ମାଓବାଦୀ ପାଳିବେ ପିଏଲଜିଏ ସପ୍ତାହ, ରାୟଗଡ଼ାରେ ୮ ପର୍ଯ୍ୟନ୍ତ ବସ ଚଳାଚଳ ବନ୍ଦ

ରାୟଗଡ଼ା: ଗୁରୁବାର ଠାରୁ ଆରମ୍ଭ ହେଉଛି ମାଓବାଦୀଙ୍କ ପିଏଲଜିଏ ସପ୍ତାହ । ଏଥିପାଇଁ ରାୟଗଡା ଜିଲ୍ଲାରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ଜିଲ୍ଲାରେ ପୋଲିସ ପକ୍ଷରୁ କମ୍ବିଂ ଅପରେସନକୁ ଜୋରଦାର କରାଯାଇଛି । ନିୟମଗିରି ଅଞ୍ଚଳରେ ସିଆରପିଏଫ, ବିଏସଏଫ ଓ ଏସଓଜି ନିୟୋଜିତ ହୋଇଛନ୍ତି । ସହର ଭିତରକୁ ପ୍ରଵେଶ କରୁଥିବା ସମସ୍ତ ଗାଡି ଗୁଡିକୁ ଯାଞ୍ଚ କରାଯାଉଛି । ସୁରକ୍ଷା ଦୃଷ୍ଟିରୁ ଜିଲ୍ଲାର ସମସ୍ତ ସରକାରୀ ବସ ଚଳାଚଳକୁ ଆସନ୍ତା 8 ପର୍ଯ୍ୟନ୍ତ ବନ୍ଦ ରଖାଯାଇଛି ।

ଜିଲ୍ଲାର ୬ ଟି ରୁଟରେ ଯାଉଥିବା ସମସ୍ତ ସରକାରୀ ବସ ଚଳାଚଳକୁ ବନ୍ଦ ରଖାଯାଇଥିବା ଓଏସଆଟିସି ସୂଚନା ଦେଇଛି । ପ୍ରତିବର୍ଷ ମାଓବାଦୀମାନେ ଡିସେମ୍ବର 2 ରୁ 8 ତାରିଖ ପର୍ଯ୍ୟନ୍ତ ପିଏଲଜିଏ ସପ୍ତାହ ପାଳନ କରନ୍ତି । ବିଶେଷ କରି ଯୁବକ ଓ ଯୁବତୀମାନଙ୍କୁ ସଂଗଠନରେ ସାମିଲ କରିବା ସହ ପୋଲିସ ଏନକାଉଣ୍ଟରରେ ମୃତ ମାଓବାଦୀଙ୍କୁ ଶ୍ରଦ୍ଧାଞ୍ଜଳି ଦେଇଥାଏ ସଂଗଠନ । ରାୟଗଡା ଜିଲ୍ଲାର କଲ୍ୟାଣସିଙ୍ଗପୁର ବ୍ଲକ ପାରସାଲି ପଞ୍ଚାୟତର ବିଭିନ୍ନ ସ୍ଥାନରେ କିଛିଦିନ ତଳେ ପୋଷ୍ଟର ମାରି ଏନେଇ ଉଲ୍ଲେଖ କରିଥିଲା ଲାଲ୍ ବାହିନୀ  ।