spot_img
Home Blog Page 5968

ଆଜି ଦ୍ୱିତୀୟ ପର୍ଯ୍ୟାୟ ନିର୍ବାଚନ, ୩୦ ଆସନ ପାଇଁ ହେବ ଭୋଟିଂ

ନୂଆଦିଲ୍ଲୀ: ପଶ୍ଚିମବଙ୍ଗରେ ଆଜି ଦ୍ୱିତୀୟ ପର୍ଯ୍ୟାୟ ମତଦାନ। ୩୦ଟି ଆସନରେ ହେବ ଭୋଟିଂ । ଏ ନେଇ ସମସ୍ତ ପ୍ରସ୍ତୁତି ଶେଷ ହୋଇଛି। ଦ୍ୱିତୀୟ ପର୍ଯ୍ୟାୟ ନିର୍ବାଚନରେ ମୋଟ ୧୭୧ ଜଣ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା କରିବେ ୭୫ ଲକ୍ଷ ୯୪ ହଜାର ୫୪୯ ଭୋଟର । ୧୦ ହଜାର ୬୨୦ଟି ମତଦାନ କେନ୍ଦ୍ରରେ ହେବ ଭୋଟିଂ ।

ପଶ୍ଚିମବଙ୍ଗରେ ମୋଟ୍ ୮ଟି ପର୍ଯ୍ୟାୟରେ ହେଉଛି ମତଦାନ । ଆଜି ୨୪ ପ୍ରଙ୍ଗଣା, ବାଙ୍କୁରା, ପଶ୍ଚିମ ମେଦିନିପୁର ଓ ନନ୍ଦିଗ୍ରାମ ଭଳି ହାଇପ୍ରୋଫାଇଲ୍ ସ୍ଥାନରେ ହେବ ମତଦାନ। ସଭିଁଙ୍କ ନଜର ରହିଛି ନନ୍ଦିଗ୍ରାମ ଉପରେ । ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ବରିଷ୍ଠ ବିଜେପି ନେତା ଶୁଭେନ୍ଦୁ ଅଧିକାରୀଙ୍କ ବିରୋଧରେ ନନ୍ଦିରଗ୍ରାମରେ ହେଉଛି କଡା ଟକ୍କର । ଶୃଙ୍ଖଳିତ ମତଦାନ ପାଇଁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ଯେଭଳି କୌଣସି ହିଂସା ପରିସ୍ଥିତି ସୃଷ୍ଟି ନ ହୁଏ ତାହା ଉପରେ ବିଶେଷଭାବେ ଧ୍ୟାନ ଦିଆଯାଇଛି ।

ସେପଟେ ଆସାମରେ ମଧ୍ୟ ଆଜି ଦ୍ୱିତୀୟ ପର୍ଯ୍ୟାୟ ନିର୍ବାଚନ ପାଇଁ ହେବ ଭୋଟିଂ। ୩୯ଟି ଆସନରେ ହେବ ମତଦାନ । ୩୪୫ ପ୍ରାର୍ଥୀଙ୍କ ମଧ୍ୟରେ ଅଛନ୍ତି ୨୬ ଜଣ ମହିଳା ପ୍ରାର୍ଥୀ । ଦ୍ୱିତୀୟ ପର୍ଯ୍ୟାୟରେ ଅନେକ ହେଭିୱେଟ୍ ନେତାଙ୍କ ଭାଗ୍ୟ ପରୀକ୍ଷା ହେଉଛି । ଆସାମରେ ତିନୋଟି ପର୍ଯ୍ୟାୟରେ ହେବ ମତଦାନ । ମେ ୨ ତାରିଖରେ ଆସିବ ନିର୍ବାଚନ ଫଳାଫଳ।

PPF ସୁଧହାର କମାଇଲେ କେନ୍ଦ୍ର ସରକାର

ନୂଆଦିଲ୍ଲୀ: କରୋନା ସଙ୍କଟ ଭିତରେ ପୁଣି ଥରେ ସାଧାରଣ ଲୋକଙ୍କୁ ବଡ ଝଟକା ଦେଇଛନ୍ତି କେନ୍ଦ୍ର ସରକାର । ପବ୍ଲିକ୍ ପ୍ରୋଭିଡେଣ୍ଟ ଫଣ୍ଡ(PPF) ସୁଧହାର କମାଇଛନ୍ତି ମୋଦି ସରକାର । ୬.୪ ପ୍ରତିଶତକୁ କମିଛି PPF ସୁଧହାର । ଦୀର୍ଘ ୪୬ବର୍ଷ ପରେ PPF ସୁଧହାର କମିଛି । ନ୍ୟାସନାଲ ସେଭିଙ୍ଗସ୍ ସାର୍ଟିଫିକେଟ୍(NSC) ୫.୯ ପ୍ରତିଶତକୁ ହ୍ରାସ ପାଇଛି । ଆସନ୍ତାକାଲିଠାରୁ ଲାଗୁ ହେବ ଏହି ନୂଆ ସୁଧହାର ।

ପୂର୍ବରୁ ୭ ପ୍ରତିଶତ ସୁଧହାର ମିଳୁଥିଲା  । ଏବେ ଏହାକୁ କମ୍ କରିଛନ୍ତି କେନ୍ଦ୍ର ସରକାର । ସେହିଭଳି ମିଆଦି ଜମା ଉପରେ ମଧ୍ୟ ସୁଧ କମିଛି । ବର୍ଷିକିଆ ମିଆଦି ଜମା ଉପରେ ସୁଧହାର ୫.୪ ପ୍ରତିଶତରୁ ଖସି ୪.୪ ପ୍ରତିଶତ,  ୨ରୁ ୫ ବର୍ଷ ମଧ୍ୟରେ ସୁଧାହାର ୦.୫ ପ୍ରତିଶତ କମ କରାଯାଇଛି । ରିକରିଂ ଜମା ଉପରେ ୫ ପ୍ରତିଶତରୁ ୫.୮ ପ୍ରତିଶତ ସୁଧ ମିଳିବ ।

ଗଣଦୁଷ୍କର୍ମ ମାମଲା, ୩ ଦୋଷୀଙ୍କୁ ୨୦ ବର୍ଷ ଲେଖାଏଁ ଜେଲ୍ ସହ ଜରିମାନା

ଝାରସୁଗୁଡ଼ା: ବନହରପାଲି ଥାନା ଅଞ୍ଚଳରେ ମହିଳାଙ୍କୁ ଗଣଦୁଷ୍କର୍ମ ମାମଲାରେ ୩ ଜଣ ଦୁଷ୍କର୍ମକାରୀଙ୍କୁ ୨୦ ବର୍ଷ ଲେଖାଏଁ ଜେଲ ଦଣ୍ଡାଦେଶ । ରମାକାନ୍ତ ନାୟକ, ପ୍ରକାଶ ନାଏକ ଓ ବାବଲୁ ମିର୍ଦ୍ଧାଙ୍କୁ ଦଣ୍ଡାଦେଶ ଶୁଣାଇଛନ୍ତି ଜିଲ୍ଲା ସ୍ୱତନ୍ତ୍ର ଅତିରିକ୍ତ ଜିଲ୍ଲା ଦୌରାଜଜ ।

Jharasuguda Gang Rape Case, 3 Accused Convicted For 20 Year

୨୦୧୫ ମସିହା ଜୁନ୍ ୨୩ ତାରିଖରେ ବନହରପାଲି ଅଞ୍ଚଳର ଜଣେ ମହିଳା ନିକଟସ୍ଥ ଡୁଙ୍ଗୁରିକୁ ଶୌଚ ପାଇଁ ଯାଇଥିବା ବେଳେ ଅଭିଯୁକ୍ତମାନେ ତାଙ୍କୁ ବଳ ପୂର୍ବକ ଦୁଷ୍କର୍ମ କରିଥିଲେ । ଏନେଇ ମହିଳା ଜଣକ ବନହରପାଲି ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ସେମାନଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ବୁଧବାର ଝାରସୁଗୁଡ଼ା ଜିଲ୍ଲା ସ୍ୱତନ୍ତ୍ର ଅତିରିକ୍ତ ଜିଲ୍ଲା ଦୌରା ଜଜ ହର ପ୍ରସାଦ ପଟ୍ଟନାୟକ ଏହି ମାମଲାର ଶୁଣାଣି କରି ଦୁଷ୍କମକାରୀଙ୍କୁ ୨୦ ବର୍ଷ ଲେଖାଏଁ ଜେଲ ଓ ୫ ହଜାର ଟଙ୍କା ଲେଖାଏଁ ଜରିମାନା ପୈଠ କରିବା ପାଇଁ ନିର୍ଦ୍ଦେଶ ଦେଇଛନ୍ତି ।

ଅଭିଯୁକ୍ତମାନେ ଜରିମାନା ପୈଠ ନକଲେ ସେମାନଙ୍କ ଜେଲ ଦଣ୍ଡାଦେଶ ଆହୁରି ୬ ମାସ ଯାଏ ବୃଦ୍ଧି କରାଯିବ ବୋଲି ଶ୍ରୀ ପଟ୍ଟନାୟକ ରାୟ ପ୍ରକାଶ କରିଛନ୍ତି । ୧୯ ଜଣ ସାକ୍ଷୀଙ୍କୁ ପଚରାଉଚରା କରିବା ପରେ ମାନ୍ୟବର କୋର୍ଟ ଏହି ରାୟ ପ୍ରକାଶ କରିଛନ୍ତି । ପ୍ରକାଶ ଯୋଗ୍ୟ ଯେ, ପୀଡିତାଙ୍କ ପକ୍ଷରୁ ପବ୍ଲିକ ପ୍ରୋସିକ୍ୟୁଟର ସତପାଲ ସିଂ ମାମଲଟିକୁ ପରିଚାଳନା କରିଥିଲେ ।

ପ୍ରଥମ ଭାଷା ଭିତ୍ତିକ ରାଜ୍ୟ ଓଡ଼ିଶା, ମହାତ୍ମା ଗାନ୍ଧୀଙ୍କ ସ୍ୱଦେଶୀ ଆନ୍ଦୋଳନର ବହୁ ପୂର୍ବରୁ ମଧୁସୂଦନ ଏହା ଆରମ୍ଭ କରିଥିଲେ

୧୯୩୬ ଅପ୍ରେଲ ୧ । ଉତ୍କଳ ଇତିହାସର ସ୍ୱର୍ଣ୍ଣିମ ଦିନ । ବ୍ରିଟିଶ୍ ଶାସନ କାଳରେ ସ୍ୱତନ୍ତ୍ର ରାଜ୍ୟ ଭାବେ ରାଜ୍ୟ ଭାବେ ଏପ୍ରିଲ୍ ୧ରେ ନବଗଠିତ ହୋଇଥିଲା ଓଡ଼ିଷା । ଏହି ସ୍ମୃତିକୁ ଉଜ୍ଜୀବତ କରିବା ଲାଗି ପ୍ରତିବର୍ଷ ଏପ୍ରିଲ୍ ୧ରେ ପାଳନ ହେଉଛି ଉତ୍କଳ ଦିବସ । ଭାରତର ପ୍ରଥମ ଭାଷା ଭିତ୍ତିକ ରାଜ୍ୟ ହେଉଛି ଓଡ଼ିଶା । ସାଲ୍ ୧୫୬୮ରେ ଶେଷ ହିନ୍ଦୁ ରାଜା ମୁକୁନ୍ଦ ଦେବଙ୍କ ଦେହାନ୍ତ ପରେ, ବ୍ରିଟିଶ ଶାସନରୁ ଅଲଗା ହୋଇ ଓଡ଼ିଶାକୁ ଏକ ଅଲଗା ରାଜ୍ୟ କରିବା ପାଇଁ ମଧୁସୁଦନ ଦାସ, ଫକୀର ମୋହନ ସେନାପତି, ଗୋପବନ୍ଧୁ ଦାସ, ନୀଳକଣ୍ଠ ଦାସ, ଗଙ୍ଗାଧର ମେହେର, ରାଧାନାଥ ମେହେର, ରାଧାନଥ ରାୟ, ବାସୁଦେବ ସୁଢ଼ଳ ଦେବ ଓ କୃଷ୍ଣଚନ୍ଦ୍ର ଗଜପତିଙ୍କ ଚେଷ୍ଟାରେ ଆନ୍ଦୋଳନ ତେଜିଥିଲା ।

ପ୍ରଥମେ ଛଅଟି ଜିଲ୍ଲାକୁ ନେଇ ଗଠିତ ହୋଇଥିଲା ଓଡ଼ିଶା । କଟକ, ପୁରୀ, ବାଲେଶ୍ୱର, ସମ୍ବଲପୁର, କୋରାପୁଟ ଓ ଗଞ୍ଜାମ ଜିଲ୍ଲାକୁ ଗଠିତ ଓଡ଼ିଶାର ପ୍ରଥମ ରାଜ୍ୟପାଳ ଥିଲେ ସାର ଅଷ୍ଟିନ ହବାକ୍‌ । ୧୯୩୬ ମସିହା ଏପ୍ରିଲ ୧ରେ ଓଡ଼ିଶାକୁ ଏକ ସ୍ୱତନ୍ତ୍ର ରାଜ୍ୟର ମାନ୍ୟତା ମିଳିଲା । ୧୯୯୨ ମସିହାରେ ଓଡ଼ିଶାର ୧୩ଟି ଜିଲ୍ଲାକୁ ପୁନର୍ବିଭାଜନ କରି ୩୦ଟି ଜିଲ୍ଲାରେ ପରିଣତ କରାଗଲା । ପ୍ରତି ବର୍ଷ ଏପ୍ରିଲ୍ ପହିଲାକୁ ଓଡ଼ିଶା ଦିବସ ରୂପେ ପାଳନ କରାଯାଇ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନର କର୍ଣ୍ଣଧାରମାନଙ୍କୁ ସମ୍ମାନ ଅର୍ପଣ କରାଯାଏ ।

ଭାଷାଭିତ୍ତିରେ ପ୍ରଥମ ରାଜ୍ୟ ଓଡ଼ିଶା । ତେଣୁ ପ୍ରତ୍ୟେକ ଓଡ଼ିଆଙ୍କ ପାଇଁ ଏହା ଏକ ଗର୍ବର ଦିନ। ଯେଉଁମାନଙ୍କର ଅଦମ୍ୟ ସାଧନା, ପ୍ରଚେଷ୍ଟା ଲାଗି ଓଡ଼ିଶା ଭାଷାଭିତ୍ତିରେ ସ୍ୱତନ୍ତ୍ର ପରିଚୟ ପାଇପାରିଛି ସେମାନଙ୍କୁ ଆଜି ସମସ୍ତେ ମନେ ପକାଉଛନ୍ତି ।

ପୂର୍ବରୁ ଉତ୍କଳ ଖଣ୍ଡବିଖଣ୍ଡିତ ହୋଇ ପଡ଼ି ରହିଥିଲା। ପଶ୍ଚିମରେ ସମ୍ବଲପୁର ମଧ୍ୟପ୍ରଦେଶ ସହିତ ମିଶିଥିବା ବେଳେ ଉତ୍ତରରେ ବାଲେଶ୍ୱରରେ ବଙ୍ଗଳାର ପ୍ରଭାବ ଥିଲା, କେତେକ ଅଞ୍ଚଳ ବିହାରରେ ଥିବା ବେଳେ, ଦକ୍ଷିଣରେ ଗଂଜାମ, ମାଡ୍ରାସ୍ ପ୍ରେସିଡେନ୍ସି ଅଧୀନରେ ଥିଲା। ହେଲେ ଉତ୍କଳ ଗୌରବ ମଧୁସୂଦନ ଦାସ, ଉତ୍କଳ ମଣି ଗୋପବନ୍ଧୁ ଦାସ, ମହାରାଜା କୃଷ୍ଣଚନ୍ଦ୍ର ଗଜପତି, ବ୍ୟାସ କବି ଫକୀର ମୋହନ ସେନାପତି, ରାଧାନାଥ ରାୟ, ସ୍ୱଭାବ କବି ଗଙ୍ଗାଧର ମେହେରଙ୍କ ପରି କେତେକ ବୀରପୁତ୍ର ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ କରିବା ପାଇଁ ସଂଘର୍ଷ କରିଥିଲେ। ଏହି ବୀରପୁତ୍ରଙ୍କ ସଂଘର୍ଷରେ ୧୯୦୩ରେ ପ୍ରଥମେ ଗଠନ ହେଲା ଉତ୍କଳ ସମ୍ମିଳନୀ । ଏହା ପରେ ଜୋରଦାର ହୋଇଥିଲା ସଂଗ୍ରାମ । ଶେଷରେ ସାକାର ହେଲା ସ୍ୱପ୍ନ । ଓଡ଼ିଆଙ୍କୁ ମିଳିଥିଲା ନିଜ ପାଇଁ ଏକ ସ୍ୱତନ୍ତ୍ର ଭୌଗୋଳିକ ଭୂଖଣ୍ଡ।

ଏକ ମହାନ ଲକ୍ଷ୍ୟ ଓ ଉଦ୍ଦେଶ୍ୟ ରଖି ମହାପୁରୁଷମାନେ ଖଣ୍ଡ ବିଖଣ୍ଡିତ ଓଡ଼ିଶାକୁ ଏକାଠି କରିଥିଲେ । ବିଚ୍ଛିନ୍ନ ଓଡ଼ିଶାକୁ ଏକତ୍ର କରିବା ପାଇଁ ସେ ଯେଉଁ ଉଦ୍ୟମ କରିଥିଲେ, ତାହା ଓଡ଼ିଶାବାସୀ କେବେ ଭୁଲି ପାରିବେ ନାହିଁ । ମାତ୍ର ଦୁଃଖର କଥା ଯେ, ଆଜକୁ ୮୫ ବର୍ଷ ତଳେ ମଧୁ ବାବୁ ଯେଉଁ ସ୍ୱପ୍ନ ନେଇ ସ୍ୱତନ୍ତ୍ର ଉତ୍କଳର ଚିନ୍ତା କରିଥିଲେ, ତାହା ପରବର୍ତ୍ତୀ ପିଢି ନଷ୍ଟଭ୍ରଷ୍ଟ କରି ଦେଇଛନ୍ତି । ଖଣି, ଖାଦାନ, ଜଙ୍ଗଲ, ଜଳରେ ପରିପୂର୍ଣ୍ଣ ଓଡ଼ିଶା । ଓଡ଼ିଶାରେ ସବୁ ଥାଇ ମଧ୍ୟ ଆମ ରାଜ୍ୟର ଲୋକେ ଗରିବ ହୋଇ ରହିଛନ୍ତି । ପ୍ରାକୃତିକ ସମ୍ପଦରେ ପରିପୂର୍ଣ୍ଣ ଓଡ଼ିଶାରେ କାମ ମିଳୁ ନଥିବାରୁ ପେଟ ପୋଷିବା ପାଇଁ ଓଡ଼ିଆ ଲୋକ ବାହାର ରାଜ୍ୟକୁ ଦାଦନ ଶ୍ରମିକ ଭାବେ ଯାଉଛନ୍ତି ।

ମଧୁସୂଦନ ଦାସଙ୍କ ଅବଦାନ

ଉତ୍କଳ ଗୌରବ ମଧୁସୂଦନ ଥିଲେ ଓଡ଼ିଆ ଜାତୀୟତାର ପ୍ରମୁଖ ମନ୍ତ୍ରଦାତା । ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନରେ ତାଙ୍କର ଅସୀମ ଜାତି ପ୍ରୀତି, ଚରମ ତ୍ୟାଗ, ଗଭୀର ଅଧ୍ୟବସାୟ, ଆନ୍ତରିକ ନିଷ୍ଠା ଓ ବିଚକ୍ଷଣ ଦୂରଦର୍ଶିତା ପ୍ରଣିଧାନଯୋଗ୍ୟ । ସତ୍ୟ, ନ୍ୟାୟ ଓ ସାଧୁତା ପ୍ରଦର୍ଶନ କରି ଓଡ଼ିଆ ଜାତିର ନୈତିକତା ଓ ସଚ୍ଚୋଟତାର ଗୌରବମୟ ପରମ୍ପରା ସେ ସୃଷ୍ଟି କରିଥିଲେ । ମହାତ୍ମା ଗାନ୍ଧୀ ଆନୁଷ୍ଠାନିକ ଭାବେ ସ୍ୱଦେଶୀ ଆନ୍ଦୋଳନ ଆରମ୍ଭ କରିବାର ବହୁ ପୂର୍ବରୁ ମଧୁସୂଦନ ଓଡ଼ିଶାରେ ଏହା ଆରମ୍ଭ କରିଥିଲେ । ଓଡ଼ିଆ ଜାତୀୟ ଆନ୍ଦୋଳନର ସେ ଥିଲେ ପ୍ରାଣ ପ୍ରତିଷ୍ଠାତା । ବିଚ୍ଛିନ୍ନାଚଂଳକୁ ଏକତ୍ର କରି ଆଧୁନିକ ଓଡ଼ିଶା ଗଠନ କରିବାରେ ସେ ଥିଲେ ପ୍ରଧାନ ପୁରୋଧା । ୧୮୮୨ରେ ସେ ପ୍ରତିଷ୍ଠା କରିଥିଲେ ଉତ୍କଳ ସଭା ଏବଂ ୧୯୦୩ରେ ଉତ୍କଳ ସମ୍ମିଳନୀ ।

ଆଧାର-ପ୍ୟାନ୍ ଲିଙ୍କ ପାଇଁ ୩ମାସ ବଢିଲା ଡେଡ୍‌ଲାଇନ୍, ଆଜି ଥିଲା ଶେଷ ତାରିଖ

ନୂଆଦିଲ୍ଲୀ: ଆଧାରକାର୍ଡଧାରୀଙ୍କୁ ଆଶ୍ୱସ୍ତି । ଘୁଞ୍ଜିଲା ଆଧାର କାର୍ଡ ସହ ପାନ କାର୍ଡ ଲିଙ୍କ କରାଇବାର ତାରିଖ । ଆଜି ଲିଙ୍କ କରାଇବାର ଶେଷ ତାରିଖ ଥିବାବେଳେ ଏହାକୁ ଜୁନ୍ ୩୦ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି । ଅର୍ଥାତ ଆହୁରି ତିନି ମାସ କୋହଳ କରିଛନ୍ତି ସରକାର । କରୋନା କଟକଣା ପାଇଁ ଏଭଳି ନିଷ୍ପତ୍ତି ନେଇଛନ୍ତି ସରକାର ।

ଏହି ତିନି ମାସ ମଧ୍ୟରେ ଆଧାର କାର୍ଡ ସହ ପାନ କାର୍ଡ ଲିଙ୍କ କରାଇବା ବାଧ୍ୟତାମୂଳକ କରାଯାଇଛି । ଆଧାର ସହ ପାନ୍ କାର୍ଡ ଲିଙ୍କ ନହେଲେ ଆଗାମି ଦିନରେ ବହୁ ସମସ୍ୟା ଭୋଗିବାକୁ ପଡିବ । ଜମି କିଣା ବିକା ସହ ମ୍ୟୁଚୁଆଲ ଫଣ୍ଡରେ ଟଙ୍କା ନିବେଶ କରିବା ସମ୍ଭବ ହେବ ନାହିଁ ବୋଲି କହିଛନ୍ତି ବିଶେଷଜ୍ଞ । ବର୍ତ୍ତମାନ ସମୟରେ ଅନେକ ବ୍ୟକ୍ତି ଆଧାର କାର୍ଡ ଜରିଆରେ ସରକାରୀ ସୁବିଧା ପାଉଛନ୍ତି ।

ପାନ୍ କାର୍ଡ ଲିଙ୍କ ନଥିବାରୁ ସେମାନଙ୍କର ଅର୍ଥନୀତିର ସଂପୂର୍ଣ୍ଣ କାରବାର ଅଦୃଶ୍ୟ ହୋଇ ରହୁଛି । କିନ୍ତୁ ଆଧାର କାର୍ଡ ସହ ପାନ୍ କାର୍ଡ ଲିଙ୍କ ହେଲେ ଟଙ୍କା କାରବାରର ସବୁ ତଥ୍ୟ ସାମ୍ନାକୁ ଆସିଯିବ । ଆୟକର ଟିକସ ଫାଙ୍କୁଥିବା ବ୍ୟକ୍ତିଙ୍କ ପତ୍ତା ଲଗାଇବ ଏହି ବ୍ୟବସ୍ଥା । ତେଣୁ ଏହାକୁ କାର୍ଯ୍ୟକାରୀ କରିବା ପାଇଁ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ସରକାର । ୨୦୨୧ ଅର୍ଥ ବିଲ ସଂଶୋଧନରେ ଏହି ବ୍ୟବସ୍ଥା ଆଣିଛନ୍ତି କେନ୍ଦ୍ର ସରକାର ।

ଧାର୍ଯ୍ୟ ଲକ୍ଷ୍ୟ ଠାରୁ ଅଧିକ ପରିମାଣର ରାଜସ୍ବ ଆଦାୟ କରିଛି ବିଏମସି

ଭୁବନେଶ୍ୱର: ରାଜସ୍ବ ଆଦାୟ କ୍ଷେତ୍ରରେ ବିଏମସିର ବଡ଼ ସଫଳତା । ଚଳିତ ଆର୍ଥିକ ବର୍ଷରେ ଧାର୍ଯ୍ୟ ଲକ୍ଷ୍ୟ ଠାରୁ ଅଧିକ ପରିମାଣର ରାଜସ୍ବ ଆଦାୟ କରିଛି ବିଏମସି । କେବଳ ହୋଲ୍ଡିଂ ଟ୍ୟାକ୍ସରୁ ଆଦାୟ ହୋଇଛି ୫୦କୋଟିରୁ ଅଧିକ ରେକର୍ଡ ପରିମାଣର ଅର୍ଥ । ୧ ହଜାର ୬୦୮ଜଣ ବଡ଼ ବଡ଼ ଖିଲାପକାରୀ ଚିହ୍ନଟ ହୋଇଛନ୍ତି । ଖିଲାପକାରୀଙ୍କ ଠାରେ ପଡ଼ି ରହିଛି ୩୩ କୋଟି ଟଙ୍କା ।

BMC Collected Holding TAX More Than Target

ବାରମ୍ବାର ନୋଟିସ ପରେ ମଧ୍ୟ ଟିକସ ଦେବାରେ ଅବହେଳା କରୁଛନ୍ତି ବିଭିନ୍ନ ସଂସ୍ଥା । ଖିଲାପକାରୀଙ୍କ ପାଖରେ ବକେୟା ପଡିଛି ପ୍ରାୟ ୩୩କୋଟି ଟଙ୍କାର ହୋଲ୍ଡିଂ ଟ୍ୟାକ୍ସ । ଆଦାୟ ପାଇଁ ସେମାନଙ୍କ ନାମରେ ସର୍ବସାଧାରଣରେ ଲଗାଯାଇଛି ନାମ ତାଲିକା । ପଠାଯାଇଛି ରେଡ୍ ନୋଟିସ୍ । ଏବେ ଓପିଡିଆର କେସ୍ ରୁଜୁ ସହ ସମ୍ପତ୍ତି ବାଜ୍ୟାପ୍ତି ପାଇଁ କରାଯାଉଛି ନୋଟିସ୍ । ଚଳିତ ଆର୍ଥିକ ବର୍ଷରେ ବିଏମସି ମୋଟ ୯୦କୋଟି ଟଙ୍କାର ରାଜସ୍ବ ଆଦାୟ କରିବାର ଲକ୍ଷ୍ୟ ରଖିଥିଲା । ସେଥିରୁ ୪୩କୋଟି କେବଳ ହୋଲ୍ଡିଂ ଟ୍ୟାକ୍ସ । ତେବେ କୋଭିଡ ଓ ବର୍ଦ୍ଧିତ ଟ୍ୟାକ୍ସ ସ୍ଥଗିତ ନେଇ ରାଜ୍ୟ ସରକାରଙ୍କ ନିଷ୍ପତ୍ତି ସତ୍ତ୍ୱେ ରେକର୍ଡ ପରିମାଣର ପ୍ରାୟ ୫୦କୋଟି ଟଙ୍କାର ହୋଲ୍ଡିଂ ଟ୍ୟାକ୍ସ ଆଦାୟ ହୋଇଛି । ଯାହା ବିଏମସି ପାଇଁ ସର୍ବକାଳୀନ ରେକର୍ଡ ।

BMC Collected Holding TAX More Than Target

ଚଳିତ ଆର୍ଥିକ ବର୍ଷରେ ରାଜସ୍ବ ଆଦାୟ କମ୍ ହେବା ଆଶଙ୍କା ଥିଲା । ତଥାପି ୩ଟି ଜୋନରେ ଜୋନାଲ ଡେପୁଟି କମିଶନରଙ୍କ ସହିତ ୱାର୍ଡ ଅଫିସରଙ୍କୁ ଟାର୍ଗେଟ୍ ଦିଆଯାଇଥିଲା । ବାରମ୍ବାର ନୋଟିସ୍ ପରେ ମଧ୍ୟ ବଡ଼ ଖିଲାପକାରୀ ଅବହେଳା କରିବା ପରେ ସେମାନଙ୍କ ସମ୍ପତ୍ତି ବାଜ୍ୟାପ୍ତି ପାଇଁ ପଦକ୍ଷେପ ନିଆଯାଇଛି । ଏଭଳି ପରିସ୍ଥିତିରେ ପାହାଳ ସ୍ଥିତ ଆପେକ୍ସ କଲେଜ ୨୦୧୨-୧୩ ମସିହାରୁ ବକେୟା ଥିବା ୬ କୋଟି ୨୯ଲକ୍ଷ ଟଙ୍କାରୁ ଶତକଡା ୫୦ ପ୍ରତିଶତ ୩କୋଟି ଟଙ୍କା ପ୍ରଦାନ କରିଛି । ଅବଶିଷ୍ଟ ପର୍ଯ୍ୟାୟ କ୍ରମେ ପଇଠ କରିବାକୁ ଲିଖିତ ଦେଇଛି ।

BMC Collected Holding TAX More Than Target

ସେପଟେ ବଡ଼ ବଡ଼ ଖିଲାପକାରୀଙ୍କ ଠାରୁ ବକେୟା ଟ୍ୟାକ୍ସ ଆଦାୟ ପାଇଁ ନିୟୋଜିତ ହୋଇଥିବା କିନ୍ନରଙ୍କ ଟିଜି ସ୍ବିକୃତୀ ଗ୍ରୁପ୍ ଦୁଇ ମାସରେ ପ୍ରାୟ ୫କୋଟି ଟଙ୍କାର ବକେୟା ହୋଲ୍ଡିଂ ଟେକ୍ସ ଆଦାୟରେ ସଫଳ ହୋଇଛନ୍ତି । ବର୍ଦ୍ଧିତ ଡୋଲ୍ଡିଂ ଟ୍ୟାକ୍ସ ସ୍ଥଗିତ ପରେ ଲୋକଙ୍କୁ ଆଶ୍ବସ୍ତି ମିଳିଛି । ସେପଟେ ବଡ ବଡ ଖିଲାପକାରୀଙ୍କୁ ମଧ୍ୟ ପ୍ରଥମେ ଶତକଡା ୫୦ଭାଗ ଓ ଅବଶିଷ୍ଟ ପର୍ଯ୍ୟାୟ କ୍ରମେ ପଇଠ କରିବାକୁ ସୁଯୋଗ ଦେଇଛି ବିଏମସି ।

ଦରବୃଦ୍ଧି ସମ୍ପର୍କରେ ଓଇଆରସି ନିକଟରେ ପୁନର୍ବିଚାର ପାଇଁ ଆବେଦନ କରିବେ ସରକାର

ଭୁବନେଶ୍ୱର: ବିରୋଧୀଙ୍କ ହୋହଲ୍ଲା ଦେଖି ବିଜୁଳି ଦରବୃଦ୍ଧି ପ୍ରସଙ୍ଗରେ ଗୃହରେ ଶକ୍ତିମନ୍ତ୍ରୀ ବିବୃତି ରଖିଛନ୍ତି । ରାଜ୍ୟ ସରକାର ଦରବୃଦ୍ଧି ସମ୍ପର୍କରେ ଓଇଆରସି ନିକଟରେ ପୁନର୍ବିଚାର ପାଇଁ ଆବେଦନ କରିବେ ବୋଲି ବିବୃତି ରଖିଛନ୍ତି ଶକ୍ତିମନ୍ତ୍ରୀ ଦିବ୍ୟଶଙ୍କର ମିଶ୍ର । ଗତ ଶନିବାର ଓଡ଼ିଶା ବିଦ୍ୟୁତ ନିୟାମକ ଆୟୋଗ (OERC) ବିଦ୍ୟୁତ୍ ଦର ୟୁନିଟ୍ ପିଛା ୩୦ ପଇସା ବୃଦ୍ଧି କରିଥିଲେ । ଗତବର୍ଷ ତୁଳନାରେ ବିଦ୍ୟୁତ୍ ଦର ୫.୬୦ ପ୍ରତିଶତ ବୃଦ୍ଧି କରିଛି ଓଇଆରସି । ଏପ୍ରିଲ୍ ୪ ତାରିଖରୁ ଲାଗୁହେବ ବର୍ଦ୍ଧିତ ଦର ।

 Odisha To Appeal OERC To Reconsider In Power Tariff Hike

ନୂଆ ଦର ଅନୁଯାୟୀ ପ୍ରିପେଡ୍‌ ଗ୍ରାହକଙ୍କ ପାଇଁ ୨ ପ୍ରତିଶତ ରିହାତି ଦିଆଯାଇଛି । କୃଷି ଏବଂ ବିପିଏଲ ବର୍ଗଙ୍କ ପାଇଁ ବର୍ଦ୍ଧିତ ଦର ଲାଗୁହେବନି । ବିତରଣ ଶୁଳ୍କରେ ୩ ପଇସା ବୃଦ୍ଧି କରାଯାଇଛି । ଗ୍ରାମୀଣ ବିଦ୍ୟୁତ ଉପଭୋକ୍ତା ନିର୍ଦ୍ଧାରିତ ବିଦ୍ୟୁତ୍ ଶୁଳ୍କ ପ୍ରଦାନ କଲେ ପ୍ରତି ୟୁନିଟରେ ୫ ପଇସା ରିହାତି ପାଇବେ ବୋଲି ଘୋଷଣା ହୋଇଛି । ତେବେ ବିଦ୍ୟୁତ ଉତ୍ପାଦନ ପାଇଁ ଆବଶ୍ୟକ କଞ୍ଚାମାଲ, ବିଦ୍ୟୁତ ଉତ୍ପାଦନ, ବିତରଣ ଓ ପରିବହନ ଖର୍ଚ୍ଚ ବଢିଥିବାରୁ ବିଦ୍ୟୁତ୍‌ ଦର ବଢ଼ିଥିବା ସରକାରଙ୍କ ପକ୍ଷରୁ କୁହାଯାଇଥିଲା ।

ଯାଜପୁର: ଫାଟିଲା ଗ୍ୟାସ ସିଲିଣ୍ଡର, ଅଳ୍ପକେ ବର୍ତ୍ତିଲେ ଅଗ୍ନିଶମ ବାହିନୀ… ଦେଖନ୍ତୁ ଭିଡିଓ

ଯାଜପୁର: ଏକ ବଡ଼ ଅଘଟଣରୁ ଅଳ୍ପକେ ବର୍ତ୍ତିଲେ ଅଗ୍ନିଶମ ବାହିନୀ । ନିଆଁ ଲିଭାଇବା ସମୟରେ ଫାଟିଲା ଗ୍ୟାସ ସିଲିଣ୍ଡର । ବିସ୍ଫୋରଣରେ ଛରିଲା ପୂରା ଅଞ୍ଚଳ । ଏହି ଅଘଟଣ ଘଟିଛି ଯାଜପୁର ଜିଲ୍ଲା ଦାନଗଦୀ ଅଞ୍ଚଳର । ସୂଚନା ମୁତାବକ ମାର୍ଚ୍ଚ ୩୧ ତାରିଖ ଅପରାହ୍ନରେ ସ୍ଥାନୀୟ ଓଭରବ୍ରିଜ ନିକଟରେ ଥିବା ଦୁଇଟି ଚା ଓ ପାନ ଦୋକାନରେ କୌଣସି କାରଣ ବଶତଃ ନିଆଁ ଲାଗିଯାଇଥିଲା ।

ପରେ ଖବର ପାଇ ଅଗ୍ନିଶମ କର୍ମଚାରୀ ଘଟଣା ସ୍ଥଳରେ ପହଞ୍ଚି ନିଆଁ ଲିଭାଇବାକୁ ଉଦ୍ୟମ କରିଥିଲେ । ଠିକ ସେତିକି ବେଳେ ଦୋକାନ ଭିତରେ ଥିବା ଏକ ଗ୍ୟାସ ସିଲିଣ୍ଡର ବିସ୍ଫୋରଣ ହୋଇଥିଲା । ବିସ୍ଫୋରଣ ଏତେ ଭଙ୍କରଣ ଥିଲା ଯେ, ଆଖପାଖ ସମସ୍ତ ଅଞ୍ଚଳ ଥରି ଉଠିଥିଲା । ତେବେ ନିକଟରେ ଥାଇ ନିଆଁ ଲିଭାଉଥିବା ଅଗ୍ନିଶମ କର୍ମଚାରୀ ଅଳ୍ପକେ ବର୍ତ୍ତିଯାଇଥିଲେ ।

ଶ୍ବଶୁର ଘରୁ ଚୋରି କରି ଜ୍ବାଇଁ ଗିରଫ

ଭୁବନେଶ୍ୱର: ରାଜଧାନୀରେ ଲୁଟେରା ଜ୍ବାଇଁ । ଶ୍ବଶୁର ଘରୁ ଚୋରି କରି ଜ୍ବାଇଁ ଗିରଫ । ଲୁଟେରା ଜ୍ବାଇଁ ଶେଖ ସାଜିଦକୁ ଗିରଫ କରିଛି ଭରତପୁର ଥାନା ପୋଲିସ । ମିଛରେ ଦୁବାଇରେ ଥିବା କହି ଶ୍ବଶୁର ଘର କଳା କନା ବୁଲାଇଥିଲା । ଅଭିଯୁକ୍ତ ଠାରୁ ୧୦ ଲକ୍ଷ ଟଙ୍କାର ସୁନା ଓ ୬ ଲକ୍ଷ ଟଙ୍କାର ବାଇକ୍ ଜବତ କରିଛି ପୋଲିସ । ଯୁବକ ଜଣଙ୍କ ଘର ହେଉଛି ଯାଜପୁର ମଙ୍ଗଳପୁର ଥାନା କସପ ଗାଁରେ । ପୂର୍ବରୁ ଶେଖ୍ ସାଜିଦି ବିବାହ କରିଥିଲେ । ଏ କଥା ଲୁଚାଇ ପୁଣି ଆଇଗିଣିଆ ଅଞ୍ଚଳର କିଶୋର ଚନ୍ଦ୍ର ପ୍ରଧାନଙ୍କ ଝିଅକୁ ଦୁବାଇରେ ଏକ ବଡ଼ କମ୍ପାନୀରେ କାମ କରୁଥିବା କହି ବିବାହ କରିଥିଲା ।

Son In Law Arrested For Stolen From Farther In Law House

କେହି ନଥିବା ବେଳେ ଶ୍ୱଶୁର ଘରୁ ସୁନା ଗହଣା ସହ ଦାମିକା ବାଇକ୍ ଚୋରି କରି ଫେରାର ହୋଇ ଯାଇଥିଲା ଶେଖ୍ । ଏ ସମ୍ପର୍କରେ ଉଭୟ ଶ୍ୱଶୁର ଓ ସ୍ତ୍ରୀଙ୍କ ଅଭିଯୋଗ କ୍ରମେ ଭରତପୁର ଥାନା ପୋଲିସ ଗିରଫ କରି କୋର୍ଟ ଚାଲାଣ କରିଛି । ଚୋରି ହୋଇଥିବା ବାଇକ, ସୁନା ଗହଣା, ପାସପୋର୍ଟ, ଆଧାର କାର୍ଡ, ମୋବାଇଲ ଜବତ କରିଛି ପୋଲିସ ।

ସାମାଜିକ, ଧାର୍ମିକ, ରାଜନୀତିକ, କ୍ରୀଡ଼ା ଆଦି କାର୍ଯ୍ୟକ୍ରମରେ ସର୍ବାଧିକ ୨୦୦ ଲୋକଙ୍କୁ ଅନୁମତି

ଭୁବନେଶ୍ୱର: ଦେଶର ବିଭିନ୍ନ ସ୍ଥାନରେ କରୋନା ସଂକ୍ରମଣ ମାମଲା ବଢ଼ିବାରେ ଲାଗିଛି । ଏହାକୁ ନଜରରେ ରଖି କୋଭିଡ୍ ଗାଇଡଲାଇନ୍ ଜାରି କରିଛନ୍ତି ଏସଆରସି । ଏପ୍ରିଲ୍ ମାସ ଲାଗି ଜାରି ହୋଇଛି କୋଭିଡ୍ ଗାଇଡଲାଇନ୍ । ଗାଇଡଲାଇନରେ ସର୍ଭେଲାନ୍ସ ଓ କଣ୍ଟେନମେଣ୍ଟ ଉପରେ ଗୁରୁତ୍ୱ ଦିଆଯାଇଛି । ଜିଲ୍ଲାପାଳ, ମହାନଗର ନିଗମ କମିଶନର ସଂକ୍ରମଣକୁ ଦେଖି କଣ୍ଟେନମେଣ୍ଟ ଜୋନ୍ ନେଇ ନିଷ୍ପତ୍ତି ନେବେ ।

ଏଥିସହ ଟେଷ୍ଟିଂ, ଟ୍ରାକିଂ ଓ ଟ୍ରିଟମେଣ୍ଟ ଉପରେ ଗୁରୁତ୍ୱ ଦିଆଯାଇଛି । କଣ୍ଟେନମେଣ୍ଟ ଜୋନରେ କେବଳ ଅତ୍ୟାବଶ୍ୟକୀୟ ସେବାକୁ ଅନୁମତି ମିଳିବ । ଘରକୁ ଘର ବୁଲି ସର୍ଭେ କରାଯିବ । ସଂକ୍ରମିତଙ୍କ ସଂସ୍ପର୍ଶରେ ଆସିଥିବା ୮୦ ପ୍ରତିଶତ ଲୋକଙ୍କୁ ୭୨ ଘଣ୍ଟା ମଧ୍ୟରେ ଚିହ୍ନଟ କରାଯାଇ କ୍ୱାରେଣ୍ଟାଇନ୍ କରାଯିବ । ମାସ୍କ ପରିଧାନ, ସାମାଜିକ ଦୂରତା ରକ୍ଷା ଉପରେ ନଜର ରଖିବ ପ୍ରଶାସନ ।

ସାମାଜିକ, ଧାର୍ମିକ, ରାଜନୀତିକ, ଖେଳ, କ୍ରୀଡ଼ା ଆଦି କାର୍ଯ୍ୟକ୍ରମ ସର୍ବାଧିକ ୨୦୦ ଲୋକଙ୍କୁ ନେଇ ହେବ । ବନ୍ଦ କୋଠରୀ ହେଉଥିବା କାର୍ଯ୍ୟକ୍ରମରେ ହଲ୍ କାପାସିଟିର ୫୦ ପ୍ରତିଶତ ଲୋକ ଭାଗ ନେଇପାରିବେ । ସଭାରେ ସାମାଜିକ ଦୂରତା ସହ ମାସ୍କ ପିନ୍ଧିବାକୁ ପଡ଼ିବ । ଏଥିସହ ହ୍ୟାଣ୍ଡୱାସ କିମ୍ବା ସାନିଟାଇଜରର ବ୍ୟବସ୍ଥା ରହିବ । କୌଣସି ଉତ୍ସବ କିମ୍ବା ସମାବେଶ ଲାଗି ଜିଲ୍ଲାପାଳ କିମ୍ବା ମହାନଗର ନିଗମରୁ ଅନୁମତି ନେବାକୁ ପଡ଼ିବ । ପିପିଲିରେ ହେଉଥିବା ଉପନିର୍ବାଚନ ଲାଗି ସଭା, ସମିତି ଓ ସମାବେ ଲାଗି ନିର୍ବାଚନ ଦାୟିତ୍ୱରେ ଥିବା ଅଧିକାରୀ ଅନୁମତି ଦେବେ । ଏଥିରେ ସର୍ବାଧିକ ୨୦୦ ଲୋକ କୋଭିଡ୍ ନିୟମ ମାନି ସାମିଲ୍ ହୋଇପାରିବେ ।

ଉତ୍କଳ ଦିବସ, ଗୁଡ୍ ଫ୍ରାଇଡେ, ରାମ ନବମୀ, ମହା ବିଷୁବ ସଂକ୍ରାନ୍ତି, ଝାମୁ ଯାତ୍ରା ଆଦି ଧାର୍ମିକ କାର୍ଯ୍ୟକ୍ରମରେ କୋଭିଡ୍ କଟକଣାକୁ ପାଳନ କରାଯିବ । ରାଜ୍ୟସାରା ଧାର୍ମିକ କାର୍ଯ୍ୟକ୍ରମରେ ଏକତ୍ରୀକରଣ ଉପରେ ରୋକ୍ ଲଗାଇଛନ୍ତି ଏସଆରସି । ଜିଲ୍ଲାପାଳ ଓ ମହାନଗର କମିଶନର ଧାର୍ମିକ ସ୍ଥଳରେ ଶ୍ରଦ୍ଧାଳୁଙ୍କ ପ୍ରବେଶ ନେଇ ପ୍ରତିବନ୍ଧକ ଲଗାଇ ପାରିବେ । ଉତ୍କଳ ଦିବସରେ ରାଜ୍ୟବ୍ୟାପୀ ଏକାଧିକ ଲୋକଙ୍କୁ ନେଇ କୌଣସି କାର୍ଯ୍ୟକ୍ରମ ହୋଇପାରିବ ନାହିଁ । ସର୍ବାଧିକ ୨୦୦ ଲୋକଙ୍କୁ ନେଇ ସରକାରୀ ସ୍ତରରେ ଉତ୍କଳ ଦିବସ ପାଳନ କରାଯିବ । ବିବାହ ଉତ୍ସବରେ ସର୍ବାଧିକ ୨୦୦ ଓ ଅନ୍ତ୍ୟେଷ୍ଟି କ୍ରିୟାରେ ସର୍ବାଧିକ ୫୦ ଜଣ ସାମିଲ୍ ହୋଇପାରିବେ ।