spot_img
Home Blog Page 5122

ଚୀନ ଏବଂ ଋଷ ମଧ୍ୟରେ ସ୍ୱାକ୍ଷରିତ ହେଲା ହେଭି ହେଲିକପ୍ଟର ନିର୍ମାଣ ରାଜିନାମା, ଭାରତ ବିରୋଧରେ ହେଲେ ଭାଇଭାଇ

ନୂଆଦିଲ୍ଲୀ: ଭାରତ ବିରୋଧରେ ଋଷ-ଚୀନ ଭାଇଭାଇ। ବହୁମୁଖୀ ହେଭି ହେଲିକପ୍ଟର ନିର୍ମାଣ ନିମନ୍ତେ ଦୁଇ ରାଷ୍ଟ୍ର ମଧ୍ୟର ସ୍ୱାକ୍ଷରିତ ହୋଇଛି ରାଜିନାମା। ଏନେଇ ସୂଚନା ଦେଇଛି ରାଷ୍ଟ୍ରାୟତ୍ତ ଋଷିଆନ ହେଲିକପ୍ଟର୍ସ। କମ୍ପାନୀର ମୁଖ୍ୟ କାର୍ଯ୍ୟନିର୍ବାହୀ ଆନ୍ଦ୍ରେ ବୋଗିନ୍ସକି କହିଛନ୍ତି ଚୀନ ଏହି ହେଲିକପ୍ଟର ତିଆରି ନିମନ୍ତେ ପଥ ପରିଷ୍କାର କରିଛି। ଏଥିଲାଗି ଋଷିଆନ ହେଲିକପ୍ଟର୍ସ ଟ୍ରାନ୍ସମିଶନ, ଷ୍ଟିୟରିଂ ସ୍କ୍ରିଉ ଓ ଆଣ୍ଟି ଆଇସିଂ ସିଷ୍ଟମ ଯୋଗାଇଦେବ। ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଏହି ପ୍ରକଳ୍ପ ନେଇ ସେ ସମସ୍ତ ସୂଚନା ପ୍ରଦାନ କରିଛନ୍ତି।

ଚୀନର ଆଭିକପ୍ଟର ଓ ଋଷିଆନ ହେଲିକପ୍ଟର୍ସ ମଧ୍ୟରେ ୨୦୧୬ରେ ସ୍ୱାକ୍ଷରିତ ଚୁକ୍ତି ଅନୁସାରେ ଏହି ଅତ୍ୟାଧୁନିକ ହେଲିକପ୍ଟର ନିର୍ମାଣ ନିମନ୍ତେ କ୍ଷେତ୍ର ପ୍ରସ୍ତୁ ହୋଇଛି। ଏହି ହେଲିକପ୍ଟର ନିର୍ମାଣ ହେଲେ ଚୀନ ନିଜ ବରଫାବୃତ୍ତ ସୀମାନ୍ତରେ ଏହାକୁ ମୁତୟନ କରିବ। ଏହା ସହ ସାମରିକ ଭାବେ ଚୀନ ଅଧିକ ଶକ୍ତିଶାଳୀ ହେବ। ଗତ ଜୁନ ୨୫ ତାରିଖରେ ଏହି ଯନ୍ତ୍ରାଂଶ ଯୋଗାଣ ନେଇ ଚୂଡାନ୍ତ କଥାବାର୍ତ୍ତା ସମ୍ପନ୍ନ ହୋଇଥିଲା। କୌଶଳଗତ ଦୃଷ୍ଟିରୁ ଚୀନ ନିଜକୁ ସାମରିକ ବଳରେ କରିବା ଲାଗି ଯୋଜନା ପ୍ରସ୍ତୁତ କରୁଥିବା ଖବର ପେଣ୍ଟାଗନ ପ୍ରକାଶ କରିବା ପରେ ଚର୍ଚ୍ଚା ହୋଇଥିଲା। ବିଶେଷ କରି ଏସୀୟ ପ୍ରଶାନ୍ତ ଅଞ୍ଚଳରେ ଚୀନ ଯେଉଁ ପ୍ରଭାବ ବିସ୍ତାର କରିବା ଲାଗି ଯୋଜନା କରୁଛି ତାହା କ୍ରମଶଃ ସଫଳ ହେବାରେ ଲାଗିଛି।

ଏହା ସହ ପ୍ରାୟ ୩୨୦ଜଣ ଯାତ୍ରୀ ଯାଇପାରୁଥିବା ନ୍ୟୁ ଜେନେରେସନ ଏୟାରବସ୍ ନିର୍ମାଣ କ୍ଷେତ୍ରରେ ଚୀନକୁ ଋଷ ସହଯୋଗ କରିଆସୁଛି। ସେପଟେ ଆମେରିକାର ନୌସେନା ବିମାନ ଓ ଡେଷ୍ଟ୍ରୟରକୁ ଧ୍ୱଂସ କରିବା ଲାଗି ଚୀନ ଯୋଜନା କରୁଥିବା ନେଇ ଉପଗ୍ରହ ଚିତ୍ରରୁ ସନ୍ଧାନ ମିଳିବା ପରେ ଆମେରିକା ଆଶଙ୍କା ପ୍ରକାଶ କରିଛି। ନିଜର ସମସ୍ତ ସାମରିକ ବ୍ୟବସ୍ଥାକୁ ଉନ୍ନୀତ କରିବା ଲାଗି ଚୀନ ଗତ କିଛି ଦିନ ଧରି ଉଦ୍ୟମ ଜାରି ରଖିଛି।

ବିଷାକ୍ତ ହେବାରେ ଲାଗିଛି ଯମୁନା ନଦୀର ଜଳ; ହରିଆଣାକୁ ଦାୟୀ କଲା ଦିଲ୍ଲୀ ସରକାର

ନୂଆଦିଲ୍ଲୀ: ଛଟ୍ ଯାତ୍ରା ଅବସରରେ ଯମୁନା ନଦୀରେ ବିଷାକ୍ତ ରାସାୟନିକ ପଦାର୍ଥ ଏବଂ ଫୋମର ଚିତ୍ର ଆସିବା ପରେ ଦିଲ୍ଲୀ ସରକାରଙ୍କୁ ଯମୁନା ସଫା କରିବାର ଦାବି ଉଠିଛି । ଯେତେବେଳେ ପ୍ରଶ୍ନ ଉଠିଥିଲା ଦିଲ୍ଲୀ ଜଳ ବୋର୍ଡ ଯମୁନା ପ୍ରଦୂଷଣ ମାମଲା ପାଇଁ ଉତ୍ତରପ୍ରଦେଶ ଓ ହରିଆଣା ସରକାରଙ୍କୁ ଦାୟୀ କରିଛି । ଏଥିସହ ଯମୁନାରେ ବିଷାକ୍ତ ରାସାୟନିକ ପଦାର୍ଥର ଚିତ୍ର ମାମଲାରେ ବିଜେପି ଦିଲ୍ଲୀ ସରକାର ଓ ଆମ୍ ଆଦମୀ ପାର୍ଟି ଉପରେ ପ୍ରଶ୍ନ ଉଠାଇଛି ।

ଦିଲ୍ଲୀ ଜଳ ବୋର୍ଡ ଉପାଧ୍ୟକ୍ଷ ରାଘବ ଚଡ୍ଡା କହିଛନ୍ତି କି ୟୁପି ଓ ହରିଆଣା ସରକାର ଯମୁନା ନଦୀରେ ମଇଳା ପାଣି ଛାଡୁଛନ୍ତି । ଏଥିସହ ଦିଲ୍ଲୀ ଜଳ ବୋର୍ଡ ଏହାର ଏସଟିପି କ୍ଷମତା ବୃଦ୍ଧି ଉପରେ ନିରନ୍ତର କାର୍ଯ୍ୟ କରୁଛନ୍ତି । ଯାହାଫଳରେ ଅପରିସ୍କାର ଜଳ ଯମୁନା ନଦୀରେ ଛଡାଯିବ ନାହିଁ । ରାଘବ ଚଡ୍ଡା କହିଛନ୍ତି କି ଓଖୋଲା ବ୍ୟାରେଜ ଉତ୍ତରପ୍ରଦେଶ ସରକାରଙ୍କ ଜଳସେଚନ ବିଭାଗ ମଧ୍ୟରେ କାର୍ଯ୍ୟ କରୁଛି । ତାଙ୍କର ଆରାମଦାୟକ ମନୋଭାବ ହେତୁ ଏହି ପରି ପ୍ରଦୂଷଣ ହେଉଛି ।

ଦିଲ୍ଲୀ ଜଳ ବୋର୍ଡ ଅନୁଯାୟୀ ଯେତେବେଳେ ଫସଫେଟ୍ ପରି ସର୍ଫାକ୍ଟାଣ୍ଟ ଥିବା ଜଳ କାଲିଣ୍ଡି କୁଞ୍ଜର ଉଚ୍ଚତାର ପଡ଼ିଥାଏ । ଯାହା ଫଳରେ ଫୋମ ସୃଷ୍ଟି ହୋଇଥାଏ । ଯାହାଫଳରେ ବହୁ ପରିମାଣରେ ମୁକ୍ତ ହୋଇଥିବା ଫୋମ୍ ଯମୁନା ନଦୀରେ ଭାସୁଛି । ଏହି ଫୋମ୍ ନଦୀରୁ ବାହାର କରିବା ଅତ୍ୟନ୍ତ କଷ୍ଟକର । ଦିଲ୍ଲୀ ଜଳ ବୋର୍ଡ କହିଛନ୍ତି ଯେ ଉତ୍ତରପ୍ରଦେଶର ମେରଟ, ମୁଜାଫରନଗର, ଶାମଲି ଏବଂ ସାହାରନପୁର କାର୍ଯ୍ୟ କରୁଥିବା କାଗଜ ଏବଂ ଚିନି ଶିଳ୍ପଗୁଡିକ ମଧ୍ୟ ଓଖୋଲା ବ୍ୟାରେଜରେ ହିନ୍ଦନ କେନାଲ ଦେଇ କାଲିଣ୍ଡି କୁଞ୍ଜ ନିକଟ ଯମୁନା ନଦୀରେ ଛାଡୁଛନ୍ତି । ଏହି କାରଣରୁ ଫୋମ୍ ସୃଷ୍ଟି ହେଉଛି ଏବଂ ଯମୁନାରେ ଜମା ହେଉଛି । ଏହା ପୂର୍ବରୁ ଦିଲ୍ଲୀ ସରକାରଙ୍କ ତରଫରୁ ଯମୁନାରେ ଆମୋନିଆର ବୃଦ୍ଧି ପାଇଁ ଅନେକ ଥର ଦିଲ୍ଲୀ ଜଳ ବୋର୍ଡ ହରିଆଣା ସରକାରଙ୍କୁ ଦାୟୀ କରିଥିଲେ । ଅନ୍ୟପକ୍ଷରେ ଯମୁନା ନଦୀର ସ୍ବଚ୍ଛତା ସମ୍ପର୍କରେ ଦିଲ୍ଲୀ ସରକାର ପୂର୍ବରୁ ଅନେକ ଦାବି କରିସାରିଛନ୍ତି । ଦିଲ୍ଲୀ ଜଳ ବୋର୍ଡ ଏହାର ଅତ୍ୟାଧୁନିକ ଜଳ ନିଷ୍କାସନ କାରଖାନା ମାଧ୍ୟମରେ ଜଳ ବିଶୋଧନ କରିବା ପାଇଁ ଚେଷ୍ଟା କରୁଛନ୍ତି । ଯମୁନା ନଦୀରେ ବିଶୋଧିତ ଜଳ ଛାଡିବା ପାଇଁ ନିରନ୍ତର କାର୍ଯ୍ୟ କରୁଛି ।

ବ୍ରାଉନ୍‌ସୁଗର ଡିଲ୍‌ ବେଳେ ରେଡ୍‌ ମାରିଲା STF, ଜବତ ହେଲା କୋଟିଏରୁ ଅଧିକ ଟଙ୍କାର ବ୍ରାଉନସୁଗର

ବାଲେଶ୍ୱର: ରାଜ୍ୟରେ ବଢ଼ି ଚାଲିଛି ନିଶା କାରବାର। ଦିନକୁ ଦିନ ନିଶା ବେପାରୀଙ୍କର ପ୍ରାଦୁର୍ଭାବ ବଢ଼ିବାକୁ ଲାଗିଛି। ପୋଲିସ ଯେତେ ଚେଷ୍ଟା କଲେ ମଧ୍ୟ ନିଶା କାରବାରକୁ ରୋକିବାକୁ ଅସଫଳ ହେଉଛି। ପୋଲିସ୍‌କୁ ଟାର୍ଗେଟ ଦେଇ ନିଶା ବେପାର କରୁଛନ୍ତି ନିଶା ବେପାରୀ। ବାରମ୍ବାର ଗିରଫ ହେଉଛନ୍ତି ହେଲେ ଜାମିନ୍‌ରେ ବାହାରି କରୁଛନ୍ତି ବେପାର। ଆଉ ଏହି ନିଶା ବେପାରର ଆଡ୍ଡା ପାଲଟିଛି ବାଲେଶ୍ୱର। ଆଜି ପୁଣି ବାଲେଶ୍ଵରରେ କ୍ରାଇମବ୍ରାଞ୍ଚ stf ଚଢ଼ାଉ କରିଛି ବିପୁଳ ପରିମାଣରେ ବ୍ରାଉନସୁଗର ଜବତ କରିଛି।

ସହଦେଵ ଖୁଣ୍ଟା ନୟାବଜାର ହାଟରୁ କେଜିଏ ୫୨ ଗ୍ରାମ ବ୍ରାଉନସୁଗର ଜବତ କରାଯାଇଛି। ବ୍ରାଉନସୁଗର ଜବତ ହେବା ସହ ଦୁଇ ଡ୍ରଗ୍ସ ମାଫିଆ ଗିରଫ ହୋଇଛନ୍ତି।
ତେବେ ବହୁଦିନ ହେବ ପରିବା ମାର୍କେଟରେ ଚାଲିଥିଲା ଧଳାଜହର ଡିଲ। ଜବତ ବ୍ରାଉନସୁଗରର ଆନୁମାନିକ ମୂଲ୍ୟ ହେବ ଏକ କୋଟି ଟଙ୍କାରୁ ଉର୍ଦ୍ଧ। ତେବେ ଏହି ବ୍ରାଉନସୁଗରକୁ ଲାଲଗୁଲାରୁ ଆଣି ବିକୁଥିଲେ ବେପାରୀ।

ବିଜୟ ସହ ଟି-୨୦ରୁ ଅଧିନାୟକ ପଦ ଛାଡିଲେ ବିରାଟ; ଭାବବିହ୍ବଳ ହେଲେ ପ୍ରଶଂସକ

ଦୁବାଇ: ଚଳିତ ଟି-୨୦ ବିଶ୍ବକପରେ ଗତକାଲି ଶେଷ ହୋଇଛି ଭାରତର ଅଭିଯାନ । ଗତକାଲି ଭାରତ ନାମିବ୍ୟା ସହ ଖେଳିଥିଲା ଏହି ମ୍ୟାଚ । ଏଥିସହ ବିରାଟ କୋହଲି ମଧ୍ୟ ଗତକାଲି କ୍ୟାପେଟନ ହିସାବରେ ଶେଷ ମ୍ୟାଚ ଖେଳିଥିଲେ । ତେବେ କ୍ୟାପଟେନ ହିସାବରେ ଶେଷ ମ୍ୟାଚରେ ବିଜୟ ଲାଭ କରିଥିଲେ କୋହଲି । ଯଦିଓ ଭାରତ ଚଳିତ ବିଶ୍ବକପର ସେମିଫାଇନାଲ ରେସରୁ ବାହାରି ଯାଇଛି କିନ୍ତୁ ବିରାଟଙ୍କ ଶେଷ ମ୍ୟାଚ ତାଙ୍କ ପ୍ରଶଂସକ ଭାବବିହ୍ବଳ ହୋଇଯାଇଥିଲେ ।

ନାମିବ୍ୟାବିପକ୍ଷରେ ଦମଦାର ବିଜୟ ପରେ ବିରାଟ କହିଛନ୍ତି କି ଟାଇମ୍ ମ୍ୟାନେଜମେଣ୍ଟ ପାଇଁ ଉପଯୁକ୍ତ ସମୟ ଆସିଛି । ଗତ ୬-୭ ବର୍ଷ ମଧ୍ୟରେ ଆମେ ଭଲ କାମ କରିଛୁ । ଯଦିଓ ଆମେ ଏହି ବିଶ୍ବକପ ଜିତି ପାରିନାହୁଁ, କିନ୍ତୁ ଦଳ ବହୁତ ଭଲ କାମ କରିଛନ୍ତି ଓ ପରସ୍ପରକୁ ସମର୍ଥନ କରିଛନ୍ତି । ଯେପରି ଭାବରେ ଆମେ ଶେଷ ତିନି ମ୍ୟାଚ ଖେଳିଥିଲୁ ତାହା ବହୁତ ଶାନଦାର ଥିଲା । ବିରାଟ କୋହଲି କହିଛନ୍ତି କି ପ୍ରଥମ ଦୁଇଟି ମ୍ୟାଚରେ ଆମେ ଭଲ ପ୍ରଦର୍ଶନ କରିପାରିନଥିଲୁ । ଯେଉଁଥି ପାଇଁ ଆମ ପାଇଁ ସେମିଫାଇନାଲ ରେସ୍ ଯିବା ପାଇଁ କଷ୍ଟସାଧ୍ୟ ହୋଇଥିଲା । ରବି ଶାସ୍ତ୍ରୀଙ୍କ ସହ ଅନ୍ୟ କୋଚିଂ ଷ୍ଟାଫ୍ ଦମଦାର କାମ କରିଛନ୍ତି । ସେ ଆମର ପରିବାରର ଏକ ବଡ଼ ଅଂଶ । ଯେଉଁମାନେ ସର୍ବଦା ଏକାଠି ରହୁଛନ୍ତି ବୋଲି କହିଛନ୍ତି ବିରାଟ କୋହଲି ।

ଚଳିତ ଟି-୨୦ ବିଶ୍ବକପରେ ଭାରତ ତା’ର ପ୍ରଥମ ଦୁଇଟି ମ୍ୟାଚରେ ପରାଜୟ ଲାଭ କରିଥିଲା । ଯାହାଫଳରେ ଭାରତ ଚଳିତ ବିଶ୍ବକପରେ ସେମିଫାଇନାଲ ରେସରେ ଏକ ପ୍ରକାର ବାହାର ହୋଇଯାଇଥିଲା । ଏଥିସହ ବିଶ୍ବକପରେ ପାକିସ୍ତାନଠାରୁ ପରାଜୟ ବରଣ କରିବାରେ ବିରାଟ କୋହଲି ହେଉଛନ୍ତି ପ୍ରଥମ ଅଧିନାୟକ । ବିରାଟ କୋହଲି କେବଳ ବର୍ତ୍ତମାନ କ୍ରିକେଟରେ ଜଣେ ବରିଷ୍ଠ ବ୍ୟାଟ୍ସମ୍ୟାନ ନୁହଁନ୍ତି କ୍ରିକେଟ ଇତିହାସରେ ଜଣେ ବରିଷ୍ଠ ବ୍ୟାଟ୍ସମ୍ୟାନ ଅଟନ୍ତି । ଗତ ୬-୭ ବର୍ଷ ଧରି ବିରାଟ କୋହଲି ସବୁ ଫର୍ମାଟରେ ଭାରତର ଅଧିନାୟକତ୍ବ କରିଆସୁଛନ୍ତି । ତେବେ ଗତକାଲି ବିରାଟ ଅଧିନାୟକ ଭାବରେ ଶେଷ ମ୍ୟାଚରେ ବିଜୟ ପରେ ସମସ୍ତେ ଭାବ ବିହ୍ବଳ ହୋଇଯାଇଥିଲେ । ସୋସିଆଲ ମିଡିଆରେ ପ୍ରଶଂସକ ବିରାଟଙ୍କୁ ବିଦାୟ ମଧ୍ୟ ଦେଇଥିଲେ ।

ଆଜି ନବୀନ ପଟ୍ଟନାୟକ ଓ ଜଗନମୋହନ ରେଡ୍ଡୀଙ୍କ ମଧ୍ୟରେ ବୈଠକ, ସମାଧାନ ହୋଇପାରେ ସୀମା ବିବାଦ

ଭୁବନେଶ୍ୱର: ଆଜି ଏକାଠି ବସିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଆନ୍ଧ୍ର ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡୀ। ଅପରାହ୍ନ ୪ଟା ୩୦ ମିନିଟରେ ଭୁବନେଶ୍ୱରରେ ପହଞ୍ଚିବେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନ ରେଡ୍ଡୀ। ଅପରାହ୍ନ ୫ଟା ୫୦ରେ ଦୁଇ ରାଜ୍ୟ ମୁଖିଆଙ୍କ ମଧ୍ୟରେ ହେବ ଆଲୋଚନା। ଲୋକସେବା କନଭେନସନ ସେଣ୍ଟରରେ ବୈଠକ ବସିବ। ଉଭୟଙ୍କ ମଧ୍ୟରେ ପ୍ରାୟ ୪୫ ମିନିଟ ଆଲୋଚନା ହେବ। ସନ୍ଧ୍ୟା ୭ଟାରେ ଜଗନ ରେଡ୍ଡୀ ଆନ୍ଧ୍ର ଫେରିଯିବେ। ଦୁଇ ରାଜ୍ୟ ମଧ୍ୟରେ ସୀମା ଓ ପୋଲାଭରାମ ପ୍ରକଳ୍ପକୁ ନେଇ ରହିଥିବା ବିବାଦ ଉପରେ ଆଲୋଚନା ହୋଇପାରେ।

ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଜଗନ ରେଡ୍ଡୀଙ୍କ ସହ ଆଲୋଚନାରେ ଏହାକୁ ମୁଖ୍ୟ ପ୍ରସଙ୍ଗ କରିବ ରାଜ୍ୟ। ଏହାସହ ଦୀର୍ଘଦିନ ଧରି ଚାଲିଥିବା ପୋଲାଭରମ ପ୍ରସଙ୍ଗରେ ବିସ୍ତୃତ ଆଲୋଚନା କରାଯାଇ ସମାଧାନର ବାଟ କଢାଯିବ। କଂଗ୍ରେସ ବିଜେଡିର ଦାବିକୁ ସମର୍ଥନ ଜଣାଇଛି। ଦୁଇ ମୁଖ୍ୟମନ୍ତ୍ରୀଙ୍କ ସାକ୍ଷାତ ପାଇଁ ବ୍ୟାପକ ବ୍ୟବସ୍ଥା ସହ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି।

ଆଶ୍ଚର୍ଯ୍ୟଜନକ NCRB ରିପୋର୍ଟ, ୨୦୨୦ରେ ୧୧ ହଜାର ବ୍ୟବସାୟୀ କରିଛନ୍ତି ଆତ୍ମହତ୍ୟା

ନୂଆଦିଲ୍ଲୀ: ବହୁରୂପୀ ଭୂତାଣୁ ଲକ୍ଷାଧିକଙ୍କ ଜୀବନ ନେଇଥିବା ବେଳେ ସଂକ୍ରମଣ ରୋକିବାକୁ ଲାଗୁ ହୋଇଥିବା ଲକଡାଉନ ଯୋଗୁ ଉଜୁଡ଼ି ଯାଇଛି ଅନେକ ପରିବାର । ୨୦୧୯ ତୁଳନାରେ ୨୦୨୦ରେ ଆତ୍ମହତ୍ୟା ମାମଲା ୫୦ପ୍ରତିଶତ ବଢ଼ିଛି । ବ୍ୟବସାୟରେ ଘାଟା ଯୋଗୁ ୧୧ହଜାରରୁ ଅଧିକ ଛୋଟବଡ଼ ବ୍ୟବସାୟୀ ଆତ୍ମହତ୍ୟା କରିଛନ୍ତି । ଏଭଳି ଚିନ୍ତାଜନକ ରିପୋର୍ଟ ଦେଇଛି ଜାତୀୟ ଅପରାଧ ରେକର୍ଡ ବ୍ୟୁରୋ ବା ଏନସିଆରବି ।

କରୋନା ପରେ ଦେଶରେ ବଢ଼ିଛି ଆତ୍ମହତ୍ୟା ମାମଲା । କରୋନା ସଙ୍କଟରେ ସାମାନ୍ୟ ଆଶ୍ବସ୍ତି ଆସିଥିବା ବେଳେ ଚିନ୍ତାଜନକ ରିପୋର୍ଟ ଦେଇଛି ଜାତୀୟ ଅପରାଧ ରେକର୍ଡ ବ୍ୟୁରୋ ବା ଏନସିଆରବି । ଦେଶରେ ଚାଷୀଙ୍କ ତୁଳନାରେ ଆତ୍ମହତ୍ୟା କରିଛନ୍ତି ଅଧିକ ବ୍ୟବସାୟୀ । ଯାହା ଇତିହାସରେ ପ୍ରଥମ । ବାରମ୍ବାର ଲକଡାଉନ, ସଟଡାଉନ, ମାନ୍ଦା ବ୍ୟବସାୟ ଆଦି କାରଣରୁ ବ୍ୟବସାୟୀମାନେ ନାହିଁ ନଥିବା କ୍ଷତିର ସମ୍ମୁଖୀନ ହେବା ପରେ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଇଛନ୍ତି । ଲକଡାଉନ ଯୋଗୁ ଋଣ ପରିଶୋଧ କରି ନପାରି ୧୧ହଜାରରୁ ଅଧିକ ଛୋଟବଡ଼ ବ୍ୟବସାୟୀ ଆତ୍ମହତ୍ୟା କରିଛନ୍ତି ।

ବ୍ୟବସାୟରେ ବ୍ୟାପକ କ୍ଷତି କାରଣରୁ ବ୍ୟବସାୟୀଙ୍କ ମଧ୍ୟରେ ଆତ୍ମହତ୍ୟା ସଂଖ୍ୟା ୫୦ ପ୍ରତିଶତ ବୃଦ୍ଧି ହୋଇଛି । 2020ରେ 11 ହଜାର 716ଜଣ ବ୍ୟବସାୟୀ ଆତ୍ମହତ୍ୟା କରିଛନ୍ତି । ସେମାନଙ୍କ ମଧ୍ୟରୁ 4 ହଜାର 356 ଜଣ ଛୋଟ, ମଧ୍ୟମ ଓ ବଡ ବ୍ୟବସାୟୀ ଥିବାବେଳେ, 4 ହଜାର 226 ଜଣ ଭେଣ୍ଡର ଥିଲେ । ସେହିପରି କୃଷି ସଂକଟ, ଫସଲହାନି, ଋଣଭାର ଆଦି କାରଣରୁ ଚାଷୀ ଆତ୍ମହତ୍ୟା ସଂଖ୍ୟା ବି ବଢିଛି । 10 ହଜାର 677 ଜଣ ଚାଷୀ ମୃତ୍ୟୁର ପଥ ବାଛି ନେଇଥିବା ରିପୋର୍ଟ ଦେଇଛି ଏନସିଆରବି।
ଦେଶରେ ମୋଟ ଆତ୍ମହତ୍ୟା ହାର 10 ପ୍ରତିଶତ ବୃଦ୍ଧି ପାଇଛି । ଗତ ବର୍ଷ ଦେଶରେ 1 ଲକ୍ଷ 53 ହଜାର 52ଜଣ ଲୋକ ଆତ୍ମହତ୍ୟା କରିଛନ୍ତି, ଯାହାକି ଦେଶର ଇତିହାସରେ ସର୍ବାଧିକ ।

T20 ବିଶ୍ୱକପରୁ ଯାତ୍ରା ସମାପ୍ତ କଲା ଭାରତ, ଶେଷ ମ୍ୟାଚରେ ନାମ୍ବିଆ ଠାରୁ ଜିତିଲା ଇଣ୍ଡିଆ

ସାଉଦିଆରବ: ଶେଷ ହୋଇଛି ଭାରତର ଟି-୨୦ ବିଶ୍ବକପ୍ ଅଭିଯାନ । ଶେଷ ମ୍ୟାଚରେ ଭାରତ ନ୍ୟାମ୍ବିଆ ୯ ଓ୍ବିକେଟରେ ପରାସ୍ତ କରିଛି । ପ୍ରଥମେ ବ୍ଯାଟିଂ କରି ନାମିବିଆ ୧୩୨ ରନ୍ସା କରିଥିବାବେଳେ ଗୋଟିଏ ଓ୍ବିକେଟ୍ ହରାଇ ୧୬ ଓଭର ଖେଳ ଖେଳି ବିଜୟ ଲକ୍ଷ୍ୟ ହାସଲ କରି ନେଇଛି ଭାରତ । ଓପନର ଲୋକେଶ ରାହୁଲ ୫୪ ରନ୍ କରିଥିବାବେଳେ ରୋହିତ ଶର୍ମା ୫୬ ରନ୍ ଓ ସୂର୍ଯ୍ୟକୁମାର ଯାଦବ ୨୫ ରନ୍ କରି ଦଳକୁ ବିଜୟୀ କରାଇଥିଲେ ।

ଗ୍ରୁପ Bରେ ଭାରତ ୫ଟି ମ୍ୟାଚ୍ ଖେଳି ୩ଟିରେ ବିଜୟ ହାସଲ କରି ତୃତୀୟ ନମ୍ବର ସ୍ଥାନରେ ରହିଛି । ଚଳିତ ଟି-୨୦ ବିଶ୍ବକପରେ ଭାରତ ପ୍ରଥମ ଦୁଇଟି ମ୍ୟାଚ୍ ହାରି ବ୍ୟାକଫୁଟରେ ରହିଥିଲା । ପାକିସ୍ତାନ ଓ ନ୍ୟୁଜିଲାଣ୍ଡଠାରୁ ହାରିଥିଲା ଭାରତ । ଏହାପରେ ଆଫଗାନିସ୍ତାନ, ସ୍କଟଲାଣ୍ଡ ଓ ନାମିବିଆ ଠାରୁ ବିଜୟ ହାସଲ କରିଥିଲେ ବିରାଟ ବାହିନୀ । ପ୍ରଥମ ଦୁଇଟି ମ୍ୟାଚରେ ଖରାପ ପ୍ରଦର୍ଶନ ଯୋଗୁଁ ଭାରତ ଚଳିତ ବର୍ଷର ଟି-୨୦ ବିଶ୍ବକପ୍ ହାତ ଛଡା କରିଛି । ଏଥି ସହ ଶେଷ ହୋଇଛି ବିରାଟ କୋହଲିଙ୍କ ଟି-୨୦ ଫର୍ମାଟରେ ଅଧିନାୟକ ସଫର୍ ।

ନୂଆ ଖଣି ଅଧିନିୟମ: ନିୟମ ନମାନିଲେ ୨ ବର୍ଷ ଜେଲ ସହ ୫ ଲକ୍ଷ ଟଙ୍କା ଜରିମାନା

ଭୁବନେଶ୍ୱର: ନିୟମ ବାହାରେ ଖଣିଜ ଉତ୍ତୋଳନ କଲେ ଜେଲ୍‌ ଦଣ୍ଡ ସହ ୫ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା । ନୂଆ ମିନେରାଲ୍‌ କନ୍‌ସେସନ୍‌ ରୁଲରେ ପ୍ରଥମ କରି ଏହି ବ୍ୟବସ୍ଥା କରାଯାଇଛି । କ୍ୟାପଟିଭ୍‌ ଖଣି ଲିଜ୍‌ଧାରୀ ୫୦ ପ୍ରତିଶତ ଖଣିଜ ପଦାର୍ଥ ବିକି ପାରିବେ । ନୂଆ ବ୍ୟବସ୍ଥା ଯୋଗୁ ଓଡ଼ିଶା ଅଧିକ ଖଣି ରାଜସ୍ୱ ପାଇବ । ଗତ ଅକ୍ଟୋବର ସୁଦ୍ଧା ଓଡ଼ିଶାର ଖଣି ରାଜସ୍ୱ ସଂଗ୍ରହ ୨୨ ହଜାର କୋଟି ଟଙ୍କାରେ ପହଞ୍ଚିଛି ।

ବେଆଇନ୍‌ ଭାବେ ଖଣିଜ ଉତ୍ତୋଳନ କଲେ ଜେଲ୍‌ଦଣ୍ଡ । ୨ ବର୍ଷ ଜେଲ୍‌ କିମ୍ବା ଜେଲ ସହିତ ୫ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା । ଖଣିଜ ସଂରକ୍ଷଣ ଓ ବିକାଶ ସଂଶୋଧନ ରୁଲ୍‌-୨୦୨୧ରେ ଏହି ନୂଆ ବ୍ୟବସ୍ଥା କରାଯାଇଛି । ପୂର୍ବରୁ କ୍ୟାପଟିଭ୍‌ ଖଣି ଲିଜ୍‌ଧାରୀ ବଳକା ଖଣିଜ ପଦାର୍ଥ ବିକି ପାରୁନଥିଲେ । ଏଣିକି ୫୦ ପ୍ରତିଶତ ବିକି ପାରିବେ । ଏଥିପାଇଁ ଖଣି ଲିଜଧାରୀ ସମାନୁପାତିକ ରୟାଲ୍‌ଟି ସରକାରଙ୍କୁ ଦେବେ । ଫଳରେ ଓଡ଼ିଶା ଭଳି ରାଜ୍ୟ ଅଧିକ ରାଜସ୍ବ ପାଇବେ । ପୂର୍ବରୁ ଲିଜ୍‌ ଅବଧି ସରିବା ପରେ ଲିଜ୍‌ଧାରୀ ଖଣିକୁ ସରେଣ୍ଡର କରୁଥିଲେ । ନୂଆ ବ୍ୟବସ୍ଥା ଅନୁଯାୟୀ ଏଣିକି ଲାଇସେନ୍‌ସ୍‌ ଅବଧି ସରିବା ପରେ ମଧ୍ୟ ଉତ୍ତୋଳନ ପ୍ରକ୍ରିୟା ସରିନଥିଲେ ଆଂଶିକ ସରେଣ୍ଡର କରାଯାଇପାରିବ । ସେହିପରି ସାଧାରଣ ଉଦ୍ୟୋଗ ଲିଜ୍‌ଧାରୀଙ୍କୁ ଲିଜ୍‌ ଅବଧି ସରିବା ପୂର୍ବରୁ ଆଉ ୫୦ ବର୍ଷ ପର୍ଯ୍ୟନ୍ତ ଲିଜ୍‌ ଦିଆଯାଇପାରିବ । ଚଳିତବର୍ଷ ଖଣି ରାଜସ୍ୱରେ  ଓଡ଼ିଶା ସରକାର ଉଲ୍କେଖନୀୟ ସଫଳତା ପାଇଛନ୍ତି । ଗତ ଅକ୍ଟୋବର ସୁଦ୍ଧା ଓଡ଼ିଶା ସରକାର ୨୨ ହଜାର କୋଟି ଟଙ୍କା ପାଇଛନ୍ତି । ଯାହା କି ଏକ ରେକର୍ଡ ।

ଖଣିଜ ଉତ୍ତୋଳନ ଶତପ୍ରତିଶତ ମେସିନ୍‌ ଦ୍ୱାରା କରାଯାଉଛି । ଡିଜିପିଏସ୍‌ ସର୍ଭେଠାରୁ ଆରମ୍ଭ କରି ଖଣି ଏରିଆ ବାହାରେ ଯେପରି ଲିଜଧାରୀ ଉତ୍ତୋଳନ କରି ନପାରିବେ ସେଥିପାଇଁ ନିୟମ କଡ଼ାକଡ଼ି କରାଯାଇଛି । ପୂର୍ବତନ ଅର୍ଥମନ୍ତ୍ରୀ ଅଭିଯୋଗ କରିଛନ୍ତି ଯେ କେନ୍ଦୁଝର, ଯୋଡ଼ା ଓ ସୁନ୍ଦରଗଡ଼ ଖଣି ଅଞ୍ଚଳରେ ମେସିନ୍‌ ଦ୍ବାରା କାମ କରାଯିବାରୁ ପ୍ରାୟ ୧୮ ହଜାର ଲୋକ ବେକାର ହୋଇଛନ୍ତି । ନୂଆ ନିୟମ ଦ୍ବାରା ଅଧିକ ଖଣିଜ ପଦାର୍ଥ ବଜାରରେ ଉପଲବ୍ଧ ହେବ । ଅନ୍ୟପଟେ ଓଡ଼ିଶା ସରକାରଙ୍କ ଫାଇଭ୍‌- ଟି ସଂସ୍କାର ବ୍ୟବସ୍ଥା ଯୋଗୁ ଖଣି କାରବାରେ ଅଧିକ ସ୍ବଚ୍ଛତା ଆସିବା ସହିତ ରାଜସ୍ୱ ସଂଗ୍ରହ ବୃଦ୍ଧି ପାଇବ ।

ଧୂଆଁ ଧୂଆଁ ଦେଶର ରାଜଧାନୀ, ୪୦୦ ପାର କଲାଣି ଏୟାର ଇଣ୍ଡେକ୍ସ

ନୂଆଦିଲ୍ଲୀ: ଧୂଆଁ ଧୂଆଁ ଦେଶର ରାଜଧାନୀ ଦିଲ୍ଲୀ । ସକାଳେ ହେବାମାତ୍ରେ ଯୁଆଡେ ଚାହିଁବେ କେବଳ ଧୂଳି ଆଉ ଧୂଳି । ଏହାକୁ ନେଇ ଚିନ୍ତାରେ ପଡିଛନ୍ତି ଦିଲ୍ଲୀବାସୀ । ଦିଲ୍ଲୀ ସହ ଗୁରଗାଓଁ , ଗାଜିଆବାଦ, ନଏଡା ଓ ଫରିଦାବାଦରେ ପ୍ରଦୂଷଣ ମାତ୍ରା ଢେର ଅଧିକ ରହିଛି । ଏଭଳିକି ଅନେକ ସହରରେ ୪୦୦ ପାର କରିଛି ଏୟାର କ୍ବାଲିଟି ଇଣ୍ଡେକ୍ସ । ବଢୁଥିବା ପ୍ରଦୂଷଣକୁ ନେଇ ଦିଲ୍ଲୀ ସରକାର ଆବଶ୍ୟକ ପଦକ୍ଷେପ ନେଉଥିବା କହିଛନ୍ତି ଦିଲ୍ଲୀ ଜଙ୍ଗଲ ଓ ପରିବେଶ ମନ୍ତ୍ରୀ ଗୋପାଳ ରଏ ।

ସମସ୍ୟାର ସମାଧାନ ପାଇଁ କେନ୍ଦ୍ର ସରକାରଙ୍କୁ ଚିଠି ଲେଖାଯାଇଛି । ଆସନ୍ତାକାଲି ଦିଲ୍ଲୀ ସରକାରଙ୍କ ସମସ୍ତ ଅଧିକାରୀଙ୍କ ଏକ ବୈଠକ ରହିଛି । ଏହି ବୈଠକରେ ବଢୁଥିବା ପ୍ରଦୂଷଣ ଉପରେ ଆଲୋଚନା ହେବ । କିଭଳି ସମସ୍ୟାର ସମାଧାନ ହୋଇପାରିବ ତାହା ଉପରେ ଧ୍ୟାନ ଦିଆଯିବ ବୋଲି କହିଛନ୍ତି ଗୋପାଳ ରଏ  । ପର୍ବରୁ ଦିଲ୍ଲୀ ବାୟୁ ମଣ୍ଡଳ ସ୍ଥିର ରହିଥିବାବେଳେ ଦୀପାବଳି ପରେ ବିଗିଡ଼ିଯାଇଥିଲା ସ୍ଥିତି  ।

 

ପୋଲିସ ହାତରେ କ୍ରାଇମ ଗ୍ୟାଙ୍ଗର ୭ ସଦସ୍ୟ: ସ୍ୟାଡ୍ ସଙ୍ଗ ଶୁଣି ବ୍ରାଉନସୁଗାର ଖାଉଥିଲେ ଆଉ ମଦ ପିଉଥିଲେ

ଭୁବନେଶ୍ୱର: ରାଜଧାନୀରେ କ୍ରାଇମ ଗ୍ୟାଙ୍ଗର ଭାଇରଲ ଭିଡିଓ ଘଟଣା । ଅଭିଯୁକ୍ତଙ୍କୁ ଧରିବା ପାଇଁ ପୋଲିସର ଅପରେସନ ଆଘାତ୍ । ଡନ୍‌ ହେବାର ନିଶାକୁ ଚୂରମାର କରିଛି ପୋଲିସ। ରାଜେଶ ବେହେରା ଓରଫ ଚେଙ୍ଗ ଘରେ ପୋଲିସ ରେଡ୍ ମାରିଛି । ମାମଲାରେ ମୋଟ ୨୯ ଜଣଙ୍କ ନାଁରେ ମାମଲା ରୁଜୁ ହୋଇଛି । ଆଜି ଦୁଇଜଣଙ୍କୁ ମିଶାଇ ଗ୍ୟାଙ୍ଗର ମୋଟ ୭ଜଣକୁ ଗିରଫ କରିଛି ପୋଲିସ। ଗ୍ୟାଙ୍ଗ ମୁଖ୍ୟ ବୁବୁ ଫେରାର ଅଛି ।

ଅପରେସନ ଆଘାତ୍‌ । କେବିଏନ ଗ୍ୟାଙ୍ଗ୍ ବନାମ ସ୍ପେଶାଲ ୨୬ । ଅବତକ୍- ୭ । ଆକ୍ସନ ମୋଡ୍‌ରେ ପୋଲିସ, ଭାଙ୍ଗିଲା ଭିଲେନର ଘର । କେବିଏନ୍‌ ଗ୍ୟାଙ୍ଗ ମୁଖିଆ ଦେବୀପ୍ରସାଦ ଜେନା ଓରଫ ବୁବୁ ସମେତ ୨୨ଜଣ ଫେରାର ହୋଇଛନ୍ତି । ବୁବୁର ସହଯୋଗୀ ରାଜେଶ ବେହେରା ଓରଫ ଚେଙ୍ଗ ଘରେ ପୋଲିସ ସର୍ଚ୍ଚ ଅପରେସନ୍ କରିଛି । ରିଲ ଭିଡିଓରେ ଚେଙ୍ଗ ଖଣ୍ଡା ଓ ବନ୍ଧୁକ ଧରିଥିଲା। ଭିଡିଓ ଭାଇରାଲ ପରେ ସେ ଫେରାର ଅଛି। ପୋଖରୀପୁଟରେ ଥିବା ଚେଙ୍ଗ ଘରେ ବେଆଇନ ବନ୍ଧୁକ ଥିବା ସନ୍ଦେହରେ ରେଡ୍ ମାରିଥିଲା ନୟାପଲ୍ଲୀ ଥାନା ପୋଲିସ। ଘରର ଆଜବେଷ୍ଟ ଓ ଚଟାଣକୁ ଭାଙ୍ଗିଥିଲା। ଯାଞ୍ଚ ବେଳେ ଆଲମାରୀରୁ ଖଣ୍ଡା ଜବତ ହୋଇଛି । ସେପଟେ ଚେଙ୍ଗର ଆଉ ଏକ ଭିଡିଓ ସାମ୍ନାକୁ ଆସିଛି। ସ୍ୟାଡ୍‌ ସଙ୍ଗରେ ବ୍ରାଉନସୁଗର ଓ ମଦ ପିଉଥିବା ଭିଡିଓ ସୋସିଆଲ ଭାଇରାଲ ହେଉଛି। ଭାଇରାଲ ଭିଡିଓରେ ଥିବା ଅନ୍ୟ ଅଭିଯୁକ୍ତଙ୍କ ଘରେ ଶୀଘ୍ର ଚଢାଉ କରିବ ପୋଲିସ ।

https://www.youtube.com/watch?v=kWiN0hK1rRE

ଭୁବନେଶ୍ୱରରେ କ୍ରାଇମଗ୍ୟାଙ୍ଗର ଭିଡିଓ ଭାଇରାଲ ହେବା ପରେ ମୋଟ୍‌ ୨୯ ଜଣଙ୍କ ନାଁ ମାମଲା ରୁଜୁ କରାଯାଇଛି । ଏବେ ୬ଜଣଙ୍କୁ ପୋଲିସ ଗିରଫ କରିଥିବା ବେଳେ ପୂର୍ବରୁ ଆଉ ଜଣେ ଚୋରି ମାମଲାରେ ଜେଲରେ ଅଛି। ଆଜି ଦୁଇ ଅଭିଯୁକ୍ତ ସାହିଲ ସାଗର ଷଡ଼ଙ୍ଗୀ ଓ କାହ୍ନା ସାହୁଙ୍କୁ ଗିରଫ କରାଯାଇଛି । ଭାଇରାଲ୍‌ ଭିଡିଓ ସୁଟ୍‌ ହୋଇଥିବା ସ୍ପଟ୍‌କୁ ଚିହ୍ନଟ କରି ପୋଲିସ ଯାଞ୍ଚ କରିଛି । ଭୁବନେଶ୍ୱରର ବିଭିନ୍ନ ଖଟିକୁ ଚିହ୍ନଟ କରି ନଜର ରଖାଯାଇଛି । ଏହି ଗ୍ୟାଙ୍ଗ ଦ୍ୱାରା କୌଣସି ଲୋକ ଅପରାଧର ଶିକାର ହୋଇଥିଲେ ଅଭିଯୋଗ କରିବାକୁ ଡିସିପି ନିବେଦନ କରିଛନ୍ତି। ଗ୍ୟାଙ୍ଗର ଆତଙ୍କ ପରେ ରାତିରେ ପାଟ୍ରୋଲିଂକୁ ଜୋରଦାର କରାଯାଇଛି । ପୋଲିସ ଗିରଫ ଭୟରେ କେବିଏନ ଗ୍ୟାଙ୍ଗ ଫେରାର ହୋଇଯାଇଛନ୍ତି । ସେମାନଙ୍କୁ ଧରିବା ପୋଲିସ ପାଇଁ ଏବେ ବଡ ଚ୍ୟାଲେଞ୍ଜ୍ ।