spot_img
Home Blog Page 5996

ରେଭେନ୍ସାରେ ଛାତ୍ରଙ୍କୁ କରୋନା, ୟୁଜି ଓ ପିଜି ପରୀକ୍ଷା ସ୍ଥଗିତ

କଟକ: ରେଭେନ୍ସା ବିଶ୍ବବିଦ୍ୟାଳୟର ୟୁଜି ଓ ପିଜି ପରୀକ୍ଷା ସ୍ଥଗିତ । ଆଜି ଅର୍ଥାତ ଗୁରୁବାର ହେବାକୁ ଥିବା ୟୁଜି ଓ ପିଜି ପରୀକ୍ଷା ସ୍ଥଗିତ କରିଛନ୍ତି କଲେଜ କର୍ତ୍ତୁପକ୍ଷ । ବିଶ୍ବବିଦ୍ୟାଳୟ କ୍ୟାମ୍ପସରେ କରୋନା ପଜିଟିଭ ଚିହ୍ନଟ ପରେ ଏପରି ପଦକ୍ଷେପ ନିଆଯାଇଥିବା ଜଣାପଡିଛି । ଆଜି ପରୀକ୍ଷା ହେବାକୁ ଥିବାବେଳେ ପରୀକ୍ଷା ବନ୍ଦ ନେଇ ରେଭେନ୍ସା ବିଶ୍ୱବିଦ୍ୟାଳୟ ପରୀକ୍ଷା ନିୟନ୍ତ୍ରକ ସୂଚନା ଦେଇଛନ୍ତି ।

ରେଭେନ୍ସା ମହାନଦୀ ହଷ୍ଟେଲର ଜଣେ ଅନ୍ତେବାସୀ କରୋନା ପଜିଟିଭ ଚିହ୍ନଟ ହୋଇଛନ୍ତି । ପଜିଟିଭି ଛାତ୍ରଜଣଙ୍କୁ ଆଇସୋଲେସନରେ ରଖାଯାଇଛି । ହଷ୍ଟେଲ ସାନିଟାଇଜ କରାଯିବା ସହିତ ଅନ୍ୟ ବିଦ୍ୟାର୍ଥୀଙ୍କ କରୋନା ଟେଷ୍ଟ କରାଯିବ । ପରୀକ୍ଷା ସମ୍ବଦ୍ଧରେ ଆଜି ଗୁରୁତ୍ବପୂର୍ଣ୍ଣ ବୈଠକ ବସିବ । ବୈଠକରେ ପରୀକ୍ଷା ନେଇ ନିଷ୍ପତ୍ତି ହେବ ବୋଲି ସୂଚନା ମିଳିଛି ।

ପ୍ରଚାରର ଅନ୍ତିମ ଦିନ; ଆସାମ-ପଶ୍ଚିମବଙ୍ଗରେ ରଙ୍ଗୀନ ମୈଦାନ, ଥମୁନି କମ୍ପନ

ଭୁବନେଶ୍ୱର : ପାଞ୍ଚ ରାଜ୍ୟରେ ନିର୍ବାଚନୀ ପ୍ରଚାରର ଆଜି ଅନ୍ତିମ ଦିନ । ଦିନକ ପରେ ବାଲାଟ ବାକ୍ସରେ ଭୋଟ ପଡିବାକୁ ଯାଉଥିବା ବେଳେ ଶେଷ ଦିନରେ ରାଜନୈତିକ ରଣାଙ୍ଗନ ହେବାକୁ ଯାଉଛି ରଙ୍ଗୀନ । ପଶ୍ଚିମବଙ୍ଗ ଓ ଆସାମରେ ଆସନ୍ତା ୨୭ ତାରିଖରେ ହେବାକୁ ଯାଉଛି ବିଧାନସଭା ନିର୍ବାଚନ । ସେପଟେ ଶେଷ ଦିନରେ ମଧ୍ୟ ମୈଦାନ ମୁହାଁ ସମସ୍ତ ଦଳର ନେତା ।

ବିଜେପି ପକ୍ଷରୁ ଅନ୍ତିମ ଦିନରେ ପଶ୍ଚିମବଙ୍ଗ ଗସ୍ତ କରିବେ ଗୃହମନ୍ତ୍ରୀ ଅମିତ ଶାହା ଏବଂ ଉତ୍ତ୍ରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ସେହିଭଳି ବିଜେପି ପକ୍ଷରୁ ମଧ୍ୟ ରୋଡ ଶୋ ଏବଂ ପ୍ରଚାର କରିବେ ବଲିଉଡ ତାରକା ତଥା ବିଜେପି ନେତା ମିଥୁନ ଚକ୍ରବର୍ତ୍ତୀ । ଟିଏମସି ସୁପ୍ରିମୋ ମମତା ବାନାର୍ଜୀ ମଧ୍ୟ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରି ଭୋଟ ଭିକ୍ଷା କରିବେ । ପୁଣି ଥରେ କ୍ଷମତା ଦାଖଲ କରିବା ପାଇଁ ଜୋର ଲଗାଇବେ ଦିଦି ।

ସେହିଭଳି ଆସାମ ଏବଂ ଅନ୍ୟ ତିନି ରାଜ୍ୟ ପାଇଁ ବିଜେପି ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ରାଷ୍ଟ୍ରୀୟ ଅଧ୍ୟକ୍ଷ ଜେ ପି ନଡ୍ଡାଙ୍କ ସମେତ ଅନେକ ବରିଷ୍ଠ ନେତା ପ୍ରଚାର କରିବେ । ପଶ୍ଚିମବଙ୍ଗରେ ବିଜେପି ଏବଂ ଟିଏମସି ମଧ୍ୟରେ କଡା ଟକ୍କର ହେବାକୁ ଯାଉଛି । ଦିଦିଙ୍କ ଭୋଟ ପ୍ରତିଶତ କମିବାକୁ ଯାଉଥିବା ମଧ୍ୟ ରାଜନୈତିକ ସମୀକ୍ଷକ ମତ ପ୍ରକାଶ କରିଛନ୍ତି । ସେହିଭଳି ବିଜେପିର ଶହେରୁ ଅଧିକ ନେତାଙ୍କୁ ହତ୍ୟା କରାଯାଇଥିବା ଅଭିଯୋଗ ଆଣିଛି ଦଳ । ଏହାକୁ ନେଇ ମଧ୍ୟ ଦଳ ମୁଦ୍ଧା କରିଛି । ପଶ୍ଚିମବଙ୍ଗରେ ଏଭଳି ଗୁଣ୍ଡା ସରକାରକୁ ତୁରନ୍ତ ପରିବର୍ତ୍ତନ କରିବାର ସମୟ ଆସିଛି ବୋଲି ନିର୍ବାଚନୀ ପ୍ରଚାରରେ ବୁଧବାର କହିଛନ୍ତି ପ୍ରଧାନମନ୍ତ୍ରୀ ମୋଦି ।

ସେପଟେ ବିଜେପିକୁ ମଧ୍ୟ ନିଶାନା କରିଛନ୍ତି ଟିଏମସି ସୁପ୍ରିମୋ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ । ବିଜେପି ବାଲା ପାନ ଖାଇ କଥା କହୁଛନ୍ତି, ପଶ୍ଚିମବଙ୍ଗକୁ ବିକ୍ରି କରିବାକୁ ଚକ୍ରାନ୍ତ କରୁଥିବା ଅଭିଯୋଗ ଆଣିଛନ୍ତି ମମତା ବାନାର୍ଜୀ । ତେଣୁ ଆଜି ପ୍ରଚାରର ଅନ୍ତିମ ଦିନ ଥିବାବେଳେ ଏ ମନାହୋଲ ଆହୁରି ସରଗରମ ହେବାକୁ ଯାଉଛି । ସେପଟେ ଆସାମରେ ଏଥର ବିଜେପି ଓ କଂଗ୍ରେସ ମଧ୍ୟରେ ହେଉଛି କଡା ଫାଇଟ୍ । କଂଗ୍ରେସ ସାଂସଦ ରାହୁଲ ଗାନ୍ଧି ଓ ମହାସଚିବ ପ୍ରିୟଙ୍କା ଗାନ୍ଧି କଂଗ୍ରେସ ପାଇଁ ଜୋରଦାର କ୍ୟାମ୍ପେନିଂ କରୁଛନ୍ତି । ଅନ୍ୟପଟେ ତାମିଲନାଡୁ, କେରଳ ଓ ପୁଡୁଚେରୀରେ ମଧ୍ୟ ବିଜେପି, କଂଗ୍ରେସ ସମେତ ଅନ୍ୟ ଆଞ୍ଚଳିକ ଦଳ ମଧ୍ୟ ଜୋରଦାର କରିଛନ୍ତି ପ୍ରଚାର।

ବିଧାୟକଙ୍କୁ ସୁରକ୍ଷା କର୍ମୀଙ୍କ ଆକ୍ରମଣ, ‘କ୍ଷମା ମାଗନ୍ତୁ ନୀତିଶ କୁମାର’

ପାଟନା: ବିହାର ବିଧାନସଭାର ବିଧାୟକଙ୍କ ପ୍ରତି ସୁରକ୍ଷା କର୍ମୀଙ୍କ ଆଚରଣ ଘଟଣାକୁ ନିନ୍ଦା କରୁଛି ଦେଶ । ଏପରି କଳଙ୍କିତ ଅଧ୍ୟାୟକୁ ସବୁ ମହଲରୁ ନିନ୍ଦା କରାଯାଇଛି । ମଙ୍ଗଳବାର ବିଧାନସଭାରେ ଜନ ପ୍ରତିନିଧିଙ୍କ ପ୍ରତି ସୁରକ୍ଷାକର୍ମୀଙ୍କ ବ୍ୟବହାର ପ୍ରସଙ୍ଗରେ ନୀତୀଶ ସରକାରଙ୍କୁ ସମାଲୋଚନା କରିଛି ବିରୋଧୀ ଆରଜେଡି ।

ଆରଜେଡି ନେତା ତେଜସ୍ବୀ ଯାଦବ ଘଟଣାକୁ ନିନ୍ଦା କରିଛନ୍ତି । ଯେ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ନୀତୀଶ କୁମାର କ୍ଷମା ନ ମାଗିଛନ୍ତି ଏବଂ ଘଟଣାରେ ସମ୍ପୃକ୍ତ ସୁରକ୍ଷାକର୍ମୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନ ହୋଇଛି ସେ ପର୍ଯ୍ୟନ୍ତ କୌଣସି ବିରୋଧୀ ବିଧାୟକ ବିଧାନସଭାର ମାଟି ମାଡିବେ ନାହିଁ ବୋଲି କହିଛନ୍ତି ତେଜସ୍ବୀ ।

ମହିଳା ଓ ବରିଷ୍ଠ ବିଧାୟକଙ୍କ ପ୍ରତି ବ୍ୟବହାର ସଭିଙ୍କୁ ଅତିଷ୍ଠ କରିଛି ଏଣୁ ସରକାର ଏଥି ପ୍ରତି ଧ୍ୟାନ ଦେବାର ଆବଶ୍ୟକ ରହିଛି ବୋଲି ସେ କହିଛନ୍ତି । ଏ ନେଇ ଆଜି ଗୋଟିଏ ପରେ ଗୋଟିଏ ଟ୍ବିଟ୍ କରିଥିଲେ ଆରଜେଡି ନେତା ତେଜସ୍ବୀ ଯାଦବ । ସେପଟେ ସଂସଦ ବାହାରେ ମଧ୍ୟ ଏ ପ୍ରସଙ୍ଗରେ ରାଜନୀତି ସରଗରମ ହୋଇଥିଲା । ଆହତ ହୋଇଥିବା ବିଧାୟକଙ୍କ ଚିକିତ୍ସା ଚାଲିଛି ।

ନୂଆପଡା ଜିଲ୍ଲାରେ ୩୩ ଜଣ କୋଭିଡ ପଜିଟିଭ ଚିହ୍ନଟ

ନୂଆପଡା:  ନୂଆପଡା ଜିଲ୍ଲାରେ ୩୩ ଜଣ କୋଭିଡ ପଜିଟିଭ ଚିହ୍ନଟ । ଜିଲ୍ଲାର ସିନାପାଲି ବ୍ଲକର ବ୍ରାହ୍ମଣପଡାରେ ସର୍ବାଧିକ ୨୯ ଜଣ ଚିହ୍ନଟ ପରେ ପ୍ରଶାସନ ଅଧିକାରୀ ତପ୍ତରତା ପ୍ରକାଶ କରିଛନ୍ତି । ସଂକ୍ରମିତଙ୍କୁ ହୋମ କୋରେଣ୍ଟଇନରେ ରଖିବା ସହ ସେହି ସ୍ଥାନରେ ପୋଲିସ ମୃତୟନ ହୋଇଛନ୍ତି ।

ସୂଚନା ମୁତାବକ ଗୁରୁବାର ବ୍ରାହ୍ମଣପଡାର ସମସ୍ତଙ୍କ ସ୍ବାବ ସଂଗ୍ରହ କରାଯିବ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି। ସିନାପାଲି ଛତିଶଗଡ଼ ସୀମାକୁ ଲାଗି ରହିଥିବା ବେଳେ ନିକଟରେ କିଛି ଲୋକ ଛତିଶଗଡ଼ରୁ ଫେରି ସଂକ୍ରମିତ ଚିହ୍ନଟ ହୋଇଥିଲେ । ୫୬ ଜଣଙ୍କର ଆଣ୍ଟିଜେନ ଟେଷ୍ଟ କରାଯାଇଥିଲା ପରେ ସର୍ବାଧିକ ୩୩ ଜଣଙ୍କ ରିପୋର୍ଟ ପଜିଟିଭ ଆସିଛି ।

ଆରୁଷୀ ଗଣଦୁଷ୍କର୍ମ ମାମଲା, ତିନି ଦୋଷୀଙ୍କୁ ଫାଶି ଦଣ୍ଡ ଶୁଣାଇଲେ କୋର୍ଟ

ବୁଲନ୍ଦସହର: ଉତ୍ତରପ୍ରଦେଶର ବୁଲନ୍ଦଶାହରର ବହୁ ଚର୍ଚ୍ଚିତ ଅରୁଷୀ ଗଣଦୁଷ୍କର୍ମ ଏବଂ ହତ୍ୟା ମାମଲାରେ ଆସିଛି ବଡ ନିଷ୍ପତ୍ତି । ଏହି ମାମଲାରେ POCSO କୋର୍ଟ ତିନି ଜଣ ଦୋଷୀଙ୍କୁ ମୃତ୍ୟୁଦଣ୍ଡାଦେଶ ଶୁଣାଇଛନ୍ତି । ଏହି ଘଟଣା ସେତେବେଳେ ଉତ୍ତରପ୍ରଦେଶରେ ରାଜନୈତିକ ଅସ୍ଥିରତା ସୃଷ୍ଟି କରିଥିଲା । ଚଳନ୍ତା କାରରେ ଗଣଦୁଷ୍କର୍ମ ଓ ହତ୍ୟା ଘଟଣାକୁ ନେଇ ପୋଲିସର ହୋସ୍‌ ମଧ୍ୟ ଉଡ଼ି ଯାଇଥିଲା ।

୨ ଜାନୁଆରୀ, ୨୦୧୮ରେ ଟ୍ୟୁସନରୁ ଘରକୁ ଫେରୁଥିବା ବେଳେ ଅରୁଷୀଙ୍କୁ ଅପହରଣ କରାଯାଇଥିଲା । ଏହା ପରେ ତାଙ୍କ ସହ ଗଣଦୁଷ୍କର୍ମ କରାଯାଇଥିଲା ଏବଂ ପରେ ହତ୍ୟା କରାଯାଇଥିଲା । ଚଳନ୍ତା କାରରେ NH-91ରେ ଆରୁଷୀଙ୍କ ସହ ଜଣକ ପରେ ଜଣେ ରାକ୍ଷସ ଦୁଷ୍କର୍ମ କରିଥିଲେ । ୪ ଜାନୁୟାରୀ ୨୦୧୮ ରେ, ଦାଦ୍ରି କୋତୱାଲି ଅଞ୍ଚଳର ରାଜୱାହୀରେ ଅରୁଷୀଙ୍କ ଗଳିତ ମୃତଦେହ ପଡ଼ିଥିବାର ଦେଖିବାକୁ ମିଳିଥିଲା । ପୋଲିସର ତଦନ୍ତ ପରେ ମୃତଦେହ ଚିହ୍ନଟ କରାଯାଇଥିଲା । ପରେ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଥିଲା । ରିପୋର୍ଟରୁ ଜଣାପଡ଼ିଥିଲା, ଆରୁଷୀଙ୍କ ସହ ତିନି ଜଣ ନର ରାକ୍ଷାସ ଦୁଷ୍କର୍ମ କରିବା ପରେ ହତ୍ୟା କରିଛନ୍ତି । ଏବେ ଦୁଇ ବର୍ଷ ପରେ କୋର୍ଟଙ୍କ ରାୟ ଆସିଛି । ଅରୁଷୀଙ୍କୁ ନ୍ୟାୟ ମିଳିଛି ।

ମାମଲାର ଶୁଣାଣି ସମୟରେ ପୋଲିସର ଅବହେଳା ମଧ୍ୟ ସାମ୍ନାକୁ ଆସିଥିଲା । ପୋଲିସକୁ କୋର୍ଟଙ୍କ ପକ୍ଷରୁ ତାଗିଦ୍‌ ମଧ୍ୟ କରାଯାଇଥିଲା । ତତ୍କାଳୀନ ଥାନା ଇନଚାର୍ଜ ସିଜ୍‌ ହୋଇଥିବା ସାମଗ୍ରୀ ଗୁଡ଼ିକୁ କୋର୍ଟରେ ଦାଖଲ କରିନଥିଲେ ।

ଜବାହାରଲାଲ ନେହେରୁ ଇଣ୍ଡୋର ଷ୍ଟାଡିୟମରେ ଜାତୀୟ ଫିନସିଂ ଚାମ୍ପିଅନସିପ୍

କଟକ: ଆରମ୍ଭ ହେଲା ଫିନସିଂ ଚାମ୍ପଅନସିପ୍ । ଇଣ୍ଡୋର ଷ୍ଟାଡିୟମରେ ପ୍ରତିଯୋଗିତା । ଜାତୀୟ ଦଳ ପାଇଁ ଚୟନ ହେବେ ଖେଳାଳି । ଜବାହାରଲାଲ ନେହେରୁ ଇଣ୍ଡୋର ଷ୍ଟାଡିୟମରେ ଆରମ୍ଭ ହୋଇଛି ୨୨ ତମ ଜାତୀୟ ଅଶୀଚାଳନା ବା ଫିନସିଂ ଚାମ୍ପିଅନସିପ୍ । କୋଭିଡ୍ କଟକଣା ମଧ୍ୟରେ ଖେଳାଯାଉଥିବା ଏହି ଜାତୀୟ ଚାମ୍ପିଅନସିପ୍‌ରେ ୨୨ଟି ରାଜ୍ୟର ୪୫୦ ପ୍ରତିଯୋଗୀ ଭାଗ ନେଇଛନ୍ତି । ତିନିଦିନ ଧରି ଚାଲିବାକୁ ଥିବା ଏହି ଚାମ୍ପିଅନସିପରୁ ସମ୍ଭାବ୍ୟ ଭାରତୀୟ ଦଳ ଚୟନ କରାଯିବ । କୋଭିଡ୍ କଟକଣା ଭିତରେ ଆୟୋଜିତ ହେଉଛି ପ୍ରତିଟି ଇଭେଣ୍ଟ୍ ।

ଏହି ଚାମ୍ପିଅନସିପରେ ଆୟୋଜକ ଓଡିଶା ବ୍ୟତୀତ ମଣିପୁର, ପଞ୍ଜାବ, ତେଲେଙ୍ଗାନା ଭଳି ରାଜ୍ୟର ଶ୍ରେଷ୍ଠ ଖେଳାଳି ଭାଗ ନେଇଛନ୍ତି । ଏଥିରୁ ସମ୍ଭାବ୍ୟ ଭାରତୀୟ ଦଳ ଚୟନ କରାଯିବ । ଭଲ ଆୟୋଜନ ଓ ପ୍ରସ୍ତୁତି କାରଣରୁ ଶ୍ରେଷ୍ଠ ଖେଳ ପ୍ରଦର୍ଶନ ନେଇ ଆଶା ରଖିଛନ୍ତି ଖେଳାଳି । ଫିନସିଂ ବା ଅଶୀଚାଳନାରେ ଓଡିଶାର ଆଗ୍ରହ ବଢୁଥିବାରୁ ଏହା ରାଜ୍ୟର ଅନ୍ୟ ଖେଳାଳିଙ୍କୁ ଉତ୍ସାହିତ କରିବ ବୋଲି ଆଶା କରାଯାଉଛି ।

ରାଜ୍ୟ ସରକାରଙ୍କୁ ବଦନାମ କରିବାକୁ ଚକ୍ରାନ୍ତ, ଲୋକଙ୍କ ପେଟପାଟଣା ସହ ଖେଳୁଛି କେନ୍ଦ୍ର

ଭୁବନେଶ୍ୱର: ରାଜ୍ୟ ସରକାରଙ୍କୁ ବଦନାମ କରିବାକୁ ଚକ୍ରାନ୍ତ । ହଜାର ହଜାର ଲୋକଙ୍କ ପେଟପାଟଣା ସହ ଖେଳୁଛି କେନ୍ଦ୍ର । ବିନା ଥଇଥାନରେ ତାଳଚେର ପାୱାର ପ୍ଲାଣ୍ଟ ବନ୍ଦକୁ ବିରୋଧ । ଅବଧି ଶେଷ ପୂର୍ବରୁ ବନ୍ଦ ହୋଇଗଲା ତାଳଚେର ଥର୍ମାଲ ପାୱାର ପ୍ଲାଣ୍ଟ । ଯେଉଁ ପ୍ରକଳ୍ପ ୫୪ ବର୍ଷ ହେଲା ନିରବଚ୍ଛିନ୍ନ ବିଦ୍ୟୁତ ଯୋଗାଇ ଆସୁଥିଲା ସେହି ଅଞ୍ଚଳରେ ଏବେ ଅନ୍ଧାର ହିଁ ଅନ୍ଧାର । ଏଭଳି ଅସ୍ୱାଭାବିକ ପରିସ୍ଥିତିକୁ ସହଜରେ ଗ୍ରହଣ କରି ପାରୁନାହାଁନ୍ତି ସ୍ଥାନୀୟ ଜନସାଧାରଣ । ଏହାକୁ ନେଇ ଏବେ କେନ୍ଦ୍ର ବିରୁଦ୍ଧରେ ଗର୍ଜିଛି ବିଭିନ୍ନ ଶ୍ରମିକ ଟ୍ରେଡ୍ ୟୁନିୟନ । ଅପର ପକ୍ଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏସମ୍ପର୍କରେ କେନ୍ଦ୍ରକୁ ଚିଠି ଲେଖି ଶୀଘ୍ର ସଂପ୍ରସାରଣ ପ୍ରକଳ୍ପ କାର୍ଯ୍ୟକାରୀ କରିବାକୁ ନିବେଦନ କରିଛନ୍ତି ।

ଷ୍ଟେଜ୍‌-ଥ୍ରୀ ପ୍ଲାଣ୍ଟ୍‌ ପ୍ରତିଷ୍ଠା ପାଇଁ ରାଜ୍ୟ ଯୋଗାଇ ଦେଇଛି ଜମି । ତୁରନ୍ତ କାର୍ଯ୍ୟକାରୀ ପାଇଁ କେନ୍ଦ୍ରକୁ ଚିଠି ଲେଖିଲେ ନବୀନ । ସବୁ ସରିଛି ହେଲେ ଶୁଣୁନି କେନ୍ଦ୍ର । ସବୁ ଜାଣି ରାଜ୍ୟ ପ୍ରତି ଦୋ ମୁହାଁ ନୀତି କରୁଛି କେନ୍ଦ୍ର । ଏନଟିପିସିର ମନମୁଖୀ କାରବାରରେ କ୍ଷତି ସହିବ ଓଡ଼ିଶା । କେନ୍ଦ୍ର ଓ ଏନଟିପିସିକୁ ନିଦରୁ ଉଠାଇବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ଶକ୍ତି ମନ୍ତ୍ରୀ ଆର କେ ସିଂହଙ୍କୁ ଲେଖିଛନ୍ତି ଚିଠି । ଫେବ୍ରୁଆରୀ ୨୦୨୦ରେ ସରକାର ତାଳଚେର ଥର୍ମାଲ ପାୱାର ଷ୍ଟେସନ-ଟିଟିପିଏସର ଷ୍ଟେଜ-ଥ୍ରୀ ସଂପ୍ରସାରଣ ପ୍ରକଳ୍ପକୁ ଅନୁମତି ଦେଇସାରିଛନ୍ତି । କିନ୍ତୁ ଏହାକୁ ଅଧିଗ୍ରହଣ କରିଥିବା ଏନଟିପିସି ପ୍ରକଳ୍ପ କାର୍ଯ୍ୟକାରୀ କରିବାକୁ ଆଗ୍ରହ ଦେଖାଉନାହିଁ ।

ଅନ୍ୟପଟେ ୨୦୨୧ ମାର୍ଚ୍ଚ ୩୧ରୁ ଟିଟିଏସକୁ ସଂପୂର୍ଣ୍ଣ ବନ୍ଦ କରିଦିଆଯିବା ନିଷ୍ପତ୍ତି ଆଗୁଆ କାର୍ଯ୍ୟକାରୀ ହୋଇସାରିଲାଣି । ଏପରି ସ୍ଥିତିରେ ହଜାର ହଜାର ଲୋକଙ୍କ ଜୀବନ ଜୀବିକା ଗୁରୁତର ପ୍ରଭାବିତ ହେବା ସହ ସ୍ଥାନୀୟ ଅର୍ଥନୀତି ମଧ୍ୟ ବାଧାପ୍ରାପ୍ତ ହେବ । ତେଣୁ ଯଥାଶୀଘ୍ର ଟିଟିପିଏସ୍‌ ଷ୍ଟେଜ୍‌ ଥ୍ରୀ ପ୍ରକଳ୍ପ କାର୍ଯ୍ୟକାରୀ କରିବାକୁ ନବୀନ ନିବେଦନ କରିଛନ୍ତି । ୨୦୧୦ରୁ ପ୍ରସ୍ତାବ ସହ ସବୁ ପ୍ରକାର ସହଯୋଗ ଯୋଗାଇ ଦିଆଯାଇଥିବା ସତ୍ତ୍ୱେ କାହିଁକି ଏନଟିପିସି ପ୍ଲାଣ୍ଟ ପ୍ରତିଷ୍ଠା ପାଇଁ ପ୍ରକ୍ରିୟା ଆରମ୍ଭ କରୁନି କମ୍ପାନୀ କର୍ତ୍ତୃପକ୍ଷଙ୍କୁ ପଚାରିବାକୁ କହିଛନ୍ତି । ଆସନ୍ତୁ ଶୁଣିବା କଣ କହୁଛନ୍ତି ସ୍ଥାନୀୟ ବିଧାୟକ ବ୍ରଜ ପ୍ରଧାନ ।

ତାଳଚେର ଥର୍ମାଲ ପାୱାର ଷ୍ଟେସନ । ଦୀର୍ଘ ୫୪ ବର୍ଷରୁ ଅଧିକ ସମୟ ଧରି ରାଜ୍ୟବାସୀଙ୍କୁ ଅବିରତ ବିଜୁଳି ପ୍ରଦାନ କରିଆସୁଛି । ବର୍ତ୍ତମାନ ବନ୍ଦ ହୋଇଯିବା ପରେ ଏ ନେଇ ଉଠିଛି ଝଡ଼ । ସମସ୍ତ ୬ଟି ୟୁନିଟକୁ ବନ୍ଦ କରିଦେବା ଫଳରେ ବିଦ୍ୟୁତ ଉତ୍ପାଦନ ସମ୍ପୂର୍ଣ୍ଣ ଠପ୍‌ ହୋଇ ଯାଇଛି । ତେବେ ପ୍ରଦୂଷଣ ମଞ୍ଜୁରୀ ଅବଧି ସରିବା ପୂର୍ବରୁ ପ୍ଲାଣ୍ଟ୍‌ ବନ୍ଦ ହୋଇଯିବାକୁ ନେଇ ଉଠିଛି ସାରା ଅଞ୍ଚଳରେ ଅସନ୍ତୋଷର ନିଆଁ । ୧୪ ଶହ ଠିକା କର୍ମଚାରୀଙ୍କ ସହିତ ପ୍ରତ୍ୟକ୍ଷ ଓ ପରୋକ୍ଷ ଭାଵରେ ୫୦ ହଜାରରୁ ଅଧିକ ଲୋକ ପ୍ରଭାବିତ ହେବାର ଆଶଙ୍କା କରାଯାଉଛି । ରାଜ୍ୟବାସୀଙ୍କ ସ୍ୱାର୍ଥ ଦୃଷ୍ଟିରୁ ଯଦି କେନ୍ଦ୍ର ସରକାର ତୁରନ୍ତ ପ୍ରସ୍ତାବିତ ୧୩୨୦ ମେଗାୱାଟ୍‌ ବିଶିଷ୍ଟ ନୂତନ ପ୍ଲାଣ୍ଟକୁ ତ୍ୱରାନିତ କରିବା ସହ ବର୍ତ୍ତମାନର ପ୍ଲାଣ୍ଟକୁ ଚଳାଇବାକୁ ଶୀଘ୍ର ପଦକ୍ଷେପ ନିଅନ୍ତୁ । ନଚେତ୍‌ ଆନ୍ଦୋଳନ ଓ ଆକ୍ରୋଶକୁ କେହି ଅଟକାଇ ପାରିବେନି ବୋଲି ଆଶଂକା ସୃଷ୍ଟି ହୋଇଛି ।

ବିଶ୍ୱବିଦ୍ୟାଳୟ ପେନ୍‍ସନଧାରୀଙ୍କ ପେନସନ୍‍ ଅଟକିବ ନାହିଁ, ଭିତ୍ତିହୀନ ଆରୋପ ଲଗାଉଛନ୍ତି ଲେଖାଶ୍ରୀ: ବିଜେଡି

ଭୁବନେଶ୍ୱର: ବିଶ୍ୱବିଦ୍ୟାଳୟ ପେନ୍‍ସନଧାରୀଙ୍କ ପେନସନ୍‍ ଅଟକାଇବା ପାଇଁ ରାଜ୍ୟ ସରକାରଙ୍କ ପତ୍ରରେ କୌଣସି ଉଲ୍ଲେଖ କରଯାଇନାହିଁ । ସେମାନେ ପୂର୍ବଭଳି ପେନ୍‍ସନ ପାଇ ଚାଲିବେ । ପେନ୍‍ସନ୍‍ ପାଇବା ସଂକ୍ରାନ୍ତରେ ବିଜେପି ନେତ୍ରୀ ଯେଉଁ ଆରୋପ ଲଗାଉଛନ୍ତି ତାହା ଭିତ୍ତିହୀନ ଓ କପୋଳ କଳ୍ପିତ । ସରକାରଙ୍କ ବିରୁଦ୍ଧରେ ବିନା କୌଣସି ତଥ୍ୟରେ ମିଥ୍ୟା ଆରୋପ ଲଗାଇବାରେ ଲେଖାଶ୍ରୀ ସିଦ୍ଧହସ୍ତା ବୋଲି କହିଛନ୍ତି ବିଜେଡି ମୁଖପାତ୍ର ଲେନିନ୍ ମହାନ୍ତି ।

ବିଜେପି ନେତ୍ରୀଙ୍କୁ ଜବାବ ଦେଇ ଶ୍ରୀ ମହାନ୍ତି କହିଛନ୍ତି, ବିଶ୍ୱବିଦ୍ୟାଳୟ ପେନ୍‍ସନଧାରୀମାନଙ୍କ ଲାଇଫ୍‍ ସାର୍ଟିଫିକେଟର ଯାଞ୍ଚ ସେମାନେ ପେନ୍‍ସନ ଉଠାଉଥିବା ବ୍ୟାଙ୍କ କର୍ତ୍ତୃପକ୍ଷ ପ୍ରତିବର୍ଷ କରିଥାନ୍ତି । ଏଭଳି ପେନସନଧାରୀଙ୍କ ପାଇଁ କୌଣସି ଯାଞ୍ଚର ଆବଶ୍ୟକତା ନାହିଁ । ପେନ୍‍ସନଧାରୀମାନେ ଅତି ସହଜରେ ଏ ସଂକ୍ରାନ୍ତରେ ବିଭାଗକୁ ଅବଗତ କରିପାରିବେ । ବିଭାଗ ପକ୍ଷରୁ ଜାରି ହୋଇଥିବା ନିର୍ଦ୍ଦେଶନାମା କେବଳ ସେହିମାନଙ୍କ ପାଇଁ ଉଦ୍ଦିଷ୍ଟ ଯେଉଁମାନଙ୍କ ଲାଇଫ୍‍ ସାର୍ଟିଫିକେଟ ବିଶ୍ୱବିଦ୍ୟାଳୟ ଦ୍ୱାରା ଯାଞ୍ଚ ହୋଇଥାଏ, ବ୍ୟାଙ୍କ୍‍ ଦ୍ୱାରା ନୁହେଁ ବୋଲି ଶ୍ରୀ ମହାନ୍ତି କହିଛନ୍ତି ।

ସେ କହିଛନ୍ତି ଯେ ବିଶ୍ୱବିଦ୍ୟାଳୟ ପେନ୍‍ସନଧାରୀମାନଙ୍କ ଯାଞ୍ଚ ପାଇଁ ଭର୍ଚୁଆଲ ବ୍ୟବସ୍ଥା ହୋଇଛି । ଯେଉଁମାନେ ବ୍ୟକ୍ତିଗତ ଭାବେ ଆସିନପାରିବେ ସେମାନେ ଭର୍ଚୁଆଲରେ ଉପସ୍ଥିତ ରହିବେ । ତେବେ ଯାଞ୍ଚ ଶେଷ ହେବା ପର୍ଯ୍ୟନ୍ତ ପେନ୍‍ସନ ଅଟକାଇବା ପାଇଁ ସରକାର କୌଣସି ଠାରେ ଉଲ୍ଲେଖ କରିନାହାନ୍ତି । ପେନ୍‍ସନ ପ୍ରଦାନ ପୂର୍ବଭଳି ଜାରି ରହିବ । ଅନ୍ୟ ପକ୍ଷରେ ଯେଉଁଠାରେ ଯାଞ୍ଚ ବିଫଳ ହେବ ସେଠାରେ ପେନ୍‍ସନ ବନ୍ଦ କିମ୍ବା ଅଟକ ରଖାଯିବ । ସରକାରଙ୍କର ଏହି ନିର୍ଦ୍ଦେଶକୁ ଠିକ୍‍ ଭାବେ ନବୁଝି କେବଳ ରାଜନୀତି କରିବା ପାଇଁ ବିଜେପି ନେତ୍ରୀ ଯେଭଳି କିମ୍ଭୁତ କିମ୍ଭାକାର ଆରୋପ ଲଗାଉଛନ୍ତି ସେଥିରୁ କ୍ଷାନ୍ତ ରହିବାକୁ ଶ୍ରୀ ମହାନ୍ତି ପରାମର୍ଶ ଦେଇଛନ୍ତି ।

୧୧ ବର୍ଷର ଝିଅ ଦିବ୍ୟା, କ୍ୟାନ୍‌ସର ରୋଗୀଙ୍କ ପାଇଁ କଲେ କେଶ ଦାନ

ଭୁବନେଶ୍ୱର: ଚେହରାର ସୁନ୍ଦରତା ବଢାଏ କେଶ । ସେଥିପାଇଁ ତ କେଶର ଯତ୍ନ ନେବା ପାଇଁ ଅନେକ ଲୋକ ବିଭିନ୍ନ ପନ୍ଥା ଆପଣାଇଥାନ୍ତି । ସ୍ପା ସାଙ୍ଗକୁ ଥେରାପି ବି ନିଅନ୍ତି । ଏଥିପାଇଁ ଅନେକ ଟଙ୍କା ବି ଖର୍ଚ୍ଚ କରନ୍ତି । କିନ୍ତୁ ରାଜଧାନୀର କିଛି ଯୁବତୀ କର୍କଟ ରୋଗୀଙ୍କ ପାଇଁ କେଶ ଦାନ କରି ସଭିଙ୍କ ପାଇଁ ସାଜିଛନ୍ତି ଉଦାହରଣ ।

ଦିବ୍ୟା ଆରାଧ୍ୟା ଦାସ । ବୟସ ମାତ୍ର ୧୧ । ଏହି କୁନି ଝିଅଟି ମନରେ ସମାଜ ପାଇଁ ଅନେକ ଚିନ୍ତା । ଲକଡାଉନ ସମୟରେ ଅନଲାଇନରେ କ୍ୟାନ୍ସର ରୋଗୀଙ୍କ କାହାଣୀ ଦେଖି ବିଚଳିତ ହୋଇପଡିଥିଲେ ଦିବ୍ୟା । କ୍ୟାନ୍ସର ରୋଗୀ ବାରମ୍ବାର କେମୋ ନେବାରୁ ସେମାନଙ୍କର ଚୁଟି ଝଡ଼ିଯାଇଥାଏ । ବାସ୍ ସେହି ସମୟରୁ ନିଜର କେଶ ଦାନ କରିବା ପାଇଁ ନିଷ୍ପତ୍ତି ନେଲେ ଦିବ୍ୟା । ଝିଅର ଏଭଳି ନିଷ୍ପତ୍ତି ମା’ ପ୍ରଜ୍ଞାଙ୍କୁ ବି ଆନ୍ଦୋଳିତ କରିଥିଲା । ତେବେ ଝିଅର ଏହି ମହତ୍ ଉଦ୍ଦେଶ୍ୟ ଦେଖି ସେ ଏଥିପାଇଁ ରାଜି ହୋଇଥିଲେ ।

ଅଭିନୟ ଜଗତରେ ଦର୍ଶକଙ୍କୁ ହସାଉଥିବା ଓ କନ୍ଦାଉଥିବା ଅଭିନେତ୍ରୀ ରାଜେଶ୍ୱରୀ ଜୀବନ ଓ ମୃତ୍ୟୁକୁ ଅତି ନିକଟରୁ ଦେଖିଛନ୍ତି । କ୍ୟାନ୍ସର ଯୋଗୁଁ ରାଜେଶ୍ୱରୀଙ୍କ ଭଳି ଅନେକ ଯୁବତୀ ନିଜର ସୁନ୍ଦର କେଶ ହରାଇବସନ୍ତି । ତେବେ କେଶ ଦାନର ଏହି ପ୍ରୟାସ ଅନେକ କ୍ୟାନ୍ସର ରୋଗୀଙ୍କ ପାଇଁ ବରଦାନ ସଦୃଶ ବୋଲି ସେ କହନ୍ତି । ସେହିପରି ଅମ୍ରିତା ପତି ବି ନିଜ କେଶ ଦାନ କରିବା ସହ ଏହା କ୍ୟାନସର ରୋଗୀଙ୍କ ମୁହଁରେ ହସ ଫୁଟାଇବ ବୋଲି ଆଶା ରଖିଛନ୍ତି । କ୍ୟାନ୍ସରରେ ପୀଡିତ ଥିବା ଅନେକ ଯୁବତୀ ଓ ମହିଳା ମହଙ୍ଗା ଓ୍ୱିଗ୍‌ କିଣିବା ପାଇଁ ଅସମର୍ଥ ହୋଇଥିବା ବେଳେ ମୁମ୍ବାଇ ସ୍ଥିତ ମଦତ୍‌ ଅନୁଷ୍ଠାନ ସେମାନଙ୍କ ପାଇଁ ମାଗଣାରେ ଓ୍ୱିଗ୍‌‌ ଯୋଗାଇଥାଏ । ଏହି କେଶ ସଂଗ୍ରହ ପରେ ମୁମ୍ବାଇ ପଠାଯିବ ।

ଲାଗିଲା ପୋଷ୍ଟର, ମିଳିବ କି ପରିଚୟ ? ପୋଷ୍ଟର କହିବ କଙ୍କାଳ କାହାର..

ଭୁବନେଶ୍ୱର: ଲାଗିଲା ପୋଷ୍ଟର, ମିଳିବ କି ପରିଚୟ? ପୋଷ୍ଟର କହିବ କଙ୍କାଳ କାହାର । ସ୍କେଚ ଉଠାଇବ କି ସସପେନ୍ସ! ଚିହ୍ନା ପକାଇବ କି ଚେହେରା ! ଭୁବନେଶ୍ୱର ଯାଁଳା ଫାଣ୍ଡି ପରିସରରୁ ଜବତ ଗାଡିରୁ ମହିଳା କଙ୍କାଳ ମିଳିବା ଘଟଣାରେ ରାଜଧାନୀର ଜନଗହଳିପୂର୍ଣ୍ଣ ସ୍ଥାନରେ ଲାଗିଲା କଙ୍କାଳ ସ୍କେଚ୍‌ ପୋଷ୍ଟର । ଏଥିରେ ମହିଳାଙ୍କ ବୟସ, ଉଚ୍ଚତା ଓ ଅନ୍ୟାନ୍ୟ ତଥ୍ୟ ଦିଆଯାଇଛି । ପୂର୍ବରୁ କଙ୍କାଳର ସ୍କେଚ୍‌ ଜାରି କରିଥିଲା ପୋଲିସ୍‌ । ଜାରି ହୋଇଥିବା ପୋଷ୍ଟରରେ, ଗତ ବର୍ଷ ସେପ୍ଟେମ୍ବରରୁ ଡିସେମ୍ବର ମଧ୍ୟରେ ମହିଳା ଜଣଙ୍କ ନିଖୋଜ ହୋଇଥିବା ନେଇ ଅନୁମାନ କରାଯାଉଥିବା ଉଲ୍ଲେଖ ରହିଛି ।

ପୋଷ୍ଟରରେ ତିନିଟି କାଟାଗୋରୀରେ ମହିଳାଙ୍କ ଫଟୋ ଲାଗିଛି । ଗୋଟିଏ ସ୍କେଚ୍ ଫଟୋ ସହ ଆଉ ଦୁଇଟିରେ ମହିଳାଙ୍କ ମୁହଁ ସ୍ପଷ୍ଟ ଦେଖାଯାଉଛି । ମହିଳା ଜଣକ ଗତବର୍ଷ ସେପ୍ଟେମ୍ବରରୁ ଡିସେମ୍ବର ମଧ୍ୟରେ ନିଖୋଜ ହୋଇଥିବା ପୋଲିସ ଅନୁମାନ କରିଛି । ମହିଳାଙ୍କ ବୟସ ୩୫ରୁ ୪୫ ବର୍ଷ, ଉଚ୍ଚତା ୧୬୪ ସେମି । ମହିଳାଙ୍କ ମୁଣ୍ଡରେ ପ୍ରାୟ ୩୫ ସେମି ଲମ୍ବର କଳା କେଶ ରହିଛି । ମହିଳା ଜଣଙ୍କ ଯକ୍ଷ୍ମା ରୋଗରେ ଆକ୍ରାନ୍ତ ଥିଲେ । ଡାହାଣ ହାତରେ ଚାରିଗୋଟି ଆଲୁମିନିୟମ ଚୁଡି ଓ ଗୋଟିଏ ସବୁଜ ରଙ୍ଗର ଫୁଲ୍ ହାତ ସ୍ୱେଟର ପିନ୍ଧିଥିବା ନେଇ ପୋଷ୍ଟରରେ ସୂଚନା ଦିଆଯାଇଛି।

ବରମୁଣ୍ଡା ବସ୍‌ଷ୍ଟାଣ୍ଡ, ବସ୍‌ଷ୍ଟପ୍‌, ମନ୍ଦିର, ପ୍ରମୁଖ ଛକ, ରେଳୱେ ଷ୍ଟେସନ, ଜନଗହଳିପୂର୍ଣ୍ଣ ଛକ, ଯାଁଳା ଫାଣ୍ଡିର ଆଖାପାଖ ଗାଁ, ୧୪ଟି ଥାନା ଓ ଭୁବନେଶ୍ୱରର ବିଭିନ୍ନ ଥାନାରେ ପୋଷ୍ଟର ଲଗାଇଛି ପୋଲିସ । ସେହିଭଳି ଗତ ୩ ମାସରେ ନିଖୋଜ ରିପୋର୍ଟକୁ କ୍ରସ୍‌ ଚେକ୍ କରାଯାଉଛି । ମହିଳାଙ୍କ ବିଷୟରେ ସୂଚନା ଦେଲେ ପରିଚୟ ଗୋପନ ରଖାଯିବ । ଆଗାମୀ ଦିନରେ ପୋଷ୍ଟରମରା ଅଭିଯାନକୁ ପୋଲିସ ଜୋରଦାର କରିବ । ମହିଳାଙ୍କ ବାବଦରେ ତଥ୍ୟ ଦେବାକୁ ପୋଲିସ ନିବେଦନ କରିଛି ।