ନୂଆଦିଲ୍ଲୀ: ଟିକା ନେଇଥିବା ଶିକ୍ଷକ ଓ ଛାତ୍ରଛାତ୍ରୀ ସ୍କୁଲ ପରିସରରେ ମାସ୍କ ପିନ୍ଧିବା ଆବଶ୍ୟକ ନାହିଁ। ଏହା କହିଛି ଆମେରିକାର ରୋଗ ନିୟନ୍ତ୍ରଣ ଓ ନିରାକରଣ କେନ୍ଦ୍ର ବା ସିଡିସି। କୋଭିଡ ସଂକ୍ରମଣ ହ୍ରାସ, ହସ୍ପିଟାଲରେ ଭର୍ତ୍ତି ହେଉଥିବା ରୋଗୀଙ୍କ ସଂଖ୍ୟା ହ୍ରାସ ପାଇବାରେ ଲାଗିଛି। ଏହାସହ ଜାତୀୟ ଟିକାକରଣ ଅଭିଯାନରେ ଏପରିକି ୧୨ ବର୍ଷର ପିଲାଙ୍କୁ ଟିକା ଦେବାକୁ ଯୋଜନା ଚାଲିଛି। ଏହି ପରିପ୍ରେକ୍ଷୀରେ ମାସ୍କ ପିନ୍ଧିବା ଜରୁରୀ ନୁହେଁ ବୋଲି କହିଛନ୍ତି ନ୍ୟୁୟର୍କ ସ୍ଥିତ ସିଡିସିର ମୁଖ୍ୟ ଏରିନ ସୋବେର ସାଜ୍। ସେ କହିଛନ୍ତି ଦେଶବାସୀଙ୍କୁ ସୁରକ୍ଷା ଦେବା ଲାଗି ଅଭିଯାନ ଜାରି ରହିଥିବା ବେଳେ, ସ୍କୁଲରେ ଏହି ପ୍ରକ୍ରିୟା ଲାଗୁ କରିବା ଲାଗି ପଦକ୍ଷେପ ନିଆଯାଇଛି। ସିଡିସିର ନୂଆ ପ୍ରସ୍ତାବ ଅନୁସାରେ କେଉଁ ପିଲା ଟିକା ନେଇଛନ୍ତି, ତାହା ଜାଣିବା ଲାଗି ଶିକ୍ଷକଙ୍କ ପାଇଁ ଗାଇଡଲାଇନ ଜାରି କରିବାର ଆବଶ୍ୟକତା ନାହିଁ। ଏହାସହ କେଉଁ ଶିକ୍ଷକ ଟିକା ନେଇଛନ୍ତି ତାହା ଜାଣିବା ବି ଅଭିଭାବକଙ୍କ ଆବଶ୍ୟକତା ନାହିଁ।
ଭାରସାମ୍ୟ ହରାଇ ଘାଟି ତଳକୁ ଖସିଲା ବାଇକ, ଦୁଇ ବାଇକ ଆରୋହି ମୃତ
ବାଲିଗୁଡ଼ା: କନ୍ଧମାଳ ଜିଲ୍ଲା ବାଲିଗୁଡ଼ା ମାଦିନାଟ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା। ଭାରସାମ୍ୟ ହରାଇ ଦୁଇ ବାଇକ୍ ଆରୋହୀଙ୍କ ମୃତ୍ୟୁ ହୋଇଛି। ମୃତକ ଦୁଇଜଣ କୁଟିକିଆ ଅଞ୍ଚଳର ସୁନିଲ ଦିଗାଳ ଓ ସୁମନ୍ତ ବେହେରଦଳାଇ ହୋଇଥିବା ଜଣାପଡ଼ିଛି। ସୂଚନା ଅନୁଯାୟୀ ଗତକାଲି ବିଳମ୍ବିତ ରାତିରେ ଦୁଇଜଣ ଯୁବକ ବାଲିଗୁଡ଼ାରୁ କୁଟିକିଆ ଯାଉଥିବା ବେଳେ ମାଦିନାଟ ନିକଟସ୍ଥ ଘାଟିରେ ଭାରସାମ୍ୟ ହରାଇ ଦୁର୍ଘଟଣା ଗ୍ରସ୍ତ ହୋଇଥିଲା। ଫଳରେ ଦୁଇଜଣ ବାଇକ୍ ଆରୋହୀଙ୍କ ମୃତ୍ୟୁ ହୋଇଛି। ଆଜି ସକାଳୁ ଘଟଣା ସମ୍ପର୍କରେ ଖବରପାଇ ଘଟଣାସ୍ଥଳରେ ବାଲିଗୁଡ଼ା ପୋଲିସ୍ ପହଞ୍ଚି ତଦନ୍ତ ଆରମ୍ଭ କରିଛ।
କାଳିଆକୁ ଦେଖିବା ଲାଗି ସମ୍ବଲପୁରରୁ ପୁରୀ ୩୩୯ କିଲୋମିଟର ଚାଲି ଚାଲି ଆସିଲେ ଏହି ଭକ୍ତ
ପୁରୀ: ମନରୁ ଥରୁଟିଏ ହେ ମହାପ୍ରଭୁ କାଲିଆ ସାଆନ୍ତ ଡାକିଦେଲେ ସବୁ ଅସମ୍ଭବ ସମ୍ବବରେ ପରିଣତ ହୋଇଯିବ। ମନର ଠାକୁର ମନୁଆ ମନକଥା ସବୁ ବୁଝେ। ସେଥିପାଇଁ ତ ସେ ଜଗତର ନାଥ ଶ୍ରୀଜଗନ୍ନାଥ। ତାକୁ ନଦେଖି କଣ ଜୀବନରେ ଆଗକୁ ବଢ଼ି ହେବ। ତାଙ୍କ ବିନା ସବୁ ଅସମ୍ଭବ ସେ ଅନନ୍ତ ସେ କୋଟି ବ୍ରହ୍ମାଣ୍ଡର ମଉଡ଼ମଣି। ଆଉ ସେଇ ମଉଡ଼ମଣିକୁ ଦେଖିବା ଲାଗି ସମ୍ବଲପୁରରୁ ପୁରୀକୁ ଲାଗିଛି ଜଣେ ଭକ୍ତଙ୍କର ଡୋରୀ। ମୁହଁରେ ଜଗନ୍ନାଥ ନାମ ନେଇ ୯ ଦିନରେ ୩୭୦ କିଲୋମିଟରର ଯାତ୍ରା। ଏହା ପ୍ରମାଣିତ କରି ଦେଖାଇଛନ୍ତି ସମ୍ବଲପୁରର ବିଲ୍ଡର ପ୍ରମୋଦ ରାଠି। ମହାପ୍ରଭୁଙ୍କ ଦର୍ଶନର କରିବାର ଇଚ୍ଛା ରଖି ସେ ସମ୍ବଲପୁରରୁ ଚାଲି ଚାଲି ଆସି ଶ୍ରୀକ୍ଷେତ୍ରରେ ପହଞ୍ଚିଛନ୍ତି। କୋଭିଡ୍ କଟକଣା ପାଇଁ ମହାପ୍ରଭୁଙ୍କ ଦର୍ଶନ କରି ପାରିନଥିଲେ ବି ପତିତପାବନକୁ ଦର୍ଶନ କରି ଆଶୀର୍ବାଦ ନେଇ ଫେରିଛନ୍ତି। ତାଙ୍କର ଏଭଳି ଭକ୍ତିଭାବନା ପାଇଁ ଜିଲ୍ଲା ପ୍ରଶାସନ ତରଫରୁ ଫୁଲମାଳ ଦେଇ ସ୍ୱାଗତ କରାଯାଇଛି।
ସମ୍ବଲପରୁର କ୍ଷେତରାଜପୁରରେ ହେଉଛି ଜଗନ୍ନାଥ ଭକ୍ତ ପ୍ରମୋଦଙ୍କ ଘର। ବିଲ୍ଡର ଭାବେ ଦୀର୍ଘ ଦିନ ଧରି କାମ କରି ଆସୁଛନ୍ତି। ସେ ଶ୍ରୀଜଗନ୍ନାଥଙ୍କୁ ବହୁତ ଭଲ ପାଆନ୍ତି। ହଠାତ୍ ରଥଯାତ୍ରା ପୂର୍ବରୁ ମହାପ୍ରଭୁଙ୍କୁ ଦର୍ଶନ କରିବାର ଇଚ୍ଛା ତାଙ୍କ ମନରେ ଜନ୍ମିଥିଲା। ଏଥିପାଇଁ ଜୁଲାଇ ୧ରୁ ନିଜ ସହଯୋଗୀ ଦିନେଶ ସିଂଘାଣିଆଙ୍କ ସହ ସମ୍ବଲପୁର ସହରରୁ ଚାଲିବା ଆରମ୍ଭ କରିଥିଲେ ପ୍ରମୋଦ। ଦିନେଶ ଚାଲି ଚାଲି ଆସିନଥିଲେ ବି ପ୍ରମୋଦ ଚାଲି ଚାଲି ଆସିବା ସମୟରେ ସୁବିଧା ଅସୁବିଧା କଥା ବୁଝୁଥିଲେ। ଏ ଭିତରେ ଅନେକ ଘାତ ପ୍ରତିଘାତ ବି ପ୍ରମୋଦ ସହିଛନ୍ତି। ରାତିରେ ଯେଉଁଠି ପାଇଛନ୍ତି, ସେଠି ବିଶ୍ରାମ ନେଇଛନ୍ତି। ପ୍ରାୟ ୩୩୯ କିଲୋମିଟର ଅତିକ୍ରାନ୍ତ କରିବା ପରେ ୯ ଦିନ ପରେ ଶ୍ରୀକ୍ଷେତ୍ରରେ ପହଞ୍ଚିବା ପରେ ପ୍ରମୋଦ ଅନେକ ଖୁସି ବ୍ୟକ୍ତ କରିଛନ୍ତି। ମହାପ୍ରଭୁଙ୍କ ସାଷ୍ଠାଙ୍ଗ ପ୍ରଣାମ କରି ଆଶୀର୍ବାଦ ନେଇଛନ୍ତି। ମହାପ୍ରଭୁଙ୍କ ପ୍ରତି ଥିବା ଭକ୍ତିଭାବ ତାଙ୍କ କଷ୍ଟକୁ ଦୂର କରି ଦେଇଛି। ଏତେ ବାଟ ଚାଲି ଚାଲି ଆସିଥିଲେ ବି ତାଙ୍କୁ ବାଟରେ ସେଭଳି କିଛି କଷ୍ଟ ଲାଗିନି ବୋଲି କହିଛନ୍ତି ପ୍ରମୋଦ।
ଖଣି ରାଜସ୍ୱ ସଂଗ୍ରହରେ ରାଜ୍ୟ ସରକାରଙ୍କୁ ବଡ଼ ସଫଳତା: ବିଗତ ବର୍ଷ ତୁଳନାରେ ୩ଶହ ପ୍ରତିଶତ ଅଧିକ ରାଜସ୍ୱ ସଂଗ୍ରହ
ଭୁବନେଶ୍ୱର: ଇତିହାସ ରଚିଲା ରାଜ୍ୟ ଖଣି ବିଭାଗ । ଚଳିତ ଆର୍ଥିକବର୍ଷର ପ୍ରଥମ କ୍ୱାର୍ଟରରେ ଖଣି ରାଜସ୍ୱ ସଂଗ୍ରହ ହେଲା ୯ ହଜାର ୨୦୦ କୋଟି ଟଙ୍କା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ୫-T ସଂସ୍କାର ଓ ବିଭାଗୀୟ ଅଧିକାରୀଙ୍କ ନିଷ୍ଠା ଯୋଗୁ ସରକାର ରାଜସ୍ୱ ସଂଗ୍ରହ କ୍ଷେତ୍ରରେ ରେକର୍ଡ ସୃଷ୍ଟି କରିପାରିଛନ୍ତି । ୨୦୨୧-୨୨ ଆର୍ଥିକବର୍ଷରେ ଖଣି ରାଜସ୍ୱ ବାବଦରେ ୧୫ ହଜାର କୋଟି ଟଙ୍କା ଆଦାୟ ହେବ ବୋଲି ବିଭାଗ ଲକ୍ଷ୍ୟ ଧାର୍ଯ୍ୟ କରିଛି ।
ଖଣି ରାଜସ୍ୱ ସଂଗ୍ରହରେ ରାଜ୍ୟ ସରକାରଙ୍କୁ ବଡ଼ ସଫଳତା । ଆର୍ଥିକବର୍ଷର ପ୍ରଥମ କ୍ୱାର୍ଟରରେ ରାଜସ୍ୱ ଆଦାୟ ୯ ହଜାର ୨୦୦ କୋଟି ଟଙ୍କା। ଯାହାକି ବିଭାଗର ସର୍ବକାଳୀନ ରେକର୍ଡ । କରୋନା ମହାମାରୀ ସତ୍ତ୍ୱେ ଜୁନ୍ ଶେଷସୁଦ୍ଧା ଲୁହାପଥର, ମାଙ୍ଗାନିଜ୍, ବକ୍ସାଇଟ୍, କ୍ରୋମାଇଟ୍ ଓ କୋଇଲା ଉତ୍ପାଦନ ୨୦୧୯-୨୦ ଆର୍ଥିକବର୍ଷ ତୁଳନାରେ ୧୧୧ ପ୍ରତିଶତ ବୃଦ୍ଧି ପାଇଛି । ସେହିପରି ଖଣିଜ ପରିବହନ କ୍ଷେତ୍ରରେ ମଧ୍ୟ ୧୦୪ ପ୍ରତିଶତ ବୃଦ୍ଧି ଘଟିଛି । ୨୦୧୯-୨୦ ଏପ୍ରିଲ ପହିଲାରୁ ଜୁଲାଇ ୬ ତାରିଖ ସୁଦ୍ଧା ଖଣି ରାଜସ୍ୱ ୩ ହଜାର ୯୩ କୋଟି ସଂଗ୍ରହ ହୋଇଥିଲା । ୨୦୨୧-୨୨ ଆର୍ଥିକବର୍ଷର ଏହି ସମୟରେ ୯ ହଜାର ୬୧୭ କୋଟିରୁ ଅଧିକ ରାଜସ୍ୱ ସଂଗ୍ରହ ହୋଇଛି । ଯାହାକି ବିଗତ ବର୍ଷ ତୁଳନାରେ ୩୧୦ ପ୍ରତିଶତ ଅଧିକ ।
କେନ୍ଦ୍ର ସରକାର ଆର୍ଥିକ କଟକଣା ଲଗାଇବା ସହ ରାଜ୍ୟର ନ୍ୟାଯ୍ୟ ହକ୍ ଦେବାରେ ଟାଳଟୁଳ ନୀତି ଆପଣାଇଛନ୍ତି । କିନ୍ତୁ ରାଜ୍ୟ ସରକାର କେନ୍ଦ୍ରକୁ ଅପେକ୍ଷା ନ କରି ନିଜସ୍ୱ ସମ୍ବଳ ସଂଗ୍ରହକୁ ଅଧିକ ଗୁରୁତ୍ୱ ଦେଇଛନ୍ତି । ବିଭାଗୀୟ ସଚିବ କହିଛନ୍ତି, ମୁଖ୍ୟମନ୍ତ୍ରୀଙ୍କ ଦିଗଦର୍ଶନ ଯୋଗୁ ଏହା ସମ୍ଭବ ହୋଇପାରିଛି । ଆର୍ଥିକବର୍ଷ ଶେଷ ସୁଦ୍ଧା ୧୫ ହଜାର କୋଟିରୁ ଅଧିକ ଖଣି ରାଜସ୍ୱ ଆଦାୟ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି ।
ରାଜସ୍ୱ ସଂଗ୍ରହରେ ରେକର୍ଡ । ସର୍ବକାଳୀନ ରେକର୍ଡ କଲା ରାଜ୍ୟ ଖଣି ବିଭାଗ । ଚଳିତ ଆର୍ଥିକବର୍ଷର ପ୍ରଥମ କ୍ୱାର୍ଟରରେ ୯ ହଜାର ୨୦୦ କୋଟି ଟଙ୍କା ଆଦାୟ । ଗତବର୍ଷ ତୁଳନାରେ ୧୧୧ ପ୍ରତିଶତ ଓ ତା’ ପୂର୍ବବର୍ଷଠାରୁ ୩୧୦ ପ୍ରତିଶତ ଅଧିକ । ମୁଖ୍ୟମନ୍ତ୍ରୀଙ୍କ ୫-T ସଂସ୍କାରକୁ ସଫଳତା । ଏ ବର୍ଷ ୧୫ ହଜାର କୋଟିରୁ ଅଧିକ ଆଦାୟ ପାଇଁ ଲକ୍ଷ୍ୟଧାର୍ଯ୍ୟ ହୋଇଛି ।
ଏଥିସହିତ ପଢ଼ନ୍ତୁ: ଇସ୍ପାତ କାରଖାନା ସ୍ୱପ୍ନ ପୂରା ହୋଇଥିବାରୁ ଖୁସି ବ୍ୟକ୍ତ କଲେ ମୁଖ୍ୟମନ୍ତ୍ରୀ: କହିଲେ, ବିଜୁ ବାବୁ ମଧ୍ୟ କେନ୍ଦୁଝର ବିକାଶ ନେଇ ତତ୍ପର ଥିଲେ
ଅକ୍ସଫାମର ଆଶ୍ଚର୍ଯ୍ୟଜନକ ରିପୋର୍ଟ: ଖାଦ୍ୟାଭାବ ଯୋଗୁଁ ବିଶ୍ୱରେ ପ୍ରତି ୧ ମିନିଟରେ ୧୧ ଜଣ ପ୍ରାଣ ହରାଉଛନ୍ତି
ନୂଆଦିଲ୍ଲୀ: ବିକାଶର ଭୂଗୋଳରେ ଭୋକର ଜ୍ୱାଳା । ବଢ଼ିଚାଲିଛି ବିଲିୟନ ବିଲିୟନ ଡଲାର ନିବେଶ । ଆହ୍ୱାନର ସିଡିରେ ଲମ୍ବିଚାଲିଛି ଯୋଜନା ପରେ ଯୋଜନା । ହେଲେ ନୂଆ ଆକଳନ ଦେଇଛି ଛାତି ଥରାଇଦେବା ପରି ତଥ୍ୟ । ବିଶ୍ୱରେ ପ୍ରତି ମିନଟରେ କ୍ଷୁଧାରେ ପ୍ରାଣ ହରାଉଛନ୍ତି ୧୧ ଜଣ । କରୋନାଠାରୁ ବି ଭୟଙ୍କର ସାଜିଛି କ୍ଷୁଧା । ଏହି ଚିନ୍ତାଜନକ ତଥ୍ୟ ଦେଇଛି ଅକ୍ସଫାମ । ଏହି ତଥ୍ୟ ପ୍ରମାଣିତ କରୁଛି ବିଶ୍ୱରେ ଏକ ଦୁର୍ଭିକ୍ଷ ପରି ସ୍ଥିତି ଜାରି ରହିଛି । ଗତବର୍ଷ ତୁଳନାରେ ଏହି ସଂଖ୍ୟା ୬ଗୁଣ ବୃଦ୍ଧି ପାଇଛି । ଏପରିକି ମହାମାରୀ କରୋନାରେ ପ୍ରତି ମିନଟରେ ୭ ଜଣ ପ୍ରାଣ ହରାଉଥିବାବେଳେ କ୍ଷୁଧାରେ ୧୧ ଜଣ ପ୍ରାଣ ହରାଉଛନ୍ତି । କରୋନା ଝଡ଼ ଓ କ୍ଷୁଧାର ଜ୍ୱାଳା ବିଶ୍ୱରେ ଏକ ଅଭୁତପୂର୍ବ ସଙ୍କଟ ସୃଷ୍ଟି କରିଛି । ଏହି ସଙ୍କଟ ଏବେ ତୀବ୍ର ଆକାର ଧାରଣ କରୁଛି ବୋଲି କହିଛନ୍ତି ଅକ୍ସଫାମ ଆମେରିକା ସଭାପତି ତଥା ସିଇଓ ଆବେ ମାକ୍ସମ୍ୟାନ । ବର୍ତ୍ତମାନ ବିଶ୍ୱରେ ୧୫ କୋଟି ୫୦ ଲକ୍ଷ ଲୋକ ଖାଦ୍ୟ ନିରପତ୍ତାରୁ ବଞ୍ଚିତ ହୋଇଛନ୍ତି । ଗତ ବର୍ଷଠାରୁ ଏହି ସଂଖ୍ୟା ୨ କୋଟି ଅଧିକ । ସେମାନଙ୍କ ମଧ୍ୟରୁ ଦୁଇ ତୃତୀୟାଂଶ ସେମାନଙ୍କ ଦେଶରେ ଚାଲିଥିବା ସାମିରକ ବିବାଦ ଯୋଗୁ ଖାଦ୍ୟାଭାବର ଶିକାର ହୋଇଛନ୍ତି । ହେଲେ ବିଶ୍ୱରେ ସାମରିକ ଖର୍ଚ୍ଚ କମୁନାହିଁ । ଦିନକୁ ଦିନ ବଢିଚାଲିଛି ସାମରିକ ଖର୍ଚ୍ଚ । କରୋନା କାଳରେ ଜନଜୀବନ ବହୁ ବିପଦର ସମ୍ମୁଖୀନ ହେଉଥିବାବେଳେ ସାମରିକ ଖର୍ଚ୍ଚ ବୃଦ୍ଧି କରାଯାଉଛି । ବର୍ତ୍ତମାନ ସାମରିକ ଖର୍ଚ୍ଚ ପରିମାଣ ୫୧ ବିଲିୟନ ଡଲାର ବୃଦ୍ଧି ପାଇଛି । କ୍ଷୁଧା ଦୂର କରିବା ଲାଗି ଯେତିକି ଅର୍ଥ ଆବଶ୍ୟକ ଏହି ପରିମାଣ ତା’ଠାରୁ ୬ ଗୁଣ ଅଧିକ । ଆଫଗାନିସ୍ତାନ, ଇଥିଓପିଆ, ଦକ୍ଷିଣ ସୁଦାନ, ସିରିୟା ଓ ୟେମନରେ କ୍ଷୁଧାର ସ୍ଥିତି ଭୟଙ୍କର ବୋଲି ରିପୋର୍ଟରେ କୁହାଯାଇଛି ।



