ଦିନିକିଆ ବିଶ୍ପକପ୍: ସେମିଫାଇନାଲ ଲାଇନ୍ ଅପ୍ ପକ୍କା, ଜାଣନ୍ତୁ କାହା ସହ କାହାର ଟକ୍କର ?

ନୂଆଦିଲ୍ଲୀ: ଇଂଲଣ୍ଡ ବିପକ୍ଷ ମ୍ୟାଚରେ ପାକିସ୍ତାନ ଫିଲ୍ଡକୁ ଓହ୍ଲାଇବା ପୂର୍ବରୁ ବିଶ୍ବକପ୍ ସେମିଫାଇନାଲ ରେସରୁ ଏକ ପ୍ରକାର ବାହାର ହୋଇଯାଇଛି । ପାକିସ୍ତାନ ଓ ଇଂଲଣ୍ଡ ମଧ୍ୟରେ ମ୍ୟାଚ୍ କେବଳ ଏକ ଔପଚାରିତା ରହି ଯାଇଥିବା ବେଳେ ୨୦୨୩ ବିଶ୍ବକପର ଚାରି ସେମିଫାଇନାଲିଷ୍ଟ ସ୍ଥିର ହୋଇ ସାରିଛି । ଭାରତ ସମେତ ନ୍ୟୁଜିଲାଣ୍ଡ, ଦକ୍ଷିଣ ଆଫ୍ରିକା ଓ ଆଷ୍ଟ୍ରେଲିଆ ମଧ୍ୟରେ ହେବ ସେମିଫାଇନାଲ ଟକ୍କର ।

କେମିତି ପାକିସ୍ତାନ ସେମିଫାଇନାଲ ରେସରୁ ହେଲା ବାହାର ?

ଆଜି ପାକିସ୍ତାନ ଓ ଇଂଲଣ୍ଡ ମଧ୍ୟରେ ବିଶ୍ବକପର ୪୪ ତମ ମ୍ୟାଚ ଆଜି ଖେଳାଯାଉଛି । ଟସ୍ ଜିତି ଇଂଲଣ୍ଡ ବ୍ୟାଟିଂ ନିଷ୍ପତ୍ତି ନେଇଛି । ସୂଚନାଯୋଗ୍ୟ, ବୋଲିଂ ଆରମ୍ଭ କରିବା ପୂର୍ବରୁ ପାକିସ୍ତାନ ଓ୍ବାଲର୍ଡ କପରୁ ବାହାର ହୋଇଯାଇଛି । କାରଣ, ପାକିସ୍ତାନ ସେମିଫାଇନାଲରେ ପହଞ୍ଚିବାକୁ ହେଲେ ଇଂଲଣ୍ଡକୁ ଏକ ବଡ଼ ବ୍ୟବଧାନରେ ହରାଇବାକୁ ପଡ଼ିବ । ଏବେ ପାକିସ୍ତାନକୁ ଲକ୍ଷ୍ୟର ପିଛା କରି ୨୮୪ ବଲ୍ ପୂର୍ବରୁ ମ୍ୟାଚ ଜିତିବାକୁ ପଡ଼ିବ । ଅର୍ଥାତ ଇଂଲଣ୍ଡ ଯାହା ଟାର୍ଗେଟ ଦେବ ପାକିସ୍ତାନକୁ ମାତ୍ର ୩ ଓଭରରେ ହାସଲ କରିବାକୁ ପଡ଼ିବ । ଏହାର ଅର୍ଥ, ମ୍ୟାଚର ଫଳାଫଳ ଯାହା ବି ହେଉ, ପାକିସ୍ତାନ ସେମିଫାଇନାଲ ରେସରୁ ଆଉଟ୍ ।

ଚାରି ସେମିଫାଇନାଲିଷ୍ଟ

ବିଶ୍ବକପରେ ୮ରୁ ୮ଟି ମ୍ୟାଚ ଜିତି ପଏଣ୍ଟ ତାଲିକାର ଏକ ନମ୍ବରରେ ଥିବା ଭାରତ ପ୍ରଥମ ଦଳ ଭାବେ ସେମିଫାଇନାଲ ଟିକେଟ୍ କାଟିଥିଲା । ସ୍ବିତୀୟ ଦଳ ଭାବେ ଦକ୍ଷିଣ ଆଫ୍ରିକା ସେମିଫାଇନାଲକୁ ଯାଇଥିଲା । ଦକ୍ଷିଣ ଆଫ୍ରିକା ୯ଟିରୁ ୭ଟି ମ୍ୟାଚ୍ ଜିତିଛି ।

ସେହିପରି ଆଫଗାନିସ୍ତାନକୁ ହରାଇ ତୃତୀୟ ଦଳ ଭାବେ ଆଷ୍ଟ୍ରେଲିଆ ସେମିଫାଇନାଲକୁ କ୍ବାଲିଫାଏ କରିଛି । ହେଲେ ୨୩ ବିଶ୍ବକପରେ ଚତୁର୍ଥ ସେମିଫାଇନାଲିଷ୍ଟକୁ ନେଇ ସସପେନ୍ସ ଲାଗି ରହିଥିଲା । ଏମିତି ସ୍ଥିତିରେ ପାକିସ୍ତାନ-ଇଂଲଣ୍ଡ ମ୍ୟାଚ ଶେଷ ହେବା ପୂର୍ବରୁ ନ୍ୟୁଜିଲାଣ୍ଡ ଚତୁର୍ଥ ଦଳ ଭାବେ ସେମିଫାଇନାଲରେ ପ୍ରବେଶ କରିଛି । କାରଣ ପାକିସ୍ତାନକୁ ଏତେ ବଡ଼ ବ୍ୟବଧାନରେ ଜିତିବା ଅସମ୍ଭବ ।

ସେମିଆାଇନାଲ ସିଡ୍ୟୁଲ

ଭାରତ ବନାମ ନ୍ୟୁଜିଲାଣ୍ଡ – ନଭେମ୍ବର ୧୫, ମୁମ୍ବାଇ, ଓ୍ବାଙ୍ଖଡେ ଷ୍ଟାଡିୟମ

ଦକ୍ଷିଣ ଆଫ୍ରିକା ବନାମ ଆଷ୍ଟ୍ରେଲିଆ– ନଭେମ୍ବର ୧୬, କୋଲକାତା, ଇଡେନ ଗାର୍ଡେନ

ଫାଇନାଲ– ୧୯ ନଭେମ୍ବର, ଅହମ୍ମଦାବାଦ, ନରେନ୍ଦ୍ର ମୋଦି ଷ୍ଟାଡିୟମ