spot_img
Home Blog Page 2757

ପୁଣିଥରେ ଭାରତୀୟ ଦଳର ମୁଖ୍ୟ ପ୍ରଶିକ୍ଷକ ଦାୟିତ୍ୱ ପାଇଲେ ରାହୁଲ ଦ୍ରାବିଡ

ନନ୍ଦିଘୋଷ ବ୍ୟୁରୋ : ୨୦୨୩ ବିଶ୍ୱକପ୍‌ରେ ପରାଜୟ ପରେ ଟିମ୍ ଇଣ୍ଡିଆର ମୁଖ୍ୟ ପ୍ରଶିକ୍ଷକ ପରିବର୍ତ୍ତନ ହେବ କି ନାହିଁ ପ୍ରଶ୍ନର ଉତ୍ତର ଦେଇଛି ବିସିସିଆଇ । ବୁଧବାର ଏକ ବଡ ଘୋଷଣା କରି ବିସିସିଆଇ ରାହୁଲ ଦ୍ରାବିଡଙ୍କୁ ମୁଖ୍ୟ ପ୍ରଶିକ୍ଷକ ଭାବରେ ରଖିଛି ।  ବିଶ୍ୱକପ ଫାଇନାଲ ପରେ ରାହୁଲ ଦ୍ରାବିଡଙ୍କ ଚୁକ୍ତି ଶେଷ ହୋଇଛି । ରାହୁଲ ଦ୍ରାବିଡଙ୍କ ସ୍ଥାନରେ ଭିଭିଏସ୍ ଲକ୍ଷ୍ମଣଙ୍କୁ କୋଚ୍ କରାଯାଇପାରିବ ବୋଲି କଳ୍ପନାଜଳ୍ପନା କରାଯାଇଥିଲା କିନ୍ତୁ ତାହା ହୋଇ ନାହିଁ । ରାହୁଲ ଦ୍ରାବିଡ ବର୍ତ୍ତମାନ ଟିମ୍ ଇଣ୍ଡିଆ ସହିତ ଦକ୍ଷିଣ ଆଫ୍ରିକା ଗସ୍ତରେ ଯିବେ।

ବିଶ୍ୱାସ ପାଇଁ ଧନ୍ୟବାଦ : ରାହୁଲ ଦ୍ରାବିଡ

ପୁନର୍ବାର ମୁଖ୍ୟ ପ୍ରଶିକ୍ଷକଙ୍କ ଦାୟିତ୍ୱ ପାଇ ରାହୁଲ ଦ୍ରାବିଡ ଖୁସି ବ୍ୟକ୍ତ କରିଛନ୍ତି। ସେ କହିଛନ୍ତି ଯେ ବିସିସିଆଇ ତାଙ୍କ ଉପରେ ବିଶ୍ୱାସ ରଖିଥିବାରୁ ସେ କୃତଜ୍ଞ । ରାହୁଲ ଦ୍ରାବିଡ କହିଛନ୍ତି ଯେ ବିସିସିଆଇ ତାଙ୍କ ଯୋଜନା ଏବଂ ପ୍ରଦର୍ଶନକୁ ସର୍ବଦା ସମର୍ଥନ କରିଆସୁଛି । ରାହୁଲ ଦ୍ରାବିଡ ତାଙ୍କ ପରିବାରକୁ ମଧ୍ୟ ଧନ୍ୟବାଦ ଜଣାଇଛନ୍ତି ଯେଉଁମାନେ ତାଙ୍କ ପାଇଁ ଅନେକ ବଳିଦାନ ଦେଇଛନ୍ତି। ରାହୁଲ ଦ୍ରାବିଡ କହିଛନ୍ତି ଯେ ବିଶ୍ୱକପ ପରେ ତାଙ୍କ ସାମ୍ନାରେ ନୂଆ ଚ୍ୟାଲେଞ୍ଜ ରହିଛି ଏବଂ ସେ ସେମାନଙ୍କୁ ସାମ୍ନା କରିବାକୁ ସେ ପ୍ରସ୍ତୁତ ଅଛନ୍ତି ।

ଦ୍ରାବିଡଙ୍କୁ ପୁଣିଥରେ କାହିଁକି ମିଳିଲା ମୁଖ୍ୟ ପ୍ରଶିକ୍ଷକ ଦାୟିତ୍ୱ ?

ବିସିସିଆଇ ସଭାପତି ରୋଜର ବିନି ଏବଂ ସଚିବ ଜୟ ଶାହା ମଧ୍ୟ ରାହୁଲ ଦ୍ରାବିଡଙ୍କୁ ଟିମ୍ ଇଣ୍ଡିଆ ସହ ଥିବାରୁ ଧନ୍ୟବାଦ ଅର୍ପଣ କରିଛନ୍ତି । ଜୟ ଶାହା କହିଛନ୍ତି ଯେ ଦ୍ରାବିଡଙ୍କ କାର୍ଯ୍ୟକାଳ ଆଶ୍ଚର୍ଯ୍ୟଜନକ ହୋଇଛି । ବିଶ୍ୱକପ୍‌ରେ ଟିମ୍ ଇଣ୍ଡିଆ କ୍ରମାଗତ ୧୦ ଟି ମ୍ୟାଚ୍ ଜିତି ନିଜର ଚମତ୍କାର ପ୍ରମାଣ କରିଛି ଏବଂ ଏଥିରେ ରାହୁଲ ଦ୍ରାବିଡଙ୍କର ଏକ ପ୍ରମୁଖ ଭୂମିକା ରହିଛି । ଜୟ ଶାହା କହିଛନ୍ତି ଯେ ଏହି ପ୍ରଦର୍ଶନ ଯୋଗୁଁ ରାହୁଲ ଦ୍ରାବିଡ଼ ପୁଣିଥରେ ମୁଖ୍ୟ ପ୍ରଶିକ୍ଷକ ହେବାକୁ ଯୋଗ୍ୟ । ଆଗକୁ ଯିବାକୁ ରାହୁଲ ଦ୍ରାବିଡଙ୍କୁ ସମସ୍ତ ସମ୍ଭାବ୍ୟ ସହାୟତା ଦିଆଯିବ ବୋଲି ବିସିସିଆଇ ସଭାପତି କହିଛନ୍ତି।

ରାହୁଲ ଦ୍ରାବିଡଙ୍କ ସାମ୍ନାରେ ବଡ ଚ୍ୟାଲେଞ୍ଜ

ମୁଖ୍ୟ ପ୍ରଶିକ୍ଷକ ଭାବରେ ରାହୁଲ ଦ୍ରାବିଡଙ୍କ ଚୁକ୍ତି କେତେ ଦିନ ବୃଦ୍ଧି କରାଯାଇଛି ତାହା ପ୍ରକାଶ କରାଯାଇ ନାହିଁ, କିନ୍ତୁ ଏଥିରୁ ସ୍ପଷ୍ଟ ହୋଇଛି ଯେ ସେ ଏକ ବଡ ଚ୍ୟାଲେଞ୍ଜର ସମ୍ମୁଖୀନ ହୋଇଛନ୍ତି । ବାସ୍ତବରେ, ଆସନ୍ତା ବର୍ଷ ଜୁନରେ ଟି -20 ବିଶ୍ୱକପ୍ ଅନୁଷ୍ଠିତ ହେବ ଏବଂ ଭାରତର ଆଇସିସି ଟ୍ରଫି ମରୁଡ଼ି ଶେଷ କରିବା ପାଇଁ ଦ୍ରାବିଡଙ୍କ ଉପରେ ପୁଣି ଥରେ ଦାୟିତ୍ୱ ରହିଛି ।

 

ଚୀନରେ ବ୍ୟାପୁଥିବା ନିମୋନିଆକୁ ନଜରରେ ରଖି ଭାରତରେ ଆଲର୍ଟ…

ନୂଆଦିଲ୍ଲୀ: ଚୀନରେ ଶିଶୁମାନଙ୍କ ମଧ୍ୟରେ ବଢିଚାଲିଥିବା ନିମୋନିଆ ବିପଦକୁ ନେଇ ଭାରତରେ ଆଲର୍ଟ ଜାରି। ୬ ରାଜ୍ୟରେ ଜାରି ହୋଇଛି ଆଲର୍ଟ। ରାଜସ୍ଥାନ, କର୍ଣ୍ଣାଟକ, ଗୁଜରାଟ, ଉତ୍ତରାଖଣ୍ଡ, ହରିୟାଣା ଏବଂ ତାମିଲନାଡୁର ସରକାର ସତର୍କତା ଜାରି କରିଛନ୍ତି। ଏହି ସବୁ ରାଜ୍ୟ ଗୁଡିକରେ ନିମୋନିଆ ଚିକିତ୍ସା ଲାଗି ହସ୍ପିଟାଲ ଗୁଡିକ ପ୍ରସ୍ତୁତ ରଖିବାକୁ ସେଠାକାର ସରକାର ଆଲର୍ଟ ଜାରି କରିଛନ୍ତି।

ଏହାସହ ଶ୍ବାସ ଜନିତ ରୋଗରେ ପୀଡ଼ିତଙ୍କ ଚିକିତ୍ସା ଲାଗି ସମସ୍ତ ବ୍ୟବସ୍ଥା ପ୍ରସ୍ତୁତ ରଖିବାକୁ ନିର୍ଦ୍ଦେ୍ଶ ଜାରି ହୋଇଛି । କର୍ଣ୍ଣାଟକ ସ୍ବାସ୍ଥ୍ୟ ମନ୍ତ୍ରାଳୟ ନିଜ ରାଜ୍ୟର ଲୋକଙ୍କୁ ଥଣ୍ଡା ଜନିତ ରୋଗ ନେଇ ସତର୍କ ରହିବାକୁ କହିଛି। ଥଣ୍ଡା ଜନିତ ରୋଗରେ ପୀଡ଼ିତ ହେଲେ କଣ କରିବେ, କଣ ସବୁ ସତର୍କତାମୂଳକ ପଦକ୍ଷେପ ଗ୍ରହଣ କରିବେ ଏହାକୁ ନେଇ ଆଲର୍ଟ ଜାରି କରାଯାଇଛି। ଥଣ୍ଡାଜନିତ ରୋଗୀ ମୁହଁରେ ମାସ୍କ ପିନ୍ଧିବା ସହ ବାରମ୍ବାର ହାତ ଧୋଇବା ଉପରେ ଗୁରୁତ୍ବାରୋପ କରାଯାଉଛି।

ସେହିପରି ବାରମ୍ବାର ମୁହଁକୁ ସ୍ପର୍ଶ ଦ୍ବାରା ମଧ୍ୟ ରୋଗ ସଂକ୍ରମଣ ଅଧିକ ହେବା ସମ୍ଭାବନା ରହିଛି। ଗହଳି ସ୍ଥାନରୁ ନିଜକୁ ଦୂରେଇ ରଖିବାକୁ କୁହାଯାଇଛି। ଅପରପକ୍ଷେ ରାଜସ୍ଥାନ ସ୍ବାସ୍ଥ୍ୟ ବିଭାଗ ମଧ୍ୟ ଆଲର୍ଟ ଜାରି କରିଛନ୍ତି। ଉତ୍ତରାଖଣ୍ଡର ୩ ଜିଲ୍ଲା ଚୀନ ସଂଲଗ୍ନ ହୋଇଥିବାରୁ ସେଠାରେ ମଧ୍ୟ ସତର୍କ ଦୃଷ୍ଟି ରଖାଯାଇଛି। ଥଣ୍ଡାରୋଗ ଜନିତ ସ୍ଥିତିର ମୁକାବିଲା ନେଇ କେନ୍ଦ୍ର ପକ୍ଷରୁ ନିର୍ଦ୍ଦେଶାବଳୀ ଜାରି ପରେ ରାଜ୍ୟସରକାର ଏହି ନିଷ୍ପତ୍ତି ନେଇଛନ୍ତି।

ବରଯାତ୍ରୀ ଧରି ବାହାରିଥିଲେ ପୁତୁରା, ଖୁଡ଼ି ପୋଲିସ ସହ ଆସି କହିଲେ ସେ ମୋ ସ୍ବାମୀ

ଉତ୍ତରପ୍ରଦେଶ: ପୁଣି ସାମନାକୁ ଆସିଲା ଏକ ଅଜବ ଘଟଣା। ଖୁସିର ସହ ବରଯାତ୍ରୀ ଧରି ବାହାରିଥିଲା ବର। ଆଉ ଅଳ୍ପ ସମୟ ପରେ ହାତଗଣ୍ଠି ପଡ଼ିଥାନ୍ତା ଆଉ ବିବାହ କରିଥାନ୍ତା । କିନ୍ତୁ ସବୁ ବିଗାଡ଼ି ଦେଲେ ଖୁଡ଼ି । ପୋଲିସ ଧରି ଆସିବା ସହ କହିଥିଲେ କେ, ସେ ହେଉଛନ୍ତି ମୋ ସ୍ବାମୀ। ଆମର ଗୋଟିଏ ସନ୍ତାନ ମଧ୍ୟ ଅଛି । ଯାହାକୁ ଏବେ ଚର୍ଚ୍ଚାର ବିଷୟ ପାଲଟିଛି । କନ୍ୟାଘରେ ପହଞ୍ଚିବାକୁ ଯାଉଥିବା ବର ସିଧା ଥାନାରେ ପହଞ୍ଚିଛି ।ଉତ୍ତରପ୍ରଦେଶର ଫିରୋଜାବାଦରୁ ଆସିଛି ଏଭଳି ଅଭିଯୋଗ ।

ପୋଲିସର ସୂଚନା ମୁତାବକ, ମହିଳା ଜଣକ ବରଙ୍କ ଦାଦାଙ୍କୁ ପୂର୍ବରୁ ବିବାହ କରିଥିଲେ । ସେମାନଙ୍କ ତିନି ସନ୍ତାନ ମଧ୍ୟ ରହିଛନ୍ତି । ଉଭୟଙ୍କ ମଧ୍ୟରେ ଝଗଡ଼ା ହେବା ପରେ ଖୁଡ଼ି ଯାଇ ବାହାରେ ରହୁଥିଲେ । ଟ୍ରକ ଚଲାଉଥିବା ପୁତୁରା ମଝିରେ ମଝିରେ ଖୁଡ଼ିଙ୍କ ପାଖକୁ ଯାଉଥିଲେ । ଏମିତି ଯିବା ଆସିବା ଭିତରେ ପ୍ରେମ ହୋଇଥିଲା । ପ୍ରେମ ପରେ ସେମାନଙ୍କ ମଧ୍ୟରେ ଶାରୀରିକ ସମ୍ପର୍କ ଗଢ଼ି ଉଠିଥିଲା । ପରେ ଉଭୟ ମନ୍ଦିରରେ ଯାଇ ବିବାହ କରିଥିଲେ। ସେମାନଙ୍କ ଗୋଟିଏ ସନ୍ତାନ ମଧ୍ୟ ରହିଛି । କିନ୍ତୁ ତାଙ୍କୁ ଛାଡ଼ି ଏବେ ଅନ୍ୟଜଣେ ଯୁବକଙ୍କୁ ବିବାହ କରିବାକୁ ଯାଉଥିବାବେଳେ ପୋଲିସ ନେଇ ପହଞ୍ଚିଥିଲେ । ଆଉ ପୋଲିସ ଉଭୟଙ୍କୁ ରଖି ପଚରା ଉଚରା କରୁଛି ।

 

 

ରାଜନୀତି ଓ ଧର୍ମ ଅଲଗା ହେଲେ, ଘୃଣା ଭାଷଣ ବନ୍ଦ ହେବ : ସୁପ୍ରିମକୋର୍ଟ

ଦିଲ୍ଲୀ : ସାରା ଦେଶରେ ଘୃଣା ଭାଷଣର ବଢୁଥିବା ମାମଲା ସମ୍ପର୍କରେ ସୁପ୍ରିମକୋର୍ଟ ବୁଧବାର ଚାରୋଟି ରାଜ୍ୟକୁ ନୋଟିସ ଜାରି କରିଛନ୍ତି । ସୁପ୍ରିମକୋର୍ଟ ସେହି ରାଜ୍ୟମାନଙ୍କୁ କହିଛନ୍ତି ଯେ ସେମାନେ ନୋଡାଲ ଅଫିସର ନିଯୁକ୍ତ କରିଛନ୍ତି କି ନାହିଁ ? ଯେଉଁ ରାଜ୍ୟଗୁଡିକରେ ବିଜ୍ଞପ୍ତି ଜାରି କରାଯାଇଛି ସେଥିରେ ଗୁଜୁରାଟ, କେରଳ, ନାଗାଲାଣ୍ଡ ଏବଂ ତାମିଲନାଡୁ ରହିଛି । ସୁପ୍ରିମକୋର୍ଟରେ ମାମଲାର ପରବର୍ତ୍ତୀ ଶୁଣାଣି  ଫେବୃଆରୀ ୫ତାରିଖ ୨୦୨୪ରେ ହେବ । କେନ୍ଦ୍ର ସରକାର ଏକ ସ୍ଥିତି ରିପୋର୍ଟ ଦାଖଲ କରି କହିଛନ୍ତି ଯେ ୨୮ ଟି ରାଜ୍ୟ ନୋଡାଲ ଅଫିସର ନିଯୁକ୍ତ କରିଛନ୍ତି । ASG KM Natarajan କୋର୍ଟଙ୍କୁ କହିଛନ୍ତି ଯେ ଗୁଜୁରାଟ, କେରଳ, ନାଗାଲାଣ୍ଡ, ପଶ୍ଚିମବଙ୍ଗ ଏପର୍ଯ୍ୟନ୍ତ ସେମାନଙ୍କର ଉତ୍ତର ଦାଖଲ କରିନାହାଁନ୍ତି । ନୋଡାଲ ଅଧିକାରୀଙ୍କ ନିଯୁକ୍ତି ସମ୍ପର୍କରେ ମଧ୍ୟ କୌଣସି ସୂଚନା ନାହିଁ। କେତେ ରାଜ୍ୟ ସେମାନଙ୍କ ଉତ୍ତର ଦାଖଲ କରିଛନ୍ତି ବୋଲି ସୁପ୍ରିମକୋର୍ଟ ପ୍ରଶ୍ନ କରିଛନ୍ତି।

ନୋଡାଲ ଅଧିକାରୀ ନିୟୋଜିତ ହୋଇଥିଲେ କି ନାହିଁ ?

ପଶ୍ଚିମବଙ୍ଗ ସରକାର କୋର୍ଟଙ୍କୁ କହିଛନ୍ତି ଯେ ଜଣେ ନୋଡାଲ ଅଫିସର ନିଯୁକ୍ତ କରିଛନ୍ତି । ASG କହିଛି ଯେ ଅକ୍ଟୋବର ୧୧ ରେ ଗୃହ ସଚିବ ସମସ୍ତ ରାଜ୍ୟର ଏକ ବୈଠକ ଡାକି ପଦକ୍ଷେପ ଗ୍ରହଣ କରାଯିବ ଏବଂ ଅନୁପାଳନ ରିପୋର୍ଟ ଦାଖଲ କରିବାର ଆବଶ୍ୟକତା ସମ୍ପର୍କରେ ସୂଚନା ଦେଇଛନ୍ତି । ଜଷ୍ଟିସ ସଞ୍ଜୀବ ଖାନ୍ନା କହିଛନ୍ତି ଯେ ଆମେ ରାଜ୍ୟମାନଙ୍କୁ ନୋଟିସ ଜାରି କରିବୁ। ନୋଡାଲ ଅଧିକାରୀ ନିଯୁକ୍ତ ହୋଇଛନ୍ତି କି ନାହିଁ ତାହା ରାଜ୍ୟ କହିବା ଉଚିତ କି ?

ବ୍ୟକ୍ତିଗତ ବିଷୟ ସହିତ ମୁକାବିଲା କରିପାରିବ ନାହିଁ : ଜଷ୍ଟିସ୍ ଖାନ୍ନା

ଆବେଦନକାରୀଙ୍କ ନିକଟରେ ହାଜର ହୋଇଥିବା ଆଡଭୋକେଟ୍ ନିଜାମ ପାଶା କହିଛନ୍ତି ଯେ ଯଦି ଜଣେ ବ୍ୟକ୍ତି ଘୃଣ୍ୟ ଭାଷଣ ଦିଅନ୍ତି ତେବେ ତାଙ୍କୁ ପୁନର୍ବାର ସଭାଗୁଡ଼ିକୁ ସମ୍ବୋଧିତ କରିବାକୁ ଅନୁମତି ଦିଆଯାଇଛି । ଜଷ୍ଟିସ୍ ଖାନ୍ନା କହିଛନ୍ତି ଯେ ଆମେ ବ୍ୟକ୍ତିଗତ ମାମଲା ସହ ମୁକାବିଲା କରିପାରିବୁ ନାହିଁ, ଆପଣ ସମ୍ପୃକ୍ତ ହାଇକୋର୍ଟଙ୍କ ନିକଟକୁ ଯାଇପାରିବେ। ଜୁଲାଇ ୭, ୨୦୧୮ରେ, ଘୃଣା ଭାଷଣ ଉପରେ ପ୍ରତିବନ୍ଧକ ଲଗାଇବାକୁ କୋର୍ଟ ନିର୍ଦ୍ଦେଶନାମା ଜାରି କରିଥିଲେ।

ଘୃଣା ଭାଷଣ ଏକ ଗୁରୁତର ଅପରାଧ – ସୁପ୍ରିମକୋର୍ଟ

ଆମେ ଆପଣଙ୍କୁ କହିରଖୁଛୁ ଯେ ସୁପ୍ରିମକୋର୍ଟ ଘୃଣା ଭାଷଣକୁ ଏକ ଗୁରୁତର ଅପରାଧ ବୋଲି କହିଛନ୍ତି । ସାରା ଦେଶରେ ଘଟୁଥିବା ଘୃଣ୍ୟ ଭାଷଣ ପ୍ରସଙ୍ଗରେ ସୁପ୍ରିମକୋର୍ଟ ଏକ ବିବୃତ୍ତିରେ କହିଛନ୍ତି ଯେ ଯେଉଁ ଦିନ ରାଜନୀତି ଓ ଧର୍ମ ଅଲଗା ହେବ, ଘୃଣା ଭାଷଣ ବନ୍ଦ ହେବ।

 

୩୧୪ ବ୍ଲକରେ ହେବ କଏନ ଏକ୍ସଚେଞ୍ଜ ମେଳା

ଭୁବନେଶ୍ୱର : ୩୧୪ ବ୍ଲକରେ ହେବ କଏନ ଏକ୍ସଚେଞ୍ଜ ମେଳା। ୫୦ ପଇସାରୁ ୨୦ ଟଙ୍କିଆ କଏନ ସାଧାରଣ ଜନତା ବଦଳାଇପାରିବେ । ରିଜର୍ଭ ବ୍ୟାଙ୍କ ଭୁବନେଶ୍ୱର ପକ୍ଷରୁ ଏହି ପଦକ୍ଷେପ ନିଆଯାଇଛି । ଡିସେମ୍ବରରୁ ଫେବ୍ରୁଆରୀ ଯାଏଁ ୩ ମାସରେ ସମସ୍ତ ବ୍ଲକରେ କଏନ ଏକ୍ସଚେଞ୍ଜ ମେଳା ଚାଲିବ । ମେଳାରେ ଚିରା ଫଟା ନୋଟ ବି ବଦଳାଇହେବ। ବ୍ୟାଙ୍କଗୁଡିକରେ ସବୁଦିନ କଏନ ବଦଳାଇପାରିବେ ଗ୍ରାହକ। କୌଣସି ବ୍ୟାଙ୍କ କଏନ ବଦଳାଇବାକୁ ମନା କରିପାରିବେ ନାହିଁ। ସେଭଳି ଖବର ଆସିଲେ କାର୍ଯ୍ୟାନୁଷ୍ଠାନ ନିଆଯିବ । କଏନର ଗ୍ରହଣୀୟତାକୁ ନେଇ ଅନେକ ଗୁଜବ ମାର୍କେଟରେ ବୁଲୁଛି।

ଏଭଳି ଗୁଜବରେ ବିଶ୍ୱାସ ନ କରିବାକୁ ଗଣମାଧ୍ୟମ ଜରିଆରେ ଅପିଲ କରିଛି ଆରବିଆଇ । ୨ ହଜାର ଟଙ୍କିଆ ଅଦଳବଦଳ ଏବେ ବି ଚାଲିଛି। ବ୍ୟକ୍ତିଗତ ଭାବେ ୫ ଖଣ୍ଡ ୨ ହଜାର ଟଙ୍କିଆ ନୋଟ ଗ୍ରହଣ କରାଯାଉଛି। ହେଲେ ପୋଷ୍ଟାଲ ମାଧ୍ୟମରେ ୨ ହଜାର ଟଙ୍କିଆ ବଦଳ ପରିମାଣକୁ ବୃଦ୍ଧି କରାଯାଇଛି  ବୋଲି କହିଛି ଆରବିଆଇ  ।

ସାମାନ୍ୟ କଥାକୁ ନେଇ ତିନିଜଣ ଯୁବକଙ୍କୁ ମରଣାନ୍ତକ ଆକ୍ରମଣ

ପୁରୀ : ପୁଣି ପୁରୀରେ ଦୁର୍ବୁତ୍ତଙ୍କ ଆତଙ୍କ । ସାମାନ୍ୟ କଥାକୁ କେନ୍ଦ୍ର କରି ତିନିଜଣ ଯୁବକଙ୍କୁ ମଙ୍ଗଳାଘାଟ ନିକଟରେ ଥିବା ଆପାର୍ଟମେଣ୍ଟରୁ ଉଠାଇ ନେଇ ମରଣାନ୍ତକ ଆକ୍ରମଣ । ଗୁରୁତର ହୋଇଥିବା ଯୁବକ ମାନଙ୍କୁ ଚିକିତ୍ସା ପାଇଁ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଆକ୍ରମଣର ଶିକାର ହୋଇଥିବା ଯୁବକ ହେଲେ ଚନ୍ଦନପୁରର ସାଗର ବେହେରା, ପ୍ରକାଶ ସାହୁ ଓ ତାଙ୍କ ଭାଇ ଅବିନାଶ ସାହୁ । ଦୁର୍ବୁତ୍ତଙ୍କ ଆକ୍ରମଣରେ ତିନି ଜଣ ଯୁବକଙ୍କ ମୁଣ୍ଡ ଓ ଦେହରେ ଗଭୀର ଆଘାତ ଲାଗିଛି । ବାସେଳୀ ସାହି ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।

ଆକ୍ରମଣ କରିଥିବା ଗୋଷ୍ଠୀର ଜଣେ ଯୁବକ ଆହତ ହୋଇଥିବା ମଧ୍ୟ ସୂଚନା ମିଳିଛି । ବାରମ୍ବାର ଦେଖିବାକୁ ମିଳୁଛି ପୁରୀରେ ଦୁର୍ବୁତ୍ତଙ୍କ ଆତଙ୍କରାଜ । ପୋଲିସ ପ୍ରଶାସନକୁ ଚ୍ୟାଲେଞ୍ଜ ଦେଉଛନ୍ତି ଦୁର୍ବୁତ୍ତ । ଅନେକ ସମୟରେ ଗୋଷ୍ଠି ସଂଘର୍ଷ କଥା କୁହନ୍ତୁ କିମ୍ବା ଦାଦାଗିରି କଥା କୁହନ୍ତୁ ଦେଖିବାକୁ ମିଳୁଛି ଶ୍ରୀକ୍ଷେତ୍ରରେ ।

ଖୁବଶୀଘ୍ର ଓଡ଼ିଶା ଫେରିବେ ଟନେଲରୁ ଉଦ୍ଧାର ଶ୍ରମିକ, 5T ଅଧକ୍ଷ କାର୍ତ୍ତିକ ପାଣ୍ଡିଆନ ଘଟଣାର କରୁଛନ୍ତି ତଦାରଖ

ଉତ୍ତରାଖଣ୍ଡ: ଉତ୍ତରକାଶୀର ଟନେଲରେ ଫସିଥିବା ଓଡ଼ଆ ଶ୍ରମିକମାନେ ଖୁବଶୀଘ୍ର ଘରକୁ ଫେରିବେ । ଉତ୍ତରକାଶୀରୁ ଏନେଇ ପ୍ରତିକ୍ରିୟା ରଖିଛନ୍ତି ଶ୍ରମ ମନ୍ତ୍ରୀ ସାରଦା ନାୟକ। ସେ କହିଛନ୍ତି କି, ଓଡ଼ିଶାର ଫସିଥିବା ୫ ଶ୍ରମିକଙ୍କ ଉଦ୍ଧାର ପାଇଁ ମୁଖ୍ୟମନ୍ତ୍ରୀ ପ୍ରଥମରୁ ତତ୍ପରତା ପ୍ରକାଶ କରିଥିଲେ । ପୁରା ଘଟଣା ଉପରେ ମୁଖ୍ୟମନ୍ତ୍ରୀ ନଜର ରଖିଥିଲେ । ଏହାସହ ମୁଖ୍ୟମନ୍ତ୍ରୀ ଏବଂ 5T ଅଧ୍ୟକ୍ଷଙ୍କୁ ଧନ୍ୟବାଦ ଜଣାଇଛନ୍ତି ଶ୍ରମମନ୍ତ୍ରୀ ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ୟମ କ୍ରମେ ଉଦ୍ଧାର ହୋଇଥିବା ଶ୍ରମିକଙ୍କୁ ଘରକୁ ଫେରାଇ ଆଣିବାକୁ ଚାଲିଛି ସମସ୍ତ ବ୍ୟବସ୍ଥା। 5T ଅଧକ୍ଷ କାର୍ତ୍ତିକ ପାଣ୍ଡିଆନ ପୁରା ଘଟଣାର ତଦାରଖ କରୁଛନ୍ତି। ଟନେଲ ଧସିବା ପରଠାରୁ ଶ୍ରମିକ ଉଦ୍ଧାର ପର୍ଯ୍ୟନ୍ତ ସବୁଦିନ ସ୍ଥିତି ବିଷୟରେ ପଚାରି ବୁଝୁଥିଲେ ରାଜ୍ୟ ସରକାର। ପୁରା ଘଟଣା ଉପରେ ନଜର ରଖିଛନ୍ତି ମୁଖ୍ୟମନ୍ତ୍ରୀ । ଶ୍ରମିକଙ୍କ ଉଦ୍ଧାର ଲାଗି ମୁଖ୍ୟମନ୍ତ୍ରୀଙ୍କ ତତ୍ପରତା ଏବଂ 5T ଅଧ୍ୟକ୍ଷ ପାଣ୍ଡିଆନଙ୍କ ଉଦ୍ୟମ ପାଇଁ ଧନ୍ୟବାଦ ବୋଲି କହିଛନ୍ତି ସାରଦା ନାୟକ । ଟନେଲ ଧସିବା ପରେ ଫସିଥିବା ଶ୍ରମିକଙ୍କ ପରିବାର 5T ଅଧ୍ୟକ୍ଷଙ୍କୁ ନବୀନ ନିବାସରେ ସାକ୍ଷାତ କରିଥିଲେ ।

ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଶ୍ରମମନ୍ତ୍ରୀ ସାରଦା ନାୟକ ଏବଂ ଅନ୍ୟ ଅଧିକାରୀ ଫସିଥିବା ଶ୍ରମିକଙ୍କ ପରିବାର ସଦସ୍ୟଙ୍କୁ ନେଇ ଉତ୍ତରକାଶୀ ଯାଇଥିଲେ । ୫ ଶ୍ରମିକଙ୍କ ପରିଜନଙ୍କୁ ନେଇ ବିମାନ ଯୋଗେ ଯାଇଥିଲେ ସାରଦା ନାୟକ । ପ୍ରତ୍ୟେକ ମିନିଟରେ ଶ୍ରମିକଙ୍କ ଉଦ୍ଧାର ସମ୍ପର୍କିତ ତଥ୍ୟ ରଖୁଥିଲେ ମୁଖ୍ୟମନ୍ତ୍ରୀ ଓ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍ । ସମସ୍ତ ଶ୍ରମିକ ଟନେଲରୁ ଉଦ୍ଧାର ହୋଇ ସାରିଛନ୍ତି । ଟନେଲ ଭିତରରୁ ଶ୍ରମିକ ଉଦ୍ଧାର ହେବା ପରେ ସମସ୍ତ ୫ ଶ୍ରମିକଙ୍କୁ ଯାଇ ଭେଟିଛନ୍ତି ଶ୍ରମମନ୍ତ୍ରୀ ସାରଦା ନାୟକ । ସେମାନେ ସୁସ୍ଥ ଅଛନ୍ତି ଏବଂ ଜନ୍ମମାଟିକୁ ଫେରିବାକୁ ବ୍ୟଗ୍ର ଅଛନ୍ତି ବୋଲି କହିଛନ୍ତି ମନ୍ତ୍ରୀ ସାରଦା ନାୟକ । ଅନ୍ୟ ରାଜ୍ୟ ତୁଳନାରେ ଆମ ରାଜ୍ୟ ସରକାର ଶ୍ରମିକଙ୍କ ଉଦ୍ଧାର ନେଇ ଅଧିକ ତତ୍ପରତା ପ୍ରକାଶ କରିଥିଲେ ବୋଲି ସାରଦା ନାୟକ କହିଛନ୍ତି ।

ଏଥିଲାଗି ମୁଖ୍ୟମନ୍ତ୍ରୀ ନବୀନଙ୍କ ଉଦ୍ୟମକୁ ଉଦ୍ଧାର ପାଇଥିବା ଶ୍ରମିକମାନେ ମଧ୍ୟ ପ୍ରଶଂସା କରିଛନ୍ତି । ଏବେ ଉତ୍ତରାଖଣ୍ଡରେ ଦୁଇ ଜଣ ଶ୍ରମ ଅଧିକାର ରହିଛନ୍ତି । ଓଡ଼ିଶାର ୫ ଶ୍ରମିକଙ୍କୁ ସକୁଶଳ ଓଡ଼ିଶା ନେଇ ଫେରିବୁ ବୋଲି କହିଛନ୍ତି ଉତ୍ତରାଖଣ୍ଡରେ ଥିବା ଶ୍ରମ ମନ୍ତ୍ରୀ । ଶ୍ରମିକଙ୍କୁ ଫେରାଇ ଆଣିବା ଲାଗି ଏଠାକାର ରାଜ୍ୟ ସରକାରଙ୍କ ସମସ୍ତ ସମସ୍ତ ପ୍ରକ୍ରିୟା ଶେଷ ହେବା ପରେ ଶ୍ରମିକଙ୍କୁ ନେଇ ଓଡ଼ିଶା ଫେରିବି ବୋଲି କହିଛନ୍ତି ଶ୍ରମ ମନ୍ତ୍ରୀ ସାରଦା ନାୟକ।

 

 

 

ହମାସ-ଇସ୍ରାଏଲ ସେନା ମଧ୍ୟରେ ଯୁଦ୍ଧ ବିରତି ଆଉ ଦୁଇ ଦିନ ବୃଦ୍ଧି

ନନ୍ଦିଘୋଷ ବ୍ୟୁରୋ : ହମାସ-ଇସ୍ରାଏଲ ସେନା ମଧ୍ୟରେ ଯୁଦ୍ଧ ବିରତି ଆଉ ଦୁଇ ଦିନ ବୃଦ୍ଧି । ଯୁଦ୍ଧ ବିମାନ ଆଉ ୨ ଦିନ ବୃଦ୍ଧି ପରେ ଆଜି ଯୁଦ୍ଧ ବିରତିର ଶେଷ ଦିନ । ଗତକାଲି ଯୁଦ୍ଧ ବିରତିର ପଞ୍ଚମ ଦିନରେ ୧୨ ପଣବନ୍ଦୀଙ୍କୁ ଛାଡିଲେ ହମାସ ଆତଙ୍କୀ । ପ୍ରତି ବଦଳରେ ଇସ୍ରାଏଲ ପାଲେଷ୍ଟାଇନର ୩୦ ବନ୍ଦୀଙ୍କୁ ମୁକ୍ତ କରିଛି। ଇସ୍ରାଏଲ ଜେଲରୁ ମୁକ୍ତି ପାଇଥିବା ବନ୍ଦୀଙ୍କ ମଧ୍ୟରେ ୧୫ ମହିଳା ଏବଂ ୧୫ ନାବାଳିକ ଅଛନ୍ତି । ପୂର୍ବରୁ ହୋଇଥିବା ଯୁଦ୍ଧବିରତି ସୋମବାର ଶେଷ ହେଉଥିଲା । ତେବେ ଇଜିପ୍ଟ, କତର ଏବଂ ଆମେରିକାର ପ୍ରୟାସରୁ ଯୁଦ୍ଧ ବିରାମକୁ ଆଉ ଦୁଇ ଦିନ ବୃଦ୍ଧି କରାଯାଇଛି । ଯୁଦ୍ଧ ବିରତି ବୃଦ୍ଧି କରିବା ପରେ ବନ୍ଦୀମାନଙ୍କ ମୁକ୍ତି ଜାରି ରହିଛି। ହମାସ ମୁକ୍ତ କରିଥିବା ନାଗରିକଙ୍କ ମଧ୍ୟରେ ୨ ଜଣ ବିଦେଶୀ ନାଗରିକ ମଧ୍ୟ ଅଛନ୍ତି । ହମାସ ମୁକ୍ତ କରିଥିବା ପଣବନ୍ଦୀଙ୍କ ମଧ୍ୟରେ ଅଧିକାଂଶ ବୟସ୍କ ଏବଂ ସେମାନଙ୍କ ପରିବାର ଲୋକ ଅଛନ୍ତି । ବର୍ତ୍ତମାନ ସୁଦ୍ଧା ହମାସ ଆତଙ୍କୀ ୬୦ ପଣବନ୍ଦୀଙ୍କୁ ମୁକ୍ତ କରିସାରିଲେଣି ।Gazze'deki ateşkeste son durum: 5. esir takası tamamlandı

ହମାସ ଆତଙ୍କୀଙ୍କୁ ମୂଳପୋଛ କରିବାକୁ ବାରମ୍ବାର କହି ଆସୁଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁ । ହମାସ ପାଖରେ ଥିବା ସମସ୍ତ ପଣବନ୍ଦୀଙ୍କୁ ମୁକ୍ତ କରିବା ସହ ଆତଙ୍କୀଙ୍କୁ ନିପାତ କରିବାକୁ ପଣ କରିଛନ୍ତି ପ୍ରଧାନମନ୍ତ୍ରୀ ନେତନ୍ୟାହୁ । ସୋସିଆଲ ମିଡିଆ ଏକ୍ସରେ ମେସେଜ୍ ଦେଇ ନେତନ୍ୟାହୁ କହିଛନ୍ତି ଯେ, ହମାସ ପାଖରେ ଥିବା ସମସ୍ତ ପଣବନ୍ଦୀଙ୍କୁ ମୁକ୍ତ କରିବା ସହ ମିଶନ ଜାରି ରଖିବୁ । ମାଟି ଉପରେ ଏବଂ ତଳେ ହମାସ ଆତଙ୍କୀଙ୍କ ସଫା କରିବା ସହ ଇସ୍ରାଏଲ ନାଗରିକଙ୍କ ଲାଗି ଗାଜା ଆଗକୁ ଆଉ ବିପଦ ସାଜିବ ନାହିଁ ବୋଲି ପ୍ରତିଶ୍ରୁତି ଦେଇଛନ୍ତି ।

ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ଏବଂ ଦିନିକିଆ ମ୍ୟାଚ ଖେଳିବେନି କୋହଲି, କହିଲେ ଓ୍ବାଇଟ୍ ବଲ…

ନୂଆଦିଲ୍ଲୀ: ଅଷ୍ଟ୍ରେଲିଆ ବିପକ୍ଷ ଟି-୨୦ ସିରିଜ ପରେ ଦକ୍ଷିଣ ଆଫ୍ରିକା ବିପକ୍ଷରେ ସିରିଜ ଖେଳିବ ଭାରତ । ଦକ୍ଷିଣ ଆଫ୍ରିକାରେ ଭାରତୀୟ ଦଳ ୩ଟି ଟେଷ୍ଟ ଏବଂ ଦିନିକିଆ ଖେଳିବା ସହ ୨ଟି ଟେଷ୍ଟ ମ୍ୟାଚ ବିଶିଷ୍ଟ ସିରିଜ ଖେଳିବାକୁ ଯାଉଛି । ବିଶ୍ବକପରେ ପରେ ବିଶ୍ରାମ ନେଇଥିବା ବିରାଟ କୋହଲି ଦକ୍ଷିଣ ଆଫ୍ରିକା ବିପକ୍ଷ ସିରିଜରେ ଖେଳିବେ ବୋଲି କୁହାଯାଉଥିଲା। କିନ୍ତୁ କୋହଲି ବିସିସିଆଇକୁ ଏକ ସୂଚନା ଦେଇଛନ୍ତି କି, ସେ ଦିନିକିଆ ଏବଂ ଟି-୨୦ ମ୍ୟାଚ ଖେଳି ପାରିବେ ନାହିଁ । ହ୍ବାଇଟ୍ ବଲରୁ ବିରତି ଦରକାର ବୋଲି ଲେଖିଛନ୍ତି। ତେବେ ଦିନିକିଆ ଏବଂ ଟି-୨୦ ମ୍ୟାଚ ଖେଳିବେନି କୋହଲି। କେବଳ ଟେଷ୍ଟ ମ୍ୟାଚ ଖେଳିବେ। ବିରାଟ କୋହଲି ଲଣ୍ଡନରେ ଛୁଟି କାଟୁଛନ୍ତି। ସେପଟେ ରୋହିତ ଶର୍ମା ବ୍ରିଟେନରେ ରହିଥିବାବେଳେ ସେ ମଧ୍ୟ ଖେଳିନପାରନ୍ତି ବୋଲି ଚର୍ଚ୍ଚା ହେଉଛି। ଦଳରେ କାହା ଉପରେ ଗୁରୁ ଦାୟିତ୍ବ ରହିବ ତାଉପରେ ରହିଛି ନଜର ।

ସେପଟେ କୋହଲି ହ୍ବାଇଟ୍ ବଲ ଖେଳିବାରୁ ବିରତି ନେବା କଥା କହିଥିବାବେଳେ ସେ ଅବସର ନେଇ ପାରନ୍ତି ବୋଲି ଚର୍ଚ୍ଚା ହେଉଛି । ମାତ୍ର ଏହାକୁ ନେଇ କୋହଲି କୌଣସି ପ୍ରତିକ୍ରିୟା ଦେଇନାହାନ୍ତି । ନିକଟରେ ଭାରତରେ ଅନୁଷ୍ଠିତ ଦିନିକିଆ ବିଶ୍ବକପରେ କୋହଲି ସର୍ବାଧିକ ସ୍କୋର କରିଥିଲେ । ଦମଦାର ବ୍ୟାଟିଂ କରିବା ସହ କ୍ରିଡ଼ାପ୍ରେମୀଙ୍କ ମନ ଜିଣିଥିଲେ । ମାତ୍ର ଭାରତର ଫାଇନାଲ ପରାଜୟ ଆଜି ମଧ୍ୟ ଚର୍ଚ୍ଚାର ବିଷୟ ପାଲଟିଛି ।

ଗ୍ୟାସ୍ ସିଲିଣ୍ଡର ଫାଟିବାରୁ ଭୁଶୁଡିଲା ୫ ଘର

ମୁମ୍ବାଇ: ମୁମ୍ବାଇରେ ଗ୍ୟାସ ସିଲିଣ୍ଡର ବିସ୍ଫୋରଣ। ବିସ୍ଫୋରଣରେ ୫ଟି ଘର ଭୁଶୁଡି ନଷ୍ଟ ହୋଇଯାଇଛି। ଚାରି ପରିବାର ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛନ୍ତି। ଏପରି ଅଭାବନୀୟ ଘଟଣାଟି ଘଟିଛି ମୁମ୍ବାଇ ଚେମ୍ବର ସ୍ଥିତ କ୍ୟାମ୍ପ ଅଞ୍ଚଳରେ। ଅନେକ ଲୋକ ଏବେବି ଭଗ୍ନାଶଂ ତଳେ ରହିଥିବା ବେଳେ ୧୧ଜଣଙ୍କୁ ଉଦ୍ଧାର କରାଯାଇଛି।

ଖବର ପାଇ ଦମକଳ ବାହିନୀ ଘଟଣା ସ୍ଥଳରେ ପହଞ୍ଚି ୧୧ ଜଣଙ୍କୁ ଉଦ୍ଧାର କରିଛି। ସେମାନଙ୍କୁ ଚିକିତ୍ସା ପାଇଁ ତୁରନ୍ତ ଭାବେ ମେଡିକାଲରେ ଭର୍ତ୍ତି କରାଯାଇଛି। ସମସ୍ତ ଆହତଙ୍କ ଚିକିତ୍ସା ବର୍ତ୍ତମାନ ସତବଦୀ ହସ୍ପିଟାଲରେ ଚାଲିଛି। ମାତ୍ର ବିସ୍ଫୋରଣର କାରଣ ଏବେବି ଅସ୍ପଷ୍ଟ ରହିଛି। ଘଟଣାର ତଦନ୍ତ କରୁଛି ପୋଲିସ,।