ନୂଆପଡ଼ା: କୋମନା ଥାନା ଅନ୍ତର୍ଗତ ବରକୋଟ ଗାଁରେ ଥିବା CRPF କ୍ୟାମ୍ପରେ ଅଘଟଣ । ନିଜ ସର୍ଭିସ ବନ୍ଧୁକରୁ ଗୁଳିକରି ଆତ୍ମହତ୍ୟା କଲେ ଯବାନ । ମୃତ ଯବାନ ହେଲେ ରାମ ପ୍ରତାପ । ଆତ୍ମହତ୍ୟାର କାରଣ ଅସ୍ପଷ୍ଟ ଥିବା ବେଳେ, ଘଟଣାସ୍ଥଳରେ ତଦନ୍ତ ଆରମ୍ଭ କରିଛନ୍ତି ବରିଷ୍ଠ ଅଧିକାରୀ । କାହିଁକି ଯବାନ ଜଣଙ୍କ ଆତ୍ମହତ୍ୟା କରିଲେ ତାହାର କାରଣ ଅସ୍ପଷ୍ଟ ଥିବାବେଳେ ପୋଲିସ ଏବଂ କ୍ୟାମ୍ପର ବରିଷ୍ଠ ଅଧିକାରୀ କାରଣ ଖୋଜୁଛନ୍ତି ।
କଟକରେ ବେଆଇନ ଭ୍ରୁଣ ଚିହ୍ନଟ ଅଭିଯୋଗ ପରେ ଚଢାଉ
କଟକ: କାଠଗୋଲା ସାହିରେ ଥିବା ଏକ ଘରୋଇ ପାଥୋଲାବ ଓ ଡାଇଗ୍ନୋଷ୍ଟିକ ସେଣ୍ଟର ଉପରେ ପୋଲିସ ଚଢ଼ାଉ କରିଛି । ଏଠାରେ ବେଆଇନ ଭାବେ ଭ୍ରୁଣ ଚିହ୍ନଟ ହେଉଥିବା ଅଭିଯୋଗ ପରେ ଚଢାଉ କରିଛି ପୋଲିସ । ଜୋନ-୨ ଏସିପିଙ୍କ ନେତୃତ୍ଵରେ ପୋଲିସ ଟିମ ଚଢାଉ କରିଛି । ପାଥୋଲାବ ଓ ଡାଇଗ୍ନୋଷ୍ଟିକ ସେଣ୍ଟରର ବିଭିନ୍ନ କାଗଜପତ୍ର ଓ ମେସିନ ଯାଞ୍ଚ କରାଯାଉଛି ।
ସୂଚନା ଅନୁସାରେ ଘରୋଇ ପାଥୋଲାବ ଓ ଡାଇଗ୍ନୋଷ୍ଟିକ ସେଣ୍ଟରକୁ ଡାକ୍ତର ଆସିବା ନେଇ ଯେଉଁ ସୂଚନା ଦିଆଯାଇଥିଲା ତାହା ଭୁଲ ଥିଲା । ତେବେ ଏହି ସେଣ୍ଟରରେ ଯେଉଁ ବ୍ୟକ୍ତି ଭ୍ରୁଣ ଚିହ୍ନଟ କରୁଥିଲେ ସେ ମାତ୍ର ଯୁକ୍ତ ଦୁଇ ପର୍ଯ୍ୟନ୍ତ ପଢିଛନ୍ତି । ତେବେ ଏହି ଯାଞ୍ଚ ପାଇଁ ସେମାନେ ୫ହଜାର ଟଙ୍କା ନେଉଥିବା ମଧ୍ୟ ଅଭିଯୋଗ ହୋଇଛି । ଏନେଇ ୨ ଜଣଙ୍କୁ ଅଟକ ରଖାଯାଇଛି । ଏହାସହ ସବୁ ଜିଲ୍ଲାରେ ଦଲାଲ କାମ କରୁଥିବା ମଧ୍ୟ ଜଣାପଡ଼ିଛି ।
ଗାଁ ମଣାଶିରେ ହେଲା ସହିଦ ଯବାନଙ୍କ ଶେଷକୃତ୍ୟ ସମ୍ପନ୍ନ
ଗଜପତି: ପୌତୃକ ଗାଁ ଗଜପତି ଜିଲ୍ଲା କୁରୁବୁଗାରେ ଶହୀଦ ଯବାନ ପର୍ଶୁରାମ ଶବରଙ୍କ ହୋଇଛି ଶେଷକୃତ୍ୟ ସମ୍ପନ୍ନ । ବିହାରର ବିରପୁର ସେନାବାହିନୀର ତାଲିମ କେନ୍ଦ୍ରରେ ତାଲିମ ନେଉଥିବା ସମୟରେ ଗତ ୧୪ ତାରିଖରେ ବିଦ୍ୟୁତ ଆଘାତରେ ତାଙ୍କର ମୃତ୍ୟୁ ହୋଇଥିଲା । ସୋମବାର ସକାଳୁ ସହିଦ ଯବାନ ପର୍ଶୁରାମ ଶବରଙ୍କ ରାଷ୍ଟ୍ରୀୟ ସମ୍ମାନ ସହ ହୋଇଛି ଶେଷକୃତ୍ୟ ସମ୍ପନ୍ନ । ଗଜପତି ଜିଲା ରାୟଗଡ ବ୍ଲକର କୁରୁଗୁଵା ଗାଁର ପର୍ଶୁରାମ ଶବର ସେନାରେ ଚାକିରୀ ପାଇବା ପରେ ନିଜ ପରିବାର ସହ ଗାଁ ଲୋକେ ବେଶ ଖୁସିଥିଲେ ।
ଗତ ଶୁକ୍ରବାର ଦିନ ବିହାରର ବିରପୁର ସେନା ତାଲିମ କେନ୍ଦ୍ରରେ ଘଟିଥିଲା ଦୁର୍ଘଟଣା । ତାଲିମ କେନ୍ଦ୍ର ଦେଇ ଯାଇଥିବା ହାଇ ଭୋଲ୍ଟେଜ ତାର ଛିଣ୍ଡି ଯିବାରୁ ୧୪ ଜଣ ସେନା କର୍ମଚାରୀ ଆହତ ହୋଇଥିଲେ। ଘଟଣାସ୍ଥଳରେ ୩ ସେନାଙ୍କ ମୃତ୍ୟୁ ହୋଇଥିବା ବେଳେ ସେମାନଙ୍କ ମଧ୍ୟରେ କୁରୁବୁଗା ଗାଁର ପର୍ଶୁରାମ ଶବରଙ୍କ ମଧ୍ୟ ମୃତ୍ୟୁ ହୋଇଥିଲା। ତାଙ୍କ ମୃତ୍ୟୁ ଖବର ଗଜପତି ପ୍ରଶାସନ ତରଫରୁ ପରିବାର ବର୍ଗଙ୍କୁ ଜଣାଇବା ପରେ ପରିବାର ଲୋକେ ଭାଙ୍ଗି ପଡିଥିଲେ। ଗାଁର ବୀର ପୁଅଙ୍କ ମୃତ୍ୟୁ ଘଟଣାକୁ ସହଜରେ ଗ୍ରହଣ କରିପାରି ନାହାଁନ୍ତି ଅଞ୍ଚଳବାସୀ। ଗତକାଲି ବିଳମ୍ବିତ ରାତିରେ ମୃତଦେହ ଗାଁ ରେ ପହଁଞ୍ଚିବା ପରେ ଆଜି ସକାଳୁ ରାଷ୍ଟ୍ରୀୟ ମର୍ଯ୍ୟାଦାରେ ପର୍ଶୁରାମଙ୍କ ଶେଷକୃତ୍ୟ ସଂପନ୍ନ କରାଯାଇଛି ।
ସେପଟେ ବୀର ଯବାନଙ୍କୁ ଶେଷ ଶ୍ରଦ୍ଧାଞ୍ଜଳୀ ଜଣାଇବା ପାଇଁ ରାସ୍ତାରେ ଶହ ଶହ ଲୋକ ପୁଷ୍ପାଞ୍ଜଳି ପ୍ରଦାନ କରୁଥିଲେ । ଜିଲ୍ଲା ଜଣେ ବୀରପୁତ୍ରକୁ ହରାଇଛି । ପ୍ରଶାସନ ତରଫରୁ ଉପସ୍ଥିତ ଅଧିକାରୀମାନେ ଦୁଃଖ ପ୍ରକାଶ କରିଛନ୍ତି । ଗତ 14 ତାରିଖର ଘଟଣାକୁ ବଖାଣି ଥିଲେ ମରଶରୀରକୁ ଘରେ ପହଞ୍ଚାଇବାକୁ ଆସିଥିବା ସେନା ଅଧିକାରୀ। ନିଜ ଯବାନକୁ ହରାଇ ଦୁଃଖ ପ୍ରକାଶ କରିଛନ୍ତି ଅଧିକାରୀ ।
ନାମାଙ୍କନ ପାଇଁ ମାର୍ଗଦର୍ଶିକା ଜାରି
ଭୁବନେଶ୍ୱର: ନାମାଙ୍କନ ଦାଖଲ ପାଇଁ ପ୍ରାର୍ଥୀଙ୍କ ପାଇଁ ମାର୍ଗଦର୍ଶିକା ଜାରି ହୋଇଛି । ନାମାଙ୍କନ ବେଳେ ପ୍ରାର୍ଥୀ, ସମର୍ଥକ କୋଭିଡ୍ ଗାଇଡ୍ଲାଇନ୍ ମାନିବେ । ପ୍ରାର୍ଥୀଙ୍କ ସହ ଜଣେ ପ୍ରସ୍ତାବକ ନିର୍ବାଚନ ଅଧିକାରୀଙ୍କ ପ୍ରକୋଷ୍ଠକୁ ଯିବେ । ୱାର୍ଡ ମେମ୍ବରଙ୍କ ବ୍ୟତୀତ ଅନ୍ୟ ପ୍ରାର୍ଥୀ ଗୋଟିଏ ଗାଡ଼ି ବ୍ୟବହାର କରି ପାରିବେ । ପ୍ରଚାର ପାଇଁ ପଦଯାତ୍ରା, ବାଇକ୍ ଶୋଭାଯାତ୍ରା ମନା ।
ସେହିଭଳି ପ୍ରାର୍ଥୀ ମାନେ ନିର୍ବାଚନୀ ସମାବେଶ କରିପାରିବେ ନାହିଁ । କୌଣସି ରାଜନୈତିକ ଦଳ ଶୋଭାଯାତ୍ରା କରିବା ଉପରେ ଅଙ୍କୁଶ ଲଗାଇଛନ୍ତି । କୋଭିଡ୍ ସୁରକ୍ଷା ଦୃଷ୍ଟିରୁ ପ୍ରାର୍ଥୀ ଡିଜିଟାଲରେ ପ୍ରଚାର କରିବେ । ପ୍ରାର୍ଥୀଙ୍କୁ ମିଶାଇ ସର୍ବାଧିକ ୫ଜଣ ଘରକୁ ଘର ବୁଲି ପ୍ରଚାର କରିପାରିବେ । ସେହିପରି ଭୋଟ୍ ଗଣତି ପରେ ହେବନି ବିଜୟ ଶୋଭାଯାତ୍ରା ।
ବିଏସଏଫ ବାବୁଙ୍କ ଘରୁ ନଗଦ ୧୪ କୋଟି ଟଙ୍କା ଜବତ
ଚଣ୍ଡିଗଡ଼: ବିଏସଏଫ ବାବୁଙ୍କ ସମ୍ପତ୍ତି ଦେଖି ପୋଲିସ ଟେରା । ନଗଦ ୧୪ କୋଟି ଟଙ୍କା, କୋଟିଏ ଟଙ୍କାର ସୁନାଗହଣା, ସାତଟି ବିଳାଶପୂର୍ଣ୍ଣ କାର୍ ଜବତ । ଗିରଫ ବାବୁଜଣକ ହେଲେ ହରିଆଣା ମାନେସରରେ ଅବସ୍ଥାପିତ ସୀମା ସୁରକ୍ଷା ବଳର ଡେପୁଟି କମାଣ୍ଡାଣ୍ଟ ପ୍ରବୀଣ ଯାଦବ । ସେ ନ୍ୟାସନାଲ ସିକ୍ୟୁରିଟି ଗାର୍ଡ ବା ଏନଏସଜି ମୁଖ୍ୟାଳୟରେ କାର୍ଯ୍ୟରତ ଅଛନ୍ତି । ଲୋକଙ୍କଠାରୁ ୧୨୫ କୋଟି ଟଙ୍କା ଠକେଇ ଅଭିଯୋଗରେ ତାଙ୍କୁ ଗିରଫ କରିଛି ପୋଲିସ ।
ତେବେ ସେ ନିଜକୁ ଜଣେ ବରିଷ୍ଠ ଆଇପିଏସ ଅଫିସର ବୋଲି ପରିଚୟ ଦେଇ ସେ ଲୋକଙ୍କଠାରୁ ବିଭିନ୍ନ ଉପାୟରେ ଅର୍ଥ ଆଦାୟ କରୁଥିଲେ । ଏହି ଘଟଣାରେ ତାଙ୍କ ସ୍ତ୍ରୀ, ଉଭଣୀଙ୍କୁ ମଧ୍ୟ ଗିରଫ କରାଯାଇଛି । ଏନଏସଜି କ୍ୟାମ୍ପସରେ ବିଭିନ୍ନ ନିର୍ମାଣ କାମ କରାଇଦେବା ନାମରେ ସେ ଲୋକଙ୍କଠାରୁ ଅର୍ଥ ଆଦାୟ କରୁଥିଲେ ଏବଂ ଏହି ଅର୍ଥ ତାଙ୍କ ଭଉଣୀଙ୍କ ନାମରେ ଖୋଲାଯାଇଥିବା ଆକାଉଣ୍ଟରେ ଜମା କରିବାକୁ କହୁଥିଲେ । ଷ୍ଟକ ମାର୍କେଟର ନିବେଶ କରି ପ୍ରବୀଣ ୬୦ ଲକ୍ଷ ଟଙ୍କା କ୍ଷତି ସହିବା ପରେ ତାଙ୍କ ମୁଣ୍ଡକୁ ଠକିବା ଉପାୟ ଆସିଥିଲା ଏବଂ ଲୋକଙ୍କୁ ଠକିବା ଲାଗି ଯୋଜନା କରିଥିଲେ ବୋଲି କହିଛନ୍ତି ଗୁରୁଗ୍ରାମ ପୋଲିସ ଏସିପି କ୍ରାଇମ – ପ୍ରୀତ ପାଲ ସିଂହ ।
କିଛି ଦିନ ତଳେ ତାଙ୍କ ବଦଳି ଅଗରତାଲାକୁ ହୋଇଥିଲା ମାତ୍ର ସେ ଚାକିରିରୁ ଇସ୍ତଫା ଦେଇଥିଲେ । ପୋଲିସ ତାଙ୍କ ନିକଟରୁ ୧୪ କୋଟି ଟଙ୍କା, କୋଟିଏ ଟଙ୍କାର ସୁନାଗହଣା, ମର୍ସିଡିଜ, ବିଏମଡବ୍ଲୁ, ଜିପ୍, ହଣ୍ଡା ସମେତ ୭ଟି ବିଳାଶପୂର୍ଣ୍ଣ କାର୍ ଜବତ କରିଛି ।
କମିଛି ସଂକ୍ରମଣର ଡବଲିଂ ଟାଇମ: ଜନସ୍ୱାସ୍ଥ୍ୟ ନିର୍ଦ୍ଦେଶକ
ଭୁବନେଶ୍ୱର: କମିଛି ସଂକ୍ରମଣର ଡବଲିଂ ଟାଇମ । ଏହାସହ ଗ୍ରୋଥ ରେଟ ବି ହ୍ରାସ ପାଇଛି । ବର୍ତ୍ତମାନ ରାଜ୍ୟରେ ୭୫ ହଜାର ଆକ୍ଟିଭ କେସ୍ ଥିବା ବେଳେ ମାତ୍ର ୧୨୦୦ ହସ୍ପିଟାଲାଇରେ ଭର୍ତ୍ତି ହୋଇଛନ୍ତି । ହସ୍ପିଟାଲ ଉପରେ କିଛି ଚାପ ନାହିଁ । ଆଜି ସଂକ୍ରମଣ କମ୍ ଥିଲେ ବି ଏହି ଟ୍ରେଣ୍ଡକୁ ଦେଖି ବର୍ତ୍ତମାନ କିଛି ଆକଳନ କରିହେବନି । ଟ୍ରେଣ୍ଡ ଆକଳନ ପାଇଁ ମାସେ ପର୍ଯ୍ୟନ୍ତ ଅପେକ୍ଷା କରିବାକୁ ପଡିବ ବୋଲି ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର କହିଛନ୍ତି ।
ଦ୍ୱିତୀୟ ଲହର ପରି ତୃତୀୟ ଲହରରେ ମଧ୍ୟ ଖୋର୍ଦ୍ଧା ଓ ସୁନ୍ଦରଗଡ଼ ଜିଲ୍ଲାରେ ସଂକ୍ରମଣ ଅଧିକ ରହୁଛି । ଏହାସହ ଆଜି ଆସୁଛି ଓମିସିୟୋର କିଟ୍ । ଆରଟି-ପିସିଆର କିଟ ପରି ଏହି କିଟ ସବୁ ଜିଲ୍ଲାକୁ ବଣ୍ଟାଯିବ । ଔଷଧ ନିଗମ ଏ ନେଇ ତଥ୍ୟ ଦେବ । ଥଣ୍ଡା କାଶ ହେଲେ ନିଜକୁ ଆଇସୋଲେଟ କରି ରଖିବା ସହ ଟେଷ୍ଟ କରିବାକୁ ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର ପରାମର୍ଶ ଦେଇଛନ୍ତି । ଅଯଥା କୌଣସି ଔଷଧ ନଖାଇ ବିଶେଷଜ୍ଞଙ୍କ ପରାମର୍ଶ କ୍ରମେ ଔଷଧ ଖାଆନ୍ତୁ ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର ।
ବ୍ଲକ ବଷ୍ଟର ଫିଲ୍ମ ପୁଷ୍ପାରେ ଓଡ଼ିଆ ପୁଅଙ୍କ କମାଲ
ଭୁବନେଶ୍ୱର: ଆଲୁ ଅର୍ଜୁନଙ୍କ ବ୍ଲକ ବଷ୍ଟର ଫିଲ୍ମ ପୁଷ୍ପାରେ କମାଲ କରିଛନ୍ତି ଓଡ଼ିଆ ପୁଅ । ଏହି ଫିଲ୍ମଟି ବଲିଉଡ଼କୁ ପଛରେ ପକାଇଛି । ଫିଲ୍ମ ରିଲିଜ ହେବାର ମାତ୍ର ୨୬ ଦିନରେ ୩୨୫ କୋଟି ଟଙ୍କାର ବ୍ୟବସାୟ କରି ହିଟ୍ ସାବ୍ୟସ୍ତ ହୋଇଛି । ଆଉ ଏହି ତେଲୁଗୁ ଫିଲ୍ମ ‘ପୁଷ୍ପା’ରେ ନଜର ଆସିଛନ୍ତି ବରଗଡ଼ର ରାମକ୍ରିଷ୍ଣା ଓରଫ ଶତ୍ରୁ ।
ରାମକ୍ରିଷ୍ଣାଙ୍କ ଏହି ଉଚ୍ଚକୋଟୀର ଅଭିନୟ ଲାଗି ବିଭିନ୍ନ ସ୍ତରରୁ ପ୍ରଶଂସାର ସୁଅ ଛୁଟୁଥିବା ବେଳେ ବରଗଡ଼ବାସୀଙ୍କୁ ଉତ୍ସାହିତ କରିଛି । ଶତ୍ରୁ ଫିଲ୍ମରେ ପୋଲିସ ଇନିସପେକ୍ଟର ଗୋବିନ୍ଦାପ୍ପା ଭୂମିକାରେ ଅଭିନୟ କରିଛନ୍ତି । ରାମକ୍ରିଷ୍ଣାଙ୍କ ଘର ବରଗଡ ସଦର ବ୍ଲକ ସର୍ଲା ଗାଁରେ । ଚାଷୀ ପରିବାର ରାମକ୍ରିଷ୍ଣା ଗୋଡ଼ଭଗା କୋଶଳ ସ୍କୁଲରେ ପାଠ ପଢିଥିଲେ । ପରେ ରେଭେନ୍ସା କଲେଜରୁ ମାଇକ୍ରୋ ବାଇଲୋଜିରେ ସ୍ନାତକ ପରେ ହାଇଦ୍ରାବାଦ ପଳାଇଥିଲେ । ସେଠାରେ ହିଁ ଆରମ୍ଭ ହୋଇଥିଲା ତାଙ୍କ ଅଭିନୟ କ୍ୟାରିଅର । ପୂର୍ବରୁ ବାହୁବଳୀ-୨ରେ ପିଣ୍ଡାରା ରୋଲରେ ଅଭିନୟ କରି ମଧ୍ୟ ସେ ସାଉଣ୍ଟିଥିଲେ ପ୍ରଶଂସା ।
ଅନ୍ୟପଟେ ‘ପୁଷ୍ପା: ଦ ରାଇଜ୍’କୁ ନେଇ ଅଲ୍ଲୁ ଅର୍ଜୁନ୍ ଓ ରଶ୍ମିକା ମନ୍ଦାନା ଗତ କିଛି ଦିନ ହେଲାଣି ଚର୍ଚ୍ଚାରେ ରହିନ୍ତି । କୁହାଯାଉଛି ଯେ, ଫିଲ୍ମର ନାୟିକା ରଶ୍ମିକା ମନ୍ଦାନା ଦ୍ୱିତୀୟ ପାର୍ଟ ‘ପୁଷ୍ପା: ଦ ରୁଲ୍’ ପାଇଁ ନିଜ ଫିସ୍ ବଢ଼ାଇ ୨ରୁ ୩ କୋଟି ଡିମାଣ୍ଡ କରିଛନ୍ତି ।
ସୁକୁମାରଙ୍କ ନିର୍ଦ୍ଦେଶନାରେ ନିର୍ମିତ ଏହି ଫିଲ୍ମର ସଫଳତାକୁ ଦେଖି ଏହାର ସିକ୍ୱେଲ ତିଆରି କରିବା ନେଇ ଚର୍ଚ୍ଚା ଚାଲିଛି । କୁହାଯାଉଛି ଯେ ଅଲ୍ଲୁ ଅର୍ଜୁନୁଙ୍କ ଏହି ଫିଲ୍ମ ପାଇଁ ଫିସ୍ ବାବଦକୁ ୫୦ କୋଟି ଟଙ୍କା ମିଳିଛି ।
ବାଲିଅନ୍ତାରେ ଫୁଟିଲା ବୋମା, ଉଡ଼ିଗଲା ଘରର ଟିଣ
ଭୁବନେଶ୍ୱର: ରାଜଧାନୀ ଉପକଣ୍ଠ ବାଲିଅନ୍ତାରେ ଫୁଟିଲା ବୋମା । ଜାଗାବାଡ଼ିକୁ କେନ୍ଦ୍ର କରି ରାଜଧାନୀ ଉପକଣ୍ଠରେ ବୋମାମାଡ଼ । ବାଲିଅନ୍ତା ଥାନା ସରକଣାରେ ହୋଇଥିବା ଏହି ବୋମାମାଡରେ ଉଡ଼ିଗଲା ଘରର ଟିଣ । ସୂଚନା ମୁତାବକ ଜାଗା ବିକ୍ରି ବାବଦ କମିଶନ ଟଙ୍କାକୁ ନେଇ ଘଟିଛି ଏହି ଘଟଣା । ବୋମା ଫିଙ୍ଗି ଗଣ୍ଡଗୋଳ କରିଛନ୍ତି କିଛି ଦୁର୍ବୁତ୍ତ । ସେପଟେ ଅଭିଯୋଗ ପାଇବା ପରେ ଘଟଣାସ୍ଥଳରେ ବାଲିଅନ୍ତା ପୋଲିସ ପହଁଚି ତଦନ୍ତ ଆରମ୍ଭ କରିଛି ।
ଟେଷ୍ଟରୁ ବିରାଟ ଅଧିନାୟକତ୍ୱ ଛାଡ଼ିବା ପରେ ସୋସିଆଲ ମିଡ଼ିଆରେ କିିଛି ଏମିତି ଲେଖିଲେ ଅନୁଷ୍କା
ଟେଷ୍ଟରୁ ବିରାଟ ଅଧିନାୟକତ୍ୱ ଛାଡ଼ିବା ପରେ ତାଙ୍କର ଅନେକ ପ୍ରଶଂସକଙ୍କ ନିରାଶ ହୋଇଛନ୍ତି । ଏବଂ ବିରାଟଙ୍କ ଏହି ନିଷ୍ପତ୍ତି ପରେ ପତ୍ନୀ ଅନୁଷ୍କା ମଧ୍ୟ ପୁରୁଣା ସ୍ମୃତିକୁ ମନେ ପକାଇଛନ୍ତି । ଏବଂ ବିରାଟ କୋହଲିଙ୍କ ପାଇଁ ସୋସିଆଲ ମିଡ଼ିଆରେ ଏକ ଭାବପୂର୍ଣ୍ଣ ଚିଠି ଲେଖିଛନ୍ତି । ଇନଷ୍ଟାଗ୍ରାମରେ ସ୍ୱାମୀ ବିରାଟ କୋହଲିଙ୍କୁ ଚିଠି ଲେଖି ଅନୁଷ୍କା ମନେ ପକାଇଛନ୍ତି ତାଙ୍କ ପୁରୁଣା ଦିନର ସ୍ମୃତିକୁ ।
ଶନିବାର ଟେଷ୍ଟରୁ ଅଧିନାୟକତ୍ୱ ଛାଡ଼ିଛନ୍ତି ବିରାଟ କୋହଲି । ଏହାପରେ ଅନୁଷ୍କା ତାଙ୍କ ପୋଷ୍ଟରେ ୨୦୧୪ ର ସେହି ଦିନକୁ ମନେ ପକାଇଛନ୍ତି, ଯେଉଁଦିନ ବିରାଟଙ୍କୁ ଟେଷ୍ଟ ଟିମ୍ର ଅଧିକନାୟକ ଦାୟୀତ୍ୱ ଦିଆଯାଇଥିଲା । ସେ ଲେଖିଛନ୍ତି, ମୋର ୨୦୧୪ର ସେହି ଦିନ ମନେଅଛି, ଯେଉଁଦିନ ତୁମେ ମତେ କହିଥିଲ ମତେ ଅଧିନାୟକ କରିଦିଆଯାଇଛି । ସେହି ସମୟରେ ଏମଏସ ଧୋନୀ ଟେଷ୍ଟ କ୍ରିକେଟରୁ ସନ୍ୟାସ ନେବା ପାଇଁ ନିଷ୍ପତ୍ତି ନେଇଥିଲେ । ସେହିଦିନ ଧୋନୀ, ତୁମେ ଏବଂ ମୁଁ ଏକାସାଙ୍ଗରେ କଥା ହୋଇଥିଲେ , ଏବଂ ଧୋନୀ ମଜାକରେ କହିଥିଲେ ଯେ, ଦେଖିବ ତୁମ ଦାଢ଼ି ଖୁବଶୀଘ୍ର ଧଳା ହୋଇଯିବ । ଏହି କଥାରେ ଆମେ ସେଦିନ ବହୁତ୍ ହସିଥିଲେ ମଧ୍ୟ ।
ସେ ଲେଖିଛନ୍ତି ଯେ, ଅଧିନାୟକ ବିରାଟ କୋହଲି ଏବଂ ଟିମ୍ ଇଣ୍ଡିଆ ଯାହା ହାସିଲ କରିଛନ୍ତି, ସେଥିପାଇଁ ମୁଁ ଗର୍ବିତ । ସେହିଦିନ ଠାରୁ ତୁମ ଦାଢ଼ି ଧଳା ହେବା ସହିତ ମୁଁ ଅନେକ କିଛି ଦେଖିଛି । ମୁଁ ତୁମ ପାରିପାର୍ଶ୍ୱିକ ସ୍ଥିତି ସହିତ ତୁମ ଭିତରେ ଅନେକ ଉନ୍ନତି ଦେଖିଛି । ଭାରତୀୟ କ୍ରିକେଟ ଟିମ୍ର ଅଧିନାୟକ ଭାବରେ ତୁମେ ଏବଂ ପୂରା ଟିମ୍ ଯେଉଁ ଉପଲବ୍ଧି ହାସଲ କରିଛି , ସେଥିପାଇଁ ମୁଁ ଗର୍ବିତ । ୨୦୧୪ରେ ଆମେ ସବୁ ଛୋଟ ଥିଲେ, ସେତେବେଳେ ଆମକୁ ଲାଗୁଥିଲା କି, ଭଲ ଉଦ୍ଦେଶ୍ୟ, ସକରାତ୍ମକ ଚିନ୍ତାଧାରା ଏବଂ ଲକ୍ଷ ତୁମକୁ ଜୀବନରେ ଆଗକୁ ନେବା ପାଇଁ ଯଥେଷ୍ଟ । ଜୀବନରେ ଆଗକୁ ବଢ଼ିବାକୁ ହେଲେ ଏହି ସବୁ ଜିନିଷର ନିହାତି ଆବଶ୍ୟକ ରହିଛି ।
ଅନୁଷ୍କା ଆଗକୁ ଲେଖିଛନ୍ତି ଯେ,’ବହୁତ ଚ୍ୟାଲେଞ୍ଜକୁ ତୁମେ ସାମ୍ନା କରିଛ, ମୈଦାନ ଉପରେ ହେଉ ବା ବାସ୍ତବିକ ଜୀବନରେ , ତୁମେ ସବୁବେଳେ ସବୁ ସମୟରେ ସମସ୍ତ ପରିସ୍ଥିତିକୁ ସାମ୍ନା କରି ସଫଳତା ହାସଲ କରିଛ, କାରଣ ଏଇ ତ ଜୀବନ ! ତୁମେ ଯେଉଁଭଳି ଭାବରେ ଦଳର ନେତୃତ୍ୱ ନେଇଛ ଏବଂ ଦଳକୁ ଜିତାଇବା ପାଇଁ ମୈଦାଦ ଉପରେ ଝାଳ ବୁହାଇଛ ଏବଂ ପରିଶେଷରେ ଜିତିଛ , ଆଉ ମଧ୍ୟ କେତକ ପରାଜୟ ପରେ ତୁମ ଆଖିର ସେହି ଲୁହକୁ ମୁଁ ଦେଖିଛି । ସେତେବେଳେ ତୁମେ ଭାବୁ ଥାଅ ଆଉ କିଛି ତୁମ ହାତରେ ରହିଯାଇଛି କି ଯାହା ଟିମ୍ କୁ ଜିତାଇ ପାରିବ । ତୁମେ ମୋ ପାଖରେ ବସିଥିବା ବେଳେ ମୁଁ ସବୁକୁ ଅନୁଭବ କରିଛି । ଏହି କାରଣରୁ ତୁମେ ସମସ୍ତଙ୍କଠାରୁ ଭିନ୍ନ ଲାଗ ।
ଅନୁଷ୍କା ଆହୁରି ମଧ୍ୟ ଲେଖିଛନ୍ତି ଯେ, ତୁମେ ସବୁବେଳେ ନିଚ୍ଛକ ରହିଛ ଲୋକ ଦେଖାଣିଆକୁ ତୁମେ ଭଲପାଅନାହିଁ । । ତୁମେ ଯାହା ଦୁନିଆ ଆଗରେ ସେୟା ହିଁ ଦେଖାଅ । ତୁମର ଏହି ସ୍ୱଭାବ ମୋ ଆଖିରେ ତୁମକୁ ମହାନ କରିଥାଏ । ତୁମେ ପୂର୍ଣ୍ଣ ନୁହେଁ ତୁମ ପାଖରେ ମଧ୍ୟ ଅନେକ ଦୋଶ ଦୂର୍ବଳାତା ରହିଛି କିନ୍ତୁ ତୁମେ ସେଗୁଡ଼ିକୁ କେବେ ଲୁଚାଇବାକୁ ଚେଷ୍ଟା କରିନାହଁ । ଯାହା ବି କିଛି କରିଛ ସମସ୍ତଙ୍କ ଭଲ ପାଇଁ କରିଛ । ମୁଁ ଜାଣିଛି ତୁମେ ସବୁ ବେଳେ ଏହି ପଦବୀର ସମ୍ମାନ କରିଛ । ଆଉ ଆମ ଝିଅ ତା ବାପର ଏହି ୭ବର୍ଷର ଯାତ୍ରାରୁ କିଛି ଶିକ୍ଷିବ । ତୁମେ ବହୁତ ଭଲ କରିଛ ।
ପତ୍ନୀ ଅନୁଷ୍କା ବିରାଟଙ୍କ ସେହି ପୁରୁଣା ଦିନରେ ସ୍ମୃତିକୁ ମନପକାଇ ଇନଷ୍ଟାଗ୍ରାମରେ ୪୦୦ଶବ୍ଦ କିଛି ଏମିତି ଲେଖିଛନ୍ତି । ତାଙ୍କର ପ୍ରତ୍ୟେକ ବିରାଟଙ୍କ ପ୍ରତି ଥିବା ଭଲପାଇବା ଏବଂ ସମ୍ମାନକୁ ସେ ସୋସିଆଲ ମିଡ଼ିଆରେ ସେୟାର କରିଛନ୍ତି ।
ରାଜ୍ୟରେ ଦିନକରେ ୧୦ହଜାର ୪୮୯ ସଂକ୍ରମିତ ଚିହ୍ନଟ
ଭୁବନେଶ୍ୱର: ରାଜ୍ୟରେ ସାମାନ୍ୟ କମିଛି କରୋନା ସଂକ୍ରମଣ । ଦିନକରେ ୧୦ହଜାର ୪୮୯ ସଂକ୍ରମିତ ଚିହ୍ନଟ ହୋଇଥିବା ବେଳେ ଶୂନରୁ ୧୮ ବର୍ଷ ବୟସର ୯୮୨ ଆକ୍ରାନ୍ତ ଚିହ୍ନଟ ହୋଇଛନ୍ତି । କ୍ୱାରେଣ୍ଟାଇନରୁ ୬୦୮୨, ସ୍ଥାନୀୟ ସଂକ୍ରମଣ ୪୪୦୭ ରହିଛି । ଖୋର୍ଦ୍ଧାରେ ସର୍ବାଧିକ ସଂକ୍ରମିତଙ୍କ ସଂଖ୍ୟା ୨୯୩୪, ସୁନ୍ଦରଗଡ଼ରୁ ୧୪୪୭, କଟକରୁ ୭୮୬ ସଂକ୍ରମିତ ଚିହ୍ନଟ ହୋଇଛନ୍ତି ।
ସେହିପରି କଟକରୁ ୭୮୬, ,ଷ୍ଟେଟପୁଲରୁ ୭୦୭, ବାଲେଶ୍ବରରୁ ୪୩୩, ସମ୍ବଲପୁରରୁ ୩୮୭, ମୟୂରଭଞ୍ଜରୁ ୩୮୩, ରାୟଗଡ଼ାରୁ ୨୫୩, ବଲାଙ୍ଗୀରରୁ ୨୩୮, ଝାରସୁଗୁଡାରୁ ୨୨୫, ଜଗତସିଂହପୁରରୁ ୨୦୭, ପୁରୀରୁ ୧୯୮, ଯାଜପୁରରୁ ୧୯୫, ନୟାଗଡ଼ରୁ ୧୯୩, ବରଗଡ଼ରୁ ୧୬୬, ସୋନପୁର ଓ କଳାହାଣ୍ଡିରୁ ୧୬୩ଜଣ ଲେଖାଏ, କୋରାପୁଟରୁ ୧୬୨, ନବରଙ୍ଗପୁରରୁ ୧୫୯, ଅନୁଗୁଳରୁ ୧୫୮, ଭଦ୍ରକରୁ ୧୧୮, ଗଜପତିରୁ ୧୦୯, ନୂଆପଡାରୁ ୧୦୮, କେନ୍ଦୁଝରରୁ ୧୦୫, ଗଞ୍ଜାମରୁ ୯୨, କେନ୍ଦ୍ରାପଡାରୁ ୯୦, ବୌଦ୍ଧରୁ ୮୫, ଢେଙ୍କାନାଳରୁ ୭୦, କନ୍ଧମାଳରୁ ୫୬, ମାଲକାନଗିରିରୁ ୫୫, ଦେବଗଡ଼ରୁ ୪୪ ସଂକ୍ରମିତ ଚିହ୍ନଟ ହୋଇଛନ୍ତି । ୨୪ ଘଣ୍ଟାରେ ସୁସ୍ଥ ହୋଇଛନ୍ତି ୪୪୫୨ଆକ୍ରାନ୍ତ ।