ଭୁବନେଶ୍ୱର: ଭୁବନେଶ୍ବର ସିଆରପି ଛକରେ ଯାତ୍ରୀଙ୍କୁ ଆକ୍ରମଣ । ଗାଡି ସାଇଡ଼ ମରାକୁ ନେଇ ଆକ୍ରମଣ କଲେ ବସ କର୍ମଚାରୀ । ରାସ୍ତା ଉପରେ ବସ ଥୋଇ ଗଣ୍ଡଗୋଳ ଲାଗିଲେ ଯାତ୍ରୀ ଓ ବସ କର୍ମଚାରୀ । ଯାତ୍ରୀଙ୍କୁ ଆକ୍ରମଣ ପରେ ଘଟଣାସ୍ଥଳରେ ପିସିଆର ପହଞ୍ଚିଥିଲା । ନୟାପଲ୍ଲୀ ପୋଲିସ ପହଞ୍ଚି ଦୁଇ ଜଣ ବସ କର୍ମଚାରୀଙ୍କୁ ଅଟକ ରଖି ତଦନ୍ତ କରୁଛି । ଗଣ୍ଡଗୋଳ ଯୋଗୁ ଅନେକ ଗାଡ଼ିମୋଟର ଅଟକି ରହିଥିଲା । ଫଳରେ ସିଆରପି ଛକରେ କିଛି ସମୟ ପାଇଁ ରାସ୍ତା ଜାମ୍ ସ୍ଥିତି ଉପୁଜିଥିଲା ।
ଭାରତ-ମଧ୍ୟପ୍ରାଚ୍ୟ-ୟୁରୋପ ଇକୋନମିକ କରିଡରର ହେଲା ଘୋଷଣା, ଚୀନକୁ ମିଳିବ ଜବାବ
ନୂଆଦିଲ୍ଲୀ: ଭାରତ, ଆମେରିକା, ସାଉଦୀ ଆରବ ଏବଂ ୟୁରୋପୀୟ ସଂଘ ଶନିବାର ଜି-୨୦ ଶିଖର ସମ୍ମିଳନୀ ଅବସରରରେ ଏକ ବହୁରାଷ୍ଟ୍ରୀୟ ରେଳ ଏବଂ ବନ୍ଦର ପରିକଳ୍ପନାର ଘୋଷଣା କରିଛନ୍ତି । ଏହି ଘୋଷଣାକୁ ଚୀନର ମହତ୍ତ୍ୱାକାଂକ୍ଷୀ ବେଲ୍ଟ ଆଣ୍ଡ ରୋଡ ଇନିସିଏଟିଭ (ବିଆରଆଇ)କୁ ପ୍ରତିହତ କରିବା ଉଦ୍ଦେଶ୍ୟରେ ଏହି ଘୋଷଣାକୁ ଗୁରୁତ୍ୱପୂର୍ଣ୍ଣ ବିବେଚନା କରାଯାଉଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଆମେରିକୀୟ ରାଷ୍ଟ୍ରପତି ଜୋ ବାଇଡେନ, ସାଉଦି ଆରବର କ୍ରାଉନ ପ୍ରିନ୍ସ ମହମ୍ମଦ ବିନ ସଲମାନ ଏବଂ ୟୁରୋପୀୟ ସଂଘର ନେତାଙ୍କ ସହ ଏହି ମେଗା ଭିତ୍ତିଭୂମି ଚୁକ୍ତି ଘୋଷଣା କରିଛନ୍ତି ।
ଏହି ଭାରତ-ମଧ୍ୟପ୍ରାଚ୍ୟ-ୟୁରୋପ ଅର୍ଥନୈତିକ କରିଡରର ଶୁଭାରମ୍ଭ ଏବଂ ବୈଶ୍ୱିକ ଭିତ୍ତିଭୂମିରେ ପୁଞ୍ଜି ବିନିଯୋଗ ପାଇଁ ମିଳିତ କାର୍ଯ୍ୟକ୍ରମର ଘୋଷଣା କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, ମୋର ମିତ୍ର ରାଷ୍ଟ୍ରପତି ଜୋ ବାଇଡେନଙ୍କ ସହ ମୋତେ ଏହି ଆୟୋଜନର ଅଧ୍ୟକ୍ଷତା କରି ବହୁତ ଖୁସି ଅନୁଭବ ହେଉଛି । ଆଜି ଆମେ ସମସ୍ତେ ଏକ ମହତ୍ତ୍ୱପୂର୍ଣ୍ଣ ଏବଂ ଐତିହାସିକ ଚୁକ୍ତିନାମା ହୋଇଥିବା ଦେଖିଛୁ । ଆଗାମୀ ସମୟରେ ଏହା ଭାରତ, ପଶ୍ଚିମ ଏସିଆ ଏବଂ ୟୁରୋପ ମଧ୍ୟରେ ଅର୍ଥନୈତିକ ଏକୀକରଣର ଏକ ପ୍ରଭାବଶାଳୀ ମାଧ୍ୟମ ହେବ ।
ଏହା ସମଗ୍ର ବିଶ୍ୱର ସଂଯୋଗ ଏବଂ ସ୍ଥାୟୀ ବିକାଶ ପାଇଁ ଏକ ନୂତନ ଦିଗ ଦେବ । ଆମେରିକାର ରାଷ୍ଟ୍ରପତି ଜୋ ବାଇଡେନ କହିଛନ୍ତି, ଏହି ଚୁକ୍ତି ବାସ୍ତବରେ ଏକ ବଡ଼ ଚୁକ୍ତି । ଏହା ବାସ୍ତବରେ ଏକ ବଡ଼ କଥା । ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଧନ୍ୟବାଦ ଦେବାକୁ ଚାହୁଁଛି । ଗୋଟିଏ ପୃଥିବୀ, ଗୋଟିଏ ପରିବାର, ଗୋଟିଏ ଭବିଷ୍ୟତ ହେଉଛି ଜି-୨୦ ଶିଖର ସମ୍ମିଳନୀର କେନ୍ଦ୍ରବିନ୍ଦୁ । ଏବଂ ଅନେକ ଉପାୟରେ ଏହି ମଧ୍ୟ ଏହି ସହଭାଗିତାର କେନ୍ଦ୍ରବିନ୍ଦୁ ଯାହା ବିଷୟରେ ଆମେ ଆଜି କହୁଛୁ ।
Asia Cup 2023: ଆସନ୍ତାକାଲି ଭାରତ ପାକିସ୍ତାନ ମଧ୍ୟରେ ମହାଲଢ଼େଇ
ନନ୍ଦିଘୋଷ ବ୍ୟୁରୋ: ଆସନ୍ତାକାଲି ଭାରତ ପାକିସ୍ତାନ ମଧ୍ୟରେ ମହାଲଢେଇ । ଏସିଆ କପର ସୁପର -4 ରେ ସମ୍ନାସାମ୍ନି ହେବେ ଦୁଇ ପାରମ୍ପରିକ ପ୍ରତିଦ୍ବନ୍ଦୀ । ଚଳିତ ଏସିଆ କପର ଗ୍ରୁପ ପର୍ଯ୍ୟାୟରେ ଭାରତ ପାକିସ୍ତାନ ମ୍ୟାଚ ବର୍ଷା ପାଇଁ ଧୋଇ ଯାଇଥିବା ବେଳେ ଆସନ୍ତା କାଲି ମ୍ୟାଚକୁ ଚାହିଁ ବସିଛି ସାରା ବିଶ୍ୱ । ଉଭୟ ଦଳ ସ୍ୱତନ୍ତ୍ର ରଣକୌଶଳ ସହ ପଡିଆକୁ ଓଲ୍ହାଇ ବିଜୟ ହାସଲ ପାଇଁ ଲକ୍ଷ୍ୟ ରଖିଛନ୍ତି । ଏସିଆ କପ୍ ସୁପର-୪ରେ ଆସନ୍ତାକାଲି ଖେଳାଯିବାକୁ ଥିବା ଭାରତ-ପାକିସ୍ତାନ ମ୍ୟାଚ୍ରେ ବର୍ଷା ବାଧକ ସାଜିପାରେ । ଏହାକୁ ନଜରରେ ରଖି ମ୍ୟାଚ୍ ପାଇଁ ପରବର୍ତୀ ଦିନକୁ ସଂରକ୍ଷିତ ଦିବସ ରଖାଯାଇଛି ।
ଯଦି ରବିବାର ମ୍ୟାଚ୍ ହେବା ସମ୍ଭବ ନହୁଏ, ତାହେଲେ ସେମାବାର ସଂରକ୍ଷିତ ଦିବସରେ ମ୍ୟାଚ୍ ଖେଳାଯିବାକୁ ଧାର୍ଯ୍ୟ କରାଯାଇଛି। ପ୍ରତିଯୋଗିତାରେ ଫାଇନାଲ୍ ମ୍ୟାଚ୍ ସହିତ କେବଳ ଏହି ଗୋଟିଏ ମ୍ୟାଚ୍ ପାଇଁ ସଂରକ୍ଷିତ ଦିବସ ରଖାଯାଇଛି। ଯଦିଓ ରବିବାର ଅଧାରୁ ମ୍ୟାଚ୍ ବନ୍ଦ ରୁହେ, ତାହେଲେ ଅବଶିଷ୍ଟ ମ୍ୟାଚ୍କୁ ସୋମବାର ଖେଳାଯିବ। ତେଣୁ ଦର୍ଶକମାନେ ଏହି ରୋମାଞ୍ଚଭରା ମ୍ୟାଚ୍କୁ ଉପଭୋଗ କରିବାରୁ ଆଦୌ ବଞ୍ଚିତ ହେବେ ନାହିଁ ବୋଲି ଆୟୋଜକ ପାକିସ୍ତାନ କ୍ରିକେଟ୍ ବୋର୍ଡ ପିସିବିପକ୍ଷରୁ କୁହାଯାଇଛି।
ଦଳୀୟ ବିଧାୟକ ହୋଇ ବି ବିରୋଧୀଙ୍କ ପରି କଥା କହୁଛନ୍ତି ସୌମ୍ୟ: ପ୍ରତାପ ଦେବ
ଭୁବନେଶ୍ୱର: ବିରୋଧୀଙ୍କ ଭାଷା କହୁଛନ୍ତି ବିଧାୟକ ସୌମ୍ୟ ରଞ୍ଜନ ପଟ୍ଟନାୟକ । ଦଳୀୟ ବିଧାୟକ ହୋଇ ବି ବିରୋଧୀଙ୍କ ପରି କଥା କହୁଛନ୍ତି । ୨୦୦୦ ମସିହାରୁ ବିରୋଧୀ ଯେଉଁ କଥା କହୁଛନ୍ତି ଏବେ ସୌମ୍ୟ ମଧ୍ୟ ସମାନ କଥା କହୁଛନ୍ତି । ସୌମ୍ୟଙ୍କ ଏଭଳି ମତକୁ ସମାଲୋଚନା କରିଛନ୍ତି ବିଜେଡି ସାଧାରଣ ସମ୍ପାଦକ ତଥା ଶିଳ୍ପ ମନ୍ତ୍ରୀ ପ୍ରତାପ ଦେବ । ସୌମ୍ୟଙ୍କୁ ଜବାବ ଦେଇ ପ୍ରତାପ କହିଛନ୍ତି ବିଧାୟକ ଓ ମନ୍ତ୍ରୀଙ୍କ ସମେତ ସବୁ ଜନପ୍ରତିନିଧିଙ୍କୁ ମୁଖ୍ୟମନ୍ତ୍ରୀ ସାକ୍ଷାତ କରୁଛନ୍ତି । ମାତ୍ର ସୌମ୍ୟଙ୍କ ଭଳି ପ୍ରତିଷ୍ଠିତ ବ୍ୟକ୍ତିଙ୍କୁ ମୁଖ୍ୟମନ୍ତ୍ରୀ ସାକ୍ଷାତ ନକରିବା କହିବା ଗ୍ରହଣୀୟ ନୁହେଁ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାରମ୍ବାର ରାଜ୍ୟବାସୀଙ୍କ ଭରସା ଜିତୁଛନ୍ତି । ନବୀନଙ୍କ ଲୋକପ୍ରିୟତାକୁ ବିଭିନ୍ନ ସମୟରେ ସୌମ୍ୟ ନିଜ ମୁହଁରେ ମାନିଛନ୍ତି । ହେଲେ ଏବେ ବିରୋଧୀଙ୍କ ପରି ଭାଷା କହୁଛନ୍ତି । ସୌମ୍ୟଙ୍କର ଚିନ୍ତାଧାରା କଣ ତାହା ସ୍ପଷ୍ଟ କରିବାକୁ ପ୍ରତାପ କହିଛନ୍ତି । ଯାହା କିଛି ସମସ୍ୟା ରହିଛି ତାହାକୁ ସମ୍ପାଦକୀୟରେ ନୁହେଁ ବରଂ ଦଳୀୟ ଫୋରମରେ ଉଠାଇବା ଆବଶ୍ୟକ । ସୌମ୍ୟ ମୁଖ୍ୟମନ୍ତ୍ରୀଙ୍କୁ ପରାମର୍ଶ ଦେଉଛନ୍ତି ନା ସମାଲୋଚନା କରୁଛନ୍ତି ତାହା ସ୍ପଷ୍ଟ କରନ୍ତୁ । ସୌମ୍ୟ ମନ୍ତ୍ରୀ ହେବାକୁ ଇଚ୍ଛା କରିଥିଲେ ମାତ୍ର ତାଙ୍କ ଇଚ୍ଛା ପୂରଣ ନହେବାରୁ ଏପରି କରୁଛନ୍ତି ବୋଲି ଜନସାଧାରଣ କହୁଛନ୍ତି । ଏଣୁ ସୌମ୍ୟ ତାଙ୍କ ଚିନ୍ତାଧାରାକୁ ସ୍ପଷ୍ଟ କରନ୍ତୁ ବୋଲି ପ୍ରତାପ କହିଛନ୍ତି ।
ଜି୨୦ ସମ୍ମିଳନୀରେ ନୂଆଦିଲ୍ଲୀ ଲିଡର୍ଷ ଘୋଷଣାପତ୍ରକୁ ମଞ୍ଜୁରୀ
ନୂଆଦିଲ୍ଲୀ: ଭାରତର ଅଧ୍ୟକ୍ଷତାରେ ଦିଲ୍ଲୀରେ ଚାଲିଥିବା ଜି-୨୦ ସମ୍ମିଳନୀରେ ବଡ଼ ସଫଳତା । ସମ୍ମଳିନୀରେ ନୂଆଦିଲ୍ଲୀ ଲିଡର୍ସ ଘୋଷଣାପତ୍ରକୁ ମଞ୍ଜୁରୀ ମିଳିଛି । ଗ୍ରୁପ ୨୦ ସମ୍ମିଳନୀରେ ଶାନ୍ତି ଓ ସ୍ଥିରତାର ବାର୍ତ୍ତା । ନୂଆଦିଲ୍ଲୀ ଘୋଷଣାନାମାରେ ଆଣବିକ ଅସ୍ତ୍ରଶସ୍ତ୍ରର ବ୍ୟବହାରକୁ ନା । ଋଷ-ୟୁକ୍ରେନ ଯୁଦ୍ଧର ସ୍ଥାୟୀ ଶାନ୍ତିପୂର୍ଣ୍ଣ ସମାଧାନ, ସୀମାଗତ ସଂହତିର ସୁରକ୍ଷା ଘୋଷଣାନାମାରେ ସ୍ଥାନ ପାଇଛି । ଫୋର ‘ପି’କୁ ଘୋଷଣାନାମାରେ ଦିଆଯାଇଛି ଗୁରୁତ୍ବ । ତାହାହେଲା ପ୍ଲାନେଟ, ପିପୁଲ, ପିସ୍ ଓ ପ୍ରସପରିଟି । ଶକ୍ତିଶାଳୀ, ସହନଶୀଳ, ଭାରସାମ୍ୟମୂଳକ ଓ ଅନ୍ତର୍ଭୁକ୍ତିମୂଳକ ଅଭିବୃଦ୍ଧିକୁ କରାଯାଇଛି ସ୍ଥାନୀତ । ପ୍ରଗତିଶୀଳ ଅଭିବୃଦ୍ଧି, ସହନଶୀଳ ଭବିଷ୍ୟତ ଲାଗି ସବୁଜ ବିକାଶ ଚୁକ୍ତି, ଏକବିଂଶ ଶତାବ୍ଦୀ ଲାଗି ବହୁପାକ୍ଷିତ ପ୍ରତିଷ୍ଠାନ ବ୍ୟବସ୍ଥା, ବହୁମୁଖୀ ସମ୍ପର୍କକୁ ଅଧିକ ଶକ୍ତିଶାଳୀ କରିବା ଆଦି ପ୍ରସଙ୍ଗ ଘୋଷଣାନାମାରେ ହୋଇଛି ସ୍ଥାନୀତ । ଭାରତର ପ୍ରସ୍ତାବକୁ ସମସ୍ତ ସଦସ୍ୟ ରାଷ୍ଟ୍ର ଜଣାଇଛନ୍ତି ସହମତି ।
ଘୋଷଣା ପତ୍ରରେ କେଉଁ କେଉଁ ବିଷୟ ଉପରେ ଆଧାରିତ ରହିଛି?
– ଶକ୍ତିଶାଳୀ, ନିରନ୍ତର, ସମତୁଲ ଓ ସମାବେଶୀ ଅଭିବୃଦ୍ଧି
– ନିରନ୍ତର ବିକାଶ ଲକ୍ଷ୍ୟର ଗତିକୁ ତ୍ୱରାନ୍ୱିତ କରିବା
– ଉତ୍ତମ ଭବିଷ୍ୟତ ପାଇଁ ସବୁଜ ବିକାଶ ଚୁକ୍ତି
– ଏକବିଂଶ ଶତାବ୍ଦୀ ପାଇଁ ମଲ୍ଟିଲାଟେରାଲ ଇନଷ୍ଟିଚ୍ୟୁସନ୍ସ
– ବହୁପକ୍ଷବାଦକୁ ପୁର୍ନଜୀବିତ କରିବା ଉପରେ ଜୋର
ଭାରତ ଶନିବାର ଜି୨୦ ଦେଶ ଗୁଡ଼ିକ ମଧ୍ୟରେ ଗ୍ରୁପର ଦୁଇଦିବସୀୟ ଶିଖର ସମ୍ମିଳନୀର ଶେଷରେ ଜାରି ହେବାକୁଥିବା ନେତାମାନଙ୍କ ଘୋଷଣାପତ୍ରରେ ୟୁକ୍ରେନ ସଂଘର୍ଷର ଉଲ୍ଲେଖ କରିବା ପାଇଁ ଏକ ନୂଆ ପାରାଗ୍ରାଫ ସେୟାର କରିଥିଲା । ୟୁକ୍ରେନ ସଂଘର୍ଷ ସହ ସମ୍ବନ୍ଧିତ ପାରାଗ୍ରାଫ ଉପରେ ସାଧାରଣ ସହମତି ନହେବା କାରଣରୁ ଭାରତ ଶୁକ୍ରବାର ଭୂ-ରାଜନୀତିକ ପ୍ରସଙ୍ଗ ସହ ସମ୍ବନ୍ଧିତ ପାରାଗ୍ରାଫ ବିନା ହିଁ ସଦସ୍ୟ ଦେଶଗୁଡ଼ିକ ମଧ୍ୟରେ ଶିଖର ସମ୍ମିଳନୀର ସଂଯୁକ୍ତ ଘୋଷଣାପତ୍ରର ଏକ ମସୁଧା ସେୟାର କରିଥିଲା, ଯାହାଫଳରେ ସକରାତ୍ମକ ପରିଣାମ ବାହାରିପାରିବ ।
ୟୁକ୍ରେନ ଉପରେ ଭାରତ ପକ୍ଷରୁ ଘୋଷଣାପତ୍ରରେ ନୂଆ ପାଠ ସେବେ ସେୟାର କରାଯାଇଥିଲା ଯେବେ ଜି୨୦ ନେତାମାନେ ଶିଖର ସମ୍ମିଳନୀର ପ୍ରଥମ ଦିନରେ ଗୁରୁତ୍ୱପୂର୍ଣ୍ଣ ବିଶ୍ୱ ଆହ୍ୱାନ ଉପରେ ବିଚାର ବିମର୍ଶ ଆରମ୍ଭ କରିଥିଲେ । ଗତ ତିନି-ଛଅ ଡିସେମ୍ବର ପର୍ଯ୍ୟନ୍ତ ହରିୟାଣାର ନୁହ ଜିଲ୍ଲାରେ ଅନୁଷ୍ଠିତ ହୋଇଥିବା ଜି୨୦ ଶେରପା ବୈଠକରେ ୟୁକ୍ରେନ ପ୍ରସଙ୍ଗର ଉଲ୍ଲେଖ କରୁଥିବା ପାଠ ଉପରେ କୌଣସି ସହମତି ହୋଇପାରିନଥିଲା ।
ପୁଣି ଆସୁଛି ଆଉ ଏକ ଘୂର୍ଣ୍ଣିବଳୟ, ବର୍ଷାରେ ଲାଗିବନି ବ୍ରେକ୍
ଭୁବନେଶ୍ୱର: ବର୍ଷାରେ ଲାଗିବନି ବ୍ରେକ୍ । ସେପ୍ଟେମ୍ବର ପ୍ରଥମ ସପ୍ତାହରେ ପ୍ରବଳ କାଚିବା ପରେ ପୁଣି ଆସୁଛି ଆଉ ଏକ ଘୂର୍ଣ୍ଣିବଳୟ । ୧୨ରେ ଘୂର୍ଣ୍ଣିବଳୟ । ଆସନ୍ତା ୧୨ ତାରିଖ ବେଳକୁ ଉତ୍ତର-ପଶ୍ଚିମ ପାର୍ଶ୍ଵବର୍ତ୍ତୀ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ଅଛି । ଏହାର ପ୍ରଭାବରେ ୧୨ ତାରିଖରୁ ରାଜ୍ୟରେ ବର୍ଷାର ପରିମାଣ ଏବଂ ବିସ୍ତୃତି ବଢ଼ିବ । ଗତ ୨୪ ଘଣ୍ଟାରେ ରାଜ୍ୟରେ ୩ ଦଶମିକ ୪ ମିଲିମିଟର ବର୍ଷା ରେକର୍ଡ କରାଯାଇଛି । ଯାହା ସ୍ୱାଭାବିକ ବର୍ଷା ୮ ଦଶମିକ ୪ ମିଲିମିଟରର ତୁଳନାରେ ୬୦ପ୍ରତିଶତ କମ୍ ।
ଫେସବୁକରେ ଶ୍ରୀଧରରୁ ଶିବାନୀ ହୋଇ ଠକିଥିଲା ୩୫ ଲକ୍ଷ, ଏବେ ବାନ୍ଧିଲା ସାଇବର ପୋଲିସ
ଭୁବନେଶ୍ୱର: ସାଇବର ଥାନା ପୋଲିସ ହାତରେ ସିଷ୍ଟର ଶିବାନୀ । ଠକେଇ ପାଇଁ ଗାର୍ଲଫ୍ରେଣ୍ଡକୁ ମୋହରା । ଧନ ସୁନା କହୁଥିଲେ, ହେଲେ ଧରା ଦେଉନଥିଲେ। ବାପାଙ୍କ ଦେହ ଖରାପ କହି ବାହାନା କରୁଥିଲେ । ଠକ ଜଣକ ଯୁବତୀ ନଥିଲେ ଥିଲେ ଯୁବକ। ଏଭଳି ଏକ ଠକକୁ ଗିରଫ କରିଛି ସାଇବର ଥାନା ପୋଲିସ । 35 ଲକ୍ଷ ଟଙ୍କା ଠକେଇ ଅଭିଯୋଗରେ ଅଭିଯୁକ୍ତକୁ ଗିରଫ କରାଯାଇଛି । ଅଭିଯୁକ୍ତ ହେଲେ ବ୍ରହ୍ମପୁରର ଶ୍ରୀଧର ମହାରଣା । ଫେସବୁକରେ ଶ୍ରୀଧର ବନିଯାଇଥିଲା ଶିବାନୀ ପଣ୍ଡା । ଫେକ ଆଇଡି କରି ସୁନ୍ଦରପଦାର ଅଙ୍କିତ କୁମାର ଗୁପ୍ତା ନାମକ ଜଣେ ଇଞ୍ଜିନିୟରଙ୍କୁ ଫସେଇଥିଲା ଠକ । ଯୁବକ ଜଣକ ନିଜକୁ ଡାକ୍ତରୀ ଛାତ୍ରୀ ବୋଲି ଇଞ୍ଜିନିୟରଙ୍କୁ ପରିଚୟ ଦେଇଥିଲା । ବର୍ଷେ ହେଲା ଯୁବତୀ ପରିଚୟରେ କଥା ହେଉଥିଲା ।
ଦେଖା କରିବାକୁ ଡାକିଲେ ବାହାନା କରି ଦେଖା ଦେଉନଥିଲେ । ନିଜ ଗାର୍ଲଫ୍ରେଣ୍ଡ ଦ୍ବାରା ପ୍ରେମର ଭଏସ ମେସଜ ପଠାଉଥିଲା । ବାହା ହେବା ପାଇଁ ବି କଥା ହୋଇଥିଲା । ବାପା ଆର୍ମିରେ ଥିବା କହିଥିଲା ଠକ ଶ୍ରୀଧର । ମିଛରେ ବାପାଙ୍କ ଦେଖ ଖରାପ କହି ବିଭିନ୍ନ ସମୟରେ ବାହାନା କରି ଇଞ୍ଜିନିୟରଙ୍କ ଠାରୁ ଫୋନ ପେରେ 35 ଲକ୍ଷ ଟଙ୍କା ନେଇଥିଲା । ଇଞ୍ଜିନିୟର ଜଣଙ୍କ ଠକେଇର ଶିକାର ହେବ ଜାଣିବା ପରେ ଥାନାରେ ଅଭିଯୋଗ କରିଥିଲେ। ଅଭିଯୁକ୍ତକୁ କଟକରୁ ଗିରଫ କରିଛି ପୋଲିସ । ଠକେଇ ଟଙ୍କାରେ ବେଟିଂ ଆପରେ ପ୍ରାୟ 28 ଲକ୍ଷ ଟଙ୍କା ବିନିଯୋଗ କରିଥିବା ଅଭିଯୁକ୍ତ ସ୍ବୀକାର କରିଛି । ରାକେଟରେ ଆଉ କେଉଁମାନେ ସଂପୃକ୍ତ ଅଛନ୍ତି ସନେଇ ତଦନ୍ତ କରାଯାଉଛି । ଆବଶ୍ୟକ ହେଲେ ଶ୍ରୀଧରକୁ ରିମାଣ୍ଡରେ ଆଣିବ ପୋଲିସ ।
ସ୍ୱାସ୍ଥ୍ୟ ପାଇଁ ବେଶ୍ ଉପଯୋଗୀ ହୋଇଥାଏ କନ୍ଦମୂଳ, ଖାଇବା ଦ୍ୱାରା ବଢ଼ିଥାଏ ଶରୀରର ଇମ୍ୟୁନିଟି
ନନ୍ଦିଘୋଷ ବ୍ୟୁରୋ: ସ୍ୱାସ୍ଥ୍ୟ ପାଇଁ ବେଶ୍ ଉପଯୋଗୀ ହୋଇଥାଏ କନ୍ଦମୂଳ । କନ୍ଦମୂଳ ଖାଇବା ଦ୍ୱାରା ଶରୀରର ଇମ୍ୟୁନିଟି ବଢିଥାଏ। ଏହା ସବୁ ପ୍ରକାରର ପନିପରିବା ଠାରୁ ଲାଭଦାୟକ ହୋଇଥାଏ । କେହି କେହି ଏହାକୁ ସ୍ୱିଟ ପୋଟାଟୋ ମଧ୍ୟ କହନ୍ତି । ଯେମିତି ମିଠା ଏହାର ସ୍ୱାଦ ଥାଏ ସେମିତି ଲାଭଦାୟକ ଶରୀର ପାଇଁ ହୋଇଥାଏ । ତେବେ ଜାଣନ୍ତୁ କନ୍ଦମୂଳ ଖାଇବା ଦ୍ୱାରା କେଉଁ କେଉଁ ରୋଗ ହୋଇନଥାଏ । ଆପଣ ଜାଣନ୍ତି କି, ମର୍ଯ୍ୟଦା ପୁରୁଷୋତ୍ତମ ଶ୍ରୀରାମ ୧୪ ବର୍ଷ ବନବାସ ସମୟରେ କନ୍ଦମୂଳ ଖାଇ ରହିଥିଲେ । କନ୍ଦମୂଳରେ ଭିଟାମିନ୍ ସି, କ୍ୟାଲସିୟମ୍, ଆଇରନ୍ ଏବଂ ଫାଇବର ବ୍ୟତିତ ବିଟା କ୍ୟାରୋଟିନ ପ୍ରଚୁର ମାତ୍ରାରେ ମିଳିଥାଏ । ଏଥିପାଇଁ ଏହା ପ୍ରତିରକ୍ଷା ପ୍ରଣାଳୀକୁ ମଜବୁତ ବନାଇବାର କାମ କରିଥାଏ ।
କନ୍ଦମୂଳ ଖାଇବା ଦ୍ୱାରା ରୋଗ ପାଖକୁ ଆସିନଥାଏ । କନ୍ଦମୂଳରେ ଅଧିକାଂଶ ଆଇରନ ଥିବାରୁ ରକ୍ତହୀନତା ହ୍ରାସ ପାଇଥାଏ । ଅସ୍ଥାମାରୁ ରକ୍ଷା କରିଥାଏ କନ୍ଦମୂଳ । ଶରୀରକୁ ଗରମ ରଖିବା ସହ ଏଥିରେ ଥିବା ଭିଟାମିନ ସି ଫୁସଫୁସ ଜନିତ ସମସ୍ୟାକୁ ମଧ୍ୟ ଦୂର କରିଥାଏ । ଖାଦ୍ୟ ହଜମ ପାଇଁ ଶରୀରରେ ଫାଇବର ରହିବା ନିହାତି ଜରୁରୀ ହୋଇଥାଏ । କନ୍ଦମୂଳ ଫାଇବର ଯୁକ୍ତ ଭୋଜନ ଅଟେ। କନ୍ଦମୂଳ ସ୍ବାଦିଷ୍ଟ ହୋଇଥାଏ ଏବଂ ଏଥିରେ ଫାଇବର ଅଧିକ ମାତ୍ରାରେ ଥାଏ । ଏଥିପାଇଁ ଏହା ପାଚନ ତନ୍ତ୍ର ପାଇଁ ଭଲ ହୋଇଥାଏ । କନ୍ଦମୂଳ ଖାଇବା ଦ୍ୱାରା ଶରୀରର ଓଜନ ହ୍ରାସ କରିବାରେ ସାହାର୍ଯ୍ୟ କରିଥାଏ । ଏହାସହ ବ୍ଲଡରେ ଥିବା ଦୂଷିତ କୋଲେଷ୍ଟ୍ରୋଲ କମିବାକୁ ଲାଗିଥାଏ । ଏବଂ ହାଡ ମଜବୁତ କରିଥାଏ ।
ବିଶ୍ୱ ଦରବାରରେ ବଢିଲା ଓଡ଼ିଶାର ଗୌରବ, ଜି୨୦ ସମ୍ମିଳନୀରେ କୋଣାର୍କର ଚାରୁକଳା ଦେଖିଲା ବିଶ୍ୱ
ନୂଆଦିଲ୍ଲୀ: ବିଶ୍ବ ଦରବାରରେ ବଢିଲା ଓଡ଼ିଶାର ଗୌରବ । ଉତ୍କଳୀୟ କଳାର ଅନ୍ୟତମ ପ୍ରାଣକେନ୍ଦ୍ର କୁହାଯାଉଥିବା କୋଣାର୍କର ଚାରୁକଳାକୁ ଦେଖିଛି ବିଶ୍ବ । ନୂଆଦିଲ୍ଲୀରେ ଆୟୋଜିତ ଗ୍ରୁପ ୨୦ ସମ୍ମିଳନୀ ଅବସରରେ କୋଣାର୍କର ଏକ ଚକର ପ୍ରତିକୃତି ବ୍ୟାକଡ୍ରପରେ ବିଶ୍ବ ନେତାଙ୍କୁ ସ୍ବାଗତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆମେରିକା ରାଷ୍ଟ୍ରପତି ଜୋ ବାଇଡେନ, ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକଙ୍କ ସମେତ ବହୁ ନେତାଙ୍କୁ ସେ ସ୍ବାଗତ କରିଛନ୍ତି ।
ଚାରୁକାରୁକଳାର ବିମୁଗ୍ଧ ସଂରଚନା ଦେଖି ଅଭିଭୂତ ହୋଇଥିଲେ ଅତିଥି । ଆମେରିକା ରାଷ୍ଟ୍ରପତି ବାଇଡେନଙ୍କୁ କଳାକୃତି ସମ୍ପର୍କରେ ବୁଝାଇଥିଲେ ମୋଦି । ପ୍ରଗତି ମଇଦାନ ସ୍ଥିତ ଭାରତ ମଣ୍ଡପର ଏକ ସ୍ବତନ୍ତ୍ର ସ୍ଥାନରେ ଅବସ୍ଥାପିତ ହୋଇଥିଲା ବିଶ୍ବପ୍ରସିଦ୍ଧ କୋଣାର୍କର ଚକ । ତ୍ରୟୋଦଶ ଶତାବ୍ଦୀରେ ନିର୍ମିତ ବିଶ୍ବପ୍ରସିଦ୍ଧ କୋଣାର୍କକୁ ପ୍ରତିବର୍ଷ ଦେଶବିଦଶର ଲକ୍ଷ ଲକ୍ଷ ପର୍ଯ୍ୟଟକ ଆସୁଥିବାବେଳେ ଖୁବ୍ ନିକଟରୁ ପ୍ରସିଦ୍ଧ କଳାର ଝଲକ ଦେଖି ବିମୋହିତ ହୋଇଥିଲେ ବିଶ୍ବନେତା ।
ଭାରତର ପ୍ରସ୍ତାବ କ୍ରମେ ଜି-୨୦ର ସ୍ଥାୟୀ ସଦସ୍ୟ ହେଲା ଆଫ୍ରିକାନ ୟୁନିୟନ
ନୂଆଦିଲ୍ଲୀ: ଭାରତରେ ଶନିବାର ଜି-୨୦ ଶିଖର ସମ୍ମିଳନୀର ଦୁଇ ଦିବସୀୟ ଅଧିବେଶନର ଉଦଘାଟନ ହୋଇଯାଇଛି । ପ୍ରଧାନମନ୍ତ୍ରୀ ମୋଦି ଏହି ସମ୍ମିଳନୀରେ ଭାଗ ନେବାକୁ ଆସିଥିବା ପ୍ରତିନିଧି ଏବଂ ରାଷ୍ଟ୍ରଅଧ୍ୟକ୍ଷଙ୍କୁ ଆୟୋଜନ ସ୍ଥଳ ଭାରତ ମଣ୍ଡପମରେ ସ୍ୱାଗତ କରିଥିଲେ । ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ଏହି ଗ୍ରୁପ ୨୦ ମହାକୁମ୍ଭ ଜାରି ରହିଛି । ମହାସମ୍ମିଳନୀରେ ନୂଆଦିଲ୍ଲୀ ଘୋଷଣାନାମା ହୋଇଛି ଗୃହିତ । ବିଭିନ୍ନ ଦ୍ବିପାକ୍ଷିକ ସମ୍ପର୍କ, ସହଭାଗିତା, ସାମ୍ପ୍ରତିକ ରାଜନୈତିକ ସ୍ଥିତି, ଅର୍ଥନୈତିକ ସହଯୋଗ ଆଦି ପ୍ରସଙ୍ଗରେ ସଦସ୍ୟ ରାଷ୍ଟ୍ର ରଖିଛନ୍ତି ମତ । ତେଣେ ଏକ ଐତିହାସିକ ଘଟଣାକ୍ରମେ ଆଫ୍ରିକାନ ୟୁନିଅନକୁ ଗ୍ରୁପ ୨୦ରେ କରାଯାଇଛି ସାମିଲ ।
ପ୍ରଧାନମନ୍ତ୍ରୀ ମୋଦି ଉଦଘାଟନୀ ଭାଷଣ ସହ ଏହି ସମ୍ମିଳନୀର ଏଜେଣ୍ଡା ନିର୍ଦ୍ଧାରିତ କରିଥିଲେ ଏବଂ ଶେଷରେ ସେ ଦୁଇଥର ହାତୁଡ଼ି ଟେବୁଲ ଉପରେ ମାରିଥିଲେ ଏଥିସହିତ ଜଣେ ବ୍ୟକ୍ତି ଆସିଥିଲେ ଏବଂ ସମ୍ପୂର୍ଣ୍ଣ ହଲ୍ ତାଳିରେ ଗୁଞ୍ଜରିତ ହୋଇ ଉଠିଥିଲା । ସେହି ବ୍ୟକ୍ତିଜଣଙ୍କୁ ପ୍ରଧାନମନ୍ତ୍ରୀ କରମର୍ଦ୍ଦନ କରିଥିଲେ । ତେବେ ସେହି ବ୍ୟକ୍ତି ଆଉ କେହି ନୁହନ୍ତି ବରଂ ୫୫ ଆଫ୍ରିକୀୟ ଦେଶର ସଂଘର ପ୍ରତିନିଧିତ୍ୱ କରୁଥିବା ଆଫ୍ରିକୀୟ ୟୁନିୟନର ଅଧ୍ୟକ୍ଷ ଅଜାଲି ଅସୌମାନୀ ଥିଲେ । ପ୍ରଧାନମନ୍ତ୍ରୀ ଶନିବାର ଆଫ୍ରିକୀୟ ୟୁନିୟନକୁ ଅଫିସିଆଲ ଭାବେ ଜି୨୦ର ସ୍ଥାୟୀ ସଦସ୍ୟ ବନାଇବାକୁ ନେଇ ପକ୍ଷ ରଖିବା ସହ ପ୍ରସ୍ତାବ ଆଗତ କରିଥିଲେ ।
ଏହି ପ୍ରସ୍ତାବକୁ ସମସ୍ତ ଦେଶ ଏକମତରେ ସ୍ୱୀକାର କରିଥିଲେ । ପ୍ରଧାନମନ୍ତ୍ରୀ ମୋଦି ମଧ୍ୟ ପରମ୍ପରା ମୁତାବିକ ପ୍ରେସିଡେଣ୍ଟ ହିସାବରେ ଦୁଇଥର ହାତୁଡ଼ି ପିଟି ଏହାର ଅଧିକାରିକ ପୃଷ୍ଟି କରିଥିଲେ । ସେ ଏପରି କରିବା କ୍ଷଣି ସମ୍ପୂର୍ଣ୍ଣ ହଲ୍ ତାଳିରେ ଫାଟିପଡ଼ିଥିଲା । ଏଥିସହିତ ହିଁ ବିଦେଶ ମନ୍ତ୍ରୀ ଏସ୍ ଜୟଶଙ୍କର ଅଜାଲୀ ଅସୌମାନୀଙ୍କ ପାଖକୁ ଆସିଥିଲେ ଏବଂ ତାଙ୍କୁ ଜି୨୦ର ଗୋଲ୍ ଟେବୁଲର ସ୍ଥାୟୀ ସଦସ୍ୟଙ୍କ ପ୍ରଥମ ପଙ୍କତିରେ ବସାଇ ଦେଇଥିଲେ । ତେବେ ଆଫ୍ରିକାନ ୟୁନିୟନ ଜି-୨୦ରେ ସାମିଲ ହେବା ଏକ ବଡ଼ ସଫଳତା ବୋଲି ମଣାଯାଉଛି । କାରଣ ୫୫ ଆଫ୍ରିକୀୟ ଦେଶର ପ୍ରତିନିଧିତ୍ୱ କରୁଛି ଆଫ୍ରିକାନ ୟୁନିୟନ (ଏୟୁ) ।
ଯାହା କି ମୋଟ ଜୈବ ବିବିଧତାର ଏକ ବଡ଼ ଭାଗର ପ୍ରତିନିଧିତ୍ୱ କରିଥାଏ । ୨୧ତମ ଶତାବ୍ଦୀରେ ଜଳବାୟୁ ପରିବର୍ତ୍ତନର ଆହ୍ୱାନକୁ ପୂରଣ କରିବା ପାଇଁ ବିଶ୍ୱର ଆବଶ୍ୟକତାକୁ ପୂରଣ କରିବା ପାଇଁ ଏୟୁର ସମସ୍ତ ମାଧ୍ୟମ ଉପଲବ୍ଧ ରହିଛି । ଆଫ୍ରିକୀୟ ମହାଦେଶରେ ବିଶ୍ୱର ଅକ୍ଷୟ ଶକ୍ତିର ୬୦ ପ୍ରତିଶତ ଉତ୍ପାଦନ ପାଇଁ ଆବଶ୍ୟକୀୟ କଞ୍ଚାମାଲ ରହିଛି । ଏଥିରେ ୩୦ ପ୍ରତିଶତରୁ ଅଧିକ ଖଣିଜ ପ୍ରଦାର୍ଥ ଅଛି ଯାହା ଅକ୍ଷୟ ଏବଂ ନିମ୍ନ ଅଙ୍ଗାରକାମ୍ଳ ପ୍ରଯୁକ୍ତିବିଦ୍ୟା ପାଇଁ ଗୁରୁତ୍ୱପୂର୍ଣ୍ଣ । ତେଣୁ ଆଫ୍ରିକୀୟ ୟୁନିୟନର ମୁଖ୍ୟ ସ୍ରୋତରେ ଯୋଗଦେବା ବିଶ୍ୱ ତଥା ଆଫ୍ରିକା ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବ ।