spot_img
Home Blog Page 5828

ସବୁ ରେକର୍ଡ ଭାଙ୍ଗିଲା ସଂକ୍ରମଣ, ଦିନକରେ ୧୨ ହଜାରରୁ ଅଧିକ ପଜିଟିଭ୍ ଚିହ୍ନଟ

ଭୁବନେଶ୍ୱର: ରାଜ୍ୟରେ କରୋନା ସଂକ୍ରମଣ ମାମଲା ସବୁ ରେକର୍ଡ ଭାଙ୍ଗିଛି । ପ୍ରଥମଥର ଲାଗି ରାଜ୍ୟରେ ୧୨ ହଜାରରୁ ଅଧିକ କରୋନା ସଂକ୍ରମଣ ମାମଲା ଚିହ୍ନଟ ହୋଇଛି । ଗୁରୁବାର ଦିନକରେ ରାଜ୍ୟରୁ ୧୨ ହଜାର ୨୩୮ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ୬ ହଜାର ୯୧୪ ଜଣ ସଂକ୍ରମିତ କ୍ୱାରେଣ୍ଟାଇନରୁ ଚିହ୍ନଟ ହୋଇଥିବା ବେଳେ ୫ ହଜାର ୩୨୪ଟି ମାମଲା ସ୍ଥାନୀୟ ସଂକ୍ରମଣ । ସୁନ୍ଦରଗଡ଼ ଜିଲ୍ଲାରୁ ସର୍ବାଧିକ ୨୦୭୩ଟି ମାମଲା ଆସିଥିବା ବେଳେ ଖୋର୍ଦ୍ଧାରୁ ୧୮୨୮ ଜଣ ଚିହ୍ନଟ ହୋଇଛନ୍ତି ।

ଅନୁଗୁଳରୁ ୪୮୦, ବାଲେଶ୍ୱରରୁ ୪୩୭, ବରଗଡ଼ରୁ ୪୭୫, ଭଦ୍ରକରୁ ୩୮୧, ବଲାଙ୍ଗିରରୁ ୨୬୦, ବୌଦ୍ଧରୁ ୧୨୮, କଟକରୁ ୯୧୬, ଦେବଗଡ଼ରୁ ୬୦, ଢେଙ୍କାନାଳରୁ ୧୪୨, ଗଜପତିରୁ ୯୧, ଗଞ୍ଜାମରୁ ୩୧୨, ଜଗତସିଂହପୁରରୁ ୧୬୮, ଯାଜପୁରରୁ ୩୧୮, ଝାରସୁଗୁଡ଼ାରୁ ୩୦୬, କଳାହାଣ୍ଡିରୁ ୫୮୦, କନ୍ଧମାଳରୁ ୬୯, କେନ୍ଦ୍ରାପଡ଼ାରୁ ୧୯୨ ଜଣ ସଂକ୍ରମିତ ଚିହ୍ନଟ ହୋଇଛନ୍ତି ।

କେନ୍ଦୁଝରରୁ ୧୭୯, ଖୋର୍ଦ୍ଧାରୁ ୧୮୨୮, କୋରାପୁଟରୁ ୧୩୦, ମାଲକାନଗିରିରୁ ୬୦, ମୟୂରଭଞ୍ଜରୁ ୨୫୭, ନବରଙ୍ଗପୁରରୁ ୨୮୨, ନୟାଗଡ଼ରୁ ୧୯୪, ନୂଆପଡ଼ାରୁ ୨୯୦, ପୁରୀରୁ ୩୬୯, ରାୟଗଡ଼ାରୁ ୨୦୧, ସମ୍ବଲପୁରରୁ ୫୪୪, ସୋନପୁରରୁ ୧୫୯, ସୁନ୍ଦରଗଡ଼ରୁ ୨୦୭୩ ଏବଂ ଷ୍ଟେଟପୁଲରୁ ୩୫୭ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ।

ଏଥିସହ ରାଜ୍ୟରେ ମୋଟ କରୋନା ସଂକ୍ରମିତଙ୍କ ସଂଖ୍ୟା ୫ ଲକ୍ଷ ୧୨ ହଜାର ୪୦୦ ଅତିକ୍ରମ ରହିଛି । ଏଯାବତ୍ ୪ ଲକ୍ଷ ୨୩ ହଜାର ୨୫୭ ଜଣ ସଂକ୍ରମିତ କରୋନାକୁ ମାତ୍ ଦେଇଥିବା ବେଳେ ଏବେ ରାଜ୍ୟରେ ୮୬ ହଜାର ୯୫୦ଟି ସକ୍ରିୟ ସଂକ୍ରମଣ ମାମଲା ରହିଛି । ୧୯ ମୃତ୍ୟୁକୁ ମିଶାଇ ରାଜ୍ୟରେ ମୋଟ କରୋନା ମୃତ୍ୟୁ ୨୧୪୦କୁ ବୃଦ୍ଧି ପାଇଛି ।

ଦରମା ନ ଦେବାରୁ ମାଲିକକୁ ହାତୁଡ଼ିରେ ବାଡ଼େଇ ହତ୍ୟା

ପିପିଲି: ମାଲିକକୁ ହାତୁଡ଼ିରେ ବାଡ଼େଇ ହତ୍ୟା କଲା କର୍ମଚାରୀ । ମୃତକ ହେଲେ ଦୀପକ ପାଟ୍ଟଶାଣୀ । ବକେୟା ଦରମାକୁ କେନ୍ଦ୍ରକରି ଦୀପକଙ୍କ ପାଖରେ କାମ କରୁଥିବା ହିରଣ୍ୟ ସାହୁ ବାଡ଼େଇ ହତ୍ୟା କରିଥିବା ଅଭିଯୋଗ ହୋଇଛି । ପିପିଲି ଥାନା ସାତଶଙ୍ଖ ଡାକଘର ପାଖରେ ଖଲିଦନା କାରଖାନା କରିଥିଲେ ଦୀପକ । କାରଖାନାରେ ହିରଣ୍ୟ ସାହୁ କାମ କରୁଥିଲେ ।

ତେବେ ଦରମାକୁ କେନ୍ଦ୍ରକରି ମାଲିକ ଦୀପକ ପାଟ୍ଟଶାଣୀ ଏବଂ କର୍ମଚାରୀ ହିରଣ୍ୟ ସାହୁଙ୍କ ମଧ୍ୟରେ ପୂର୍ବରୁ ଅନେକ ବାର ବଚସା ହେଉଥିଲା । ତେବେ ପ୍ରାପ୍ୟ ନପାଇ ନିରାଶ ଥିଲେ ହିରଣ୍ୟ । ଆଜି ଦୀପକ ଶୋଇଥିଲା ବେଳେ ମାନସିକ ଭାରସାମ୍ୟ ହରାଇ ହିରଣ୍ୟ ହାତୁଡ଼ିରେ ତାଙ୍କୁ ଆକ୍ରମଣ କରିଥିଲେ ।

ଜର୍ମାନୀରୁ ଆସୁଛି ଦୈତ୍ୟ ଅକ୍ସିଜେନ୍ ପ୍ଲାଣ୍ଟ, ଉତ୍ପାଦନ କ୍ଷମତା ୪ ଲକ୍ଷ ଲିଟର

ନୂଆଦିଲ୍ଲୀ: ଦିଲ୍ଲୀରେ ଅକ୍ସିଜେନ୍ ଉତ୍ପାଦନ ପାଇଁ ଲାଗିବ ଜର୍ମାନ ମେସିନ୍ । ଗୁରୁବାର ଧାରରେ ଏକ ମାସିଭ୍ ଅକ୍ସିଜେନ୍ ପ୍ଲାଣ୍ଟ ଜର୍ମାନୀରୁ ଦିଲ୍ଲୀ ଆସୁଛି । ଯାହା ଥରକରେ ୪ ଲକ୍ଷ ଲିଟର ଅକ୍ସିଜେନ୍ ଉତ୍ପାଦନ କରିବାରେ ସକ୍ଷମ । ଡିଆରଡିଓ ଦ୍ୱାରା ପରିଚାଳିତ ସର୍ଦ୍ଦାର ପଟେଲ୍ କୋଭିଡ୍ ହସ୍ପିଟାଲରେ ଏହାକୁ ସ୍ଥାପନ କରାଯିବ । ଏହାଦ୍ୱାରା ସର୍ଦ୍ଦାର ପଟେଲ୍ କୋଭିଡ୍ ହସ୍ପିଟାଲ ସହ ଅନ୍ୟମାନେ ଅକ୍ସିଜେନ୍ ରିଫିଲିଂ କରିପାରିବେ ।

ଜର୍ମାନ ଆମ୍ବାସଡର ୱାଲ୍ଟର ଜେ. ଲିନ୍ଦନର ଏନେଇ ସୂଚନା ଦେଇଛନ୍ତି । ଏହି ଅକ୍ସିଜେନ୍ ପ୍ଲାଣ୍ଟ ପ୍ରତିଦିନ ଶହେ ରୋଗୀଙ୍କ ଆବଶ୍ୟକତା ପୂରଣ କରିବ । ଆବଶ୍ୟକତା ପର୍ଯ୍ୟନ୍ତ ଉକ୍ତ ମେସିନ୍ ଦିଲ୍ଲୀରେ ରହିବ । ଏଥିସହ ଭାରତରେ ଟିକାକରଣ ଦିଗରେ ୟୁନିସେଫ୍ ସହ ମିଶି ଜର୍ମାନୀ ସରକାର କାମ କରୁଥିବା ସେ ସୂଚନା ଦେଇଛନ୍ତି ।

ଲାଞ୍ଚ ଭିଡିଓ ଭାଇରାଲ୍ ପରେ ବିଡିଓ ନିଲମ୍ବିତ

କେନ୍ଦୁଝର: ବିଡିଓଙ୍କୁ ମହଙ୍ଗା ପଡ଼ିଲା ପିସି କାରବାର । ପିସି କାରବାର ଅଭିଯୋଗରେ ନିଲମ୍ବିତ ହେଲେ କେନ୍ଦୁଝର ଜିଲ୍ଲା ଯୋଡ଼ା ବ୍ଲକର ବିଡିଓ । ଯୋଡ଼ା ବ୍ଲକର ବିଡ଼ିଓ ଯୋଗେଶ୍ବର ନାୟକଙ୍କୁ ନିଲମ୍ବିତ କରାଯାଇଛି । ପିସି କାରବାର ଅଭିଯୋଗରେ ଯୋଗେଶ୍ବରଙ୍କୁ ଦାୟିତ୍ବରୁ ହଟାଇଛନ୍ତି କେନ୍ଦୁଝର ଜିଲ୍ଲାପାଳ । ବିଡିଓଙ୍କ ପିସି କାରବାରର ଏକ ଭିଡିଓ ସୋସିଆାଲ ମିଡିଆରେ ଭାଇରାଲ୍ ହୋଇଥିଲା ।

Keonjhar Collector Suspends Joda BDO After Bribe taking Video Goes Viral

ଭାଇରାଲ୍ ଭିଡିଓରେ ବିଡିଓ ଯୋଗେଶ୍ବର ନାଏକ ମହିଳା ପିଇଓଙ୍କଠାରୁ ବିଲ୍ ଫାଇଲ ପାସ୍ କରିବାକୁ ପିସି ନେଉଥିବା ଦେଖିବାକୁ ମିଳିଥିଲା । ନଳକୂଅ ମରାମତି ବାବଦକୁ ୧ ଲକ୍ଷ ଟଙ୍କାର ବିଲ୍ ପାସ୍ କରିବାକୁ ୩୦ ହଜାର ଟଙ୍କା ପିସି ନେଉଥିବା ଜଣାପଡ଼ିଥିଲା । ଭାଇରାଲ ଭିଡିଓଟି ଗଣମାଧ୍ୟମରେ ପ୍ରସାରଣ ହେବା ପରେ ଜିଲ୍ଲାପାଳ ଯୋଗେଶ୍ବରଙ୍କୁ ନିଲମ୍ବିତ କରିବା ସହ ଝୁମ୍ପୁରାର ଏବିଡିଓ ଚୁନୁ ହାସଦାଙ୍କୁ ଅତିରିକ୍ତ ଦାୟିତ୍ବ ଦେଇଛନ୍ତି ।

୩ ଘଣ୍ଟାରେ କୋଭିଡ୍ ଆକ୍ରାନ୍ତଙ୍କୁ ବେଡ୍ ନଦେଲେ କାର୍ଯ୍ୟାନୁ୍ଷ୍ଠାନ ନିର୍ଦ୍ଦେଶ

ଅମରାବତୀ: ରାଜ୍ୟରେ ବଢ଼ୁଥିବା କରୋନା ସଂକ୍ରମଣ ସ୍ଥିତିର ସମୀକ୍ଷା କରିଛନ୍ତି ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇଏସ୍ ଜଗନ ମୋହନ ରେଡ୍ଡୀ । ରାଜ୍ୟବ୍ୟାପୀ କୋଭିଡ୍ ବେଡ୍ ସହ ଟିକାକରଣ ବୃଦ୍ଧି କରିବାକୁ ସେ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । କୋଭିଡ୍ ଆକ୍ରାନ୍ତ ୧୦୪କୁ କଲ୍ କରିବା ମାତ୍ରେ ସମ୍ପୂର୍ଣ୍ଣ ସହାୟତା ଦେବାକୁ ସେ କହିଛନ୍ତି ।

ଏଥିସହ କରୋନା ଆକ୍ରାନ୍ତଙ୍କୁ ମାତ୍ର ୩ ଘଣ୍ଟା ମଧ୍ୟରେ ବେଡ୍ ଯୋଗାଇ ଦେବାକୁ ନିର୍ଦ୍ଦେଶ ଦେଇଛନ୍ତି । ଶଯ୍ୟା ପ୍ରଦାନରେ ବିଳମ୍ବ ହେଲେ କାର୍ଯ୍ୟାନୁଷ୍ଠାନ ନେବାକୁ କୁହାଯାଇଛି । ୧୦୪କୁ ଫୋନ୍ କଲ୍ ଆସିବା ମାତ୍ରେ ଆକ୍ରାନ୍ତଙ୍କ ସ୍ଥାନ ଅନୁଯାୟୀ ସମ୍ପୂର୍ଣ୍ଣ ତଥ୍ୟ ଜିଲ୍ଲାକୁ ଦେବାକୁ କହିଛନ୍ତି ।

ସ୍ଥାନୀୟ ପ୍ରଶାସନ ଅଗ୍ରାଧିକାର ଭିତ୍ତିରେ କରୋନା ଆକ୍ରାନ୍ତଙ୍କୁ ଆଡମିଟ୍ କରିବେ । ସମ୍ପୂର୍ଣ୍ଣ ମାଗଣା ଭାବେ କରୋନା ଆକ୍ରାନ୍ତଙ୍କୁ ଚିକିତ୍ସା ସେବା ଯୋଗାଇ ଦେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।

ଉଡ଼ାଣ ଭରୁ ଭରୁ ଖସିଗଲା ଏୟାର ଆମ୍ବୁଲାନ୍ସର ଚକ୍

ମୁମ୍ବାଇ: ଗୁରୁତର ରୋଗୀଙ୍କ ଜୀବନ ବଞ୍ଚାଇବା ଲାଗି ଏୟାର ଆମ୍ବୁଲାନ୍ସର ବ୍ୟବହାର କରାଯାଏ । ସମୟର ସ୍ୱଳ୍ପତା ଏବଂ ଜରୁରୀକାଳୀନ ଚିକିତ୍ସା ଲାଗି ଏୟାର ଆମ୍ବୁଲାନ୍ସ ରୋଗୀଙ୍କ ଭରସା ଥାଏ । ତେବେ ମହାରାଷ୍ଟ୍ରରେ ରୋଗୀକୁ ନେଇ ଯାଉଥିବା ଏୟାର ଆମ୍ବୁଲାନ୍ସ ଦୁର୍ଘଟଣାଗ୍ରସ୍ତ ହୋଇଛି । ନାଗପୁରରୁ ଏୟାର ଆମ୍ବୁଲାନ୍ସଟି ରୋଗୀଙ୍କୁ ନେଇ ହାଇଦ୍ରାବାଦ ଉଡ଼ାଣ ଭରିବା ଦୁର୍ଘଟଣା ଘଟିଛି ।

ଫଳରେ ବିମାନଟିକୁ ମୁମ୍ବାଇରେ ଜରୁରୀ ଅବତରଣ କରିବାକୁ ପଡ଼ିଛି । ସୂଚନା ଅନୁସାରେ ଏୟାର ଆମ୍ବୁଲାନ୍ସଟି ନାଗପୁରରୁ ଉଡ଼ାଣ ଭରିବା ମାତ୍ରେ ଏକ ଟାୟାର୍ ଭୂଇଁରେ ଖସି ପଡ଼ିଥିଲା । ଫଳରେ ବିମାନଟିକୁ ମୁମ୍ବାଇରେ ଜରୁରୀ ଅବତରଣ କରିବାକୁ ପଡ଼ିଛି ।

ସି-୯୦ ଏୟାରକ୍ରାଫ୍ଟ ନାଗପୁରରୁ ହାଇଦ୍ରାବାଦ ଯାଉଥିଲା । ଏୟାର ଆମ୍ବୁଲାନ୍ସରେ ମୋଟ ୫ ଜଣ ଥିଲେ ।  । ଯେଉଁଥିରେ ୨ ଜଣ କ୍ରିଉ ମେମ୍ବର, ଜଣେ ଡାକ୍ତର ଓ ରୋଗୀ ଥିଲେ । ନାଗପୁରରେ ବିମାନ ଉଡ଼ାଣ ମାତ୍ରେ ସମସ୍ୟା ସୃଷ୍ଟି ହୋଇଥିଲା । ଏକ ଚକ ବିମାନରୁ ଖସି ପଡ଼ିଥିଲା । ପାଇଲଟ୍ ଉପସ୍ଥିତ ବୁଦ୍ଧି ଖଟାଇ ମୁମ୍ବାଇରେ ବିମାନ ଅବତରଣ କରିଥିଲେ । ରୋଗୀଙ୍କୁ ମୁମ୍ବାଇର ଏକ ହସ୍ପିଟାଲରେ ଭର୍ତ୍ତି କରାଯାଇଛି ।

କରୋନା ସ୍ଥିତି ନେଇ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କଥାହେଲେ ପ୍ରଧାନମନ୍ତ୍ରୀ

ଭୁବନେଶ୍ୱର: ଦେଶରେ କରୋନା ସଂକ୍ରମଣ ମାମଲା ବେକାବୁ ଭାବେ ବଢ଼ି ଚାଲିଛି । ଏହାରି ଭିତରେ ପ୍ରଧାନମନ୍ତ୍ରୀ କରୋନା ସ୍ଥିତି ନେଇ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସହ ଆଲୋଚନା କରିଛନ୍ତି । ଦେଶରେ ସମ୍ପୂର୍ଣ୍ଣ ଲକଡାଉନ୍ ଲାଗୁ ହେବା ଆବଶ୍ୟକତା ରହିଛି କି ? ଏନେଇ ପ୍ରଧାନମନ୍ତ୍ରୀ ଓଡ଼ିଶା, ତେଲଙ୍ଗାନା, ଆନ୍ଧ୍ରପ୍ରଦେଶ ଓ ଝାଡ଼ଖଣ୍ଡ ମୁଖ୍ୟମନ୍ତ୍ରୀଙ୍କ ସହ ପୁଡୁଚେରୀ ଓ ଜମ୍ମୁକାଶ୍ମୀର ଉପରାଜ୍ୟପାଳଙ୍କ ସହ କଥା ହୋଇଛନ୍ତି ।

ଏଥିସହ ପଢ଼ନ୍ତୁ: ଦେଶରେ ତାଣ୍ଡବ ରଚୁଛି କରୋନାର ଦ୍ୱିତୀୟ ପ୍ରବାହ, ଡରାଇଲାଣି ତୃତୀୟ ଲହର…

ଦେଶ ସହ ରାଜ୍ୟରେ କରୋନାର ଦ୍ୱିତୀୟ ପ୍ରବାହ ଆତଙ୍କ ସୃଷ୍ଟି କରିଛି । ଦେଶର ବିଭିନ୍ନ ରାଜ୍ୟରେ ଅକ୍ସିଜେନ୍, ବେଡ୍ ସମସ୍ୟା ସ୍ୱାସ୍ଥ୍ୟସେବାର ପ୍ରକୃତ ଚିତ୍ରକୁ ପଦାରେ ପକାଇଛି । ଅନେକ ରାଜ୍ୟ କରୋନା ସଂକ୍ରମଣ ଚେନକୁ ଭାଙ୍ଗିବା ପାଇଁ ନାଇଟ୍ କର୍ଫ୍ୟୁ, ୱିକେଣ୍ଡ ସଟଡାଉନ୍ ଠାରୁ ନେଇ ଲକଡାଉନ୍ ଲାଗୁ କରିଛନ୍ତି । ତଥାପି ସଂକ୍ରମଣ ସ୍ଥିତିରେ ସୁଧାର ଆସୁନାହିଁ । ଏମିତିରେ ଦେଶବ୍ୟାପୀ ଲକଡାଉନ୍ ନେଇ ଆଲୋଚନା ଚାଲିଛି ।

ଆମେରିକାର ବରିଷ୍ଠ ସ୍ୱାସ୍ଥ୍ୟ ବିଶେଷଜ୍ଞ ଡକ୍ଟର ଏଣ୍ଟନି ଫାଉଚି ମଧ୍ୟ ଭାରତରେ ଲକଡାଉନ୍ ସପକ୍ଷରେ ଅଛନ୍ତି । ଲକଡାଉନ୍ ହିଁ ସଂକ୍ରମଣ ଗତିକୁ ରୋକିବ ବୋଲି ସେ କହିଛନ୍ତି । ଗୁରୁବାର ଦେଶରେ କରୋନାର ରେକର୍ଡ ସଂଖ୍ୟକ ମାମଲା ଚିହ୍ନଟ ହୋଇଛି । ଦିନକରେ ୪.୧୨ ଲକ୍ଷ ସଂକ୍ରମଣ ମାମଲା ଆସିଥିବା ବେଳେ ୪ ହଜାର ଜଣଙ୍କ ମୃତ୍ୟୁ ହୋଇଛି । ଏଥିସହ ଦେଶରେ ସକ୍ରିୟ ସଂକ୍ରମଣ ମାମଲା ୩ ଲକ୍ଷ ପାର୍ କରିଛି । ମହାରାଷ୍ଟ୍ର, କର୍ଣ୍ଣାଟକ, କେରଳ, ଦିଲ୍ଲୀ, ଉତ୍ତରପ୍ରଦେଶ, ତାମିଲନାଡ଼ୁ ଆଦି ରାଜ୍ୟରେ ସବୁଠୁ ଅଧିକ ମାମଲା ଆସୁଛି । ଦୁନିଆରେ ସବୁଠୁ ଅଧିକ କରୋନା ସଂକ୍ରମିତ ମାମଲା ଭାରତରେ ଚିହ୍ନଟ ହେଉଛି ।

ପଶ୍ଚିମବଙ୍ଗ ଆସିଲେ ମନ୍ତ୍ରୀଙ୍କୁ ଦେଖାଇବାକୁ ପଡ଼ିବ କରୋନା ନେଗେଟିଭ୍ ରିପୋର୍ଟ: ମମତା

କୋଲକାତା: ପଶ୍ଚିମବଙ୍ଗରେ ନିର୍ବାଚନ ଫଳାଫଳ ଆସିବା ପରେ ବ୍ୟାପିଥିବା ହିଂସାକୁ ନେଇ ଟିଏମସି ବିଜେପିକୁ ଟାର୍ଗେଟ୍ କରୁଛି । ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି, କେନ୍ଦ୍ରୀୟ ମନ୍ତ୍ରୀ ପଶ୍ଚିମବଙ୍ଗ ଆସି ହିଂସା ସୃଷ୍ଟି କରୁଛନ୍ତି । ଏତିକି ନୁହେଁ ସେମାନେ ପଶ୍ଚିମବଙ୍ଗ ଆସି କରୋନା ସଂକ୍ରମଣକୁ ବିସ୍ତାର ଦେଉଥିବା କହିଛନ୍ତି ମମତା ।

ହିଂସା ପରେ ପଶ୍ଚିମବଙ୍ଗରେ ପହଞ୍ଚିଥିବା କେନ୍ଦ୍ରୀୟ ଟିମକୁ ନେଇ ମମତା କହିଛନ୍ତି, କରୋନାର ବଢ଼ୁଥିବା ଟିମ୍ ଏଠାକୁ ଆସି ଚା’ ପିଇକରି ଯାଉଛନ୍ତି । ଯଦି ମନ୍ତ୍ରୀ ସ୍ୱତନ୍ତ୍ର ବିମାନରେ ବି ଆସୁଛନ୍ତି । ତେବେ ତାଙ୍କୁ ମଧ୍ୟ ଆରଟି-ପିସିଆର୍ କୋଭିଡ୍ ନେଗେଟିଭ୍ ରିପୋର୍ଟ ଆଣିବାକୁ ପଡ଼ିବ । ନିୟମ ସମସ୍ତଙ୍କ ପାଇଁ ଗୋଟିଏ ପ୍ରକାର । ବିଜେପି ନେତା ଲଗାତାର ଆସୁଥିବାରୁ ରାଜ୍ୟରେ କରୋନା ମାମଲା ବଢ଼ୁଥିବା କହିଛନ୍ତି ମମତା ।

West Bengal CM Mamata Banerjee On Ministers RTPCR Negative Report

ଏଥିସହ ମମତା ମାଗଣା ଟିକା ନେଇ ପ୍ରଧାନମନ୍ତ୍ରୀ ମୋଦିଙ୍କୁ ଟାର୍ଗେଟ୍ କରିଛନ୍ତି । ମୁଁ ଲେଖିଥିବା ଚିଠିର ଏଯାଏଁ କୌଣସି ଉତ୍ତର ମିଳିନାହିଁ । ସେ ଟିକା ପାଇଁ ୩୦ ହଜାର କୋଟି ଟଙ୍କା କାହିଁକି ବାଣ୍ଟୁନାହାଁନ୍ତି । ଯେତେବେଳେ କି ନୂଆ ସଂସଦ ଓ ମୂର୍ତ୍ତି ଲାଗି ୨୦ ହଜାର କୋଟି ଟଙ୍କା ଖର୍ଚ୍ଚ କରାଯାଉଛି ।

ପିଏମ୍ କେୟାର୍ସ ଫଣ୍ଡ କୁଆଡ଼େ ଗଲା ବୋଲି ପ୍ରଶ୍ନ କରିଛନ୍ତି ମମତା । ଯୁବଗୋଷ୍ଠୀ ଜୀବନ ବିପଦରେ ପଡ଼ୁଛି । ଦଳର ନେତା ବିଭିନ୍ନ ସ୍ଥାନକୁ ଯିବା ପରିବର୍ତ୍ତେ କରୋନା ହସ୍ପିଟାଲ ଯିବା ଦରକାର । ଦଳର ନେତା ପଶ୍ଚିମବଙ୍ଗ ଆସି କୋଭିଡ୍ ସଂକ୍ରମିତ କରୁଥିବା କହିଛନ୍ତି ମମତା ।

କରୋନାର ତୃତୀୟ ପ୍ରବାହ ପାଇଁ ସରକାର କେତେ ସଜାଗ ? ପ୍ରଶ୍ନ କଲେ ସୁପ୍ରିମକୋର୍ଟ

ନୂଆଦିଲ୍ଲୀ: ନା କରୋନା ସଂକ୍ରମଣ କମୁଛି, ନା ଭୟ ଦୂର ହେଉଛି । ଦ୍ବିତୀୟ ଲହର ପରେ ଏବେ ତୃତୀୟ ଲହର ଆସିବା ନେଇ ପୂର୍ବାନୁମାନ କଲେଣି ବିଶେଷଜ୍ଞ । ସୁପ୍ରିମକୋର୍ଟ ଏବେଠୁ ଚେତାଇବ ସହ କ’ଣ କରିଛ ବୋଲି କେନ୍ଦ୍ର ସରକାରଙ୍କୁ ପଚାରିଛନ୍ତି । ସେପଟେ ଉତ୍ତର ଭାରତ ପରେ ଚିନ୍ତା ବଢ଼ାଇଛି ଦକ୍ଷିଣ ଭାରତ । କର୍ଣ୍ଣାଟକ ଓ କେରଳରେ ସଂକ୍ରମଣ ପିକ୍‌ରେ ଅଛି ।

ସାରା ଦେଶରେ କରୋନାର ପାଦଚିହ୍ନ । ଉତ୍ତର ପରେ ଡରାଇଲାଣି ଦକ୍ଷିଣ । ତୃତୀୟ ଲହର ପାଇଁ ସଜାଗ ରହିବାକୁ ସୁପ୍ରିମକୋର୍ଟଙ୍କ ପରାମର୍ଶ । ଦେଶରେ ଥାର୍ଡ ୱେଭ ହିଟ୍ କରିବା ନେଇ ଆଶଙ୍କା ପ୍ରକଟ କରିଛନ୍ତି ବିଶେଷଜ୍ଞ । ଏଥିରେ ଅଧିକ ପ୍ରଭାବିତ ହେବେ ଶିଶୁ । ଯାହାକୁ ନେଇ ଚିନ୍ତା ପ୍ରକଟ କରିବା ସହ କେନ୍ଦ୍ରକୁ ଚେତାଇଛନ୍ତି ସୁପ୍ରିମକୋର୍ଟ । ତୃତୀୟ ଲହରର ମୁକାବିଲା ପାଇଁ କେନ୍ଦ୍ର ସରକାର କ’ଣ ପ୍ଲାନ୍ କରିଛନ୍ତି ବୋଲି ପ୍ରଶ୍ନ କରିଛନ୍ତି କୋର୍ଟ । ଶିଶୁମାନେ ସଂକ୍ରମିତ ହେଲେ ସ୍ଥିତି ଆହୁରି ସାଂଘାତିକ ହେବ । ଏଭଳି ସ୍ଥିତିରେ ସେମାନଙ୍କ ବାପା, ମାଆ କ’ଣ କରିବେ । ସମ୍ଭାବ୍ୟ ପରିସ୍ଥିତିକୁ ଦୃଷ୍ଟିରେ ରଖି ସରକାର ତୃତୀୟ ଲହର ମୁକାବିଲା ଲାଗି କ’ଣ ଯୋଜନା ପ୍ରସ୍ତୁତ କରିଛନ୍ତି, ତାହା ଜାଣିବାକୁ ଚାହିଁଛନ୍ତି ସୁପ୍ରିମକୋର୍ଟ ।

Supreme Court Asked Centre How Much Prepared For Third Covid Wave

ଦ୍ବିତୀୟ ଲହରର ପ୍ରଥମ ଭାଗରେ ଉତ୍ତର ଭାରତ ଅଧିକ ପ୍ରଭାବିତ ହୋଇଥିବାବେଳେ ଏବେ କରୋନାର କାଳ ନଜର ପଡ଼ିଛି ଦକ୍ଷିଣ ଭାରତ ଉପରେ । ସ୍ଥିତି ଏଭଳି ହୋଇଛି ଯେ କର୍ଣ୍ଣାଟକରେ ଦୈନିକ ସଂକ୍ରମଣ ୫୦ ହଜାର ପାର୍ କରିଛି । କେବଳ ବେଙ୍ଗାଳୁରରୁ ଚିହ୍ନଟ ହୋଇଛନ୍ତି ଅଧା ସଂକ୍ରମିତ । ସେହିଭଳି କେରଳରୁ ୪୦ ହଜାରରୁ ଅଧିକ ସଂକ୍ରମିତ ଚିହ୍ନଟ ହୋଇଥିବା ବେଳେ ଆସନ୍ତା ୮ ତାରିଖରୁ ୧୬ ତାରିଖ ଯାଏ ଲକଡାଉନ୍ ଘୋଷଣା କରିଛନ୍ତି ରାଜ୍ୟ ସରକାର । ସଂକ୍ରମିତଙ୍କ ସଂଖ୍ୟା ବଢୁଥିବାରୁ ୯ ଦିନିଆ ଲକଡାଉନ ପାଇଁ ନିଷ୍ପତ୍ତି ନେଇଛନ୍ତି ମୁଖ୍ୟମନ୍ତ୍ରୀ ପିନାରାୟୀ ବିଜୟନ ।

ଦେଶରେ ବିଭିନ୍ନ ରାଜ୍ୟରୁ ସାମ୍ନାକୁ ଆସୁଛି ଭିନ୍ନ ଭିନ୍ନ ଭାରିଆଣ୍ଟ । ବ୍ରିଟେନ୍ ଷ୍ଟ୍ରେନଠାରୁ ଅଧିକ ସଂକ୍ରାମକ ହେଉଛି ମହାରାଷ୍ଟ୍ର ମ୍ୟୁଟାଣ୍ଟ । ଏହା କମ୍ ସମୟ ମଧ୍ୟରେ ଅଧିକ ଲୋକଙ୍କୁ ସଂକ୍ରମିତ କରୁଥିବା ସହ ମୃତ୍ୟୁର ତାଣ୍ଡବ ରଚୁଥିବା ନ୍ୟାସନାଲ ସେଣ୍ଟର ଫର ଡିଜିଜ କଣ୍ଟ୍ରୋଲର ନିର୍ଦ୍ଦେଶକ ସୁଜିତ ସିଂ କହିଛନ୍ତି । ସେପଟେ ଆନ୍ଧ୍ର ମ୍ୟୁଟାଣ୍ଟକୁ ନେଇ ଚାଲିଥିବା ଚର୍ଚ୍ଚା ଉପରେ ବିରାମ ଲଗାଇଛନ୍ତି ସେଠାକାର ସରକାର । ଆନ୍ଧ୍ର ମ୍ୟୁଟାଣ୍ଟ କୁହାଯାଉଥିବା କରୋନାର N୪୪୦K ଭ୍ୟାରିଆଣ୍ଟ ପୂର୍ବରୁ ଦେଶରେ ମହଜୁଦ୍ ଥିଲା । ଯାହା ଏବେ ସାରାଦେଶରେ ବ୍ୟାପୁଛି । ଏହି ଭ୍ୟାରିଆଣ୍ଟ ଆନ୍ଧ୍ରପ୍ରଦେଶରୁ ଉତ୍ପନ୍ନ ହୋଇଥିବା ବେଳେ ଏହା ଅଧିକ ସଂକ୍ରାମକ ବୋଲି ଗଣମାଧ୍ୟମରେ ପ୍ରକାଶ ପାଉଥିବା ରିପୋର୍ଟକୁ ପ୍ରତ୍ୟାଖାନ କରିଛନ୍ତି ଆନ୍ଧ୍ର ସରକାର ।

ଏଥିସହ ପଢ଼ନ୍ତୁ- ଦେଶରେ ତାଣ୍ଡବ ରଚୁଛି କରୋନାର ଦ୍ୱିତୀୟ ପ୍ରବାହ, ଡରାଇଲାଣି ତୃତୀୟ ଲହର…

ମେ’ ୯ରୁ ଦିଲ୍ଲୀରୁ ରାଜଧାନୀ, ଶତାବ୍ଦୀ ଓ ଦୂରନ୍ତ ଭଳି ୨୮ ଟ୍ରେନ୍ ବାତିଲ୍

ନୂଆଦିଲ୍ଲୀ: ରେଲୱେ ଉପରେ କରୋନା ପ୍ରଭାବ । ଆସନ୍ତା ୯ରୁ ଆଉ ଦିଲ୍ଲୀରୁ ଗଡ଼ିବନି ରାଜଧାନୀ ଏକ୍ସପ୍ରେସ୍ ସହ ଶତାବ୍ଦୀ ଓ ଦୂରନ୍ତ । ଦିଲ୍ଲୀରୁ ବିଭିନ୍ନ ରାଜ୍ୟକୁ ଚାଲୁଥିବା ଏଭଳି ୨୮ଟି ଟ୍ରେନକୁ କରୋନା ସଂକ୍ରମଣ ବଢ଼ୁଥିବାରୁ ରେଲୱେ ବାତିଲ୍ କରି ଦେଇଛି । ପରବର୍ତ୍ତୀ ନିର୍ଦ୍ଦେଶନାମା ଯାଏ ଟ୍ରେନ୍ ଚଳାଚଳ ବନ୍ଦ ରହିବ । ଜାରି ତାଲିକା ଅନୁସାରେ ନୂଆଦିଲ୍ଲୀ-ଭୁବନେଶ୍ୱର ରାଜଧାନୀ ଏକ୍ସପ୍ରେସ୍ ବାତିଲ୍ ହୋଇନାହିଁ ।

Railways Discontinues Rajdhani Shatabdi And Duronto Express Trains From May 9 Delhi

କରୋନା ସଂକ୍ରମଣ ବୃଦ୍ଧି ପାଇବା ପରେ ଟ୍ରେନରେ ଯାତ୍ରୀଙ୍କ ସଂଖ୍ୟା ହ୍ରାସ ପାଇଛି । ଏସବୁକୁ ଦେଖି ରେଳବାଇ ଦିଲ୍ଲୀରୁ ବିଭିନ୍ନ ରାଜ୍ୟକୁ ଚାଲୁଥିବା ୨୮ଟି ଟ୍ରେନ୍ ବାତିଲ୍ ପାଇଁ ନିଷ୍ପତ୍ତି ନେଇଛି । ଏଥିସହ ସଂକ୍ରମଣକୁ ଦୃଷ୍ଟିରେ ରଖି ରେଲୱେ ନୂଆ ଏସଓପି ଜାରି କରିଛି । ଷ୍ଟେସନ ଓ ଟ୍ରେନକୁ କେବଳ ଟିକେଟ ସଂରକ୍ଷିତ ଥିବା ଯାତ୍ରୀ ପ୍ରବେଶ କରିପାରିବେ । ୱେଟିଂ ଲିଷ୍ଟରେ ଥିଲେ ଷ୍ଟେସନରେ ପ୍ରବେଶ କରିପାରିବେ ନାହିଁ ।

ଯାତ୍ରା ବେଳେ ରେଲୱେ ତରଫରୁ ଯାତ୍ରୀଙ୍କୁ ବ୍ଲାଙ୍କେଟ ଦିଆଯିବ ନାହିଁ । ରାଜଧାନୀ ଭଳି ଟ୍ରେନରେ ଟିକେଟ ସହ ଖାଦ୍ୟ ମିଳିବ ନାହିଁ । ଟ୍ରେନ କିମ୍ବା ଷ୍ଟେସନରେ ମାସ୍କ ପିନ୍ଧି ନଥିଲେ ୫ ଶହ ଟଙ୍କା ଜରିମାନା ଦେବାକୁ ପଡ଼ିବ । ଯାତ୍ରା ସମୟରେ ଯାତ୍ରୀ ସାନିଟାଇଜର ବ୍ୟବହାର ସହ ସାମାଜିକ ଦୂରତା ରକ୍ଷା କରିବା ପାଇଁ ରେଲୱେ ପକ୍ଷରୁ କୁହାଯାଇଛି ।