ଚୀନ୍ ପୁଣିଥରେ କେନ୍ଦ୍ର ଶାସିତ ଲଦାଖକୁ ମାନ୍ୟତା ଦେବାକୁ ମନା କରିଦେଇଛି । ଯାହାର ଅର୍ଥ ହେଉଛି ଚୀନ୍ ଏହାକୁ ଭାରତର ଅଂଗ ବୋଲି ମନେ କରୁନି । ଚୀନ କହିବା ହେଉଛି ଭାରତ ଲଦାଖ ଉପରେ ଅବୈଧ କବଜା କରିଛି । ୭ ନଭେମ୍ବର ୧୯୫୯ ଦିନ ସୀମାରେ ଯିଏ ଯେଉଁଠି ଥିଲା ତାହା ହିଁ ଏଲଏସି ବା ଲାଇନ୍ ଅଫ୍ ଆକଚୁଆଲ କଣ୍ଟ୍ରୋଲ ବୋଲି ଚୀନ୍ କହୁଛି ।  ଆସନ୍ତୁ ଜାଣିବା ଚୀନ୍ ବାରମ୍ବାର କାହିଁକି ୧୯୫୯ କଥା କହି ମ୍ୟାକମୋହନ ଲାଇନକୁ ମାନିବାକୁ ମନା କରୁଛି ।

ଲାଇନ୍ ଅଫ୍ ଆକଚୁଆ କଣ୍ଟ୍ରୋଲ କ’ଣ ?

୧୯୬୨ରେ ହିମାଳୟର ବରଫ ଭୂଇଁରେ ଡ୍ରାଗନ ସହ ମୁହାଁମୁହିଁ ହୋଇଥିଲା ଭାରତ । ନେହେରୁଙ୍କ ଜିଓପଲିଟିକ୍ସ ଜ୍ଞାନ ଅଭାବ କାରଣରୁ ଅପ୍ରସ୍ତୁତ ଭାରତୀୟ ସେନା ଲଜ୍ଜଜନକ ପରାଜୟର ସମ୍ମୁଖୀନ ହୋଇଥିଲା ।  ତେବେ ଆମେରିକାର ସମ୍ଭାବ୍ୟ ହସ୍ତକ୍ଷେପ ଆଶଙ୍କାରେ ଚୀନ ଅଧିକ ଦିନ ଯୁଦ୍ଧ କରିନଥିଲା । ଯୁଦ୍ଧ ପରେ ଯଏ ଯେଉଁଠି ଥିଲେ ସେଇଠି ରହିଲେ । ମାନେ ଭାରତୀୟ ସେନା ଯେଉଁଠି ଥିଲେ ସେଇଠି, ଚିନ୍ ସେନା ଯେଉଁଠି ଥିଲା ସେଇଠି ତମ୍ବୁ ପକାଇଦେଲା । ଏହାପରେ ଆସିଲା ୧୯୯୩ । ୧୯୮୯୩ ମସିହାରେ ଦୁଇ ଦେଶ ମଧ୍ୟରେ ଗୋଟିଏ ଚୁକ୍ତି ହୁଏ । ଏହି ଚୁକ୍ତି ଅନୁସାରେ ଯେଉଁ ଅଂଚଳ ଦୁଇ ଦେଶର ସେନାର କବଜାର ଥିଲା ତାକୁ ଗୋଟିଏ ନୂଆ ନାମ ଦିଆଗଲା । ଏଲଏସି ବା ଲାଇନ୍ ଅଫ ଆକଚୁଆଲ କଣ୍ଟ୍ରୋଲ । ହିମାଚଳ ଓ ଲଦାଖରେ ଏହି ଏଲଏସି ରହିଛି । ଏଲଏସି ମଧ୍ୟରୁ ଅଧିକାଂଶ ଅଂଚଳ ଭାରତୀୟ ସୀମାରେ ରହିଛି । ଅନ୍ୟପକ୍ଷରେ ଉତ୍ତର ପୂର୍ବ ଭାରତର ଚୀନ ସହ ଲାଗିଥିବା ସୀମାକୁ ମ୍ୟାକମୋହନ ଲାଇନ୍ ବୋଲି କୁହାଯାଇଥାଏ । ତେବେ ଚୀନ୍ ସବୁବେଳେ ଏହି ମ୍ୟାକମୋହନ ଲାଇନକୁ ମାନିବାକୁ ମନା କରିଥାଏ ।

୧୯୫୯ ବେଳକୁ ଭାରତ ଓ ଚୀନ ସେନା ମଧ୍ୟରେ ଛୋଟମୋଟ ସଂଘର୍ଷ ଆରମ୍ଭ ହୋଇଯାଇଥିଲା । ଏହି ସମୟରେ ଚୀନର ପ୍ରିମିୟର ଥିଲେ ଝାଉ ଏନ୍ ଲାଇ । ଝାଉ,ନେହେରୁଙ୍କୁ ଚିଠି ଲେଖି କହିଲେ ଚୀନ୍ ମ୍ୟାକମୋହନ ଲାଇନକୁ ମାନେ ନାହିଁ । ଚୀନ ଉପରେ ଏହାକୁ ବ୍ରିଟିଶ ସରକାର ଲଦିଥିଲେ । ଆମେ ମାନୁନୁ ।  ଚୀନ ଓ ଭାରତ ମଧ୍ୟରେ ଆଧିକାରିକ ସୀମା ନିର୍ଧାରିତ ହୋଇନାହିଁ । ଭାରତ ୧୮୬୫ର ଜନସନ୍ ଲାଇନ୍ ପଶ୍ଚିମ କ୍ଷେତ୍ରରେ ସୀମା ଭାବେ ଦାବି କରେ ଅନ୍ୟପକ୍ଷରେ ଚୀନ୍ ୧୮୯୯ର ମୈକାର୍ଟନି-ମେକଡୋନାଲ୍ଡ ଲାଇନକୁ ସୀମା ବୋଲି ମାନେ ।

ପ୍ରଥମ ଚିଠି ଲେଖିବା ପରେ ୭ ନଭେମ୍ବର ୧୯୫୯ରେ ଚୀନ୍ ପ୍ରିମିୟର ଝାଉ ଏନ୍ ଲାଇ ପୁଣି ଗୋଟିଏ ଚିଠି ଲେଖିଥିଲେ । ଏଥିରେ ସେ ନେହେରୁଙ୍କ ଆଗରେ ଭାରତୀୟ ସେନା ଓ ଚୀନ୍ ସେନା ୨୦ କିଲୋମିଟର ପଛକୁ ଫେରନ୍ତୁ ବୋଲି ଦାବି କରିଥିଲେ । ନେହେରୁ ଏହାକୁ ମାନିବାକୁ ମନା କରିଥିଲେ । କାରଣ ଚୀନ୍ ସେନା ଭାରତୀୟ ସୀମା ଭିତରେ ଥିଲା । ଚୀନ୍ ସେନା ୨୦ କିଲୋମିଟର ପଛକୁ ଫେରିଲେ ମଧ୍ୟ ଭାରତୀୟ ସୀମା ଭିତରେ ରହୁଥିଲା । ଆଉ ଭାରତୀୟ ସେନା ଯଦି ପଛକୁ ଫେରୁଥିଲା ତେବେ ଅଧିକ ୨୦ କିଲୋମିଟର ଅଂଚଳ ଉପରୁ ନିଜ ଦାବି ଛାଡୁଥିଲା । କାରଣ ଏମିତିରେ ବି ଭାରତୀୟ ସେନା ନିଜ ସୀମା ଭିତରେ ହିଁ ଥିଲା । ନେହେରୁ ପଛକୁ ଫେରିବାକୁ ମନା କରିବା ପରେ ହିଁ ଚୀନ୍ ଯୁଦ୍ଧ ପ୍ରସ୍ତୁତି ଆରମ୍ଭ କରିଥିଲା ।

୧୯୬୨ ମସିହାରେ ଚୀନରେ ଦୁର୍ଭିକ୍ଷ ପଡିଥିଲା । ଦୁର୍ଭିକ୍ଷରୁ ନଜର ହଟାଇବାକୁ ମାଓ ଭାରତ ଉପରେ ଆକ୍ରମଣ ଆରମ୍ଭ କରିଥିଲେ । କାରଣ ଦେଶରେ ଖାଦ୍ୟ ନଥିଲା । ଲୋକ ପୋକମାଛି ଭଳି ମରୁଥିଲେ । ଏମିତିରେ ଲୋକଙ୍କ ଆଗରେ ଭାରତକୁ ଶତ୍ରୁ କରି ଛିଡା କରାଇଥିଲେ ମାଓ । ଏବେ ଠିକ୍ ସେହି ପରିସ୍ଥିତି ଚୀନରେ ଦେଖିବାକୁ ମିଳୁଛି । କରୋନା,ପଙ୍ଗପାଳ ଚୀନକୁ ବେହାଲ କରି ଦେଇଛନ୍ତି । ଚୀନରେ ଖାଦ୍ୟ ସଂକଟ ଏମିତି ଯେ, ରାଷ୍ଟ୍ରପତି ସି ଜିନ୍ ପିଙ୍ଗ୍ କ୍ଲିନ୍ ୟୋର ପ୍ଲେଟ୍ କ୍ୟାମ୍ପେନ ୨୦୧୩ରେ ପରେ ପୁଣିଥରେ ଆରମ୍ଭ କରିଛନ୍ତି । ଏହାକୁ ସି ପିଙ୍ଗଙ୍କ ବିଫଳତା ଭାବେ ତାଙ୍କ ବିରୋଧୀ ଦେଖୁଛନ୍ତି । ଏମିତିରେ ଜିନ୍ ପିଙ୍ଗ୍ ଭାରତ ସହ ମୋର୍ଚ୍ଚା ଖୋଲିବାକୁ ତତ୍ପର ଅଛନ୍ତି । ଆଉ ଲାଇନ୍ ଅଫ୍ ଆକଚୁଆଲ କଣ୍ଟ୍ରୋଲ ହେଉଛି ଭଲ ବାହନା । ତେଣୁ ଚୀନ୍ ସେନା ଓ କମ୍ୟୁନିଷ୍ଟ ନେତୃତ୍ୱକୁ ଏବେ ୧୯୫୯ ମନେ ପଡୁଛି ।