spot_img
Home Blog Page 5594

ଗାଁ ମୁହାଁ ଗୋଠଛଡ଼ା ଦନ୍ତାହାତୀ, ଘର ଭାଙ୍ଗିଲେ ଧାନ ବସ୍ତା ନଷ୍ଟ କଲେ

କେନ୍ଦୁଝର: କେନ୍ଦୁଝର ତେଲକୋଇ ରେଞ୍ଜ ବିମଳା ଫରେଷ୍ଟ ବିଟ୍‌ ଅଞ୍ଚଳରେ ଗୋଠଛଡ଼ା ଦନ୍ତାହାତୀ ଉପଦ୍ରବ। ପଡାଙ୍ଗ ପଞ୍ଚାୟତର ଅହିଗୋଳା ଗାଁ ଜୁଆଙ୍ଗ ସାହିରେ ଗତକାଲି ବିଳମ୍ବିତ ରାତିରେ ଗୋଠଛଡା ଦନ୍ତା ଉତ୍ପାତ ମଚାଇଥିଲା। ରାତି ପ୍ରାୟ ୪ଟା ସମୟରେ ରବି ପେଣ୍ଠେଇ ଓ ତାଙ୍କ ସ୍ତ୍ରୀ  ୨ପିଲାଙ୍କ ସହିତ ଘରେ ଶୋଇଥିବା ବେଳେ ଦନ୍ତା ଘର ଭାଙ୍ଗିଦେଇଥିଲା। ଭୟରେ ପିଲାଛୁଆ ଧରି ସାହି ଭିତରେ ଥିବା ପଡ଼ିଶା ଘରକୁ ଲୁଚି ପଳାଇ ଥିଲେ।

ଦନ୍ତା ଘର ଭାଙ୍ଗିବା ସହ  ଦୁଇବସ୍ତା ଧାନ ଖାଇବା ସହ ଦୁଇବସ୍ତା ଚାଉଳ ଟେକି ନେଇ ଚାଲି ଯାଇଥିଲା। ଏବଂ ହାଣ୍ଡିରେ ଥିବା ପଖାଳକୁ ମଧ୍ୟ ଖାଇ ଦେଇଥିଲା। ଗାଁରେ ଦନ୍ତା ପଶିବା ଦେଖି ଲୋକେ ବନବିଭାଗକୁ ଜଣାଇଥିଲେ ମଧ୍ୟ ଯୋଗାଯୋଗ ହୋଇପାରିନଥିଲା। ଫଳରେ ଗାଁ ଲୋକେ ଟାୟାର ଜାଳି ହାତୀକୁ ଘଉଡାଇଥିଲେ। ବାରମ୍ବାର ହାତୀ ଉପଦ୍ରବ ଜାରି ରହିଥିଲେ ମଧ୍ୟ ବନବିଭାଗ କୌଣସି ପଦକ୍ଷେପ ନେଉନଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି।

ମହାରାଷ୍ଟ୍ର ଓ କେରଳ ଫେରନ୍ତାଙ୍କ ଉପରେ କଡ଼ା ନଜର ରଖିଛି ରାଜ୍ୟ ସ୍ୱାସ୍ଥ୍ୟ ବିଭାଗ

ଭୁବନେଶ୍ୱର: ମହାରାଷ୍ଟ୍ର ଓ କେରଳ ଫେରନ୍ତାଙ୍କ ଉପରେ କଡ଼ା ନଜର ରଖିଛି ରାଜ୍ୟ ସ୍ୱାସ୍ଥ୍ୟ ବିଭାଗ। ସେଠାରୁ ଆସୁଥିବା ଲୋକଙ୍କ ଟ୍ରେସିଂ, ଟେଷ୍ଟିଂ  ଓ ଟ୍ରିଟମେଣ୍ଟ ଉପରେ ରାଜ୍ୟ ସରକାର ଅଧିକ ଫୋକସ୍ କରିଛନ୍ତି। ମହାରାଷ୍ଟ୍ର ଓ କେରଳରେ କରୋନା ସଂକ୍ରମଣ ବୃଦ୍ଧି ପାଇଛି ଓ ନୂଆ ମ୍ୟୁଟାଣ୍ଟ ଦେଖାଦେଇଛି। ଏହି ଦୁଇ ରାଜ୍ୟ ଫେରନ୍ତାଙ୍କ ଉପରେ ନଜର ରଖିବାକୁ ବିଭିନ୍ନ ଜିଲ୍ଲାର ଅଙ୍ଗନବାଡ଼ି, ଆଶା ଦିଦି ଓ ସର୍ଭେଲାନ୍ସ କରୁଥିବା ଟିମଙ୍କୁ ନିର୍ଦ୍ଦେଶ ଦିଆଯାଇଥିବା ଡିଏମ୍‌ଇଟି ନିର୍ଦ୍ଦେଶକ ସି.ବି.କେ ମହାନ୍ତି କହିଛନ୍ତି। କେବଳ ରାଜ୍ୟ ସରକାର ନୁହନ୍ତି, କେନ୍ଦ୍ର ସରକାର ମଧ୍ୟ ପଦକ୍ଷେପ ନେବାକୁ ସେ ମତ ରଖିଛନ୍ତି।

ପ୍ରଥମ ଓ ଦ୍ୱିତୀୟ ଲହରରେ ସରକାର ଯେଉଁ ପଦକ୍ଷେପ ନେଇଥିଲେ, ତୃତୀୟ ଲହର ପାଇଁ ଅନେକ ଆଗୁଆ ପ୍ରସ୍ତୁତି ହୋଇଛି। ଆବଶ୍ୟକ ପଡ଼ିଲେ, ଆଇସିୟୁ, ବେଡ୍ ଓ ଭେଣ୍ଟିଲେଟର ସଂଖ୍ୟା ବୃଦ୍ଧି କରାଯିବ। ରାଜ୍ୟ ସରକାରଙ୍କ ଏପରି ପଦକ୍ଷେପକୁ ସ୍ବାସ୍ଥ୍ୟ ବିଶେଷଜ୍ଞ ସ୍ୱାଗତ କରିଛନ୍ତି। ଏଭଳି ହେଲେ ଅନ୍ୟରାଜ୍ୟର ସଂକ୍ରମଣ ଆମ ରାଜ୍ୟରେ ବିଶେଷ କାୟା ବିସ୍ତାର କରିବନି ବୋଲି ସ୍ୱାସ୍ଥ୍ୟ ବିଶେଷଜ୍ଞ ଡାକ୍ତର ନିରୋଜ ମିଶ୍ର କହିଛନ୍ତି।

ଦିନକ ପରେ ଟାହିଆ ଦୋହଲାଇ ବଡ଼ଦାଣ୍ଡକୁ ଛୁଟିଆସିବେ ଚତୁର୍ଦ୍ଧା ମୁରତି, ହେଲେ ଖାଁଖାଁ ଶ୍ରୀକ୍ଷେତ୍ର

ପୁରୀ: ଦିନକ ପରେ ବିଶ୍ୱ ପ୍ରସିଦ୍ଧ ଘୋଷ ଯାତ୍ରା। ବଡ଼ଦାଣ୍ଡକୁ ଟାହିଆ ଦୋହଲାଇ ଛୁଟି ଆସିବେ ଚତୁର୍ଦ୍ଧା ମୁରତି। ଆଉ ସେଥିପାଇଁ ଚଳଚଞ୍ଚଳ ହୋଇଉଠିଛି ଶ୍ରୀକ୍ଷେତ୍ର। ପୂର୍ବ ବର୍ଷ ଭଳି ଚଳିତ ବର୍ଷ ମଧ୍ୟ ଭକ୍ତ ବିନା ଖାଁ ଖାଁ ବଡ ଦାଣ୍ଡ। ଭକ୍ତ ଓ ଭଗବାନଙ୍କ ମିଳନରେ ପ୍ରତିବନ୍ଧକ ସାଜିଛି କରୋନା ସଂକ୍ରମଣ। କଟକଣାରେ ଗଡ଼ିବ ମହାବାହୁଙ୍କ ରଥ। ବିନା ଭକ୍ତରେ ମାଉସୀଙ୍କ ଘରକୁ ଯିବେ ତିନି ବିଗ୍ରହ। ସେପଟେ ଆଜି ହେଉଛି ଶ୍ରୀଜିଉଙ୍କ ଉଭାଯାତ୍ରା। ରଥଯାତ୍ରା ପୂର୍ବୁରୁ ଆଜି ସରିବ ରଥକନା ମଣ୍ଡଣି। ଅନବସରର ୧୫ଦିନ ଗୁପ୍ତନୀତି ପରେ ଗତକାଲି ନବଯୌବନ ବେଶରେ ଦର୍ଶନ ଦେଇଛନ୍ତି ମହାବାହୁ।

କୋଭିଡ୍ କଟକଣା ଯୋଗୁ ଭକ୍ତ ନବଯୌବନ ବେଶର ଦର୍ଶନରୁ ବଞ୍ଚିତ ହୋଇଛନ୍ତି। ତେବେ ଦୀର୍ଘ ପନ୍ଦର ଦିନ ପରେ ଭକ୍ତମାନେ ବଡ଼ଦାଣ୍ଡରୁ ପତିତପାବନଙ୍କୁ ଦର୍ଶନ କରି ଭାବବିହ୍ଵଳ ହୋଇପଡିଥିଲେ। ରଥଯାତ୍ରାକୁ ଦୃଷ୍ଟିରେ ରଖି ଆଜି ସମୀକ୍ଷା କରିବେ ବରିଷ୍ଠ ପୋଲିସ ଅଧିକାରୀ। ଅତିରିକ୍ତ ଡିଜି ଆଇନ ଶୃଙ୍ଖଳା, କେନ୍ଦ୍ରଞ୍ଚଳ ଆଇଜି, ଏସପି ଓ ୨୦୦ରୁ ଅଧିକ ବରିଷ୍ଠ ପୋଲିସ ଅଧିକାରୀ ଏହି ବୈଠକରେ ସାମିଲ ହେବେ। ଭକ୍ତ ଶୂନ୍ୟ ରଥ ଯାତ୍ରା କିଭଳି ପାଳନ ହେବ ଓ ରଥଟଣା କାର୍ଯ୍ୟ କିଭଳି ଶେଷ ହେବ ହେବ ସେନେଇ ବୈଠକରେ ଆଲୋଚନା ହେବ। କଟକଣା ଓ ସୁରକ୍ଷାକୁ ଦୃଷ୍ଟିରେ ରଖି ଆସନ୍ତାକାଲି  ରାତି ୮ରୁ ୧୩ତାରିଖ ରାତି ୮ପର୍ଯ୍ୟନ୍ତ ପୁରୀ ସହରରେ କର୍ଫ୍ୟୁ ଜାରି କରାଯିବ।

ଆବାସ ଗୃହ ଟଙ୍କା ହଡ଼ପ ଅଭିଯୋଗରେ ଗିରଫ ହେଲେ ଠିକାଦାର

ଉମରକୋଟ: ଗରିବ ହିତାଧିକାରୀଙ୍କ ଆବାସ ଗୃହ ଟଙ୍କା ହଡ଼ପ ଅଭିଯୋଗ। ଗିରଫ ହେଲେ ୪୨୦ ଠିକାଦାର। ଘଟଣା ଘଟିଛି ନବରଙ୍ଗପୁର ଜିଲ୍ଲା ଉମରକୋଟରେ। କୁର୍ସି ପଞ୍ଚାୟତରେ ପ୍ରଧାନମନ୍ତ୍ରୀ ଆବାସ ଯୋଜନା ଓ ବିଜୁ ପକ୍କା ଘର ଯୋଜନାରେ ଅନେକ ହିତାଧିକାରୀଙ୍କ ନାଁରେ ଆସିଥିବା ଅନୁଦାନକୁ ଚଞ୍ଚକତା କରି ଠିକାଦାର ସଞ୍ଜୀବ ସୁବୁଦ୍ଧି ହଡ଼ପ କରିଥିବା ଉମରକୋଟ ଥାନା ରେ ଅଭିଯୋଗ ହୋଇଛି।

ଏକାଥରକେ ୫ଟି ଏତଲା ଆସିବା ପରେ ଘଟଣାର ପ୍ରାଥମିକ ତଦନ୍ତ କରି ଠିକାଦାର ସଞ୍ଜୀବ ସୁବୁଦ୍ଧିକୁ ଗିରଫ କରି କୋର୍ଟ ଚାଲାଣ କରିଛି ଉମରକୋଟ ପୋଲିସ। ସୂଚନା ଅନୁସାରେ ନୁଆପାରା ଗାଁରେ ୫ ବର୍ଷ ତଳେ ରଜବତୀ କଲାର, ଫୁଲମତି ଗଣ୍ଡ, ମଙ୍ଗତି ଗଣ୍ଡ, ଜୟମଣି ଗଣ୍ଡ, ମାରୀ ଗଣ୍ଡଙ୍କ ନାଁରେ ପ୍ରଧାନମନ୍ତ୍ରୀ ଆବାସ ଓ ବିଜୁ ପକ୍କା ଘର ଯୋଜନାରେ ଘର ମିଳିଥିଲା।

ନିରୀହ ଆଦିବାସୀ ସମ୍ପ୍ରଦାୟ ହୋଇଥିବାରୁ ପକା ଘର ତିଆରିର ଏତେ ଧାରଣା ନାହିଁ। ଏହାର ସୁଯୋଗ ନେଇ ସଂଜୀବ ସୁବୁଦ୍ଧି ନାମକ ଠିକାଦାର ଘର ତିଆରି କରାଇ ଦେବାକୁ କହି ସେମାନଙ୍କର ଆଧାର କାର୍ଡ, ବ୍ୟାଙ୍କ୍ ପାସ୍ ବୁକ୍ ସହ ଆବଶ୍ୟକ କାଗଜପତ୍ର ମାଗି ନେଇଥିଲା। ଏବଂ ସେମାନଙ୍କ ଆକାଉଣ୍ଟକୁ ଆସିଥିବା ଟଙ୍କା ଉଠାଇନେବା ସହ  ଘର କାମ କିନ୍ତୁ ଅଦାରେ ପକାଇଥିବା ଅଭିଯୋଗ ହୋଇଛି। ଘର ସମ୍ପୂର୍ଣ୍ଣ କରିବାକୁ ସୁନା ଓ ଜମି ବନ୍ଧା ପକାଇ କିଛି କିଛି କାମ କରିଛନ୍ତି ଏମାନେ। ସେପଟେ ଫୋନ୍ ଉଠାଇନଥିଲା ସଂଜୀବ ସୁବୁଦ୍ଧି ଅନ୍ୟପଟେ ଥାନାରେ ଏତଲା ପରେ ଗିରଫ ହୋଇଛି ସଞ୍ଜୀବ। ଜାମିନ ନାମଞ୍ଜୁର ହେବାରୁ ବର୍ତ୍ତମାନ ଉମରକୋଟ ଉପ କାରାଗାରକୁ ପଠାଇ ଦିଆଯାଇଛି।

ରାଜ୍ୟରେ ବଢ଼ୁଛି ବାଘଛାଲ ବେପାର, ପୁଣି ଜବତ ହେଲା ୪ ବାଘଛାଲ

କଳାହାଣ୍ଡି: କଳାହାଣ୍ଡିରୁ ୪ ବାଘଛାଲ ଜବତ । ୪ ଅଭିଯୁକ୍ତଙ୍କୁ ଗିରଫ କଲା ୱାଇଲ୍ଡ ଲାଇଫ୍ କ୍ରାଇମ୍ କଣ୍ଟ୍ରୋଲ ବ୍ୟୁରୋ ଟିମ୍ । ଜାଲ ବିଛାଇ ଦକ୍ଷିଣ ବନଖଣ୍ଡ ଶଗଡା ଅଂଚଳରୁ ୩ ଚିତାବାଘ ଛାଲ ସହ ଗୋଟିଏ ମହାବାଳ ବାଘ ଛାଲ ଜବତ କରିଛି । କ୍ରାଇମ୍ ବୋର୍ଡ଼ ଅଧିକାରୀ ବିପିନ ଚୌଧୁରୀଙ୍କ ନେତୃତ୍ୱରେ ଗରିଆବନ୍ଧ, ନୁଆପଡା ଓ କଳାହାଣ୍ଡିର ବନ ଅଧିକାରୀ ସାମିଲ୍ ଅଛନ୍ତି । ଟିମ୍ ବେପାରୀ ପରିଚୟ ଦେଇ ରାଜ୍ୟ ବନ୍ୟଜନ୍ତୁ ସାମଗ୍ରୀ ଚୋରା ଚାଲାଣକାରୀ ଦଳର ପର୍ଦ୍ଦାଫାଶ କରିଛି । ଏହି ରାକେଟ୍ ଓଡ଼ିଶା, ଛତିଶଗଡ, ପଶ୍ଚିମବଙ୍ଗରେ ସକ୍ରିୟ ରହିଥିଲେ ।

ଉନ୍ମୋଚନ ହେଲା ଜଗନ୍ନାଥ ଆଧାରିତ ଛଅଟି ଭଜନର ଅଡିଓ

ଭୁବନେଶ୍ୱର: ମିରାମ୍ବିକା ପ୍ରଡକ୍ସନ ତରଫରୁ କବି ନିରଞ୍ଜନ ସେଠୀଙ୍କ ରଚିତ ଜୀବନ, ଯନ୍ତ୍ରଣା ଓ ଜଗନ୍ନାଥ ଆଧାରିତ ଛଅଟି ଗୀତର ଅଡିଓ ‘ପୁଣ୍ୟବ୍ରହ୍ମ’ଏବଂ ସାଇ ସୃତି ପବ୍ଲିକେସନ ତରଫରୁ ‘ପ୍ରୀତିନୀଡ଼’ ଓ “ନଥିବା ଲୋକର ଛାଇ ,’ଦୁଇଟି କବିତା ସଂକଳନର ଶୁଭ ଉନ୍ମୋଚନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ସୂଚନା ଓ ଲୋକ ସମ୍ପର୍କ ଏବଂ ଜଳ ସମ୍ପଦ ମନ୍ତ୍ରୀ ରଘୁନନ୍ଦନ ଦାସ, ପୂର୍ବତନ ସାଂସଦ କବି ପ୍ରସନ୍ନ ପାଟ୍ଟଶାଣୀ, ପୂର୍ବ ପ୍ରଶାସକ ରବି ନାରାୟଣ ନନ୍ଦ, ଗବେଷକ ବାଗ୍ମୀ ପ୍ରଫେସର ପାର୍ଥ ସାରଥୀ ଅଜୟ ବାରିକ ମୁଖ୍ୟ ଅତିଥିଭାବେ ଯୋଗଦେଇଥିଲେ ।

ଜୀବନ, ଜଞ୍ଜାଳ, ଯନ୍ତ୍ରଣା ଓ ଜଗନ୍ନାଥଙ୍କୁ ନେଇ ଅଡିଓ ପୁଣ୍ୟବ୍ରହ୍ମ ଅତ୍ୟନ୍ତ ଭଲ ଦୃଦୟସ୍ପର୍ଶୀ ଏବଂ ଏହା ସଙ୍ଗୀତ ଜଗତକୁ ଏକ ବଳିଷ୍ଠ ଅବଦାନ ବୋଲି ଅତିଥିମାନେ ମତବ୍ୟକ୍ତ କରିଥିଲେ।

କବି ନିରଞ୍ଜନ ସେଠୀଙ୍କ ଗୀତିକବିତା ସଂକଳନ ‘ପ୍ରୀତିନୀଡ଼’ପ୍ରେମ, ବିରହ, ବିଚ୍ଛେଦ, ପ୍ରତାରଣାର କଥା କହୁଥିବା ବେଳେ ଆଧୁନିକ କବିତା ସଂକଳନ ‘ନଥିବା ଲୋକର ଛାଇ’ ଭିନ୍ନ ସ୍ୱାଦର କଥା କହେ। ଜୀବନର ପ୍ରତି ପାଦରେ ଦୁଃଖ, ଯନ୍ତ୍ରଣା ଓ ଅମାନବୀୟ ଅବବୋଧରେ ଛଟପଟ ଜୀବନରେ ଅଦୃଶ୍ୟରେ  ମଣିଷକୁ କେହି ଜଣେ ବାଟ କଢେଇ ନେଉଥିବା କଥା କବି ଅଙ୍ଗେ ଅଙ୍ଗେ ଅନୁଭବ କରିଥିବା କବିତାଗୁଡିକର ସାରମର୍ମ। ଅତ୍ୟନ୍ତ ସରଳ ସାବଲୀଳ ଶବ୍ଦ ବିନ୍ୟାସରେ ପରିସ୍ଫୁଟ ଶ୍ରୀ ସେଠୀଙ୍କ ଦ୍ୱାରା ରଚିତ କବିତା ସଂକଳନ ଦୁଇଟି ଓଡ଼ିଆ ବାଣୀ ଭଣ୍ଡାରକୁ ରୁଦ୍ଧିମନ୍ତ କରିବ ବୋଲି ଅତିଥିମାନେ ଆଶା ବ୍ୟକ୍ତ କରିଥିଲେ।

ଆଜିଠୁ ୪ଦିନ ଯାଏଁ ଅଧିକାଂଶ ଜିଲ୍ଲାକୁ ଭିଜାଇବ ବର୍ଷା

ଭୁବନେଶ୍ୱର: ଆଜିଠୁ ୪ଦିନ ଯାଏ ଅଧିକାଂଶ ଜିଲ୍ଲାକୁ ଭିଜାଇବ ବର୍ଷା। ସ୍ୱଳ୍ପରୁ ମଧ୍ୟମ ଧରଣର ବର୍ଷାରେ ଭିଜିବ ଅଧା ଓଡ଼ିଶା। ତେବେ କେତେକ ସ୍ଥାନରେ ପ୍ରବଳ ବର୍ଷା ହେବାର ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ବିଶେଷ କରି ଉପକୂଳ ଓ ଦକ୍ଷିଣ ଓଡ଼ିଶାର ବର୍ଷାର ପ୍ରଭାବ ରହିବ। ଉପକୀଳ ଜିଲ୍ଲା ଗୁଡିକରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହେବ।

ଦକ୍ଷିଣ ଓଡ଼ିଶାର କେତେକ ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଗଞ୍ଜାମ, ଗଜପତି, କେନ୍ଦୁଝର, ମୟୂରଭଞ୍ଜ, ଢେଙ୍କାନାଳ, ରାୟଗଡା, କନ୍ଧମାଳ, କୋରାପୁଟ, ମାଲକାନାଗିରିକୁ ବର୍ଷା ପାଇଁ ୟେଲୋ ଆଲର୍ଟ ଜାରି କରିଛି ପାଣିପାଗ କେନ୍ଦ୍ର। ମାଲକାନଗିରି, କୋରାପୁଟ, ନବରଙ୍ଗପୁର, ଗଜପତି ଓ ଗଞ୍ଜାମରେ ବର୍ଷାର ପରିମାଣ ଅଧିକ ରହିବ । ତେବେ ଭୁବନେଶ୍ୱରରେ ପାଗ ମେଘୁଆ ରହିବା ସହିତ କିଛି ସ୍ଥାନରେ ହାଲୁକା ବର୍ଷା ହେବ। ପୁରୀ, ଖୋର୍ଦ୍ଧା ଓ ନୟାଗଡ଼ରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ନେଇ ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର।

କରୋନାରୁ ଧିରେ ଧିରେ ସୁସ୍ଥ ହେଉଛି ରାଜ୍ୟ, ଚିନ୍ତା ବଢ଼ାଉଛି ଉପକୂଳ

ଭୁବନେଶ୍ୱର: ରାଜ୍ୟରେ ଦିନକୁ ଦିନ ତଳକୁ ତଳକୁ ଖସୁଛି କରୋନା ସଂକ୍ରମଣ। ଗୋଟିଏ ଦିନକରେ ୨ହଜାର ୩୩୪ ପଜିଟିଭ ଚିହ୍ନଟ ହୋଇଛନ୍ତି। କ୍ୱାରେଣ୍ଟାଇନ ସେଣ୍ଟରରୁ ୧୩୪୨ ଜଣ କରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ ଲୋକାଲ କଣ୍ଟାକ୍ଟ ରହିଛି ୯୯୨। ଖୋର୍ଦ୍ଧାରୁ ସର୍ବାଧିକ ୩୮୦ ପଜିଟିଭ୍‌ ଚିହ୍ନଟ ହୋଇଥିବା ବେଳେ କଟକରୁ ୩୭୧, କେନ୍ଦ୍ରାପଡ଼ାରୁ ୧୦୬, ଯାଜପୁରରୁ ୧୭୯, ବାଲେଶ୍ୱରରୁ ୧୬୪, ଭଦ୍ରକରୁ ୧୨୧, ପୁରୀରୁ ୧୦୬, ମୟଳରଭଞ୍ଜରୁ ୧୦୪, ଜଗତସିଂପୁରରୁ ୧୦୧ କରୋନା ଆକ୍ରନ୍ତ ଚିହ୍ନଟ ହୋଇଛନ୍ତି। ସେହିପରି ନୟାଗଡ଼ରୁ ୯୪, ସୁନ୍ଦରଗଡ଼ରୁ ୮୭, ଷ୍ଟେଟ୍‌ପୁଲରୁ ୭୬, ଅନୁଗୁଳରୁ ୬୪, କେନ୍ଦରୁଝରୁ ୫୪ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ତେବେ ୫୮ ଜଣଙ୍କ ଜୀବନ ନେଇଛି କିଲର ଭାଇରାସ୍। ଗତ ୨୪ ଘଣ୍ଟାରେ ସୁସ୍ଥ ହୋଇଛନ୍ତି ୩ହଜାର ୩୪୧। ୨୧ଜିଲ୍ଲାରେ ଶହେ ତଳେ ରହିଛି ଦୈନିକ ସଂକ୍ରମଣ।

ମୋଦିଙ୍କ ନୂଆ କ୍ୟାବିନେଟକୁ ନେଇ ନୂଆ ବିବାଦ, ୪୨% ମନ୍ତ୍ରୀଙ୍କ ନାଁରେ ଅପରାଧିକ ମାମଲା

ନୂଆଦିଲ୍ଲୀ: କେନ୍ଦ୍ର କ୍ୟାବିନେଟ ସମ୍ପ୍ରସାରଣ ପରେ ନୂଆ ମନ୍ତ୍ରୀଙ୍କୁ ନେଇ ନୂଆ ନୂଆ ବିବାଦ ସାମ୍ନାକୁ ଆସୁଛି । ୭୮ ଜଣ ମନ୍ତ୍ରୀଙ୍କ ମଧ୍ୟରୁ ୪୨ ପ୍ରତିଶତ ମନ୍ତ୍ରୀଙ୍କ ନାଁରେ ଅପରାଧିକ ମାମଲା ଚାଲିଛି। କିଛି ମାମଲା ହତ୍ୟା ଭଳି ସଙ୍ଗୀନ ଅପରାଧ ରହିଛି। ଏଡିଆରର ରିପୋର୍ଟରୁ ସ୍ପଷ୍ଟ ହୋଇଛି ଏହି ତଥ୍ୟ। ବୁଧବାର ମୋଟ ୪୩ ଜଣ ମନ୍ତ୍ରୀ ଶପଥ ନେଇଥିବା ବେଳେ ୧୫ ଜଣଙ୍କୁ କ୍ୟାବିନେଟ ପାହ୍ୟା ମିଳିଛି। ଅନ୍ୟ ୨୩ ଜଣଙ୍କୁ ରାଷ୍ଟ୍ର ମନ୍ତ୍ରୀ ଭାବେ ଦାୟିତ୍ୱ ମିଳିଛି। କେନ୍ଦ୍ରରେ ଥିବା ମନ୍ତ୍ରୀଙ୍କ ମଧ୍ୟରୁ ୨୪ରୁ ୩୦ ପ୍ରତିଶତ ମନ୍ତ୍ରୀଙ୍କ ନାଁରେ ହତ୍ୟା, ହତ୍ୟା ଉଦ୍ୟମ ଏବଂ ଡକାୟତି ଭଳି ମାମଲା ରହିଛି। କୁଛବେହାରରୁ ସାଂସଦ ଥିବା ନିତିଶ ପାରମାଣିକଙ୍କ ନାଁରେ ହତ୍ୟା ମାମଲା ରହିଛି। ତାଙ୍କ ବିରୋଧରେ ଧାରା ୩୦୨ରେ ମାମଲା ଚାଲିଛି । ତାଙ୍କୁ ଗୃହମନ୍ତ୍ରାଳୟର ରାଷ୍ଟ୍ର ମନ୍ତ୍ରୀ ଭାବେ ଦାୟିତ୍ୱ ମିଳିଛି। ଅନ୍ୟ ତିନି ଜଣ ମନ୍ତ୍ରୀଙ୍କ ନାଁରେ ମଧ୍ୟ ସଙ୍ଗୀନ ମାମଲା ରହିଛି। ସେମାନେ ହେଲେ ଜନ୍‌ ବାର୍ଲା, ପଙ୍କଜ ଚୌଧୁରୀ ଏବଂ ଭି ମୁରଲୀ ଧରନ। ତେବେ ନୂଆ ମନ୍ତ୍ରୀଙ୍କ ମଧ୍ୟରୁ ୯୦ ପ୍ରତିଶତ ମନ୍ତ୍ରୀ କୋଟିପତି। ସେମାନେ ଦାଖଲ କରିଥିବା ସମ୍ପତ୍ତି ତାଲିକାରୁ ଏହି ତଥ୍ୟ ମିଳିଛି। ଅତିକମ୍‌ରେ ସମସ୍ତଙ୍କର ୧୭ କୋଟି ଟଙ୍କାର ସମ୍ପତ୍ତି ରହିଛି। ଜ୍ୟୋତିରାଦିତ୍ୟ ସିନ୍ଧିଆ, ପିୟୁଷ ଗୋଏଲ, ନାରାୟଣ ରାଣେ, ରାଜୀବ ଚନ୍ଦ୍ରଶେଖରଙ୍କର ୫୦ କୋଟି ଟଙ୍କାରୁ ଅଧିକ ମୁଲ୍ୟର ସମ୍ପତ୍ତି ରହିଛି।

ଏଣିକି ଏହି ଦେଶରେ ଟିକା ନେଇଥିବା ଶିକ୍ଷକ ଓ ଛାତ୍ରଛାତ୍ରୀଙ୍କୁ ସ୍କୁଲରେ ମାସ୍କ ପିନ୍ଧିବା ଆବଶ୍ୟକତା ନାହିଁ

ନୂଆଦିଲ୍ଲୀ: ଟିକା ନେଇଥିବା ଶିକ୍ଷକ ଓ ଛାତ୍ରଛାତ୍ରୀ ସ୍କୁଲ ପରିସରରେ ମାସ୍କ ପିନ୍ଧିବା ଆବଶ୍ୟକ ନାହିଁ। ଏହା କହିଛି ଆମେରିକାର ରୋଗ ନିୟନ୍ତ୍ରଣ ଓ ନିରାକରଣ କେନ୍ଦ୍ର ବା ସିଡିସି। କୋଭିଡ ସଂକ୍ରମଣ ହ୍ରାସ, ହସ୍ପିଟାଲରେ ଭର୍ତ୍ତି ହେଉଥିବା ରୋଗୀଙ୍କ ସଂଖ୍ୟା ହ୍ରାସ ପାଇବାରେ ଲାଗିଛି। ଏହାସହ ଜାତୀୟ ଟିକାକରଣ ଅଭିଯାନରେ ଏପରିକି ୧୨ ବର୍ଷର ପିଲାଙ୍କୁ ଟିକା ଦେବାକୁ ଯୋଜନା ଚାଲିଛି। ଏହି ପରିପ୍ରେକ୍ଷୀରେ ମାସ୍କ ପିନ୍ଧିବା ଜରୁରୀ ନୁହେଁ ବୋଲି କହିଛନ୍ତି ନ୍ୟୁୟର୍କ ସ୍ଥିତ ସିଡିସିର ମୁଖ୍ୟ ଏରିନ ସୋବେର ସାଜ୍। ସେ କହିଛନ୍ତି ଦେଶବାସୀଙ୍କୁ ସୁରକ୍ଷା ଦେବା ଲାଗି ଅଭିଯାନ ଜାରି ରହିଥିବା ବେଳେ, ସ୍କୁଲରେ ଏହି ପ୍ରକ୍ରିୟା ଲାଗୁ କରିବା ଲାଗି ପଦକ୍ଷେପ ନିଆଯାଇଛି। ସିଡିସିର ନୂଆ ପ୍ରସ୍ତାବ ଅନୁସାରେ କେଉଁ ପିଲା ଟିକା ନେଇଛନ୍ତି, ତାହା ଜାଣିବା ଲାଗି ଶିକ୍ଷକଙ୍କ ପାଇଁ ଗାଇଡଲାଇନ ଜାରି କରିବାର ଆବଶ୍ୟକତା ନାହିଁ। ଏହାସହ କେଉଁ ଶିକ୍ଷକ ଟିକା ନେଇଛନ୍ତି ତାହା ଜାଣିବା ବି ଅଭିଭାବକଙ୍କ ଆବଶ୍ୟକତା ନାହିଁ।