spot_img
Home Blog Page 5997

ଲେଉଟୁଛି କରୋନା-ବଢୁଛି ସଂକ୍ରମଣ; ଶ୍ରୀମନ୍ଦିରରେ କଟକଣା କଡ଼ାକଡ଼ି, ସପ୍ତାହକୁ ଥରେ ହେବ ସାନିଟାଇଜ୍‌

ପୁରୀ: ପୁଣି ଲେଉଟୁଛି କରୋନା । ବଢୁଛି ସଂକ୍ରମଣ ସଂଖ୍ୟା । ସଜାଗ ଶ୍ରୀମନ୍ଦିର ପ୍ରଶାସନ । ରାଜ୍ୟରେ ଏବେ ଦିନକୁ ଦିନ ବୃଦ୍ଧି ପାଉଛି କରୋନା ସଂକ୍ରମିତ ସଂଖ୍ୟା । ରାଜ୍ୟ ତଥା ରାଜ୍ୟ ବାହାରେ କରୋନା ସଂକ୍ରମଣ ବୃଦ୍ଧି ପାଉଥିବାରୁ ପୁରୀ ଶ୍ରୀମନ୍ଦିରରେ ବ୍ୟାପକ ବ୍ୟବସ୍ଥା ଗ୍ରହଣ କରୁଛି ପ୍ରଶାସନ । ଭିଡ଼ ନିୟନ୍ତ୍ରଣ ସହ ସତର୍କତା ପାଇଁ ପଦକ୍ଷେପ । ସପ୍ତାହରେ ଗୋଟିଏ ଦିନ ଶ୍ରୀମନ୍ଦିର ବନ୍ଦ ରଖି ସାନିଟାଇଜ୍‌ କରାଯିବାକୁ ନିଷ୍ପତି ନିଆଯାଇଥିବା ବେଳେ ମାସ୍କ ପରିଧାନ ସହ ହ୍ୟାଣ୍ଡ ସାନିଟାଇଜ୍‌କୁ ଗୁରୁତ୍ୱ ଦିଆଯାଇଛି । ପ୍ରଶାସନର ଏହି ନିଷ୍ପତ୍ତିକୁ ସେବାୟତ ଓ ଭକ୍ତମାନଙ୍କ ପକ୍ଷରୁ ସ୍ୱାଗତ କରାଯାଇଛି ।

ପ୍ରତିଦିନ ଲକ୍ଷାଧିକ ଭକ୍ତଙ୍କ ଭିଡ ଜମୁଥିବାରୁ ସତର୍କତାମୂଳକ ପଦକ୍ଷେପ ନେବାକୁ ନିଷ୍ପତ୍ତି ନିଆଯାଇଛି । ସପ୍ତାହକୁ ଗୋଟିଏ ଦିନ, ଅପାତତଃ ପ୍ରତି ରବିବାର, ଶ୍ରୀମନ୍ଦିର ବନ୍ଦ ରଖାଯାଇ ସାନିଟାଇଜ କରାଯିବାକୁ ନିଷ୍ପତି ନିଆଯାଇଛି । ଶ୍ରଦ୍ଧାଳୁଙ୍କ ମାସ୍କ ପରିଧାନ, ସାନିଟାଇଜ୍‌ ଓ ସାମାଜିକ ଦୂରତାକୁ ଗୁରୁତ୍ୱ ଦିଆଯାଇଛି ।

ସାମୁହିକ ସ୍ୱାର୍ଥ ପାଇଁ ପ୍ରଶାସନର ଏପରି ପଦକ୍ଷେପକୁ ସ୍ୱାଗତ କରିଛନ୍ତି ସେବାୟତ ଓ ଶ୍ରଦ୍ଧାଳୁ । ଏବେଠାରୁ ସତର୍କ ନହେଲେ ଆଗକୁ ପୂର୍ବଭଳି ସଙ୍ଗୀନ ପରିସ୍ଥିତି ଉପୁଜି ପାରେ ବୋଲି ସେମାନେ ମତ ଦେଇଛନ୍ତି । ଭକ୍ତ ଓ ସେବାୟତଙ୍କ ସୁରକ୍ଷା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଚେକିଂକୁ କଡାକଡି କରାଯାଇଛି ।

ନିଆରା ସାଇକେଲ ଧରି ମନୋଜ ବାଣ୍ଟୁଛନ୍ତି ବାପୁଙ୍କ ବାର୍ତ୍ତା

ଭୁବନେଶ୍ୱର: ମହାତ୍ମା ଗାନ୍ଧୀଙ୍କ ଓଡିଶା ଆଗମନକୁ ପୂରିଛି ୧୦୦ ବର୍ଷ । ଅତୀତର ସ୍ମୃତିକୁ ସାଉଁଟିଛି ଓଡିଶା । ରାଜ୍ୟର କୋଣ ଅନୁକୋଣରେ ଆୟୋଜିତ ହେଉଛି ଗାନ୍ଧୀ ସଭା । ଏହି ସମୟରେ ରାଜଧାନୀର ଜଣେ ଯୁବକ ନିଆରା ଢଙ୍ଗରେ ବାପୁଙ୍କୁ ମନେ ପକାଇଛନ୍ତି । ସ୍ୱତନ୍ତ୍ର ଡିଜାଇନର ସାଇକେଲ ଧରି ସହର ଗଲି କନ୍ଦି ବୁଲି ବାଣ୍ଟୁଛନ୍ତି ଶାନ୍ତି ଓ ସଦ୍‌ଭାବନାର ବାର୍ତ୍ତା ।

ରାଜଧାନୀରେ ଗଡୁଛି ନିଆରା ସାଇକେଲ । ସାଇକେଲର ଉଚ୍ଚତା ୫ ଫୁଟ । ସାଇକେଲର ଚେନ ବି ଉପରମୁହାଁ । ସାଇକେଲ ଚଲାଇ ବାପୁଙ୍କ ବାର୍ତ୍ତା ବାଣ୍ଟୁଛନ୍ତି ମନୋଜ । ଗତ କିଛି ଦିନ ହେବ ରାଜଧାନୀରେ ସାଇକେଲିଆଙ୍କ ସଂଖ୍ୟା ବଢିଛି । ଭଳିକି ଭଳି ସାଇକେଲ ଚଲାଇ ଫିଟ୍‌ ରହିବାକୁ ଚେଷ୍ଟା କରୁଛନ୍ତି ଭୁବନେଶ୍ୱରବାସୀ । କିନ୍ତୁ ଏଭଳି ସାଇକେଲ ଆପଣ ବୋଧ ହୁଏ ପୂର୍ବରୁ କେବେ ଦେଖିନଥିବେ । ଯିଏ ଥରେ ଦେଖୁଛି ତା ଆଖି ଲାଖିଯାଉଛି । ସାଇକେଲର ଉଚ୍ଚତା ୫ ଫୁଟ । ଦୁଇଟି ଚକରେ ଗଡୁଥିବା ଏହି ସାଇକେଲରେ ଦୁଇଟି ସାଇକେଲର ଫ୍ରେମ ଲାଗିଛି । ପ୍ୟାଡେଲ ବି ୩ ଫୁଟ ଉପରେ । ଚେନର ଡିଜାଇନ ବି ଭାରି ନିଆରା । ଆଉ ଏହି ସାଇକେଲରେ ମହାତ୍ମା ଗାନ୍ଧୀଙ୍କ ଆଦର୍ଶରେ ଅନୁପ୍ରାଣିତ ହୋଇ ଶାନ୍ତି ଓ ସଦଭାବନାର ବାର୍ତ୍ତା ବାଣ୍ଟୁଛନ୍ତି ମନୋଜ ।

ସାଙ୍ଗ ସାଥିଙ୍କ ସହ ମିଶି ଏହି ଡବଲ ଫ୍ରେମର ସାଇକଲେକୁ ତିଆରି କରିଛନ୍ତି ମନୋଜ । ଲକଡାଉନ ସମୟରେ ଦୁଇଟି ପୁରୁଣା ସାଇକେଲ କିଣି ଏହି ସାଇକେଲ ତିଆରି କରାଯାଇଛି । ସାଇକେଲ ଚଢିବା ଓ ଓହ୍ଲାଇବା ବେଳେ ଟିକେ ସମସ୍ୟା ହେଉଥିଲେ ବି ଲୋକଙ୍କର ଦୃଷ୍ଟି ଆକର୍ଷଣ କରିବା ପାଇଁ ଏଭଳି ପ୍ରୟାସ କରାଯାଇଥିବା ମନୋଜ କହିଛନ୍ତି । ସାଇକେଲ କ୍ୟାରିଅରରେ ମ୍ୟୁଜିକ୍‌ ସିଷ୍ଟମ ଖଞ୍ଜା ଯାଇଥିବା ବେଳେ ବାପୁଙ୍କ ସ୍ମୃତିରେ ବାଜୁଛି ଗୀତ ଓ ଭାରତ ମାତା କି ଜୟ ସ୍ଲୋଗାନ । ମନୋଜଙ୍କର ଏହି ନିଆରା ପ୍ରୟାସକୁ ଅନେକ ପ୍ରଶଂସା କରିଛନ୍ତି ।

ପ୍ରକୃତି କୋଳରେ ଆଦିବାସୀ ପରମ୍ପରା, ଜଙ୍ଗଲକୁ ଜୀବନ ଭାବି ପାଳୁଛନ୍ତି ବାହା ପର୍ବ

କେନ୍ଦୁଝର: ପ୍ରକୃତି କୋଳରେ ଆଦିବାସୀ ପରମ୍ପରା । ଆଦିବାସୀଙ୍କ ନିଆରା ପରମ୍ପରା । ଜଙ୍ଗଲକୁ ଜୀବନ ଭାବି ପାଳୁଛନ୍ତି ବାହା ପର୍ବ । ଜଙ୍ଗଲର ସୁରକ୍ଷା ପାଇଁ ପୁଜାର୍ଚ୍ଚନା କରୁଛନ୍ତି । ଏହା ସହିତ ଘର କାନ୍ଥରେ ରଙ୍ଗ ବେରଙ୍ଗ ଚିତ୍ର ଆଙ୍କି ସୁସଜିତ କରିଛନ୍ତି । ଆଦିବାସୀଙ୍କ ଏଭଳି ପ୍ରକୃତି ପ୍ରେମକୁ ଅତ୍ୟନ୍ତ ପ୍ରଶଂସା କରିଛନ୍ତି ବୁଦ୍ଧିଜୀବୀ ।

ଏଭଳି ଦୃଶ୍ୟ ଦେଖିବାରୁ ମିଳିଛି କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡ ଘଷିପୁରା ବ୍ଲକରେ । ଆଦିବାସୀ ଅଧ୍ୟୁଷିତ ନିଆଳିଝରଣ ଗ୍ରାମବାସୀ, ଜଙ୍ଗଲକୁ ମାଆ ଭାବି ପାଳନ କରୁଛନ୍ତି ବାହା ପର୍ବ । ଏଥିପାଇଁ ଗାଁକୁ ନବବଧୂ ପରି ସଜେଇଛନ୍ତି । ଆଉ ଘର କାନ୍ଥରେ ରଙ୍ଗ ବେରଙ୍ଗର ଆଦିବାସୀ ଚିତ୍ର ଆଙ୍କି ପ୍ରକୃତି ପ୍ରତି ନିଆରା ପ୍ରେମକୁ ଉଜ୍ଜିବିତ କରୁଛନ୍ତି ।

ଦୀର୍ଘ ୫ବର୍ଷ ପରେ ନିଆଳିଝରଣ ଗାଁରେ ବାହା ପର୍ବ ଧୁମଧାମରେ ପାଳନ ହେଉଛି । ଆଉ ବିଶ୍ୱ ଶାନ୍ତି ପାଇଁ ଜଙ୍ଗଲକୁ ଫୁଲ ଫଳ, ଛେଳି କୁକୁଡ଼ା ଦେଇ ଶାନ୍ତି କରୁଛନ୍ତି । ବିଶ୍ୱାସ ରହିଛି ପ୍ରକୃତି ଶାନ୍ତି ହେଲେ ବିଶ୍ୱ ଶାନ୍ତି ହେବ । ଆଦିବାସୀଙ୍କ ବିଶ୍ୱାସ ଓ ପରମ୍ପରାକୁ ନେଇ ବଞ୍ଚିଛି ଏହି ପର୍ବ । ଜଙ୍ଗଲକୁ ନିଜର ମା ଭାବୁଥିବା ଏହି ଆଦିବାସୀ ମାନେ ପୂଜାର୍ଚ୍ଚନା ଦ୍ୱାରା ପ୍ରକୃତିକୁ ଶାନ୍ତି କରିବାକୁ ପ୍ରୟାସ କରୁଛନ୍ତି ।

କଟକଣା କଡ଼ାକଡ଼ି କରୁଛନ୍ତି ସରକାର, ହେଲେ ଏଠି ଲୋକଙ୍କୁ ପରଓ୍ୱା ନାହିଁ !

ଜଗତସିଂହପୁର: କଡ଼ ଲେଉଟାଉଛି କରୋନା । ମହାମାରୀ କରୋନା ଭୂତାଣୁଠାରୁ ରକ୍ଷା ପାଇବା ପାଇଁ ପୁଣି ଥରେ ନିୟମ କଡ଼ାକଡ଼ି ହୋଇଛି । ସାମାଜିକ ଦୂରତା, ମାସ୍କ ପିନ୍ଧିବା, ସାନିଟାଇଜର ବ୍ୟବହାର ଆଦିକୁ ଗୁରୁତ୍ୱ ଦିଆଯାଉଛି । ହେଲେ ଜଗତସିଂହପୁର ଜିଲ୍ଲାରେ ବ୍ୟତିକ୍ରମ ଦେଖିବାକୁ ମିଳିଛି । ସବୁଠି ଖୋଲା ମେଲା । ଯେଉଁଠି ଦେଖିବେ ଜନଗହଳୀ । ବସ୍‌ଷ୍ଟାଣ୍ଡ, ବସ ଭିତରେ, ମେଡିକାଲରେ ନିୟମକୁ ଫୁ କରି ବିନା ମାସ୍କରେ ଲୋକେ ବୁଲା ବୁଲି କରୁଥିବା ଦେଖିବା ମିଳିଛି । କରୋନା କଟକଣାକୁ ସବୁ ସ୍ଥାନରେ ବେଖାତିର୍ । ଯାହାକୁ ନେଇ ଚିନ୍ତାରେ ଡାକ୍ତର, ବୁଦ୍ଧିଜୀବୀ ଓ ସମାଜସେବୀ ।

ଏପଟେ କରୋନା କଡ ଲେଉଟାଉଥିବା ବେଳେ ଜଗତସିଂହପୁର ଜିଲ୍ଲାରେ ଏପରି ଦୃଶ୍ୟ ସମସ୍ତଙ୍କୁ ବିବ୍ରତ କରିଛି । ରାଜ୍ୟ ସରକାର ଭୂତାଣୁକୁ ମାତ୍ ଦେବା ପାଇଁ କଟକଣାକୁ କଡାକଡ଼ି କରିବା ସହ ସଚେତନତା ସୃଷ୍ଟି କରୁଥିଲେ ମଧ୍ୟ ଲୋକେ ମାନିବାକୁ ନାରାଜ୍ ।

ଜଗତସିଂହପୁର ଜିଲ୍ଲାର ସଦର, ବାଲିକୁଦା, ବିରିଡି, ନାଉଗାଁ, ତିର୍ତ୍ତୋଲ, ରଘୁନାଥପୁର, ଏରସମା, କୁଜଙ୍ଗ ଓ ପାରାଦ୍ୱୀପରେ ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ପକ୍ଷରୁ ବ୍ୟାପକ ପଦକ୍ଷେପ ନିଆଯାଉଛି । ଲୋକଙ୍କୁ ସାମାଜିକ ଦୂରତା ଓ ମାସ୍କ ବ୍ୟବହାର ପାଇଁ କୁହାଯାଉଛି । ସେପଟେ କିନ୍ତୁ କିଛି ଦିନର ବ୍ୟବଧାନ ପରେ ଜିଲ୍ଲାରେ ପୁଣି ମୁଣ୍ଡ ଟେକିଛି କରୋନା । ଆଉ ତିନୋଟି ପଜିଟିଭ୍ କେସ୍ ଚିହ୍ନଟ ସମସ୍ତଙ୍କୁ ଆତଙ୍କିତ କରିଛି ।

ମନରେଗା ଯୋଜନାରେ ଦୁର୍ନୀତି, ବିନା ସୂଚନା ଫଳକରେ ଚାଲିଛି ପୋଖରୀ ଖୋଳା କାମ

ସାଲେପୁର: ମନରେଗା ଯୋଜନାରେ ଦୁର୍ନୀତି ଅଭିଯୋଗ । ବିନା ସୂଚନା ଫଳକରେ ଚାଲିଛି ପୋଖରୀ ଖୋଳା କାମ । ମଣିଷ ବଦଳରେ ମେସିନ୍ ଖୋଳୁଛି ପୋଖରୀ । ଯାହାକୁ ନେଇ ଗ୍ରାମବାସୀ ଆପତ୍ତି ଉଠାଇଥିବା ବେଳେ ଆର୍‌ଟିଆଇ ତଥ୍ୟ ଦୁର୍ନୀତିର ଆଉ ଏକ ଚେର ଖୋଲି ଦେଇଛି ।

ଆରଟିଆଇ ତଥ୍ୟରେ କାମ ପୂର୍ବରୁ ବିଲ୍ ହୋଇଥିବା ଦେଖାଯାଇଛି । ଏଭଳି ଦୁର୍ନୀତିର ସଙ୍ଗୀନ ଅଭିଯୋଗ ଆସିଛି କଟକ ଜିଲ୍ଲା ସାଲେପୁର ବ୍ଲକ ପୁରୁଣା ହାଟ ପଞ୍ଚାୟତ କାଳିକାପୁର ଗାଁରୁ । ମନରେଗା ଯୋଜନାରେ ଗାଁରେ ପୋଖରୀ ଖୋଳା ଯାଉଥିବା ବେଳେ ଏହାକୁ କିନ୍ତୁ ମଣିଷ ବଦଳରେ ମେସିନ୍ ଖୋଳୁଛନ୍ତି । ତାହା ବି ପୁଣି ବିନା ସୂଚନା ଫଳକରେ । ଯାହାକୁ ନେଇ ଦୁର୍ନୀତିର ଗନ୍ଧ ବାରିଛନ୍ତି ଗ୍ରାମବାସୀ ।

ସବୁଠୁ ରୋଚକ କଥା ହେଲେ ପୋଖରୀ ଖୋଳା ବାବଦରେ ଗାଁର ଓ୍ବାର୍ଡ ମେମ୍ବର କିଛି ଜାଣିନାହିଁନ୍ତି । ସେପଟେ ସୂଚନା ଅଧିକାର ଆଇନ ଦୁର୍ନୀତିର ଆଉ ଏକ ଚେରକୁ ଖୋଲି ଦେଇଛି । ପୋଖରୀ ଖୋଳା ସମ୍ପୂର୍ଣ୍ଣ ହୋଇନଥିଲେ ମଧ୍ୟ ୨୦୨୦ ଅକ୍ଟୋବର ମାସରୁ ୪ ଲକ୍ଷ ୭୦ ହଜାର ଟଙ୍କା ବିଲ୍ ହୋଇଥିବା ଜଣାପଡିଛି । ଏବାବଦରେ ଅତିରିକ୍ତ ବିଡିଓ କିଛି କହିନଥିବା ବେଳେ ଆସିଷ୍ଟାଣ୍ଡ ଏନଆରଜିଏସ୍‌ ଅଧିକାରୀ, ଉପରିସ୍ଥ ଅଧିକାରୀଙ୍କୁ ଜଣାଇବେ ବୋଲି କହିଛନ୍ତି । କାଳିକାପୁରରେ ପୋଖରୀ ଖୋଳାରେ ଦୁର୍ନୀତି ସାମ୍ନାକୁ ଆସଥିବା ବେଳେ ପ୍ରଶାସନ କିଭଳି କାର୍ଯ୍ୟାନୁଷ୍ଠାନ ଗ୍ରହଣ କରୁଛି ତାହା ଦେଖିବାକୁ ବାକି ରହିଲା ।

ନବରଙ୍ଗପୁରକୁ ଫେରିଲା ନାଇଟ କର୍ଫ୍ୟୁ, ରାତି ୮ରୁ ସକାଳ ୬ ଟା ଯାଏଁ ବଳବତ୍ତର ରହିବ କଟକଣା

ନବରଙ୍ଗପୁର: ଗୁରୁବାର ଠାରୁ ନବରଙ୍ଗପୁର ଜିଲ୍ଲାରେ ପୁଣି ନାଇଟ କର୍ଫ୍ୟୁ । ଜାରିହେଲା ରାତ୍ରୀ କାଳିନ କର୍ଫ୍ୟୁ ନିର୍ଦେଶ । ରାଜ୍ୟରେ ପୁନର୍ବାର କୋଭିଡ ସଂକ୍ରମଣ ବୃଦ୍ଧି ଘଟୁଥିବାରୁ, ଏହାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ନେଇଛି ଏହି ନିଷ୍ପତ୍ତି ।

ଜିଲ୍ଲା ପ୍ରଶାସନର ନିଷ୍ପତ୍ତି ଅନୁଯାୟୀ ରାତି 8ରୁ ସକାଳ 6 ଟା ପର୍ଯ୍ୟନ୍ତ ବଳବତ୍ତର ରହିବ କର୍ଫ୍ୟୁ । କରୋନାର ଦ୍ବିତୀୟ ଲହରକୁ ଦେଖି ଜିଲ୍ଲା ପ୍ରଶାସନର ଆଗୁଆ ନିଷ୍ପତ୍ତି । ସେପଟେ ଯଦି ସାଧାରଣ ଲୋକେ କୋଭିଡ଼ -19 କୁ ଖିଲାପ କରନ୍ତି କିମ୍ବା କର୍ଫ୍ୟୁ ନିର୍ଦ୍ଦେଶକୁ ଅବମାନନା କରନ୍ତି ତେବେ ଆଇନଗତ ଭାବେ କାର୍ଯ୍ୟାନୁଷ୍ଠାନ କରାଯିବା ନେଇ ଜିଲ୍ଲା ପ୍ରଶାସନ ପକ୍ଷରୁ ବିଜ୍ଞପ୍ତି ଜାରି କରାଯାଇଛି ।

ମୁଖ୍ୟମନ୍ତ୍ରୀଙ୍କ ପାନୀୟ ଜଳ ଯୋଗାଣ ସମୀକ୍ଷା , ଗ୍ରୀଷ୍ମ ପାଇଁ ପ୍ରସ୍ତୁତି ରହିବାକୁ ପରାମର୍ଶ

ଭୁବନେଶ୍ବର: ଭିଡିଓ କନ୍‌ଫରେନ୍‌ସିଂ ଜରିଆରେ ରାଜ୍ୟର ଉଭୟ ସହରାଞ୍ଚଳ ଓ ଗ୍ରାମାଞ୍ଚଳର ପାନୀୟ ଜଳ ଯୋଗାଣ ସଂପର୍କରେ ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାଜ୍ୟର ସମସ୍ତ ଗ୍ରାମପଞ୍ଚାୟତ ଓ ପୌରାଞ୍ଚଳ ପାନୀୟ ଜଳ ଯୋଗାଣ କ୍ଷେତ୍ରରେ ଶତପ୍ରତିଶତ ପ୍ରସ୍ତୁତ ଅଛନ୍ତି ବୋଲି ପ୍ରମାଣ ପତ୍ର ଦେବା ପାଇଁ ନିର୍ଦ୍ଦେଶ ଦେଇଛନ୍ତି।

ମୁଖ୍ୟମନ୍ତ୍ରୀ କହିଛନ୍ତି ଯେ ଚଳିତ ବର୍ଷ ଖୁବ ଶୀଘ୍ର ଗ୍ରୀଷ୍ମ ଋତୂ ଆସିଥିବାରୁ ଏବଂ ଏବର୍ଷ ପୂର୍ବାପେକ୍ଷା ଅଧିକ ଗରମ ହେବାର ସମ୍ଭାବନା ଥିବାରୁ ଆମକୁ ପୂର୍ବ ବର୍ଷ ଗୁଡିକ ଅପେକ୍ଷା ଅଧିକ ପ୍ରସ୍ତୁତି କରିବାକୁ ପଡିବ। ନିୟମିତ ପାନୀୟ ଜଳ ସମସ୍ୟା ଥିବା ହଟ୍‌ସ୍ପଟ୍‌ ଅଂଚଳ ଗୁଡିକୁ ଚିହ୍ନଟ କରି ତୁରନ୍ତ ପ୍ରତିକାରମୂଳକ ପଦକ୍ଷେପ ନେବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ ।

ଲୋକଙ୍କ ଅଭିଯୋଗର ଶୁଣାଣି ପାଇଁ ଏକ ତ୍ରୁଟିଶୂନ୍ୟ ଅଭିଯୋଗ ଶୁଣାଣି ବ୍ୟବସ୍ଥା ସହିତ ବୈଷୟିକ ଜ୍ଞାନସଂପନ୍ନ ତଦାରଖ ବ୍ୟବସ୍ଥା କାର୍ଯ୍ୟକାରୀ କରିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ। ବରିଷ୍ଠ ଅଧିକାରୀମାନେ ପାନୀୟ ଜଳ ଯୋଗାଣ ବ୍ୟବସ୍ଥାକୁ ଉତ୍ତମ ରୂପେ ତଦାରଖ କରି ଅବହେଳା କରୁଥିବା ଅଧିକାରୀଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ମଧ୍ୟ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ ଏବଂ ମୁଖ୍ୟ ଶାସନ ସଚିବ ଓ ଜିଲ୍ଲାପାଳମାନେ ନିୟମିତ ସମୀକ୍ଷା କରି ସମସ୍ୟାର ସମାଧାନ କରିବାକୁ କହିଥିଲେ।

ମୁଖ୍ୟମନ୍ତ୍ରୀ କହିଥିଲେ ଯେ ରାଜ୍ୟ ସରକାର ଉଭୟ ସହରାଞ୍ଚଳ ଓ ଗ୍ରାମାଞ୍ଚଳରେ ପାନୀୟ ଜଳର ସୁବିଧା ପାଇଁ ବ୍ୟାପକ ଅର୍ଥ ବିନିଯୋଗ କରୁଛନ୍ତି। ଗ୍ରାମାଞ୍ଚଳରେ ୧୭ ହଜାର କୋଟି ଟଙ୍କାର ୮୯ଟି ବୃହତ ପାନୀୟ ଜଳ ପ୍ରକଳ୍ପ କାର୍ଯ୍ୟକାରୀ ହେଉଛି ଏବଂ ୨୦୨୪ ସୁଦ୍ଧା ସବୁ ଗ୍ରାମ୍ୟ ପରିବାରକୁ ଶତପ୍ରତିଶତ ପାଇପ ଜଳ ଯୋଗାଣ ପାଇଁ ଲକ୍ଷ୍ୟ ରଖାଯାଇଛି।

ସେହିପରି ସହରାଞ୍ଚଳରେ ମଧ୍ୟ ଗତ ୩ ବର୍ଷ ମଧ୍ୟରେ ପାନୀୟ ଜଳ ପାଇଁ ୩୮୦୦ କୋଟି ଟଙ୍କା ବିନିଯୋଗ କରାଯାଇଛି ଏବଂ ୨୦୨୨ ସୁଦ୍ଧା ସହରାଞ୍ଚଳର ସବୁ ପରିବାରକୁ ପାଇପ ଜଳ ଯୋଗାଣର ଲକ୍ଷ୍ୟ ରଖାଯାଇଛି ବୋଲି ସେ କହିଥିଲେ । ଲୋକଙ୍କୁ ଉତ୍ତମ ମାନର ପାନୀୟ ଜଳ ଯୋଗାଇ ଦେବା ହେଉଛି ରାଜ୍ୟ ସରକାରଙ୍କ ପ୍ରାଥମିକତା ଏବଂ ବିଶେଷକରି ଖରାଦିନରେ ଏହାର ଗୁରୁତ୍ବ ବହୁତ ଅଧିକ ବୋଲି ମୁଖ୍ୟମନ୍ତ୍ରୀ କହିଥିଲେ।

ଆଲୋଚନାରୁ ଜଣାଯାଇଛି ଯେ ସହରାଞ୍ଚଳରେ ୨୦୨୧ରେ ପାନୀୟ ଜଳର ଆବଶ୍ୟକତା ଦୈନିକ ୧୦୮୮ ମିଲିଅନ ଲିଟର ଥିବାବେଳେ, ଦୈନିକ ୧୦୯୩ ମିଲିଅନ ଲିଟର ପାନୀୟ ଜଳ ଯୋଗାଣ କରାଯାଉଛି। ଏହାସହିତ ୨୦୧୬ ରେ ତିନି ଲକ୍ଷ ଘରକୁ ପାଇପ ପାଣି ସଯୋଗ ହୋଇଥିବା ବେଳେ ଏବେ ୮,୩୦,୦୦୦ ଘରକୁ ପାଇପ ପାଣି ସଂଯୋଗ ଦିଆଯାଇଛି।

ତେଣୁ ବର୍ତ୍ତମାନ ପାନୀୟ ଜଳ ଯୋଗାଣର କ୍ଷମତା ବେଶ୍ ଭଲ ରହିଛି। ୨୦୧୬-୧୭ରୁ ୨୦୨୦-୨୧ ମଧ୍ୟରେ ବାସଗୃହ ଗୁଡିକୁ ପାନୀୟ ଜଳ ସଂଯୋଗ କ୍ଷେତ୍ରରେ ୧୬୮ ପ୍ରତିଶତ ଉନ୍ନତି ଆସିଛି ବୋଲି ସୂଚନା ଦିଆଯାଇଥିଲା। ରାଜ୍ୟର ୬୫ଟି ପୌରାଞ୍ଚଳର ୩୩୫ଟି ସ୍ଥାନରେ ପାନୀୟ ଜଳର ସମସ୍ୟା ଥିବା ବେଳେ ଏଗୁଡିକୁ ୧୧୭ଟି ଟ୍ୟାଙ୍କର ଓ ୧୩୮୦ଟି PVC ଟ୍ୟାଙ୍କ ଜରିଆରେ ପାଣି ଯୋଗାଇ ଦିଆଯାଉଛି।

ସମସ୍ତ ଅଭିଯୋଗର ପ୍ରତିକାର ୨୪ ଘଣ୍ଟା ମଧ୍ୟରେ କରାଯାଉଛି । ଏହାଛଡା ପାନୀୟ ଜଳର ସମସ୍ୟା ଥିବା ୧୧ଟି ପୌରାଞ୍ଚଳ ଉପରେ ସ୍ବତନ୍ତ୍ର ଧ୍ୟାନ ରଖାଯାଇଛି। ସମସ୍ତ ପୌରାଞ୍ଚଳରେ ମୋ ସରକାର ସେଲ୍‌ ଜରିଆରେ ଅଭିଯୋଗର ଶୁଣାଣି କରାଯାଉଛି । ପଞ୍ଚାୟତିରାଜ ଓ ପାନୀୟ ଜଳ ବିଭାଗର ପ୍ରମୁଖ ସଚିବ ଦେଓରଂଜନ କୁମାର ସିଂହ କହିଥିଲେ ଯେ ସାରା ଦେଶରେ ପାନୀୟ ଜଳ କ୍ଷେତ୍ରରେ ୮୧ ପ୍ରତିଶତ ଲୋକଙ୍କୁ ଦୈନିକ ବ୍ୟକ୍ତି ପିଚ୍ଛା ୪୦ ଲିଟର ପାଣି ଦିଆଯାଉଥିବା ବେଳେ, ଓଡିଶାରେ ୧୦୦ ପ୍ରତିଶତ ଲୋକଙ୍କୁ ବ୍ୟକ୍ତି ପିଚ୍ଛା ଦୈନିକ ୪୦ ଲିଟର ପାଣି ଦିଆଯାଇପାରୁଛି।

ଗ୍ରାମାଞ୍ଚଳ ଜନସଂଖ୍ୟାର ୪୭.୬୫ ପ୍ରତିଶତ ଲୋକ, ୫୪ ପ୍ରତିଶତ ଗାଁ ଓ ୨୭ ପ୍ରତିଶତ ଜନବସତିକୁ ପାଇପ ପାଣିର ସୁବିଧା ଦିଆଯାଇପାରିଛି। ଖରାଦିନ ପାଇଁ ସବୁ ପାଇପ ପାଣି ଓ ଟ୍ୟୁବୱେଲ ଗୁଡିକୁ ଯାଂଚ କରାଯାଉଛି ଏବଂ ପ୍ରତିକାର ବ୍ୟବସ୍ଥା କରାଯାଉଛି। ମୋବାଇଲ ଭ୍ୟାନ ଓ ଟିମ୍‌ ପ୍ରସ୍ତୁତ କରାଯାଇ ପାନୀୟ ଜଳ ଯୋଗାଣ କରାଯାଉଛି । ଜଳକଷ୍ଟ ଅଞ୍ଚଳରେ ଟ୍ୟାଙ୍କର ଜରିଆରେ ପାଣି ଯୋଗାଇ ଦିଆଯାଉଛି ବୋଲି ସୂଚନା ଦିଆଯାଇଥିଲା ।

ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କହିଲେ ଯେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଅନୁଯାୟୀ ପାନୀୟ ଜଳ ଯୋଗାଣ ସଂପର୍କରେ ନିୟମିତ ସମୀକ୍ଷା କରାଯିବ। ଏହି ବୈଠକକୁ ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଭି.କେ. ପାଣ୍ଡିଆନ ସଂଞ୍ଚାଳନ କରିଥିଲେ । ବୈଠକରେ ଅନ୍ୟମାନଙ୍କ ମଧ୍ୟରେ ଉନ୍ନୟନ କମିଶନର, କୃଷି ଉତ୍ପାଦନ କମିଶନର, ଜଙ୍ଗଲ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଏବଂ ଅନ୍ୟ ବରିଷ୍ଠ ଅଧିକାରୀ ମାନେ ଉପସ୍ଥିତ ଥିଲେ ।

ବିହାର ବିଧାନସଭା ଇତିହାସରେ କଳା ଅଧ୍ୟାୟ, ମହିଳାଙ୍କ ଶାଢ଼ି ଟାଣିଲେ ସୁରକ୍ଷା କର୍ମୀ

ବ୍ୟୁରୋ: ବିହାର ବିଧାନସଭା ଇତିହାସରେ କଳା ଅଧ୍ୟାୟ । ବିଧାନସଭାକୁ ପ୍ରଥମଥର ଲାଗି ପୋଲିସ ଏଣ୍ଟ୍ରି ମାରିଛି । ବିହାର ବିଶେଷ ସଶସ୍ତ୍ର ପୋଲିସ ବିଧେୟକକୁ ବିରୋଧୀ ବିରୋଧ କରି ମଙ୍ଗଳବାର ଗୃହରେ ହୋହଲ୍ଲା କରିଥିଲେ । ସ୍ଥିତି ଏମିତି ହୋଇଥିଲା ଯେ ବିଧାନସଭାରେ ବିଧାୟକଙ୍କ ମଧ୍ୟରେ ହାତାହାତି ଯାଏ କଥା ଯାଇଥିଲା । ଗଣତନ୍ତ୍ରର ମନ୍ଦିର ବିଧାନସଭାରେ ମାରପିଟ୍‌ ଓ ଅସଦାଚରଣ ଗଣତନ୍ତ୍ର ପାଇଁ ଆଦୌ ଶୁଭଙ୍କର ନୁହେଁ ।

ମଙ୍ଗଳବାର ବିହାର ବିଧାନସଭାରେ ବିରୋଧୀଙ୍କ ଅନୁପସ୍ଥିତିରେ ସରକାର ବିହାର ବିଶେଷ ପୋଲିସ ବିଧେୟକ-୨୦୨୧ ପାରିତ କରିଥିଲେ । ହେଲେ, ବିଲ୍ ପାରିତ ବେଳେ ଗୃହରେ ସୃଷ୍ଟି ହୋଇଥିଲା ଅସ୍ୱାଭାବିକ ସ୍ଥିତି । ବିଧାନସଭାରେ ମହିଳା ବିଧାୟକଙ୍କ ସହ ଟଣାଓଟରା ସବୁ ସୀମା ଟପି ଯାଇଥିଲା । ଏପରିକି ଜଣେ ମହିଳାଙ୍କ ବିଧାୟକଙ୍କ ଶାଢୀ ଟାଣିବାକୁ ଉଦ୍ୟମ କରିଥିଲେ ସୁରକ୍ଷା କର୍ମୀ ।

ବିଧେୟକକୁ ବିପକ୍ଷଙ୍କ ବିରୋଧ ପରେ ବାରମ୍ବାର ଗୃହ ମୁଲତବି ହୋଇଥିଲା । ଗୃହ ସ୍ଥଗିତ ପରେ ବାଚସ୍ପତି ତାଙ୍କ କକ୍ଷରେ ବସିଥିବା ବେଳେ ବିରୋଧୀ ସଦସ୍ୟ ଗୃହ ବାହାରେ ଧାରଣାରେ ବସି ପଡ଼ିଥିଲେ । ଅପରାହ୍ଣ ୪ଟା ୩୦ରେ ବାଚସ୍ପତି ଗୃହ କାର୍ଯ୍ୟ ଆରମ୍ଭ ପାଇଁ ଯିବାକୁ ବାହାରିଥିବା ବେଳେ ବାଟ ଛାଡ଼ି ନଥିଲେ ବିରୋଧୀ । ଏହାପରେ ମାର୍ଶଲ ବିରୋଧୀ ବିଧାୟକଙ୍କୁ ହଟାଇବା ଲାଗି ଉଦ୍ୟମ କରିଥିଲେ ବି ସେମାନେ ହଟିନଥିଲେ ।
ଫଳରେ ବାଧ୍ୟ ହୋଇ ପୋଲିସ ବିଧାନସଭା ପରିସରକୁ ପଶି ବଳ ପ୍ରୟୋଗ କରିଥିଲା ।

ବିରୋଧୀ ବିଧାୟକଙ୍କୁ ସେଠାରୁ ଟେକି ଟେକି ଆଣିଥିଲା ପୋଲିସ । ତେବେ, ବିଧାୟକଙ୍କୁ ପୋଲିସ ଗୋଇଠା ମାରିଥିବା ନେଇ ବିରୋଧୀ ଅଭିଯୋଗ ଆଣିଛନ୍ତି । ଅନ୍ୟପଟେ ଏହି ସମୟରେ ବିଧାନସଭା ପରିସରରେ ଆରଜେଡି କାର୍ଯ୍ୟକର୍ତ୍ତ ଢେଲା ଫିଙ୍ଗିଥିବା ଅଭିଯୋଗ ହୋଇଛି । ଢେଲାମାଡ଼ରେ ସାମ୍ବାଦିକ, ପୋଲିସ ସହ ଅନ୍ୟ କେତେଜଣ ଆହତ ମଧ୍ୟ ହୋଇଛନ୍ତି ।

ବାରମ୍ବାର ଗୃହରେ ହଟ୍ଟଗୋଳ ମଧ୍ୟରେ ବିରୋଧୀ ସଦସ୍ୟ ବାଚସ୍ପତିଙ୍କ ଆସନକୁ ମାଡ଼ି ଯାଇଥିଲେ । ମାର୍ଶଲ ଅଟକାଇ ଥିଲେ । ପରେ ଏମଏଲସି ଅଶୋକ ଚୌଧୁରୀ ବିପକ୍ଷ ସଦସ୍ୟ ପ୍ରେମ କୁମାରଙ୍କ ହାତରୁ କାଗଜ ଛଡ଼ାଇବା ଲାଗି ଚେଷ୍ଟା କରିବାରୁ ଆରମ୍ଭ ହୋଇଥିଲା ମୁଥ ମରାମରି । ଏହାପରେ ବିରୋଧୀ ବିଦାୟକ ବିଧାନସଭାରେ ଚେୟାର ଭାଙ୍ଗି ଦେଇଥିଲା । ଗଣତନ୍ତ୍ରର ମନ୍ଦିର ବିଧାନସଭା ପାଲଟି ଯାଇଥିଲା ରଣକ୍ଷେତ୍ର ।

ସଲମାନ ଖାନ୍ ନେଲେ କରୋନା ଟିକା

ମୁମ୍ବାଇ: ଦେଶରେ ଚାଲିଛି ଦ୍ୱିତୀୟ ପର୍ଯ୍ୟାୟ କୋଭିଡ ଟିକାକରଣ । ସୁପରଷ୍ଟାର ସଲମାନ ଖାନ ବୁଧବାର କରୋନା ଟିକାର ପ୍ରଥମ ଡୋଜ୍ ନେଇଛନ୍ତି । ଏ ନେଇ ସେ ଟ୍ୱିଟ୍ କରି ତାଙ୍କ ପ୍ରଶଂସକଙ୍କୁ ସୂଚନା ଦେଇଛନ୍ତି। ସଲମାନ ଖାନ ଟ୍ୱିଟ୍ କରିଛନ୍ତି, ‘ଆଜି ମୁଁ କରୋନା ଟିକାର ପ୍ରଥମ ଡୋଜ ନେଇଛି।

ସଲମାନ ଖାନଙ୍କ ଟ୍ୱିଟରେ ଅନେକ ପ୍ରଶଂସକ ନିଜର ପ୍ରତିକ୍ରିୟା ଦେଇଛନ୍ତି। ପ୍ରଶଂସକମାନେ ସଲମାନଙ୍କୁ ସୁରକ୍ଷିତ ରହିବାକୁ ପରାମର୍ଶ ଦେଇଛନ୍ତି। ମହାରାଷ୍ଟ୍ରରେ ପୁଣି ଥରେ କରୋନା ମାମଲା ଦ୍ରୁତ ଗତିରେ ବୃଦ୍ଧି ହେଉଛି । ଗତ କିଛି ଦିନ ମଧ୍ୟରେ ଅନେକ ସେଲିବ୍ରିଟି କୋଭିଡ ପଜିଟିଭ୍ ଚିହ୍ନଟ ହୋଇଛନ୍ତି। ତେବେ ନିକଟରେ ସଲମାନ ଖାନଙ୍କ ଅଭିନୀତ ଚଳଚ୍ଚିତ୍ର ରେସ -୩ର ନିର୍ମାତା ଆମୀର ତୌରାନୀ ମଧ୍ୟ କରୋନା ପଜିଟିଭ ଚିହ୍ନଟ ହୋଇଥିଲେ। ତାଙ୍କ ବ୍ୟତୀତ ଗତ କିଛି ଦିନ ମଧ୍ୟରେ କାର୍ତ୍ତିକ ଆର୍ଯ୍ୟନ, ମନୋଜ ବାଜପେଇ, ରଣବୀର କପୁର ଏବଂ ସତୀଶ କୌଶିକଙ୍କ ପରି ଅନେକ ସେଲିବ୍ରିଟି କୋଭିଡ ପଜିଟିଭ ଥିବା ଜଣାପଡ଼ିଛି।

 

ରାଜ୍ୟରେ ବଢ଼ୁଛି ଆକ୍ରାନ୍ତଙ୍କ ସଂଖ୍ୟା, ଗୋଟିଏ ଦିନରେ ୩ UK ଷ୍ଟ୍ରେନ୍‌ ଚିହ୍ନଟ

ଭୁବନେଶ୍ୱର: ଡରାଇଲାଣି କରୋନା । ଦେଶରେ ୟୁକେ ଷ୍ଟ୍ରେନ୍‌ ପୂର୍ବରୁ ଚିହ୍ନଟ ହୋଇଥିବା ବେଳେ ଏବେ ଓଡ଼ିଶାରେ ଦେଖାଦେଇଛି  ୟୁକେ ଷ୍ଟ୍ରେନ୍‌ । ଗୋଟିଏ କି ଦୁଇଟି ନୁହେଁ ଏକା ଥରକେ ୩ଜଣ ୟୁକେ ଷ୍ଟ୍ରେନ୍‌ କରୋନା ଆକ୍ରାନ୍ତ ଥିବା ଜଣାପଡ଼ିଛି । ସାରା ଦେଶରେ ୭୩୬ ୟୁକେ ଷ୍ଟ୍ରେନ୍‌ ଚିହ୍ନ ହୋଇଥିବା ବେଳେ ପଞ୍ଜାବରୁ ସର୍ବାଧିକ ୩୩୬ ଜଣ ଚିହ୍ନଟ ହୋଇଛନ୍ତି । ସେହିଭଳି ଦ୍ୱିତୀୟ ଓ ତୃତୀୟ ନମ୍ବରରେ ରହିଛି ତେଲେଙ୍ଗାନା ଓ ଦିଲ୍ଲୀ । ତେବେ ଦେଶରେ ପୁଣି କରୋନା ସଂକ୍ରମଣ ବୃଦ୍ଧି ପାଇବାରେ ଲାଗିଛି । ଏହାକୁ ନେଇ ସାଧାରଣରେ ଚିନ୍ତା ବଢ଼ୁଛି ।

ସମସ୍ତଙ୍କ ମନରେ ଗୋଟିଏ ପ୍ରଶ୍ନ ପୁଣି ଥରେ ଲକ୍‌ଡାଉନ୍‌ ହେବନି ତ ? କାରଣ ଦେଶର ବିଭିନ୍ନ ରାଜ୍ୟରେ ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି ନାଇଟ୍‌ କର୍ଫ୍ୟୁ ଘୋଷଣା କରାଯାଇଛି । ଏମିତିକି ଓଡ଼ିଶାରେ ମଧ୍ୟ ନାଇଟ୍‌ କର୍ଫ୍ୟୁ ଆରମ୍ଭ ହୋଇସାରିଲାଣି । ମାଲକାନଗିରିରେ ପ୍ରାୟ ଏକ ସପ୍ତାହ ପର୍ଯ୍ୟନ୍ତ ନାଇଟ୍‌ କର୍ଫ୍ୟୁ ଲଗାଯାଇଛି ।

ସେପଟେ ରାଜ୍ୟରେ ବୁଧବାର ଗୋଟିଏ ଦିନରେ କରୋନା ଆକ୍ରାନ୍ତଙ୍କ ସଂଖ୍ୟା ୧୫୦ ପାର୍‌ ହୋଇଛି । ଗତ ୨୪ ଘଣ୍ଟାରେ ରାଜ୍ୟରେ ୧୭୦ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । କ୍ୱାରେଣ୍ଟାଇନରୁ ୯୯ ଓ ଲୋକାଲ କଣ୍ଟାକ୍ଟ ୭୧ ଜଣ ଚିହ୍ନଟ ହୋଇଛନ୍ତି । ନୂଆପଡାରୁ ସର୍ବାଧିକ ୨୭ ସଂକ୍ରମିତ ଚିହ୍ନଟ ହୋଇଛନ୍ତି । କଟକରୁ ୨୩, ଖୋର୍ଦ୍ଧାରୁ ୨୩, ସୁନ୍ଦରଗଡରୁ ୨୨ ଜଣଙ୍କୁ ଚିହ୍ନଟ କରାଯାଇଛି ।