କଟକ: ଘରେ ଘରେ ପହଞ୍ଚିବ ପିଇବା ପାଣି । ଅମୃତ ଯୋଜନାରେ ବିଶୁଦ୍ଧ ପିଇବା ପାଣି ପାଇବେ କଟକବାସୀ । ସହର ସମେତ ଜଗତପୁର ଓ ପ୍ରତାପ ନଗରୀରେ ନିର୍ମାଣ ହୋଇଛି ପାନୀୟ ଜଳ ପ୍ରକଳ୍ପ । ଏଥିପାଇଁ ଖର୍ଚ୍ଚ ହୋଇଛି ମୋଟ୍‌ ସାଢେ ୩ ଶହ କୋଟି ଟଙ୍କା । ଏହି କାମ ଲାଗି ମୁଖ୍ୟମନ୍ତ୍ରୀଙ୍କୁ କଟକ ସହରବାସୀ ଧନ୍ୟବାଦ ଦେଇଛନ୍ତି ।

କଟକରେ ରହିବନି ପିଇବା ପାଣି ସଂକଟ । ଅମୃତ ଯୋଜନାରେ ଘରେ ପହଞ୍ଚିବ ବିଶୁଦ୍ଧ ପାନୀୟ ଜଳ । ମୁଖ୍ୟମନ୍ତ୍ରୀଙ୍କ ବିଶୁଦ୍ଧ ଜଳ ପ୍ରଦାନ ଅଭିଯାନ ଆଣିଛି ଏହି ଖୁସିର ଲହରୀ । କଟକ ସହର ସମେତ ଜଗତପୁର ଓ ପ୍ରତାପ ନଗରୀରେ ନିର୍ମାଣ ହୋଇଛି ପାନୀୟ ଜଳ ପ୍ରକଳ୍ପ । ଖର୍ଚ୍ଚ ହୋଇଛି ମୋଟ୍‌ ସାଢେ ୩ ଶହ କୋଟି ଟଙ୍କା । କଟକ ସିଡିଏ ଏବଂ ଚହଟା ଅଞ୍ଚଳକୁ ଅଧିକ ଫୋକସ କରାଯାଇଛି । ଚହଟା ଇନଟେକ ଓ୍ୱେଲ ପାଇଁ ୨୮ କୋଟି ୧୯ ଲକ୍ଷ ଖର୍ଚ୍ଚ ହୋଇଥିବା ବେଳେ ସିଡିଏ ୧୨ ଟ୍ରିଟମେଣ୍ଟ ପ୍ଲାଣ୍ଟ ପାଇଁ ଖର୍ଚ୍ଚ ହୋଇଛି ୫୦ କୋଟି ୬୮ ଲକ୍ଷ । ଏହି ଦୁଇ ଅଞ୍ଚଳର ଟ୍ରିଟମେଣ୍ଟ ପ୍ଲାଣ୍ଟ ଓ ଇନଟେକ୍ ଓ୍ୱେଲ ପାଇଁ ଆଇଓସିଏଲ୍‌ ଖର୍ଚ୍ଚ ହୋଇଛି ୭୮ କୋଟିରୁ ଅଧିକ ଟଙ୍କା । ଅନ୍ୟ ଖର୍ଚ୍ଚ ରାଜ୍ୟ ସରକାର ବହନ କରିଛନ୍ତି । ୧୮ ମିଟର ଗଭୀର ୧୦ ମିଟର ଓସାର ବିଶିଷ୍ଟ ଚହଟା ଇନଟେକ ଓେଲ୍ବରେ ଖଞ୍ଜା ଯାଇଛି ତିନିଟି ୨୭୦ ଏଚପିର ମଟର । ମହାନଦୀରୁ ଏହି ଓ୍ବେଲ ଘଣ୍ଟାକରେ ୫୪ ଲକ୍ଷ ଲିଟର ଜଳ ସଂଗ୍ରହ କରି ସିଡିଏ ୧୨ ଟ୍ରିଟମେଣ୍ଟ ପ୍ଲାଣ୍ଟକୁ ପଠାଇବ । ସିଡିଏ ୧୨୯ ଏମ୍‌ଏଲ୍‌ଡି କ୍ଷମତା ସମ୍ପନ୍ନ ଟ୍ରିଟମେଣ୍ଟ ପ୍ଲାଣ୍ଟ ନଦୀ ପାଣିକୁ ବିଶୋଧନ କରି ଲୋକଙ୍କ ଘରେ ପହଞ୍ଚାଇବ । ଏହି ପ୍ଲାଣ୍ଟ ଦିନକୁ ୧୨୯ ମିଲିୟନ ଲିଟର ଜଳ ବିଶୋଧନ କରିପାରିବ ।

ନଦୀ ପାଣିରେ ଥିବା ରାସାୟନିକ ଓ ମଇଳାକୁ ସଫା କରିବା ପାଇଁ ଟ୍ରିଟମେଣ୍ଟ ପ୍ଲାଣ୍ଟରେ ବ୍ୟବହାର କରାଯିବ ଫିଟିକିରି, ଚୂନ, କ୍ଲୋରିନ୍ । ଟ୍ୟାଙ୍କରୁ ୭ଟି ଉଚ୍ଚ କ୍ଷମତା ସମ୍ପନ୍ନ ମୋଟର ସାହାଯ୍ୟରେ ସହରର ପ୍ରାୟ ୪୦ ସ୍ଥାନରେ ଥିବା ଓଭର ହେଡ ଟ୍ୟାଙ୍କକୁ ପାଣି ଛଡ଼ାଯିବ । ସେଠାରୁ ପାଇପ ଯୋଗେ ସହରବାସୀ ପାଇବେ ବିଶୁଦ୍ଧ ପାନୀୟ ଜଳ । ମେଗା ପ୍ରକଳ୍ପ କୁ ସହରବାସୀ ସ୍ୱାଗତ କରିଛନ୍ତି।