ଛତିଶଗଡ଼ : ସୀମାନ୍ତରେ ପୁଣି ମାତିଲେ ମାଓବାଦୀ । ସୁକୁମା ଜିଲ୍ଲାରେ ମାଓବାଦୀଙ୍କ ଲଙ୍କାକାଣ୍ଡ । ଗୋଟିଏ ବସ୍ ସମେତ ୩ଟି ଗାଡ଼ିରେ ନିଆଁ ଲଗାଇଦେଲେ ଲାଲବାହିନୀ । ଆସିରଗୁଡା ନିକଟରେ ମୁଖ୍ୟରାସ୍ତାରେ ବସ୍ ଅଟକାଇ ଜାଳିଦେଲେ ମାଓବାଦୀ । ସମସ୍ତ ଯାତ୍ରୀ ସୁରକ୍ଷିତ ଥିବା ସୂଚନା ମିଳିଛି । ଘଟଣାସ୍ଥଳରେ ପହଞ୍ଚିଲେ ସୁରକ୍ଷା ବାହିନୀ । ସୁରକ୍ଷା ଦୃଷ୍ଟି କୋଣରୁ ସୁକୁମା-କୋଣ୍ଟା ରାସ୍ତାରେ ଯାନବାହାନ ଚଳାଚଳ ବନ୍ଦ କରାଯାଇଛି । ୧୫ ରୁ ୨୦ ମାଓବାଦୀ ପୋଡ଼ାଜଳାରେ ସାମିଲ ହୋଇଥିବା ସୂଚନା ମିଳିଛି । ସୁରକ୍ଷା ବାହିନୀ ଘଟଣାସ୍ଥଳରେ କୁମ୍ବିଂ ଅପରେସନ ଆରମ୍ଭ କରିଛି ।
କେନ୍ଦ୍ର ଶିକ୍ଷାମନ୍ତ୍ରୀଙ୍କ ଉତ୍ତରକୁ କାଉଣ୍ଟର କଲେ ରାଜ୍ୟ ଗଣଶିକ୍ଷା ମନ୍ତ୍ରୀ
ନୂଆଦିଲ୍ଲୀ : କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସଂସଦରେ ରଖିଥିବା ଉତ୍ତରକୁ କାଉଣ୍ଟର କଲେ ରାଜ୍ୟ ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସୁଦାମ ମାର୍ଣ୍ଡି । ଚିଠି ଲେଖି ସେ ଆପତ୍ତି ଜଣାଇଛନ୍ତି । ୨୦୨୧-୨୨ ୟୁଡିଆଇଏସଇ ଆଧାରରେ ଓଡ଼ିଶାର ଛାତ୍ରଛାତ୍ରୀଙ୍କ ଡ୍ରପଆଉଟ ହାରକୁ ୪୯.୯ ପ୍ରତିଶତ ଦର୍ଶାଇଥିବାରୁ ଉଦବେଗ ପ୍ରକାଶ ପାଇଛି । ରାଜ୍ୟରେ ଚାଲୁଥିବା ଅନ୍ୟାନ୍ୟ ବେସରକାରୀ ବିଦ୍ୟାଳୟ, ବୈଷୟିକ ଅନୁଷ୍ଠାନ ଏବଂ ପତ୍ର ବିନିମୟ ପାଠକ୍ରମରେ ଅଧ୍ୟୟନରତ ଛାତ୍ରଛାତ୍ରୀମାନଙ୍କର ତଥ୍ୟ ଉପସ୍ଥାପିତ କରାଯିବାର ବିଧି ବ୍ୟବସ୍ଥା ନଥିବାରୁ କେବଳ UDISE ତଥ୍ୟ ଆଧାରରେ ଡ୍ରପ ଆଉଟ ହାର ସଠିକ୍ ଭାବେ ଆକଳନ କରିବା ସମ୍ଭବପର ନୁହେଁ ।
ଆମ ରାଜ୍ୟରେ ପ୍ରାୟ ୧ ଲକ୍ଷ ୪୦ ହଜାର ଛାତ୍ରଛାତ୍ରୀ ଏହି ଅନୁଷ୍ଠାନ ମାନଙ୍କରେ ଅଧ୍ୟୟନରତ ଥିବାରୁ ସେମାନଙ୍କ ସମ୍ବନ୍ଧୀୟ ତଥ୍ୟ ଗୁଡିକୁ UDISE ରେ ଅନ୍ତର୍ଭୁକ୍ତ କରିବା ପାଇଁ ଓଡିଶା ବିଦ୍ୟାଳୟ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣର ରାଜ୍ୟ ପ୍ରକଳ୍ପ ନିର୍ଦ୍ଦେଶକ, କେନ୍ଦ୍ର ଶିକ୍ଷା ବିଭାଗକୁ ବାରମ୍ବାର ଚିଠି ଲେଖିଛନ୍ତି । ୨୦୨୨-୨୩ ଶିକ୍ଷା ବର୍ଷ ନିମନ୍ତେ ସଂଗୃହୀତ ତଥ୍ୟ ଅନୁଯାୟୀ ଆମ ରାଜ୍ୟରେ Drop-out ହାର ପ୍ରାୟ ୨୦ ପ୍ରତିଶତକୁ ହ୍ରାସ ପାଇଛି । ଅନ୍ୟାନ୍ୟ ପାଠ୍ୟକ୍ରମର ଅଧୟନରତ ୧ଲକ୍ଷ ୪୦ ହଜାର ଛାତ୍ରଛାତ୍ରୀଙ୍କର ତଥ୍ୟକୁ UDISEରେ ସଠିକ୍ ଭାବେ ଉପସ୍ଥାପିତ କରାଗଲେ, ଏହା ପ୍ରାୟ ୧୫ ପ୍ରତିଶତକୁ ହ୍ରାସ ପାଇବ । ଏଣୁ, ରାଜ୍ୟର Drop-out ହାରକୁ ସଠିକ୍ ଭାବେ ଆକଳନ କରିବା ପାଇଁ କେନ୍ଦ୍ର ମନ୍ତ୍ରୀଙ୍କର ଦୃଷ୍ଟି ଆକର୍ଷଣ କରାଯାଇଛି ।
ଲୋକସଭାରେ ଗୃହୀତ ହେଲା ୩ଟି ଗୁରୁତ୍ବପୂର୍ଣ୍ଣ ବିଲ
ନୂଆଦିଲ୍ଲୀ : ୯୭ ବିରୋଧୀ ଦଳ ସାଂସଦଙ୍କ ଅନୁପସ୍ଥିତରେ ଲୋକସଭାରେ ଗୃହୀତ ହୋଇଛି ୩ଟି ଗୁରୁତ୍ବପୂର୍ଣ୍ଣ ବିଲ । ଇଣ୍ଡିଆନ ପେନାଲ କୋଡ, ୧୮୬୦ ବଦଳରେ ଭାରତୀୟ ନ୍ୟାୟ ସଂହିତା, ୨୦୨୩ ପାସ୍ ହୋଇଛି । କୋଡ ଅଫ କ୍ରିମିନାଲ ପ୍ରସିଜୋର, ୧୮୯୮ ବଦଳରେ ଭାରତୀୟ ନାଗରିକ ସୁରକ୍ଷା ସଂହିତା-୨୦୨୩ ପାସ୍ ହୋଇଛି ।
ସେହିପରି ଇଣ୍ଡିଆନ ଏଭିଡେନ୍ସ ଆକ୍ଟ, ୧୮୭୨ ବଦଳରେ ଗୃହୀତ ହୋଇଛି ଭାରତୀୟ ସାକ୍ଷ୍ୟ ବିଲ୍, ୨୦୨୩ । କେତେକ ପରିବର୍ତ୍ତନ କରାଯାଇ ଏହି ୩ଟି ବିଲ୍ ଆଗତ ହୋଇଥିଲା । ଷ୍ଟାଣ୍ଡିଂ କମିଟି ଦ୍ବାରା ସମୀକ୍ଷା ପରେ ଏହି ବିଲଗୁଡିକୁ ଦାଖଲ କରାଯାଇଥିଲା । ନୂଆ ବିଲରେ ଭିଡ ହତ୍ୟା ଲାଗି ମୃତ୍ୟୁ ଦଣ୍ଡ ବ୍ୟବସ୍ଥା କରାଯାଇଛି । ଦେଶଦ୍ରୋହୀ ଆଇନକୁ ହଟାଇବା ଲାଗି ନୂଆ ବିଲରେ ପଦକ୍ଷେପ ନିଆଯାଇଛି । ଦେଶଦ୍ରୋହ ଆଇନ ବଳରେ ତିଲକ ମହାରାଜ, ମହାତ୍ମା ଗାନ୍ଧୀ, ସର୍ଦ୍ଦାର ପଟେ ପ୍ରମୁଖ ଗିରଫ ହୋଇ ଜେଲ ଯାଇଥିଲେ ।
୨୦୨୪ ନିର୍ବାଚନ ପାଇଁ କଂଗ୍ରେସର ରୋଡମ୍ୟାପ
ନୂଆଦିଲ୍ଲୀ : ୨୦୨୪ ନିର୍ବାଚନ ପାଇଁ କଂଗ୍ରେସର ରୋଡମ୍ୟାପ । ଦିଲ୍ଲୀରେ ଓଡିଶା କଂଗ୍ରେସ ନେତା, ପିସିସି ସଭାପତିଙ୍କୁ ନେତୃତ୍ୟରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଏବଂ ସାଧାରଣ ସମ୍ପାଦକ କେସି ବେଣୁଗୋପାଲ, ରାହୁଲ ଗାନ୍ଧିଙ୍କୁ ଭେଟିଛନ୍ତି। ପଲିଟିକାଲ ଆଫେୟାର୍ସ କମିଟିର ୨୦ ଜଣ ସଦସ୍ୟ ଏହି ବୈଠକ ସାମିଲ ହୋଇଥିଲେ । ଏହାସହ ରାଜ୍ୟ କଂଗ୍ରେସ ପ୍ରଭାରୀ ଚେଲ୍ଲା କୁମାର ମଧ୍ୟ ବୈଠକ ରେ ଉପସ୍ଥିତ ଥିଲେ । ସାଧାରଣ ନିର୍ବାଚନକୁ ଆଉ କିଛି ମାସ ଥିବାବେଳେ ସଂଗଠନକୁ କିଭଳି ମଜବୁତ୍ କରାଯିବ , ସେ ନେଇ ପୁଙ୍ଖାନୁପଙ୍ଖ ଆଲୋଚନା ହୋଇଛି । ଏହା ସହିତ ରାଜ୍ୟର ରାଜନୈତିକ ସ୍ଥିତି ସମେତ ରଣନୀତି ମଧ୍ୟ ପ୍ରସ୍ତୁତ ହୋଇଛି ବୋଲି କହିଛନ୍ତି ପିସିସି ସଭାପତି ଶରତ ପଟ୍ଟନାୟକ
ସିକ୍ରେଟ ଅଣ୍ଡରଗ୍ରାଉଣ୍ଡ ବଙ୍କର INS Varshaକୁ ନେଇ ଚିନ୍ତାରେ ଚୀନ୍-ପାକିସ୍ତାନ
ନନ୍ଦିଘୋଷ ବ୍ୟୁରୋ : INS Varsha ହେଉଛି ଭାରତର ଗୁପ୍ତ ନୌସେନା ବେସ, ଯେଉଁଠାରେ ଆଣବିକ ବୁଡାଜାହାଜ ରଖାଯିବ । ଏହା ଇଷ୍ଟର୍ନ ନାଭାଲ୍ କମାଣ୍ଡ ଦ୍ୱାରା ପରିଚାଳିତ ହେବ । ଯାହାର ମୁଖ୍ୟାଳୟ ବିଶାଖାପାଟନମରେ ଅଛି । ଏହାପୂର୍ବରୁ ଏହି ବେସର ନିର୍ମାଣ ଗଙ୍ଗାଭାରମରେ ହେବାକୁ ଥିଲା । କିନ୍ତୁ ପରେ ଏହା ବିଶାଖାପାଟନମ ଠାରୁ ୫୦ କିଲୋମିଟର ଦୂର ରାମ୍ବିଲିରେ ନିର୍ମାଣ କରାଯାଉଛି । ନୌସେନା ଏବଂ ପରିବହନ ମନ୍ତ୍ରଣାଳୟର ଜାହାଜଗୁଡ଼ିକ ବିଶାଖାପାଟନମ ବନ୍ଦର ପରିଦର୍ଶନ ଜାରି ରଖିଛନ୍ତି । ଭିଜାଗରେ ସମସ୍ତ ଜାହାଜ ପାର୍କ କରିବାକୁ କୌଣସି ସ୍ଥାନ ବାକି ନାହିଁ । ୨୦୦୬ ମସିହାରେ,୧୫ ଟି ଯୁଦ୍ଧ ଜାହାଜ ଏଠାରେ ସ୍ଥାପିତ ହୋଇଥିଲା । କିନ୍ତୁ ବର୍ତ୍ତମାନ ଏହା ୪୬କୁ ବୃଦ୍ଧି ପାଇଛି । ଏହି ସଂଖ୍ୟା ମଧ୍ୟ ବୃଦ୍ଧି ପାଉଛି । ଅତିକମରେ ୮ ରୁ ୧୨ ବୁଡ଼ାଜାହାଜ INS Varsha ନୌସେନା ବେସରେ ରହିବାକୁ ସକ୍ଷମ ହେବେ ।
ଏହା ନାଭାଲ ଅଲ୍ଟରନେଟିଭ ଅପରେସନ ବେସ ହେବ । ଆସନ୍ତା ବର୍ଷ ସୁଦ୍ଧା ଏହାର ନିର୍ମାଣ କାର୍ଯ୍ୟ ଶେଷ ହେବ ବୋଲି ଅନୁମାନ କରାଯାଉଛି । ଏହି ଆଧାର ନିର୍ମାଣ ପାଇଁ କ୍ଲିୟରାନ୍ସ ୨୦୧୮ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଦାନ କରିଥିଲେ। ସେବେଠାରୁ ଦ୍ରୁତ ଗତିରେ ଏହାର କାର୍ଯ୍ୟ ଚାଲୁଛି । ଯାହାଦ୍ୱାରା ନୌସେନାର ଶକ୍ତି ବୃଦ୍ଧି ହୋଇପାରିବ ।
ବେସ ହେବ ଅଣ୍ଡରଗ୍ରାଉଣ୍ଡ, ବୁଡି ରହିବ ବୁଡାଯାହାଜ
ରାମ୍ବିଲି ନାଭାଲ୍ ବେସ୍ ଆନ୍ଧ୍ରପ୍ରଦେଶର ଆନାକାପାଲ୍ ଜିଲ୍ଲାରେ ପଡିଛି। ଏହାର ଉପସ୍ଥିତି ଭାରତୀୟ ନୌସେନା ଉଭୟ ପୂର୍ବ ଏବଂ ପଶ୍ଚିମ ଉପକୂଳକୁ ସହଜରେ ରକ୍ଷା କରିପାରିବ । ସେର୍ଟେଲାଇଟ ଚିତ୍ରରୁ ଜଣାପଡୁଛି ଯେ, ପ୍ରଥମ ପର୍ଯ୍ୟାୟରେ ଟନେଲନ ନିର୍ମାଣ କରାଯାଇଛି । ଏହୋ ଅର୍ଥ ଏହା ଅଣ୍ଡରଗ୍ରାଉଣ୍ଡ ହେବ ଆଉ ଭୁମିରେ ଦେଖାଯିବ ନାହିଁ ।
ନୌସେନା ବେସ୍ ଆଣବିକ କେନ୍ଦ୍ରର ନିକଟବର୍ତ୍ତୀ
ଏହି ଟନେଲଗୁଡିକ ମଧ୍ୟରେ ୮ରୁ ୧୨ ପରମାଣୁ ଚାଳିତ ବାଲିଷ୍ଟିକ୍ ବୁଡ଼ାଜାହାଜ ଏବଂ ଉର୍ସାଲ୍ଟ ବୁଡ଼ାଜାହାଜ ରଖାଯିବ । ଭାଭା ଏଟୋମିକ ରିସର୍ଚ ସେର୍ଟର (BARC) ର ସୁବିଧା ନିକଟରେ ରହିଛି ଏହି ବେସ । ଏହି କାରଣରୁ ଏହି ସୁବିଧା ମଧ୍ୟ ଅଧିକ ସୁରକ୍ଷିତ ରହିବ । NAOB ରେ ଅଣ୍ଡର ୱାଟର ଟନେଲ ରହିବ, ଯାହା ଭିତରେ ବୁଡ଼ାଜାହାଜ ରଖାଯିବ ।
ଚିନ୍ତାରେ ଚୀନ୍ ଏବଂ ପାକିସ୍ତାନ
ଏହା ବ୍ୟତୀତ ଅନେକ ପ୍ରକାରର ନୌସେନା ଯୁଦ୍ଧ ଜାହାଜ ମଧ୍ୟ ଏଠାରେ ସ୍ଥାପିତ ହୋଇପାରିବ । ଭାରତ ଯେଉଁଭଳି ଭାବରେ ନିଜର ନୌସେନା ଶକ୍ତି ବୃଦ୍ଧି କରୁଛି, ଯାହାକୁ ନେଇ ଚିନ୍ତାରେ ଚୀନ୍ ଏବଂ ପାକିସ୍ଥାନର। ଏହି ବେସର ଉପର ଅଂଶଟି ପାହାଡ଼ିଆ । ଯାହା ଉପରେ ଏକ ଜଙ୍ଗଲ ଅଛି । ଏହା ପ୍ରାୟ ୬୭୦ ହେକ୍ଟର ଉପରେ ବ୍ୟାପିଛି । ଓ୍ବାର୍କର ଦୂରତା ଏଠାରୁ ମାତ୍ର ୨୦ କିଲୋମିଟର ରହିଛି ।
ଆଉ ଜଣେ ସାଲବେଗ, ମୁସଲମାନ ହେଲେ ବି ଜଗନ୍ନାଥଙ୍କ ଭକ୍ତିରେ ନିମଗ୍ନ
କୋରାପୁଟ : ଆଉ ଜଣେ ସାଲବେଗ । ଧର୍ମ ମୁସଲମାନ ,ହେଲେ ଜଗନ୍ନାଥଙ୍କ ଭକ୍ତିରେ ନିମଗ୍ନ । ମୁହଁରୁ ତାଙ୍କ ଅନର୍ଗଳ ବାହାରୁଛି ଜଗନ୍ନାଥ ଚେତନା ଓ ସଂସ୍କୃତିକୁ ନେଇ ପ୍ରବଚନ । ଶ୍ରୀଜିଉଙ୍କ ପ୍ରତି ଭକ୍ତି ତାଙ୍କୁ ଟାଣି ଆଣିଛି ଶାବର ଶ୍ରୀକ୍ଷେତ୍ର । କୋରାପୁଟ ଜଗନ୍ନାଥ ମନ୍ଦିରର ପଚାଶ ବର୍ଷ ପୂର୍ତ୍ତି ଅବସରରେ ପାଳିତ ହୋଇଛି ପଞ୍ଚ ଦିବସୀୟ ସୁବର୍ଣ୍ଣ ଉତ୍ସବ । ଅବସରରେ ଦୁଇଦିନିଆ ଜାତୀୟ ଆଲୋଚନା ଚକ୍ରରେ ଭାଗ ନେବା ପାଈଁ ସୁଦୂର କଲିକତାରୁ ଆସିଥିଲେ ଭାରତବର୍ଷର ଖ୍ୟାତି ସମ୍ପନ୍ନ ଜଗନ୍ନାଥ ଚେତନାର ଗବେଷକ ଶେଖ ମକବୁଲ ଇସଲାମ ।
ସୁଫିପନ୍ଥୀ ଇସଲାମ ଭାବାଦର୍ଶ ସମୃଦ୍ଧ ପରିବାରରେ ଜନ୍ମ ନେଇଥିବା ଡକ୍ଟର ଇସଲାମ ପିଲାଟି ବେଳୁ ମହାପ୍ରଭୁ ଜଗନ୍ନାଥଙ୍କ ପ୍ରତି ଆକର୍ଷିତ ହୋଇଥିଲେ । ଏହି ଆଗ୍ରହ ତାଙ୍କୁ ଜଗନ୍ନାଥ ସଂସ୍କୃତି ଉପରେ ଉଚ୍ଚତର ଶିକ୍ଷା ଗ୍ରହଣ ପାଇଁ ଅନୁପ୍ରାଣିତ କରିଥିଲା । ୨୦୧୫ରେ ନବ କଳେବର ସମୟରେ ପୁରୀ ଶଙ୍କରାଚାର୍ଯ୍ୟଙ୍କ ହସ୍ତରୁ ପାଇଥିବା ନବ କଳେବର ସମ୍ମାନ ତାଙ୍କ ଜୀବନର ଏକ ଅମୂଲ୍ୟ ସମ୍ପଦ ବୋଲି ଡ଼. ଇସଲାମ କହିଛନ୍ତି । ଏହି ଆଲୋଚନା ଚକ୍ରରେ ଡକ୍ଟର ଶେଖ ମକବୁଲ ଇସଲାମ, ସୂର୍ଯ୍ୟନାରାୟଣ ରଥଶର୍ମାଙ୍କ ଭଳି ଅନେକ ଜଗନ୍ନାଥ ସଂସ୍କୃତି ଗବେଷକ ଯୋଗଦେଇଥିଲେ ।

