spot_img
Home Blog Page 5789

ନାଗ ସହ ଲଢ଼ିଲା ନାଗ, ଜାଣନ୍ତୁ କ’ଣ ହେଲା ପରିଣାମ…  

ଭୁବନେଶ୍ୱର: ନାଗ ସାପ ଓ ନେଉଳ ଲଢେଇ ଦେଖିଛନ୍ତି । ହେଲେ ଦୁଇଟି ନାଗଙ୍କ ଭିତରେ ଭୟଙ୍କର ଲଢେଇ କେବେ ଦେଖି ନଥିବେ। ସୁନାବେଡ଼ାରେ ନାଗ ନାଗ ମଧ୍ୟରେ ଲଢେଇ ଦେଖିବାକୁ ମିଳିଛି । ୨ଟି ନାଗ ସାପ ପରସ୍ପରକୁ ଆକ୍ରମଣ କରୁଛନ୍ତି । ଜଣେ ଆଉ ଜଣଙ୍କୁ କାମୁଡ଼ି ପକାଉଛନ୍ତି । କେହି କାହାକୁ ଛାଡ଼ିବାର ନାହିଁ ।

 Two King Cobra Face Off In Sunabeda

ସୁନାବେଡ଼ାରେ ରହୁଥିବା ଇତିହାସ ଅଧ୍ୟାପିକା ଅନସୂୟା ନନ୍ଦଙ୍କ ଘରେ ନାଗ ଲଢ଼େଇ ଦେଖିବାକୁ ମିଳିଛି । ଅନସୂୟାଙ୍କ ଗ୍ୟାରେଜ ଭିତରେ ଏକ ସାପ ଦେଖି ସେ ଉଦ୍ଧାର ପାଇଁ ସ୍ନେକ ହେଲ୍ପ ଲାଇନକୁ ଫୋନ କରିଥିଲେ । ସ୍ନେକ ହେଲ୍ପ ଲାଇନ୍ ସଦସ୍ୟ ସୁଜିତ କୁମାର ମହାନ୍ତି ଘଟଣା ସ୍ଥଳରେ ପହଞ୍ଚି ଏକ ସିମେଣ୍ଟ ଅଖା ପଛପଟେ ଏକ ନାଗ ସାପର ଅଧା ଦେହ ଦେଖିବାକୁ ପାଇଲେ । ୨ ଫୁଟ୍ ଲମ୍ବର ସେହି ନାଗ ସାପଟି ମଝିରେ ମଝିରେ ଗୋଲ ଗୋଲ ହୋଇ ନିଜ ଦେହକୁ ଗୁଡେଇ ଦେଉଥିଲା ।

ସେଇ ୨ ଫୁଟ ଲମ୍ବର ସାପଟିର ଲାଙ୍ଗୁଳକୁ ସୁଜିତ ନିଜର ସ୍ନେକ ହୁକ ସାହାଯ୍ୟରେ ଟେକି ହାତରେ ଭିଡ଼ିବାକୁ ଚେଷ୍ଟା କରିବାରୁ ସିମେଣ୍ଟ ବ୍ୟାଗ ପଛପଟୁ ଆଉ ଗୋଟିଏ ନାଗ ସାପର ମୁଣ୍ଡ ଦେଖାଗଲା । ଯିଏକି ଏହି ୨  ଫୁଟ ସାପର ମୁଣ୍ଡକୁ ପ୍ରାୟ ଗିଳି ଦେଇଥିଲା । ବଡ଼ ନାଗ ସାପର ପାଟିରୁ ଖସିବା ପାଇଁ ଛୋଟ ନାଗଟି ବହୁତ ପରିଶ୍ରମ କରୁଥିଲା, ହେଲେ ସଫଳ ହେଉ ନଥିଲା । ସୁଜିତ ଧୀରେ ଧୀରେ ଛୋଟ ନାଗଟିକୁ ଭିଡ଼ି ବାହାର କରି ଆଣିବା ବେଳେ ବଡ଼ ନାଗଟି ସେଇଭଳି ଛୋଟ ନାଗ ସାପ ମୁଣ୍ଡକୁ ପାଟିରେ ଧରି ବାହାରକୁ ଆସିଥିଲା ।

 Two King Cobra Face Off In Sunabeda

ବାହାରକୁ ଆସିବା ପରେ ଛୋଟ ନାଗଟି କିଛି କ୍ଷଣ ପାଇଁ ନିଜକୁ ବଡ଼ ନାଗ ପାଟିରୁ ମୁକ୍ତ କରି ନେଇଥିଲା । ହେଲେ ପୁଣି ବଡ଼ ନାଗଟି ଛୋଟ ନାଗର ବେକ ପାଖକୁ କାମୁଡ଼ି ଧରି ନେଇଥିଲା । ଏଥର ନିଜକୁ ବଞ୍ଚେଇବା ପାଇଁ ଛୋଟ ନାଗଟି ମଧ୍ୟ ବଡ଼ ନାଗର ବେକକୁ କାମୁଡ଼ି ଧରିଲା । ଯେମିତିକି ସିଏ ଆଉ ତା ମୁଣ୍ଡକୁ ଧରି ନପାରିବ । ଏହି କାମୁଡ଼ା କାମୁଡ଼ି ଅତ୍ୟନ୍ତ ଭୟଙ୍କର ରୂପ ନେଇଥିଲା ଏବଂ ବଡ଼ ନାଗଟି ଛୋଟ ନାଗକୁ କାମୁଡୁଥିବା ଅବସ୍ଥାରେ ବିଭିନ୍ନ ଦିଗକୁ ଭିଡ଼ି ନେଉଥିଲା । ଏହି ଲଢ଼େଇ ପ୍ରାୟ ୧୦ ମିନିଟ୍ ଚାଲିବା ପରେ ସାପ ୨ଟି ଅଲଗା ହେଇଥିଲେ ଏବଂ ସୁଜିତ ସାପ ଦୁଇଟିକୁ ଉଦ୍ଧାର କରି ବ୍ୟାଗରେ ଭର୍ତ୍ତି କରିଥିଲେ ।

 Two King Cobra Face Off In Sunabeda

ନାଗ ସାପ ନିଜ ଭିତରେ କାମୁଡ଼ା କାମୁଡ଼ି ହେଲେ ବିଷ କ୍ରିୟା ହେବ କି ନାହିଁ ? ଏନେଇ ସ୍ନେକ ହେଲ୍ପ ଲାଇନର ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ କହିଛନ୍ତି ‘ନାଗ ସାପଙ୍କ କ୍ଷେତ୍ରରେ କାନିବାଲିଜିମ୍ ଦେଖାଯାଏ ଏବଂ ଗୋଟିଏ ନାଗ ଅନ୍ୟ ନାଗକୁ ଖାଇବା ଏକ ସାଧାରଣ ଘଟଣା । ତେବେ ବୈଜ୍ଞାନିକ ମାନେ ଏବେ ମଧ୍ୟ ଏକ ନାଗର ଶରୀର ଉପରେ ଅନ୍ୟ ଏକ ନାଗ ବିଷର ପ୍ରତିକ୍ରିୟା ଉପରେ ଦ୍ଵନ୍ଦ୍ୱରେ ଅଛନ୍ତି । କାରଣ ବିଷ ତିଆରି ହେବା ଏକ ଜଟିଳ ପ୍ରକ୍ରିୟା ଏବଂ ସାପ ମାନେ ନିଜର ବିଷକୁ କେବଳ ଶିକାର ପାଇଁ ଖର୍ଚ୍ଚ କରିଥାନ୍ତି । ଅଯଥାରେ ବିଷ ଖର୍ଚ୍ଚ କରିବା ସାପ ମାନେ ପସନ୍ଦ କରନ୍ତି ନାହିଁ । ଏଣୁ ସୁନାବେଡ଼ାରେ ଲଢେଇ କରିଥିବା ଦୁଇ ସାପଙ୍କ ଶରୀରରେ ପରସ୍ପର ବିଷ ଛାଡ଼ି ଥିଲେ କି ନାହିଁ ତାହା ଆମେ ନିର୍ଦ୍ଦିଷ୍ଟ କରି କହି ପାରିବା ନାହିଁ । କିନ୍ତୁ ଯଦି କେଉଁ ବି ସାପ ମରିଥାନ୍ତା, ଆମେ ନିଶ୍ଚୟ ପ୍ରାଣୀ ଚିକିତ୍ସକଙ୍କ ଦ୍ଵାରା ତାର ପୋଷ୍ଟମର୍ଟମ କରିବା ପାଇଁ ସବୁ ପ୍ରସ୍ତୁତି କରି ରଖିଥିଲୁ । ତେବେ ଯାହା ହେଉ ସାପ ଦୁଇଟି ବଞ୍ଚି ଯାଇଛନ୍ତି ।‘

 Two King Cobra Face Off In Sunabeda

ସାପଙ୍କୁ ଉଦ୍ଧାର କରିବା ପରେ ସୁଜିତଙ୍କ ମନରେ ସ୍ୱାଭାବିକ କୌତୁହଳ ସୃଷ୍ଟି ହେଲା ଯେ, ନାଗ ସାପ ଦୁଇଟି ପରସ୍ପରକୁ କାମୁଡିଥିବାରୁ ସେମାନେ ବଞ୍ଚିବେ ନା ନାହିଁ ? ସମାନ ପ୍ରଜାତିର ସାପ ହୋଇଥିବା ହେତୁ ନିଜ ଉପରେ ନାଗ ସାପ ବିଷ କାମ କରିବ ନା ନାହିଁ ? ସୁଜିତଙ୍କ ପାଇଁ ଏହା ଏକ ନୂଆ ଘଟଣା ହୋଇଥିବାରୁ ସେ ସ୍ନେକ ହେଲ୍ପ ଲାଇନର ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକଙ୍କୁ ସାପ ଦୁଇଟିକୁ ଗୋଟିଏ ରାତି ବଜରଭେସନରେ ରଖି ସକାଳେ ଅବସ୍ଥା ଦେଖି ଜଙ୍ଗଲରେ ଛାଡ଼ିବାକୁ ପରାମର୍ଶ ଦେଇଥିଲେ । ସକାଳେ ସୁଜିତ ଉଭୟ ସାପ ଜୀବିତ ଓ ସୁସ୍ଥ ଦେଖିବାକୁ ପାଇଥିଲେ । ଏହା ପରେ ସାପ ୨ଟିକୁ ସହର ବାହାରେ ଏକ ପ୍ରାକୃତିକ ଆବାସ ସ୍ଥଳୀରେ ଛାଡ଼ି ଦେଇଥିଲେ ।

IMAର ପୂର୍ବତନ ନିର୍ଦ୍ଦେଶକ ଡାକ୍ତର କେକେ ଅଗ୍ରୱାଲଙ୍କ କରୋନାରେ ଦେହାନ୍ତ

ନୂଆଦିଲ୍ଲୀ: ହାର୍ଟ କେୟାର୍ ଫାଉଣ୍ଡେସନ୍ ଅଫ୍ ଇଣ୍ଡିଆର ସଭାପତି ଓ IMAର ପୂର୍ବତନ ନିର୍ଦ୍ଦେଶକ ପଦ୍ମଶ୍ମୀ ଡାକ୍ତର କେକେ ଅଗ୍ରୱାଲଙ୍କ ଦେହାନ୍ତ ହୋଇଛି । ସୋମବାର ରାତି ପ୍ରାୟ ୧୧ଟା ୩୦ରେ ତାଙ୍କର ପରଲୋକ ଘଟିଛି । ସେ କରୋନା ସଂକ୍ରମିତ ହେବା ପରେ ଏମ୍ସର ଆଇସିୟୁରେ ଭର୍ତ୍ତି ହୋଇଥିଲେ । ନିଜ ଟ୍ୱିଟର ଆକାଉଣ୍ଟରେ ଏନେଇ ସେ ଏପ୍ରିଲ୍ ୨୮ରେ ସୂଚନା ଦେଇଥିଲେ । ସେ କରୋନା ଭ୍ୟାକ୍ସିନର ୨ଗୋଟି ଡୋଜ୍ ବି ନେଇଥିଲେ ।

ତାଙ୍କ ମୃତ୍ୟୁ ନେଇ ଅଧିକାରୀକ ଘୋଷଣା ହୋଇଛି । ମେ ୧୭ ରାତି ୧୧ଟା ୩୦ରେ କରୋନା ସହିତ ଲମ୍ବା ଯୁଦ୍ଧ ଲଢ଼ି କେକେ ଅଗ୍ରୱାଲଙ୍କ ପରଲୋକ ହୋଇଛି । ଲୋକ ଏବଂ ସ୍ୱାସ୍ଥ୍ୟ ସଚେତନତା ଲାଗି କେକେ ଅଗ୍ରୱାଲ ନିଜ ଜୀବନକୁ ସମର୍ପିତ କରି ଦେଇଥିଲେ ।

ଡାକ୍ତର କେକେ ଅଗ୍ରୱାଲ ହାର୍ଟ କେୟାର ଫାଉଣ୍ଡେସନର ସଭାପତି ଥିଲେ । ଏହା ପୂର୍ବରୁ ସେ ଇଣ୍ଡିଆନ୍ ମେଡିକାଲ୍ ଆସୋସିଏସନର ଅଧ୍ୟକ୍ଷ ରହିଥିଲେ । ୨୦୧୦ରେ ମେଡିକାଲ କ୍ଷେତ୍ରରେ ତାଙ୍କ ଅବଦାନ ପାଇଁ କେନ୍ଦ୍ର ସରକାର ତାଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରିଥିଲେ ।

କାମ୍ ଦେଉନି କଟକଣା: ଲକ୍‌ଡାଉନ୍ ଓ ସଟ୍‌ଡାଉନ୍‌ରେ ଚାଲିଛି ଦେହ ବେପାର

ଭୁବନେଶ୍ୱର: ଲକ୍‌ଡାଉନ ଓ ସଟ୍‌ଡାଉନ୍‌ରେ ରାତିରେ ଜମୁଛି ଦେହ ବେପାର । ଛିଣ୍ଡିଥିଲା ୨୫ଶହ ଟଙ୍କା, କାହିଁକି ଦେଲୁ ୫୦୦ ଟଙ୍କା । ଆଉ ୨ ହଜାର ଦେବ କିଏ । ଏଭଳି ପ୍ରଶ୍ନ କରିଛି ଦେହଜୀବୀ । ରାଜଧାନୀର ମାଷ୍ଟରକ୍ୟାଣ୍ଟିନ ଛକରେ ଦେଖିବାକୁ ମିଳିଛି ଏପରି କିଛି ଦୃଶ୍ୟ । ସଟଡାଉନ ସମୟରେ ରାତିରେ ଖୁଲାମଖୁଲା ଚାଲୁଥିଲା ଦେହ ବେପାର । ଟଙ୍କା ନେଣଦେଣକୁ ନେଇ ଉଭୟ ଯୁବତୀ ଓ ଗ୍ରାହକଙ୍କ ମଧ୍ୟରେ ହୋଇଛି କଥା କଟାକଟି । ଏମିତିକି ମୁହାଁମୁହିଁ ପରିସ୍ଥିତି ମଧ୍ୟ ସୃଷ୍ଟି ହୋଇଥିଲା । ଶେଷରେ ନିଜ ପାଉଣା ନମିଳିବାରୁ ସମ୍ପୃକ୍ତ ଯୁବତୀ ଜଣଙ୍କ ଚିଲ୍ଲାଇଥିଲେ ।

ଦେହ ବ୍ୟବସାୟ କରୁଥିବା ଯୁବତୀ ଜଣକ ତାଙ୍କ ଦାବି ମୁତାବକ ଟଙ୍କା ପାଇନଥିବା କହୁଥିବା ବେଳେ ସମ୍ପୃକ୍ତ ଗ୍ରାହକ ଜଣକ ସବୁ ଟଙ୍କା ଦେଇ ସାରିଥିବା କହିଥିଲେ । ଏଭଳି ଏକ ଭିଡ଼ିଓ ସୋସିଆଲ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି । ତାଲାବନ୍ଦ ବେଳେ ମାଳମାଳ ପୋଲିସ ସହରରେ ମୁତୟନ ହୋଇଛନ୍ତି । ଘଟଣାସ୍ଥଳଠାରୁ ମାତ୍ର ୩୦୦ମିଟର ଦୂରରେ ପୋଲିସ ନାକାବନ୍ଦି ବି କରିଛି । ଏମିତିକି ୫୦୦ମିଟର ଦୂରରେ ଏକ ପୋଲିସ ଆଉଟ୍ ପୋଷ୍ଟ ମଧ୍ୟ ରହିଛି । ଏହା ସତ୍ତ୍ୱେ ଯୁବତୀମାନେ କିଭଳି ଦେହ ବ୍ୟବସାୟ କରୁଛନ୍ତି, ସେନେଇ ସାଧାରଣରେ ପ୍ରଶ୍ନ ସୃଷ୍ଟି ହୋଇଛି ।

ସଂକ୍ରମଣ ବଢୁଛି ସୁସ୍ଥତା ବି ବଢୁଛି, ୨୪ ଘଣ୍ଟାରେ ୧୧, ୮୨୧ ସୁସ୍ଥ

ଭୁବନେଶ୍ୱର: କୋଭିଡର ସଂକ୍ରମଣ ବଢୁଛି କିନ୍ତୁ ସୁସ୍ଥତା ମଧ୍ୟ ପଛରେ ରହିଯାଇନି । ରାଜ୍ୟରେ କରୋନା ସଂକ୍ରମଣକୁ ମାତ ଦେଉଛି ସୁସ୍ଥ ହାର । ଆଜି ରାଜ୍ୟରେ ସୁସ୍ଥ ହୋଇଛନ୍ତି ଆଉ 11ହଜାର 821ଜଣ ସଂକ୍ରମିତ । ଏହାକୁ ମିଳାଇ ରାଜ୍ୟରେ ମୋଟ ସୁସ୍ଥଙ୍କ ସଂଖ୍ୟା 5ଲକ୍ଷ 26ହଜାର 353ରେ ପହଞ୍ଚିଛି। 24ଘଣ୍ଟାରେ ସୁନ୍ଦରଗଡରୁ ସର୍ବାଧିକ 1921ଜଣ ସୁସ୍ଥ ହୋଇଥିବେ ବେଳେ ଖୋର୍ଦ୍ଧାରୁ 1596, କଟକରୁ1052, କଳାହାଣ୍ଡିରୁ 575ଜଣ ସୁସ୍ଥ ହୋଇଛନ୍ତି ।

ସେହିପରି ଅନୁଗୁଳ-562, ସମ୍ବଲପୁର-533, ବରଗଡ଼457, ଝାରସୁଗୁଡ଼ା 442, ପୁରୀରୁ 433, ବଲାଙ୍ଗୀର 318, ନବରଙ୍ଗପୁରରୁ 316ଜଣ ସୁସ୍ଥ ହୋଇଛନ୍ତି । ସେହିପରି କେନ୍ଦୁଝରରୁ 315, ବୌଦ୍ଧରୁ 278, ବାଲେଶ୍ବରରୁ 260 ଯାଜପୁରରୁ 237, ଗଞ୍ଜାମରୁ 233, ନୂଆପଡାରୁ 229, କେନ୍ଦ୍ରାପଡାରୁ 203 ସୁସ୍ଥ ହୋଇଛନ୍ତି ।

ସେହିପରି ଦେବଗଡ଼ରୁ 199, ମୟୁରଭଞ୍ଜରୁ 179, ନୟାଗଡ଼ରୁ 174, ଜଗତସିଂହପୁରରୁ 142, ରାୟଗଡାରୁ 137, ସୋନପୁରରୁ 134, ଢେଙ୍କାନାଳରୁ 129, ଗଜପତି ଓ କୋରାପୁଟରୁ 120 ଲେଖାଏଁ ଆକ୍ରାନ୍ତ ସୁସ୍ଥ ହୋଇଛନ୍ତି । ଏହାସହିତ କନ୍ଧମାଳରୁ 85, ଭଦ୍ରକରୁ 83, ମାଲକାନଗିରିରୁ 58, ଓ ଷ୍ଟେଟପୁଲରୁ 301ଜଣ ଆକ୍ରାନ୍ତ ସୁସ୍ଥ ହୋଇଛନ୍ତି ।

କୋଭିଡରେ ଆଖି ବୁଜିଲେ ସାମ୍ବାଦିକ ଅଞ୍ଜନ୍ ବନ୍ଦୋପାଧ୍ୟାୟ , ଜୀ-୨୪ ଘଣ୍ଟାର ଥିଲେ ସମ୍ପାଦକ

କୋଲକାତା: ବରିଷ୍ଠ ସାମ୍ବାଦିକ ତଥା ପଶ୍ଚିମବଙ୍ଗର ଲୋକପ୍ରିୟ ଟିଭି ଆଙ୍କର୍ ଅଞ୍ଜନ୍ ବନ୍ଦୋପାଧ୍ୟାୟଙ୍କ ମୃତ୍ୟୁ ଘଟିଛି। ରବିବାର ରାତିରେ କୋଲକାତାର ଏକ ଘରୋଇ ହସ୍ପିଟାଲରେ ତାଙ୍କର ଦେହାନ୍ତ ହୋଇଛି । କରୋନାରେ ସଂକ୍ରମିତ ହେବା ପରେ ମେଡିକାଲରେ ଚିକିତ୍ସିତ ହେଉଥିଲେ ୫୬ ବର୍ଷୀୟ ବନ୍ଦୋପାଧ୍ୟାୟ । ବଙ୍ଗୀୟ ନ୍ୟୁଜ୍ ଚ୍ୟାନେଲ ଜୀ-୨୪ ଘଣ୍ଟା (Zee-24 Ghanta) ର ସମ୍ପାଦକ ଥିଲେ ଅଞ୍ଜନ୍ ବନ୍ଦୋପାଧ୍ୟାୟ ।

ରାଜ୍ୟ ସ୍ୱାସ୍ଥ୍ୟ ଅଧିକାରୀ ତାଙ୍କ ମୃତ୍ୟୁ ବିଷୟରେ ସୂଚନା ଦେଇ ଚିକିତ୍ସା ସମୟରେ ଶେଷ ନିଶ୍ୱାସ ତ୍ୟାଗ କରିଥିବା କହିଛନ୍ତି । ଅଞ୍ଜନ ବନ୍ଦୋପାଧ୍ୟାୟଙ୍କ ଦେହାନ୍ତରେ ଅନ୍ୟ ସହଯୋଗୀ ସାମ୍ବାଦିକମାନେ ସ୍ତବ୍ଧ ହୋଇଯାଇଛନ୍ତି । ସେପଟେ ତାଙ୍କ ନିଧନ ଜୀ ଗ୍ରୁପ୍ ପାଇଁ ଅପୂରଣୀୟ କ୍ଷତି । ତାଙ୍କ ମୃତ୍ୟୁରେ ରାଜ୍ୟର ସିଏମ ମମତା ବାନାର୍ଜୀ ଓ ରାଜ୍ୟପାଳ ଗଭୀର ସମବେଦନା ଜଣାଇଛନ୍ତି ।

ଅଞ୍ଜନ ବନ୍ଦୋପାଧ୍ୟାୟ ରବିବାର ରାତି ୯.୨୫ରେ ଡାକ୍ତରଖାନାରେ ଶେଷ ନିଶ୍ୱାସ ତ୍ୟାଗ କରିଥିଲେ । ପରିବାର ସଦସ୍ୟ କହିଛନ୍ତି ଯେ ଏପ୍ରିଲ ମଧ୍ୟଭାଗରେ ଅଞ୍ଜନ କୋରୋନା ପଜିଟିଭ ହୋଇଥିଲେ ଏବଂ ତାଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ଥିଲା । ସାମାନ୍ୟ ସୁସ୍ଥ ହେବା ପରେ ସେ ଥରେ ଘରକୁ ଫେରିଥିଲେ, କିନ୍ତୁ ଅବସ୍ଥା ଖରାପ ହେବା ପରେ ତାଙ୍କୁ ଡାକ୍ତରଖାନା ନିଆଯାଇଥିଲା । ପରେ ତାଙ୍କର ଦେହାନ୍ତ ଘଟିଥିବା ଜାଣିବାକୁ ମିଳିଛି ।

କରୋନା ଚିକିତ୍ସାରେ ବ୍ୟବହାର ହେବ ନାହିଁ ପ୍ଲାଜମା ଥେରାପି, ICMRର ନିଷ୍ପତ୍ତି

ନୂଆଦିଲ୍ଲୀ: କରୋନା ଚିକିତ୍ସାରେ ଆଉ ବ୍ୟବହାର ହେବ ନାହିଁ ପ୍ଲାଜମା ଥେରାପି କୋଭିଡର ପ୍ରଥମ ପର୍ଯ୍ୟାୟରେ ବ୍ୟବହାର ହେଉଥିବାବେଳେ ବର୍ତ୍ତମାନ ଠାରୁ ପ୍ଲାଜମା ଚିକିତ୍ସା ବନ୍ଦ ରହିବ ବୋଲି ବଡ ଘୋଷଣା କରିଛନ୍ତି ଆଇସିଏମର ।

ଏନେଇ ଏକ ସ୍ବତନ୍ତ୍ର ଗାଇଡ ମଧ୍ୟ ଜାରି କରାଯାଇଛି । ପ୍ଲାଜମା ଥେରାପି ଚିକିତ୍ସା ଦ୍ବାରା ନକରାତ୍ମକ ପ୍ରଭାବ ପଡୁଛି । ତେଣୁ ଏହି ଚିକିତ୍ସା ବର୍ତ୍ତମାନ ବନ୍ଦ ରହିବ । ଏହି ଚିକିତ୍ସା ବନ୍ଦ ରହିବା ନେଇ ଏମ୍ସ ଏବଂ ଆଇସିଏମଆର ପକ୍ଷରୁ ମିଳିତ ଅନୁଧ୍ୟାନ କରାଯାଇଥିଲା ।

ଆଇସିଏମଆର ପକ୍ଷରୁ ପ୍ଲାଜମା ଥେରାପି ଉପରେ ଗବେଷଣା କରିବାକୁ ଏକ ଟିମ୍‌ ଗଠନ କରାଯାଇଥିଲା । ପ୍ଲାଜମା ଥେରାପିର ଚିକିତ୍ସା ନେଇ ଗବେଷଣା ଜାରି ରଖାଯାଇଥିଲା । ଏନେଇ ଆଜି ବିଧିବଦ୍ଧ ଭାବେ ଘୋଷଣା କରାଯାଇଛି ।

ପହଞ୍ଚିଲା ବାତ୍ୟା ‘ତଉତେ’, ସ୍ଥଳଭାଗରେ ରଚୁଛି ତାଣ୍ଡବଲୀଳା

ଅହମ୍ମଦାବାଦ: ଗୁଜୁରାଟ ତଟବର୍ତ୍ତୀ ଅଞ୍ଚଳରେ ପହଞ୍ଚିଲା ବାତ୍ୟା ‘ତଉତେ’ । ସ୍ଥଳଭାଗ ଛୁଇଁଲା ବାତ୍ୟା । ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଆସନ୍ତା ଦୁଇ ଘଣ୍ଟା ପର୍ଯ୍ୟନ୍ତ ଏହି ପ୍ରକ୍ରିୟା ଜାରି ରହିବ। ବାତ୍ୟାର ପ୍ରଭାବରେ ଗୋଆ ଓ ମହାରାଷ୍ଟ୍ରରେ ମଧ୍ୟ ତାଣ୍ଡବଲୀଳା ରଚିଛି । ସାଇକ୍ଲୋନ୍ ‘ତଉତେ’ ଲ୍ୟାଣ୍ଡଫଲ ପୂର୍ବରୁ ଅତ୍ୟନ୍ତ ଭୀଷଣ ଘୂର୍ଣ୍ଣିବାତ୍ୟାରେ ରୂପ ନେଇଛି ।

ଗୁଜରାଟ ଉପକୂଳ ଦେଇ ଅତିକ୍ରମ କରିବା ସମୟରେ ଘଣ୍ଟା ପ୍ରତି ୧୫୫ କିମିରୁ ୧୬୫ କିମି ଏବଂ ଅତି ବେଶିରେ ୧୮୫ କିମି ବେଗରେ ପବନ ବହିବ । ଲ୍ୟାଣ୍ଡଫଲ ଚାଲିଥିବାବେଳେ ଅଧିକ କ୍ଷତିଗ୍ରସ୍ତ ହେବ ସୌରାଷ୍ଟ୍ରର ଅନେକ ଅଞ୍ଚଳ। ବିଶେଷକରି ପୋରବନ୍ଦର, ଦାମନ- ଡ୍ୟୁ, ଜୁନାଗଡ, ଭାବନଗର, ଅହମ୍ମଦାବାଦରେ ପଡିବ ଅଧିକ ପ୍ରଭାବ।

ଦକ୍ଷିଣ ଗୁଜରାଟ ଓ ସୌରାଷ୍ଟ୍ର ଅଞ୍ଚଳରେ ପ୍ରବଳରୁ ଅତି ପ୍ରବଳ ମାତ୍ରାରେ ବର୍ଷା ହେବାର ସମ୍ଭାବନା ରହିଛି । ଏହାଫଳରେ ଉପକୂଳବର୍ତ୍ତି ଅଞ୍ଚଳର ଖାଲୁଆ ସ୍ଥାନରେ ପାଣି ଜମିବା ସହ ଅନେକ ନଦୀରେ ବନ୍ୟା ଆସିବା ନେଇ ଆକଳ କରିଛି ପାଣିପାଗ ବିଭାଗ । ପ୍ରବଳ ପବନ ସମୟରେ କଚ୍ଚା ଘର ସହ ଇଲେକ୍ଚ୍ରି ଖୁଣ୍ଟ, ଟେଲିଫୋନ୍ ଖୁଣ୍ଟି ଭାଙ୍ଗିବାର ସମ୍ଭାବନା ରହିଛି । ସେହିଭଳି କ୍ଷତିଗ୍ରସ୍ତ ହୋଇପାରେ ଜାତୀୟ ରାଜପଥ ଓ ରେଲଓ୍ବେ ଲାଇନ୍।

ସର୍ବଦଳୀୟ ବୈଠକରେ ବିଧାୟକଙ୍କୁ ଶପଥପାଠ, ସଚେତନ କରାଇବାକୁ ମନ୍ତ୍ର ଦେଲେ ନବୀନ

ଭୁବନେଶ୍ୱର: ସର୍ବଦଳୀୟ ବୈଠକରେ ଶପଥ କରାଇଲେ ମୁଖ୍ୟମନ୍ତ୍ରୀ । ବିଧାୟକ ମାନଙ୍କୁ ଶପଥ ପାଠ କରାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନିଜ ନିର୍ବାଚନମଣ୍ଡଳୀର ଲୋକଙ୍କୁ ସଚେତନ କରାଇବାକୁ ମନ୍ତ୍ର ଦେଇଛନ୍ତି ନବୀନ । ନିର୍ବାଚନ ମଣ୍ଡଳୀର ଲୋକମାନଙ୍କୁ କୋଭିଡ ନିୟମ, ଯଥା ଠିକ୍ ଭାବେ ମାସ୍କ ପିନ୍ଧିବା, ବାରମ୍ବାର ହାତ ଧୋଇବା ଓ ସାମାଜିକ ଦୂରତା ରକ୍ଷା କରିବା ଆଦି ସଂପର୍କରେ ସଚେତନ କରିବା ପାଇଁ ନିଷ୍ଠାର ସହ କାମ କରିବାକୁ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ ।

କୋଭିଡ ବିରୋଧରେ ଏ ଲଢେଇରେ ଆଗରେ ରହି ଆମ ପାଇଁ ଲଢୁଥିବା କୋଭିଡ ଯୋଦ୍ଧାମାନଙ୍କୁ ପୂରା ସହଯୋଗ ଯୋଗାଇଦେବେ। ଓଡ଼ିଶାର ପ୍ରତିଟି ପରିବାର, ତଥା ପ୍ରତିଟି ଜୀବନ ଯେପରି ସୁରକ୍ଷିତ ରହିବ, ସେଥିପାଇଁ ସଂପୂର୍ଣ୍ଣ ଦାୟିତ୍ବର ସହ କାମ କରିବେ। ଏ ଲଢେଇ, ସାରା ମାନବ ସମାଜର ଲଢେଇ। ସବୁ ଭେଦଭାବ ଭୁଲି, ସମସ୍ତଙ୍କୁ ସାଥିରେ ନେଇ, କୋଭିଡ ବିରୋଧରେ ସଂପୂର୍ଣ୍ଣ ବିଜୟ ହାସଲ ପର୍ଯ୍ୟନ୍ତ ଲଢେଇ ଜାରି ରଖିବାକୁ ମୁଖ୍ୟମନ୍ତ୍ରୀ ବିଧାୟକଙ୍କୁ ଶପଥ ପାଠ କରାଇଛନ୍ତି।

ଏଣିକି ବିବାହ ଏବଂ ଅନ୍ତେଷ୍ଟିକ୍ରିୟା ପାଇଁ ୱେବସାଇଟରେ ଆବେଦନ

ଭୁବନେଶ୍ୱର: କଟକ-ଭୁବନେଶ୍ୱରେ ବିବାହ ଏବଂ ଅନ୍ତେଷ୍ଟି କ୍ରିୟା ପାଇଁ ଆଉ ଯିବାକୁ ପଡିବନି ପୋଲିସ କାର୍ଯ୍ୟାଳୟ । ସାଧାରଣ ଲୋକଙ୍କ ସୁରକ୍ଷା ଏବଂ ସଂକ୍ରମଣକୁ ଦୃଷ୍ଟିରେ ରଖି କମିସନରେଟ ପୋଲିସ ପକ୍ଷରୁ ଏକ ୱେବସାଇଟ ଲଞ୍ଚ କରାଯାଇଛି ।

ବିବାହ ଓ ଅନ୍ତେଷ୍ଟିକ୍ରିୟା ପାଇଁ ଅନୁମତି ଚାହୁଁଥିଲେwww.bhubaneswarcuttackpolice.gov.in ଉକ୍ତ ୱେବସାଇଟରେ ଆବେଦନ କରିବାକୁ ପଡିବ । ସେହିପରି
sms ମାଧ୍ୟମରେ ମଧ୍ୟ ଲାଇସେନ୍ସ ମିଳିହେବ ବୋଲି କହିଛନ୍ତି କମିସନର ସୌମେନ୍ଦ୍ର ପ୍ରିୟଦର୍ଶୀ ।

ଏଥିପାଇଁ ଆବେଦନ କରିବାକୁ ଚାହୁଁଥିଲେ 72 ଘଣ୍ଟା ପୂର୍ବରୁ ତଥ୍ୟ ଦେବାକୁ ପଡିବ । କୋଭିଡ ସମୟରେ ଵ୍ୟଵସ୍ଥା କୁ ସରଲୀ କରଣ କରିବାକୁ କମିସନରେଟ ପୋଲିସ ପକ୍ଷରୁ ଏହି ପୋର୍ଟାଲ ବ୍ୟବସ୍ଥା କରାଯାଇଛି ।

ମୁଖ୍ୟମନ୍ତ୍ରୀଙ୍କ ବଡ ଘୋଷଣା: ସରପଞ୍ଚଙ୍କୁ ପୁଣି ମିଳିବ ଜିଲ୍ଲାପାଳ କ୍ଷମତା, କୋଭିଡରେ ମୃତ୍ୟୁ ହେଲେ ଏହି ସୁବିଧା…

ଭୁବନେଶ୍ୱର: କରୋନା ବିରୋଧରେ  ବାଚସ୍ପତିଙ୍କ ଅଧ୍ୟକ୍ଷତାରେ ଆଜି ଅନୁଷ୍ଠିତ ସର୍ବଦଳୀୟ ବୈଠକରେ ମୁଖ୍ୟମନ୍ତ୍ରୀନବୀନ ପଟ୍ଟନାୟକ ଅନେକ ଗୁରୁତ୍ବପୂର୍ଣ୍ଣ ଘୋଷଣା କରିଛନ୍ତି । ମୁଖ୍ୟମନ୍ତ୍ରୀ ବୈଠକରେ ଯୋଗଦେବା ସହ  କହିଛନ୍ତି ଯେ ଗତ ଏକ ମାସରୁ ଉର୍ଦ୍ଧ୍ବ ସମୟ ଧରି ଓଡିଶାରେ ସଂକ୍ରମଣ ବଢୁଛି । ମହାପ୍ରଭୁଙ୍କ ଆଶୀର୍ବାଦରୁ ଆମେ ପରିସ୍ଥିତିକୁ ମୋଟାମୋଟି ଭାବରେ ନିୟନ୍ତ୍ରଣରେ ରଖିବା ସହ ରୋଗୀକୁ ସେବା ଯୋଗାଇ ଦେବା ଦିଗରେ କାମ କରିଚାଲିଛୁ । ଆମ ପ୍ରଶାସନ ଓ ସ୍ବାସ୍ଥ୍ୟକର୍ମୀ ମାନେ ଯେପରି ଦିନରାତି କାମ କରିଚାଲିଛନ୍ତି, ସେଥିପାଇଁ ମୁଖ୍ୟମନ୍ତ୍ରୀ ଏହି ଅବସରରେ ସେମାନଙ୍କର ଉଚ୍ଚପ୍ରଶଂସା କରିଥିଲେ ।

କୋଭିଡ ସଂକ୍ରମଣରେ ପ୍ରାଣ ହରାଇଥିବା ବ୍ୟକ୍ତିଙ୍କ ପତ୍ନୀ ଏବଂ ବାପା-ମାଙ୍କୁ ହରାଇ ଥିବା ପିଲାଙ୍କୁ ମଧୁବାବୁ ପେନ୍‌ସନ୍‌ ଯୋଜନାରେ ସାମିଲ କରାଯିବ ବୋଲି ବଡ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ  । ସେହିପରି ଗତବର୍ଷ ପରି ସରପଞ୍ଚମାନେ ଜିଲ୍ଲାପାଳ ଦାୟିତ୍ୱ ଫେରିପାଇବେ ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ  ।  କୋଭିଡ ପରିଚାଳନାରେ ଗୋଷ୍ଠୀକୁ ମୁଖ୍ୟ ସ୍ତମ୍ଭ ଭାବେ ବର୍ଣ୍ଣନା କରି ମୁଖ୍ୟମନ୍ତ୍ରୀ କହିଥିଲେ ଯେ ଆରମ୍ଭରୁ ହିଁ ଗ୍ରାମ ପଞ୍ଚାୟତ ଓ ଗାଁ କଲ୍ୟାଣ ସମିତି ଏଥିରେ ସାମିଲ ଅଛନ୍ତି ।

ଲୋକଙ୍କୁ ସେବା ଯୋଗାଇବା ପାଇଁ ANM, ଆଶା, ଅଙ୍ଗନବାଡି କର୍ମୀ ଓ ମିଶନ ଶକ୍ତି ଗୋଷ୍ଠୀ ଆଦି ସମସ୍ତଙ୍କୁ ସାଥିରେ ନେଇ କୋଭିଡ ପରିଚାଳନା କାମ ଜାରି ରହିଛି  ।ଆସନ୍ତା ମଇ ୨୪ ତାରିଖରୁ ୩ ମାସ ପାଇଁଁ ସାରା ରାଜ୍ୟରେ ଆଶା ଓ ANM ମାନେ ଘରକୁ ଘର ବୁଲି କୋଭିଡ ଲକ୍ଷଣ ଓ ଜଟିଳ ରୋଗ ସଂପର୍କରେ ସର୍ଭେ କରିବେ ।ଏଥିପାଇଁ ସେମାନଙ୍କୁ ୩ ମାସ ପାଇଁ ମାସିକ ୧୦୦୦ ଟଙ୍କା ଲେଖାଏ ପ୍ରୋତ୍ସାହନ ରାଶି ଦିଆଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଥିଲେ।

ସେହିପରି ପ୍ରତି ଗାଁ ରେ ଥିବା ଗାଁ କଲ୍ୟାଣ ସମିତି ମାନଙ୍କୁ ମଧ୍ୟ କୋଭିଡ ନିୟନ୍ତ୍ରଣ ପାଇଁ ବିଭିନ୍ନ କାର୍ଯ୍ୟ ନିମନ୍ତେ ୧୦ ହଜାର ଟଙ୍କା ସହାୟତା ଦିଆଯିବ  । ଅନ୍ୟପଟେ  ଗୃହ ସଂଗରୋଧ ତଦାରଖ ଦାୟିତ୍ବରେ ଥିବା ଆଶାକର୍ମୀ ମାନଙ୍କୁ ମଧ୍ୟ ବାଇସାଇକେଲ, ଚପଲ, ଛତା, ଟର୍ଚ୍ଚ ଓ କପ୍‌ବୋର୍ଡ ଆଦି ପାଇଁ ଏକକାଳୀନ ୧୦ ହଜାର ଟଙ୍କା ସହାୟତା ଦିଆଯିବ ନେଇ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ  ।

ଲକ୍‌ଡାଉନ କାର୍ଯ୍ୟକାରୀ କରିବା ଏବଂ ଗାଁର ଆବଶ୍ୟକତାକୁ ଦେଖି ଗାଁରେ TMC ଖୋଲିବା ବିଷୟ ନେଇ ସରପଞ୍ଚମାନେ ସେମାନଙ୍କର ଜିଲ୍ଲାପାଳ କ୍ଷମତା ପ୍ରୟୋଗ କରିପାରିବେ । ଗତବର୍ଷ ତୁଳନାରେ ଏ ବର୍ଷ ଅନ୍ୟ ରାଜ୍ୟକୁ ଫେରୁଥିବା ଲୋକଙ୍କ ସଂଖ୍ୟା କମ୍‌ ଥିଲେ ମଧ୍ୟ ସରକାର ଜୋନାଲ TMC ଆରମ୍ଭ କରି ସାରିଛନ୍ତି। ସେହିପରି ସ୍ୱାସ୍ଥ୍ୟସେବା ଭିତ୍ତିଭୂମିକୁ ସୁଦୃଢ କରିବା ସହିତ ICU-HDU ଶଯ୍ୟାରେ ବୃଦ୍ଧି କରାଯାଇଛି । ପ୍ରତି ଜିଲ୍ଲାରେ ଅକ୍ସିଜେନ ସଂଯୁକ୍ତ ଶଯ୍ୟାର ବ୍ୟବସ୍ଥା ମଧ୍ୟ କରାଯାଇଛି ।

ତ୍ରୁଟିଶୂନ୍ୟ ଅକ୍ସିଜେନ  ଯୋଗାଣ ପାଇଁ ଅଧିକ  ସିଲିଣ୍ଡର, refilling ଓ ପରିବହନ କାର୍ଯ୍ୟ ତଦାରଖ କରାଯାଉଛି । ମୁଖ୍ୟ ଡାକ୍ତରଖାନା ଗୁଡିକରେ ଅକ୍ସିଜେନ ପ୍ଲାଣ୍ଟ ପ୍ରତିଷ୍ଠା ସହ  ସିଲିଣ୍ଡର ମଧ୍ୟ ଆମଦାନୀ କରାଯାଉଛି । ଜରୁରୀ ଔଷଧ ଓ ଅକ୍‌ସିଜେନ ଯୋଗାଣରେ ଯେପରି ଅସୁବିଧା ନ ହୁଏ, ସେଥିପ୍ରତି ସରକାର ଦୃଷ୍ଟି ଦେଇଛନ୍ତି  ।
ନିଜ ରାଜ୍ୟର ଚାହିଦା ପୂରଣ ସହିତ  ଓଡିଶା ଅନ୍ୟ ରାଜ୍ୟକୁ ମଧ୍ୟ ଅକ୍ସିଜେନ ଯୋଗାଇ ବହୁ ମୂଲ୍ୟବାନ ଜୀବନ ରକ୍ଷା କରିପାରୁଛି । ଏହା ଓଡିଶା ପାଇଁ ନିଶ୍ଚିତ ଭାବରେ ଗୌରବର କଥା ବୋଲି କହିଛନ୍ତି ମୁଖ୍ୟମନ୍ତ୍ରୀ ।

ସେହିପରି ଅନ୍ୟ ରାଜ୍ୟକୁ ଅକ୍ସିଜୋନ ଯୋଗାଣ କରିବା ପାଇଁ ସରକାର ଟାକ୍ସଫୋର୍ସ ଗଠନ କରିଛନ୍ତି  । ଏହି ଲଢେଇରେ ସ୍ବାସ୍ଥ୍ୟ କର୍ମୀ ଓ ଡାକ୍ତରମାନଙ୍କ ସବୁଠାରୁ ଗୁରୁ ଦାୟିତ୍ୱ ଥିବାରୁ ଏ କ୍ଷେତ୍ରରେ ମାନବ ସମ୍ବଳ ବୃଦ୍ଧି ଉପରେ ଗୁରୁତ୍ୱ ଦିଆଯାଇଛି ଏବଂ ୭୮୬ ଡାକ୍ତର ଓ ୫୧୩୭ ପାରାମେଡିକାଲ ଷ୍ଟାଫଙ୍କୁ ଇତି ମଧ୍ୟରେ ନିଯୁକ୍ତି ଦିଆଯାଇଛି । ଏହାସହିତ ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କୁ ଚୁକ୍ତିଭିତ୍ତିକ ନିଯୁକ୍ତି ଦେବା ପାଇଁ ମଧ୍ୟ ପଦକ୍ଷେପ ନିଆଯାଇଛି ।

ଓଡିଶାର ଲୋକଙ୍କୁ ମାଗଣା ପରୀକ୍ଷା ଓ ରୋଗୀଙ୍କୁ ମାଗଣା ଚିକିତ୍ସା ସୁବିଧା ଯୋଗାଇ ଦିଆଆଉଛି। ଘରୋଇ ଡାକ୍ତରଖାନା ମାନଙ୍କୁ ସାଥିରେ ନେଇ କୋଭିଡ ରୋଗୀଙ୍କୁ ଉତ୍ତମ ଚିକିତ୍ସା ଯୋଗାଇ ଦିଆଯାଉଛି। ଏହାଦ୍ବାରା ରୋଗୀ ଶୀଘ୍ର ଚିକିତ୍ସା ସେବା ପାଉଛନ୍ତି ଓ ସାରା ଦେଶରେ ଓଡିଶାର ମୃତ୍ୟୁ ହାର ସେଥିପାଇଁ କମ୍‌ ରହିଛି ବୋଲି ମୁଖ୍ୟମନ୍ତ୍ରୀ କହିଥିଲେ। ଲୋକଙ୍କୁ ସତର୍କ କରି ମୁଖ୍ୟମନ୍ତ୍ରୀ କହିଥିଲେ ଯେ ହୁଏତ ଆଗକୁ କୋଭିଡର ଅନେକ ଲହର ଆସିପାରେ । ତେଣୁ ଆମକୁ ଦୀର୍ଘ ଲଢେଇ ପାଇଁ ପ୍ରସ୍ତୁତ ରହିବାକୁ ହେବ। କରୋନା ବିରୁଦ୍ଧରେ ସଫଳ ଲଢେଇ ପାଇଁ ଟିକାକରଣ ଆମର ମୁଖ୍ୟ ରଣକୌଶଳ ହେବ ବୋଲି କହିଛନ୍ତି  ।