spot_img
Home Blog Page 5331

କୋଟିଆରେ ଆନ୍ଧ୍ରର ନିର୍ବାଚନ ପ୍ରସଙ୍ଗରେ କୋରାପୁଟ ଜିଲ୍ଲାପାଳଙ୍କ ପ୍ରତିକ୍ରିୟା, କହିଲେ ଆମ ସୀମା ଭିତରେ ହୋଇନି ନିର୍ବାଚନ

ଜୟପୁର: ଓଡ଼ିଶା ସୀମାରେ ପଞ୍ଚାୟତ ନିର୍ବାଚନ କରିନି ଆନ୍ଧ୍ର। ଆନ୍ଧ୍ରପ୍ରଦେଶ ସୀମାରେ ହିଁ ହୋଇଛି ନିର୍ବାଚନ। ଓଡ଼ିଶା ନୁହେଁ, କେବଳ ଆନ୍ଧ୍ରପ୍ରଦେଶର ଲୋକମାନେ ଦେଇଛନ୍ତି ଭୋଟ୍। କୋଟିଆରେ ଆନ୍ଧ୍ରର ନିର୍ବାଚନ ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି କୋରାପୁଟ ଜିଲ୍ଲାପାଳ ଅବଦାଲ ମହମ୍ମଦ ଅଖତର। ଜିଲ୍ଲାପାଳଙ୍କ କହିବା ଅନୁସାରେ ଆନ୍ଧ୍ର ଯେଉଁ ନିର୍ବାଚନ କରିଛି ତାହା ଓଡ଼ିଶା ସୀମାରେ ଆସୁନାହିଁ। କୋଟିଆ ହେଉଛି ଓଡ଼ିଶାର ଅଭିନ୍ନ ଅଙ୍ଗ। ଏଠାରେ ଆଉ କାହାର ପ୍ରବେଶକୁ ବରଦାସ୍ତ କରାଯିବ ନାହିଁ। ଓଡ଼ିଶା ବ୍ୟତୀତ ଅନ୍ୟ କେହି କୋଟିଆରେ ଉନ୍ନୟନ କାମ କରିପାରିବେ ନାହିଁ।

ଏପରିକି ଆନ୍ଧ୍ରର ନିର୍ବାଚିତ ପ୍ରତିନିଧିଙ୍କୁ ମଧ୍ୟ ପ୍ରବେଶ କରିବାକୁ ସୁଯୋଗ ଦିଆଯିବ ନାହିଁ ବୋଲି ଜିଲ୍ଲାପାଳ କହିଛନ୍ତି। ଆଗକୁ କୋଟିଆରେ ଓଡ଼ିଶା ପଞ୍ଚାୟତ ନିର୍ବାଚନ କରାଯିବ ବୋଲି ଜିଲ୍ଲାପାଳ ଅବଦାଲ ମହମ୍ମଦ ଅଖତର ପ୍ରତିକ୍ରିୟା ରଖିଛନ୍ତି। ପୂର୍ବରୁ ରାଜସ୍ୱ ସଚିବ ଓ ଆରଡିସି କୋଟିଆ ଯାଇ ସ୍ଥିତି ସମୀକ୍ଷା କରିଥିଲେ। କୋଟିଆରେ ବିଭିନ୍ନ ସରକାରୀ ଯୋଜନା ସମ୍ପର୍କରେ ଲୋକମାନଙ୍କ ସହ ଆଲୋଚନା କରିବା ସହିତ ସମସ୍ୟା ସମ୍ପର୍କରେ ପଚାରି ବୁଝିଛନ୍ତି। ଅନ୍ୟପଟେ କୋରାପୁଟ ଜିଲ୍ଲାପାଳଙ୍କ ସହିତ ଭିଡିଓ କନଫରେନ୍‌ସିଂରେ ଆଲୋଚନା କରିଥିଲେ ବାଚସ୍ପତି ସୂର୍ଯ୍ୟନାରାୟଣ ପାତ୍ର। ଗୃହ କମିଟି ପକ୍ଷରୁ ବୈଠକ ଡକାଯାଇ ସ୍ପଟ୍ ଭିଜିଟ ନେଇ ନିଷ୍ପତ୍ତି ନିଆଯିବ ବୋଲି ବାଚସ୍ପତି ସୂଚନା ଦେଇଥିଲେ।

ଓଡ଼ିଶାରେ ଟିକାକରଣରେ ନୂଆ ରେକର୍ଡ, ଦିନକରେ ଦିଆଗଲା ୪ଲକ୍ଷ ୧୬ହଜାର ୪୫୪ ଡୋଜ୍ ଭ୍ୟାକସିନ୍

ଭୁବନେଶ୍ୱର: ରାଜ୍ୟରେ କମିବାକୁ ଲାଗିଛି କରୋନା ସଂକ୍ରମଣ। ଏହି ଭିତରେ ରାଜ୍ୟରେ ଟିକାକରଣରେ ନୂଆ ରେକର୍ଡ ହୋଇଛି। ଦିନିକିଆ ଟିକାକରଣରେ ରେକର୍ଡ କରାଯାଇଛି। ଦିନକରେ ଦିଆଗଲା ୪ଲକ୍ଷ ୧୬ହଜାର ୪୫୪ ଡୋଜ୍ ଭ୍ୟାକସିନ୍। ଯାହାକି ରାଜ୍ୟରେ ଟିକାକରଣରେ ସର୍ବକାଳୀନ ରେକର୍ଡ। ଏନେଇ ସ୍ୱାସ୍ଥ୍ୟ ବିଭାଗ  ତରଫରୁ  ଟୁଇଟ୍ କରି ସୂଚନା ଦିଆଯାଇଛି। ପୂର୍ବରୁ ଦିନକୁ ୪ଲକ୍ଷରୁ ଅଧିକ ଡୋଜ୍ ଦେବାକୁ ରାଜ୍ୟ ସରକାର ଲକ୍ଷ୍ୟ ରଖିଥିଲେ। ଏହି ଲକ୍ଷ୍ୟ ସଫଳ ହେଉଥିବାରୁ ସମସ୍ତ ସ୍ୱାସ୍ଥ୍ୟକର୍ମୀ ଓ ଜନସାଧାରଣଙ୍କୁ ଧନ୍ୟବାଦ ପ୍ରଦାନ କରିଛି ସ୍ୱାସ୍ଥ୍ୟ ବିଭାଗ। ଏହା ସହିତ ଆଗାମୀ ଦିନରେ ଅଧିକରୁ ଅଧିକ ଲୋକଙ୍କୁ ଟିକାକରଣ କରିବାକୁ ବିଭାଗ ଲକ୍ଷ୍ୟ ରଖିଛି।

ସାମ୍ନାକୁ ଆସିଲା ପଡ଼ୋଶୀ ରାଷ୍ଟ୍ର ଚୀନ୍‌ର ଗେମପ୍ଲାନ୍‌, ଆଫଗାନିସ୍ତାନ ବଗ୍ରାମ ଏୟାରବେସକୁ ଗଲା ଚୀନ୍‌

ନୂଆଦିଲ୍ଲୀ: ପଦାକୁ ଆସିଲା ପଡ଼ୋଶୀ ରାଷ୍ଟ୍ର ଚୀନ୍‌ର ଗେମପ୍ଲାନ୍‌। ଆଫଗାନିସ୍ତାନ ବଗ୍ରାମ ଏୟାରବେସକୁ ଯାଇ ସେଠାକାର ସ୍ଥିତି ଅନୁଧ୍ୟାନ କରିଛନ୍ତି ଚୀନର ଗୁଇନ୍ଦା ଓ ସାମରିକ ପ୍ରତିନିଧି। ୨୦ ବର୍ଷ ଧରି ସ୍ଥିତି ଜାହିର କରିଥିବା ଆମେରିକା ଏହି ବଗ୍ରାମ ଏୟାରବେସକୁ ଦେଶର ସର୍ବବୃହତ ଏୟାରବେସ୍ ଭାବେ ବ୍ୟବହାର କରୁଥିଲା। କିଛି ଦିନ ପୂର୍ବରୁ ସରକାର ଗଠନ ନେଇ କାବୁଲକୁ ଆଇଏସଆଇ ମୁଖ୍ୟ ଫୈଜ ହମିଦ ଗସ୍ତ କରିଥିବା ବେଳେ, ଏବେ ଚୀନ ପ୍ରତିନିଧିଙ୍କ ଏୟାରବେସ ପରିଦର୍ଶନ ଆଗକୁ ନୂଆ ସମୀକରଣ ସୃଷ୍ଟି କରିବ। ଉତ୍ତର କାବୁଲସ୍ଥିତ ଏହି ଏୟାରବେସକୁ ଯାଇ ଚୀନର ଗୁଇନ୍ଦା ଓ ସାମରିକ ପ୍ରତିନିଧି ଆମେରିକା ବିରୋଧରେ କିଛି ପ୍ରମାଣ ସଂଗ୍ରହ କରିଥିବା କୁହାଯାଇଛି।

ଏଠାରେ ତାଲିବାନ ଓ ପାକିସ୍ତାନ ସହଯୋଗରେ ଚୀନ ଏକ ଗୁଇନ୍ଦା ସହାୟକ କେନ୍ଦ୍ର ପ୍ରତିଷ୍ଠା କରିବାକୁ ଯୋଜନା କରିଥିବା ସୂଚନା ମିଳିଛି। ଚୀନର ଜିଞ୍ଜିଆଙ୍ଗ ପ୍ରଜାତନ୍ତ୍ରର ବିଦ୍ରୋହୀ ୟୁଘୁର ମୁସଲମାନଙ୍କ କାର୍ଯ୍ୟକଳାପ ଉପରେ ଦୃଷ୍ଟି ରଖିବା ଲାଗି ଏହି ଗସ୍ତ ଉଦ୍ଦିଷ୍ଟ ଥିଲା। ଆଶ୍ଚର୍ଯ୍ୟର କଥା, ଚୀନ ପ୍ରତିନିଧିଙ୍କ ବିମାନ ପାକିସ୍ତାନ ଦେଇ ଆସିଥିଲା। ଫଳରେ କାବୁଲ ବିମାନ ବନ୍ଦରରେ ଏହି ବିମାନ ଦୃଶ୍ୟମାନ ହୋଇ ନଥିଲା। ଏହା ପ୍ରମାଣ କରୁଛି ଚୀନ ପ୍ରତିନିଧିଙ୍କ ଗସ୍ତ ସମ୍ପର୍କରେ ପାକିସ୍ତାନ ଅବଗତ ଥିଲା। ଏପଟେ ଲଦାଖ, ଅରୁଣାଚଳ ପ୍ରଦେଶସ୍ଥିତ ଏଲଏସିର ୧୦ଟି ସ୍ଥାନରେ ଚୀନ ଏୟାରଫୋର୍ସ ଘାଟି ପ୍ରତିଷ୍ଠା କରିଥିବା ବେଳେ, କୌଶଳଗତ ଭାବେ ଗୁରୁତ୍ୱପୂର୍ଣ୍ଣ ବଗ୍ରାମ ଏୟାରବେସକୁ ଚୀନ ପ୍ରତିନିଧିଙ୍କ ଗସ୍ତ ଭାରତ ଲାଗି ଚିନ୍ତାର କାରଣ ହୋଇଛି।

ଯଦି ପାକିସ୍ତାନ ସହାୟତାରେ ଚୀନ ଏଠାରେ ଏୟାରବେସ୍ ପ୍ରତିଷ୍ଠା କରେ, ତେବେ ସୀମାରେ ପୁଣି ଅସ୍ଥିରତା ଦେଖାଦେବ। ଆଇଏସଆଇ ମୁଖ୍ୟ ହମିଦ କାବୁଲ ଗସ୍ତରେ ଯାଇ ତତକାଳୀନ ଆଫଗାନିସ୍ତାନ ସରକାରକୁ ଭାରତ କରୁଥିବା ସହାୟତା ପ୍ରସଙ୍ଗ ଉଠାଇବା ସହ ଆତଙ୍କବାଦ ବୃଦ୍ଧି ଦିଗରେ ଭାରତ କାର୍ଯ୍ୟ କରୁଛି ବୋଲି ଅଭିଯୋଗ କରିଥିଲେ। ଆଫଗାନିସ୍ତାନକୁ ତାଲିବାନ ଅକ୍ତିଆର କରିବା ପରେ ପରେ କୂଟନୈତିକ ସମ୍ପର୍କ ଆଗୁଆ ପ୍ରତିଷ୍ଠା କରିବା କ୍ଷେତ୍ରରେ ଚୀନ ଥିଲା ପ୍ରଥମ ରାଷ୍ଟ୍ର। କିଛି ଦିନ ପୂର୍ବରୁ ଆଫଗାନିସ୍ତାନ ଲାଗି ନିଯୁକ୍ତ ଚୀନ ରାଷ୍ଟ୍ରଦୂତ ହେ ଓ୍ୱାଙ୍ଗ ତାଲିବାନ ନେତାଙ୍କ ସହ ଭେଟି ହସ୍ପିଟାଲ, ସ୍କୁଲ, ସୌରଶକ୍ତି ଷ୍ଟେସନ ନିର୍ମାଣ ଲାଗି ପ୍ରସ୍ତାବ ଦେଇଥିଲେ।

ଖୋଲୁଛି DRDO ହନିଟ୍ରାପର ଗୁମର, କ୍ରାଇମବ୍ରାଞ୍ଚର ଜେରା ପରେ ମିଳିଲା ଏମିତି ତଥ୍ୟ

ଭୁବନେଶ୍ୱର: ଚାନ୍ଦିପୁର ପ୍ରତିରକ୍ଷା ଘାଟିରେ ଗୁପ୍ତ ତଥ୍ୟ ଲିକ ଘଟଣା। ଗିରଫ ଅଭିଯୁକ୍ତଙ୍କୁ ଜେରା କରି ଅନେକ ଚାଞ୍ଚଲ୍ୟକର ତଥ୍ୟ ପାଇଛି କ୍ରାଇମବ୍ରାଞ୍ଚ। ଡ୍ରାଇଭର ଭାବେ କାର୍ଯ୍ୟ କରୁଥିବା ଉତ୍ତରପ୍ରଦେଶ ମିରଟ ଅଞ୍ଚଳର ଅଭିଯୁକ୍ତ ସଚିନ କୁମାର ଠାରୁ ଅନେକ ତଥ୍ୟ ପାଇଛି କ୍ରାଇମବ୍ରାଞ୍ଚ। ମିରଟରେ କିଛି ବ୍ୟକ୍ତି ଅଛନ୍ତି ଯେଉଁମାନେ ଗୁପ୍ତଚରଙ୍କ ସହାୟତାରେ ଶତ୍ରୁରାଷ୍ଟ୍ରକୁ ସୁରକ୍ଷା ପ୍ରତିରକ୍ଷା ସଂକ୍ରାନ୍ତ ତଥ୍ୟ ପ୍ରଦାନ କରିଥାନ୍ତି। ଏଥିପାଇଁ ସେମାନଙ୍କ ନିକଟକୁ ବିଦେଶରୁ ବିପୁଳ ଅର୍ଥ ଆସିଥାଏ। ସେମାନେ ଏଜେଣ୍ଟ ଜରିଆରେ ଖୁବ ଚତୁରତାର ସହ ଅର୍ଥ କାରବାର କରିଥାନ୍ତି।

ଅଧିକ ତଥ୍ୟ ଦେଲେ ଅଧିକ ଟଙ୍କା ଦେଇ ପ୍ରୋତ୍ସାହନ କରାଯାଏ। ସୁନ୍ଦରୀ ଯୁବତୀଙ୍କୁ ବ୍ଲାକମେଲ ଓ ଟଙ୍କାର ପ୍ରଲୋଭନ ଦେଖାଇ ଅକ୍ତିଆରକୁ ଆଣିବା ପରେ ଦେଶର ସୁରକ୍ଷା ଦାୟିତ୍ୱରେ ଥିବା ଅଧିକାରୀ ଓ କର୍ମଚାରୀଙ୍କୁ ହନିଟ୍ରାପରେ ଫସାଇବା ପାଇଁ ପ୍ରରୋଚିତ କରିଥାନ୍ତି। ଯୁବତୀମାନେ ସେମାନଙ୍କର ସୌନ୍ଦର୍ଯ୍ୟ ଓ ନଗ୍ନତାର ମାୟାଜାନ ବିଛାଇ ଅଧିକାରୀ ଓ କର୍ମଚାରୀଙ୍କ ଠାରୁ ତଥ୍ୟ ସଂଗ୍ରହ କରିଥାନ୍ତି ବୋଲି କ୍ରାଇମବ୍ରାଞ୍ଚ ଜାଣିବାକୁ ପାଇଛି। ଗିରଫ ଅଭିଯୁକ୍ତ ସଚିନ ପ୍ରାୟ ବର୍ଷେ ହେବ ଏପରି ଗୁପ୍ତଚର ଭାବେ କାର୍ଯ୍ୟ କରୁଥିବା ଜଣାପଡ଼ିଛି।

ସଚିନକୁ ମିରଟର ଜଣେ କ୍ଷମତାଶାଳୀ ବ୍ୟକ୍ତି ମୋଟା ଅଙ୍କର ଅର୍ଥ ଦେଇ ଚାନ୍ଦିପୁର ପ୍ରତିରକ୍ଷା ଘାଟି ସମ୍ପର୍କିତ ତଥ୍ୟ ହାସଲ କରିଥିବା ନେଇ କ୍ରାଇମବ୍ରାଞ୍ଚ ଜାଣିବାକୁ ପାଇଛି। ସେହିପରି ଅଭିଯୁକ୍ତ ମସାଫିରଠାରୁ ପଶ୍ଚିମବଙ୍ଗର କେତକ ଯୁବତୀଙ୍କ ସୂଚନା ପାଇଛି କ୍ରାଇମବ୍ରାଞ୍ଚ। ହନିଟ୍ରାପରେ ଫସାଇଥିବା ୩ ଜଣ ଯୁବତୀଙ୍କ ଅସଲ ପରିଚୟ ଜାଣିବାକୁ ବୈଷୟିକ ଟିମ ସହାୟତାରେ କ୍ରାଇମବ୍ରାଞ୍ଚ ସହାୟତା ଚଳାଇଛି। ଅଭିଯୁକ୍ତ ବିଜୟ ମଧ୍ୟ ଏଥିରେ ଫଶିଥିବା ଜଣାପଡ଼ିଛି। ଆହୁରି ଅନେକ ତଥ୍ୟ ଉଗାରିବବାକୁ ପ୍ରଶ୍ନ ତାଲିକା ପ୍ରସ୍ତୁତ କରିଛି କ୍ରାଇମବ୍ରାଞ୍ଚ।

ରାଜ୍ୟ ସରକାରଙ୍କୁ କେନ୍ଦ୍ରର ଅନୁସରଣ: BSKY ଯୋଜନା ଢାଞ୍ଚାରେ କେନ୍ଦ୍ର ବାଣ୍ଟିବ ଡିଜିଟାଲ ହେଲ୍ଥ କାର୍ଡ

ଭୁବନେଶ୍ୱର: ରାଜ୍ୟକୁ ଅନୁସରଣ କଲା କେନ୍ଦ୍ର  । ବିଜୁ ସ୍ୱାସ୍ଥ୍ୟ କାର୍ଡ ଢାଞ୍ଚାରେ କେନ୍ଦ୍ର ବାଣ୍ଟିବ ଡିଜିଟାଲ ହେଲ୍ଥ କାର୍ଡ଼ । ଆୟୁଷ୍ମାନ ଭାରତ ଯୋଜନାରେ ଥିବା ତ୍ରୁଟିକୁ ନୂଆ କାର୍ଡ ମାଧ୍ୟମରେ ସୁଧାରିବା ପାଇଁ କେନ୍ଦ୍ର  ପ୍ରୟାସ କରୁଛି । ପ୍ରଥମ ପର୍ଯ୍ୟାୟରେ କେନ୍ଦ୍ର ଶାସିତ ଅଞ୍ଚଳରେ ପାଇଲଟ ପ୍ରକଳ୍ପ ଆରମ୍ଭ ହୋଇଛି । ତେବେ ବିଏସକେଓ୍ବାଇ କାର୍ଡ ଭଳି କେନ୍ଦ୍ର ସରକାର ପ୍ରସ୍ତୁତ କରୁଥିବା କାର୍ଡରେ ଏତେ ଚିକିତ୍ସା ସୁବିଧା ନାହିଁ  ।

ନବୀନଙ୍କ ଯୋଜନାକୁ ଅନୁସରଣ କରୁଛନ୍ତି କେନ୍ଦ୍ର ସରକାର । ରାଜ୍ୟ ସରକାରଙ୍କ ଆଉ ଏକ ସଫଳ ଯୋଜନାକୁ ଆପଣାଇଛି କେନ୍ଦ୍ର । ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ସ୍ମାର୍ଟ କାର୍ଡକୁ ଅନୁସରଣ କରୁଛି କେନ୍ଦ୍ର । ବିଜୁ ହେଲ୍ଥ୍ ସ୍ମାର୍ଟ କାର୍ଡ ଭଳି ହିତାଧିକାରୀଙ୍କ ଆଧାର ଓ ଫୋନ ନମ୍ବର ବି କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଡିଜିଟାଲ ହେଲ୍ଥ କାର୍ଡରେ ରହିବ । ଜାତୀୟ ଡିଜିଟାଲ ହେଲ୍ଥ ମିଶନ ଅଧୀନରେ ଲୋକଙ୍କୁ ହେଲ୍ଥ କାର୍ଡ ଦିଆଯିବ । ତେବେ ବିଜୁ ସ୍ବାସ୍ଥ୍ୟ ସ୍ମାର୍ଟ କାର୍ଡରେ ଅନେକ ସୁବିଧା ଥିବାରୁ ଏହାକୁ ମଡେଲ ଭାବେ ନେଇଛନ୍ତି କେନ୍ଦ୍ର ସରକାର । ୧୪ଟିକିଆ ନମ୍ବର ବିଶିଷ୍ଟ ଏହି କାର୍ଡ ପାଇବା ପାଇଁ ହିତାଧିକାରୀଙ୍କୁ ଏନଡିଏଚ୍ଏମ୍ ମୋବାଇଲ ଆପ୍ ଡାଉନଲୋଡ କରିବାକୁ ପଡ଼ିବ ।

ବିଜୁ ସ୍ବାସ୍ଥ୍ୟ ସ୍ମାର୍ଟ କାର୍ଡରେ ସମସ୍ତ ସରକାରୀ ମେଡିକାଲ ସହିତ ରାଜ୍ୟ ଓ ରାଜ୍ୟ ବାହାରେ ୨୦୦ରୁ ଅଧିକ ଘରୋଇ ହସ୍ପିଟାଲରେ ହିତାଧିକାରୀ ମାଗଣା ଚିକିତ୍ସା ସୁବିଧା ପାଇପାରିବେ । ହେଲେ ଆୟୁଷ୍ମାନ ଯୋଜନା ହେଲ୍ଥ କାର୍ଡ ବୀମାଭୁକ୍ତ ହୋଇଥିବାରୁ ଚିକିତ୍ସା ପାଇବା ବୀମା କମ୍ପାନୀଙ୍କ ଉପରେ ନିର୍ଭର କରିବ । ସେହିଭଳି ବିଏସକେଓ୍ବାଇ କାର୍ଡକୁ ମୁଖ୍ୟମନ୍ତ୍ରୀ ଏବଂ ମନ୍ତ୍ରୀମାନେ ଲୋକଙ୍କ ପାଖକୁ ଯାଇ ବାଣ୍ଟଥିବା ବେଳେ ଆୟୁଷ୍ମାନ ଯୋଜନା କାର୍ଡ ପାଇବାକୁ ଲୋକଙ୍କୁ କଷ୍ଟ କରିବାକୁ ପଡ଼ିବ । ନବୀନ ସରକାରଙ୍କ ଆଉ ଏକ ଯୋଜନାକୁ କେନ୍ଦ୍ର ଆପଣାଇବା ବେଳେ ଏଥିରେ ମିଳୁଥିବା ସୁବିଧାକୁ ବି ଧ୍ୟାନ ଦେବା ଦରକାର ବୋଲି ସମୀକ୍ଷକ କହିଛନ୍ତି ।

ପୂର୍ବରୁ ମମତା ଯୋଜନା ଏବଂ ବେଆଇନ ଖଣି କାରବାର ରୋକିବାକୁ ରାଜ୍ୟ ସରକାର ଆଣିଥିବା ସ୍ବତନ୍ତ୍ର ସଫ୍ଟଓ୍ବେରକୁ ମଧ୍ୟ କେନ୍ଦ୍ର ସରକାର ଅନୁସରଣ କରିଥିଲେ  ।  ଏଥିସହ ଅନ୍ୟ ରାଜ୍ୟଙ୍କୁ ଏହାକୁ ମଡେଲ ଭାବେ ଗ୍ରହଣ କରିବାକୁ ପରାମର୍ଶ ଦେଇଥିଲେ ।

ଆରସିବି ବିପକ୍ଷ ମ୍ୟାଚ୍‌ରେ ୯ ଓ୍ୱିକେଟରେ କେକେଆର ବିଜୟୀ

0

ଆବୁଧାବି: ଚଳିତ ଆଇପିଏଲ୍‌ର ୩୧ତମ ମ୍ୟାଚ୍‌ରେ ୯ ଓ୍ୱିକେଟରେ ବିଜୟୀ ହୋଇଛି କୋଲକାତା ନାଇଟ ରାଇଡର୍ସ । ଶେଖି ଜାୟେଦ୍ ଷ୍ଟାଡିୟମଠାରେ ଖେଳାଯାଇଥିବା ଆରସିବି ବିପକ୍ଷ ମ୍ୟାଚ୍‌ରେ ଏକତରଫା ବିଜୟ ହାସଲ କରିଛି କୋଲକାତା ନାଇଟ ରାଇଡର୍ସ ।  ଆରସିବି ଦ୍ୱାରା ଧାର୍ଯ୍ୟ ୯୩ରନର ବିଜୟ ଲକ୍ଷ୍ୟକୁ କୋଲକାତା ୧୦ମ ଓଭରରେ ଗୋଟିଏ ମାତ୍ର ଓ୍ୱିକେଟ ହରାଇ ହାସଲ କରିନେଇଥିଲା । ଦଳ ପକ୍ଷରୁ ଶୁଭମନ ଗିଲ୍ ୪୮, ଭେଙ୍କଟେଶ ଆୟାର ୪୧ ରନ କରିଥିଲେ ।

May be an image of 1 person, playing a sport and text

ଟସ ଜିତି ପ୍ରଥମେ ବ୍ୟାଟି କରିଥିବା ବିରାଟଙ୍କ ଦଳ ପ୍ରଥମରୁ ହିଁ ଅଧିନାୟକ ବିରାଟ କୋହଲିଙ୍କୁ ହରାଇ ବିପଦର ସମ୍ମୁଖୀନ ହୋଇଥିଲା । ତେବେ ଦେବୀଦତ୍ତ ପଲ୍ଲିକଲ ଓ ଶ୍ରୀକର ଭାରତ ସତର୍କତାର ସହ ବ୍ୟାଟିଂ କରି ଦଳୀୟ  ସ୍କୋରକୁ ଆଗେଇ ନେଇଥିଲେ । କିନ୍ତୁ ଦଳର ମଧ୍ୟକ୍ରମ ଓ ନିମ୍ନ ମଧ୍ୟକ୍ରମ ବ୍ୟାଟ୍ସମ୍ୟାନମାନେ ବିଫଳ ହେବା ପରେ ଦଳ ୧୯ ଓଭରରେ ମାତ୍ର ୯୨ ରନ କରି ଅଲଆଉଟ ହୋଇଯାଇଥିଲା । ଦଳର ୭ ଜଣ ବ୍ୟାଟ୍ସମ୍ୟାନ ଦୁଇ ଅଙ୍କ ଛୁଇଁପାରି ନଥିଲେ । କୋଲକତା ପକ୍ଷରୁ ବରୁଣ ଚକ୍ରବର୍ତ୍ତୀ ଓ ଆନ୍ଦ୍ରେ ରସେଲ ୩ଟି ଲେଖାଏଁ ଓ ଫର୍ଗୁସନ ୨ଟି ଓ୍ୱିକେଟ ନେଇଥିଲେ ।

May be an image of 2 people, people playing sports and text

 

ନାଳରେ ଭାସିଗଲେ ଚୋରା ମଦ ବେପାରୀ: ଅବକାରୀ ଅଧିକାରୀଙ୍କ ଭୟରେ ଡେଇଁ ପଡ଼ିଲେ

ବାଲେଶ୍ୱର: ଚମ୍ପଟ ଉଦ୍ୟମ ବେଳେ ନାଳରେ ଭାସି ଗଲେ ଚୋରା ମଦ ବେପାରୀ । ବାଲେଶ୍ୱରରେ ଅବକାରୀ ବିଭାଗର ଚଢ଼ାଉ ବେଳେ ଏଭଳି ଅଘଟଣ ଘଟିଛି । ଭାସି ଯାଇଥିବା ବ୍ୟକ୍ତି ଜଣକ ହେଲେ ପୁରୁଣା ବାଲେଶ୍ୱର ଗାଁର ସପନ ମାଝୀ । ସେ ଗିରଫ ଭୟରେ ମଦ ଲଦା ଯାଇଥିବା ନିଜ ମୋଟରସାଇକେଲ ଛାଡି ନାଳକୁ ଡେଇଁ ପଡିଥିଲେ । ହେଲେ ସମୁଦ୍ରକୁ ସଂଯୋଗ କରୁଥିବା ସେହି ନାଳରେ ପାଣି ସୁଅ ଅଧିକ ରହିଥିଲା । ଫଳରେ ସେ ବାହାରି ନପାରି ଭାସି ଯାଇଥିଲେ । ଏନେଇ ସୂଚନା ପାଇବା ପରେ ଉଦ୍ଧାର କାର୍ଯ୍ୟ ଜାରି ରଖିଛି ଅଗ୍ନିଶମ ବାହିନୀ ଓ ପୋଲିସ । ଏ ପର୍ଯ୍ୟନ୍ତ ସପନଙ୍କ ସନ୍ଧାନ ମିଳିପାରିନଥିବା ସୂଚନା ରହିଛି ।

ଏଥିସହିତ ପଢ଼ନ୍ତୁ: ଖୋର୍ଦ୍ଧାରେ ଡିଜେ ସାଉଣ୍ଡକୁ ନେଇ ହତ୍ୟାକାଣ୍ଡ: ୪ଜଣଙ୍କୁ ଅଟକ ରଖିଛି ପୋଲିସ

କବିସୂର୍ଯ୍ୟନଗରର ବହୁ ବିଜେପି ଓ କଂଗ୍ରେସ ନେତାଙ୍କ ବିଜେଡିରେ ଯୋଗଦାନ

ଭୁବନେଶ୍ୱର: କବିସୂର୍ଯ୍ୟନଗର ବିଧାନସଭା ନିର୍ବାଚନ ମଣ୍ଡଳୀ ଅନ୍ତର୍ଗତ କବିସୂର୍ଯ୍ୟନଗର ବ୍ଳକ୍ ଅନ୍ତର୍ଗତ ଜରଡ଼, ଗୁଡ଼ିଆଳି ଏବଂ ଆଠଗଡ଼ ପଞ୍ଚାୟତର ବହୁ ବିଜେପି ଏବଂ କଂଗ୍ରେସ କର୍ମୀ ଦଳ ପରିତ୍ୟାଗ କରି ଆଜି ଭୁବନେଶ୍ୱରଠାରେ ନବୀନ ପଟ୍ଟନାୟକଙ୍କ ବଳିଷ୍ଠ ନେତୃତ୍ୱ ଏବଂ ଲୋକାଭିମୁଖୀ ଯୋଜନାରେ ଅନୁପ୍ରାଣିତ ହେବା ସହିତ ଯୁବ ନେତା ପ୍ରଣବ ପ୍ରକାଶ ଦାସଙ୍କ ସାଂଗଠନିକ କାର୍ଯ୍ୟକ୍ରମରେ ଆକୃଷ୍ଠ ହୋଇ ବିଧାୟିକା ଲତିକା ପ୍ରଧାନଙ୍କ ନେତୃତ୍ୱକୁ ସମର୍ଥନ ଜଣାଇ ତାଙ୍କ ଉପସ୍ଥିତିରେ ବିଜୁ ଜନତା ଦଳ (ବିଜେଡି)ରେ ଯୋଗ ଦେଇଛନ୍ତି ।

ଜରଡ଼ ପଞ୍ଚାୟତର ରାଜେଶ କୁମାର ତ୍ରିପାଠୀ, ପ୍ରେମାନନ୍ଦ ପାତ୍ର, ବ୍ରହ୍ମଜୀ ପାତ୍ର, ରବୀନ୍ଦ୍ର କୁମାର ତ୍ରିପାଠୀ, ପ୍ରଶାନ୍ତ ଦୋରା, ସଞ୍ଜୟ ବେହେରା, ପାଣ୍ଡବ ମେହେନା,ଦିବାକର ମେହେନା, ଶଙ୍କର ଜେନା, ବାଲାଜୀ ପଣ୍ଡା, କୈଳାଶ ସାହୁ, ଭାଗିରଥୀ ଦୋରା, ଦେବାଶିଷ ପଣ୍ଡା, କିଶୋର ଚନ୍ଦ୍ର ସ୍ୱାଇଁ, ଦୟା ସ୍ୱାଇଁ, ପୀତବାସ ପଣ୍ଡା, ଲଳିତ ଡାକୁଆ, ନୀଳାଞ୍ଚଳ ମହାନ୍ତି, ଗଣେଶ ସାହୁ, କିଶୋର ଚନ୍ଦ୍ର ସାହୁ, ଅଶୋକ ସାହୁ, ହୃଷିକେଶ ସାହୁ, ନାରାୟଣ ସେଠୀ, ଦିଲ୍ଲୀପ କୁମାର ମହାନ୍ତି, ରାଜେଶ କୁମାର ମେହେନା, ଭବାନୀ ଶଙ୍କର ତ୍ରିପାଠୀ । ସେହିଭଳି ଗୁଡ଼ିଆଳୀ ପଞ୍ଚାୟତର ସୁବାଷ ଚନ୍ଦ୍ର ସେଠୀ, ନୀଳାଞ୍ଚଳ ପଣ୍ଡା, ସଞ୍ଚୟ ପ୍ରଧାନ, ଶଙ୍କର ଭୂୟାଁ, ଯୋଗେନ୍ଦ୍ର ଭୂୟାଁ, ମଙ୍ଗରାଜ ସ୍ୱାଇଁ ଓ ଆଠଗଡ଼ ପଞ୍ଚାୟତର ସନ୍ତୋଷ କୁମାର ମାର୍ଥୀ, ବ୍ରିଟିଶ ନାୟକ ପ୍ରମୁଖ ଯୋଗଦେଇଛନ୍ତି ।

ପାକିସ୍ତାନ ସହ ଖେଳିବନି ଇଂଲଣ୍ଡ ଟିମ୍‌, କ୍ରିକେଟ ବୋର୍ଡର ନିଷ୍ପତ୍ତି

ପାକିସ୍ତାନ କ୍ରିକେଟକୁ ଜୋରଦାର ଝଟ୍‌କା ଲାଗିଛି । ନ୍ୟୁଜିଲାଣ୍ଡ ପରେ ଇଂଲଣ୍ଡ ଟିମ୍‌ ମଧ୍ୟ ଏବେ ପାକିସ୍ତାନ ସହ ଖେଳିବାକୁ ମନା କରିଦେଇଛି । ଇଂଲଣ୍ଡର ଉଭୟ ମହିଳା ଓ ପୁରୁଷ ଟିମର ମ୍ୟାଚ୍‌ ବାତିଲ୍‌ କରାଯାଇଛି । ଇଂଲଣ୍ଡ କ୍ରିକେଟ ବୋର୍ଡ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି।

ସୂଚନା ଅନୁଯାୟୀ, ଆସନ୍ତା ଅକ୍ଟୋବର ମାସରେ ଇଂଲଣ୍ଡ-ପାକିସ୍ତାନ ମଧ୍ୟରେ ମ୍ୟାଚ୍‌ ହୋଇଥାନ୍ତା ।

ଇଂଲଣ୍ଡ ଏବଂ ୱେଲ୍ସ କ୍ରିକେଟ୍ ବୋର୍ଡ (ECB) ତରଫରୁ ଆଜି ଜାରି ହୋଇଥିବା ପ୍ରେସ ବିଜ୍ଞପ୍ତିରେ ଏନେଇ ସୂଚନା ଦିଆଯାଇଛି । ପୁରୁଷ ଫ୍ୟୁଚର ଟୁର୍ କାର୍ଯ୍ୟକ୍ରମର ଏକ ଅଂଶ ଭାବରେ ୨୦୨୨ ମସିହାରେ ପାକିସ୍ତାନ ଗସ୍ତ କରିବା ପାଇଁ ECB ବହୁ ଦିନର ପ୍ରତିବଦ୍ଧତା କରିଥିଲା । ଚଳିତ ବର୍ଷ ପ୍ରାରମ୍ଭରେ ଆମେ ଅକ୍ଟୋବରରେ ପାକିସ୍ତାନ ଗସ୍ତ କରିବାକୁ ଯୋଜନା କରିଥିଲୁ। ଏପରିକି ପାକିସ୍ତାନରେ ଦୁଇଟି ଅତିରିକ୍ତ T20 ମ୍ୟାଚ୍, T20 ବିଶ୍ୱକପ ଅଭ୍ୟାସ ଭାବେ ଖେଳିବାକୁ ସହମତି ପ୍ରକାଶ କରିଥିଲା ।

ଦିନକ ପରେ ମୁଖ୍ୟମନ୍ତ୍ରୀଙ୍କ ବଲାଙ୍ଗୀର ଗସ୍ତ: ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ କରିବେ ସ୍ମାର୍ଟ କାର୍ଡ ପ୍ରଦାନ

ବଲାଙ୍ଗୀର ପାଇଁ ବିକାଶର ବ୍ଲୁପ୍ରିଣ୍ଟ । ଆଉ ଦିନକ ପରେ ବଲାଙ୍ଗୀରରେ ବିଜୁ ସ୍ୱାସ୍ଥ୍ୟ କଲ୍ୟାଣ କାର୍ଡ ବଣ୍ଟନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏଥିସହ ହରିଶଙ୍କର, ନୃସିଂହନାଥ ରୂପାନ୍ତର ପ୍ରକଳ୍ପର ଶିଳାନ୍ୟାସ କରିବେ । ବଲାଙ୍ଗୀରର ବିକାଶ ପାଇଁ ପ୍ରାୟ ୬ଶହକୋଟି ଟଙ୍କାର ପ୍ରକଳ୍ପ ଉଦଘାଟନ ଓ ଭିତ୍ତପ୍ରସ୍ତର ସ୍ଥାପନ କାର୍ଯ୍ୟକ୍ରମ ରହିଛି । ତୃଣମୂଳସ୍ତରରେ ଯୋଜନାର ସଫଳ ରୂପାୟନ ପାଇଁ ଜିଲ୍ଲାର ୧୪ଟି ବ୍ଲକ ପାଇଁ ୧୧ଜଣ ମନ୍ତ୍ରୀ ଓ ୧୬ଜଣ ଦଳୀୟ ଉପଦେଷ୍ଟାଙ୍କୁ ମୁଖ୍ୟମନ୍ତ୍ରୀ ଦାୟିତ୍ବ ଦେଇଛନ୍ତି ।

ସୁସ୍ଥ ବଲାଙ୍ଗୀର ପାଇଁ ସ୍ମାର୍ଟ ସ୍ୱପ୍ନ । ବଲାଙ୍ଗୀର ବିକାଶରେ ଯୋଡ଼ିହେବ ନୂଆ ଫର୍ଦ୍ଦ । ବଦଳିବ ଭିତ୍ତଭୂମି, ଲାଗିବ ବିକାଶର ରଙ୍ଗ । ହରିଶଙ୍କର, ନୃସିଂହନାଥ ପ୍ରକଳ୍ପର ପଡିବ ନିଅ । ୨୨ତାରିଖରେ ବଲାଙ୍ଗୀର ଗସ୍ତରେ ଯାଇ ବିଜୁ ସ୍ୱାସ୍ଥ୍ୟ କଲ୍ୟାଣ କାର୍ଡ ବଣ୍ଟନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କାର୍ଡ ଦେଖାଇ ମାଗଣାରେ ଉନ୍ନତ ସ୍ୱାସ୍ଥ୍ୟ ସେବା ପାଇପାରିବେ । ପ୍ରତି ପରିବାରକୁ ୫ଲକ୍ଷ ଟଙ୍କା ଓ ମହିଳାଙ୍କୁ ୧୦ଲକ୍ଷ ଟଙ୍କା ପର୍ଯ୍ୟନ୍ତ ଚିକିତ୍ସା ସହାୟତା ମିଳିବ । ଜାତୀୟ ଖାଦ୍ୟ ସୁରକ୍ଷା ଓ ରାଜ୍ୟ ଖାଦ୍ୟ ସୁରକ୍ଷା ହିତାଧିକାରୀଙ୍କୁ ମିଳିବ ସ୍ମାର୍ଟ ହେଲଥ କାର୍ଡ। ରାଜ୍ୟ ସହ ଦେଶର ୨୦୦ଟି ହସପିଟାଲରେ କାର୍ଡ ଜରିଆରେ ମିଳିବ ଚିକିତ୍ସା ସୁବିଧା ।

ସ୍ୱତନ୍ତ୍ର ବିମାନ ଯୋଗେ ତୁଷୁରା ଏୟାରଷ୍ଟ୍ରିପରେ ପହଞ୍ଚିବେ ମୁଖ୍ୟମନ୍ତ୍ରୀ। ସେଠାରୁ ଟିଟିଲାଗଡ଼ ମିନି ଷ୍ଟାଡିୟମ ଯାଇ ହିତାଧିକାରୀଙ୍କୁ ସ୍ମାର୍ଟ ହେଲଥ୍ କାର୍ଡ ବଣ୍ଟନ କରିବେ । ଏହାପରେ ପାଟଣାଗଡ଼ରେ ବିଜୁ ସ୍ମାର୍ଟ ହେଲଥ୍ କାର୍ଡ ବଣ୍ଟନ ସହ ହରିଶଙ୍କର ନୃସିଂହନାଥ ବିକାଶ ପ୍ରକଳ୍ପର ଶିଳାନ୍ୟାସ ହେବ । ବଲାଙ୍ଗୀର ଅତ୍ୟାଧୁନିକ ବସଷ୍ଟାଣ୍ଡ ଉଦଘାଟନ କରିବା ସହ ପାନୀୟ ଜଳଯୋଗାଣ, କୃଷି, ଜଳସେଚନ ଭଳି ବିକାଶମୂଳକ ପ୍ରକଳ୍ପର ଶିଳାନ୍ୟାସ କରିବା କାର୍ଯ୍ୟକ୍ରମ ରହିଛି ।

ସ୍ୱାସ୍ଥ୍ୟସେବା କ୍ଷେତ୍ରରେ ନୂଆ ଅଧ୍ୟାୟ ଲେଖିଛି ବିଜୁ ସ୍ୱାସ୍ଥ୍ୟ କଲ୍ୟାଣ କାର୍ଡ । ମାଲକାନଗିରି, ସୁନ୍ଦରଗଡ଼ ପରେ ବଲାଙ୍ଗିରରେ ସ୍ମାର୍ଟକାର୍ଡ ବଣ୍ଟନର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ । ସେପଟେ ଗନ୍ଧମାର୍ଦ୍ଦନ ପର୍ବତ ଅଞ୍ଚଳରେ ହରିଶଙ୍କର, ନୃସିଂହ ନାଥ ବିକାଶ ପ୍ରକଳ୍ପର ପଡିବ ନିଅ । ଦୁଇ ମନ୍ଦିର ବିକାଶ ବେଳେ ସାଂସ୍କୃତିକ, ଧାର୍ମିକ, ପାରିବେଶିକ ଓ ଦୁଃସାହସିକ ପର୍ଯ୍ୟଟନକୁ ଗୁରୁତ୍ବ ଦେଉଛନ୍ତି ରାଜ୍ୟ ସରକାର ।