ପିପିଲି: ଡେଲାଙ୍ଗରେ ଘଟିଛି ଅଘଟଣ । ଲୁଣା ନଦୀରେ ବୁଡ଼ି ୨ଭାଇଙ୍କ ଘଟିଛି ମୃତ୍ୟୁ । ଡେଲାଙ୍ଗ ଧାନକେରା ପଞ୍ଚାୟତ ନାଗଣ ଗାଁରେ ଘଟିଛି ଏହି ଅଘଟଣ । ମିଳିଥିବା ସୂଚନା ମୁତବାକ ଦୁଇ ଭାଇ ଲୁମା ନଦୀକୁ ଗାଧୋଇବା ଯାଇଥିଲେ । ଏହି ସମୟରେ ନଦୀରେ ପ୍ରଖର ସୁଅ ଥିବାବେଳେ ଦୁଇ ଭାଇଙ୍କ ପାଦ ଖସି ଯାଇଥିଲା । ଫଳରେ ନଦୀ ସୁଅରେ ଭାସିଯାଇଛନ୍ତି ଦୁଇ ଭାଇ।
ଉଭୟ ନାବାଳକ ହୋଇଥିବା ନେଇ ସୂଚନା ରହିଥିବାବେଳେ ଜଣକୁ ୭ବର୍ଷ ଏବଂ ଅନ୍ୟ ଜଣଙ୍କୁ ୪ ବର୍ଷ । ସେପଟେ ଦୁଇ ନାବାଳକଙ୍କ ସହ କେଉଁ ସ୍ଥିତିରେ ଅଘଟଣ ଘଟିଲା । ସେମାନେ ଦୁହେଁ ଯାଇଥିଲେ ନା ସାଥିରେ ଆଉ କିଏ ଯାଇଥିଲେ ଏନେଇ ଖୋଳତାଡ଼ ଆରମ୍ଭ କରିଛି ଡେଲାଙ୍ଗ ପୋଲିସ ।
ଭୁବନେଶ୍ୱର: ଓଡିଆ ସିନେ ଜଗତର ଲୋକପ୍ରିୟ ଅଭିନେତା, ଓଡ଼ିଶା ସରକାରଙ୍କ ‘ମୋ କଲେଜ ଅଧ୍ୟକ୍ଷ’, ଉଡ୍ର ଚାରିଟେବୁଲ୍ ଟ୍ରଷ୍ଟର ଉପଦେଷ୍ଟା ଆକାଶ ଦାସନାୟକଙ୍କ ଆଜି ଜନ୍ମଦିନ ସେପ୍ଟେମ୍ବର ୧୭ । ପ୍ରତିବର୍ଷ ଆକାଶ ଦାସନାୟକ ତାଙ୍କର ଜନ୍ମଦିନକୁ ନିଆରା ଢଙ୍ଗରେ ପାଳନ କରିଆସୁଛନ୍ତି । ସେ ପ୍ରତିବର୍ଷ ତାଙ୍କ ଜନ୍ମଦିନ ଅନାଥ ଆଶ୍ରମର କୁନି କୁନି ପିଲା, ସେବାଶ୍ରମ, ବୃଦ୍ଧାଶ୍ରମର ଅନ୍ତେବାସୀଙ୍କ ସହିତ ପାଳନ କରି ଆସୁଛନ୍ତି । ଏହି ବର୍ଷ ଭୁବନେଶ୍ୱର ସ୍ଥିତ ‘ଶ୍ରୀକୃଷ୍ଣା ବୃଦ୍ଧାଶ୍ରମ’ରେ ତାଙ୍କ ଜନ୍ମଦିନ ପାଳନ କରିଛନ୍ତି ।
ଆକାଶଙ୍କ ଜନ୍ମଦିନ ଉପଲକ୍ଷେ ‘ଉଡ୍ର ଚାରିଟେବୁଲ୍ ଟ୍ରଷ୍ଟ’ ଏହି ବୃଦ୍ଧାଶ୍ରମର ଅନ୍ତେବାସୀଙ୍କ ଚକ୍ଷୁ ଓ ସ୍ୱାସ୍ଥ୍ୟ ଚିକିତ୍ସା ଶିବିର ଆୟୋଜନ କରାଯାଇଥିଲା । ଚକ୍ଷୁ ଓ ସ୍ୱାସ୍ଥ୍ୟ ପରୀକ୍ଷା କରାଯାଇ ଆବଶ୍ୟକ ଉପକରଣ ଓ ଔଷଧ ଦିଆଯାଇଥିଲା । ‘ଶ୍ରୀ ହସ୍ପିଟାଲ’ର ଡାକ୍ତର, ‘ଭୂମିକା ଚକ୍ଷୁ ଚିକିତ୍ସାଳୟ’ର ଡାକ୍ତର, CYTOPOT ଡାକ୍ତର ଏହି ଚକ୍ଷୁ ଓ ସ୍ୱାସ୍ଥ୍ୟ ଚିକିତ୍ସା ଶିବିରକୁ ସହଯୋଗ କରିଥିଲେ । ଜନ୍ମଦିନରେ ବୃଦ୍ଧାଶ୍ରମର ଅନ୍ତେବାସୀଙ୍କ ମୁହଁରେ ଟିକେ ହସ ଫୁଟାଇବା ପାଇଁ ଆକାଶଙ୍କର ଏହା ଥିଲା ଏକ ନିଆରା ପ୍ରୟାସ ।
‘ଶ୍ରୀକୃଷ୍ଣା ବୃଦ୍ଧାଶ୍ରମ’ର ଅନ୍ତେବାସୀମାନେ ତାଙ୍କ ଜନ୍ମଦିନ ଉପଲକ୍ଷେ ଶୁଭେଚ୍ଛା ଓ ଶୁଭକାମନା ଜଣାଇଛନ୍ତି । ଆକାଶଙ୍କ ଦୀର୍ଘଜୀବନ ପାଇଁ ଠାକୁରଙ୍କ ପାଖରେ ଶୁଭ ମନାସୀ ଥିଲେ ଏବଂ କେକ୍ କାଟି ଜନ୍ମଦିନ ଶୁଭେଚ୍ଛା ଜଣାଇଥିଲେ । ଆକାଶ ବୃଦ୍ଧାଶ୍ରମର ଅନ୍ତେବାସୀଙ୍କ ସହ ଖୁସି ବାଣ୍ଟିଥିଲେ । ସେ କହିଥିଲେ ‘ଖୁସି ବାଣ୍ଟିଲେ ଖୁସି ବଢ଼େ’ । ଆକାଶଙ୍କର ସିନେ ପ୍ରଶଂସକ, ରାଜନୈତିକ ପ୍ରଶଂସକ, ବୁଦ୍ଧିଜୀବୀ ମହଲରୁ ଜନ୍ମଦିନର ଶୁଭେଚ୍ଛା ଓ ଶୁଭକାମନାର ସୁଅ ଛୁଟିବାରେ ଲାଗିଛି ।
ଅନେକ ବିଶିଷ୍ଟ ବ୍ୟକ୍ତି ଆକାଶଙ୍କୁ ତାଙ୍କର ଜନ୍ମଦିନ ଉପଲକ୍ଷେ ଶୁଭେଚ୍ଛା ଓ ଶୁଭକାମନା ଜଣାଇଛନ୍ତି । ଆକାଶ ମଧ୍ୟ ତାଙ୍କ ଜନ୍ମଦିନରେ ସମସ୍ତଙ୍କୁ ବାର୍ତ୍ତା ଦେଇ ଅନୁରୋଧ କରିଛନ୍ତି ଯେ, ସମସ୍ତେ ସେମାନଙ୍କର ଛୋଟ ପିଲାମାନଙ୍କୁ ଘରେ ରଖନ୍ତୁ, ମାସ୍କ ବ୍ୟବହାର କରନ୍ତୁ, ସମଦୂରତ୍ୱ ରକ୍ଷା କରନ୍ତୁ, ଜରୁରୀ କାମ ଥିଲେ ପିଲାମାନଙ୍କୁ ବାହାରକୁ ଯିବା ପାଇଁ ଅନୁମତି ଦିଅନ୍ତୁ, କୋଭିଡ୍ ମହାମାରୀରୁ ରକ୍ଷା ପାଆନ୍ତୁ ।
ଏହି ଜନ୍ମଦିନ ପାଳନ ଉତ୍ସବରେ ‘ଶ୍ରୀ ହସ୍ପିଟାଲ’ର ଡାକ୍ତର, ଭୂମିକା ହସ୍ପିଟାଲର ଡାକ୍ତ. CYTOPOT ଡାକ୍ତର ଓ ‘ଉଡ୍ର ଚାରିଟେବୁଲ୍ର ଟ୍ରଷ୍ଟ’ର ସୁଭଶ୍ରୀ ମଙ୍ଗରାଜ, ବୈଷ୍ଣବ ଚରଣ ଭୋଳ, ଭବାନୀ ଶଙ୍କର ଜେନା, ଦେବୀ ପ୍ରସାଦ ମଙ୍ଗରାଜ, ରୋଜାଲିନ୍ ଖଣ୍ଡୁଆଳ, କିଶୋର ଦାସ, ସୌମ୍ୟ ରଞ୍ଜନ ରାଉତ, ପ୍ରମୋଦ ବଳ, ଭାଗ୍ୟଧର ସାମଲ, ପ୍ରୟାଗ ସାମଲ, ଶୁଶ୍ରୀ ଏମ୍ ପ୍ରମୂଖ ଉପସ୍ଥିତ ରହି ଏଥିରେ ସହଯୋଗ କରିଥିଲେ ।
ଭୁବନେଶ୍ୱର: କୋଭିଡ୍ ଟିକାକରଣରେ ଆଉ ଏକ ମାଇଲଖୁଣ୍ଟ ଅତିକ୍ରମ କଲା ଓଡ଼ିଶା । ଜାନୁଆରୀ ୧୬ରୁ ଦେଶବ୍ୟାପୀ ଟିକାକରଣ ଜାରି ରହିଛି । ରାଜ୍ୟରେ ଟିକାକରଣ ଜାରି ରହିଛି । ଏବେ ସୁଦ୍ଧା ୨ କୋଟିରୁ ଅଧିକ ପ୍ରଥମ କୋଭିଡ୍ ଟିକା ନେଇଥିବା ସ୍ୱାସ୍ଥ୍ୟ ବିଭାଗ ଟ୍ୱିଟ୍ କରି ସୂଚନା ଦେଇଛି । କୋଭିଡ୍ ବିରୋଧୀ ଯୁଦ୍ଧରେ ଲୋକଙ୍କ ସହଯୋଗ ସହ ସ୍ୱାସ୍ଥ୍ୟକର୍ମୀଙ୍କ ନିଷ୍ଠାପର ଉଦ୍ୟମକୁ ପ୍ରଶଂସା କରିଛି ସ୍ୱାସ୍ଥ୍ୟ ବିଭାଗ ।
Crossing another milestone in the fight against #COVID19, #Odisha has covered more than 2 Cr persons with 1st dose of #COVID19Vaccine.
Commend the hardwork & commitment of our health team & people of Odisha for their support in the fight against COVID19. @CMO_Odisha #OdishaCares
— H & FW Dept Odisha (@HFWOdisha) September 17, 2021
ରାଜ୍ୟରେ ୧୬୦୬ଟି ଟିକାକରଣ କେନ୍ଦ୍ର ରହିଛି । ଆଜି ସୁଦ୍ଧା ୨ କୋଟି ୬୭ ହଜାର ୧୮୮ ଜଣ ଲୋକ ପ୍ରଥମ ଡୋଜ୍ ଟିକା ନେଇଛନ୍ତି । ସେହିଭଳି ୬୯ ଲକ୍ଷ ୨୦ ହଜାର ୫୩୬ ଜଣ ଦ୍ୱିତୀୟ ଡୋଜ୍ ଟିକା ନେଇଥିବା ଜଣାପଡ଼ିଛି । ବୟସାନୁପାତରେ ୧୮ରୁ ୪୪ ବର୍ଷ ବୟସ୍କଙ୍କୁ ସର୍ବାଧିକ ୧ କୋଟି ୩୨ ଲକ୍ଷ ୮୧ ହଜାର ୮୭୮ ଡୋଜ୍ ଟିକା ଦିଆଯାଇଛି । ୪୫ରୁ ୬୦ ବର୍ଷ ବୟସ୍କ ମଧ୍ୟରେ ୮୧ ଲକ୍ଷ ୬୦ ହଜାର ୩୩୭ ଡୋଜ୍ ଟିକା ଦିଆଯାଇଥିବା ବେଳେ ୬୦ ବର୍ଷ ବୟସ୍କରୁ ଅଧିକ ୫୫ ଲକ୍ଷ ୪୫ ହଜାର ୫୦୯ ଡୋଜ୍ ଦିଆଯାଇଛି ।
ମୋଟ ୨ କୋଟି ୩୪ ଲକ୍ଷ ୪୬ ହଜାର ୭୬୪ କୋଭିସିଲ୍ଡ ଡୋଜ୍ ଦିଆଯାଇଥିବା ବେଳେ ୩୫ ଲକ୍ଷ ୩୫ ହଜାର ୨୭୪ ଡୋଜ୍ କୋଭିସିଲ୍ଡ ଡୋଜ୍ ଦିଆଯାଇଛି । ଲିଙ୍ଗ ଅନୁପାତରେ ମହିଳାଙ୍କ ଠାରୁ ଅଧିକ ପୁରୁଷ ଟିକା ନେଇଛନ୍ତି । ଗଞ୍ଜାମ ଜିଲ୍ଲାରେ ସର୍ବାଧିକ ୧୯ ଲକ୍ଷ ୪୩ ହଜାର ୨୩୮ ଜଣ ପ୍ରଥମ ଡୋଜ୍ ନେଇଥିବା ବେଳେ ଦ୍ୱିତୀୟ ଡୋଜ୍ କ୍ଷେତ୍ରରେ ଆଗରେ ରହିଛି ଖୋର୍ଦ୍ଧା ଜିଲ୍ଲା । ଖୋର୍ଦ୍ଧାରେ ସର୍ବାଧିକ ୧୨ ଲକ୍ଷ ୬ ହଜାର ୩୮୪ ଜଣ ଦ୍ୱିତୀୟ ଡୋଜ୍ ଟିକା ନେଇଛନ୍ତି ।
ବାଲିଗୁଡ଼ା: ପୁଅକୁ ମାରି ଜଙ୍ଗଲରେ ପୋତି ଦେଇଥିଲା ବାପା । ଘଟଣା ସ୍ଥଳରୁ ମାଟି ଖୋଳି ମୃତଦେହ ଉଦ୍ଧାର କଲା ପୋଲିସ । କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ପାଙ୍ଗୁରୁମିଲା ଗାଁରେ ଦେଖିବାକୁ ମିଳିଛି ଏହି ଅଭାବନୀୟ ଘଟଣା । ଘଟଣା ସମ୍ପର୍କରେ ପରମପଙ୍ଗା ସରପଞ୍ଚ ରମେଶ ମଲ୍ଲିକ ବାଲିଗୁଡ଼ା ଥାନାରେ ଅଭିଯୋଗ କରିବା ପରେ ଆଜି ପୋଲିସ୍ ଘଟଣାସ୍ଥଳରେ ପହଞ୍ଚି ମାଟିତଳୁ ମୃତଦେହ ଉଦ୍ଧାର କରିଛି । ପୋଲିସ ତଦନ୍ତ କରି ହତ୍ୟାକାରୀ ବାପା ଭୁସ୍କର ପୂଜାରୀକୁ ଗିରଫ କରିଛି ।
ପାଙ୍ଗୁରୁମିଲା ଗାଁର ଭୁସ୍କର ପୂଜାରୀ ଓ ପୁଅ ଚୈତନ୍ୟ ପୂଜାରୀ ମଧ୍ୟରେ କୌଣଶି କାରଣରୁ ଅଧିକାଂଶ ସମୟରେ ଝଗଡ଼ା ଲାଗି ରହୁଥିଲା । ପ୍ରତିଶୋଧ ପରାୟଣ ହୋଇ ବାପା ଭୁସ୍କର ପୂଜାରୀ ଗତ ୧୪ ତାରିଖ ବିଳମ୍ବିତ ରାତିରେ ପୁଅ ଚୈତନ୍ୟକୁ ହତ୍ୟା କରି ଗାଁ ନିକଟ ମୁସୁକୁଟି ଜଙ୍ଗଲରେ ମାଟିତଳେ ପୋତି ଦେଇଥିଲା । ଏନେଇ ଅଭିଯୋଗ ପରେ ଆଜି ପୋଲିସ ଘଟଣାସ୍ଥଳରେ ପହଞ୍ଚି ମାଟିତଳୁ ଶବ ଉଦ୍ଧାର କରି ବାଲିଗୁଡ଼ା ଉପଖଣ୍ଡ ଚିକିତ୍ସାଳୟକୁ ବ୍ୟବଛେଦ ପାଇଁ ପଠାଇଛି ।
ଇସଲାମବାଦ: ପୁଣି ଥରେ ନିନ୍ଦିତ ହୋଇଛି ପାକିସ୍ତାନ କ୍ରିକେଟ । ଖେଳ ପୂର୍ବରୁ ହାରିଛି ପାକିସ୍ତାନ, ଲାଗିଛି ଶକ୍ତ ଝଟକା । ଟିମ ପାକିସ୍ତାନରେ ପହଁଚିବାକୁ ସମୟ ଧାର୍ଯ୍ୟ ହୋଇ ସାରିଥିଲା । ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଁଚିସାରିଥିଲା । ଖେଳ ହେବା ପାଇଁ ପଡିଆ ପ୍ରସ୍ତୁତ ହୋଇସାରିଥିଲା । କିନ୍ତୁ ପଡିଆକୁ ଓହ୍ଲାଇବା ପାଇଁ ମନା କରିଦେଇଛି ନ୍ୟୁଜିଲାଣ୍ଡ । ନ୍ୟୁଜିଲାଣ୍ଡ ଦଳ ପାକିସ୍ତାନ ବିପକ୍ଷ ଦିନିକିଆ ସିରିଜ ପ୍ରଥମ ମ୍ୟାଚରେ ଟସ୍ ପଡିବା ପୂର୍ବରୁ ପଡିଆକୁ ଓହ୍ଲାଇବାକୁ ମନା କରି ଦେଇଛି । ଯାହା ପଳରେ ପାକିସ୍ତାନକୁ ପୁଣି ଥରେ ନିନ୍ଦିତ ହେବାକୁ ପଡିଛି ।
ସୁରକ୍ଷା କାରଣରୁ ପଡିଆକୁ ଓହ୍ଲାଇବାକୁ ନ୍ୟୁଜିଲାଣ୍ଡ ମନା କରିଦେଇଥିବାବେଳେ ଏହାର କିଛି ସମୟ ପରେ ଗସ୍ତା ବାତିଲ କରିଛି ଟିମ । ନ୍ୟୁଜିଲାଣ୍ଡ ଦଳ ଏହି ବାବଦରେ ପାକିସ୍ତାନ କ୍ରିକେଟ୍ ବୋର୍ଡକୁ ଅବଗତ କରାଇଛି । ଦଳ ବୋର୍ଡକୁ କହିଛି ଯେ, ପାକିସ୍ତାନରେ ସେମାନଙ୍କ ପ୍ରତି ବିପଦ ରହିଛି । ସୁରକ୍ଷା ବ୍ୟବସ୍ଥାକୁ ନେଇ କ୍ରିକେଟ ଟିମ ସନ୍ତୋଷ ଲାଭ ନାହିଁ । ଏହି ଘଟଣା ପରେ ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନ ଓ ପିସିବିର ଅଧିକାରୀ ନ୍ୟୁଜିଲାଣ୍ଡ କ୍ରିକେଟ୍ ବୋର୍ଡ ଏବଂ ଖେଳାଳିଙ୍କ ସହ ଆଲୋଚନା ଆରମ୍ଭ କରିଥିବା ଜଣା ପଡିଛି ।
ନୂଆଦିଲ୍ଲୀ: ନୂତନ କୃଷି ଆଇନକୁ ପ୍ରତ୍ୟାହାର ଦାବି ବର୍ଷାଧିକ ହେଲା ଜାରି ରହିଛି । କୃଷି ଆଇନକୁ ବିରୋଧ କରି ଏଥିପାଇଁ ବିଜେପିର ହାତ ଛାଡିଥିଲା ଅକାଳୀ ଦଳ । ଏନଡିଏରୁ ଓହରିବା ପରେ ବିଜେପି ବିରୋଧରେ ଦଳ ଋଣ ହୁଙ୍କାର ଦେଇଛି । ସେପଟେ ଆଜି ଚାଷୀ ଆନ୍ଦୋଳନରେ ସାମିଲ ହୋଇ ଅକାଳି ଦଳ କରିଛି ହଲ୍ଲାବୋଲ । ଦିଲ୍ଲୀ ସୀମାରେ ଚାଷୀ ଆନ୍ଦୋଳନରେ ବସିଥିବା ବେଳେ ଚାଷୀଙ୍କ ସହ ସାମିଲ ହୋଇଛନ୍ତି ଅକାଳି ଦଳ ସଦସ୍ୟ ।
ନୂଆ କୃଷି ଆଇନକୁ ବିରୋଧ କରି ଚାଷୀ ଜାରି ରଖିଥିବା ଆନ୍ଦୋଳନକୁ ବର୍ଷେ ପୁରୁଥିବାରୁ ଆଜି ଅକାଳି ଦଳ ପକ୍ଷରୁ କଳା ଦିବସ ପାଳନ କରାଯାଉଛି । ସୀମାରେ ପ୍ରବଳ ଜାମ ଯୋଗୁ ହରିୟାଣାରୁ ଦିଲ୍ଲୀ ଆସୁଥିବା ସବୁ ରାସ୍ତା ବନ୍ଦ କରିଦିଆଯାଇଛି । ରାସ୍ତା ବନ୍ଦ ଯୋଗୁଁ ଯାନବାହନ ଚଳାଚଳ ବାଧାପ୍ରାପ୍ତ ହେଉଥିବା ବେଳେ ସାଧାରଣ ଲୋକ ସମସ୍ୟା ଭୋଗୁଛନ୍ତି । ଦଳ ପକ୍ଷରୁ ସୁଖବୀର ବାଦଲ ଏବଂ ହର୍ଷମିତ କୌର ଚାଷୀଙ୍କ ଆନ୍ଦୋଳନରେ ସାମିଲ ହୋଇଥିଲେ ।
ଭିଡ଼ ନିୟନ୍ତ୍ରଣ ପାଇଁ ଦିଲ୍ଲୀ ପୋଲିସ ବାହାଦୂରଗଡ଼ ଠାରେ ବ୍ୟାରିକେଡିଂ କରାଯିବା ସହ ନିଜାମପୁର ବର୍ଡର, ସିଦ୍ଧିପୁର ଗ୍ରାମ ସମେତ ଅନ୍ୟ ସବୁ ସୀମା ବନ୍ଦ କରିଦିଆଯାଇଛି । ହରିୟାଣାରୁ ଅକାଳି ଦଳ ପକ୍ଷରୁ ବିକ୍ଷୋଭ ପ୍ରଦର୍ଶନ ଆରମ୍ଭ ହୋଇଥିବା ବେଳେ ପଞ୍ଜାବ ଦେଇ ଏହା ଦିଲ୍ଲୀ ସୀମାରେ ପହଞ୍ଚିଛି ।
ଭୁବନେଶ୍ୱର: ଆସନ୍ତାକାଲି ସକାଳେ ମୁଣ୍ଡଳୀ ଦେଇ ସର୍ବାଧିକ ବନ୍ୟାଜଳ ପ୍ରବାହିତ ହେବ । ଏବେ ହୀରାକୁଦକୁ ଉପରମୁଣ୍ଡରୁ ଇନ-ଫ୍ଲୋ କମିଛି । ଗତକାଲି ସୁଦ୍ଧା ହୀରାକୁଦକୁ ୫ଲକ୍ଷ ୫୦ହଜାର କ୍ୟୁସେକ୍ ଜଳ ପ୍ରବେଶ କରୁଥିଲା । ଏବେ ତାହା ହ୍ରାସ ପାଇଂ ୪ଲକ୍ଷ ୭୦ହଜାର କ୍ୟୁସେକରେ ପହ଼୍ଚିଛି । ମୁଣ୍ଡଳି ଦେଇ ୭ଲକ୍ଷ ୫୦ହଜାରରୁ ୮ଲକ୍ଷ କ୍ୟୁସେକ ମଧ୍ୟରେ ଜଳ ପ୍ରବାହିତ ହେବ ।
ଏହାଦ୍ୱାରା ମହାନଦୀ ଅବବାହିକାରେ ବିଶେଷ ସମସ୍ୟା ସୃଷ୍ଟି ହେବନି । ମହାନଦୀରେ ନାହିଁ ବନ୍ୟା ଆଶଙ୍କା । ବୈତରଣୀ, ବୁଡାବଳଙ୍ଗ ଓ ଜଳକାର ଜଳସ୍ତର କମିବା ଆରମ୍ଭ ହୋଇଛି । ତେବେ ରାଜଘାଟଠାରେ ସୁବର୍ଣ୍ଣରେଖାର ଜଳସ୍ତର ବଢୁଛି । ଘଣ୍ଟାକୁ ୪ସେଣ୍ଟିମିଟର ହାରରେ ସୁବର୍ଣ୍ଣରେଖାର ଜଳସ୍ତର ବଢୁଛି । ଆଜି ରାତି ୧୦ରୁ ୧୨ଟା ମଧ୍ୟରେ ସର୍ବାଧିକ ଜଳସ୍ତର ବୃଦ୍ଧି ପାଇବ । ଏହାଦ୍ୱାରା ବାଲେଶ୍ୱର ଭୋଗରାଇ, ବାଲିଆପାଳ ଆଦି ତଳି ଅଞ୍ଚଳରେ ସାମାନ୍ୟ ବନ୍ୟା ପରିସ୍ଥିତି ସୃଷ୍ଟି ହେବ । ଏନେଇ ଜିଲ୍ଲା ପ୍ରଶାସନକୁ ଆଲର୍ଟ କରାଯାଇଛି । ବ୍ରାହ୍ମଣୀର ଜଳସ୍ତର ମଧ୍ୟ କମିବା ଆରମ୍ଭ ହୋଇଛି ।
ନୂଆଦିଲ୍ଲୀ: ଭାରତୀୟ ବାୟୁସେନା କିଣିବ ମିରେଜ । ୨୪ଟି ପୁରୁଣା ମିରେଜ ଯୁଦ୍ଧ ବିମାନକୁ ଭାରତୀୟ ବାୟୁସେନା କିଣିବାକୁ ଯାଉଛି । ପ୍ରାୟ ୨୭ ନିୟୁତ ୟୁରୋ ମୂଲ୍ୟର ଏହି ବିମାନ କିଣିବା ଲାଗି ପଦକ୍ଷେପ ନିଆଯାଇଛି । ମିଳିଥିବା ସୂଚନା ମୁତାବକ ଗୋଟିଏ ବିମାନର ମୂଲ୍ୟ ହେଉଛି ୧.୧୨୫ ନିୟୁତ ୟୁରୋ । ଫ୍ରାନସର ଡାସଲ୍ଟ ଆଭିଏସନ ପକ୍ଷରୁ ନିର୍ମିତ ମିରେଜ-୨୦୦୦ ବିମାନ ଭାରତୀୟ ପ୍ରତିରକ୍ଷାକୁ ଅଧିକ ସଶକ୍ତ କରିବ ବୋଲି କୁହାଯାଇଛି । ଏହି ୨୪ଟି ବିମାନରୁ ୮ଟି ବିମାନ ରେଡି-ଟୁ-ଫ୍ଲାଏ ଅବସ୍ଥାରେ ରହିଛି ।
ଫ୍ରାନସରୁ ଏହି ବିମାନଗୁଡିକୁ ଜାହଜରେ ଅଣାଯିବା ଲାଗି ବ୍ୟବସ୍ଥା କରାଯାଉଛି । ଅନ୍ୟ ବିମାନଗୁଡିକରେ ଇଞ୍ଜିନ ଲାଗିବା ସହ ପୂର୍ଣ୍ଣାଙ୍ଗ ଅବସ୍ଥାରେ ରହିଛି । ଭାରତୀୟ ବାୟୁସେନାର ୩୫ ବର୍ଷ ପୁରାତନ ମିରେଜ ଫ୍ଲିଟକୁ ବର୍ତ୍ତମାନ ମିଡ ଲାଇଫ ଅପଗ୍ରେଡ କରାଯାଉଛି । ୨୦୧୯ ବାଲକୋଟ ଅପରେସନ ବେଳେ ଏହି ମିରେଜ ଉଲ୍ଲେଖନୀୟ ଭୂମିକା ଗ୍ରହଣ କରିଥିଲା । ଭାରତରେ ଥିବା ମିରେଜଗୁଡିକର କିଛି ଯନ୍ତ୍ରାଂଶ ଆବଶ୍ୟକ ଥିବାବେଳେ ଏହି ଫ୍ଲିଟକୁ ପରିବର୍ଦ୍ଧିତ କରିବା ଉପରେ ଗୁରୁତ୍ବାରୋପ କରିଥିଲେ ବାୟୁସେନା ମୁଖ୍ୟ ଏୟାରଚିଫ ମାର୍ଶାଲ ଆର.କେ.ଏସ ଭଦୁଆରିଆ ।
୧୯୮୫ରେ ଭାରତୀୟ ବାୟୁସେନା ଭାରତ ଫ୍ରାନସଠାରୁ ୫୦ଟି ଫୋର୍ଥ ଜେନେରେସନ ମିରେଜ ୨୦୦୦ ସି ଓ ବି ଲଢୁଆ ବିମାନ କ୍ରୟ କରିଥିଲା । ଏହି ବିମାନର କ୍ରୟ ସହ ରକ୍ଷଣାବେକ୍ଷଣ ନେଇ ମଧ୍ୟ ଚୁକ୍ତ ହୋଇଥିଲା । ମିରେଜ ବିମାନ କିଣିବା ଯୋଗୁ ବାୟୁସେନା ଅଧିକ ଶକ୍ତିଶାଳୀ ହେବ ଏବଂ ଭାରତୀୟ ବାୟୁସେନା ଓ ଭାରତୀୟ ନୌସେନା ମଧ୍ୟରେ ସୁସଂହତ ପ୍ରତିଷ୍ଠା ହୋଇପାରିବ ।
କଟକ: ହାଇକୋର୍ଟରେ ଦୁର୍ଗା ପୂଜା ମୂର୍ତ୍ତି ଉଚ୍ଚତା ପ୍ରସଂଗ । ବାଲୁ ବଜାର ପୂଜା କମିଟି ଆବେଦନ ଖାରଜ । ବାଲୁ ବଜାର ପୂଜା କମିଟି ପକ୍ଷରୁ ଆଗତ ଆବେଦନକୁ ହାଇକୋର୍ଟ ଖାରଜ କଲେ । ମୂର୍ତ୍ତିର ଉଚ୍ଚତା ସହ ପୂଜାର ସମ୍ପର୍କ ନାହିଁ । ଗତକାଲି ମାମଲାର ଶୁଣାଣି କରି ରାୟକୁ ସଂରକ୍ଷଣ କରିଥିଲେ ହାଇକୋର୍ଟ ।
କରୋନା କାଳରେ ସରକାର ଭାବିଚିନ୍ତି ନିଷ୍ପତ୍ତି ନେଇଛନ୍ତି । କେବଳ ଗୋଟିଏ ପୂଜା ମଣ୍ଡପକୁ ଅନୁମତି ଦେଇ ହେବନାହିଁ ବୋଲି ହାଇକୋର୍ଟ ନିଷ୍ପତ୍ତିରେ ଦର୍ଶାଇଛନ୍ତି । ଗତବର୍ଷ ଏକ ମାସ ଆଗରୁ ମୂର୍ତ୍ତି ନିର୍ମାଣ ହୋଇସାରିଥିଲା । ତେଣୁ ୯ ପୂଜା ମଣ୍ଡପରେ ମୂର୍ତ୍ତି ବଡ଼ କରିବା ଲାଗି ଅନୁମତି ଦିଆଯାଇଥିଲା । ଚଳିତ ବର୍ଷ ସେଭଳି ଅବସ୍ଥା ନାହିଁ ବୋଲି ମାନ୍ୟବର ହାଇକୋର୍ଟଙ୍କ ପକ୍ଷରୁ କୁହାଯାଇଛି ।
ବାଲୁ ବଜାର ପୂଜା କମିଟି ପକ୍ଷରୁ ଏସଆରସିଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ କରି ମାମଲା ଦାୟର ହୋଇଥିଲା ଏବଂ ପୂର୍ବବତ୍ ମୂର୍ତ୍ତି ନିର୍ମାଣ ପାଇଁ ଅନୁମତି ଦେବାକୁ ପ୍ରାର୍ଥନା କରାଯାଇଥିଲା । ବାଲୁ ବଜାର ପୂଜା କମିଟି ତରଫରୁ ଦାୟର ହୋଇଥିବା ପିଟିସନରେ ଗତ ଅଗଷ୍ଟ ୯ ତାରିଖରେ ଏସଆରସି ଜାରି କରିଥିବା ବିଜ୍ଞପ୍ତିର କ୍ଲଜ୍ ୪କୁ ମୁଖ୍ୟତଃ ଚ୍ୟାଲେଞ୍ଜ କରାଯାଇଥିଲା ।
ଲକ୍ଷ୍ନୌ: ଉତ୍ତରପ୍ରଦେଶରେ ପ୍ରଳୟଙ୍କରୀ ବର୍ଷା । ଅଧିକାଂଶ ନଦୀରେ ବନ୍ୟା ସହ ବିଭିନ୍ନ ସ୍ଥାନ ଜଳମଗ୍ନ ହେବା ଯୋଗୁ ୪୨ଜଣଙ୍କ ମୃତ୍ୟୁ ଘଟିଛି । ସବୁଠାରୁ ଅଧିକ ବିପର୍ଯ୍ୟସ୍ତ ହୋଇଛି ବାରବାଙ୍କି ଜିଲ୍ଲା । ଭିଭିନ୍ନ ପ୍ରଭାବିତ ଅଞ୍ଚଳକୁ ଗସ୍ତ କରିବା ଲାଗି ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ବାରବାଙ୍କିରେ ଅବିଶ୍ରାନ୍ତ ବର୍ଷା ଯୋଗୁ ସ୍ଥିତି ଅତି ସଂଗୀନ ହୋଇଛି । କେବଳ ବାରବାଙ୍କିରେ ୧୨ଜଣଙ୍କ ମୃତ୍ୟୁ ଘଟିଛି । ହଜାର ହଜାର ଲୋକ ଜଳବନ୍ଦୀ ରହିଥିବାବେଳ ସେମାନଙ୍କ ନିକଟରେ ରିଲିଫ ପହଞ୍ଚି ପାରିନାହିଁ ।
ପ୍ରୟାଗରାଜ, ଫତେପୁର, ବାନ୍ଦା, ଜୋନପୁର, ରାୟରେଲି, ପ୍ରତାପଗଡ, ଆମେଥି, ସୁଲତାନପୁର, କୋଶାମ୍ବୀ ଆଦି ଅଞ୍ଚଳରେ ପ୍ରବଳ ବର୍ଷା ଯୋଗୁ ଜନଜୀବନ ବିପର୍ଯ୍ୟସ୍ତ ହୋଇଛି । ସେପଟେ ଲକ୍ଷ୍ନୌରେ ୨୪ଘଣ୍ଟାରେ ୧୩ ସେଣ୍ଟିମିଟର ବର୍ଷା ହୋଇଛି । କାନପୁର, ଫୁରସତଗଞ୍ଜ, ସୁଲତାନପୁରରେ ପ୍ରବଳ ବର୍ଷା ଯୋଗୁ ଲକ୍ଷାଧିକ ଲୋକ ଜଳବନ୍ଦୀ ରହିଛନ୍ତି । ବନ୍ୟା ଯୋଗୁ ରାଜ୍ୟର ଅଧିକାଂଶ ଜିଲ୍ଲାରେ ସ୍କୁଲ ବନ୍ଦ କରାଯାଇଛି । ଗତ ୧ ତାରିଖରୁ ସ୍କୁଲରେ ଶିକ୍ଷାଦାନ ଲାଗି ସରକାର ଘୋଷଣା କରିଥିଲେ । ମାତ୍ର ବନ୍ୟା ଯୋଗୁ ତାହାକୁ ବନ୍ଦ କରିଦିଆଯାଇଛି ।
