spot_img
Home Blog Page 5987

ବଢ଼ୁଛି ସଂକ୍ରମିତଙ୍କ ସଂଖ୍ୟା: ୨୧୦ କରୋନା ଆକ୍ରାନ୍ତ ଚିହ୍ନଟ

ଭୁବନେଶ୍ୱର: ପୁଣି ରାଜ୍ୟରେ କରୋନା କହର । ୨୪ ଘଣ୍ଟାରେ ୨୧ଜିଲ୍ଲା ଓ ଷ୍ଟେଟପୁଲରୁ ୨୧୦ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । କ୍ବାରେଣ୍ଟାଇନରୁ ୧୨୪, ଲୋକାଲ କେସ୍ ୮୬ ଚିହ୍ନଟ ହୋଇଥିବା ବେଳେ ଜଣେ କରୋନା ଆକ୍ରାନ୍ତଙ୍କ ମୃତ୍ୟୁ ହୋଇଛି । ଖୋର୍ଦ୍ଧାରୁ ସର୍ବାଧିକ ୫୧, ନୂଆପଡାରୁ ୨୩, କଟକରୁ ୧୯, ବଲାଙ୍ଗିର, କଳାହାଣ୍ଡି, ସୁନ୍ଦରଗଡ଼଼ ଓ ଷ୍ଟେଟପୁଲରୁ ୧୨ଜଣ ଲେଖାଏଁ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହିପରି ସମ୍ବଲପୁରରୁ ୧୧, ବରଗଡ଼, ଯାଜପୁର, ମୟୂରଭଞ୍ଜରୁ ୮ଜଣ ଲେଖାଏଁ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଅନୁଗୁଳରୁ ୭, ବାଲେଶ୍ବରରୁ ୬, ପୁରୀରୁ ୫, , ଝାରସୁଗୁଡାରୁ ୪, ଗଞ୍ଜାମରୁ ୩, କେନ୍ଦ୍ରାପଡା, ନୟାଗଡ଼ ଓ ରାୟଗଡ଼ାରୁ ୨ଜଣ ଲେଖାଏଁ ଓ ଢେଙ୍କାନାଳ, କେନ୍ଦୁଝର ଓ ନବରଙ୍ଗପୁରରୁ ଜଣେ ଲେଖାଏଁ କୋରାନା ଆକ୍ରାନ୍ତ ଚିହ୍ନଟ ହୋଇଛନ୍ତି । ରାଜ୍ୟରେ ମୋଟ୍ ସଂକ୍ରମିତଙ୍କ ସଂଖ୍ୟା ୩ଲକ୍ଷ ୩୯ହଜାର ୯୦୪ଥିବା ବେଳେ ଆକ୍ଟିଭ କେସ୍ ରହିଛି ୧୪୪୯ । ଏଯାଏ କରୋନାରେ ୧୯୨୦ଜଣଙ୍କ ମୃତ୍ୟୁ  ହେଲାଣି । ସୁସ୍ଥ ହେଲେଣି ୩ଲକ୍ଷ ୩୬ହଜାର ୪୮୨ଜଣ କୋଭିଡ ଆକ୍ରାନ୍ତ ।

ଏଥିସହିତ ପଢ଼ନ୍ତୁ: ମାର୍ଚ୍ଚ ୨୮ରୁ ସାରା ରାଜ୍ୟରେ ନାଇଟ୍ କର୍ଫ୍ୟୁ ଲାଗୁ

ଉପକୂଳ ଓଡ଼ିଶାରେ ୩ ରୁ ୪ ଡିଗ୍ରୀ ବଢ଼ିପାରେ ତାପମାତ୍ରା

ଭୁବନେଶ୍ୱର: ଆସନ୍ତା ଦୁଇ ଦିନ ଉପକୂଳରେ ବର୍ଷିବ ଅଗ୍ନି  । ସ୍ବାଭାବିକ ଠାରୁ ୩ ରୁ ୪ଡିଗ୍ରୀ ବଢିବ ପାରଦ ଏନେଇ ୩ ଜିଲ୍ଲାକୁ ହିଟ୍ଓ୍ବେଭ ଆଲର୍ଟ ଜାରି କରାଯାଇଛି । ଉପକୂଳ ଓଡ଼ିଶାରେ ପାରଦ ବଢୁଥିବା ବେଳେ ଆଭ୍ୟନ୍ତରୀଣ ଓଡ଼ିଶାରେ କାଳ ବୈଶାଖୀ ସମ୍ଭାବନା । ଆସନ୍ତା ୪୮ ଘଣ୍ଟା ପର୍ଯ୍ୟନ୍ତ ଉପକୂଳ ଓଡ଼ିଶାରେ ପ୍ରବଳ ଗ୍ରୀଷ୍ମ ପ୍ରବାହ ପାଇଁ ଖୋର୍ଦ୍ଧା, କଟକ ଏବଂ ନୟାଗଡ ଜିଲ୍ଲାରେ ୟେଲୋ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ୨୯ ଓ ୩୦ ତାରିଖରେ ରାଜ୍ୟର ଉତ୍ତର ଏବଂ ଆଭ୍ୟନ୍ତରୀଣ ଓଡ଼ିଶାରେ କାଳବୈଶାଖୀ ବର୍ଷା ସମ୍ଭାବନା ରହିଛି । ବିଶେଷ କରି ବାଲେଶ୍ବର, ଭଦ୍ରକ, ମୟୁରଭଞ୍ଜ, କେନ୍ଦୁଝର, ଯାଜପୁର, କେନ୍ଦ୍ରାପଡା, ଜଗତସିଂହପୁର, ଗଞ୍ଜାମ ଏବଂ ଗଜପତି ଜିଲ୍ଲାରେ ଘଡଘଡି ବିଜୁଳି ସହ ବର୍ଷା ହେବ । ବର୍ଷା ସମୟରେ ଘଣ୍ଟା ପ୍ରତି ୪୦ ରୁ ୫୦ କିଲୋମିଟର ବେଗରେ ପବନ ବହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଏଥିପାଇଁ ଦୁଇଦିନ ପର୍ଯ୍ୟନ୍ତ ମତ୍ସଜୀବୀ ମାନଙ୍କୁ ସମୁଦ୍ର ମଧ୍ୟକୁ ନ ଯିବାକୁ ପରାମର୍ଶ ଦିଆଯାଇଛି ।

ପ୍ୟାଙ୍ଗୋଗରେ ଭାରତୀୟ ଯବାନଙ୍କ ଡ୍ୟାନ୍ସ, ଭାଇରାଲ ହେଉଛି ଭିଡିଓ

ଆଜି ଆସାମ ଓ ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟ ମତଦାନ

ନୂଆଦିଲ୍ଲୀ: ଆଜି ଆସାମ ଓ ପଶ୍ଚିମବଙ୍ଗର ପ୍ରଥମ ପର୍ଯ୍ୟାୟ ନିର୍ବାଚନ । ସକାଳ ୮ଟାରୁ ସଂଧ୍ୟା ୬ଟା ଯାଏ ହେବ ମତଦାନ । ଉଭୟ ରାଜ୍ୟରେ ମୋଟ ୭୭ଟି ଆସନରେ ହେବ ପୋଲିଂ ।  କୋଭିଡ କଟକଣା ପାଇଁ ଏଥର ୧୧ ହଜାର ୫୩୭ଟି ମତଦାନ କେନ୍ଦ୍ରରେ ହେଉଛି ମତଦାନ । ସୁରକ୍ଷା ବ୍ୟବସ୍ଥା ପାଇଁ ପୋଲିସ ଫୋର୍ସ ମୁତୟନ କରାଯାଇଛି । ଆସାମରେ ୪୭ ଏବଂ ପଶ୍ଚିମବଙ୍ଗରେ ୩୦ଟି ଆସନରେ ପୋଲିଂ ହେବ । ଆସାମରେ ୧୨ଟି ଜିଲ୍ଲାରେ ପ୍ରଥମ ପର୍ଯ୍ୟାୟ ଭୋଟିଂ ହେଉଥିବା ବେଳେ ମୈଦାନରେ ଅଛନ୍ତି ୨୬୭ ଜଣ ପ୍ରାର୍ଥୀ । ପଶ୍ଚିମ ମେଦିନାପୁର ପାର୍ଟ-୧, ପୂର୍ବ ମେଦିନାପୁର ପାର୍ଟ-୧, ବାଙ୍କୁରା, ଝାରଗ୍ରାମ ଓ ପୁରୁଲିଆର ୩୦ଟି ଆସନରେ ମତଦାନ ହେବ  । ୧୯୧ ଜଣ ପ୍ରାର୍ଥୀଙ୍କର ପ୍ରଥମ ପର୍ଯ୍ୟାୟରେ ଭାଗ୍ୟ ପରୀକ୍ଷା ହେବ ।

ଏଥିସହିତ ପଢ଼ନ୍ତୁ: ଦ୍ୱିତୀୟ ମ୍ୟାଚ ଇଂଲଣ୍ଡର,୧-୧ରେ ବରାବର ସିରିଜ

ଦ୍ୱିତୀୟ ମ୍ୟାଚ ଇଂଲଣ୍ଡର,୧-୧ରେ ବରାବର ସିରିଜ

ପୁନେ: ଦିନିକିଆ ସିରିଜର ଦ୍ବିତୀୟ ମ୍ୟାଚରେ ବିଦେଶୀ ଦଳର ବିଜୟ । ପ୍ରଥମ ମ୍ୟାଚରେ ଭାରତ ବିଜୟୀ ହୋଇଥିବାବେଳେ ଦ୍ବିତୀୟ ମ୍ୟାଚରେ ଇଂଲଣ୍ଡ ପଟକୁ ଯାଇଛି । ଫଳରେ ଦିନିକିଆ ସିରିଜ ୧-୧ରେ ବରାବର ରହିଛି । ଭାରତ ପ୍ରଥମେ ବ୍ୟାଟିଂ କରିଥିବା ବେଳେ ୫୦ ଓଭରରେ ୩୩୬ ରନ ସଂଗ୍ରହ କରିଥିଲେ । ସେପଟେ ୩୩୭ରନର ପିଛା କରୁଥିବା ଇଂଲଣ୍ଡ ୪୩.୩ ଓଭରରେ ସହଜରେ ହାସଲ କରିନେଇଥିଲେ ।

ଭ୍ରମଣକାରୀ ଇଂଲଣ୍ଡ ଟିମର ବ୍ୟାଟ୍ସମ୍ୟାନ ବେୟରଷ୍ଟୋ ଚମତ୍କାର ବ୍ୟାଟିଂ କରିଥିଲେ । ଭଲ ପଦର୍ଶନ କରିବା ସହ ଦଳକୁ ୧୨୪ରନ ଏକାକୀ ଯୋଗାଇଦେଇଥିଲେ । ସେହିପରି ବେନ ଷ୍ଟୋକ୍ସ ମଧ୍ୟ ୯୯ରନ କରିଛନ୍ତି । ସେପଟେ ଭାରତ ପକ୍ଷରୁ ମଧ୍ୟ କେଏଲ ରାହୁଲ ୧୦୮ରନ ସଂଗ୍ରହ କରିଥିଲେ ।

ଅନ୍ୟପକ୍ଷରେ ଋଷଭ ପନ୍ଥ ୭୭ ରନ କରିଥିବାବେଳେ ବିରାଟ କୋହଲି ମଧ୍ୟ ୬୬ ରନ କରିଥିଲେ । ଭାରତ ପ୍ରଥମ ପାଳି ଖେଳିଥିଲା । ୫୦ ଓଭରର ପାଳିରେ ଦଳ ୬ ୱିକେଟ ହରାଇ ୩୩୬ ରନ କରିଥିଲେ । କିନ୍ତୁ ମ୍ୟାଚରେ ସବୁଠାରୁ ଚର୍ଚ୍ଚାରେ ଥିଲେ ହାର୍ଦ୍ଧିକ ପାଣ୍ଡ୍ୟା । ୧୬ ବଲରେ ୪ଟି ଛକା ମାରି ପାଣ୍ଡ୍ୟା ୩୫ରନ ସଂଗ୍ରହ କରିଥିଲେ ।

ଭିଜିଲାନ୍ସ ଜାଲରେ ବାଙ୍ଗିରିପୋଷି ତହସିଲଦାର, କାରରୁ ଜବତ ହେଲା ୨ ଲକ୍ଷ ୫୬ ହଜାର ଟଙ୍କା

ମୟୂରଭଞ୍ଜ: ଭିଜିଲାନ୍ସ ଜାଲରେ ତହସିଲଦାର । ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ତହସିଲଦାର ଅଭିମନ୍ୟୁ ପଣ୍ଡାଙ୍କ ଘରେ ଚଢାଉ କରିଛି । ସୂଚନା ମୁତାବକ ତହସିଲଦାର ବାଙ୍ଗିରିପୋଷିରୁ ବାହାରି ଏକ କାରରେ ବାଲେଶ୍ଵର ଯାଉଥିବା ବେଳେ ନହରପାଟଣା ନିକଟରେ ଭିଜିଲାନ୍ସ ଟିମ ଚଢାଉ କରିଛି ।

ଚଢାଉ ସମୟରେ ତାଙ୍କ ଗାଡ଼ିରେ ଥିବା ଏକ ଵ୍ୟାଗରୁ ୨ ଲକ୍ଷ ୫୬ ହଜାର ୫୦୫ ଟଂକା ବାହାରିଥିବା ଜଣା ପଡିଛି। ଏହା ପରେ ତାଙ୍କ ପୈତୃକ ଘର ବୈଶିଙ୍ଗା ନିକଟରେ ଥିବା ଚୁଆପଦା ଗ୍ରାମରେ ଏବଂ ବାଲେଶ୍ବର ଘରେ ଚଢ଼ାଉ ଜାରି ରଖିଛି ଭିଜିଲାନ୍ସ ଟିମ ।

ପ୍ୟାଙ୍ଗୋଗରେ ଭାରତୀୟ ଯବାନଙ୍କ ଡ୍ୟାନ୍ସ, ଭାଇରାଲ ହେଉଛି ଭିଡିଓ

ଲଦାଖ: ଯେଉଁ ପ୍ୟାଙ୍ଗୋଗ ହ୍ରଦ ଦିନେ ରକ୍ତ ରଞ୍ଜିତ ହୋଇଥିଲା, ସେହି ପ୍ୟାଙ୍ଗୋଗ କୂଳ ରୋମାଞ୍ଚିତ ହୋଇ ଉଠୁଛି । ଲଦାଖରେ ପ୍ୟାଙ୍ଗୋଗ କୂଳରେ ଖୁସିରେ ନୃତ୍ୟ କରୁଛନ୍ତି ଭାରତୀୟ ଯବାନ। ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ପ୍ୟାଙ୍ଗୋଗ କୂଳରୁ ବହି ଆସୁଛି ଶୀତଳ ପବନ, ଆକାଶର ଅପୂର୍ବ ଶୋଭା । ଆଉ ଏହି ଶୋଭା ମଧ୍ୟରେ ହଜି ଯାଉଛନ୍ତି ଏ ଦେଶର ସୁରକ୍ଷା ବାହିନୀ । ଗୀତର ତାଳେ ତାଳେ ଯବାନମାନେ ଡ୍ୟାନ୍ସ କରୁଛନ୍ତି । କିଏ ନାଚି ନାଚି ଗଡିଯାଉଛନ୍ତି ତ, ଆଉ କିଏ ଜୋସ ବଢାଇବା ପାଇଁ ସମର୍ଥନ କରୁଛନ୍ତି । ଆପଣ ବି ଦେଖୁ ନାହାଁନ୍ତି କିପରି ଡ୍ୟାନ୍ସରେ ମସଗୁଲ ଏହି ଦୁଇ ଯବାନ ।

ପାଖରେ ବାଜା ଥୁଆହୋଇଛି  ଏବଂ କିଛି ଉଚ୍ଚପଦସ୍ଥ ଅଧିକାରୀ ମଧ୍ୟ ନିକଟରେ ବସିଛନ୍ତି । ନୃତ୍ୟ କରୁଥିବା ଯବାନ ଯେତିକି ଆନନ୍ଦ ଅନୁଭବ କରୁଛନ୍ତି, ପାଖରେ ବସିଥିବା ସାଥି ଯବାନ ମଧ୍ୟ ସେତିକି । ଦେଖୁ ନାହାଁନ୍ତି କିପରି ଏହି ଦୁଇ ଯବାନଙ୍କ ନୃତ୍ୟକୁ ଉପଭୋଗ କରୁଥିବା ସାଥି ତାଳି ମାରି ସମର୍ଥନ କରୁଛନ୍ତି । ପୁଣି ଆଉ କିଏ କିଏ ତ, ଜୋରରେ ଶବ୍ଦ କରି ସମର୍ଥନ କରୁଛନ୍ତି ।

ଏହି ଭିଡିଓକୁ କେନ୍ଦ୍ର କ୍ରୀଡ଼ା ମନ୍ତ୍ରୀ କିରଣ ରିଜଜୁ ସୋସିଆଲ ମିଡିଆରେ ପୋଷ୍ଟ କରିଛନ୍ତି । ଏବଂ କ୍ୟାପସନରେ ଲେଖିଛନ୍ତି , ଖୁବ ଆନନ୍ଦ ଅନୁଭବ ହେଉଛି, ଯେତେବେଳେ ଏ ଦେଶର ଯବାନ ପ୍ୟାଙ୍ଗୋଗ କୂଳରେ ଏନଜୟ କରୁଛନ୍ତି । ସୂଚନା ଅନୁଯାୟୀ ନୃତ୍ୟ କରୁଥିବା ଯବାନ ହେଉଛନ୍ତି ଗୋରଖା ବାହିନୀର । ପ୍ୟାଙ୍ଗୋଗ ନିକଟରେ କର୍ତ୍ତବ୍ୟରେ ଥିବା ଏହି ଯବାନମାନେ ସୁରକ୍ଷାପ୍ରହରୀ ସାଜିଛନ୍ତି । କିନ୍ତୁ ଅବସର ସମୟରେ ସାଥି ଯବାନଙ୍କ ସହ ଗୀତର ତାଳେ ତାଳେ ନୃତ୍ୟ କରୁଥିବା ଏହି ଭିଡିଓ ସୋସିଆଲ ମିଡିଆରେ ଭାଇରାଲ ସାଜିଛି ।

ମାର୍ଚ୍ଚ ୨୮ରୁ ସାରା ରାଜ୍ୟରେ ନାଇଟ୍ କର୍ଫ୍ୟୁ ଲାଗୁ

ମୁମ୍ବାଇ: ମହାରାଷ୍ଟ୍ରରେ ନିଦ ହଜାଇଛି କରୋନା ସଂକ୍ରମଣ। ଏହାକୁ ଆୟତ୍ତ କରିବା ପାଇଁ ସରକାର ପୁରା ରାଜ୍ୟରେ ରବିବାର ଠାରୁ ଅର୍ଥାତ୍ ମାର୍ଚ୍ଚ ୨୮ରୁ ନାଇଟ୍ କର୍ଫ୍ୟୁ ଜାରି କରିଛନ୍ତି । ରାତି ୮ଟାରୁ ସକାଳ ୭ଟା ପର୍ଯ୍ୟନ୍ତ କର୍ଫ୍ୟୁ ଜାରି ରହିବ ବୋଲି ଘୋଷଣା କରିଛନ୍ତି ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକ୍‌ରେ । ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଏହି କଟକଣା ଜାରି କରାଯାଇଛି । ରାଜ୍ୟରେ ସମ୍ପୂର୍ଣ୍ଣ ଭାବେ ଲକଡାଉନ କରିବାକୁ ଆମେ ଚାହୁଁନାହୁଁ ବୋଲି ମୁଖ୍ୟମନ୍ତ୍ରୀ ଉଦ୍ଧବ ଠାକ୍‌ରେ କହିଛନ୍ତି ।

ସୂଚନା ଅନୁଯାୟୀ, କର୍ଫ୍ୟୁ ସମୟରେ ଅତ୍ୟାବଶକୀୟ ସେବା ଜାରି ରହିବ । ବିନା କୌଣସି ଠୋସ୍‌ କାରଣରେ ଘରୁ ବାହାରିଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ସରକାର କହିଛନ୍ତି। ଏଥିସହ ଦିନରେ ମାସ୍କ ପିନ୍ଧି ଘରୁ ବାହାରିବାକୁ ନିର୍ଦ୍ଦେଶ ଦିଆଯାଇଛି।

ସେହିପରି ଉପ-ମୁଖ୍ୟମନ୍ତ୍ରୀ ଅଜିତ ପାୱାର କହିଛନ୍ତି ଯେ ମଲ୍, ମାର୍କେଟ, ସିନେମା ହଲ୍ ଆଦି ୫୦ ପ୍ରତିଶତ କ୍ଷମତାରେ କାର୍ଯ୍ୟ କରିବ । ସେହିପରି ୫୦ରୁ ଅଧିକ ଲୋକ ବିବାହ ଉତ୍ସବରେ ଯୋଗଦେବେ ନାହିଁ ବୋଲି ଏକ କଟକଣା ଜାରି କରିଛନ୍ତି। ଅନ୍ତିମ ସଂସ୍କାରରେ ୨୦ ଜଣଙ୍କୁ ଅନୁମତି ଦିଆଯିବ ବୋଲି ଅଜିତ ଘୋଷଣା କରିଛନ୍ତି। ଯଦି କରୋନା ସଂକ୍ରମଣ କ୍ରମାଗତ ଭାବରେ ବଢିଚାଲେ ତାହେଲେ ଆଗାମୀ ଶୁକ୍ରବାର ଲକଡାଉନ୍ ନେଇ ନିଷ୍ପତ୍ତି ନିଆଯିବ ।

ବର୍ତ୍ତମାନ ଦେଶରେ ଚିହ୍ନଟ ହେଉଥିବା କରୋନା ମାମଲା ମଧ୍ୟରୁ ୬୦ ପ୍ରତିଶତରୁ ଅଧିକ ମାମଲା ମହାରାଷ୍ଟ୍ରରୁ ଆସୁଛି। ଆସନ୍ତା ଏପ୍ରିଲ ୨ ତାରିଖ ପର୍ଯ୍ୟନ୍ତ ଏହା ଉପରେ ନଜର ରଖାଯିବ। ଯଦି ଲୋକମାନେ କରୋନା ଗାଇଡଲାଇନର ଉଲ୍ଲଂଘନ କରିବା ଜାରି ରଖନ୍ତି ତାହେଲେ ଲକଡାଉନ୍ ଲାଗୁ କରିବା ବ୍ୟତୀତ ସରକାରଙ୍କ ପାଖରେ ଅନ୍ୟ କୌଣସି ବିକଳ୍ପ ରହିବ ନାହିଁ ।

ସ୍ୱେଜରେ ଅଟକିଲା କଣ୍ଟେନର, ଜଳ ପଥରେ ଟ୍ରାଫିକ ଜାମ୍

କାଇରୋ: ସଡକରେ ଟ୍ରାଫିକ ଜାମ ହେବା ସାଧାରଣ କଥା । ଯାହା ଆମ ସହ ମଧ୍ୟ ଅନେକଥର ଘଟିଛି । ସ୍ଥିତି ଏମିତି ହୋଇଛି କି ଘଣ୍ଟା ଘଣ୍ଟା ଧରି ଅଟକି ରହିବାକୁ ପଡେ । କିନ୍ତୁ କେବେ ଜଳପଥରେ ଟ୍ରାଫିକ ଜାମ କଥା ଶୁଣିଛନ୍ତି କି ? କିନ୍ତୁ ହଁ ଜଳ ପଥରେ ଏମିତି ଏକ ଟ୍ରାଫିକ ଜାମର ଘଟଣା ଏବେ ସାମ୍ନାକୁ ଆସିଛି । ଆଉ ଏହି ଘଟଣା ଘଟିଛି ଇଜିପ୍ଟରେ ।

ଜଳପଥରେ ଯାଉଥିବା ଏକ ଜାହାଜ କେନାଲରେ ଅଟକି ଯାଇଛି । ଏହା କେବଳ ଅଟକି ଯାଇନି, ବଂର ପୃଥିବୀର ନିଶ୍ବାସ ଅଟକାଇ ଦେଇଛି । ଏହି କେନାଲର ନାମ ହେଇଛି ସ୍ବେଜ କେନାଲ । ମଙ୍ଗଳବାର ଏହି କେନାଲରେ ଯାଉଥିବା ଏକ କଣ୍ଟେନର ଜାହାଜ ଟି ଫଶି ଯାଇଛି । ଫଳରେ କଣ୍ଟେନରର ଉଭୟ ପାର୍ଶ୍ବରେ ଶହ ଶହ ଜାହାଜ ଅଟକି ରହିଛନ୍ତି ।

ଏହି କଣ୍ଟେନର ଜାହାଜର ଲମ୍ବ ୪୦୦ ମିଟର ହୋଇଥିବାବେଳେ, ପ୍ରସ୍ଥ ରହିଛି ୫୯ ମିଟର । ଚୀନରୁ ସାମଗ୍ରୀ ନେଇ ଇଜିଫ୍ଟ ଗସ୍ତ କରୁଥିଲା ଏହି ଜାହାଜ । କିନ୍ତୁ ଜଳପଥର ନିତିଦିନିଆ ରାସ୍ତାରେ ଯାଉଥିବା ଏହି ଜାହାଜ ସ୍ବେଜ କେନାଲରେ ମଝି ଭାଗରେ ଫସି ଯାଇଥିଲା । ନା ଏହି ଜାହାଜଟି ଆଗକୁ ଯାଇପାରୁଛି, ନା ପଛକୁ । ଫଳରେ ଜଳପଥର ଟ୍ରାଫିକ ଏକପ୍ରକାର ଜାମ ହୋଇଯାଇଛି । ଯେଉଁଥିପାଇଁ କେନାଲର ଉଭୟ ଦିଗରେ ଅଟକି ରହିଛି ଶହ ଶହ ଜାହାଜ ।

ସେପଟେ ଏହି ଜଳପଥ ଦେଇ ପ୍ରତିଦିନ ହଜାର ହଜାର ଜାହାଜ ଯିବା ଆସିବା କରିଥାନ୍ତି । ଅନ୍ୟ ଦେଶ ମାନଙ୍କୁ ବିଭିନ୍ନ ପ୍ରକାର ସାମଗ୍ରୀ ଏହି ପଥ ଦେଇ ଆମଦାନୀ, ରପ୍ତାନି ହୋଇଥାଏ । କିଛି ବର୍ଷ୍ ପୂର୍ବେ ଅନ୍ୟ ଏକ ଜାହାଜ ମଧ୍ୟ ଏହି କେନାଲରେ ଅଟକି ଯାଇଥିଲା । ସେବେ ମଧ୍ୟ ନିକଟବର୍ତ୍ତୀ ଦେଶ ଗୁଡିକୁ ସାମଗ୍ରୀ ଆମଦାନୀ, ରପ୍ତାନୀ କରିବାରେ ସମସ୍ୟା ସୃଷ୍ଟି ହୋଇଥିବା ଦେଖିବାକୁ ମିଳିଥିଲା ।

ଦୁଇ ଟ୍ରେନ୍ ମୁହାଁମୁହିଁ ଧକ୍କା, ୩୨ ମୃତ ଓ ୬୦ରୁ ଉର୍ଦ୍ଧ୍ୱ ଗୁରୁତର

ଇଜିପ୍ଟ: ଦକ୍ଷିଣ ଇଜିପ୍ଟରେ ଶୁକ୍ରବାର ଦୁଇଟି ଟ୍ରେନ୍ ମଧ୍ୟରେ ଧକ୍କା ହେବା ଫଳରେ ୩୨ ଜଣଙ୍କର ମୃତ୍ୟୁ ଘଟିଛି । ଏଥିସହିତ ୬୬ ଜଣ ଆହତ ହୋଇଛନ୍ତି। ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଜାରି ଏକ ବିଜ୍ଞପ୍ତି ଅନୁଯାୟୀ ସୋହାଗ ପ୍ରଦେଶର ତାହଟା ଜିଲ୍ଲାରେ ଏହି ଅଘଟଣ ଘଟିଛି । ମିଶରର ରାଜଧାନୀ କାଇରୋ ଠାରୁ ତାହଟା ଜିଲ୍ଲା ପ୍ରାୟ ୪୬୦ କିଲୋମିଟର ଦୂରରେ ଅବସ୍ଥିତ ।

ଭିଡିଓ ଫୁଟେଜରେ ଟ୍ରେନର ଅନେକ କୋଚ୍ ଓଲଟି ପଡିଥିବା ନଜର ଆସିଛି ।

 

ଉଲ୍ଲେଖନୀୟ, ନିକଟ ଅତୀତରେ ପର୍ଯ୍ୟାପ୍ତ ପରିମାଣର ଭିତ୍ତିଭୂମି ଏବଂ ରକ୍ଷଣାବେକ୍ଷଣ ଅଭାବ ହେତୁ ଇଜିପ୍ଟରେ ଅନେକ ବଡ଼ଧରଣର ରେଳ ଦୁର୍ଘଟଣା ଘଟିଛି। ୨୦୦୨ ମସିହାରେ ହୋଇଥିବା ଏକ ଟ୍ରେନ୍ ଦୁର୍ଘଟଣାରେ ୩୭୩ ଜଣ ପ୍ରାଣ ହରାଇଥିଲେ।

ସେହିପରି ଗତ ବର୍ଷ ମାର୍ଚ୍ଚରେ କାଇରୋରେ ଦୁଇଟି ଟ୍ରେନ୍ ଧକ୍କାରେ ୧୩ ଜଣ ଆହତ ହୋଇଥିଲେ । ଯାହା ପରେ ଦେଶରେ ରେଳ ସେବାକୁ ଆଶିଂକ ଭାବେ କିଛି ଦିନ ଲାଗି ସ୍ଥଗିତ ରଖାଯାଇଥିଲା । ଅପରପକ୍ଷେ ୨୦୧୯ ମସିହା ଫେବୃଆରୀ ମାସରେ ଏକ ଟ୍ରେନରେ ନିଆଁ ଲାଗି ୨୦ରୁ ଅଧିକ ଲୋକଙ୍କର ମୃତ୍ୟୁ ହୋଇଥିଲା।