ଭୁବନେଶ୍ୱର: ଆଜିଠୁ ଆରମ୍ଭ ହେଉଛି ନୂଆ ମାସ । ମାସର ପ୍ରଥମ ଦିନରେ ଅନେକ କିଛିରେ ପରିବର୍ତ୍ତନ ହୋଇଛି । ଆଉ ଯାହା ଆପଣଙ୍କ ଦୈନନ୍ଦିନ ଜୀବନ ଉପରେ ପ୍ରଭାବ ମଧ୍ୟ ପକାଇବ । ସେସବୁ ବିଷୟରେ ଜାଣିବା ନିହାତି ଆବଶ୍ୟକ । କାରଣ ବଦଳିଥିବା ନିୟମ ବିଷୟରେ ଜାଣିଲେ ହିଁ ଆପଣ ଠିକ୍ ସମୟରେ ସେ କାର୍ଯ୍ୟ କରିପାରିବେ ।

SBI ଏଟିଏମରୁ ଟଙ୍କା ଉଠାଇଲେ ଅଧିକ ଚାର୍ଜ

ଦେଶର ବଡ଼ ବ୍ୟାଙ୍କ ଅର୍ଥାତ୍ ଭାରତୀୟ ଷ୍ଟେଟ ବ୍ୟାଙ୍କରେ ଆଜିଠୁ କିଛି ପରିବର୍ତ୍ତନ ହେଉଛି । ଯାହା ସିଧାସଳଖ ଆପଣଙ୍କ ପକେଟକୁ ବାଧିବ । ଯଦି ଆପଣ ଏସବିଆଇ ଏଟିଏମରୁ ମାସକରେ ୪ ଥରରୁ ଅଧିକ ଥର ଟଙ୍କା ଉଠାଉଛନ୍ତି ତ ଆପଣଙ୍କୁ ଅତିରିକ୍ତ ଚାର୍ଜ ଦେବାକୁ ପଡ଼ିବ । ୪ ଥର ଟଙ୍କା ଉଠାଣ ପରେ ପଞ୍ଚମ ଉଠାଣ ପରେ ପ୍ରତି ୱିଥଡ୍ରରେ ୧୫ ଟଙ୍କା ପ୍ଲସ ଜିଏସଟି ଦେବାକୁ ହେବ ।

SBI ଚେକବୁକର ନୂଆ ନିୟମ

ଟଙ୍କା ଉଠାଣ ସହ ଏସବିଆଇ ଚେକବୁକ୍ ପାଇଁ ନିୟମ କରିଛି । ଏହି ନିୟମ ଅନୁସାରେ, ଆପଣ ଏସବିଆଇ ଚେକବୁକ୍ ବ୍ୟବହାର କରୁଥିଲେ ଅଧିକ ଟଙ୍କା ଦେବାକୁ ପଡ଼ିବ । ୧୦ଟି ଚେକ୍ ପାଇଁ ଗ୍ରାହକଙ୍କୁ ୪୦ ଟଙ୍କା ପ୍ଲସ ଜିଏସଟି ଦେବାକୁ ହେବ । ଏସବିଆଇର ବେସିକ୍ ସେଭିଂ ବ୍ୟାଙ୍କ ଡିପୋଜିଟ୍ ଆକାଉଣ୍ଟଧାରୀଙ୍କୁ ପ୍ରତିବର୍ଷ ୧୦ ପେଜ୍ ବିଶିଷ୍ଟ ଚେକବୁକ୍ ମାଗଣା ଦିଏ । ଏହା ବାଦ୍ ଯଦି ଆପଣ ୧୦ ପୃଷ୍ଠାର ଚେକବୁକ୍ ନେବେ ତ ୪୦ ଟଙ୍କା ପ୍ଲସ ଜିଏସଟି ଏବଂ ୨୫ ପୃଷ୍ଠାର ଚେକବୁକ୍ ପାଇଁ ୭୫ ଟଙ୍କା ପ୍ଲସ ଜିଏସଟି ଦେବାକୁ ହେବ । ଏଥିସହ ତତ୍କାଳ ୧୦ ପୃଷ୍ଠାର ଚେକବୁକ୍ ପାଇଁ ୫୦ ଟଙ୍କା ସହ ଜିଏସଟି ଲାଗିବ । ତେବେ ଏହି ନିୟମ ବରିଷ୍ଠ ନାଗରିକଙ୍କ କ୍ଷେତ୍ରରେ ଲାଗୁ ହେବ ନାହିଁ ।

ଆୟକର ରିଟର୍ଣ୍ଣ ନଦେଲେ ଅଧିକTDS

ଆୟକର ରିଟର୍ଣ୍ଣ ଦାଖଲ କରୁନଥିଲେ ଅଧିକ ଟିଡିଏସ, ଟିସିଏସ୍ ଦେବାକୁ ପଡ଼ିବ । ବାର୍ଷିକ ୫୦ ହଜାର ଟଙ୍କାରୁ ଅଧିକ ଟିଡିଏସ୍ ଥିବା ବ୍ୟକ୍ତିଙ୍କ କ୍ଷେତ୍ରରେ ଏହା ଲାଗୁ ହେବ । ସେହିଭଳି ଆୟକର ଦାଖଲ ନକଲେ ଅଧିକ ଟିକସ ଦେବାକୁ ପଡ଼ିବ ।

ବଦଳିବ IFSC କୋଡ୍

ଆଜିଠୁ ସିଣ୍ଡିକେଟ୍ ବ୍ୟାଙ୍କର IFSC କୋଡ୍ ବଦଳିବାକୁ ଯାଉଛି । ଗତବର୍ଷ ସିଣ୍ଡିକେଟ୍ ବ୍ୟାଙ୍କକୁ କାନାରା ବ୍ୟାଙ୍କ ସହ ମିଶ୍ରଣ କରାଯାଇଥିଲା । ତେଣୁ ସିଣ୍ଡିକେଟ୍ ବ୍ୟାଙ୍କର ଗ୍ରାହକଙ୍କୁ ଆଜିଠୁ କାନାରା ବ୍ୟାଙ୍କର IFSC କୋଡ୍ ମିଳିବ । ଆଜିଠୁ ସିଣ୍ଡିକେଟ୍ ବ୍ୟାଙ୍କର IFSC କୋଡ୍ ଅବୈଧ ହୋଇଯିବ ।

ବଦଳିପାରେ ଗ୍ୟାସ୍ ଦର

ପ୍ରତିମାସର ପ୍ରଥମ ଦିନରେ କେନ୍ଦ୍ର ସରକାର ଏଲପିଜି ସିଲିଣ୍ଡର ଦର ଧାର୍ଯ୍ୟ କରନ୍ତି । ଗତମାସରେ ସରକାର ୧୯ କେଜି ବିଶିଷ୍ଟ କମର୍ସିଆଲ୍ ସିଲିଣ୍ଡର ଦର ୧୨୨ ଟଙ୍କା କମ୍ କରିଥିଲେ । ସେହିଭଳି ଏଥର ଗ୍ୟାସର ଦର ବଦଳିବା ନେଇ ଆକଳନ କରାଯାଉଛି । କାରଣ ଅଶୌଧିତ ତୈଳଦର ନିୟମିତ ଭାବେ ବଢ଼ି ଚାଲିଛି ।