spot_img
Home Blog Page 5571

ବାଳିକା ବଧୁର “ଦାଦିସା”ଙ୍କ ୭୫ ବର୍ଷ ବୟସରେ ପରଲୋକ, ହାତେଇଛନ୍ତି ଜାତୀୟ ସମ୍ମାନ ସହ ଅନେକ ପ୍ରଶଂସା

ନୂଆଦିଲ୍ଲୀ: ଆଉ ନାହାନ୍ତି ପ୍ରଶିଦ୍ଧ ସିରିଏଲ କଳାକାର ସୁରେଖା ସିକରି। ୭୫ ବର୍ଷ ବୟସରେ ତାଙ୍କର ନିଧନ ହୋଇଛି। ଶୁକ୍ରବାର ହାର୍ଟ ଆଟାକା କାରଣରୁ ତାଙ୍କର ମୃତ୍ୟୁ ହୋଇଛି। ସେ ତାଙ୍କ ଜୀବନରେ ହାତେଇଛନ୍ତି ଅନେକ ପ୍ରଶଂସା। କଳାକାର ଜଗତରେ ସୁରେଖା ହେଉଛନ୍ତି ଚମକୁଥିବା ନକ୍ଷତ୍ର। ଷ୍ଟାରପ୍ଲସ୍‌ ଠାରୁ ଆରମ୍ଭ କରି କଲସର ଟିଭିରେ ଅନକେ ବଡ଼ ବଡ଼ ସିରିଏଲରେ ସେ ଅଭିନୟ କରି ଜିତିଛନ୍ତି ଦର୍ଶକଙ୍କର ମନ। କଲସରେ ଦେଉଥିବା ବାଳିକା ବଧୂରେ ଦାଦିସା ଅଭିନୟ କରି ହାତେଇଥିଲେ କୋଟି କୋଟି ପ୍ରଶଂସା। ୨୦୨୦ ରେ ସୁରେଖାଙ୍କୁ ଦ୍ୱିତୀୟ ଥର ପାଇଁ ବ୍ରେନ୍‌ ଷ୍ଟ୍ରୋକ ଆସିଥିଲା। ସେବେଠାରୁ ତାଙ୍କର ଦେହ ଅଧିକରୁ ଅଧିକ ଖରାପ ହୋଇଚାଲିଥିଲା।

ତିନି ତିନିଥର ଜାତୀୟ ପୁରସ୍କାର ହାତେଇଛନ୍ତି ସୁରେଖା ସିକରି। ସେପଟେ ସୁରେଖାଙ୍କ ମୃତ୍ୟୁ କାରଣରୁ ବଲିଉଡ ଏବଂ ଟିଭି ଜଗତରେ ଶୋକର ଲହରୀ ଖେଳିଯାଇଛି। ସୁରେଖା ସିକରିଙ୍କ ମୃତ୍ୟୁକୁ ନେଇ ସେଲିବ୍ରିଟିମାନେ ଦୁଃଖ ପ୍ରକାଶ କରିଛନ୍ତି। ପ୍ରଶଂସକଙ୍କ ସମେତ ସେଲିବ୍ରିଟମାନେ ସୁରେଖା ସିକରିଙ୍କୁ ସୋସିଆଲ ମିଡିଆରେ ଶ୍ରଦ୍ଧାଞ୍ଜଳି ଅର୍ପଣ କରୁଛନ୍ତି। ବାଳିକା ବଧୂରେ ସୁରେଖା ସିକରି ଦାଦିସା ଭୂମିକାରେ ଅଭିନୟ କରିଥିଲେ। ଏହି ଭୂମିକାରେ ସୁରେଖାଙ୍କୁ ବହୁତ ପସନ୍ଦ କରାଯାଇଥିଲେ।

ଥିଏଟର, ଚଳଚ୍ଚିତ୍ର ଏବଂ ଟିଭିରେ ସୁରେଖା ଅନେକ କାମ କରିଛନ୍ତି । ୧୯୭୮ ମସିହାରେ ସୁରେଖା ରାଜନୈତିକ ଡ୍ରାମା ଚଳଚ୍ଚିତ୍ର “କିସା କୁର୍ସି କା” ରୁ କ୍ୟାରିୟର ଆରମ୍ଭ କରିଥିଲେ।  ଶ୍ରେଷ୍ଠ ସହାୟକ ଅଭିନେତ୍ରୀ ପାଇଁ ସୁରେଖା ଜାତୀୟ ପୁରସ୍କାର ପାଇଥିଲେ। ସେ ତମେସ (୧୯୮୮), ମମୋ (୧୯୯୫) ଏବଂ ବଧାଇ ହୋ (୨୦୧୮) ଚଳଚ୍ଚିତ୍ର ପାଇଁ ଏହି ସମ୍ମାନ ମିଳିଥିଲା। ଜାତୀୟ ପୁରସ୍କାର ବ୍ୟତୀତ ସୁରେଖା ଫିଲ୍ମଫେୟାର ଆଓ୍ୱାଡ, ସ୍କ୍ରିନ ଆୱାର୍ଡ ଏବଂ ଭାରତୀୟ ଟେଲିଭିଜନ ଏକାଡେମୀ ପୁରସ୍କାର ଜିତିଛନ୍ତି।

ପଞ୍ଚାୟତ ନିର୍ବାଚନ ପାଇଁ ପ୍ରସ୍ତୁତି, ବାଲଟ ବକ୍ସ ପ୍ରସ୍ତୁତ ରଖିବାକୁ ଜିଲ୍ଲାପାଳଙ୍କୁ ଚିଠି

ଭୁବନେଶ୍ୱର: ପଞ୍ଚାୟତ ନିର୍ବାଚନ ପାଇଁ ଆରମ୍ଭ ହେଲା ପ୍ରକ୍ରିୟା । ଏବେ ଠାରୁ ଆରମ୍ଭ ହେଲାଣି ପ୍ରସ୍ତୁତି  । ଅର୍ଥାତ ନିର୍ବାଚନର ଯଥେଷ୍ଟ ପୂର୍ବରୁ ପ୍ରସ୍ତୁତି ଆରମ୍ଭ କରିଛି ରାଜ୍ୟ ନିର୍ବାଚନ ଆୟୋଗ  । ରାଜ୍ୟରେ ଆସନ୍ତା ବର୍ଷ ଅର୍ଥାତ ୨୦୨୨ ମସିହା ଫେବୃୟାରୀ ମାସରେ ପଞ୍ଚୟତ ନିର୍ବାଚନ ହେବାକୁ ଥିବାବେଳେ ରାଜ୍ୟ ନିର୍ବାଚନ କମିଶନ କାର୍ଯ୍ୟ ଆରମ୍ଭ କରିଦେଇଛନ୍ତି  ।

ଏନେଇ ଆଜି  ସମସ୍ତ ଜିଲ୍ଲାପାଳଙ୍କୁ ଚିଠି ଲେଖିଛନ୍ତି ନିର୍ବାଚନ କମିଶନର ।  ବାଲାଟ୍ ବକ୍ସ ପ୍ରସ୍ତୁତ ରଖିବା ପାଇଁ ଚିଠିରେ ନିର୍ଦ୍ଦେଶ ଦେଇଛନ୍ତି କମିଶନର । ପଞ୍ଚାୟତ ନିର୍ବାଚନ ପୂର୍ବରୁ ରାଜ୍ୟ ନିର୍ବାଚନ କମିଶନ ପ୍ରସ୍ତୁତି ଆରମ୍ଭ କରିଦେଇଛନ୍ତି । ରାଜ୍ୟ ସରକାର ପଞ୍ଜାୟତ ନିର୍ବାଚନ ପାଇଁ ପ୍ରସ୍ତୁତ ବୋଲି ଗତ ୨୯ ତାରିଖରେ ନିର୍ବାଚନ କମିଶନରଙ୍କୁ ଜଣାଇଥିଲେ । ସେଥି ପାଇଁ ସମସ୍ତ ଜିଲ୍ଲାପାଳଙ୍କିୁ ଚିଠି ଲେଖିଛନ୍ତି ନିର୍ବାଚନ କମିଶନର ।

ଡ୍ରୋନ ବ୍ୟବହାର ନେଇ ଆସିବ ନୂଆ ନୀତି, ରଦ୍ଦ ହେବ ୟୁଏଏସ ନିୟମାବଳୀ 2021

ନୂଆଦିଲ୍ଲୀ: ଡ୍ରୋନ ବ୍ୟବହାର ନେଇ କେନ୍ଦ୍ର ସରକାରଙ୍କ ଚିଠା ନୀତି ପ୍ରସ୍ତୁତ । ବିଶ୍ୱସନୀୟତା, ସ୍ୱୟଂ ପ୍ରମାଣସିଦ୍ଧ ଆଧାରରେ ଡ୍ରୋନ ବ୍ୟବହାର ନେଇ ଏହି ନୀତି ଆସିବ । ଡ୍ରୋନ ନିୟମାବଳୀ 2021 ବିଜ୍ଞପ୍ତି ପ୍ରକାଶ ପାଇଲେ ପୂର୍ବରୁ ରହିଥିବା ମାନବବିହୀନ ବିମାନ ବ୍ୟବସ୍ଥା ବା ୟୁଏଏସ ନିୟମାବଳୀ 2021 ରଦ୍ଦ ହେବ । ଡ୍ରୋନ ନିୟମାବଳୀ  ୨୦୨୧ ଅନୁସାରେ ଏଣିକି ୬ଟି କ୍ଷେତ୍ରରେ ଡ୍ରୋନ ଅପରେଟ କରିବା ଲାଗି ଅନୁମତି ମିଳିବ । ପୂ୍ର୍ବରୁ ୨୫ଟି କ୍ଷେତ୍ର ଲାଗି ଡ୍ରୋନ ଅନୁମତି ମିଳୁଥିଲା ।

ବିଶ୍ୱସନୀୟତା, ସ୍ବୟଂ ପ୍ରମାଣସିଦ୍ଧ ଓ ଅଣବ୍ୟାଘାତସୃଷ୍ଟି ଭିତ୍ତିରେ ଡ୍ରୋନ ବ୍ୟବହାର ନେଇ କେନ୍ଦ୍ର ବେସାମରିକ ବିମାନଚଳାଚଳ ମନ୍ତ୍ରଣାଳୟ ଚିଠା ନୀତି ଜାରି କରିଛି । ନୂଆ ନୀତି ଯୋଗୁ ଏଣିକି ଗ୍ରୀନ ଜୋନରେ 400 ଫୁଟ ଉଚ୍ଚରେ ଏବଂ ବିମାନବନ୍ଦରର 8ରୁ 12 କିଲୋମିଟର ମଧ୍ୟରେ 200 ମିଟର ଉଚ୍ଚରେ ଡ୍ରୋନ ଉଡାଇବା ଲାଗି କୌଣିସ ଉଡାଣ ଅନୁମିତ ଆବଶ୍ୟକ ପଡିବ ନାହିଁ । ୟୁଏଏସ ନିୟମାବଳୀ 2021 ଗତ ମାର୍ଚ୍ଚ 12 ତାରିଖରେ ଆସିଥିଲା । ମାତ୍ର ଡ୍ରୋନ ନିୟମାବଳୀ 2021 ଲାଗୁ ହେବା ପରେ ତାହା ଆଉ ବଳବତ୍ତର ହେବ ନାହିଁ ।

ଏହି ନୂଆ ନିୟମ ଅନୁସାରେ ଏଣିକି ଉତ୍ପାଦ, ସେବା ସଂକ୍ରାନ୍ତ ପ୍ରମାଣପତ୍ର, ରକ୍ଷଣାବେକ୍ଷଣ ପ୍ରମାଣପତ୍ର, ଆମଦାନୀ ସଂକ୍ରାନ୍ତ କ୍ଲିଅରାନ୍ସ, ଅପରେଟର ପରମିଟ, ଗବେଷଣା ଓ ବିକାଶ ସଂଗଠନର ସ୍ବୀକୃତି, ଷ୍ଟୁଡେଣ୍ଟ ରିମୋଟ ପାଇଲଟ ଲାଇସେନ୍ସ ଆଦି ଆବଶ୍ୟକ ପଡିବ ନାହିଁ । ପୂର୍ବର ୟୁଏଏସ ନିୟମାବଳୀ 2021 ଅନୁସାରେ ଏହି ନୂଆ ନୀତି ବେଶ୍ ତାତ୍ପର୍ଯ୍ୟପୂର୍ଣ୍ଣ ବୋଲି କହିଛନ୍ତି କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ।

ବର୍ତ୍ତମାନ ସାରା ବିଶ୍ୱରେ ପ୍ରଯୁକ୍ତି କ୍ଷେତ୍ରରେ ଡ୍ରୋନ ବିପ୍ଲବ ସୃଷ୍ଟି ହେବାକୁ ଯ଼ାଉଛି । କମ ମୂଲ୍ୟ ଦୃଷ୍ଟିରୁ ଏହାର ଭୂମିକା ଗୁରୁତ୍ବପୂର୍ଣ୍ଣ ହୋଇଛି । ନୂଆ ଚିଠା ନୀତିରେ ଡ୍ରୋନର ହସ୍ତାନ୍ତର ଓ ପଞ୍ଜିକରଣ ପ୍ରତ୍ୟାହାର କରିବା ନୀତି ମଧ୍ୟ ସହଜ କରାଯାଇଛି । ଏଣିକି ମାଇକ୍ରୋ଼ ଡ୍ରୋନ ଅର୍ଥାତ ଅଣବ୍ୟାବସାୟିକ ଡ୍ରୋନ, ନାନୋ ଡ୍ରୋନ, ଓ ଗବେଷଣା ଓ ବିକାଶ ସକାଶେ ବ୍ୟବହୃତ ଡ୍ରୋନ ସକାଶେ କୌଣସି ପାଇଲଟ ଲାଇସେନ୍ସ ଦରକାର ନାହିଁ ।

ଡ୍ରୋନରେ ପରିବହନ ହେବ କୋଭିଡ ସାମଗ୍ରୀ, ଉପାନ୍ତରେ ସହଜ ହେବ ସୁବିଧା

ଭୁବନେଶ୍ୱର: ସଂକ୍ରମଣ କମାଇବ ଡ୍ରୋନ  । ଅର୍ଥାତ ସାମ୍ପୁଲ ସଂଗ୍ରହ ଠାରୁ ଆରମ୍ଭ କରି କୋଭିଡ ପାଇଁ ବ୍ୟବହୃତ ହେଉଥିବା କିଟ ଏବଂ ଅନ୍ୟାନ ଉପକରଣ  ଏଣିକି ଡ୍ରୋନ୍ ସାହାଯ୍ୟରେ ପରିବହନ ହେବ  ।  କରୋନା କିଟ୍ ଓ ସାମ୍ପୁଲ ପରିବହନ କରାଯିବ । ବିଶେଷକରି ଉପାନ୍ତ ଓ ପାହାଡିଆ ଅଞ୍ଚଳରେ ଏପରି ସାମ୍ପୁଲ ସଂଗ୍ରହ ପାଇଁ ଅଣ୍ଟା ଭିଡିଛି ଆରଏମଆରସି । ଏନେଇ ଆରଏମଆରସି ପରିସରରେ ଗୁରୁବାର ପରୀକ୍ଷାମୂଳକ ଭାବେ ଡ୍ରୋନର ବ୍ୟବହାର କରାଯାଇଛି ।

ଯେହେତୁ କରୋନା ସାମ୍ପୁଲ ସଂଗ୍ରହ କଲା ବେଳେ ସଂଗ୍ରହ କରୁଥିବା ସ୍ବାସ୍ଥ୍ୟକର୍ମୀଙ୍କୁ ସଂକ୍ରମଣର ଭୟ ରହୁଛି, ଏସବୁକୁ ରୋକିବାକୁ ଡ୍ରୋନ୍ ବ୍ୟବହାର କରାଯିବ । ଆରଏମଆରସି ନିର୍ଦ୍ଦେଶିକା ସଂଘମିତ୍ରା ପତି ଏନେଇ ସୂଚନା ଦେଇଛନ୍ତି । ରାଜ୍ୟରେ ଦୈନିକ ୬୦ରୁ ୭୦ହଜାର ଟେଷ୍ଟିଂ କରାଯାଉଛି । ଏହାକୁ ନଜରରେ ରଖି ଡ୍ରୋନରେ କିଟ୍ ଓ ସାମ୍ପୁଲ ସଂଗ୍ରହ ବ୍ୟବସ୍ଥା ଏକ ପ୍ରଶଂସନୀୟ ଉଦ୍ୟମ ହେବ ।

ଉପାନ୍ତ ଏବଂ ଅପହଞ୍ଚ ଅଞ୍ଚଳରୁ କୋଭିଡ ସାମ୍ପୁଲ ସଂଗ୍ରହ କରି ସ୍ବାସ୍ଥ୍ୟ କର୍ମୀମାନେ ଆଣିବା ଦ୍ୱାରା ସେମାନଙ୍କୁ ମଧ୍ୟ ସଂକ୍ରମଣର ଭୟ ରହୁଥିଲା  । ଯଦି ସାମ୍ପଲ ସଂଗ୍ରହରେ ଡ୍ରେନ ବ୍ୟବହାର କରାଯାଏ ତେବେ  ନିୟୋଜିତ ସ୍ୱାସ୍ଥ୍ୟ କର୍ମୀଙ୍କୁ ସଂକ୍ରମିତ ହେବାର ଭୟ ରହିବ ନାହିଁ  । ସେପଟେ ଡ୍ରୋନ ଦ୍ୱାରା ନବା ଆଣିବା କରିବା ସହଜ ଏବଂ ଶୀଘ୍ର ହୋଇପାରିବ  ।

ପୁଣି ଆଜି PM-CM ଆଲୋଚନା, ଥାର୍ଡ ୱେଭ ନେଇ ହୋଇପାରେ ଆଲୋଚନା

ଭୁବନେଶ୍ୱର: ଆଜି ମୁଖ୍ୟମନ୍ତ୍ରୀ ମାନଙ୍କ ସହ ବୈଠକ କରିବେ ପ୍ରଧାନମନ୍ତ୍ରୀ  । ଦେଶରେ ଲାଗି ରହିଥିବା କୋଭିଡ ସ୍ଥିତି ନେଇ ୬ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ବୈଠକରେ ସାମିଲ ହେବେ ଓଡ଼ିଶା, ତାମିଲନାଡୁ, କର୍ଣ୍ଣାଟକ, ମହାରାଷ୍ଟ୍ର, କେରଳ ଓ ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ । ରାଜ୍ୟରେ କଣ ରହିଛି କୋଭିଡ୍ ସ୍ଥିତି , ଆଗାମି ଦିନରେ କିଭଳି ଏହାର ମୁକାବିଲା କରାଯାଇପାରିବ ସେ ନେଇ ହେବ ଆଲୋଚନା ।

ସମ୍ଭାବ୍ୟ ତୃତୀୟ ଲହରକୁ ଆଖି ଆଗରେ ରଖି କିଭଳି ମହାମାରୀର ମୁକାବିଲା ହେବ ସେ ନେଇ ରାଜ୍ୟ ସରକାରଙ୍କଠାରୁ ପରାମର୍ଶ ନେଇପାରନ୍ତି କେନ୍ଦ୍ର ସରକାର । ଗତ ୧୩ ତାରିଖରେ ୮ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଥିଲେ ମୋଦି । ଏବେ ବିଭିନ୍ନ ରାଜ୍ୟରେ କରୋନା ସଂକ୍ରମଣ କମିବାରେ ଲାଗିଛି । ତେବେ ହାଟବଜାର ଓ ପର୍ଯ୍ୟଟନସ୍ଥଳୀରେ ଲାଗୁଛି ଭିଡ । ଯାହାକୁ ନେଇ ଚିନ୍ତା ଜାହିର କରିଛନ୍ତି କେନ୍ଦ୍ର ସରକାର ।

ଅନୁମତି ସତ୍ତ୍ୱେ ବରମୁଣ୍ଡାରୁ ଗଡ଼ିଲାନି ବସ, ଯାତ୍ରୀ ନିରାସ

ଭୁବନେଶ୍ୱର: ବସ ଚଳାଚଳକୁ ଅନୁମତି ସତ୍ତ୍ୱେ ଭୁବନେଶ୍ୱରରୁ ଗଡ଼ିଲାନି ଯାତ୍ରୀବାହୀ ବସ । କଟକଣା କୋହଳ ସହ ବସ୍‌ରେ ଯେତିକି ସିଟ ସେତିକି ଯାତ୍ରୀଙ୍କୁ ନେଇ ବସ ଚଳାଚଳକୁ ଅନୁମତି ଦେଇଛନ୍ତି ରାଜ୍ୟ ସରକାର । ହେଲେ ବସ୍‌ ମାଲିକ ସଂଘ ବିଭିନ୍ନ ଦାବିକୁ ନେଇ ବସ ଚଳାଚଳ ନ କରିବାକୁ ନିଷ୍ପତ୍ତି ନେଇଛନ୍ତି । ଫଳରେ ଆଜି ଭୁବନେଶ୍ୱର ବରମୁଣ୍ଡା ବସଷ୍ଟାଣ୍ଡରୁ କୌଣସି ବସ ଗଡ଼ିନାହିଁ । ବସ ଚାଲିବା ଆଶାରେ ଆସିଥିବା ଯାତ୍ରୀ ମାନେ ନିରାଶ ହୋଇ ଫେରିଛନ୍ତି ।

ଭୁବନେଶ୍ୱର ଘରୋଇ ବସ ମାଲିକ ସଙ୍ଘର ଆଜି ଜରୁରୀ ବୈଠକ ଅନୁଷ୍ଠିତ ହେବ । ବୈଠକରେ ଆଲୋଚନା ସହ ପରବର୍ତ୍ତୀ କାର୍ଯ୍ୟପନ୍ଥା ସମ୍ପର୍କରେ ନିଷ୍ପତ୍ତି ନିଆଯିବ । ବସ୍ ଚଳାଚଳ ନେଇ ପ୍ରତିକ୍ରିୟା ରଖଛନ୍ତି ପରିବହନ ମନ୍ତ୍ରୀ । ବସ ମାଲିକଙ୍କ କିଛି ଦାବି ରହିଛି । ସେ ସମ୍ପର୍କରେ ସରକାର ଓ ପରିବହନ ବିଭାଗ ଅବଗତ ରହିଛି । ଆସନ୍ତାକାଲି ଘରୋଇ ବସ ମାଲିକ ସଙ୍ଘର କର୍ମକର୍ତ୍ତାଙ୍କ ସହ ଆଲୋଚନା ପାଇଁ ଦିନ ଧାର୍ଯ୍ୟ ହୋଇଛି । ଆଲୋଚନା ପରେ ବସ ଚଳାଚଳ ସ୍ୱାଭାବିକ ହେବ ବୋଲି ଆଶା ଥିବା କହିଛନ୍ତି ପରିବହନ ମନ୍ତ୍ରୀ ପଦ୍ମନାଭ ବେହେରା ।

ରାଜ୍ୟରେ ସୁଧୁରୁଛି କରୋନା ସ୍ଥିତି; ଦିନକରେ ୨ ହଜାର ୭୦ ପଜିଟିଭ

ଭୁବନେଶ୍ୱର: ରାଜ୍ୟରେ ସୁଧୁରୁଛି କରୋନା ସ୍ଥିତି । ଗତ  ୨୪ ଘଣ୍ଟାରେ ଚିହ୍ନଟ ହୋଇଛନ୍ତି ୨ ହଜାର ୦୭୦ ଜଣ କରୋନା ଆକ୍ରାନ୍ତ । ସେମାନଙ୍କ ମଧ୍ୟରୁ କ୍ବାରେଣ୍ଟାଇନରୁ ୧ ହଜାର ୧୯୫ ଜଣ ଚିହ୍ନଟ ହୋଇଥିବା ବେଳେ ଲୋକାଲ୍ କେସ୍ ରହିଛି ୮୭୫ ।

ସୂଚନା ଓ ଲୋକ ସମ୍ପର୍କ ବିଭାଗର ରିପୋର୍ଟ ଅନୁଯାୟୀ, ଖୋର୍ଦ୍ଧାରୁ ସର୍ବାଧିକ ୪୪୬ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ କଟକରୁ ୩୧୯ ସଂକ୍ରମିତ ଚିହ୍ନଟ ହୋଇଛନ୍ତି। ବାଲେଶ୍ବରରୁ ୧୭୬, ଯାଜପୁରରୁ ୧୩୬, ପୁରୀରୁ ୧୧୦, ଜଗତସିହପୁରରୁ ୯୭, ମୟୂରଭଞ୍ଜରୁ ୮୧, କେନ୍ଦ୍ରାପଡାରୁ ୭୭, ଭଦ୍ରକରୁ ୬୬, ସୁନ୍ଦରଗଡରୁ ୬୬,  ନୟାଗଡରୁ ୫୯, ଅନଗୁଳରୁ ୫୭, କେନ୍ଦୁଝରରୁ ୫୬, ଢେଙ୍କାନାଳରୁ ୪୪ ଜଣ ସଂକ୍ରମିତ ଚିହ୍ନଟ ହୋଇଛନ୍ତି  ।

ସେହିଭଳି କୋରାପୁଟରୁ ୨୩, ମାଲକାନଗିରିରୁ ୨୦, ରାୟଗଡାରୁ ୧୮, କନ୍ଧମାଳରୁ ୧୮, ସମ୍ବଲପୁରରୁ ୧୬, ବରଗଡରୁ ୧୫,  କଳାହାଣ୍ଡିରୁ ୧୨, ଗଞ୍ଜାମରୁ ୧୨, ନବରଙ୍ଗପୁରରୁ ୧୧, ବୌଦ୍ଧରୁ ୧୧, ଝାରସୁଗୁଡାରୁ ୮, ସୋନପୁରରୁ ୮, ବଲାଙ୍ଗିରରୁ ୭, ନୂଆପଡାରୁ ୭, ଗଜପତିରୁ ୬, ଦେବଗଡରୁ ୩ ଓ ଷ୍ଟେଟପୁଲରୁ ୮୫ ସଂକ୍ରମିତ ଚିହ୍ନଟ ହୋଇଛନ୍ତି  ।

ତେବେ ୨୪ ଘଣ୍ଟାରେ ସୁସ୍ଥ ହୋଇଛନ୍ତି ୨ ହଜାର ୫୬୩ ସଂକ୍ରମିତ  ।

କୂଅରେ ଭିତରେ ଫସିଛନ୍ତି ୧୩ ଜଣ, ଦୁଇ ମୃତ

ଭୋପାଳ: ମଧ୍ୟ ପ୍ରଦେଶର ବିଦିଶା ଜିଲ୍ଲା ଅନ୍ତର୍ଗତ ଗଂଜବାସୌଦାରେ ବଡ ଧରଣର ଅଘଟଣ । କୂଅରେ ପଡି ଚାଲିଗଲା ଦୁଇ ଜୀବନ । ଲାଲପଠାର ଗ୍ରାମରେ ଘଟିଥିବା ଏହି ଘଟଣା ସମସ୍ତଙ୍କୁ ଚକିତ କରିଛି । କୂଅରେ ପ୍ରାୟ ୩୦ ଜଣ ଫସିରହିଥିବାବେଳେ ଅଧା ଲୋକଙ୍କୁ ଉଦ୍ଧାର କରାଯାଇଛି । ଅଧା ଲୋକ କୂଅରେ ଫସିରହିଥିବାବେଳେ ଏବେ ବି ଉଦ୍ଧାର କାର୍ଯ୍ୟ ଜାରି ରହିଛି । ଦୁଇ ଜଣକ ମୃତ୍ୟୁ ହୋଇଥିବା ଟ୍ବିଟ୍ କରି ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ।

ଉଦ୍ଧାର କାର୍ଯ୍ୟରେ ଏନଡିଆରଏଫ, ଏସଡିଆରଏଫ ଓ ସ୍ଥାନୀୟ ପୋଲିସ ନିୟୋଜିତ ହୋଇଛନ୍ତି । ଘଟଣାସ୍ଥଳରେ ସ୍ଥାନୀୟ ଜିଲ୍ଲାପାଳ ଓ ଏସପିଙ୍କ ସହ ବରିଷ୍ଠ ଅଧିକାରୀ ଉପସ୍ଥିତ ଅଛନ୍ତି । ମୁଖ୍ୟମନ୍ତ୍ରୀ ଶିବରାଜ ସିଂ ଘଟଣାର ଉଚ୍ଚସ୍ତରୀୟ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି । ସୂଚନା ଅନୁସାରେ ଲାଲପଠାର ଗ୍ରାମର ଏକ କୂଅରେ ଜଣେ ୧୪ ବର୍ଷର ନାବାଳକ ପଡି ଯାଇଥିଲେ । ତାଙ୍କୁ ଉଦ୍ଧାର କରିବାକୁ ଯାଇ କୂଅ ନିକଟରେ ଜମା ହୋଇଥିଲେ ଅନେକ ଲୋକ । ଦୁର୍ଭାଗ୍ୟବସତଃ ଏହି ସମୟରେ ମାଟି ଭୁସୁଡି ପଡିଥିଲା । ଯାହାଫଳରେ କୂଅରେ ପ୍ରାୟ ୩୦ ଜଣ ଲୋକ ପଡିଯାଇଥିଲେ ।

ପର୍ଯ୍ୟଟନସ୍ଥଳୀରୁ ବ୍ୟାପିପାରେ ଥାର୍ଡ ୱେଭ୍, ଅଗଷ୍ଟ ଶେଷରେ ଆଶଙ୍କା

ଭୁବନେଶ୍ୱର: ଅଗଷ୍ଟ ଶେଷ ସୁଧା ଆସିବ କରୋନାର ତୃତୀୟ ଲହର । କିନ୍ତୁ ଏହା ଦ୍ବିତୀୟ ଲହର ଭଳି ସ୍ଥିତି ସୃଷ୍ଟି କରିବ ନାହିଁ । ଆଇସିଏମର ପକ୍ଷରୁ ଏଭଳି ଆକଳନ କରାଯାଇଛି । କିଛି ଅଞ୍ଚଳରେ ପ୍ରଥମ ଓ ଦ୍ବିତୀୟ ଲହରର ପ୍ରଭାବ ପଡିନଥିବା ବେଳେ ସେଠାରୁ ହିଁ ତୃତୀୟ ଲହର ଆରମ୍ଭ ହୋଇପାରେ ।

ଏଥିସହ କରୋନାର ନୂଆ ଭ୍ୟାରିଏଣ୍ଟ ଯୋଗୁଁ ତୃତୀୟ ଲହର ଅନୁମାନରୁ ଶିଘ୍ର ଆସିପାରେ । ସବୁଠାରୁ ବଡ଼ କଥା ହେଲା କରୋନାର କଟକଣା ହଟିଥିବା ରାଜ୍ୟରେ ଲୋକମାନେ ବିନା ମାସ୍କ ଏବଂ ପର୍ଯ୍ୟଟନ ସ୍ଥଳୀରେ ଜମୁଥିବା ଭିଡ ଯୋଗୁଁ କରୋନାର ତୃତୀୟ ଲହର ନିଶ୍ଚୟ ଆସିବ ବୋଲି ଆରସିଏମଆର ପକ୍ଷରୁ କୁହାଯାଇଛି ।

ଆଜିଠୁ ଖୋଲିବ ବିୟୁଟି ପାର୍ଲର-ସ୍ପା ଓ ଜିମ୍ ସେଣ୍ଟର, ଗଡ଼ିବ ବସ୍

ଭୁବନେଶ୍ୱର: ଆଜିଠାରୁ ରାଜ୍ୟରେ ଆରମ୍ଭ ହେବ ଆଂଶିକ ଲାକଡାଉନ୍ । ଖୋଲିବ ବିୟୁଟି ପାର୍ଲର, ସ୍ପା ଓ ଜିମ୍ ସେଣ୍ଟର । ବିନା ଦର୍ଶକରେ ଆୟୋଜିତ ହୋଇପାରିବ କ୍ରୀଡା ପ୍ରତିଯୋଗିତା । ସେହିଭଳି ଆଉଟ୍ ଡୋର ଓ ଇନ୍ ଡୋର ସୁଟିଂକୁ ଅନୁମତି ମିଳିଛି । କୃଷି, ଶିଳ୍ପ ପ୍ରତିଷ୍ଠାନ ସହିତ ପୂର୍ବରୁ ଅନୁମତି ଦିଆଯାଇଥିବା କାମ ଜାରି ରହିବ । ହେଲେ ପାର୍କ, ସିନେମା ହଲ୍, ମେଳା, ଯାତ୍ରା, ମଲ୍ ଖୋଲିବ ନାହିଁ । ବିବାହ, ଅନ୍ତ୍ୟେଷ୍ଟିରେ ପୂର୍ବଭଳି କଟକଣା ବଳବତ୍ତର ରହିବ ।

ସ୍କୁଲ, କଲେଜ, କୋଚିଂ ସେଣ୍ଟର ବନ୍ଦ ରହିବ । ବାର୍ ବନ୍ଦ ରହିବ । ରେସ୍ତୋରାଁରେ ଖାଇପାରିବେନାହିଁ, କେବଳ ହୋମ ଡେଲିଭରିକୁ ଅନୁମତି ଦିଆଯାଇଛି । ପୂର୍ବ ବ୍ୟବସ୍ଥା ଅନୁଯାୟୀ ଦୁଇ ଭାଗରେ ରାଜ୍ୟକୁ ବିଭକ୍ତ କରାଯାଇଛି । କ୍ୟାଟେଗୋରୀ-ଏ ରେ ୨୦ଟି ଜିଲ୍ଲାଥିବା ବେଳେ କ୍ୟାଟେଗୋରୀ-ବିରେ ୧୦ଟି ଜିଲ୍ଲା ରହିଛି । କ୍ୟାଟେଗୋରୀ-ଏରେ ଥିବା ୨୦ ଜିଲ୍ଲାରେ ହାଟବଜାର ସବୁଦିନ ସକାଳ ୬ରୁ ରାତି ୮ଟା ଯାଏ ଖୋଲା ରହିବ ।

ଏହା ପରେ ନାଇଟ କର୍ଫ୍ୟୁ ରାତି ୮ରୁ ସକାଳ ୬ଟା ବଳବତ୍ତର ରହିବ । କ୍ୟାଟେଗୋରୀ-ବି ରେ ଥିବା ୧୦ ଜିଲ୍ଲାରେ ଏବେ ସକାଳ ୬ରୁ ସନ୍ଧ୍ୟା ୫ଟା ଯାଏ ଦୋକାନ ବଜାର ଖୋଲା ରହିବ । ତେବେ ଏହି ୧୦ ଜିଲ୍ଲାରେ ସପ୍ତାହାନ୍ତ ସଟଡାଉନ ବଳବତ୍ତର ରହିବା ସହ ନାଇଟ କର୍ଫ୍ୟୁ ସନ୍ଧ୍ୟା ୫ରୁ ସକାଳ ୬ ଯାଏ ଲାଗୁ କରାଯିବ । ରାଜ୍ୟ ସରକାର ଆସନ୍ତା ୧୫ ଦିନ ପାଇଁ କୋଭିଡ୍ ଗାଇଡ୍ ଲାଇନ୍ ଜାରି କରି ଏପରି ଘୋଷଣା କରିଛନ୍ତି । ଆଉ ଦୁଇ ସପ୍ତାହ ରାଜ୍ୟରେ ଜାରି ରହିବ ଆଂଶିକ ଲକଡାଉନ୍ ।