spot_img
Home Blog Page 5829

ସିଙ୍ଗଲ ଡୋଜ୍ ଭ୍ୟାକ୍ସିନ୍ ‘ସ୍ପୁଟନିକ୍ ଲାଇଟ୍’କୁ ଋଷର ଅନୁମତି, ୮୦% ପ୍ରଭାବୀ ଦାବି

ନୂଆଦିଲ୍ଲୀ: ଋଷ କୋଭିଡ୍ ଟିକା ସ୍ପୁଟନିକ ଭିର ନୂଆ ଭର୍ସନ୍ ଲଞ୍ଚ କରିଛି । ଏହି ଟିକାର ନାମ ‘ସ୍ପୁଟନିକ ଲାଇଟ୍’ ରଖାଯାଇଛି । ‘ସ୍ପୁଟନିକ ଲାଇଟ୍’ ୮୦ ପ୍ରତିଶତ ପ୍ରଭାବୀ ସାବ୍ୟସ୍ତ ହୋଇଥିବା ଦାବି କରିଛି ଋଷ । ଏହି ଭ୍ୟାକ୍ସିନର ଗୋଟିଏ ମାତ୍ର ଡୋଜ୍ କୋଭିଡରୁ ସୁରକ୍ଷା ଦେବାରେ ସକ୍ଷମ ବୋଲି ଋଷ ପକ୍ଷରୁ କୁହାଯାଇଛି । ଏହି ଭ୍ୟାକ୍ସିନ୍ ପାଇଁ ଅର୍ଥ ଦେଉଥିବା ଆରଡିଆଇଏଫ୍ କହିଛି, ୨ଟି ଡୋଜ୍ ବିଶିଷ୍ଟ ସ୍ପୁଟନିକ୍ ଭି ତୁଳନାରେ ସିଙ୍ଗଲ୍ ଡୋଜ୍ ବିଶିଷ୍ଟ ‘ସ୍ପୁଟନିକ ଲାଇଟ୍’ ଅଧିକ ପ୍ରଭାବୀ ଅଟେ । ସ୍ପୁଟନିକ ଭି ୯୧.୬ ପ୍ରତିଶତ ପ୍ରଭାବୀ ହୋଇଥିବା ବେଳେ ‘ସ୍ପୁଟନିକ ଲାଇଟ୍’ ୭୯.୪ ପ୍ରତିଶତ ପ୍ରଭାବୀ ।

 Russia Approves Single Dose Sputnik Light Covid-19 Vaccine

୨୦୨୦ ଡିସେମ୍ବର ୫ରୁ ୨୦୨୧ ଏପ୍ରିଲ୍ ୧୫ ଯାଏ ଋଷରେ ବ୍ୟାପକ ଟିକାକରଣ କରାଯାଇଥିଲା । ଟିକାକରଣର ୨୮ ଦିନ ପରେ ତଥ୍ୟ ନିଆଯାଇଥିଲା । ସୂଚନାଯୋଗ୍ୟ, ୬୦ଟି ଦେଶ ଋଷର ଭ୍ୟାକ୍ସିନ୍ ପ୍ରୟୋଗ ପାଇଁ ଅନୁମତି ଦେଇଛନ୍ତି । କିନ୍ତୁ ଏବେ ଯାଏ ୟୁରୋପିୟନ୍ ମେଡିସିନ୍ ଏଜେନ୍ସି ଏବଂ ୟୁନାଇଟେଡ୍ ଷ୍ଟେଟ୍ସ ଫୁ଼ଡ୍ ଆଣ୍ଡ ଡ୍ରଗ୍ସ ଆଡମିନିଷ୍ଟ୍ରେସନ୍ ମଞ୍ଜୁରୀ ଦେଇନାହିଁ ।

କିଛି ପଶ୍ଚିମ ଦେଶ ମଧ୍ୟ ସ୍ପୁଟନିକ ଭ୍ୟାକ୍ସିନକୁ ନେଇ ଚେତାବନୀ ଦେଇଛନ୍ତି । ସୋଭିଏତ ଯୁଗର ଏକ ଉପଗ୍ରହ ନାମରେ ପ୍ରସ୍ତୁତ ଏହି ଭ୍ୟାକ୍ସିନ୍ ଋଷ ନିଜ ରୁଚିକୁ ଆଗକୁ ବଢ଼ାଇବା ଲାଗି ନରମ ଶକ୍ତି ଭାବେ ଉପଯୋଗ କରିପାରେ ବୋଲି କୁହାଯାଉଛି । ଏହାକୁ ବଡ଼ ଆକାରରେ କ୍ଲିନିକାଲ୍ ପରୀକ୍ଷଣ ପୂର୍ବରୁ ଗତ ଅଗଷ୍ଟରେ ଟିକାକରଣରେ ସାମିଲ୍ କରାଯାଇଥିଲା ।

ରାଜ୍ୟରୁ ସୁସ୍ଥ ହେଲେ ରେକର୍ଡ ସଂଖ୍ୟକ ୬ ହଜାର ୮୫୪ ଜଣ ସଂକ୍ରମିତ

ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣ ଦୈନିକ ରେକର୍ଡ ଭାଙ୍ଗିଥିବା ବେଳେ ଦୈନିକ ସୁସ୍ଥତା ବି ରେକର୍ଡ କରିଛି । ଗତ ୨୪ ଘଣ୍ଟାରେ ରାଜ୍ୟରେ ୧୦ ହଜାର ୫୨୧ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ୬ ହଜାର ୫୮୪ ଜଣ କରୋନାକୁ ମାତ୍ ଦେଇ ଆରୋଗ୍ୟ ହୋଇଛନ୍ତି । ସଂକ୍ରମଣ ଭଳି ଖୋର୍ଦ୍ଧା ଜିଲ୍ଲାରେ ସର୍ବାଧିକ ରହିଛି ସୁସ୍ଥତା ହାର । ଏଥିସହ ରାଜ୍ୟର ମୋଟ ୪ ଲକ୍ଷ ୨୩ ହଜାର ୨୫୭ ଜଣ କରୋନାକୁ ହରାଇଛନ୍ତି ।

ଖୋର୍ଦ୍ଧାରୁ ସର୍ବାଧିକ ୧ ହଜାର ୯୧ ଜଣ ସୁସ୍ଥ ହୋଇଥିବା ବେଳେ ଝାରସୁଗୁଡ଼ାରୁ ୪୨୧ ଜଣ, ନବରଙ୍ଗପୁରରୁ ୪୧୫, ସୁନ୍ଦରଗଡ଼ରୁ ୩୭୦, ବଲାଙ୍ଗିରରୁ ୩୫୮, ଅନୁଗୁଳରୁ ୩୪୮, ବରଗଡ଼ରୁ ୩୦୮, ଯାଜପୁରରୁ ୩୦୧, କେନ୍ଦୁଝରରୁ ୩ ଶହ, ମୟୂରଭଞ୍ଜରୁ ୨୮୯, ନୂଆପଡ଼ାରୁ ୨୮୨, ଗଞ୍ଜାମ ଏବଂ କଳାହାଣ୍ଡିରୁ ୨୭୪ ଜଣ ଲେଖାଏଁ, ପୁରୀରୁ ୨୫୯, କଟକରୁ ୧୯୯, ରାୟଗଡ଼ାରୁ ୧୮୭, ସମ୍ବଲପୁରରୁ ୧୬୩, ଜଗତସିଂହପୁରରୁ ୧୧୨ ଜଣ ଆରୋଗ୍ୟ ଲାଭ କରିଛନ୍ତି ।

ସେହିଭଳି ଗଜପତିରୁ ୧୦୯, ନୟାଗଡ଼ରୁ ୧୦୪, ବାଲେଶ୍ୱରରୁ ୭୯, ସୋନପୁରରୁ ୭୮, କେନ୍ଦ୍ରାପଡ଼ାରୁ ୭୭, ଭଦ୍ରକରୁ ୬୫, କୋରାପୁଟରୁ ୫୫, କନ୍ଧମାଳରୁ ୩୮, ମାଲକାନଗିରିରୁ ୩୨, ଦେବଗଡ଼ରୁ ୨୮, ବୌଦ୍ଧରୁ ୧୫, ଢେଙ୍କାନାଳରୁ ୧୧ ଏବଂ ଷ୍ଟେଟ ପୁଲରୁ ୨୧୨ ଜଣ କରୋନା ସଂକ୍ରମିତ ଆରୋଗ୍ୟ ଲାଭ କରିଛନ୍ତି ।

କୋଭିଡ୍ ଟିକା ଉପରୁ GST ହଟାଇବା ପାଇଁ କେନ୍ଦ୍ର ଅର୍ଥମନ୍ତ୍ରୀଙ୍କୁ ନବୀନଙ୍କ ଚିଠି

ଭୁବନେଶ୍ୱର: ଦେଶ କରୋନା ସହ ଲଢ଼ୁଥିବା ବେଳେ ଟିକାକରଣ ଜାରି ରହିଛି । ୪୫ ବର୍ଷରୁ ଊର୍ଦ୍ଧ୍ୱ ବୟସ୍କଙ୍କ ଲାଗି କେନ୍ଦ୍ର ମାଗଣା ଟିକା ଯୋଗାଇ ଦେଉଛି । ରାଜ୍ୟ ସରକାର ୧୮ରୁ ୪୪ ବର୍ଷ ବୟସ୍କଙ୍କ କୋଭିଡ୍ ଟିକାକରଣ ମାଗଣାରେ କରିବେ ବୋଲି ଘୋଷଣା କରିଛନ୍ତି । ୧୮ରୁ ୪୪ ବର୍ଷ ବୟସ୍କଙ୍କ ଲାଗି ରାଜ୍ୟ ସରକାର ନିଜ ପାଣ୍ଠିରୁ ଟିକା କିଣୁଛନ୍ତି । ଟିକା ଉପରେ ଜିଏସଟି ଲାଗିଥିବାରୁ ଭ୍ୟାକ୍ସିନ୍ ଦର ରାଜ୍ୟ ପାଇଁ ଅଧିକ ହେଉଛି ।

Naveen Writes Nirmala To Exemption Of GST On Purchase Of Covid19 Vaccine

ଟିକା କ୍ରୟ ଉପରେ ସମ୍ପୂର୍ଣ୍ଣ ଭାବେ ଜିଏସଟି ହ୍ରାସ୍ କରିବାକୁ ଦାବି କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭ୍ୟାକ୍ସିନ୍ ଉପରୁ ଜିଏସଟି ସମ୍ପୂର୍ଣ୍ଣ ଛାଡ଼ କଲେ ରାଜ୍ୟ ଉପକୃତ ହେବ । ସମସ୍ତଙ୍କୁ ଟିକାକରଣରେ ଏହି ପଦକ୍ଷେପ ସହାୟକ ହେବ ବୋଲି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଚିଠି ଲେଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଲମ୍ବା କୋଭିଡ୍ ଯୁଦ୍ଧ ପାଇଁ ସମସ୍ତଙ୍କ ସହଯୋଗ ଦରକାର । ରାଜ୍ୟମାନଙ୍କୁ ସହଯୋଗ କଲେ ଦେଶ ଏକାଠି କରୋନା ବିରୋଧୀ ଯୁଦ୍ଧ ଲଢ଼ି ପାରିବ । ଅର୍ଥାଭାବ କେବଳ ଗୋଟିଏ ରାଜ୍ୟକୁ ପ୍ରଭାବିତ କରିବ ନାହିଁ ବରଂ ଦେଶ ଗତିକୁ ଲେଉଟାଣି ମୋଡ଼କୁ ନେଇଯିବ ବୋଲି ନବୀନ ଲେଖିଛନ୍ତି ।

ଏଥିସହ ପେଟ୍ରୋଲ, ଡିଜେଲ୍, ମଦ ଇତ୍ୟାଦି ଉପରୁ ଆଦାୟ ବିଭିନ୍ନ ସେସ୍ ଏବଂ ସରଚାର୍ଜେସକୁ କେନ୍ଦ୍ର ସରକାର ପାଉଛନ୍ତି । ଏଭଳି ଘଡ଼ିସନ୍ଧି ମୁହୂର୍ତ୍ତରେ ସେହି ଅର୍ଥକୁ ରାଜ୍ୟମାନଙ୍କ ସହ କେନ୍ଦ୍ର ସରକାର ସମାନ ଭାବେ ବିତରଣ ପାଇଁ ନବୀନ ଅନୁରୋଧ କରିଛନ୍ତି । ଏହାଦ୍ୱାରା ମହାମାରୀ ବିରୋଧରେ ଟିକାକରଣ, ମାଗଣା ଚିକିତ୍ସା ଏବଂ ଅନ୍ୟ ପଦକ୍ଷେପ ନେବା ସମ୍ଭବ ହୋଇପାରିବ ବୋଲି ଚିଠିରେ ଉଲ୍ଲେଖ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ରାଜଧାନୀ ଉପକଣ୍ଠ ଅନ୍ଧାରୁଆରେ ଟିକା ଉତ୍ପାଦନ କେନ୍ଦ୍ରର ନିର୍ମାଣ କାମ ଆରମ୍ଭ

ଭୁବନେଶ୍ୱର: ଭୁବନେଶ୍ୱରରେ ଉତ୍ପାଦନ ହେବ ଭ୍ୟାକ୍ସିନ୍ । କରୋନାରୁ ନେଇ ମାଲେରିଆ ୧୦ ପ୍ରକାର ଟିକା ଉତ୍ପାଦନ କରାଯିବ । ଭାରତ ବାୟୋଟେକ୍ ରାଜଧାନୀ ଉପକଣ୍ଠ ଅନ୍ଧାରୁଆରେ ଭ୍ୟାକ୍ସିନ୍ ଉତ୍ପାଦନ କରିବ । ଆଜିଠୁ ଟିକା ଉତ୍ପାଦନ କେନ୍ଦ୍ରର ନିର୍ମାଣ କାର୍ଯ୍ୟ ଆରମ୍ଭ ହୋଇଛି । ତୁରନ୍ତ ନିର୍ମାଣ କାର୍ଯ୍ୟ ସାରିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ୨୦୨୨ ଜୁନ୍ ସୁଦ୍ଧା ଉତ୍ପାଦନ ଆରମ୍ଭ ପାଇଁ ଲକ୍ଷ ରଖାଯାଇଛି । ଏଠାରେ କୋଭିଡ ଓ ମାଲେରିଆ ସହ ୧୦ଟି ରୋଗର ଟିକା ପ୍ରସ୍ତୁତ କରାଯିବ ।

Construction of Vaccine Production Unit Started at Andharua

ଏନେଇ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ଏକ ରାଜ୍ୟସ୍ତରୀୟ ଭର୍ଚୁଆଲ୍ ବୈଠକରେ ଆଲୋଚନା କରିଛନ୍ତି । ଅନ୍ଧାରୁଆରେ ଟିକା ଉତ୍ପାଦନ କେନ୍ଦ୍ରର ଅଗ୍ରଗତି ସମୀକ୍ଷା କରିବା ସହ ୨୦୨୨ ଜୁନ୍ ସୁଦ୍ଧା କୋଭାକ୍ସିନ୍ ଉତ୍ପାଦନ ପାଇଁ ଲକ୍ଷ୍ୟ ରଖାଯାଇଛି । ଭାରତ ବାୟୋଟେକ୍ ଅନ୍ଧାରୁଆରେ କରୋନା ସହ ଡାଇରିଆ, ମାଲେରିଆ, ଜାପାନିଜ୍ ଏନସେଫାଲାଇଟିସ୍, ରେବିସ୍, ଇନଫ୍ଲୁଏଞ୍ଜା ଭଳି ୧୦ ପ୍ରକାରର ଟିକା ଉତ୍ପାଦନ କରିବ ।

କରୋନା କଟକଣା ମାନିବାକୁ ସମସ୍ତଙ୍କୁ ନିବେଦନ କଲେ ଅତିରିକ୍ତ ମୁଖ୍ୟ ଶାସନ ସଚିବ

ଭୁବନେଶ୍ୱର: ଦେଶ ଓ ରାଜ୍ୟରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଛି । ଏଭଳି ସ୍ଥଳେ ସରକାର ଲକଡାଉନ୍ କେବେ ଚାହୁଁନଥିଲେ । ସ୍ଥିତିକୁ ଦେଖି ବାଧ୍ୟ ହୋଇ ଲକଡାଉନ୍ କଲୁ ବୋଲି କହିଛନ୍ତି ଅତିରିକ୍ତ ମୁଖ୍ୟ ଶାସନ ସଚିବ ସ୍ୱାସ୍ଥ୍ୟ ବିଭାଗ ପ୍ରଦୀପ୍ତ ମହାପାତ୍ର । ପ୍ରଥମେ ସୀମାବର୍ତ୍ତୀ ଜିଲ୍ଲାରେ ନାଇଟ୍ କର୍ଫ୍ୟୁ, ସପ୍ତାହନ୍ତ ସଟଡାଉନ୍ କରିଥିଲୁ । ସ୍ଥିତି ନ ସୁଧୁରିବାରୁ ସରକାର ଲକଡାଉନ୍ କରିଛନ୍ତି । ସରକାରଙ୍କ କୋଭିଡ୍ କଟକଣାକୁ ମାନନ୍ତୁ । ସକାଳେ ବଜାର ପାଇଁ ଦିଆଯାଇଥିବା ସମୟର ଅପବ୍ୟବହାର କରନ୍ତୁ ନାହିଁ । ସମସ୍ତେ କୋଭିଡ୍ ନିୟମ ପାଳନ କରନ୍ତୁ ।

ACS Requested All To Follow Covid Guidelines

ସମସ୍ତେ ସଚେତନ ହୁଅନ୍ତୁ, କରୋନାର ତୃତୀୟ ପ୍ରବାହ ଆସୁଛି । ଲକଡାଉନ୍ ସମୟରେ ସମସ୍ତେ କରୋନା କଟକଣା ମାନନ୍ତୁ । ନ ମାନିଲେ ସ୍ଥିତି ବିଗିଡ଼ିବ ବୋଲି କହିଛନ୍ତି ଅତିରିକ୍ତ ମୁଖ୍ୟ ଶାସନ ସଚିବ । ଏଥିସହ ରାଜ୍ୟରେ ଟିକାକରଣ ନେଇ ସେ ସୂଚନା ଦେଇଛନ୍ତି । ରାଜ୍ୟରେ ଏଯାବତ୍ ୯୭ ପ୍ରତିଶତ ସ୍ୱାସ୍ଥ୍ୟକର୍ମୀ ପ୍ରଥମ ଡୋଜ୍ ଟିକା ନେଇଥିବା ବେଳେ ୮୭ ପ୍ରତିଶତ ଲୋକ ଦ୍ୱିତୀୟ ଡୋଜ୍ ଟିକା ନେଇଛନ୍ତି । ସେହିଭଳି ୯୭ ପ୍ରତିଶତ ସମ୍ମୁଖ ଯୋଦ୍ଧା ପ୍ରଥମ ଡୋଜ୍ ଟିକା ନେଇଥିବା ବେଳେ ୮୫ ପ୍ରତିଶତ ଦ୍ୱିତୀୟ ଡୋଜ୍ ଟିକା ନେଇଛନ୍ତି ।

ଆକଳନ ଅନୁସାରେ ରାଜ୍ୟରେ ୪୫ ବର୍ଷରୁ ଅଧିକ ୧ କୋଟି ୧୬ ଲକ୍ଷ ଲୋକ ରହିଛନ୍ତି । ସେଥିରୁ ୪୩ ଲକ୍ଷ ୫୫ ହଜାର (୩୭ ପ୍ରତିଶତ) ଲୋକଙ୍କୁ କୋଭିଡ୍ ଟିକା ଦିଆଯାଇଛି । ସେଥିରୁ ୨୩ ଲକ୍ଷ ୪୩ ହଜାର ୯୦୭ ଜଣ ଦ୍ୱିତୀୟ ଡୋଜ୍ ଟିକା ନେବା ପାଇଁ ଦିନ ହୋଇ ସାରିଲାଣି । ଏବେ ସୁଦ୍ଧା ପ୍ରାୟ ୬ ଲକ୍ଷ ଲୋକଙ୍କୁ ଦ୍ୱିତୀୟ ଡୋଜ୍ ଟିକା ଦିଆଯାଇଛି । କେବଳ ଭୁବନେଶ୍ୱରରେ କୋଭାକ୍ସିନ୍ ଦିଆଯାଉଥିବା ବେଳେ ଖୋର୍ଦ୍ଧା ଜିଲ୍ଲା ସହ ଜିଲ୍ଲାରେ କୋଭିସିଲ୍ଡ ଟିକା ଦିଆଯାଉଛି ।

ଏହା ପୂର୍ବରୁ ଘରୋଇ ହସ୍ପିଟାଲ୍ ଟିକା ଦେଉଥିଲେ । ଏଥିପାଇଁ ସେମାନେ ୧୫୦ ଟଙ୍କା ନେଉଥିଲେ । ଯେଉଁମାନେ ଏପ୍ରିଲ୍ ୩୦ ପୂର୍ବରୁ ଘରୋଇ ହସ୍ପିଟାଲରେ ଟିକା ନେଇଥିଲେ ସେମାନେ ଦ୍ୱିତୀୟ ଡୋଜ୍ ଟିକା ସରକାରୀ ହସ୍ପିଟାଲରେ ନେଇପାରିବେ । ସେମାନଙ୍କୁ ମାଗଣାରେ ଦ୍ୱିତୀୟ ଡୋଜ୍ କୋଭିଡ୍ ଟିକା ଦିଆଯିବ । କୋଭାକ୍ସିନ୍ ନିଅଣ୍ଟ ନାହିଁ, କୋଭିସିଲ୍ଡ ନିଅଣ୍ଟ ରହିଛି । କୋଭିସିଲ୍ଡ ଯୋଗାଇ ଦେବା କେନ୍ଦ୍ର ସରକାରଙ୍କ ଦାୟିତ୍ୱ । ଟିକା ଆସିଲେ ପ୍ରଥମେ ଦ୍ୱିତୀୟ ଡୋଜ୍ ଲୋକଙ୍କୁ ଦିଆଯିବ । ତା’ଛଡ଼ା ସ୍ୱାସ୍ଥ୍ୟକର୍ମୀ ଓ ସମ୍ମୁଖ ଯୋଦ୍ଧା ଯେଉଁମାନେ ପ୍ରଥମ ଡୋଜ୍ ଟିକା ନେଇନାହାଁନ୍ତି ସେମାନଙ୍କୁ ଦିଆଯିବ ।

କୋଭାକ୍ସିନ୍ ପ୍ରଥମ ଡୋଜ୍ ନେବାର ୨୮ରୁ ୪୧ ଦିନ ମଧ୍ୟରେ ଦ୍ୱିତୀୟ ଡୋଜ୍ ନେବାକୁ ପଡ଼ିବ । ସେହିଭଳି କୋଭିସିଲ୍ଡ ପ୍ରଥମ ଡୋଜର ୬ରୁ ୮ ସପ୍ତାହ ଅର୍ଥାତ୍ ୪୨ ଦିନ ମଧ୍ୟରେ ଦ୍ୱିତୀୟ ଡୋଜ୍ ନେବାକୁ ପଡ଼ିବ । ୧୮ରୁ ୪୪ ବର୍ଷ ମଧ୍ୟରେ ୧ କୋଟି ୯୩ ଲକ୍ଷ ଲୋକ ରହିଛନ୍ତି । ସେଥିରୁ ୧୦ ଲକ୍ଷ ୩୪ ହଜାର ଭୁବନେଶ୍ୱର ଅଞ୍ଚଳର, ସେମାନଙ୍କୁ କୋଭାକ୍ସିନ୍ ଦିଆଯିବ । ବାକି ସମସ୍ତ ସ୍ଥାନରେ କୋଭିସିଲ୍ଡ ଦିଆଯିବ । ଏଥିପାଇଁ ସରକାର କୋଭିସିଲ୍ଡ, କୋଭାକ୍ସିନ୍ ପାଇଁ ଅର୍ଡର ଦେଇଛନ୍ତି ।

ମେ ମାସରେ ୪୦ ଲକ୍ଷ, ତା ପର ମାସରେ ୬୦ ଲକ୍ଷ କୋଭିସିଲ୍ଡ ଟିକା ଦେବା ପାଇଁ ଆମେ ଲେଖିଥିଲୁ । ସେମାନେ ୪ ଲକ୍ଷ ୭୮ ହଜାର କୋଭିସିଲ୍ଡ ଡୋଜ୍ ଦେବା ପାଇଁ ସେରମ ପ୍ରତିଶ୍ରୁତି ଦେଇଛି । ଏଥିପାଇଁ ଆମେ ୧୫ କୋଟି ଟଙ୍କା ଅଗ୍ରମୀ ଦେଇଛୁ । ଏପରିକି ୪୦ କୋଟିର ଟଙ୍କା ଚାହିଁଲେ ଆମେ ଦେଇ ଦେବୁ । ଟିକା ଆସିଲେ ଦିଆଯିବ । ପ୍ରଥମେ ସହରାଞ୍ଚଳକୁ ପ୍ରାଥମିକତା ଦିଆଯିବ । ଟିକା ଆସିଲେ, ସ୍ଲଟ୍ ଦିଆଯିବ । ଏପରିକି ଘରୋଇ କେନ୍ଦ୍ରରେ ମାଗଣା ଟିକା ଦିଆଯିବା ନେଇ ସରକାର ପଦକ୍ଷେପ ନେଇଛନ୍ତି । ଏଥିପାଇଁ କେବଳ ଶହେ ଟଙ୍କା ପରିଚାଳନା ଖର୍ଚ୍ଚ ଦେବାକୁ ପଡ଼ିବ ବୋଲି କହିଛନ୍ତି ଅତିରିକ୍ତ ମୁଖ୍ୟ ଶାସନ ସଚିବ ।

କୋଭିଡ୍ କଟକଣା ଭିତରେ ଶ୍ରୀମନ୍ଦିର ବାହାରେ ହେବ ଚନ୍ଦନଯାତ୍ରା

ପୁରୀ: ଚଳିତବର୍ଷ କୋଭିଡ୍ କଟକଣା ଭିତରେ ଶ୍ରୀମନ୍ଦିର ବାହାରେ ହେବ ଚନ୍ଦନଯାତ୍ରା । ସର୍ବନିମ୍ନ ଲୋକଙ୍କୁ ନେଇ ଚନ୍ଦନଯାତ୍ରା ଅନୁଷ୍ଠିତ ହେବ । ଏ ନେଇ ଆସନ୍ତା ୧୧ ତାରିଖରେ ବସିବ ଛତିଶା ନିଯୋଗ ବୈଠକ । ଏହା ପୂର୍ବରୁ ଜିଲ୍ଲାପାଳ ବୈଠକ କରି ଚନ୍ଦନଯାତ୍ରାରେ ସାମିଲ ହେବାକୁ ଥିବା ସର୍ବନିମ୍ନ ଲୋକଙ୍କ ତାଲିକା ପ୍ରସ୍ତୁତ ହେବ । ଗତବର୍ଷ କରୋନା ମହାମାରୀ କାରଣରୁ ବାହାର ଚନ୍ଦନଯାତ୍ରା ଶ୍ରୀମନ୍ଦିର ଭିତରେ ଅନୁଷ୍ଠିତ ହୋଇଥିଲା ।

Chandana Jatra Of Lord Jagannath To Be Held Adhering Corona Restriction Puri

ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ କୁମାରଙ୍କ ଅଧ୍ୟକ୍ଷତାରେ ହୋଇଥିବା ଭର୍ଚୁଆଲ ବୈଠକରେ  ଏହି ନିଷ୍ପତ୍ତି ହୋଇଛି । ସେବାୟତଙ୍କ ଟିକାକରଣ ପାଇଁ ଘରକୁ ଘର ବୁଲି ସର୍ଭେ କରାଯିବ । ଆବଶ୍ୟକ ପଡ଼ିଲେ ଆଉ ଏକ ଟିକାକରଣ କେନ୍ଦ୍ର ଖୋଲାଯିବ । କୋଭିଡ୍ ପରିଚାଳନା ନେଇ ଗଠିତ ୭ ଜଣିଆ ଟିମ୍ ଓ ଅଧିକାରୀ ମାନଙ୍କ ସହ ଆଲୋଚନା କରାଯାଇଛି ।

ଦେଶରେ ତାଣ୍ଡବ ରଚୁଛି କରୋନାର ଦ୍ୱିତୀୟ ପ୍ରବାହ, ଡରାଇଲାଣି ତୃତୀୟ ଲହର…

ନୂଆଦିଲ୍ଲୀ: ଦେଶରେ କରୋନାର ଦ୍ୱିତୀୟ ଲହର ଆତଙ୍କ ଖେଳାଇଛି । ପ୍ରଶ୍ନ ଉଠୁଛି କେନ୍ଦ୍ର ସରକାର କଣ ଦେଶରେ ଲକଡାଉନ୍ ଲଗାଇବାକୁ ବିଚାର କରୁଛନ୍ତି ? କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଏଭଳି ସମ୍ଭାବନାକୁ ଏଡ଼ାଇ ଯାଇ ନାହିଁ । ନୀତି ଆୟୋଗ ସଦସ୍ୟ ଡକ୍ଟର ବିକେ ପାଲ୍ କହିଛନ୍ତି, ଜାତୀୟ ଲକଡାଉନ୍ ବିକଳ୍ପ ନେଇ ଆଲୋଚନା ଚାଲିଛି ।

ଦେଶରେ ଦୈନିକ ୪ ଲକ୍ଷ ସଂକ୍ରମଣ ସହ ପାଖାପାଖି ୪ ହଜାର ମୃତ୍ୟୁ ହେଉଥିବା ବେଳେ କୋଭିଡ୍-୧୯ ଟାସ୍କ ଫୋର୍ସ ମୁଖ୍ୟଙ୍କ ଏଭଳି ବୟାନ ବେଶ୍ ଗୁରୁତ୍ୱବହନ କରୁଛି । ସେ କହିଛନ୍ତି, ସରକାର ଏବେର ସ୍ଥିତି ଦେଖି ନିର୍ଦ୍ଦେଶନାମା ଜାରି କରିଛନ୍ତି । କଡ଼ା ପ୍ରତିବନ୍ଧକ ଆବଶ୍ୟକତା ହେଉଛି । ଆହୁରି କଡ଼ା ପ୍ରତିବନ୍ଧକର ଆବଶ୍ୟକତାର ବିକଳ୍ପ ନେଇ ଆଲୋଚନା କରାଯାଉଛି । ଯେଉଁ ନିଷ୍ପତ୍ତି ନିଆଯିବା ଆବଶ୍ୟକ ହେବ ନିଆଯିବ ।

ନୀତି ଆୟୋଗ ସଦସ୍ୟ କହିଛନ୍ତି, ସ୍ଥାନୀୟ ସ୍ଥିତି ଆଧାରରେ ରାଜ୍ୟ ସରକାର ୧୦ ପ୍ରତିଶତ ଅଧିକ ସଂକ୍ରମଣ ହାର ଦେଖି ଜିଲ୍ଲାରେ ପ୍ରତିବନ୍ଧକ ଜାରି କରିପାରିବେ । ଅନ୍ୟପଟେ ମହାରାଷ୍ଟ୍ର, କେରଳ, ରାଜସ୍ଥାନ, କର୍ଣ୍ଣାଟକ, ଦିଲ୍ଲୀ, ଉତ୍ତରପ୍ରଦେଶ, ମଧ୍ୟପ୍ରଦେଶ, ଭଳି ରାଜ୍ୟରେ ଲକଡାଉନ୍, କର୍ଫ୍ୟୁ, ନାଇଟ୍ କର୍ଫ୍ୟୁ, ୱିକେଣ୍ଡ ସଟଡାଉନ୍ ସତ୍ତ୍ୱେ କରୋନା ମାମଲା ଥମୁନି । ଏସବୁ ଭିତରେ ଦେଶରେ ସମ୍ପୂର୍ଣ୍ଣ ଲକଡାଉନ୍ ନେଇ ଚର୍ଚ୍ଚା ହେଉଛି ।

ଦେଶରେ କରୋନାର ଦ୍ୱିତୀୟ ପ୍ରବାହର ପ୍ରଭାବକୁ ଦେଖି ବିଗତ କିଛିଦିନ ହେଲା ଲକଡାଉନ୍ ଦାବି ହେଉଛି । ରାଜନେତାଙ୍କ ସହ ବିଶେଷଜ୍ଞ ମଧ୍ୟ ଦେଶବ୍ୟାପୀ ଲକଡାଉନ୍ ଲଗାଇବା ପାଇଁ ସ୍ୱର ଉଠାଇଲେଣି । କଂଗ୍ରେସ ସାଂସଦ ରାହୁଲ ଗାନ୍ଧୀ ମଧ୍ୟ ସମ୍ପୂର୍ଣ୍ଣ ଲକଡାଉନ୍ ପାଇଁ ଦାବି ଉଠାଇଛନ୍ତି ।

Corona Second Wave Full National Lockdown Centre

ଆମେରିକାର ବରିଷ୍ଠ ସ୍ୱାସ୍ଥ୍ୟ ବିଶେଷଜ୍ଞ ଡକ୍ଟର ଏଣ୍ଟନି ଫାଉଚି ମଧ୍ୟ ଭାରତରେ ଲକଡାଉନ୍ ସପକ୍ଷରେ ଅଛନ୍ତି । ଲକଡାଉନ୍ ହିଁ ସଂକ୍ରମଣ ଗତିକୁ ରୋକିବ ବୋଲି ସେ କହିଛନ୍ତି । ଗୁରୁବାର ଦେଶରେ କରୋନାର ରେକର୍ଡ ସଂଖ୍ୟକ ମାମଲା ଚିହ୍ନଟ ହୋଇଛି । ଦିନକରେ ୪.୧୨ ଲକ୍ଷ ସଂକ୍ରମଣ ମାମଲା ଆସିଥିବା ବେଳେ ୪ ହଜାର ଜଣଙ୍କ ମୃତ୍ୟୁ ହୋଇଛି । ଏଥିସହ ଦେଶରେ ସକ୍ରିୟ ସଂକ୍ରମଣ ମାମଲା ୩ ଲକ୍ଷ ପାର୍ କରିଛି । ମହାରାଷ୍ଟ୍ର, କର୍ଣ୍ଣାଟକ, କେରଳ, ଦିଲ୍ଲୀ, ଉତ୍ତରପ୍ରଦେଶ, ତାମିଲନାଡ଼ୁ ଆଦି ରାଜ୍ୟରେ ସବୁଠୁ ଅଧିକ ମାମଲା ଆସୁଛି । ଦୁନିଆରେ ସବୁଠୁ ଅଧିକ କରୋନା ସଂକ୍ରମିତ ମାମଲା ଭାରତରେ ଚିହ୍ନଟ ହେଉଛି ।

ଗୋଟିଏ ପଟେ ଦେଶ କରୋନାର ଦ୍ୱିତୀୟ ପ୍ରବାହ ସହ ଯୁଝୁଥିବା ବେଳେ ବିଶେଷଜ୍ଞ ତୃତୀୟ ଲହରର ଚେତାବନୀ ଦେଇଛନ୍ତି । ଭାରତ ସରକାରଙ୍କ ପ୍ରମୁଖ ବୈଜ୍ଞାନିକ ପରାମର୍ଶଦାତା କହିଛନ୍ତି, କରୋନାର ତୃତୀୟ ପ୍ରବାହ ନିଶ୍ଚିତ ଆସିବ । ତେବେ ଏହା କେବେ ଆସିବ ଅନୁମାନ କରି ହେବନାହିଁ । ଦେଶରେ କରୋନାର ଦ୍ୱିତୀୟ ପ୍ରବାହ ବେଳେ ସ୍ୱାସ୍ଥ୍ୟାସେବାର ବିପର୍ଯ୍ୟସ୍ଥ ଚିତ୍ର ପଦାରେ ପଡ଼ିଛି । ତ ପ୍ରଶ୍ନ ଉଠୁଛି ଦେଶ କରୋନାର ତୃତୀୟ ପ୍ରବାହର ସାମ୍ନା କେମିତି କରିବ ?

ଏଥିସହ ପଢ଼ନ୍ତୁ- ‘ଭାରତରେ ନିଶ୍ଚୟ ଆସିବ କରୋନାର ତୃତୀୟ ପ୍ରବାହ, ଟାଳି ହେବନି’

ଗୁରୁବାର ଶୁଣାଣି ବେଳେ ସୁପ୍ରିମକୋର୍ଟ ମଧ୍ୟ ତୃତୀୟ ପ୍ରବାହକୁ ନେଇ ଚିନ୍ତାବ୍ୟକ୍ତ କରିଛନ୍ତି । ସୁପ୍ରିମକୋର୍ଟ କହିଛନ୍ତି, ସରକାରଙ୍କୁ ଏବେଠୁ ପ୍ରସ୍ତୁତ ହେବାକୁ ପଡ଼ିବ । କାରଣ ତୃତୀୟ ପ୍ରବାହ ଶିଶୁଙ୍କୁ ପ୍ରଭାବିତ କଲେ ଚିକିତ୍ସା ସହ ବାପାମାଆଙ୍କ ଅବସ୍ଥା ଭାବିବାକୁ ପଡ଼ିବ । ଏଥିସହ ଡକ୍ଟର୍ସ, ନର୍ସଙ୍କ ସହ ବିକଳ୍ପ ଯୋଜନା ପ୍ରସ୍ତୁତ ରଖିବାକୁ ସୁପ୍ରିମକୋର୍ଟ କହିଛନ୍ତି ।

କୁସ୍ତି ଯୋଦ୍ଧାଙ୍କ ମୃତ୍ୟୁ ଘଟଣା ; ଅଲିମ୍ପିକ ବିଜେତା ସୁଶୀଲ କୁମାରଙ୍କୁ ଖୋଜୁଛି ପୋଲିସ

ନୂଆଦିଲ୍ଲୀ: ଯୁବ ଜୁନିୟର ରାଷ୍ଟ୍ରୀୟ ଚମ୍ପିଆନଙ୍କ ହତ୍ୟା ଅଭିଯୋଗରେ ଏବେ ଖୋଲିବାରେ ଲାଗିଛି ନୂଆ ଗୁମର । ଏହି ଘଟଣାରେ ଅଲମ୍ପିକ ପଦକ ବିଜେତା ସୁଶୀଲ କୁମାରଙ୍କ ନାମ ଏବେ ପଦାକୁ ଆସିଛି । ହତ୍ୟା ଘଟଣାରେ ବଡି ହିଲ୍ଡର ସୁଶୀଲ କୁମାରଙ୍କ ସଂଶ୍ଲିଷ୍ଟ ଥିବା ନେଇ ଜାଣିବାକୁ ପାଇଥିଲା ପୋଲିସ । ଏହାପରେ ଦିଲ୍ଲୀ ପୋଲିସ ସୁଶୀଲଙ୍କ ଘରେ ତଲାସୀ କରିଥିବା ଜାଣିବାକୁ ମିଳିଛି ।

ସୂଚନା ମୁତାବକ ଦିଲ୍ଲୀ ଛତ୍ରସାଲ ଷ୍ଟାଡିୟମ ଭିତରେ ମଙ୍ଗଳବାର ଦୁଇ ଜଣ ଯୁବତକଙ୍କୁ ମଧ୍ୟରେ ମାରପିଟ ହୋଇଥିଲେ । ଯେଉଁଥିରେ ୨୩ ବର୍ଷୀୟ ଜଣେ ବଡି ବିଲ୍ଡରଙ୍କ ମୃତ୍ୟୁ ଘଟିଥିଲା । ଏହି ଘଟଣାରେ ଅନ୍ୟ ଦୁଇ ଜଣ ଯୁବକଙ୍କର ହାତ ରହିଥିବା ପୋଲିସକୁ ସୂଚନା ମିଳିଛି । ଯାହାକୁ ନେଇ ସୁଶୀଲ କୁମାରଙ୍କ ସମେତ ଅନ୍ୟ ଦୁଇ ଜଣଙ୍କ ଘରେ ଦିଲ୍ଲୀ ପୋଲିସ ପହଁଚି ପଚରା ଉଚରା ଜାରି ରଖିଛି ।

ପୋଲିସକୁ ମିଳିଥିବା ଅଭିଯୋଗ ଅନୁସାରେ ବୁଧବାର ସକାଳେ ଏକ ଏଫଆଇଆର ମିଳିଥିଲା । ଯେଉଁଥିରେ ଦୁଇ ଜଣ ଯୁବକଙ୍କ ମଧ୍ୟରେ ଝଗଡା ହୋଇଥିବା ନେଇ ଉଲ୍ଲେଖ ରହିଥିଲା । ଜଣେ ଏଥିରେ ଗୁରୁତ୍ତର ଆହତ ହୋଇଥିବା ମଧ୍ୟ ପୋଲିସକୁ ଏତଲା କୁହାଯାଇଥିଲା । କିନ୍ତୁ ପରବର୍ତ୍ତୀ ସମୟରେ ଚିକିତ୍ସାଧିନ ଅବସ୍ଥାରେ ଗୁରୁତ୍ତର ଯୁବକଙ୍କର ମୃତ୍ୟୁ ଘଟିଥିଲା । ଏବଂ ଏହି ଘଟଣାରେ ଯୁବ ବଡି ବିଲ୍ଡର ସୁଶୀଲ କୁମାରଙ୍କ ସମେତ ଅନ୍ୟ ଦୁଇ ଜଣ ଯୁବକ ସାମିଲ ଥିବା ନେଇ ସୂଚନା ମିଳିଛି । ଯାହାକୁ ନେଇ ପୋଲିସ ଖୋଳତାଡ ଆରମ୍ଭ କରିଛି ।

ଜୁନ ପ୍ରଥମ ସପ୍ତାହରେ କେରଳ ଛୁଇଁବ ମୌସୁମୀ ବାୟୁ

ନୂଆଦିଲ୍ଲୀ: ଜୁନ ମାସରେ ଆସୁଛି ମୌସୁମୀ ବାୟୁ । ଜୁନ ମାସର ପ୍ରଥମ ସପ୍ତାହର ମୌସୁମୀ ବାୟୁ କେରଳ ଛୁଇଁବା ନେଇ ଆକଳନ କରିଛି ଭାରତୀୟ ପାଣିପାଗ କେନ୍ଦ୍ର । ପାଣିପାଗ ବିଭାଗ ପକ୍ଷରୁ କୁହାଯାଇଛି, ଦକ୍ଷିଣ-ପଶ୍ଚିମ ମୌସୁମୀ ବାୟୁ ଜୁନ୍ ପହିଲାରେ କେରଳ ଛୁଇଁବ ।

ଚଳିତ ବର୍ଷ ଜୁନରେ ମୌସୁମୀ କରେଳ ଛୁଇଁବାକୁ ଥିବାବେଳେ କୋଭିଡ ସମୟରେ ସତର୍କ ରହିବାକୁ ମଧ୍ୟ କୁହାଯାଇଛି । ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ମଧ୍ୟ ଏନେଇ ସୂଚନା ଦେଇଛି । ମେ ୧୫ରେ ପାଣିପାଗ ବିଭାଗ ପକ୍ଷରୁ ବିଧିବଦ୍ଧ ସୂଚନା ଦିଆଯିବ ବୋଲି କୁହାଯାଇଛି ।

କଟକଣାକୁ ଉଲ୍ଲଂଘନ କଲେ, ପ୍ରତିବାଦ କରିବାରୁ ତହସିଲଦାରଙ୍କୁ ଦୁର୍ବ୍ୟବହାର କଲେ

ବାଲେଶ୍ୱର: କରୋନା କଟକଣାକୁ ଉଲ୍ଲଂଘନ କଲେ । ବାରଣ କରିବାରୁ ତହସିଲଦାରଙ୍କୁ ଦୁର୍ବ୍ୟବହାର କଲେ । ଏଭଳି ଘଟଣା ଘଟିଛି ବାଲେଶ୍ବରରେ । ଭୋଜି କରୁଥିବା ଲୋକଙ୍କୁ ବାରଣ କରିବାରୁ ବାଲେଶ୍ବର ସଦର ତହସିଲଦାରଙ୍କୁ ଆକ୍ରମଣ ହୋଇଥିବା ଅଭିଯୋଗ ହୋଇଛି । ପୋଲିସ ସହିତ ଜିଲ୍ଲାପାଳ ଓ ଉପଜିଲ୍ଲାପାଳ ଘଟଣାସ୍ଥଳରେ ପହଞ୍ଚି ଭୋଜି ପାଇଁ ପ୍ରସ୍ତୁତ କରାଯାଇଥିବା ଖାଦ୍ୟକୁ ଜବତ କରିଛନ୍ତି । ଏଥିସହିତ ନିୟମ ଉଲ୍ଲଂଘନ କରିଥିବା ଅଭିଯୋଗରେ 3ଜଣଙ୍କୁ ଅଟକ ରଖାଯାଇଛି ।

ବାଲେଶ୍ବର ସଦର ଥାନା ଓଡ଼ଙ୍ଗି ପଞ୍ଚାୟତ ଇଚ୍ଛାପୁର ଗାଁର ରମେଶ ରାଉତଙ୍କ ସ୍ତ୍ରୀ ହୀରାମଣି ରାଉତଙ୍କର କୋଭିଡ୍‌ରେ ମୃତ୍ୟୁ ହେବାପରେ ଗତକାଲି ତାଙ୍କର ଏକାଦଶାହ କ୍ରିୟା ଥିଲା । ପରିବାର ଲୋକ ଭୋଜିର ଆୟୋଜନ କରିଥିଲେ । ହେଲେ କରୋନା କଟକଣାରେ ଶୁଦ୍ଧିକ୍ରିୟାରେ ମାତ୍ର 20 ଜଣଙ୍କୁ ଅନୁମତି ଥିବାବେଳେ, ଏହି ଭୋଜିରେ ଶହେରୁ ଅଧିକ ଲୋକଙ୍କୁ ନିମନ୍ତ୍ରଣ କରାଯାଇଥିଲା ।

ଭିଡ଼ ଅଧିକ ହୋଇଥିବା ସୂଚନା ପାଇ ସଦର ତହସିଲଦାର ଅନାମିକା ସିଂ ଘଟଣାସ୍ଥଳରେ ପହଞ୍ଚି ଭୋଜିକୁ ବାରଣ କରିଥିଲେ । ଖାଦ୍ୟ ସାମଗ୍ରି ଜବତ କରିବାରୁ ପରିବାର ଲୋକ ତାଙ୍କୁ ଠେଲାପେଲା କରିବା ସହିତ ମାଡ଼ ମାରିଥିବା ମଧ୍ୟ ଅଭିଯୋଗ ହୋଇଛି । ଏନେଇ ତହସିଲଦାରଙ୍କ ଅଭିଯୋଗ ଅନୁସାରେ ସଦର ଥାନାରେ ଏକ ମାମଲା ରୁଜୁ କରାଯାଇଛି ।