ନୂଆଦିଲ୍ଲୀ: ପେଗାସସ ଭାଇରସ୍ ମାମଲାରେ ବଢୁଛି ସରକାରଙ୍କ ଅଡୁଆ। ବିରୋଧିଙ୍କ ସହିତ ଏବେ ସହଯୋଗୀ ମଧ୍ୟ କେନ୍ଦ୍ରକୁ ଟାର୍ଗେଟ କଲେଣି। ମୌସୁମୀ ଅଧିବେଶନକୁ ପେଗାସସ ଝଡ ଧୋଇନେଉଥିଲାବେଳେ ଆଜି ସକାଳୁ ଗୁରୁତ୍ୱପୂର୍ଣ୍ଣ ବୈଠକ କରୁଛନ୍ତି ବିରୋଧି। ରାହୁଲ ଗାନ୍ଧୀଙ୍କ ବାସଭବନରେ ଏକାଠି ହେବେ ୧୪ଟି ଦଳର ନେତା। ଆଗାମୀ ରଣନୀତି ନେଇ ବୈଠକରେ ଆଲୋଚନା ହେବ। ବ୍ରେକଫାଷ୍ଟ ବୈଠକରେ ଜାସୁସୀକାଣ୍ଡର ଉଚିତ ଜବାବ ଦେବାକୁ ପ୍ରସ୍ତୁତ ହେବ ବ୍ଲୁ ପ୍ରିଣ୍ଟ। କେନ୍ଦ୍ର ସରକାର ଓ ବିରୋଧୀଙ୍କ ମଧ୍ୟରେ ବାକ୍ ଯୁଦ୍ଧ ପାଇଁ ଗୃହରେ ଅନ୍ୟ ପ୍ରସଙ୍ଗରେ ମଧ୍ୟ ଆଲୋଚନା ହୋଇପାରୁନି। ପ୍ରତ୍ୟେକ ଦିନ ଗୃହକାର୍ଯ୍ୟ ଆରମ୍ଭରୁ ଜାସୁସୀକାଣ୍ଡ ପାଇଁ ସରକାରଙ୍କୁ ଘେରୁଛନ୍ତି ବିରୋଧୀ। କେନ୍ଦ୍ର ସରକାର ଗୃହରେ ଗୋଟିଏ ପରେ ଗୋଟିଏ ବିଲ୍ ପାସ୍ କରିଚାଲିଥିବା ବେଳେ ବିରୋଧୀଙ୍କୁ ଗୁରୁତ୍ୱ ଦେଉନାହାନ୍ତି। ସଙ୍ଗୀନ ଘଟଣାକୁ ହାଲୁକା ଭାବେ ନେଉଛନ୍ତି ସରକାର। ବିରୋଧ ପରେ ବି କାହିଁକି ଏହାର ତଦନ୍ତ ପାଇଁ ସରକାର ନିର୍ଦ୍ଦେଶ ଦେଉନାହାନ୍ତି ତାକୁ ନେଇ ପ୍ରଶ୍ନ ଉଠିଛି। ଏପଟେ ବିରୋଧୀଙ୍କ ସ୍ୱରରେ ତାଳ ମିଳାଇଛନ୍ତି ସହଯୋଗୀ। ବିହାର ମୁଖ୍ୟମନ୍ତ୍ରୀ ତଥା ଏନଡିଏର ସହଯୋଗୀ ନୀତୀଶ କୁମାର ସରକାରଙ୍କୁ ଘେରିଛନ୍ତି।
ଖୋଲିଲା ସପିଂ ମଲ ଓ ଖୋଲିବ ସିନେମା ହଲ, ତଦାରଖ ପାଇଁ ଗଠିତ ବିଏମ୍ସିର ସ୍ୱତନ୍ତ୍ର ଟିମ୍
ଭୁବନେଶ୍ୱର: ଦୀର୍ଘ ଦିନର ଅପେକ୍ଷାର ଅନ୍ତ ଘଟି ଅନ୍ଲକ୍ ହେଲା ଓଡ଼ିଶା । ସ୍ୱାଭାବିକ ହେବ ସବୁକିଛି । ତଥାପି ରହିଛି କଟକଣା । ଦ୍ୱୈତନଗରରୀ ବଳବତ୍ତର ରହିଛି ସପ୍ତାହାନ୍ତ ସଟ୍ଡାଉନ୍ । ଅନୁମତି ମିଳିବା ପରେ ଖୋଲିଛି ସପିଂ ମଲ । ଖୁବଶୀଘ୍ର ଖୋଲିବ ସିନେମା ହଲ । ସପ୍ତାହନ୍ତ ସଟ୍ଡାଉନ୍ ପରେ ରାଜଧାନୀ ଭୁବନେଶ୍ୱର ଆଜି ଚଳଚଞ୍ଚଳ । ମନେହେଉଛି ସ୍ୱାଭାବିକ ଅବସ୍ଥାକୁ ଫେରିଲା ସ୍ମାର୍ଟସିଟି । ଦୋକାନ ବଜାର ସବୁ କିଛି ଖୋଲା । ତେବେ ସମସ୍ତଙ୍କୁ ପରାମର୍ଶ ଦିଆଯାଇଛି ମାର୍ଗଦର୍ଶିକା ପାଳନ କରିବାକୁ । ସପିଂ ମଲଗୁଡିକୁ ଖୋଲିବାକୁ ଯଦିଓ ଅନୁମତି ଦିଆଯାଇଛି ତେବେ କିଛି କଟକଣା ବି ଜାରି କରାଯାଇଛି । ୧୮ବର୍ଷରୁ ଅଧିକ ବ୍ୟକ୍ତିଙ୍କୁ ଉଭୟ ଡୋଜ୍ ଟିକାର ସାର୍ଟିଫିକେଟ ଦେଖାଇବାକୁ ବାଧ୍ୟତାମୂଳକ କରାଯାଇଛି । ଭୁବନେଶ୍ୱରରେ ସଂକ୍ରମିତଙ୍କ ସଂଖ୍ୟା ଅଧିକ ରହୁଥିବାରୁ କୋଭିଡ କଟକଣାର ପାଳନ ହେଉଛି କି ନାହିଁ ତାହାର ତଦାରଖ କରିବାକୁ ବିଏମ୍ସି ପକ୍ଷରୁ ସ୍ୱତନ୍ତ୍ର ଟିମ୍ ଗଠନ କରାଯାଇଛି । ନିୟମିତ ଚଢାଉ କରି ରିପୋର୍ଟ ଦେବାକୁ ସବୁ ଟିମ୍କୁ ନିର୍ଦେଶ ଦିଆଯାଇଥିବା ଅତିରିକ୍ତ କମିଶନର କହିଛନ୍ତି । ଦିର୍ଘ ୩ମାସ ପରେ ପୁଣି ଖୋଲିଛି ସପିଂ ମଲ । ଭୁବନେଶ୍ୱରର ସବୁ ମଲ୍ରେ ଦେଖିବାକୁ ମିଳିଛି ଭିଡ଼ । କୋଭିଡ କଟକଶଣା ସହିତ ସରକାରଙ୍କ ମାର୍ଗଦର୍ଶିକା ପ୍ରକାରେ ସାନିଟାଇଜର, ଥର୍ମାଲ ସ୍କ୍ରିନିଂ, ଡବଲ ଡୋଜ୍ ସାର୍ଟିଫିକେଟ ସବୁ ଉପରେ ଦିଆଯାଉଛି ଗୁରୁତ୍ୱ । ଦୀର୍ଘ ଦିନ ବ୍ୟବଧାନରେ ମଲ ଖୋଲିଥିବାରୁ ମଲର କର୍ମଚାରୀଙ୍କ ମଧ୍ୟରେ ଦେଖିବାକୁ ମିଳିଛି ଉତ୍ସାହ । ସରକାରଙ୍କ ନିଷ୍ପତ୍ତିକୁ କରିଛନ୍ତି ସ୍ୱାଗତ । ସେପଟେ କିନ୍ତୁ ଅନୁମତି ସତ୍ତ୍ୱେ ଖୋଲିପାରିନି ସିନେମା ହଲ । କୌଣସି ନୂଆ ସିନେମା ରିଲିଜ ପାଇଁ ନଥିବା କାରଣରୁ ଗୁରୁବାର ଠାରୁ ସିନେମା ହଲ ଖୋଲିବାକୁ ନିଷ୍ପତ୍ତି ନେଇଛନ୍ତି ସିନେମା ହଲ ମାଲିକ । ମୋଟ କ୍ଷମତାର ୫୦ଭାଗ ଦର୍ଶକଙ୍କୁ ନେଇ ଚାଲିବ ସିନେମା ହଲ ବୋଲି କହିଛନ୍ତି ସିନେମା ହଲ କର୍ତ୍ତୃପକ୍ଷ । ସିନେମା ହଲ, ମଲ ସହିତ ଖୋଲିଛି ପାର୍କ ଓ ରେଣ୍ଟୁରାଣ୍ଟ । ହେଲେ ଧାର୍ମିକ ଅନୁଷ୍ଠାନ ଖୋଲିବା ନେଇ କୌଣସି ନିତିଗତ ନିଷ୍ପତ୍ତି ହୋଇନାହିଁ ।
ଏଥିସହିତ ପଢ଼ନ୍ତୁ: ଅଗଷ୍ଟରେ ଆସିବ କରୋନାର ତୃତୀୟ ଲହର: ଓଡ଼ିଶା ନେଇ କିଛି ଏଭଳି କହିଲେ ବିଶେଷଜ୍ଞ
ଏଣିକି ମୋବାଇଲରେ ପାଇପାରିବେ ଓଡ଼ିଶା ହାଇକୋର୍ଟଙ୍କ ବିଭିନ୍ନ ସୁବିଧା
କଟକ: ଏଣିକି ମୋବାଇଲରେ ପାଇପାରିବେ ଓଡ଼ିଶା ହାଇକୋର୍ଟ ସେବା । ଏ ନେଇ ଆଜିଠାରୁ ଆରମ୍ଭ ହୋଇଛି ମୋବାଇଲ ଆପ୍ ସେବା । ଯାହା ଗୁଗୁଲ ପ୍ଳେ ଷ୍ଟୋର ଏବଂ ଆପଲ ଆପ୍ରେ ମଧ୍ୟ ଉପଲବ୍ଧ । ବ୍ୟବହାରକାରୀ OrissaHighCourteService ସର୍ଚ୍ଚ କରି ଆପକୁ ଡାଉନଲୋଡ କରିପାରିବେ । ଓକିଲମାନେ ଏହି ଆପ୍କୁ ଡାଉନଲୋଡ କରିପାରିବେ । ଯାହା ସହୟତାରେ ସେମାନେ ନୂଆ କେସ୍, କେସ୍ ଷ୍ଟାଟସ୍, ସାର୍ଟିଫିକେଟ୍ କପି ଷ୍ଟାଟସ୍, ମାଇ ଡାଏରୀ ଭଳି ସୁବିଧା ପାଇପାରିବେ । ତେବେ ଆପର ବ୍ୟବହାର ନେଇ ବିସ୍ତୃତ ଭାବେ https://www.orissahighcourt.nic.in/ରେ ଜାଣିପାରିବେ ।
ଏଥିସହିତ ପଢ଼ନ୍ତୁ: ଅଗଷ୍ଟରେ ଆସିବ କରୋନାର ତୃତୀୟ ଲହର: ଓଡ଼ିଶା ନେଇ କିଛି ଏଭଳି କହିଲେ ବିଶେଷଜ୍ଞ
ସିବିଏସ୍ଇ ଦ୍ୱାଦଶ ଶ୍ରେଣୀ ପରୀକ୍ଷାରେ ଟପ୍ କଲେ ଓଡ଼ିଆ ଝିଅ ଅମ୍ରିତା
ଭୁବନେଶ୍ୱର: ସିବିଏସ୍ଇ ଦ୍ୱାଦଶ ଶ୍ରେଣୀ ପରୀକ୍ଷାରେ ଓଡ଼ିଆ ଝିଅଙ୍କ କୃତିତ୍ୱ । ମୋଟ ୫୦୦ ମାର୍କକୁ ୪୯୯ ମାର୍କ ରଖି ଟପ୍ କରିଛନ୍ତି ଓଡ଼ିଆ ଝିଅ ଅମ୍ରିତା ବେହୁରା । ସେ ସମସ୍ତ ବିଷୟରେ A-1 ଗ୍ରେଡ୍ ରଖି ପାସ୍ କରିଛନ୍ତି । ଅମ୍ରିତାଙ୍କ ପିତା ହେଉଛନ୍ତି ଅମିୟ କୁମାର ଏବଂ ମାଆ ହେଉଛନ୍ତି ମୀତା ରାଣୀ । ସେମାନେ ନୋଏଡାରେ ରହୁଥିବା ବେଳେ ଝିଅ ନୋଏଡ ସେକ୍ୱର ୨୭ ସ୍ଥିତ କ୍ରେମ୍ୱ୍ରିଜ୍ ସ୍କୁଲରେ ପାଠ ପଢ଼ନ୍ତି । ପିତା ଅମିତ ଆଇଓସିଏଲ୍ରେ ଜେନେରାଲ୍ ମ୍ୟାନେଜର ଭାବେ କାର୍ଯ୍ୟ କରୁଥିବା ବେଳେ ମାଆ ନବୋଦୟ ବିଦ୍ୟାଳୟ ସମିତିର ଆସିଷ୍ଟାଣ୍ଟ ଡାଇରେକ୍ଟର ଭାବେ କାର୍ଯ୍ୟ କରନ୍ତି । ତେବେ ଅମ୍ରିତ ଆଗକୁ ଜଣେ ଅର୍ଥନୀତିଜ୍ଞ ହେବାକୁ ଲକ୍ଷ୍ୟ ରଖିଛନ୍ତି । ଏଣୁ ସେ ଅର୍ଥନୀତି ସମ୍ମାନ ସହ ନିଜ ଉଚ୍ଚତର ଶିକ୍ଷା ଶ୍ରୀରାମ ବାଣିଜ୍ୟ ମହାବିଦ୍ୟାଳୟରେ ପୂରା କରିବାକୁ ଯୋଜନା କରିଛନ୍ତି ।
ତେବେ ଅମ୍ରିତା ପାଠ ପଢ଼ା ସହ ସମାଜିକ କାର୍ଯ୍ୟରେ ମଧ୍ୟ ରୁଚି ରଖନ୍ତି । ସେ ପଢ଼ୁଥିବା ସ୍କୁଲରେ ବାୟାନ ନାମକ କ୍ଳବ୍ ଗଠନ କରିଛନ୍ତି । ଆଉ ଏହି କ୍ଳବ୍ର ସ୍ୱେଚ୍ଛାସେବୀ ଛାତ୍ରଛାତ୍ରୀମାନେ କରୋନା ରୋଗୀଙ୍କୁ ସାହାଯ୍ୟ କରିଥାନ୍ତି । ତେବେ ଅମ୍ରିତାଙ୍କ ପିତା ମାତା କେନ୍ଦ୍ରାପଡ଼ା ଜିଲ୍ଲା ଓଳାଭରର ମୂଳ ବାସିନ୍ଦା । ତେବେ ଅମ୍ରିତା ଓଡ଼ିଶା ବାହାରେ ରହୁଥିଲେ ମଧ୍ୟ ଜଣେ ଓଡ଼ିଆ ଭାବେ ସେ ବେଶ ଗର୍ବିତ । ତାଙ୍କ ପିତା ମାତା ଓଡ଼ିଶା ସୋସିଆଲ ଆଣ୍ଡ କଲଚର ଆସୋସିଏସନ୍ର ସକ୍ରିୟ ସଦସ୍ୟ ରହିଥିବା ବେଳେ ଓଡ଼ିଶାର କଳା ସଂସ୍କୃତି ପ୍ରଚାର ପ୍ରସାର ଦିଗରେ ସର୍ବଦା ତତ୍ପରତାର ସହ କାର୍ଯ୍ୟ କରିଆସୁଛନ୍ତି ।
ଅଗଷ୍ଟରେ ଆସିବ କରୋନାର ତୃତୀୟ ଲହର: ଓଡ଼ିଶା ନେଇ କିଛି ଏଭଳି କହିଲେ ବିଶେଷଜ୍ଞ
ଭୁବନେଶ୍ୱର: ଅଗଷ୍ଟରେ ଆସିବ କରୋନାର ତୃତୀୟ ଲହର, ଅକ୍ଟୋବରରେ ଛୁଇଁବ ପିକ୍ । ଆଇଆଇଟି କାନପୁର ଓ ବିଭିନ୍ନ ଗବେଷଣାରୁ ଏଭଳି ଆକଳନ କରାଯାଇଛି । ଦେଶର ୧୦ଟି ରାଜ୍ୟରେ କରୋନା ସଂକ୍ରମଣ ବଢିବାରେ ଲାଗିଛି । ତେବେ ଓଡିଶାରେ ଆର- ଭ୍ୟାଲ୍ୟୁ କମ୍ ଥିବାରୁ ତୃତୀୟ ଲହରରେ ଦୈନିକ ସଂକ୍ରମଣ ୫ହଜାର ଟପିବ ନାହିଁ ବୋଲି ସ୍ୱାସ୍ଥ୍ୟ ବିଶେଷଜ୍ଞ କହିଛନ୍ତି । ଏପଟେ କିନ୍ତୁ ରାଜ୍ୟରେ କମୁଛି କରୋନା ।
ସରିନି ଦ୍ୱିତୀୟ ଲହର ଡରାଇଲାଣି ତୃତୀୟ ଲହର । ଦେଶରେ ଦୈନିକ ସଂକ୍ରମଣ ୧ଲକ୍ଷରୁ ଦେଢଲକ୍ଷରେ ପହଞ୍ଚିବ । ହାଇଦ୍ରାବାଦ ଓ କାନପୁର ଆଇଆଇଟି ଗବେଷଣାରୁ ଏଭଳି ତଥ୍ୟ ଆସିଛି । ଧୀରେ ଧୀରେ ଦେଶର ୧୦ଟି ରାଜ୍ୟରେ କରୋନା ସଂକ୍ରମିତ ବୃଦ୍ଧି ଓ କିଛି ରାଜ୍ୟରେ ଆର-ଭ୍ୟାଲ୍ୟୁ ବଢ଼ିବା ଏହାର ସଂକେତ ବୋଲି ଗବେଷଣା ରିପୋର୍ଟରେ କୁହାଯାଇଛି । ତେବେ ଆଶ୍ୱସ୍ତିକର କଥା, ଓଡିଶାରେ ତୃତୀୟ ଲହରର ପ୍ରଭାବ ସେତେଟା ପଡ଼ିବନି । ରାଜ୍ୟରେ ସଂକ୍ରମଣ ନିମ୍ନଗାମୀ ଥିବାରୁ ତୃତୀୟ ଲହରରେ ଦୈନିକ ସଂକ୍ରମଣ ୫ହଜାର ଭିତରେ ସୀମିତ ରହିବ ।
ଓଡିଶାରେ ଆର-ଭ୍ୟାଲ୍ୟୁ ଅନ୍ୟରାଜ୍ୟ ତୁଳନାରେ ଭଲ ଅଛି । ଆର-ଭ୍ୟାଲୁ ୧ ପଏଣ୍ଟ ଉପରେ ରହିଲେ ଅଧିକ ଲୋକ ସଂକ୍ରମିତ ହେବେ । ହେଲେ ଏଯାଏଁ ଓଡିଶାରେ ଆର-ଭ୍ୟାଲ୍ୟୁ ୧ ତଳେ ରହିଛି । ଏପରିକି ଦେଶରେ ଦ୍ୱିତୀୟ ଲହର ଆର-ଭ୍ୟାଲ୍ୟୁ ଉପରେ ସେତେଟା ପ୍ରଭାବ ପକାଇନାହିଁ । ତେଣୁ ଏବେଠାରୁ ଲୋକେ ସତର୍କ ଓ ସଚେତନ ହେବା ସହ କୋଭିଡ ନିୟମ ମାନିବାକୁ ପରାମର୍ଶ ଦେଇଛନ୍ତି ଡିଏମଇଟି ନିର୍ଦ୍ଦେଶକ । ତୃତୀୟ ଲହର ପାଇଁ ଓଡିଶା ସଂପୂର୍ଣ୍ଣ ପ୍ରସ୍ତୁତ । ଭିତ୍ତିଭୂମି ସହ ଏକ୍ମୋ ମେସିନ, ଡାକ୍ତର, ସ୍ୱାସ୍ଥ୍ୟକର୍ମୀଙ୍କ ସ୍ୱତନ୍ତ୍ର ତାଲିମ ସହ ଶିଶୁମାନଙ୍କ ପାଇଁ ବିଶେଷ ଫୋକସ କରାଯାଇଛି ।
ଏଥିସହିତ ପଢ଼ନ୍ତୁ: ବିଦେଶରେ ଓଡ଼ିଆଙ୍କୁ ସାହା ହେଲେ ଆଉ ଜଣେ ଓଡ଼ିଆ: କୋମାରେ ଥିବା ଶ୍ରମିକଙ୍କ କରାଉଛନ୍ତି ଚିକିତ୍ସା
ବିଦେଶରେ ଓଡ଼ିଆଙ୍କୁ ସାହା ହେଲେ ଆଉ ଜଣେ ଓଡ଼ିଆ: କୋମାରେ ଥିବା ଶ୍ରମିକଙ୍କ କରାଉଛନ୍ତି ଚିକିତ୍ସା
ବ୍ରହ୍ମପୁର: ଶ୍ରମିକ ଯନ୍ତ୍ରଣାର ବିକଳ ଚିତ୍ର । ସାତ ଦରିଆ ସେପଟେ ସ୍ୱାମୀ ପଡ଼ିଛି କୋମାରେ । ଏପଟେ ଅସହାୟ ପରିବାରର ଆଖିରୁ ଶୁଖୁନି ଲୁହ । ସ୍ୱାମୀଙ୍କୁ ବଞ୍ଚାଇ ଗାଁକୁ ଆଣିବା ପାଇଁ ସ୍ତ୍ରୀ ଓ ପୁଅର କରିଛନ୍ତି ଆକୁଳ ନିବେଦନ । ସେପଟେ ଏହି ଅସହାୟ ଓଡ଼ିଆଙ୍କ ପାଇଁ ଆଉ ଜଣେ ଓଡ଼ିଆ ଦେବଦୂତ ସାଜିଛନ୍ତି ।
ଆଖିରୁ ଶୁଖୁନି ଲୁହ । କାନ୍ଦ ବୋବାଳିରେ ଫାଟି ଫଡୁଛି ଘର । ପରିବାରର ରୋଜଗାରିଆ ପୁଅକୁ ଫେରାଇ ଆଣିବାକୁ ଆକୁଳ ନିବେଦନ । ଗଞ୍ଜାମ ଜିଲ୍ଲା ଖଲ୍ଲିକୋଟ ନିକଟ ତୋଟାଗାଁର ସୀମାଞ୍ଚଳ ରାଉତ । ପରିବାର ପୋଷିବା ପାଇଁ ତାଙ୍କୁ ଯିବାକୁ ପଡ଼ିଥିଲା ବିଦେଶ । ହେଲେ କିଏ ଯାଣିଥିଲା ସେଠି ମିଳିବ ଜୀବନ ଯନ୍ତ୍ରଣା । କୋମାରେ ପଡ଼ି ମୃତ୍ୟୁ ସହ କରିବେ ସଂଗ୍ରାମ । ଦୁବାଇର ବେରିହିନରେ ଏନଏସଏଚ ନିଗମରେ ମେକାନିକାଲ ଲିଡ ମେନ ଭାବେ କାର୍ଯ୍ୟ କରୁଥିଲେ ସିମାଂଚଳ । କିନ୍ତୁ ଗତ ୧୮ ତାରିଖରେ ସୀମାଞ୍ଚଳଙ୍କ ମସ୍ତିସ୍କରୁ ରକ୍ତଶ୍ରାବ ହୋଇ କୋମାକୁ ଚାଲି ଯାଇଥିଲେ । ସେଠାରେ ସେ ମେଡିକାଲରେ ଚିକତ୍ସିତ ହେଉଛନ୍ତି । ଏହି ଖବର ଶୁଣିବା ପରେ ଏବେ ଧର୍ଯ୍ୟହରା ପରିବାର । ସ୍ୱାମୀକୁ ଫେରାଇ ଅଣିବାକୁ ସରକାରଙ୍କୁ ସ୍ତ୍ରୀ କରିଛନ୍ତି ଆକୁଳ ନିବେଦନ । ସେପଟେ ଏହି ଅସହାୟ ଓଡ଼ିଆଙ୍କ ପାଇଁ ଆଉ ଜଣେ ଓଡ଼ିଆ ଦେବଦୂତ ସାଜିଛନ୍ତି । ସେଠାକାର ଓଡ଼ିଆ ସମାଜର ପ୍ରତିଷ୍ଠାତା ଡକ୍ଟର ଅରୁଣ କୁମାର ପ୍ରହରାଜ । ସୀମାଞ୍ଚଳଙ୍କ ଉପଯୁକ୍ତ ଚିକତ୍ସା ପାଇଁ ସମସ୍ତ ସହାୟତା ଯୋଗାଇଛନ୍ତି । ଏପରିକି ଭିଡ଼ିଓ କଲ ସାହାର୍ଯ୍ୟରେ ପରିବାରକୁ ସୀମାଞ୍ଚଳଙ୍କୁ ସାକ୍ଷାତ କରାଉଛନ୍ତି ଅରୁଣ ।
ପରଲୋକରେ ବରିଷ୍ଠ ବିଜେଡି ନେତା ତଥା ପୂର୍ବତନ ବିଧାୟକ ଅରୁଣ ଦେ
ଭୁବନେଶ୍ୱର: ବରିଷ୍ଠ ବିଜେଡି ନେତା ତଥା ପୂର୍ବତନ ବିଧାୟକ ଅରୁଣ ଦେଙ୍କ ପରଲୋକ । ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ତାଙ୍କର ପରଲୋକ ହୋଇଛି । ବାମପନ୍ଥୀ ଚିନ୍ତାଧାର ସହ ଜଡ଼ିତ ଅରୁଣ ଦେ ୧୯୭୧ରେ ସିପିଆଇରେ ଯୋଗ ଦେଇଥିଲେ । ସିପିଆଇ ଦଳ ସହ ୧୯୯୪ ସହ ଜଡ଼ିତ ଥିଲେ । ସିପିଆଇ ପ୍ରାର୍ଥୀ ଭାବେ ସେ ତିନି ଥର ବାଲେଶ୍ୱର ବିଧାନସଭା କ୍ଷେତ୍ରରୁ ନିର୍ବାଚିତ ହୋଇଥିଲେ ।
୧୯୭୪, ୧୯୮୦ ଓ ୧୯୯୦ରେ ସେ ତିନିଥର ସିପିଆଇରୁ ପ୍ରତିନିଧିତ୍ୱ କରି ବିଧାୟକ ହୋଇଥିଲେ । ୧୯୯୫ରେ ସେ ସ୍ୱାଧୀନ ପ୍ରାର୍ଥୀ ଭାବେ ଜିତିଥିଲେ । ପରେ ୨୦୦୪ରେ ସେ ଓଡିଶା ଗଣ ପରିଷଦରୁ ବିଧାୟକ ଭାବେ ନିର୍ବାଚିତ ହୋଇଥିଲେ । ୧୯୪୬ ଏପ୍ରିଲ ୩୦ ତାରିଖରେ ବାଲେଶ୍ୱରରେ ଜନ୍ମଗ୍ରହଣ କରିଥିବା ଅରୁଣ ଦେ ବୃତ୍ତିରେ ଜଣେ ଆଇନଜୀବୀ । ୨୦୦୯ରେ ସେ ଓଡିଶା ଗଣ ପରିଷଦରୁ ବାଲେଶ୍ୱର ଲୋକସଭା ଆସନ ପାଇଁ ପ୍ରତିଦ୍ୱନ୍ଦ୍ୱିତା କରି କଂଗ୍ରେସ ପ୍ରାର୍ଥୀ ଶ୍ରୀକାନ୍ତ ଜେନାଙ୍କ ଠାରୁ ହାରିଯାଇଥିଲେ । ୨୦୦୯ ପରେ ସେ ଆଉ ନିର୍ବାଚନ ଜିତି ପାରିନାହାଁନ୍ତି । ୨୦୧୪ରେ ସେ ବିଜେଡିରେ ଯୋଗ ଦେଇଥିଲେ । କିନ୍ତୁ ଟିକେଟ ନପାଇବାରୁ ସେ ବିଜେଡି ଛାଡି କଂଗ୍ରେସ ପ୍ରାର୍ଥୀ ଭାବେ ବାଲେଶ୍ୱର ବିଧାନସଭା ଆସନରୁ ଲିଢିଥିଲେ । କିନ୍ତୁ ବିଜେଡି ପ୍ରାର୍ଥୀ ଜୀବନ ପ୍ରଦୀପ ଦାସଙ୍କ ଠାରୁ ହାରିଯାଇଥିଲେ । ୨୦୨୦ରେ ବାଲେଶ୍ୱର ଉପନିର୍ବାଚନ ପୂର୍ବରୁ ସେ ପୁଣି ଥରେ ବିଜେଡି ଫେରିଥିଲେ ।
ଏଥିସହିତ ପଢ଼ନ୍ତୁ: ଭାରତୀୟ ହକିରେ ମହିଳା ଏବଂ ପୁରୁଷ ଦଳର ବିଜୟ ପରେ ମୁଖ୍ୟମନ୍ତ୍ରୀଙ୍କୁ ଛୁଟୁଛି ପ୍ରଶଂସା ସୁଅ
ଓଡ଼ିଶା ଆଦର୍ଶ ବିଦ୍ୟାଳୟ ସଂଗଠନର ଉପଦେଷ୍ଟା ହେଲେ ଅବସରପ୍ରାପ୍ତ ଆଇଏଏସ୍ ଉପେନ୍ଦ୍ର ତ୍ରିପାଠୀ
ଭୁବନେଶ୍ୱର: ଓଡ଼ିଶା ଆଦର୍ଶ ବିଦ୍ୟାଳୟ ସଂଗଠନ ଉପଦେଷ୍ଟା ତଥା ସଭାପତି ଭାବେ ନିଯୁକ୍ତ ହେଲେ ଅବସରପ୍ରାପ୍ତ ଆଇଏଏସ୍ ଉପେନ୍ଦ୍ର ତ୍ରିପାଠୀ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ଏହି ନିଯୁକ୍ତି ଦେଇଛନ୍ତି । ବର୍ତ୍ତମାନ ଶ୍ରୀ ତ୍ରିପାଠୀ ମୁଖ୍ୟମନ୍ତ୍ରୀଙ୍କ ପ୍ରମୁଖ ଉପଦେଷ୍ଟା (ଶିକ୍ଷା) ଭାବେ କାର୍ଯ୍ୟ କରୁଛନ୍ତି । ୧୯୮୦ ବ୍ୟାଚ କର୍ଣ୍ଣାଟକ କ୍ୟାଡରର ଆଇଏଏସ୍ ହେଉଛନ୍ତି ଉପେନ୍ଦ୍ର ତ୍ରିପାଠୀ । ପୂର୍ବରୁ ଆଦର୍ଶ ବିଦ୍ୟାଳୟ ସଂଗଠନ ନେଇ ତାଙ୍କର ଅଭିଜ୍ଞତା ରହିଛି । କର୍ଣ୍ଣାଟକରେ ଗୁଣାତ୍ମକ ଶିକ୍ଷାର ବିକାଶ ଦିଗରେ ସେ ପୂର୍ବରୁ କାର୍ଯ୍ୟ କରିଛନ୍ତି । ସୂଚନା ଯୋଗ୍ୟ ଯେ, ଗତ ଜୁନ୍ ୩ ତାରିଖରେ ତତ୍କାଳୀନ ଉପଦେଷ୍ଟ ବିଜୟ କୁମାର ସାହୁଙ୍କ କରୋନାରେ ଦେହାନ୍ତ ପରେ ଏହି ପଦବୀ ଖାଲି ପଡ଼ିଥିଲା ।
ଏଥିସହିତ ପଢ଼ନ୍ତୁ: ମହିଳା ଏବଂ ପୁରୁଷ ହକିର ବିଜୟ ପାଇଁ ମୁଖ୍ୟମନ୍ତ୍ରୀଙ୍କୁ ପ୍ରଶଂସା କଲେ ସାମ୍ବାଦିକ ରାଜଦୀପ ସରଦେଶାଇ
ଗୁଣିଗାରେଡ଼ି ସନ୍ଦେହରେ ୩ଜଣଙ୍କୁ ହତ୍ୟା: ମୃତଦେହକୁ ନଦୀରେ ଫିଙ୍ଗିଦେଲେ ଲୋକେ
ଅନୁଗୁଳ: ଅନ୍ଧବିଶ୍ୱାସର କରୁଣ ପରିଣତି । ଗୁଣିଗାରେଡି ସନ୍ଦେହରେ ୩ ଜଣଙ୍କୁ ହତ୍ୟା କରି ନଦୀରେ ଫିଙ୍ଗିଦେଲେ ଗାଁ ଲୋକେ । ୪ ଦିନ ପରେ ମୃତଦେହ ଉଦ୍ଧାର କରି ଘଟଣାର ୬ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ୍ । ଘଟଣାଟି ଘଟିଛି ଅନୁଗୁଳ ଜିଲ୍ଲା ପାଲଲହଡ଼ା ବ୍ଲକ ଖମାର ଥାନା କୁଞ୍ଜମ ଗ୍ରାମରେ । ଗତ ୩୦ତରିଖ ଦିନ ଗାଁର ଢିପାସାହି ସ୍ଥିତ ବୁଧୁ ଚାତାର ଏବଂ ମୁନି ଚାତାରଙ୍କ ଘରକୁ ତାଙ୍କ ସମ୍ପର୍କୀୟ ମୋତେଇ ଗାଗରାଇ କୌଣସି କାମରେ ଆସିଥିବାବେଳେ ଗାଁର କିଛି ଯୁବକ ଘରେ ପଶି ଅତର୍କିତ ଆକ୍ରମଣ କରିଥିଲେ । ପରେ ସେମାନଙ୍କୁ ଜଙ୍ଗଲ ଆଡକୁ ନେଇଯାଇଥିବା ବୁଧୁଙ୍କ ସ୍ତ୍ରୀ ଖମାର ଥାନାରେ ଅଭିଯୋଗ କରିଥିଲେ । ପୋଲିସ ତଦନ୍ତ କରି ଗତ ୧ ତାରିଖରେ ବୁଧୁଙ୍କ ମୃତଦେହ ଗାଁ ଠାରୁ ୫ କିମି ଦୂର ସମାକୋଇ ନଦୀ କୁଳରୁ ଉଦ୍ଧାର କରିଥିଲା । ଆଜି ମୋତେଇଙ୍କ ମୃତଦେହ ସମଲ ଥାନା ଗହମ ଗ୍ରାମ ନିକଟ ନଦୀ ପଠାରୁ ଉଦ୍ଧାର କରିଛି ପୋଲିସ । ତେବେ ମୁନି ଚାତାରଙ୍କ ଏ ପର୍ଯ୍ୟନ୍ତ କୌଣସି ପତ୍ତା ମିଳିନାହିଁ । ଘଟଣାରେ ପୋଲିସ ଗ୍ରାମର ଦୁଇଜଣ ନାବାଳକଙ୍କ ସହ ମୋଟ ୬ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ପ୍ରାଥମିକ ତଦନ୍ତରୁ ଏହା ଗୁଣିଗାରେଡି ଜନିତ ହତ୍ୟା ବୋଲି କହିଛି ପୋଲିସ୍ । ଗ୍ରାମର ଜଣେ ଯୁବକଙ୍କ କିଛିଦିନ ତଳେ ଅସ୍ୱାଭାବିକ ମୃତ୍ୟୁ ହୋଇଥିଲା । ବୁଧୁ ଏବଂ ମୁନି ଗୁଣିଗାରେଡି କରି ତାଙ୍କୁ ମାରିଥିବା ଲୋକେ ସନ୍ଦେହ କରିଥିଲେ ।
ଏଥିସହିତ ପଢ଼ନ୍ତୁ: କୁବେର ପିଏସ୍ ବିରଞ୍ଚି ସାହୁ ନିଲମ୍ୱିତ
ଯାଜପୁର ଜିଲ୍ଲାର ପ୍ରସିଦ୍ଧ ଶୈବ ପୀଠ ମହାବିନାୟକ ମନ୍ଦିର ଖୋଲିବାକୁ ସେବାୟତଙ୍କ ଦାବି
ଚଣ୍ଡିଖୋଲ: ସ୍ଥାନୀୟ ପ୍ରଶାସନର ଅନୁମତି ପରେ ଖୋଲିବ ମନ୍ଦିର । ଏ ନେଇ ଅଗଷ୍ଟ ଗାଇଡଲାଇନ୍ରେ ଘୋଷଣା କରିଛନ୍ତି ରାଜ୍ୟ ସରକାର । ଆଉ ଏହା ପରେ ଯାଜପୁର ଜିଲ୍ଲାର ପ୍ରମୁଖ ଶୈବ ପୀଠ ମହାବିନାୟକ ଶୈବ ପୀଠ ସର୍ବସାଧାରଣଙ୍କ ନିମନ୍ତେ ଖୋଲିବା ପାଇଁ ସେବାୟତମାନେ ଦାବି କରିଛନ୍ତି । କରୋନାର ପ୍ରଥମ ଓ ଦ୍ୱିତୀୟ ଲହରରେ ମନ୍ଦିର ଗୁଡିକ ଦୀର୍ଘ ଦିନ ଧରି ବନ୍ଦ ରହିଛି । ଯେଉଁଥି ପାଇଁ ଭକ୍ତକୁ ମନ୍ଦିର ଆସିବା ପାଇଁ ବାରଣ କରାଯାଇଛି. ମନ୍ଦିର ପରିସର ଖାଁ ଖାଁ ହୋଇ ପଡିଛି । ବର୍ଷ ବର୍ଷ ଧରି ମନ୍ଦିର ଦାନ ଦକ୍ଷୀଣାରେ କରି ନିଜ ପରିବାର ଚଳାଉ ଥିବା ସେବାୟତ ମାନେ ଆର୍ଥିକ ସଂକଟରେ ଗତି କରୁଛନ୍ତି । ଭକ୍ତ ନଆସିବାରୁ ମନ୍ଦିର ଓ ସେବାୟତ ଉଭୟ ପ୍ରଭାବିତ ହେଉଛନ୍ତି । ଏହା ଉପରେ ଜିଲ୍ଲା ପ୍ରଶାସନ ପକ୍ଷରୁ ପଦକ୍ଷେପ ନେବା ପାଇଁ ଦାବି କରିଛନ୍ତି । ଭକ୍ତମାନେ ମନ୍ଦିର ବାହାରୁ ଦର୍ଶନ କରି ଫେରୁଛନ୍ତି ଦୀର୍ଘ ଦିନ ଧରି ମନ୍ଦିର ବନ୍ଦ ରହି ଥିବାରୁ ଉଭୟ ସେବାୟତ ଓ ଭକ୍ତମାନେ ମନ୍ଦିର ଖୋଲିବା ପାଇଁ ଦାବି କରିଛନ୍ତି । ଆସନ୍ତା ବୁଧବାର ଦିନ ଯାଜପୁର ମା ବିରଜା ଙ୍କ ମନ୍ଦିର ଖୋଲିବା ପାଇଁ ପ୍ରଶାସନ ପକ୍ଷରୁ ନିଷ୍ପତ୍ତି ନିଆ ଯାଇଥିବା ବେଳେ ମହାବିନାୟକ ମନ୍ଦିର ଖୋଲିବାକୁ ପ୍ରଶାସନ ଅନୁମତି ଦେବ ବୋଲି ଆଶାବ୍ୟକ୍ତ କରିଛନ୍ତି ସେବାୟତ ।