ନୂଆଦିଲ୍ଲୀ: ଭ୍ୟାକସିନ ନେଲେ ବି ବ୍ୟାପୁଛି କରୋନା । ଗୁରୁବାର ବ୍ରିଟିଶର ଏକ ମଡେଲରୁ ଜଣା ପଡ଼ିଛି ଯେ କରୋନା ଭାଇରସର ଡେଲଟା ଭ୍ୟାରିୟଣ୍ଟ ଟିକାକରଣ ହୋଇଥିବା ଲୋକଙ୍କଠାରୁ ସେମାନଙ୍କ ନିକଟ ସର୍ମ୍ପକୀୟ ପାଖକୁ ସହଜରେ ବ୍ୟାପି ପାରେ । କିନ୍ତୁ ଡେଲଟା ଭାରିଏଣ୍ଟ ସମ୍ପର୍କରେ ଆସୁଥିବା ଲୋକ ଯଦି ଟିକା ନେଇଥିବେ ତାହାଲେ ସେମାନେ ସଂକ୍ରମିତ ହେବା ସମ୍ଭାବନା କମ୍ ରହିଛି । ଲଣ୍ଡନର ଇମ୍ପେରିଆଲ୍ କଲେଜ ଦ୍ବାରା କରାଯାଇଥିବା ଏକ ଅଧ୍ୟୟନରୁ ଜଣାପଡ଼ିଛି ଯେ ଯେଉଁଠାରେ ଲୋକମାନେ ଟିକା ନେଇଛନ୍ତି ସହି ଜନସଂଖ୍ୟାରେ ଡେଲଟା ଭାରିଏଣ୍ଟ ବିସ୍ତାର କରିପାରେ । ଅନୁସନ୍ଧାନକାରୀମାନେ କହିଛନ୍ତି କି କୋଭିଡ-୧୯ ସଂକ୍ରମଣକୁ ହ୍ରାସ କରିବାର ସର୍ବୋତ୍ତମ ଉପାୟ ହେଉଛି ଭ୍ୟାକସିନ୍ । ଏହାସହ ବୁଷ୍ଟର ଡୋଜ ଆବଶ୍ୟକତା ଉପରେ ମଧ୍ୟ ସେ ଗୁରୁତ୍ବାରୂପ କରିଛନ୍ତି ।
ଅନୁସନ୍ଧାନକାରୀମାନେ ଆହୁରି କହିଛନ୍ତି କି ଯେଉଁମାନେ ଭ୍ୟାକସିନ୍ ନେଇଛନ୍ତି ସେମାନେ ଶୀଘ୍ର ସୁସ୍ଥ ହେଉଛନ୍ତି । ତେବେ ଏହି ଅଧ୍ୟୟନର ସହ ଲେଖକ ଅନିକା ସିଙ୍ଗନାୟଗମ କହିଛନ୍ତି କି କରୋନାରେ ସଂକ୍ରମିତ ହେଉଥିବା ଲୋକଙ୍କଠାରୁ ବାରମ୍ବାର ନମୁନା ସଂଗ୍ରହ କରିବା ପରେ ଜଣା ପଡ଼ିଛି କି ଟିକାକରଣ ହୋଇଥିବା ଲୋକମାନେ ମଧ୍ୟ ସଂକ୍ରମିତ ହେଉଛନ୍ତି ଏବଂ ସେମାନଙ୍କ ଘରେ ସଂକ୍ରମଣ ବିସ୍ତାର ମଧ୍ୟ କରିପାରିବେ । ଯେଉଁମାନେ ଟିକା ନେଇଛନ୍ତି ସେମାନେ ମଧ୍ୟ କରୋନାରେ ଆକ୍ରାନ୍ତ ହେବେ ବୋଲି କହିଛନ୍ତି ସିଙ୍ଗନାୟଗମ ।
ତେବେ ଏହି ଅଧ୍ୟୟନରେ ୬୨୧ ଜଣ ଲୋକ ଭାଗ ନେଇଥିଲେ । ଯେଉଁଥିରୁ ଜାଣିବାକୁ ମିଳିଥିଲା କି କରୋନାର ଡେଲଟା ଭ୍ୟାରିୟଣ୍ଟ ଦ୍ବାରା ୨୦୫ଟି ଘର ସମ୍ପର୍କରେ ଥିଲେ । ସେଥିମଧ୍ୟରୁ ପିଜିଟିଭ୍ ଆସିଥିବା ଲୋକଙ୍କ ମଧ୍ୟରେ ୨୫ ପ୍ରତିଶତ ଲୋକ ଟିକା ନେଇଥିବା ବେଳେ ୩୮ ପ୍ରତିଶତ ଲୋକ ଟିକା ନେଇନଥିଲେ । ଅନୁସନ୍ଧାନକାରୀଙ୍କ କହିଛନ୍ତି ଯେ ଟିକା ନେଉଥିବା ଲୋକମାନେ ରୋଗ ପ୍ରତିରୋଧକ ଶକ୍ତି ହରାଉଛନ୍ତି । ତେଣୁ ସେମାନଙ୍କୁ ଏକ ବୁଷ୍ଟର ଡୋଜ୍ ଦିଆଯିବା ନିହାତି ଦରକାର । ଅନ୍ୟପଟେ ଇମ୍ପେରିଆଲ୍ ଏପିଡେମୋଲୋଜିଷ୍ଟ୍ ନିଲ୍ ଫର୍ଗୁସନ କହିଛନ୍ତି କି ସମୟ ସହିତ ଲୋକଙ୍କ ରୋଗ ପ୍ରତିରୋଧକ ଶକ୍ତି କମିଯାଏ । ସେଥିପାଇଁ ଟିକା ନେଇଥିବା ବ୍ୟକ୍ତି ଯେକୌଣସି ସମୟରେ ସଂକ୍ରମିତ ହୋଇପାରନ୍ତି । ତେଣୁ ଏଥିପାଇଁ ଏକ ବୁଷ୍ଟର ଡୋଜ୍ ଅତ୍ୟନ୍ତ ଗୁରୁତ୍ବପୂର୍ଣ୍ଣ ।
