spot_img
Home Blog Page 6005

୧୯୨୧ ମସିହା ଆଜିର ଦିନରେ ଓଡ଼ିଶା ଆସିଥିଲେ ମହାତ୍ମା ଗାନ୍ଧୀ

ଭୁବନେଶ୍ୱର: ଶହେ ବର୍ଷ ପୂର୍ବେ ଆଜିର ଦିନରେ ଓଡ଼ିଶା ଆସିଥିଲେ ଜାତିର ପିତା ମହାତ୍ମା ଗାନ୍ଧି । ୧୯୨୧ ମସିହା ମାର୍ଚ୍ଚ ୨୩ ତାରିଖରେ ଓଡିଶା ଗସ୍ତରେ ଆସିଥିଲେ ଜାତିର ପିତା ମହାତ୍ମା ଗାନ୍ଧି । କଟକରେ ଏକ ପଦଯାତ୍ରା କରି ପୁରୀଘାଟରେ ହଜାର ହଜାର ଲୋକଙ୍କୁ ସମ୍ବୋଧିତ କରିଥିଲେ ଗାନ୍ଧି । ଏହି ଐତିହାସିକ ଦିବସକୁ ଆଜି ପୁରିଛି ଶହେ ବର୍ଷ । ଏହି ଅମୂଲ୍ୟ ସମୟକୁ ସ୍ମରଣ କରିବା ପାଇଁ କଟକ ଷ୍ଟେସନରୁ ଏକ ବିରାଟ ପଦଯାତ୍ରାର ଆୟୋଜନ କରାଯାଉଛି । ଏଥିରେ ପ୍ରଜ୍ଞାପନ ମେଢ ସହ ବାଚସ୍ପତି, ପିସିସି ସଭାପତି, କଟକ ସାଂସଦ ଓ ଜିଲ୍ଲାପାଳ ସହ ବହୁ ଗାନ୍ଧୀ ପ୍ରେମୀ ଯୋଗ ଦେବାର କାର୍ଯ୍ୟକ୍ରମ ରହିଛି ।

ଗାନ୍ଧୀଜି କଟକ ଗସ୍ତ ବେଳେ ସ୍ୱରାଜ ଆଶ୍ରମରେ ରାତ୍ରିଯାପନ କରିଥିବାରୁ ଶତବାର୍ଷିକୀ ଅବସରରେ ଏକ ଡାକ ଟିକେଟକୁ ଉନ୍ମୋଚନ କରିବେ ସଂସ୍କୃତି ମନ୍ତ୍ରୀ । ଏଥି ସହ କଟକ ଦରଘାବଜାର ପୁରୁଣା ଜେଲ ପଡିଆରେ ଏକ ସୁନ୍ଦର ପ୍ରଦର୍ଶନୀର ଆୟୋଜନ କରାଯାଉଛି । ଏଥିରେ ଗାନ୍ଧୀଜୀଙ୍କ ପିଲା ବେଳ, ସଂଗ୍ରାମୀ ଜୀବନ ଓ ଭାରତୀୟ ସ୍ୱାଧୀନତା ସଂଗ୍ରାମର ବିଭିନ୍ନ କଥା ଚିଠି, ଫଟୋ ଓ ପୋଷ୍ଟର ଆକାରରେ ସ୍ଥାନ ପାଇଛି। ଏଠାରେ ଗାନ୍ଧୀଜୀଙ୍କ ଚରଖା ଓ ପୁରୀଘାଟ ସଭାର ଦରି ମଧ୍ୟ ପ୍ରଦର୍ଶିତ ହୋଇଛି । ଗାନ୍ଧିଜୀଙ୍କ ଓଡ଼ିଶା ଆଗମନର ଶତ ବର୍ଷ ପୂର୍ତ୍ତି ଅବସରରେ କଟକ ଦରଘା ବଜ଼ାର ଜେଲ ପଡିଆରେ ଆୟୋଜିତ ହୋଇଛି ଗାନ୍ଧୀ ସ୍ମୃତି ପଦର୍ଶନୀ । ଏଥିରେ ବାପୁଜୀଙ୍କ ଜୀବନିର ଓଡିଶା କଟକ ସହିତ, ଅନେକ ସ୍ମୃତି ସ୍ଥାନ ପାଇଛି ।

ସେହି ସ୍ମୃତିକୁ ମନେ ପକାଇବା ପାଇଁ ଆଜି ବିଧାନସଭାରେ କେବଳ ବାପୁଙ୍କ ଉପରେ ହେବ ଆଲୋଚନା । ଜାତିର ପିତା ମହାତ୍ମା ଗାନ୍ଧୀଙ୍କ ଓଡ଼ିଶା ଆଗମନକୁ ଆଜି ଶହେ ବର୍ଷ ପୁରୁଥିବାରୁ ବିଧାନସଭାରେ ସ୍ୱତନ୍ତ୍ର ଆଲୋଚନା ହେବ । ଗୃହରେ ସଙ୍କଳ୍ପ ଅଣାଯିବା ସହ ପାରିତ କରାଯିବ । ପ୍ରଶ୍ନକାଳ, ଶୂନ୍ୟକାଳ, ମୂଲତବୀ ପ୍ରସ୍ତାବ ଆଲୋଚନାକୁ ବାତିଲ କରାଯାଇ ଗୃହରେ ସ୍ୱତନ୍ତ୍ର ଆଲୋଚନା କରାଯିବ । ସକାଳ ୧୦ଟା ୩୦ ମିନିଟରୁ ଅପରାହ୍ନ ଗୋଟାଏ ୩୦ ମିନିଟ ପର୍ଯ୍ୟନ୍ତ ଚାଲିବ ମହାତ୍ମା ଗାନ୍ଧୀଙ୍କ ଉପରେ ଚାଲିବ ଆଲୋଚନା । ବିଶେଷକରି ମହାତ୍ମା ଗାନ୍ଧୀଙ୍କ ଓଡ଼ିଶା ଆଗମନର ବିଭିନ୍ନ ଦିଗ ଉପରେ ଆଲୋଚନା କରାଯିବ ବୋଲି ସୂଚନା ଦେଇଛନ୍ତି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ।

ବାପୁଙ୍କ ଓଡ଼ିଶା ଆଗମନର ୧୦୦ ବର୍ଷ ପୂର୍ତ୍ତି ପାଳନ ଓଡ଼ିଶା ପାଇଁ ଆନନ୍ଦର ବିଷୟ ଅଟେ । ମହାତ୍ମାଙ୍କର ଓଡ଼ିଶାବାସୀଙ୍କ ସହ ଥିବା ସମ୍ପର୍କ ବେଶ ଚିରସ୍ମଣରୀ । ବାପୁଙ୍କ ଜୀବନୀ, ଆଦର୍ଶ ଓ ସ୍ୱାଧୀନତା ସଂଗ୍ରାମରେ ଅବଦାନ ଅବିସ୍ମରଣୀୟ ଅଟେ । ମହାତ୍ମାଙ୍କ ଓଡ଼ିଶା ଆଗମନର ୧୦୦ ବର୍ଷ ପୂର୍ତ୍ତି ଅବସରରେ ଅହିଂସା ଶଦ୍ଦକୁ ଭାରତୀୟ ସମ୍ବିଧାନର ମୁଖବନ୍ଧରେ ସ୍ଥାନିତ କରାଗଲେ ଏହା ବାପୁଙ୍କ ପ୍ରତି ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ । ଏହି ସମ୍ବନ୍ଧରେ ବିଧାନସଭାରେ ଏକ ସଂକଳ୍ପ ଆସିପାରେ ।

ଜୁନ୍ ୩୦ ଯାଏଁ ବଢ଼ିଲା ଲର୍ଣ୍ଣିଂ ଲାଇସେନ୍ସ ଅବଧି

ଭୁବନେଶ୍ୱର: ଗାଡ଼ି ଚାଳକଙ୍କ ପାଇଁ ଖୁସି ଖବର । ରାଜ୍ୟରେ ବଢ଼ିଲା ଲର୍ଣ୍ଣିଂ ଲାଇସେନ୍ସ ଅବଧି । ଡ୍ରାଇଭିଂ ଲାଇସେନ୍ସ ଆବେଦନ କରିବାକୁ ଚାହୁଁଥିବା ବ୍ୟକ୍ତିମାନେ ଜୁନ ୩୦ ଯାଏଁ ଆବେଦନ କରିପାରିବେ । ଏନେଇ ରାଜ୍ୟ ସରକାରଙ୍କର ପରିବହନ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।

ଯେଉଁମାନଙ୍କର ଲର୍ଣ୍ଣିଂ ଲାଇସେନ୍ସ ଅବଧି ସରିଯାଇଥିବ, ତେବେ ତାହାକୁ ବୈଧ ଘୋଷଣା କରାଯିବ । କରୋନାର ଲେଉଟାଣୀକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଛି । ଡିଏଲ କରିବା ପାଇଁ ଅନେକ ଏଲଏଲଧାରୀ ଅପେକ୍ଷାରେ ରହିଛନ୍ତି । ଏଭଳି ସ୍ଥିତିରେ ଆବେଦନର ସମୟ ସୀମାକୁ ବୃଦ୍ଧି କରାଯାଇଛି । ପୂର୍ବ ବର୍ଷ କରୋନାର ଭୟବହତାକୁ ଦେଖି ମାର୍ଚ୍ଚ ୩୧ ପର୍ଯ୍ୟନ୍ତ ଲର୍ଣ୍ଣିଂ ଲାଇସେନ୍ସ ଅବଧି ବୃଦ୍ଧି କରାଯାଇଥିଲା । କିନ୍ତୁ ଏବେ ପୁଣି ସେହି କରୋନା ସଂକ୍ରମଣକୁ ଦୃଷ୍ଟିରେ ରଖି ଜୁନ୍ ୩୦ ପର୍ଯ୍ୟନ୍ତ ଏହାକୁ ବୃଦ୍ଧି କରାଯାଇଛି । ଏହି ସମୟ ମଧ୍ୟରେ ନୂଆ ଗାଡ଼ି ଚାଳକଙ୍କ ସମେତ ସମସ୍ତ ଲର୍ଣ୍ଣିଂ ଲାଇସେନ୍ସଧାରୀ ଡ୍ରାଇଭିଂ ଲାଇସେନ୍ସ ଆବେଦନ କରିପାରିବେ । ଏସମ୍ପର୍କରେ ଏସ୍ଟିଏ ତରଫରୁ ଟୁଇଟ୍‌ ଜରିଆରେ ସୂଚନା ଦିଆଯାଇଛି ।

ସରଗରମ ପିପିଲା ଉପନିର୍ବାଚନ: ରାତି ପାହିଲେ ବିଜ୍ଞପ୍ତି, ପ୍ରାର୍ଥୀ ଘୋଷଣା ପରେ ଜୋରଦାର ହେବ ପ୍ରଚାର

ପିପିଲି: ପିପିଲି ଉପନିର୍ବାଚନ ପାଇଁ ମଙ୍ଗଳବାର ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବ । ଏହାସହ ଆରମ୍ଭ ହେବ ପ୍ରାର୍ଥିପତ୍ର ଦାଖଲ ପ୍ରକ୍ରିୟା । ଏଥିପାଇଁ ରାଜ୍ୟର ତିନି ପ୍ରମୁଖ ରାଜନୈତିକ ଦଳ ବିଜେଡି, ବିଜେପି ଓ କଂଗ୍ରେସ ପ୍ରାର୍ଥୀ ଚୟନକୁ ନେଇ ଘଣ୍ଟା ଚକଟା ଆରମ୍ଭ କରିଦେଇଛନ୍ତି । ତେବେ ଏଯାଏଁ କୌଣସି ଦଳ ନିଜ ପ୍ରାର୍ଥୀଙ୍କ ନାଁ ଘୋଷଣା କରିନଥିଲେ ମଧ୍ୟ ବିଜେପି ଓ ବିଜେଡିର ପ୍ରାର୍ଥୀ ପ୍ରାୟତଃ ସ୍ଥିର ହୋଇସାରିଥିବା କୁହାଯାଉଛି । କିନ୍ତୁ କଂଗ୍ରେସ ପକ୍ଷରୁ ଏଯାଏଁ ପ୍ରାର୍ଥୀ କିଏ ହେବ ସେନେଇ ବିଚାର ବିମର୍ଷ ଚାଲିଛି । ଲାଗୁଛି ସତେ ଯେମିତି କଂଗ୍ରେସ ପ୍ରାର୍ଥୀ ଚୟନକୁ ନେଇ ଚିନ୍ତାରେ ପଡ଼ିଛି ।

ସେପଟେ ବିଜେଡି ୩୦ରୁ ୩୫ହଜାର ଭୋଟ୍ ବ୍ୟବଧାନରେ ଜିତିବ ବୋଲି ବିଜେଡି ବିଧାୟକ ଉମାକାନ୍ତ ସାମନ୍ତରାୟ ଦୃଢ଼ୋକ୍ତି ପ୍ରକାଶ କରିଛନ୍ତି । ଏଥିଲାଗି ଦଳ ସବୁପ୍ରକାର ପ୍ରସ୍ତୁତି ମଧ୍ୟ କରି ସାରିଥିବା କହିଛନ୍ତି ଶ୍ରୀ ସାମନ୍ତରାୟ । ସେହିପରି ବିଜେପିର ପ୍ରାର୍ଥୀ ମଧ୍ୟ ସ୍ଥିର ହୋଇସାରିଥିବା ଦଳ ପକ୍ଷରୁ କୁହାଯାଇଛି । ଗତଥର ଯାହାଙ୍କୁ ପ୍ରାର୍ଥୀ କରାଯାଇଥିଲା, ଏକରକମର ତାଙ୍କୁ ହିଁ ପ୍ରାର୍ଥୀ କରିବା ଚୂଡାନ୍ତ ବୋଲି ଭିତିରି ସୂଚନା ମିଳିଛି । କେବଳ ବିଜେପି ସଂସଦୀୟ ବୋର୍ଡର ସ୍ୱୀକୃତିକୁ ଅପେକ୍ଷା ରହିଛି । ଉପରୁ ନିର୍ଦ୍ଦେଶ ଆସିଲେ ପ୍ରାର୍ଥୀଙ୍କ ନାଁ ଘୋଷଣା କରିବ ବିଜେପି । ସେହିପରି କଂଗ୍ରେସ ବିଧାୟକ ସୁରେଶ ରାଉତରାୟ କହିଛନ୍ତି, ପିପିଲିରେ କଂଗ୍ରେସ ବିଜୟ ଲାଭ କରିବ । ୫ ଜଣ ଆଶାୟୀ ପ୍ରାର୍ଥୀ ଅଛନ୍ତି, ଦିନେ ଦୁଇ ଦିନ ଭିତରେ ଜଣଙ୍କ ନାଁ ଘୋଷଣା କରାଯିବ ।

ତେବେ ଆସନ୍ତା ଏପ୍ରିଲ୍ ୧୭ ତାରିଖରେ ପିପିଲି ଉପନିର୍ବାଚନ ହେବ । ମାର୍ଚ୍ଚ ୩୦ ପ୍ରାର୍ଥୀପତ୍ର ଦାଖଲର ଶେଷ ତାରିଖ, ମାର୍ଚ୍ଚ ୩୧ରେ ପ୍ରାର୍ଥୀପତ୍ର ଯାଞ୍ଚ ହେବ । ପ୍ରାର୍ଥୀପତ୍ର ପ୍ରତ୍ୟାହାରର ଶେଷ ତାରିଖ ଏପ୍ରିଲ୍ ୩ । ଏପ୍ରିଲ୍ ୧୭ରେ ଭୋଟ୍ ହେବ । ମେ’ ୨ ତାରିଖରେ ଭୋଟ୍ ଗଣତି ସହ ଫଳାଫଳ ପ୍ରକାଶ ପାଇବ । ୨୦୨୦ ଅକ୍ଟୋବର ୪ ତାରିଖରେ ପିପିଲି ବିଧାୟକ ପ୍ରଦୀପ ମହାରଥୀଙ୍କ ଦେହାନ୍ତ ହୋଇଥିଲା । ଏହା ପରଠାରୁ ଉପନିର୍ବାଚନ ନେଇ ଲାଗି ରହିଥିଲା କଳ୍ପନାଜଳ୍ପନା ।

ମହାତ୍ମା ଗାନ୍ଧୀଙ୍କ ଓଡିଶା ଯାତ୍ରାକୁ ପୁରିବ ଶହେ ବର୍ଷ, ୭ ଦିନ ପର୍ଯ୍ୟନ୍ତ ଚାଲିବ ସ୍ୱତନ୍ତ୍ର ପ୍ରଦର୍ଶନୀ

ଜାତିର ପିତା ମହାତ୍ମା ଗାନ୍ଧୀଙ୍କ ଓଡିଶା ଯାତ୍ରାକୁ ମଙ୍ଗଳବାର ପୁରିବ ଶହେ ବର୍ଷ । ଏହି ଐତିହାସିକ ଦିବସକୁ ସ୍ମରଣ କରିବା ପାଇଁ କଟକରେ ଆୟୋଜିତ ହେଉଛି ବିଭିନ୍ନ କାର୍ଯ୍ୟକ୍ରମ । କଟକ ଷ୍ଟେସନରୁ ଏକ ପଦଯାତ୍ରା ପ୍ରଜ୍ଞାପନ ମେଢ ସହ ବାହାରି ସହର ପରିକ୍ରମା କରି ବେଲଭ୍ୟୁ ଆସିବ । ଏଥି ସହିତ ପୁରୁଣା ଜେଲ ପରିସରରେ ଗାନ୍ଧୀଙ୍କ ସ୍ମୃତି ବହନ କରୁଥିବା ସାମଗ୍ରୀକୁ ନେଇ ଏକ ପ୍ରଦର୍ଶନୀ ଆୟୋଜିତ ହେବ ।

୧୯୨୧ ମସିହା ମାର୍ଚ୍ଚ ୨୩ ତାରିଖରେ ଓଡିଶା ଗସ୍ତରେ ଆସିଥିଲେ ଜାତିର ପିତା ମହାତ୍ମା ଗାନ୍ଧି । କଟକରେ ଏକ ପଦଯାତ୍ରା କରି ପୁରୀ ଘାଟରେ ହଜାର ହଜାର ଲୋକଙ୍କୁ ସମ୍ବୋଧିତ କରିଥିଲେ ଗାନ୍ଧି । ଏହି ଐତିହାସିକ ଦିବସକୁ ମଙ୍ଗଳବାର ଶହେ ବର୍ଷ ପୁରୁଛି । ତେବେ ଏହି ପ୍ରଜ୍ଞାପନ ମେଢ଼ ସହ ବାଚସ୍ପତି, ପିସିସି ସଭାପତି, କଟକ ସାଂସଦ ଓ ଜିଲ୍ଲାପାଳ ସହ ବହୁ ଗାନ୍ଧୀ ପ୍ରେମୀ ଯୋଗ ଦେବେ । ଏହା ସହର ପରିକ୍ରମା କରି ବେଲଭ୍ୟୁରେ ଶେଷ ହେବ ।

ଏଥି ସହିତ ଗାନ୍ଧୀ ପ୍ରେମୀ କଟକ ଦରଘାବଜାର ପୁରୁଣା ଜେଲ ପଡିଆରେ ଏକ ସୁନ୍ଦର ପ୍ରଦର୍ଶନୀର ଆୟୋଜନ କରାଯାଉଛି । ଏଥିରେ ଗାନ୍ଧୀଜୀଙ୍କ ପିଲା ବେଳ, ସଂଗ୍ରାମୀ ଜୀବନ ଓ ଭାରତୀୟ ସ୍ୱାଧୀନତା ସଂଗ୍ରାମର ବିଭିନ୍ନ କଥା ଚିଠି, ଫଟୋ ଓ ପୋଷ୍ଟର ଆକାରରେ ସ୍ଥାନ ପାଇଛି । ଏଠାରେ ଗାନ୍ଧୀଜୀଙ୍କ ଚରଖା ଓ ପୁରୀଘାଟ ସଭାର ଦରି ମଧ୍ୟ ପ୍ରଦର୍ଶିତ ହୋଇଛି । ଏହା ସାତ ଦିନ ଧରି ଚାଲିବ । ସାଧାରଣ ଲୋକ ଓ ଛାତ୍ରଛାତ୍ରୀ ସକାଳ ଦଶଟାରୁ ରାତି ଦଶଟା ମଧ୍ୟରେ ବୁଲି ପାରିବେ । ଗାନ୍ଧୀଜି କଟକ ଗସ୍ତ ବେଳେ ସ୍ୱରାଜ ଆଶ୍ରମରେ ରାତ୍ରିଯାପନ କରିଥିବାରୁ ଶତବାର୍ଷିକୀ ଅବସରରେ ଏକ ଡାକ ଟିକେଟକୁ ସଂସ୍କୃତି ମନ୍ତ୍ରୀ ଉନ୍ମୋଚନ କରିବେ ବୋଲି ନିଷ୍ପତି ହୋଇଛି ।

ଭୋଟିଂର ୭୨ ଘଣ୍ଟା ପୂର୍ବରୁ ହୋଇପାରିବନି ବାଇକ୍ ରାଲି: ନିର୍ବାଚନ ଆୟୋଗ

କୋଲକାତା: ପଶ୍ଚିମବଙ୍ଗରେ ମାର୍ଚ୍ଚ ୨୭ ତାରିଖରୁ ପ୍ରଥମ ପର୍ଯ୍ୟାୟ ମତଦାନ ଆରମ୍ଭ ହେବାକୁ ଯାଉଛି । ଏହି ପରିପ୍ରେକ୍ଷୀରେ ମତଦାନ ଆରମ୍ଭ ହେବାର ୭୨ ଘଣ୍ଟା ପୂର୍ବରୁ ବିଧାନସଭା ନିର୍ବାଚନମଣ୍ଡଳୀରେ ବାଇକ୍ ରାଲି ଉପରେ ରୋକ୍ ଲଗାଇଛନ୍ତି ନିର୍ବାଚନ ଆୟୋଗ । ଏହି ସମୟରେ ପ୍ରଥମ ପର୍ଯ୍ୟାୟ ଭୋଟ୍ ପୂର୍ବରୁ ମଙ୍ଗଳବାର ଦିନ ନିର୍ବାଚନ ଆୟୋଗର ଫୁଲ୍ ବେଞ୍ଚ ବଙ୍ଗଳା ଗସ୍ତ କରିବ ।

ନିର୍ବାଚନ ଆୟୋଗର ଫୁଲ୍ ବେଞ୍ଚ ବଙ୍ଗଳା ଗସ୍ତ ପୂର୍ବରୁ ସୋମବାର ଦିନ ବଙ୍ଗଳାର ଡେପୁଟି ନିର୍ବାଚନ କମିଶନର ସୁଦୀପ ଜେନା ସୋମବାର ଦିନ ରାଜ୍ୟରେ ପହଞ୍ଚିବାର କାର୍ଯ୍ୟକ୍ରମ ରହିଛି । ସୁଦୀପ ଜେନା ସିଧାସଳଖ ଉତ୍ତର ବଙ୍ଗଳାକୁ ଯିବାର କାର୍ଯ୍ୟକ୍ରମ ରହିଛି । ମାର୍ଚ୍ଚ ୨୩ରେ ଆୟୋଗର ଫୁଲ୍ ବେଞ୍ଚ ଉତ୍ତର ବଙ୍ଗଳାକୁ ଯିବ। ଏହି ବେଞ୍ଚର ସଦସ୍ୟମାନେ ଉତ୍ତର ବଙ୍ଗଳାର ଜିଲ୍ଲାଧିକାରୀଙ୍କ ସହ ଗୁରୁତ୍ୱପୂର୍ଣ୍ଣ ବୖେଠକ କରିବେ।

ସେହିପରି ଭିଡିଓ କନଫରେନ୍ସିଂ ମାଧ୍ୟମରେ ସେମାନେ ଦକ୍ଷିଣ ବଙ୍ଗଳାର ଜିଲ୍ଲାଧିକାରୀଙ୍କ ସହ ମଧ୍ୟ ଆଲୋଚନା କରିବେ ଏବଂ ଭୋଟ୍ ପ୍ରସ୍ତୁତି ସମ୍ବନ୍ଧରେ ବିଚାର ବିମର୍ଶ କରିବେ । ବଙ୍ଗଳାର ପରିସ୍ଥିତିକୁ ଅନୁଧ୍ୟାନ କରିବା ପରେ ୨୬ ମାର୍ଚ୍ଚରେ ସେମାନେ ଦିଲ୍ଲୀ ଫେରିବ।

ଉଲ୍ଲେଖଯୋଗ୍ୟ, ପଶ୍ଚିମବଙ୍ଗ ବିଧାନସଭା ନିର୍ବାଚନ ଘୋଷଣା ପରେ ଏହା ଫୁଲ୍ ବେଞ୍ଚର ପ୍ରଥମ ଗସ୍ତ। ଗତ ଗସ୍ତ ସମୟରେ ମୁଖ୍ୟ ନିର୍ବାଚନ କମିଶନର ପଶ୍ଚିମବଙ୍ଗଳର ଆଇନ ଶୃଙ୍ଖଳା ପରିସ୍ଥିତିକୁ ନେଇ ଅସନ୍ତୋଷ ବ୍ୟକ୍ତ କରିଥିଲେ । ସେପଟେ ନିର୍ବାଚନ ଆୟୋଗର ସ୍ୱତନ୍ତ୍ର ପୋଲିସ ପର୍ଯ୍ୟବେକ୍ଷକ ଆଜି ବାଗଡୋଗରା ଅଭିମୁଖେ ଯାତ୍ରା କରିଛନ୍ତି। ତେବେ ସେ  ଫୁଲ୍ ବେଞ୍ଚ ସହ ଏକ ବୈଠକରେ ଯୋଗଦେବେ ବୋଲି ଜଣାପଡିଛି।

ସାବଧାନ ! ବଢୁଛି ସାଇବର ଅପରାଧର ଗ୍ରାଫ୍, ବର୍ଷକରେ ଦୁଇଗୁଣା ଠକେଇ

ଭୁବନେଶ୍ୱର: ବଢୁଛି ସାଇବର ଅପରାଧର ଗ୍ରାଫ୍ । ବର୍ଷକରେ ଦୁଇଗୁଣା ଠକେଇ । ଓଡ଼ିଶାରେ ଅଦୃଶ୍ୟ ଠକଙ୍କ ଆତଙ୍କ । ନିମିଷକେ ଗାଏବ କରି ଦେଉଛନ୍ତି କୋଟି କୋଟି ଟଙ୍କା । କେତେ ବେଳେ ଲୋଭନାୟ ଅଫର ତ କେତେବେଳେ ବ୍ଳାକମେଲିଂ କରି ଚାଲିଛି କାରବାର । ଇଣ୍ଟରନେଟ୍‌ ଜରିଆରେ ଲୋକଙ୍କୁ ବୋକା ବନାଇ ସାଇବର ଠକ ରାଜ୍ କରୁଛନ୍ତି । ଏମାନଙ୍କୁ ସାବାଡ୍‌ କରିବା ପାଇଁ ରାଜ୍ୟ ସରକାର ଅନେକ ପଦକ୍ଷେପ ନେଉଥିବା ବିଧାନସଭାରେ ଗୃହ ରାଷ୍ଟ୍ରମନ୍ତ୍ରୀ କହିଛନ୍ତି ।

୨୦୨୦ରେ ସାଇବର ଠକ ରାଜ୍ୟରୁ ଲୁଟିଛନ୍ତି ୩୫ କୋଟି । ସାଇବର ଅପରାଧୀଙ୍କ ବିରୋଧରେ ଦଣ୍ଡବିଧାନ ସଂଖ୍ୟା କମ୍‌ ରହିଛି । ବିଧାନସଭାରେ ଏହି ତଥ୍ୟ ଦେଇଛନ୍ତି ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର । ରାଜ୍ୟରେ ସାଇବର ଠକେଇ ରୋକିବା ପାଇଁ କି ପଦକ୍ଷେପ ନିଆଯାଇଛି ବୋଲି ବିଧାୟକ ସୌମ୍ୟରଞ୍ଜନ ପଟ୍ଟନାୟକ ପ୍ରଶ୍ନ କରିଥିଲେ । ମନ୍ତ୍ରୀ କହିଥିଲେ, ସାଇବର ଅପରାଧ ରୋକିବାକୁ କ୍ରାଇମ୍‌ବ୍ରାଞ୍ଚ୍‌ କାମ କରୁଛି । ସମ୍ବଲପୁର, ବ୍ରହ୍ମପୁର ଓ ରାଉରକେଲାରେ ଖୋଲିଛି ସାଇବର ଥାନା । ଆଗାକୁ ସବୁ ଜିଲ୍ଲାରେ ସାଇବର ଥାନା ଖୋଲିବା ପାଇଁ ସରକାର ଯୋଜନା କରୁଛନ୍ତି ବୋଲି ଗୃହ ରାଷ୍ଟ୍ରମନ୍ତ୍ରୀ କହିଛନ୍ତି । ୨୦୧୯ରେ ୧୪୭୫ଟି ସାଇବର ଠକେଇ ମାମଲା ରୁଜୁ ହୋଇଥିବା ବେଳେ ୧୬ କୋଟି ୯ ଲକ୍ଷ ଟଙ୍କା ଠକେଇ ହୋଇଥିଲା । ରାଜ୍ୟ ତଥା ରାଜ୍ୟ ବାହରୁ ୩୪୨ ଜଣ ଗିରଫ ହୋଇଥିବା ବେଳେ ୨ ଜଣ ଦୋଷୀ ସାବ୍ୟସ୍ତ ହୋଇଛନ୍ତି । ୨୦୨୦ରେ ୧୯୩୧ଟି ମାମଲା ରୁଜୁ ହୋଇଥିବା ବେଳେ ୩୫ କୋଟି ୭ ଲକ୍ଷ ଟଙ୍କା ଠକେଇ ହୋଇଥିଲା । ୩୬୬ ଜଣ ଗିରଫ ହୋଇଥିବା ବେଳେ ଜଣେ ବି ଅଭିଯୁକ୍ତଙ୍କୁ ଦଣ୍ଡବିଧାନ ହୋଇନାହିଁ ।

ତେବେ ୨୦୨୧ ଆରମ୍ଭରୁ ଓଡ଼ିଶାରେ ଅଥୟ କଲେଣି ସାଇବର ଠକ । ୩ ମାସରେ ୩ କୋଟି ଗାଏବ ହେଲାଣି । କେବଳ ଭୁବନେଶ୍ୱରରୁ ୩ ମସାରେ ୧ କୋଟିରୁ ଉର୍ଦ୍ଧ୍ୱ ଟଙ୍କା ଲୁଟିଥିବା ସାଇବର ହେଲ୍ପ ଡେସ୍କ ରିପୋର୍ଟ ଦେଇଛି । ଓଟିପି, କାର୍ଡ, କ୍ୟୁଆର କୋଡ୍‌କୁ ସ୍କାନ କରି, ଲୋଭ, ଭୟ, ଗିଫ୍ଟ, ଆକାଉଣ୍ଟ ଭ୍ୟାଲିଡିଟି, କେୱାଇସି, କାର୍ଡ ବନ୍ଦ ହେବାର ଭୟ ଦେଖାଇ ସାଇବର ଅପରାଧୀ ଠକୁଛନ୍ତି । ସାଇବର ଅପରାଧକୁ ରୋକିବା ପାଇଁ ପ୍ରତି ଥାନାରେ ରିସେସ୍ପନ୍‌ସ ଡେସ୍କରେ ସଚେତନ ପୋଷ୍ଟର ଲଗାଯିବ ବୋଲି ଭୁବନେଶ୍ୱର ଡିସିପି କହିଛନ୍ତି । ସାଇବର ଅପରାଧକୁ ରୋକିବାକୁ ହେଲେ ସଚେତନ ହେବା ହିଁ ଉପଯୁକ୍ତ ଉପାୟ ବୋଲି ବିଶେଷଜ୍ଞ କହିଛନ୍ତି ।

ଘରକୁ ଫେରିବା ପାଇଁ ଥାନା ଆଗରୁ ମହିଳା ମାଗିଥିଲେ ଲିଫ୍ଟ, କିନ୍ତୁ ଏଯାଏଁ ପହଞ୍ଚି ନାହାନ୍ତି ଘରେ…

ଖୋର୍ଦ୍ଧା: ଖୋର୍ଦ୍ଧାରେ ଚାଞ୍ଚଲ୍ୟ । ଲିଫ୍ଟ ମାଗି କାରରେ ଘରକୁ ଯାଉଥିବା ମହିଳା ଘରେ ପହଞ୍ଚିଲେନି । ଘଟଣାକୁ ତିନି ଦିନ ବିତିଥିଲେ ମଧ୍ୟ ମହିଳାଙ୍କ କୌଣସି ଖୋଜ ଖବର ନଥିବାରୁ ଚିନ୍ତାରେ ପଡିଛନ୍ତି ସ୍ବାମୀ ଓ ମା । ଏ ନେଇ ବେଗୁନିଆ ଥାନାରେ ଏତଲା ଦେବା ପରେ ପୋଲିସ ଆରମ୍ଭ କରିଛି ତନାଘନା । ମହିଳାଙ୍କ ପାଖରେ ମୋବାଇଲ ନଥିବାରୁ ପୋଲିସ ପାଇଁ ତାଙ୍କୁ ଖୋଜିବା ଏକ ବଡ ଚ୍ୟାଲେଞ୍ଜ ସୃଷ୍ଟି ହୋଇଛି ।

ମହିଳାଙ୍କ ବୟସ ଶୁଭଲଷ୍ମୀ ସେଠି । ବୟସ ୩୭ । ଖୋର୍ଦ୍ଧା ଜିଲ୍ଲା ଟାଙ୍ଗିରେ ସ୍ୱାମୀ ପ୍ରକାଶ ସେଠି ଏବଂ ୧୨ ବର୍ଷର ପୁଅଙ୍କ ସହ ରୁହନ୍ତି । ଗତ ୧୯ ତାରିଖ ଦିନ ଶୁଭଲଷ୍ମୀ ନିଜ ବାପ ଘର ବେଗୁନିଆକୁ ଆସିଥିଲେ । ମାଆ ସହ ରହି ତାଙ୍କର ବ୍ୟକ୍ତିଗତ କାମ ସାରି ୨୦ ତାରିଖ ସକାଳେ ଟାଙ୍ଗି ଯିବା ପାଇଁ ବେଗୁନିଆ ଥାନା ଛକରେ ଅପେକ୍ଷା କରିଥିଲେ । ଏହି ସମୟରେ ଏକ କାର ଯୋଗେ ଲିଫ୍ଟ ନେଇ ଯାଇଥିଲେ ଶୁଭଲକ୍ଷ୍ମୀ । ନିର୍ଦ୍ଧାରିତ ସମୟ ଭିତରେ ଟାଙ୍ଗିରେ ନ ପହଂଚିବାରୁ ସ୍ୱାମୀ ପ୍ରକାଶ ବ୍ୟସ୍ତ ହୋଇ ସବୁଆଡ଼େ ଖୋଜା ଖୋଜାଖୋଜି କରିଥିଲେ । ପତ୍ନୀଙ୍କୁ ନପାଇବାରୁ ବେଗୁନିଆ ଥାନାରେ ସ୍ୱାମୀ ଏତଲା ଦେଲେ । ମହିଳା ଜଣଙ୍କ କାର ଲିଫ୍ଟ ମାଗିବା ପରେ ଘରେ ନ ପହଞ୍ଚିବା ନେଇ ସନ୍ଦେହ ସୃଷ୍ଟି ହୋଇଛି ।

ଘଟଣାକୁ ନେଇ ବେଗୁନିଆ ଥାନାରେ ଏକ ମିସିଂ କେଶ୍‌ ରୁଜୁ ହୋଇଥିବା ବେଳେ ପୋଲିସ ତଦନ୍ତ ଆରମ୍ଭ କରିଛି । ଆଖପାଖ ସମସ୍ତ ଥାନାକୁ ଉକ୍ତ ମହିଳାଙ୍କ ଫୋଟ ପଠା ଯାଇଥିବା ବେଗୁନିଆ ଥାନା ଅଧିକାରୀ କହିଛନ୍ତି । ମହିଳାଙ୍କ ମାଆ ମଧ୍ୟ ନିଜ ୩୭ ବର୍ଷର ଝିଅର ଫଟୋ ଧରି ତାଙ୍କୁ ଉଦ୍ଧାର କରିବା ପାଇଁ ଆକୁଳ ନିବେଦନ କରୁଛନ୍ତି ।

ହସ୍ତକଳାର ଅଦ୍ଭୁତ ପରିକଳ୍ପନା, ବଢ଼ୁଛି ପଥର ଶିଳ୍ପୀ-କାଇଁଚ-ଟେରାକୋଟାର ଚାହିଦା

ଯାଜପୁର: ହସ୍ତକଳାର ଅଦ୍ଭୁତ ପରିକଳ୍ପନା । ସଜେଇ ହୋଇ ରହିଛି ଭଳିକି ଭଳି କଳାକୃତି । ଦେଖିବା ଓ କିଣିବାକୁ ଜମୁଛି ଲୋକଙ୍କ ଭିଡ ।  ହସ୍ତଶିଳ୍ପ କ୍ଷେତ୍ରରେ ରାଜ୍ୟର ବିଭିନ୍ନ ଜିଲ୍ଲା ବେଶ ପ୍ରସିଦ୍ଧ ଲାଭ କରିଛି । ହେଲେ କରୋନା ମହାମାରୀ ଯୋଗୁଁ ପ୍ରଭାବିତ ହୋଇଛନ୍ତି ଅନେକ କଳାକାର । ନିଜ ତିଆରି ସାମଗ୍ରୀକୁ ବିକ୍ରି କରି ନ ପାରି ସମସ୍ୟା ଭିତରେ ଗତି କରୁଛନ୍ତି । ଏହାକୁ ଦୃଷ୍ଟିରେ ରଖି ଚଳିତ ବର୍ଷ ଛତିଆ ରାଜ ଦୋଳ ମେଳନ ମହୋତ୍ସବ ଅବସରରେ ହସ୍ତଶିଳ୍ପ ପଦର୍ଶନୀ କରାଯାଇଛି । ଏହି ପଦର୍ଶନୀ ମାଧ୍ୟମରେ ନିଜ ସାମଗ୍ରୀ ବିକ୍ରି କରିବା ଲକ୍ଷ୍ୟ ରଖିଛନ୍ତି କାରିଗର ।

ବଡ଼ଚଣା ବିଧାୟକ ଅମର ପ୍ରସାଦ ଶତପଥୀ ଏହି ଉତ୍ସବକୁ ଉଦଘାଟନ କରିଛନ୍ତି । ୭ ଦିନ ଧରି ଏହି ହସ୍ତଶିଳ୍ପ ପ୍ରଦର୍ଶନୀ ଚାଲିବାକୁ ଥିବାବେଳେ ଏଥିରେ ମୋଟ ୮୦ଟି ଷ୍ଟଲ ଖୋଲା ଯାଇଛି । ଏଥିରେ ହସ୍ତଶିଳ୍ପଠୁ ଆରମ୍ଭ କରି କୃଷି ଭିତ୍ତିକ ସାମଗ୍ରୀ ଓ ପୁସ୍ତକ ଷ୍ଟଲ ମଧ୍ୟ ଦେଖିବାକୁ ମିଳିଛି । ଏହି ପ୍ରଦର୍ଶନୀରେ ୬୦ରୁ ଉର୍ଦ୍ଧ୍ୱ କାରିଗର ସାମିଲ ଅଛନ୍ତି । ୧୪ ପ୍ରକାର ହସ୍ତଶିଳ୍ପର ଷ୍ଟଲ ଏଥିରେ ସାମିଲ ହୋଇଛି । ବିଶେଷ କରି ପଥର ଶିଳ୍ପୀ ଓ କାଇଁଚ, ଟେରାକୋଟାର ଚାହିଦା ଦେଖିବାକୁ ମିଳୁଛି । କରୋନା ଯୋଗୁଁ କ୍ଷତି ସହିଥିବା କାରିଗର ଏହି ପ୍ରଦର୍ଶନୀରୁ ବେଶ କିଛି ପଇସା ରୋଜଗାର ହେବାର ଆଶା ରଖିଛନ୍ତି ।

ସୁପ୍ରିମକୋର୍ଟ ଗଲେ ପରମବୀର ସିଂହ

ମୁମ୍ବାଇ: ସୁପ୍ରିମକୋର୍ଟରେ ପହଞ୍ଚିଲା ମହାରାଷ୍ଟ୍ର ଚିଠି ବିବାଦ ମାମଲା। ପୂର୍ବତନ ପୋଲିସ କମିଶନର ପରମବୀର ସିଂହ ଘଟଣାର ନିରପେକ୍ଷ ତଦନ୍ତ କରିବା ପାଇଁ ସୁପ୍ରିମକୋର୍ଟରେ ଯାଚିକା ଦାୟର କରିଛନ୍ତି। ସିବିଆଇ ଘଟଣାର ତଦନ୍ତ କଲେ ପ୍ରକୃତ ସତ୍ୟାସତ୍ୟ ସାମ୍ନାକୁ ଆସିବ ବୋଲି ଦାବି କରିଛନ୍ତି ପରମବୀର ସିଂ ।

ଆସନ୍ତା ୨୬ ତାରିଖରେ ଏହି ମାମଲା ଉପରେ ସୁପ୍ରିମକୋର୍ଟ ଶୁଣାଣି କରିପାରନ୍ତି । ସେପଟେ ସଂସଦରେ ଉଠିଛି ମହାରାଷ୍ଟ୍ର ଝଡ଼ । ଉଭୟ ଲୋକସଭା ଓ ରାଜ୍ୟସଭାରେ ବିଜେପି ସାଂସଦ ଏହି ପ୍ରସଙ୍ଗ ଉଠାଇ ମହାରାଷ୍ଟ୍ର ସରକାରକୁ ସମାଲୋଚନା କରିଥିଲେ । ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଇସ୍ତଫା ଦେବା ଦରକାର ବୋଲି ସଂସଦରେ ଦାବି କରିଛି ବିଜେପି । ଘଟଣାର ନିରପେକ୍ଷ ତଦନ୍ତ ପାଇଁ କେନ୍ଦ୍ରୀୟ ସଂସ୍ଥାକୁ ଦାୟିତ୍ବ ଦେବାକୁ ଦଳ ଦାବି କରିଛି । ସେପଟେ ମହାରାଷ୍ଟ୍ର ଘଟଣାରୁ ନିଜକୁ ଦୂରେଇ ରଖିଥିବା କଂଗ୍ରେସ ଆଜି ଏହି ପ୍ରସଙ୍ଗରେ ମନ୍ତବ୍ୟ ରଖିଛି ।

ମଧ୍ୟପ୍ରଦେଶ ଭଳି ମହାରାଷ୍ଟ୍ରରେ ସରକାର ଭାଙ୍ଗିବାକୁ କେନ୍ଦ୍ର ସରକାର ଚେଷ୍ଟା କରୁଛନ୍ତି ବୋଲି ଅଭିଯୋଗ କରିଛି କଂଗ୍ରେସ । ଶିବସେନା ମଧ୍ୟ ବିଜେପିକୁ ସମାଲୋଚନା କରିଛି । ମାସକୁ ୧୦୦ କୋଟି ଟଙ୍କା ଚାନ୍ଦା ଆଦାୟ କରୁଥିଲେ ମହାରାଷ୍ଟ୍ର ଗୃହମନ୍ତ୍ରୀ ଅନୀଲ ଦେଶମୁଖ । ପୂର୍ବତନ ପୋଲିସ କମିଶନର ପରମବୀର ସିଂହଙ୍କ ଏଭଳି ଅଭିଯୋଗ ପରେ ମହାରାଷ୍ଟ୍ର ରାଜନୀତିରେ ଝଡ଼ ସୃଷ୍ଟି ହୋଇଛି । ଏହି ଘଟଣାରେ ଅନୀଲ ଦେଶମୁଖଙ୍କ ଇସ୍ତଫା ଦାବି କରିଛି ବିରୋଧୀ ବିଜେପି । ସେପଟେ ରାମଦାଶ ଅଠାୱଲେ ମହାରାଷ୍ଟ୍ରରେ ରାଷ୍ଟ୍ରପତି ଶାସନ ଲାଗୁ ହେଉ ବୋଲି କହିଛନ୍ତି।

କୁନି ଝିଅର ଅଦ୍ଭୁତ ପ୍ରତିଭା, ୧ ମିନିଟ୍‌ରେ ୧୭ଟି ଶ୍ଲୋକ ଗାନ କରି ଇଣ୍ଡିଆ ବୁକ ଅଫ୍ ରେକର୍ଡ

ଯାଜପୁର: କୁନି ଝିଅର ଅଦ୍ଭୁତ ପ୍ରତିଭା । ମାତ୍ର ଗୋଟିଏ ମିନିଟ୍‌ରେ ୧୭ଟି ଶ୍ଲୋକ ଗାଇ ଇଣ୍ଡିଆ ବୁକ ଅଫ୍ ରେକର୍ଡରେ ସ୍ଥାନ ପାଇଛନ୍ତି ଦଶ ବର୍ଷର ଝିଅ ସାଇ ଆଦ୍ୟାଜ୍ୟୋତି ଦାଶ । ସର୍ବ ଭାରତୀୟ ସ୍ତରରେ ପ୍ରଥମ ସ୍ଥାନ ଅଧିକାର କରିଛନ୍ତି ଯାଜପୁର ବିବିସରାଇ ଗ୍ରାମର ଆଦିତ୍ୟ କୁମାର ଦାଶଙ୍କ ଝିଅ ଆଦ୍ୟାଜ୍ୟୋତି । ସାଇ ଆଦ୍ୟାଜ୍ୟୋତି ସ୍ଥାନୀୟ ଡିଏଭି ସ୍କୁଲର ପଞ୍ଚମ ଶ୍ରେଣୀର ଛାତ୍ରୀ । ଗୋଟିଏ ମିନିଟରେ ଶ୍ରୀମଦ୍ ଭାଗବତ ଗୀତାର ୧୭ଟି ଶ୍ଲୋକ ଗାଇ ଚୟନକର୍ତ୍ତାଙ୍କୁ ଚକିତ କରିଦେଇଥିଲେ ।

ଓଡ଼ିଶା ପାଇଁ ଗର୍ବ ଆଣିଛନ୍ତି ଆଦ୍ୟାଜ୍ୟୋତି ଦାଶ । ଗୀତାର ଦ୍ୱାଦଶ ଅଧ୍ୟାୟ ଭକ୍ତିଯୋଗର ପ୍ରଥମରୁ ୧୭ଟି ଶ୍ଲୋକ ୧ ମିନିଟରେ ଗାନ କରି ଇଣ୍ଡିଆ ବୁକ୍ ଅଫ ରେକର୍ଡରେ ସ୍ଥାନ ପାଇଛନ୍ତି । ଏହି କୃତିତ୍ୱ ପାଇଁ ସେ ଜଗତଗୁରୁ ଅଭିରାମ ପରମହଂସ, ତାଙ୍କ ଜେଜେ ବାପା ଓ ଗୁରୁଜନଙ୍କୁ ଶ୍ରେୟ ଦେଇଛନ୍ତି ।

ଦୈନିକ ସକାଳୁ ସାଇ ଆଦ୍ୟାଜ୍ୟୋତି ନିଜର ନିତ୍ୟକର୍ମ ସାରି ବାପାଙ୍କ ଉପସ୍ଥିତିରେ ସାନ ଭାଇଙ୍କ ସହ ଗୋଟିଏ ଗୋଟିଏ ଶ୍ଲୋକ ପାଠ କରିଥାନ୍ତି । ଏହାସହ ବିଭିନ୍ନ ଭକ୍ତିପୂର୍ଣ୍ଣ କାର୍ଯ୍ୟକ୍ରମରେ ସେ ପ୍ରବଚନ ଦେଇ ଆସୁଛନ୍ତି । ତାଙ୍କର ଏହି କୃତିତ୍ୱ ପାଇଁ ତାଙ୍କ ପରିବାର ବେଶ ଖୁସି । ଇଣ୍ଡିଆ ବୁକ୍ ଅଫ ରେକର୍ଡ ପ୍ରତିଯୋଗିତାରେ ବ୍ରହ୍ମପୁରର ଜଣେ ନାବାଳକଙ୍କୁ ପଛରେ ପକାଇ ଏହି ସମ୍ମାନର ଅଧିକାରୀ ହୋଇଛନ୍ତି । ବିଗତ ବର୍ଷ ବ୍ରହ୍ମପୁରର ଜଣେ ନାବାଳକ ୧ ମିନିଟରେ ୧୩ ଟି ଶ୍ଲୋକ ଗାଇ ପ୍ରଥମ ହୋଇଥିଲେ ।