ଇତିହାସରେ ବିରଳ, ‘ରଙ୍ଗବତୀ’ ଗୀତ ପାଇଁ ବଦଳିଲା ଗାଁର ନାଁ…

ଭୁବନେଶ୍ୱର: ବହୁଚର୍ଚ୍ଚିତ ରଙ୍ଗବତୀ ଗୀତ ଏବେ ପୁଣି ଚର୍ଚ୍ଚାରେ । ଦୀର୍ଘ ଦିନ ହେବ ଲୋକଙ୍କ ଜିଭ ଅଗରେ ରହି ଆସିଥିବା ରଙ୍ଗବତୀ ଗୀତକୁ ନେଇ ପୁଣି ଚର୍ଚ୍ଚା ଆରମ୍ଭ ହୋଇଯାଇଛି । ପୂର୍ବରୁ ସାରା ଓଡ଼ିଶା ସମେତ ଦେଶରେ ମଧ୍ୟ ଏହି ରଙ୍ଗବତୀ ଗୀତ ବେଶ୍‌ ଚହଳ ସୃଷ୍ଟି କରିଥିଲା । ଏହି ଗୀତର ପୁରୁଷ ଗାୟକ ହେଉଛନ୍ତି ବିଶିଷ୍ଟ କଣ୍ଠଶିଳ୍ପୀ ଜିତେନ୍ଦ୍ର ହରିପାଲ୍‌ ।  ଏହି ଗୀତ ପାଇଁ ୨୦୧୭ରେ ତାଙ୍କୁ ପଦ୍ମଶ୍ରୀ ପୁରଷ୍କାରରେ ସମ୍ମାନିତ ମଧ୍ୟ କରାଯାଇଛି । ଏହାର ଗୀତିକାର ଥିଲେ ମିତ୍ରଭାନୁ ଗୌନ୍ତିଆ । ଗୀତିକାର ମିତ୍ରଭାନୁଙ୍କ ଗାଁ ବିଲୁଙ୍ଗର ନାମକରଣ ରଙ୍ଗବତୀ ବିଳୁଙ୍ଗ କରାଯାଇଛି ।  ଓଡ଼ିଶାର ଅନେକ ଲୋକପ୍ରିୟ ଗୀତ ମଧ୍ୟରୁ ରଙ୍ଗବତୀ ଗୀତ ହେଉଛି ଅନ୍ୟତମ । ତେବେ ଗୋଟିଏ ଗ୍ରାମର ନାମକରଣ କୌଣସି ଗୀତ ନାମରେ ହେବା ସମ୍ଭବତଃ ଏହା ପ୍ରଥମ ଘଟଣା । ସମ୍ବଲପୁର ଜିଲ୍ଲାର ବାମରା ତହସିଲ ଅନ୍ତର୍ଗତରେ ଏହି ଗ୍ରାମ ଆସୁଛି ।

State government renames 'Bilung' village under Bamra Tehsil of Sambalpur district as 'Rangabati Bilung' in recognition of the popularity of #Rangabati song. #NandighoshaTV pic.twitter.com/zHnK8GYKxY

— NandighoshaTV (@NandighoshaTV) July 22, 2020

ଗୀତିକାର ମିତ୍ରଭାନୁଙ୍କ ସମ୍ମାନାର୍ଥେ ଏବଂ ପ୍ରଥମ ଥର ସମ୍ବଲପୁରରେ ଏହି ଗୀତ ରେକର୍ଡ ହୋଇଥିବାରୁ ବିଲୁଙ୍ଗ ଗାଁକୁ ଏବେ ରଙ୍ଗବତୀ ବିଲୁଙ୍ଗ ନାଁରେ ନାମିତ କରାଯାଇଛି । ଏଥିପାଇଁ କେନ୍ଦ୍ର ସରକାରଙ୍କ ପକ୍ଷରୁ ନୋ ଅବ୍‌ଜେକ୍ସନ୍‌ ସାର୍ଟିଫିକେଟ୍‌ ମଧ୍ୟ ଆସିସାରିଛି । ଏଭଳି ଘଟଣା ଭାରତ ଇତିହାସରେ ବିରଳ ବୋଲି କୁହାଯାଉଛି । ପୂର୍ବରୁ ଏଭଳି ଏକ ଗୀତ ନାଁରେ କୌଣସି ଗାଁର ନାଁ ପରିବର୍ତ୍ତନ କରାଯାଇଥିବା ନଜିର ନାହିଁ କହିଲେ ଚଳେ ।

ରଙ୍ଗବତୀ ଗୀତ ପ୍ରଥମେ ୧୯୭୫-୭୬ ମସିହାରେ ସମ୍ବଲପୁରର ଅଲ ଇଣ୍ଡିଆ ରେଡିଓ (ଏଆର)ରେ ରେକର୍ଡ କରାଯାଇଥିଲା । ଏହାର ବ୍ୟାପକ ଲୋକପ୍ରିୟତା ପରେ, ଇଣ୍ଡିଆନ୍ ରେକର୍ଡ ମାନୁଫକ୍ଚରିଂ କମ୍ପାନୀ ଲିମିଟେଡ୍ (INRECO), ଏହି ଗୀତକୁ ୧୯୭୬ରେ ଡିସ୍କ ଫର୍ମାଟରେ ରେକର୍ଡ କରାଯାଇଥିଲା । କିନ୍ତୁ ଏହି ଡିସ୍କ ୧୯୭୮-୭୯ରେ ମୁକ୍ତିଲାଭ କରିଥିଲା । ଏହି ଗୀତ ମ୍ୟୁଜିକ୍‌ କମ୍ପୋଜର ଥିଲେ ସ୍ୱର୍ଗତ ପ୍ରଭୂଦତ୍ତ ପ୍ରଧାନ । ଏହି ଗୀତରେ ଜିତେନ୍ଦ୍ର ହରିପାଲଙ୍କ ସହ-ଗାୟକ ହେଉଛନ୍ତି କ୍ରୀଷ୍ଣା ପଟେଲ ।

ଏହି ରଙ୍ଗବତୀ ଗୀତ ୧୯୭୮-୭୯ ମସିହାରେ ବଜାରକୁ ଆସିଥିଲେ ମଧ୍ୟ ୨୦୨୦ରେ ବି ଏହାର ଲୋକପ୍ରିୟତା ଦେଖିବାକୁ ମିଳିଛି । ରଙ୍ଗବତୀ ଏହି ସ୍ୱର ସଂଯୋଜନାକୁ ଅନେକ ଭାଷାରେ ଡବ୍‌ ମଧ୍ୟ କରାଯାଇଛି । ସୋସିଆଲ ମିଡିଆରେ ଗୀତର ରିମେକ୍‌ ଦେଖିବାକୁ ମିଳିବ ।