spot_img
Home Blog Page 5995

ବିଜେପି ବିଧାୟକଙ୍କ ବିସ୍ଫୋରକ ବୟାନ: କେରଳର ଲୋକ ଉଚ୍ଚ ଶିକ୍ଷିତ, ତେଣୁ ଏଠି ବିଜେପି ପଛୁଆ

ଥିରୁଅନନ୍ତପୁରମ: କେରଳରେ ସରଗରମ ହେଲାଣି ରାଜନୀତି । ଆସନ୍ତା ଏପ୍ରିଲ ୬ରେ କେରଳରେ ହେବ ବିଧାନସଭା ନିର୍ବାଚନ । ଏଥିପାଇଁ ଜେରସୋର୍ ରେ ଚାଲିଛି ପ୍ରଚାର । କିନ୍ତୁ ଏହାରି ଭିତରେ କେରଳର ବରିଷ୍ଠ ବିଜେପି ନେତା ଏଭଳି ମନ୍ତବ୍ୟ ଦେଇଛନ୍ତି ଯାହା କି ସମସ୍ତଙ୍କୁ ଚକିତ କରିଦେଇଛି। ବିଶେଷ କରି ବିଜେପି ସମର୍ଥକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।  କେରଳର ଏକମାତ୍ର ବିଜେପି ବିଧାୟକ  ଓ. ରାଜଗୋପାଳ କହିଛନ୍ତି  ଯେ କେରଳରେ ବିଜେପିର ସଂଖ୍ୟା ନବଢ଼ିବାର କାରଣ ହେଉଛି ରାଜ୍ୟର ଅତ୍ୟଧିକ ସାକ୍ଷରତା । ସେ କହିଛନ୍ତି ଯେ ଏଠାକାର ଲୋକ ଉଚ୍ଚ ଶିକ୍ଷିତ । ଏମାନେ ଭାବି ଚିନ୍ତି ଭୋଟ ଦିଅନ୍ତି । ରାଜଗୋପାଳଙ୍କ ଏଭଳି ବୟାନ ବିଜେପି ଗାଲରେ ଏକ ଶକ୍ତ ଚାପୁଡ଼ା ଭାବେ ବାଜିଛି।

ଏପ୍ରିଲ ୬ରେ କେରଳର ୧୪୦ଟି ବିଧାନସଭା ସିଟ୍ ପାଇଁ ଭୋଟଗ୍ରହଣ ହେବ । ଯାହାର ଫଳାଫଳ ମେ ୨ରେ ପ୍ରକାଶ ପାଇବ । ବର୍ତ୍ତମାନ ରାଜ୍ୟରେ ବାମ ମୋର୍ଚ୍ଚା LDF କ୍ଷମତାରେ ଅଛି। କଂଗ୍ରେସ ନେତୃତ୍ୱାଧୀନ UDF ମେଣ୍ଟ ମୁଖ୍ୟ ବିରୋଧୀ ଭାବେ ଅଛି। ଏହି ଦୁଇ ଦଳ ମଧ୍ୟରେ ବିଜେପି ବି ନିଜ ସ୍ଥିତିକୁ ମଜଭୁତ କରିବା ପାଇଁ ଜୋରଦାର ପ୍ରସ୍ତୁତି ଚଲାଇଛି। କିନ୍ତୁ ରାଜଗୋପାଳଙ୍କ ଏଭଳି ବୟାନ ପରେ ଦଳକୁ ଅନେକ ପ୍ରଶ୍ନର ସମ୍ନା କରିବାକୁ ପଡ଼ିପାରେ ।

ଏକ ଗଣମାଧ୍ୟମ ସଂସ୍ଥାକୁ ସାକ୍ଷାତକାର ଦେଇ କେରଳର ନେମୋମ ବିଧାୟକ ଓ. ରାଜଗୋପାଳ କେରଳରେ ବିଜେପିର ସ୍ଥିତି ସ୍ପଷ୍ଟ କରିଛନ୍ତି । ତାଙ୍କୁ ପ୍ରଶ୍ନ କରାଯାଇଥିଲା ଯେ କେରଳରେ ବିଜେପି ଏତେ ପଛୁଆ କାହିଁକି? ଯେତେବେଳେ କି ହରିୟାଣା ଓ ତ୍ରିପୁରାରେ କ୍ଷମତା ଲଢ଼େଇରେ ପାର୍ଟି ବାଜି ମାରିଛି । ଅନ୍ୟପଟେ ପଶ୍ଚିମବଙ୍ଗରେ ବି ବିଜେପିର ସ୍ଥିତି ମଜଭୁତ ହେବାରେ ଲାଗିଛି । ତେବେ ଏହାର ଉତ୍ତରରେ ରାଜଗୋପାଳ କହିଥିଲେ, “କେରଳ ଏକ ଭିନ୍ନ ପ୍ରକାରର ରାଜ୍ୟ, ଏଠାରେ ଦୁଇଟି ତିନୋଟି କାରଣ ଅଛି ଯାହା ଏହାକୁ ଅନ୍ୟ ସ୍ଥାନଠାରୁ ଭିନ୍ନ କରିଥାଏ, କେରଳର ସାକ୍ଷରତା ଶତକଡା ୯୦ ପ୍ରତିଶତ ରହିଛି, ଏଠାକାର ଲୋକମାନେ ଭୋଟ ଦେବା ପୂର୍ବରୁ ଭାବନ୍ତି, ଏହାକୁ ନେଇ ଯୁକ୍ତି କରନ୍ତି। ଏବଂ ତା’ପରେ ଯାଇ ଭୋଟ୍ ଦିଅନ୍ତି। ଶିକ୍ଷିତ ଲୋକଙ୍କ ଏହା ହିଁ ଅଭ୍ୟାସ। ଆଉ ବିଜେପି ପାଇଁ ଏହା ହେଉଛି ଏକ ସମସ୍ୟା।”

ରାଜଗୋପାଲ କେରଳରେ ବିଜେପି ହାରିବାର ଦ୍ୱିତୀୟ କାରଣ ଦେଇ କହିଛନ୍ତି, ‘ରାଜ୍ୟରେ ୫୫ ପ୍ରତିଶତ ହିନ୍ଦୁ ଏବଂ ୪୫ ପ୍ରତିଶତ ସଂଖ୍ୟାଲଘୁ ଅଛନ୍ତି, ତେଣୁ ଏଠାରେ ପ୍ରତ୍ୟେକ ରାଜନୈତିକ ଦଳର ଗୁଣନ ଫେଲ ମାରେ। ତେଣୁ କେରଳକୁ ଅନ୍ୟ ରାଜ୍ୟ ସହ ତୁଳନା କରାଯାଇପାରିବ ନାହିଁ। ଏଠାରେ ପରିସ୍ଥିତି ଅଲଗା, କିନ୍ତୁ ଆମେ ଧୀରେ ଧୀରେ  ଆଗକୁ ବଢ଼ୁଛୁ।’ ତେବେ ରାଜଗୋପାଳଙ୍କ ଏଭଳି ବୟାନ ଆଗାମି ନିର୍ବାଚନରେ ବିଜେପି ପାଇଁ କଠିନ ପରିସ୍ଥିତି ସୃଷ୍ଟି କରିପାରେ ।

ସେନାରେ ମହିଳାଙ୍କୁ ସ୍ଥାୟୀ କମିଶନ ପ୍ରସଙ୍ଗ: ସୁପ୍ରିମକୋର୍ଟ କହିଲେ ପୁରୁଷଙ୍କ ପାଇଁ ପୁରୁଷ ତିଆରି କରିଛନ୍ତି ନିୟମ

ନୂଆଦିଲ୍ଲୀ: ସେନାରେ ମହିଳାଙ୍କୁ ସ୍ଥାୟୀ କମିଶନ ପାଇଁ ୮୦ ଜଣ ମହିଳା ଅଧିକାରୀ କରିଥିବା ଆବେଦନ ଉପରେ ଗୁରୁବାର ଦିନ ସୁପ୍ରିମକୋର୍ଟ ରାୟ ଦେଇଛନ୍ତି । ନିଜ ରାୟରେ ସୁପ୍ରିମକୋର୍ଟ କହିଛନ୍ତି ଯେ, ମହିଳାଙ୍କ ପାଇଁ ମେଡିକାଲ ଫିଟନେସ୍ ଆବଶ୍ୟକତା ‘ମନମୁତାବକ’ ଓ ‘ତର୍କହୀନ’ ଅଟେ । ସର୍ବୋଚ୍ଚୋ ଅଦାଲତ କହିଛନ୍ତି ଯେ, ‘ ଆମକୁ ଏହା ବୁଝିବାକୁ ପଡିବ ଯେ, ଆମ ସମାଜର ସରଞ୍ଚନା ପୁରୁଷଙ୍କ ଦ୍ୱାରା ପୁରୁଷଙ୍କ ପାଇଁ ତିଆରି ହୋଇଛି । ଯଦି ଏଥିରେ ପରିବର୍ତ୍ତନ ନହୁଏ ତେବେ ମହିଳାଙ୍କୁ ସମାନ ଅବସର ମିଳିବ ନାହିଁ । ସୁପ୍ରିମକୋର୍ଟଙ୍କ ଏହି ଆଦେଶ ସେନା ପାଇଁ ଝଟକା ଭାବେ ବିବେଚନା କରାଯାଉଛି ।

ସେନାର ବାର୍ଷିକ ଗୋପନୀୟ ରିପୋର୍ଟ (ଏସିଆର) ମହିଳାଙ୍କ ପାଇଁ ଭେଦଭାବପୂର୍ଣ୍ଣ ବୋଲି ସୁପ୍ରିମକୋର୍ଟ କହିଛନ୍ତି । ସେନାର ଏହି ତରିକା ମହିଳାଙ୍କୁ କେବେ ମଧ୍ୟ ସମାନ ଅଧିକାର ଦେବ ନାହିଁ । ସ୍ଥାୟୀ କମିଶନ ପାଇବା ପାଇଁ ଯୋଗ୍ୟ ମହିଳା ଅଧିକାରୀଙ୍କୁ ଦୁଇ ମାସ ମଧ୍ୟରେ ତୁରନ୍ତ ପଦଭାର ଦେବାକୁ ଅଦାଲତ ଆଦେଶ ଦେଇଛନ୍ତି । ଅଦାଲତ ଆହୁରି ମଧ୍ୟ କହିଛନ୍ତି ଯେ, ମୁଲ୍ୟାଙ୍କନର ତରିକା ପ୍ୟାଟର୍ଣ୍ଣ ଦ୍ୱାରା ଏସଏସସି (ସର୍ଟ ସର୍ଭିସ କମିଶନ) ମହିଳା ଅଧିକାରୀଙ୍କୁ ମାନସିକ ଓ ଆର୍ଥିକ କ୍ଷତି ହୋଇଥାଏ ।

ସୁପ୍ରିମକୋର୍ଟ ଫେବ୍ରୁଆରୀ ୧୭,୨୦୨୦ର ନିଜ ଫୈସଲାରେ ସର୍ଟ ସର୍ଭିସ କମିଶନ ସମସ୍ତ ମହିଳା ଅଧିକାରୀଙ୍କୁ ସ୍ଥାୟୀ କମିଶନ ପ୍ରଦାନ କରିବାକୁ ଆଦେଶ ଦେଇଥିଲେ । ସୁପ୍ରିମକୋର୍ଟ ଗତବର୍ଷ କେନ୍ଦ୍ର ସରକାରଙ୍କୁ ନିଜ ପୁରୁଷ ସମକକ୍ଷଙ୍କ ସହିତ ସେନାର ସମସ୍ତ ଯୁଦ୍ଧ ଲଢୁନଥିବା ଅଙ୍ଗରେ ମହିଳା ଅଧିକାରୀଙ୍କୁ ସ୍ଥାୟୀ କମିଶନ ପ୍ରଦାନ କରିବାକୁ ଆଦେଶ ଦେଇଥିଲେ ।

ବିଧାନସଭାରେ କୃଷି ଆଇନ ତାତି, ନରସିଂହ କହିଲେ ରାଜ୍ୟରେ ଲାଗୁ ନହେଉ କେନ୍ଦ୍ର ଆଇନ

ଭୁବନେଶ୍ବର: ବିଧାନସଭାରେ କୃଷି ଆଇନ ତାତି । କେନ୍ଦ୍ର ସରକାରଙ୍କ ତିନି କୃଷି ଆଇନ ପ୍ରସଙ୍ଗ ଉଠାଇଲେ କଂଗ୍ରେସ ଦଳ ନେତା ନରସିଂହ ମିଶ୍ର । କେନ୍ଦ୍ର ସରକାର ଆଣିଥିବା କୃଷି ଆଇନ କୃଷକଙ୍କ ପାଇଁ କ୍ଷତିକାରକ । କୃଷକ ବିରୋଧି ଏହି ଆଇନ, ତେଣୁ କେନ୍ଦ୍ର ସରକାର ଯେଉଁ ତିନୋଟି କଳା କୃଷି ଆଇନ ଆଣିଛନ୍ତି ତାକୁ ରାଜ୍ୟରେ କାର୍ଯ୍ୟକାରୀ କରାନଯାଉ ବୋଲି ଗୃହରେ ଉଠାଇଛନ୍ତି ନରସିଂହ ମିଶ୍ର ।

ସେପଟେ ଏନେଇ କଂଗ୍ରେସ ଦଳ ଏହା ଉପରେ ଏକ ସଂକଳ୍ପ ଦେଇଛି । ଏହି ସଂକଳ୍ପ ପତ୍ରକୁ ଗୃହରେ ଆଲୋଚନା କରାଯିବା ପାଇଁ ପାସ କରାଯାଉ ବୋଲି ମଧ୍ୟ କହିଛନ୍ତି କଂଗ୍ରେସ ଦଳ ନେତା। ବହୂ ରାଜ୍ୟ ଏହି ଆଇନ କୁ କାର୍ଯ୍ୟକାରୀ କରିନାହାନ୍ତି । କାଲି ଏହି ଆଇନ କୁ ବିରୋଧ କରି କୃଷକ ସଂଘଠନ ଭାରତ ବନ୍ଦ ଡାକରା ଦେଇଛନ୍ତି ବୋଲି ଗୃହରେ କହିଛନ୍ତି ନରସିଂହ ମିଶ୍ର ।

‘ଡିସେମ୍ବରରେ ଚିହ୍ନଟ ହୋଇଥିଲେ ୟୁକେ ଷ୍ଟ୍ରେନ, କାହାକୁ କରି ନାହାନ୍ତି ସଂକ୍ରମିତ’

ଭୁବନେଶ୍ୱର: ରାଜ୍ୟରେ ବ୍ରିଟେନ ଭୂତାଣୁ ନେଇ ସୂଚନା ଜାରି କରିଛନ୍ତି ଆଇଅଲଏସ ନିର୍ଦ୍ଦେଶକ ଅଜୟ ପରିଡା  । ସେ କହିଛନ୍ତି  ଦେଶର 10ଟି ଅନୁଷ୍ଠାନ ସିକ୍ୱେନ୍ସିଂ କରୁଥିଲେ ।  4ଟି ରାଜ୍ୟର ଆଇଏଲଏସ କରୁଥିଲେ । 3 ଜଣ ୟୁକେ ଫେରନ୍ତା ଆସିଥିଲେ । ସେମାନଙ୍କ ଠାରେ ୟୁକେ ଷ୍ଟ୍ରେନ ଦେଖାଯାଇଥିଲା । ଡିସେମ୍ବର ମାସରେ ଚିହ୍ନଟ ହୋଇଥିଲେ । ସେମାନେ ଏବେ ଆରୋଗ୍ୟ ହୋଇସାରିଛନ୍ତି ଆଉ କାହାକୁ ସଂକ୍ରମିତ କରି ନାହାନ୍ତି। 220ଟି ସମ୍ପୁଲ ଆଇଏଲଏସରେ ଟେଷ୍ଟ କରଯାଇଥିଲା  । N440K ଆସିଛି, ହେଲେ ସେତେ ମାରାତ୍ମକ ନୁହେଁ । ଏହି 3ଟା ମଧ୍ୟ ଅଧିକ ସଂକ୍ରମକ ନୁହେଁ ।

ମହାରାଷ୍ଟ୍ର ଓ ପଞ୍ଜାବରେ ଦେଖାଯାଉଥିବା ଷ୍ଟ୍ରେନର ସଂକ୍ରମଣ ହାର ଯଥେଷ୍ଟ ଅଧିକ । ପୁନଃ ସଂକ୍ରମଣ ହାର ବଢ଼ିଛି । 1:1 ରୁ 1:5 ହୋଇ ଯାଇଛି । କିନ୍ତୁ ଏହା ଏତେଟା ମାରାତ୍ମକ ନୁହେଁ । ପଞ୍ଜାବରେ 80 ପ୍ରତିଶତ ୟୁକେ ଭେରିଏଣ୍ଟ । କିନ୍ତୁ ଓଡିଶାରେ ପରିସ୍ଥିତି ଠିକ୍ ଅଛି । ତଥାପି ହୋଲି ଭଳି ପର୍ବପର୍ବାଣୀରେ ସତର୍କ ରହିବାକୁ ପଡ଼ିବ । ହେଲେ ଓଡ଼ିଶାକୁ ସେ ସ୍ଥିତି ଆସି ନାହିଁ। ତେବେ ଲୋକ ଅମାନିଆ ଅଛନ୍ତି।

ମାଇକ୍ରୋ କଣ୍ଟେନମେଣ୍ଟ ଜୋନ କରି ନିୟନ୍ତ୍ରଣ କରାଯାଇପାରିବ । କେଉଁ ମ୍ୟୁଟେସନ ଅଧିକ ସଂକ୍ରାମକ ତାହା ଅଧ୍ୟୟନ କଲେ ଜଣାପଡ଼ିବ । ଆଉ ଏକ ସପ୍ତାହ ଭିତରେ ଆଇଏଲଏସରେ ଆଉ 320ଟି ସାମ୍ପୁଲ ଟେଷ୍ଟ କରାଯିବ। ବର୍ତ୍ତମାନ ଓଡିଶାର ବିଭିନ୍ନ ଜିଲ୍ଲାରେ ଚିହ୍ନଟ ହେଉଥିବା ନମୁନାରୁ ସେତେଟା ଭୟାନକ ସ୍ଥିତି ନଥିବା ଜଣା ପଡ଼ିଛି। ଆମେ ନୂଆପଡା, କନ୍ଧମାଳ ଓ କଳାହାଣ୍ଡିର ନମୁନା ପରୀକ୍ଷା କରୁଛୁ। ଦୈନିକ 10,500 RTPCR ହେଉଛି। ଜାନୁଆରୀ ଓ ଫେର୍ବୃଆରୀର genom sequence NIV ଯାଇଛି। ଦୁଇ ଦିନରେ ରିପୋର୍ଟ ଆସିବ ବୋଲି କହିଛନ୍ତି ଅଜୟ ପରିଡ଼ା  ।

ବେକାବୁ କରୋନା: ଦିନକରେ ୫୦ ହଜାର ଟପିଲା ସଂକ୍ରମଣ

ଦେଶରେ ପୁଣି ୫୦ହଜାର ଟପିଲା ଦୈନିକ କରୋନା ସଂକ୍ରମଣ। ଦୀର୍ଘ ୫ମାସ ପରେ ଦୈନିକ କରୋନା ସଂକ୍ରମଣ ୫୦ ହଜାର ପାର୍ କରିଛି।  ଦେଶରେ ଗତ ୨୪ ଘଣ୍ଟାରେ ଆଉ ୫୩ ହଜାର ୪୭୬ ନୂଆ ପଜିଟିଭ ଚିହ୍ନଟ ହୋଇଛନ୍ତି । ଏଥିସହ ଗୋଟିଏ ଦିନରେ ୨୫୧ ଜଦଣଙ୍କ ଜୀବନ ବି ଯାଇଛି ।

ସେହିପରି ଦିନକରେ ୨୬ ହଜାର ୪୯୦ ଜଣ ଆକ୍ରାନ୍ତ  କରୋନାରୁ ସୁସ୍ଥ ହୋଇଛନ୍ତି । ତେବେ ନୂଆ ଆକ୍ରାନ୍ତଙ୍କୁ ମିଶାଇ ବର୍ତ୍ତମାନ ସୁଦ୍ଧା ମୋଟ ଆକ୍ରାନ୍ତଙ୍କ ସଂଖ୍ୟା ୧ କୋଟି ୧୭ ଲକ୍ଷ ୮୭ ହଜାର ୫୩୪ରେ ପହଞ୍ଚିଛି ।  ଏବେ ସୁଦ୍ଧା ମୋଟ ୧ କୋଟି ୧୨ ଲକ୍ଷ ୩୧ ହଜାର ୬୫୦ ଜଣ ଆକ୍ରାନ୍ତ ସୁସ୍ଥ ହୋଇଥିବା ବେଳେ,  ୩ ଲକ୍ଷ ୯୫ ହଜାର ୧୧୨ ସକ୍ରିୟ ମାମଲା ରହିଛି। ସେହିଭଳି ମୋଟ ମୃତ୍ୟୁ ସଂଖ୍ୟା ୧ ଲକ୍ଷ ୬୦ ଜାର ୬୯୨ରେ ପହଞ୍ଚିଛି । ଅନ୍ୟପଟେ ଦେଶରେ ଦ୍ୱିତୀୟ ପର୍ଯ୍ୟାୟ ଟିକାକରଣ ଜାରି ରହିଛି। ବର୍ତ୍ତମାନ ସୁଦ୍ଧା ଦେଶରେ ୫ କୋଟି ୩୧ ଲକ୍ଷ ୪୫ ହଜାର ୭୦୯ ଜଣ କରୋନା ଟିକା ନେଇସାରିଲେଣି।

ମହାରାଷ୍ଟ୍ରରେ ସ୍ଥିତି ସଙ୍ଗୀନ: ମହାରାଷ୍ଟରରେ ପ୍ରତିଦିନ କରୋନା ସଂକ୍ରମଣ ପୂରୁଣା ରେକର୍ଡ଼୍ ଭାଙ୍ଗୁଛି । ଗତ କିଛି ଦିନରେ ମହାରାଷ୍ଟ୍ରରେ ୩୧ ହଜାରରୁ ବି ଅଧିକ ନୂଆ ମାମଲା ଚିହ୍ନଟ ହୋଇଛି । ତେବେ ବର୍ତ୍ତମାନ ରାଜ୍ୟରେ ଅଢ଼େଇ ଲକ୍ଷରୁ ଅଧିକ କରୋନା ମାମଲା ସକ୍ରିୟ ରହିଛି, ଯାହାକି ଦେଶର ମୋଟ ସକ୍ରିୟ ମାମଲାର ଅଧାରୁ ଅଧିକ। ଏହି କାରଣରୁ ରାଜ୍ୟର ଅଧିକାଂଶ ଅଞ୍ଚଳରେ ସମ୍ପୂର୍ଣ୍ଣ ଲକଡାଉନ କରିଦିଆଯାଇଛି।

କେବଳ ମହାରାଷ୍ଟ୍ର ନୁହେଁ ଦିଲ୍ଲୀ, ଉତ୍ତରପ୍ରଦେଶ, କର୍ଣ୍ଣାଟକ, ଆନ୍ଧ୍ରପ୍ରଦେଶ, ତାମିଲନାଡୁ, ପଶ୍ଚିମବଙ୍ଗରେ ମଧ୍ୟ କରୋନା ଗ୍ରାଫ ଉପରମୁହାଁ ହେଉଛି । ତେଣୁ ପ୍ରାୟ ରାଜ୍ୟରେ ପୁଣି ଥରେ କରୋନାକଟକଣା କୁ କଡ଼ା କଡ଼ି ଭାବେ ପାଳ କରାଯିବାକୁ ନିର୍ଦ୍ଦେଶ ଦିଆଯାଇଛି ।

ବହିରୁ ମିଳିଲା ହତ୍ୟା ଟ୍ରେନିଂ, ଶାଶୁକୁ ହତ୍ୟା, ସ୍ତ୍ରୀ କୋମାରେ

ନୂଆଦିଲ୍ଲୀ: ପୁସ୍ତକ ସାଜିଛି ଶିକ୍ଷକ । କିନ୍ତୁ କୌଣସି ମହାନ କାମ ପାଇଁ ନୁହେଁ ବରଂ ଅପରାଧ ପାଇଁ । ଦିନେ ରାଜନୈତିକ ବିରୋଧୀଙ୍କୁ ମାରିବା ପାଇଁ ଥିଲିୟମ ନାମକ ବିଷାକ୍ତ ପଦାର୍ଥ ବ୍ୟବହାର କରିଥିଲା ଏକଛତ୍ରବାଦ ଶାସକ ସଦ୍ଦାମ ହୁସୈନ । ଯାହାର କାହାଣୀକୁ ପୁସ୍ତକରେ ପଢି ହତ୍ୟା ପ୍ରଶିକ୍ଷଣ ନେଇଥିଲା ଦିଲ୍ଲୀ ସ୍ଥିତ ବିଲଡର ବରୁଣ ଅରୋରା । ପୁସ୍ତକରୁ ନେଇଥିବା ଜ୍ଞାନକୁ କାମରେ ବ୍ୟବହାର କରିଛି ସୈତାନ ବରୁଣ । ଶାଶୁ, ଶ୍ୱଶୁର, ଶାଳୀ ଏବଂ ପତ୍ନିକୁ ମାଛ ସହିତ ଦେଇଥିଲା ବିଷାକ୍ତ ଥିଲିୟମ ଗ୍ୟାସ୍‌। ଏହା ପ୍ରଭାବରେ ବରୁଣର ଶାଶୁ ଏବଂ ଶାଳୀଙ୍କ ମୃତ୍ୟୁ ହୋଇଥିବା ବେଳେ କୋମାକୁ ଚାଲି ଯାଇଛନ୍ତି ବରୁଣର ପତ୍ନି ଅନିତା ଶର୍ମା ।

ଉକ୍ତ ମାମଲାକୁ ନେଇ ଥାନାରେ ଅଭିଯୋଗ କରିଛନ୍ତି ବରୁଣର ଶ୍ୱଶୁର । ବରୁଣର ଶ୍ୱଶୁରଙ୍କ କହିବା ଅନୁସାରେ ତାଙ୍କ ପୂରା ପରିବାରକୁ ବରୁଣ ମାଛ ମାଧ୍ୟମରେ ବିଷାକ୍ତ ଥିଲିୟମ ଗ୍ୟାସ ଦେଇଥିବା ବେଳେ ନିଜେ ସେହି ମାଛ ଖାଇନଥିଲା । ବରୁଣର ଶାଶୁ ଅନିତାଙ୍କ ମୃତ ଶରୀରରୁ ଥିଲିୟମ ଗ୍ୟାସ ମିଳିଥିବା ପୋଷ୍ଟମର୍ଟମ ରିପୋର୍ଟର ଜଣାପଡ଼ିଛି । କେବଳ ସେତିକି ନୁହେଁ ବରୁଣର ପତ୍ନି ଦିବ୍ୟାଙ୍କ ଶରୀରରୁ ମଧ୍ୟ ଥିଲିୟମ ଗ୍ୟାସ୍‌ର ଅତ୍ୟଧିକ ମାତ୍ରା ମିଳିଛି ।

ପୋଲିସ ଉକ୍ତ ଘଟଣାର ତଦନ୍ତ ପରେ ଅଭିଯୁକ୍ତର ଲ୍ୟାପଟପ ଏବଂ କମ୍ପ୍ୟୁଟରକୁ ଜବତ କରିଛି । ଯେଉଁଥିରୁ ଅଭିଯୁକ୍ତ ହତ୍ୟା ପାଇଁ ରଦାମ ହୁସୈନଙ୍କ କାହାଣୀ ଇଂଣ୍ଟରନେଟରୁ ପଢିଥିବା ଜଣାପଡ଼ିଲା । ପୋଲିସ୍‌ଅଭିଯୁକ୍ତକୁ ଗିରଫ କରିସାରିଛି ।

ଥିଲିୟମ ହେଉଛି ଅତ୍ୟଧିକ ବିଷାକ୍ତ ରାସାୟନିକ ଗ୍ୟାସ୍‌। କୀଟାଣୁ ଏବଂ ମୂଷାକୁ ମାରିବା ପାଇଁ ଏହାକୁ ବ୍ୟବହାର କରାଯାଏ ।

ବିଧାନସଭାରେ ମନ୍ତ୍ରୀଙ୍କ ଉତ୍ତର, ୨୫୧ ବ୍ଲକରେ ଜଳସେଚିତ ହୋଇଛି ୩୫ ପ୍ରତିଶତ ଜମି

ଭୁବନେଶ୍ବର: ସୁରୁଖୁରୁରେ ଚାଲିଛି ବିଧାନସଭା ଅଧିବେଶନ । ଜଳସମ୍ପଦ, ଯୋଜନା ଓ ସଂଯୋଜନ ନେଇ ଗୃହରେ ତଥ୍ୟ ରଖିଛନ୍ତି ଜଳ ସମ୍ପଦ ମନ୍ତ୍ରୀ ରଘୁନନ୍ଦନ ଦାସ । ରାଜ୍ୟ ସରକାର ରାଜ୍ୟର ସମୁଦାୟ 43 ଲକ୍ଷ ହେକ୍ଟର ଚାଷ ଜମିରେ ଜଳ ସେଚନ ସାମର୍ଥ୍ୟ ସୃଷ୍ଟି କରିଛନ୍ତି । ମୋଟ୍‌ 314 ବ୍ଲକରୁ 251 ବ୍ଲକରେ 35 ପ୍ରତିଶତ ଜମି ଜଳସେଚିତ ହୋଇଛି । ଆଉ 63 ବ୍ଲକରେ ଜଳ ସେଚନ ପାଇଁ ସରକାର ଅନୁଦାନ ଦେବା ସହ କାର୍ଯ୍ୟକ୍ରମ ହାତକୁ ନେଇଛନ୍ତି ।
ଆଜି ବିଧାନସଭାରେ ଜଳସଂପଦ ମନ୍ତ୍ରୀ ରଘୁନନ୍ଦନ ଦାସ ଏହି ସୂଚନା ଦେଇଛନ୍ତି ।

2015 -16ରୁ 2019-20 ମଧ୍ୟରେ 7ଲକ୍ଷ43ହଜାର ହେକ୍ଟର ଜମିରେ ଜଳସେଚନ ସାମର୍ଥ୍ୟ ସୃଷ୍ଟି କରାଯାଇଛି । ସେପଟେ ବିଧାନସଭାରେ ଜଳ ସେଚନ ନେଇ ଗୃହର ଉଦବେଗ ଦେଖି ରୁଲିଂ ଦେଇଛନ୍ତି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର। ବିଧାନସଭା ଅଧିବେଶନ ସରିବା ପରେ ଦୁଇଟି ଲେଖାଏଁ ଜିଲ୍ଲାର ସଦସ୍ୟ ଏବଂ ସମ୍ପୃକ୍ତ ଅଧିକାରୀଙ୍କୁ ଡାକି ଆଲୋଚନା କରି ସମସ୍ୟା ସମାଧାନ କରିବାକତୁ ରୁଲିଂ ଦେଇଛନ୍ତି ।

ସେପଟେ ପ୍ରଶ୍ନକାଳରେ ଜଳସଂପଦ ମନ୍ତ୍ରୀ ରଘୁନନ୍ଦନ ଦାସ କହିଛନ୍ତି, ରାଜ୍ୟରେ ୨୫୧ ବ୍ଲକରେ ୩୫ ପ୍ରତିଶତ ଜମିକୁ ଜଳସେଚିତ କରିଛନ୍ତି ରାଜ୍ୟ ସରକାର । ୪୩ ଲକ୍ଷ ହେକ୍ଟର ଚାଷ ଜମିରେ ସୃଷ୍ଟି ହୋଇଛି ଜଳସେଚନ ସାମର୍ଥ୍ୟ । ବାକି ୬୩ଟି ବ୍ଲକରେ ଜଳସେଚନ ପାଇଁ ସରକାର ଅନୁଦାନ ଦେବା ସହ କାର୍ଯ୍ୟକ୍ରମ ହାତକୁ ନେଇଛନ୍ତି ବୋଲି ସୂଚନା ଦେଇଛନ୍ତି ଜଳସମ୍ପଦ ମନ୍ତ୍ରୀ ରଘୁନନ୍ଦନ ଦାସ ।

ରାଜ୍ୟରେ ପୁଣି କରୋନା ଆତଙ୍କ, ଦୈନିକ ସଂକ୍ରମଣ ୨୦୦ ଟପିଲା

ଭୁବନେଶ୍ବର: ରାଜ୍ୟରେ ପୁଣି କରୋନା ଆତଙ୍କ । ଦୈନିକ ସଂକ୍ରମଣ ପୁଣି ୨୦୦ ଟପିଛି । ଆଜି ଗୋଟିଏ ଦିନରେ ରାଜ୍ୟରେ ୨୧୪ କରୋନା ଆକ୍ରାନ୍ତ ହୋଇଥିବା ଜଣାପଡିଛି । କ୍ବାରେଣ୍ଟାଇନ ସେଣ୍ଟରରୁ ୧୨୬ ଜଣଙ୍କୁ ଚିହ୍ନଟ କରାଯାଇଥିବାବେଳେ ଲୋକାଲ କଣ୍ଟ୍ରାକ୍ଟ ୮୮ ଚିହ୍ନଟ କରାଯାଇଛି ।

ଆଜି ଚିହ୍ନଟ ହୋଇଥିବା କରୋନା ସଂକ୍ରମିତଙ୍କ ତାଲିକାରେ ଆଗରେ ରହିଛି ଖୋର୍ଦ୍ଧା ଜିଲ୍ଲା । ସର୍ବାଧିକ ୩୩ ଜଣ ଖୋର୍ଦ୍ଧା ଜିଲ୍ଲାରୁ ଚିହ୍ନଟ ହୋଇଛନ୍ତି । ସେହିଭଳି ସୁନ୍ଦରଗଡ଼ରୁ ୨୭ ଜଣ, ବଲାଙ୍ଗୀର ଓ କଟକରୁ ୨୦ ଜଣ , ବରଗଡ଼ ଓ ବାଲେଶ୍ବରରୁ ୧୩ ଜଣ ଲେଖାଏଁ ଚିହ୍ନଟ କରାଯାଇଛି ।

ସେହିପରି ଢେଙ୍କାନାଳ, କୋରାପୁଟ ଓ ସମ୍ବଲପୁରରୁ ୧୦ ଜଣ ଚିହ୍ନଟ ହୋଇଛନ୍ତି । ମୟୁରଭଞ୍ଜରୁ ୯, ଅନୁଗୁଳରୁ ୬, ପୁରୀ, ଯାଜପୁର, କଳାହାଣ୍ଡିରୁ ୫ ଜଣ ଲେଖାଏଁ ଚିହ୍ନଟ ହୋଇଥିବାବେଳେ ଷେଟ ପୁଲରୁ ୯ଜଣ ଚିହ୍ନଟ ହୋଇଥିବା ଜଣାପଡିଛି । କରୋନା ସଂକ୍ରମିତ ହ୍ରାସ ଘଟିଥିବାବେଳେ ଆଜି ପୁଣି ଚଳିତ ବର୍ଷର ସର୍ବାଧିକ ୨୦୦ ଅତିକ୍ରମ କରିଛି ସଂକ୍ରମଣ ସଂଖ୍ୟା । ଫଳରେ ରାଜ୍ୟରେ ମୋଟ ଆକ୍ରାନ୍ତଙ୍କ ସଂଖ୍ୟା ୩ ଲକ୍ଷ ୩୯ ହଜାର ୪୬୦ ଛୁଇଁଛି ।

ପ୍ରକାଶ ପାଇଲା ଜେଇଇ ମେନ୍ ରେଜଲ୍ଟ, ଶତ ପ୍ରତିଶତ ମାର୍କ ରଖିଲେ ୧୩ ଜଣ ଶିକ୍ଷାର୍ଥୀ

ନୂଆଦିଲ୍ଲୀ: ପ୍ରକାଶ ପାଇଛି ଜେଇଇ ମେନ୍ ରିଜଲ୍ଟ । ମାର୍ଚ୍ଚ ମାସର ରେଜଲ୍ଟ ଆଜି ପ୍ରକାଶିତ ହୋଇଛି । ମାତ୍ର ୬ ଦିନ ମଧ୍ୟରେ ଜେଇଇ ମେନ୍‌ ରେଜଲ୍ଟ ଏନଟିଏ ପକ୍ଷରୁ ପ୍ରକାଶ ପାଇଛି । ପୂର୍ବରୁ ଫେବୃଆରୀ ସେସନର ଜେଇଇ ମେନ୍‌ ରେଜଲ୍ଟ ପ୍ରକାଶ ପାଇଥିଲା। । ଏହି ପରୀକ୍ଷା ପାଇଁ ୬,୧୯,୩୬୮ ଜଣ ଶିକ୍ଷାର୍ଥୀ ପଞ୍ଜୀକରଣ କରିଥିଲେ । ସେଥରୁ ପ୍ରାୟ ୫ ଲକ୍ଷ ୯୦ ହଜାର ଛାତ୍ରଛାତ୍ରୀ ପରୀକ୍ଷା ଦେଇଥିଲେ ।

ସେହିଭଳି ମାର୍ଚ୍ଚ ୧୬ରୁ ୧୮ ଯାଏ ଏହି ପରୀକ୍ଷା ହୋଇଥିଲା । ଏହି ସେସନରେ ମୋଟ ୧୩ ଜଣ ଶିକ୍ଷାର୍ଥୀ ଶତ ପ୍ରତିଶତ ମାର୍କ ରଖିଛନ୍ତି। ଆଜି ପ୍ରକାଶ ପାଇଥିବା ରେଜଲ୍ଟରେ ଓଡ଼ିଶାରୁ ଟପ୍ପର ହୋଇଛନ୍ତି ଦେବାଶିଷ ପଣ୍ଡା । ଦେବାଶିଷ ମୋଟ ୯୯.୯୫% ମାର୍କ ରଖିଛନ୍ତି । ଶତ ପ୍ରତିଶତ ମାର୍କ ରଖିଥିବା ଶିକ୍ଷାର୍ଥୀମାନେହେଲେ ଦିଲ୍ଲୀର ସିଦ୍ଧାର୍ଥ କଲରା ଓ କାବ୍ୟା ଚୋପ୍ରା, ତେଲେଙ୍ଗାନାର ବାନ୍ନୁରୁ ରୋହିତ କୁମାର ରେଡ୍ଡୀ ।

ସେହିପରି ମାଦୁର ଆଦର୍ଶ ରେଡ୍ଡୀ ଓ ଯୋସୟୁଲା ଭେଙ୍କଟ ଆଦିତ୍ୟ, ପଶ୍ଚିମବଙ୍ଗର ବ୍ରାଟିନ ମଣ୍ଡଳ, ବିହାରର କୁମାର ସତ୍ୟଦର୍ଶୀ, ରାଜସ୍ଥାନର ମ୍ରିଦୁଲ ଅଗ୍ରୱାଲ ଓ ଜେନିଥ ମାଲହୋତ୍ରା, ତାମିଲନାଡୁର ଅଶ୍ୱିନ ଅବ୍ରାହମ ଏବଂ ମହାରାଷ୍ଟ୍ରର ଅଥର୍ବ ଅଭିଜିତ ତାମବାଟ ଓ ବକ୍ସି ଗାର୍ଗୀ ମାରକଣ୍ଡ ମଧ୍ୟ ଶତ ପ୍ରତିଶତ ମାର୍କ ରଖିଛନ୍ତି ।

ଜଳିଗଲା ଯବାନଙ୍କ ଜିପ୍, ୩ ଜୀବନ୍ତ ଦଗ୍ଧ, ୫ ଗୁରୁତର

ଜୟପୁର: ରାଜସ୍ଥାନରେ ଯବାନଙ୍କ ଜିପ୍ ଦୁର୍ଘଟଣାଗ୍ରସ୍ତ । ସୁରଟଗଡ ଇନ୍ଦିରା ଗାନ୍ଧୀ କେନାଲର ୩୩୦ ଆରଡି ନିକଟରେ ଦୁର୍ଘଟଣାଗସ୍ତ ହୋଇଛି ଆର୍ମି ଜିପ । ସୂଚନା ଅନୁଯାୟୀ ଦୁର୍ଘଟଣାପରେ ଜଳିଯାଇଛି ଜିପ୍ । ଫଳରେ ୩ ଯବାନ୍ ଜୀବନ୍ତ ଦଗ୍ଧ ହୋଇଥିବାବେଳେ 5 ଜଣ ଗୁରୁତର ହୋଇଛନ୍ତି।

ସୂଚନା ମୁତାବକ ବୁଧବାର ବିଳମ୍ବିତ ରାତିରେ ଆର୍ମି ଗାଡି ଦୁର୍ଘଟଣାଗ୍ରସ୍ତ ହୋଇ ନିଆଁ ଲାଗିଯାଇଥିଲା । ଏଥିରେ ୫ ଯବାନ ଗୁରୁତର ଆହତ ହୋଇଥିଲେ । ଘଟଣାସ୍ଥଳରେ 3ଯବାନ ଜୀବନ୍ତ ଦଗ୍ଧ ହୋଇଥିବାବେଳେ 5ଜଣ ଗୁରୁତର ଆହତ ହୋଇଛନ୍ତି । ଆହତଙ୍କୁ ସୁରଟଗଡର ମିଲିଟାରୀ ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣାସ୍ଥଳରେ ଅଗ୍ନିଶମବାହିନୀ ପହଞ୍ଚି ନିଆଁକୁ ଆୟତ୍ତ କରିଛି ।