୧୦୩ ବର୍ଷ ପରେ ଭାରତର ଅନେକ ସ୍ଥାନରେ ତାପମାତ୍ରା ୪୩ ଡିଗ୍ରୀ ପାର୍
ନନ୍ଦିଘୋଷ ବ୍ୟୁରୋ: ସୂର୍ଯ୍ୟଙ୍କ ଉତ୍ତାପ, ଗରମ ପବନ ଏବଂ ମାତ୍ରାଧିକ ତାପମାତ୍ରା ଏବେ ଏପ୍ରିଲ୍ ମାସରେ ଦେଖିବାକୁ ମିଳିଛି । ଏହି ମାସରେ ସମସ୍ତ ରେକର୍ଡ ଭାଙ୍ଗିଛି ତାତି । ୧୦୩ ବର୍ଷ ପରେ ଅନେକ ସ୍ଥାନରେ ତାପମାତ୍ରା ୪୩ ଡିଗ୍ରୀରେ ପହଞ୍ଚିଛି । ମେ ମାସରେ ପାଗ କିପରି ହେବ ସେନେଇ ପାଣିପାଗ ବିଭାଗ ସୂଚନା ଦେଇଛି।
ପାଣିପାଗ ବିଭାଗ ୧୯୨୧ ରୁ ୨୦୨୪ ମଧ୍ୟରେ ଏପ୍ରିଲ୍ ମାସ ତାପମାତ୍ରାର ତଥ୍ୟ ସେୟାର କରିଛି। ଏହି ତଥ୍ୟ ଦର୍ଶାଉଛି ଯେ ଦେଶର ଅନେକ ସ୍ଥାନରେ ଏହା ସବୁଠାରୁ ଗରମ ମାସ । ଆଗାମୀ ପାଞ୍ଚ ଦିନ ମଧ୍ୟରେ ତାପମାତ୍ରା ଆହୁରି ଅଧିକ ହେବାକୁ ଯାଉଛି । ଆଇଏମଡି ଅନୁଯାୟୀ, ଦେଶର ପୂର୍ବ ଏବଂ ଦକ୍ଷିଣ ଦ୍ୱୀପପୁଞ୍ଜରେ ଲୁର ପ୍ରଭାବ ଦେଖିବାକୁ ମିଳୁଛି।
ଏହି ତୀବ୍ର ଉତ୍ତାପ ଆସନ୍ତା ପାଞ୍ଚ ଦିନ ପର୍ଯ୍ୟନ୍ତ ଜାରି ରହିବ । ଏହି ସମୟ ମଧ୍ୟରେ ଯେଉଁ ସ୍ଥାନରେ ମତଦାନ ହେବାକୁ ଅଛି ସେହି ସ୍ଥାନରେ ଅତ୍ୟଧିକ ଗରମ ଅନୁଭୂତ ହେବ । ପଶ୍ଚିମବଙ୍ଗ, ବିହାର, ଝାଡଖଣ୍ଡ ଏବଂ ଓଡିଶାର କେତେକ ସ୍ଥାନରେ ହିଟୱେଭର ସମ୍ଭାବନା ରହିଛି। ଏହା ବ୍ୟତୀତ କର୍ଣ୍ଣାଟକ, ତେଲେଙ୍ଗାନା ଏବଂ ଆନ୍ଧ୍ରପ୍ରଦେଶର କେତେକ ସ୍ଥାନରେ ଭୀଷଣ ଗରମ ଅନୁଭୂତ ହେବ ।
ଏପ୍ରିଲ ଏବଂ ମେ ବିଷୟରେ ପାଣିପାଗ ବିଭାଗ ପୂର୍ବରୁ ମଧ୍ୟ କହିଥିଲା ଯେ ଏହି ଦୁଇ ମାସ ଅନ୍ୟ ବର୍ଷ ଅପେକ୍ଷା ଅଧିକ ଗରମ ହୋଇପାରେ। ପ୍ରଧାନମନ୍ତ୍ରୀ ମୋଦୀଙ୍କ ସହ ହୋଇଥିବା ବୈଠକରେ ପାଣିପାଗ ବିଭାଗର ଅଧିକାରୀମାନେ ଏହା କହିଛନ୍ତି। ପ୍ରବଳ ଗରମ କାରଣରୁ ଦୁଇଟି ପର୍ଯ୍ୟାୟ ଭୋଟିଂ ପ୍ରଭାବିତ ହୋଇଛି ।
ଦ୍ୱିତୀୟ ପର୍ଯ୍ୟାୟ ମତଦାନ ପରେ କେତେକ ରାଜ୍ୟର ଅଧିକାରୀମାନେ ମଧ୍ୟ ଏହା ଉଲ୍ଲେଖ କରିଥିଲେ। ତଥ୍ୟ ଅନୁଯାୟୀ, ହିଟୱେଭ ସୂଚକାଙ୍କ ଅନୁସାରେ ତାପମାତ୍ରା ୪୦ ରୁ ୫୦ ଡିଗ୍ରୀ ସେଲସିୟସ ଦେଖାଯାଉଛି । ଏହି ସୂଚକାଙ୍କ କେରଳ ସମେତ ପୂର୍ବ ଉପକୂଳର ଅନେକ ସ୍ଥାନରେ ୫୦ ରୁ ୬୦ ଡିଗ୍ରୀ ସେଲସିୟସକୁ ବୃଦ୍ଧି ପାଇଛି ।
ଆଗାମୀ ୨ ଦିନ ମଧ୍ୟରେ ପୂର୍ବ ଭାରତରେ ସର୍ବାଧିକ ତାପମାତ୍ରା ୧ ରୁ ୨ ଡିଗ୍ରୀ ସେଲସିୟସ ବୃଦ୍ଧି ହେବାର ସମ୍ଭାବନା ଅଛି ।
ଆଗାମୀ ୪ ରୁ ୫ ଦିନ ମଧ୍ୟରେ କେନ୍ଦ୍ରୀୟ ଭାରତର ସର୍ବାଧିକ ତାପମାତ୍ରା ୨ ରୁ ୪ ଡିଗ୍ରୀ ସେଲସିୟସ ବୃଦ୍ଧି ପାଇପାରେ । ତାମିଲନାଡୁର ସର୍ବାଧିକ ତାପମାତ୍ରା ଆସନ୍ତା ୩ ରୁ ୪ ଦିନରେ ୨ ରୁ ୩ ଡିଗ୍ରୀ ସେଲସିୟସ ବୃଦ୍ଧି ହେବାର ସମ୍ଭାବନା ରହିଛି।
