କେନ୍ଦୁଝର: କେନ୍ଦୁଝର ଜିଲ୍ଲା ବାମେବାରୀ ଥାନା କନକନା ଗାଁରେ ଅଘଟଣ । କନକନା ଗାଁ ରାସ୍ତା କାମ ଚାଲୁଥିବା ବେଳେ ପିଚୁ କଡ଼େଇରେ ପଡ଼ିଗଲେ ୩ ଜଣ ପିଲା । ଗୁରୁତର ଅବସ୍ଥାରେ ଛୁଆଙ୍କୁ ଉଦ୍ଧାର କରିଛନ୍ତି ଗାଁ ଲୋକ ।
ସୂଚନା ଅନୁସାରେ କନକନା ଗାଁର ରାସ୍ତା କାମ ଚାଲୁଥିବା ବେଳେ ଗତକାଲି ହୋଲି ପାଇଁ ରାସ୍ତା କାମ ବନ୍ଦ ଥିଲା । ଆଜି ସକାଳୁ ପିଲା ଖେଳୁଥିବା ବେଳେ ରାସ୍ତାକଡ଼ରେ ଥିବା ପିଚୁ କଡ଼େଇରେ ପଡ଼ି ଯାଇଥିଲେ । ପିଲାଙ୍କୁ ଉଦ୍ଧାର କରି ଦେହରୁ ପିଚୁ ଛଡ଼ାଇବାକୁ ଚେଷ୍ଟା କରୁଛନ୍ତି ଲୋକ । ସୌଭାଗ୍ୟବଶତଃ ରାସ୍ତା କାମ ବନ୍ଦଥିବାରୁ ପିଚୁ କଡ଼େଇ ଗରମ ନଥିବାରୁ ପିଲାଙ୍କ ବିଶେଷ କ୍ଷୟକ୍ଷତି ହୋଇନାହିଁ ।
କଟକ: କଟକ ଜିଲ୍ଲା ନିଆଳିରେ ବୋମାମାଡ଼ । କଟକ ଜିଲ୍ଲା ଗୋବିନ୍ଦପୁର ଥାନା ଅଧିନ ବ୍ରାହ୍ମଣବାଟି ପଞ୍ଚାୟତର ସରପଞ୍ଚ ସଞ୍ଜୟ କୁମାର ରାଉତରାୟଙ୍କ ଘର ଉପରକୁ ବୋମାମାଡ଼ ଅଭିଯୋଗ ହୋଇଛି । ବୋମାମାଡ଼ କରି ଦୁର୍ବୃତ୍ତ ଫେରାର ହୋଇଯାଇଛନ୍ତି । ଗତକାଲି ବିଳମ୍ବିତ ରାତିରେ କେହି ଦୁର୍ବୃତ୍ତ ବୋମାମାଡ଼ କରିଛି । ତେବେ ଏଥିରେ କୌଣସି କ୍ଷୟକ୍ଷତି ହୋଇନାହିଁ । ନିର୍ବାଚନକୁ ନେଇ ଏପରି ଘଟିଥିବା ସନ୍ଦେହ କରାଯାଉଛି । ନିର୍ବାଚନ ଫଳାଫଳ ପରେ ଉଭୟ ପକ୍ଷ ମଧ୍ୟରେ ହାର ଜିତକୁ ନେଇ ଛକା ପଂଝା ଲାଗି ରହିଥିଲା । ତେଣୁ ବୋମାମାଡ଼ ସରପଞ୍ଚଙ୍କ ଘର ଉପରକୁ ବୋମାମାଡ଼ ହୋଇଛି ବୋଲି ସନ୍ଦେହ କରାଯାଉଛି ।
ନବ ନିର୍ବାଚିତ ସରପଞ୍ଚ ପ୍ରାର୍ଥୀ ସଞ୍ଜୟ କୁମାର ରାଉତରାୟଙ୍କ ଘର ଉପରକୁ କିଏ ଓ କାହିଁକି ବୋମାମାଡ଼ କରିଛି ସେନେଇ ତଦନ୍ତ ଜାରି ରଖିଛି ପୋଲିସ । ଏହା ପୂର୍ବରୁ ମଧ୍ୟ କିଛି ଦୁର୍ବୃତ୍ତ ପଞ୍ଚାୟତ କାର୍ଯ୍ୟାଳୟରେ ଭଙ୍ଗାରୁଜା କରିଥିବା ଅଭିଯୋଗ ହୋଇଥିଲା । ବାରମ୍ବାର ଏପରି ଦୁର୍ବୃତ୍ତମାନଙ୍କ ଆଚରଣ ପାଇଁ ସ୍ଥାନୀୟ ଅଞ୍ଚଳରେ ଉତ୍ତେଜନା ଲାଗି ରହିଛି ।
ଇସଲମାବାଦ: ଉତ୍ତର ପାକିସ୍ତାନର ସିୟାଲକୋଟ ସହରରେ ଗୋଟିଏ ବଡ଼ ଧରଣର ବିସ୍ଫୋରଣ । ସୂଚନାଅନୁସାରେ ରବିବାର ସକାଳ ଏହି ବିସ୍ଫୋରଣ ପାକିସ୍ତାନୀ ସେନା ଶିବିର ପାଖରେ ହୋଇଛି । ଏହି ବିସ୍ଫୋରଣର ଶବ୍ଦ ଖୁବ ଭୟଙ୍କର ହୋଇଥିବା ଜଣାପଡ଼ିଛି । କାରଣ ଏହାର ଶବ୍ଦରେ ପୂରା ଅଞ୍ଚଳ ଫାଟିପଡ଼ିଥିଲା ।
ସୂଚନା ଅନୁସାରେ , ପ୍ରଥମେ ଗୁଳିଗୋଳାଥିବା ସ୍ଥାନରେ ନିଆଁ ଲାଗିଯାଇଥିଲା । କିଛି ସମୟ ପରେ ବିସ୍ଫୋରଣର ଶବ୍ଦ ଶୁଭି ଥିଲା । ଯଦିଓ ବିସ୍ଫୋରଣର ଅନ୍ୟ କିଛି କାରଣ ଜଣାପଡ଼ିନାହିଁ । କିନ୍ତୁ ଉତ୍ତର ପାକିସ୍ତାନର ସିୟାଲକୋଟରେ ସେନା ଶିବିର ଥିଲା । ଏଭଳି ପରିସ୍ଥିତିରେ ବିସ୍ଫୋରଣ କାରଣରୁ ବଡ଼ କ୍ଷୟକ୍ଷତିର ଆଶଙ୍କା କରାଯାଉଛି।
Something is Happening in #Sialkot
Cant #Sialkot pic.twitter.com/UsZ97NhW7M— MariA RazAa (@RazaaMaria) March 20, 2022
ଏହି ଘଟଣାର ଭିଡ଼ିଓ ସୋସିଆଲ ମିଡ଼ିଆରେ ଖୁବ ଭାଇରାଲ ହେଉଛି । ଏହି ଭିଡ଼ିଓକୁ ନେଇ ଦାବି କରାଯାଉଛି ଯେ ପୂର୍ବରୁ ଏଠାରେ ଅନେକ ବଡ଼ ବଡ଼ ବିସ୍ଫୋରଣ ହୋଇଛି । ସିୟାଲକୋଟରେ ସେନା ଶିବିର ବହୁତ ପୁରଣା ଏବଂ ଏହା ପାକିସ୍ତାନୀ ସେନାଙ୍କ ଗୁରୁତ୍ୱପୂର୍ଣ୍ଣ ସେନା ଶିବିର ଯାହା ସହର ସହ ଲାଗିରହିଛି । ଏବଂ ଏହାର ସ୍ଥାପନା ୧୮୫୨ରେ ବ୍ରିଟିସ ଭାରତୀୟ ସେନା ଦ୍ୱାରା କରାଯାଇଥିଲା ।
ନୂଆଦିଲ୍ଲୀ: ଦିନେ ଆଇପିଏଲରେ ପର୍ପଲ କ୍ୟାପ ବିଜେତା ଥିଲେ କିନ୍ତୁ ଏବେ ନେଟ୍ ବୋଲର । ଦିନେ ଆଇପିଏଲରେ ହିରୋ ଥିଲେ ଏବେ ପାଲଟି ଯାଇଛନ୍ତି ଜିରୋ । ଇଣ୍ଡିଆନ ପ୍ରିମିୟର ଲିଗର ସିଜିନ୍-୧୫ ମାର୍ଚ୍ଚ ୨୬ରେ ଆରମ୍ଭ ହେବାକୁ ଯାଉଛି । ମାର୍ଚ୍ଚ ୨୬ରୁ ଆରମ୍ଭ ହୋଇ ଏହି ଟୁର୍ଣ୍ଣାମେଣ୍ଟର ଫାଇନାଲ ମ୍ୟାଚ ମେ’ ୨୯ରେ ଖେଳାଯିବ । ଚଳିତ ଥର ଆଇପିଏଲରେ ଅନେକ ଆଶ୍ଚର୍ଯ୍ୟ କଲା ଭଳି ଖବର ସାମ୍ନାକୁ ଆସିଛି । ଯେପରିକି ଆଇପିଏଲ ମେଗା ଅକ୍ସନରେ ସୁରେଶ ରୈନା ଓ ଷ୍ଟିଭ୍ ସ୍ମିଥଙ୍କ ଭଳି ଖେଳାଳିଙ୍କୁ କୌଣସି ଫ୍ରାଞ୍ଚାଇଜ୍ କିଣିନଥିଲେ । ତେବେ ଏହାରି ମଧ୍ୟରେ ଏବେ ଆଉ ଏକ ଖବର କ୍ରିକେଟ ଫ୍ୟାନଙ୍କୁ ଆଶ୍ଚର୍ଯ୍ୟଚକିତ କରିଛି । ୨୦୧୫ ବିଶ୍ୱକପ ଖେଳିଥିବା ଭାରତୀୟ ଦ୍ରୁତ ବୋଲର ମୋହିତ ଶର୍ମାଙ୍କୁ ଆଇପିଏଲରେ କୌଣସି ଦଳ କିଣିନାହିଁ । ଯାହା ଫଳରେ ସେ ଏବେ ନେଟ୍ ବୋଲର ଭାବରେ ଏକ ଫ୍ରାଞ୍ଚାଇଜ୍ ସହ ଯୋଡି ହୋଇଛନ୍ତି ।
ଦିନ ଥିଲା ଆଇପିଏଲରେ ନିଜର ଘାତକ ବୋଲିଂରେ ଅନେକ ବ୍ୟାଟ୍ସମ୍ୟାନଙ୍କୁ ପ୍ୟାଭିଲିୟନକୁ ପଠାଉଥିଲେ । କିନ୍ତୁ ଆଜି ତାଙ୍କୁ ଆଇପିଏଲରେ କୌଣସି ଦଳ କିଣିନାହିଁ । ତେଣୁ ତାଙ୍କୁ ଗୁଜୁରାଟ ଟାଇଟନ୍ସ ନେଟ୍ ବୋଲର ଭାବରେ ଦଳରେ ସାମିଲ କରିଛି । ମୋହିତ ଶର୍ମା ଚଳିତ ଆଇପିଏଲ ମେଗା ଅକ୍ସନରେ ବି ସାମିଲ ହୋଇଥିଲେ । ତାଙ୍କ ବେସ୍ ପ୍ରାଇସ ୫୦ ଲକ୍ଷ ରହିଥିଲା । କିନ୍ତୁ ମୋହିତ ଶର୍ମାଙ୍କୁ କୌଣସି ଦଳ କିଣିନଥିଲା । ଯାହା ଫଳରେ ଗୁଜୁରାଟ ଟିମ୍ ତାଙ୍କୁ ନେଟ୍ ବୋଲର ଭାବରେ ଦଳରେ ସାମିଲ କରିଛି ।
ମୋହିତ ଶର୍ମା ୨୦୧୪ ମସିହାରେ ଖେଳାଯାଇଥିବା ଆଇପିଏଲରେ ପର୍ପଲ କ୍ୟାପ ନିଜ ନାମରେ କରିଥିଲେ । ସେହି ସିଜିନରେ ମୋହିତ ୨୩ ଓ୍ୱିକେଟ ଅକ୍ତିଆର କରିଥିଲେ । ସେ ସମୟରେ ସେ ମହେନ୍ଦ୍ର ସିଂ ଧୋନୀଙ୍କ ଅଧିନାୟକତ୍ୱରେ ଚେନ୍ନାଇ ସୁପର କିଙ୍ଗ୍ସରେ ଖେଳୁଥିଲେ । ଚେନ୍ନାଇ ବ୍ୟତୀତ ସେ ପଞ୍ଜାବ କିଙ୍ଗ୍ସ ଓ ମୁମ୍ବାଇ ଇଣ୍ଡିଆନ୍ସ ପାଇଁ ଖେଳିଛନ୍ତି । ମୋହିତ ଶର୍ମାଙ୍କ ବ୍ୟତୀତ ଗୁଜୁରାଟ ଦଳରେ ଲୁକମାନ ମେରିଓ୍ୱାଲା ଓ ବିରେନ୍ଦ୍ର ସରନଙ୍କୁ ମଧ୍ୟ ନେଟ୍ ବୋଲର ଭାବରେ ସାମିଲ କରିଛି ।
ନୂଆଦିଲ୍ଲୀ: ଋଷ ୟୁକ୍ରେନ ଯୁଦ୍ଧ ୨୫ଦିନରେ ପହଞ୍ଚିଛି । ୟୁକ୍ରେନର ଅନେକ ସହରରେ ଲଗାତାର ଆକ୍ରମଣ ଜାରି ରହିଛି । ଋଷ ୟୁକ୍ରେନ ସହର ମାରିୟୁପୋଲକୁ ଚାରିପଟୁ ଘେରିବାସହ ଘନ ଘନ ମିଶାଇଲ ଓ ବୋମା ମାଡ଼ କରୁଛି । ଏହିମଧ୍ୟରେ ବ୍ରିଟେନର ଏକ ଗଣମାଧୟମ ରୁପୋର୍ଟ ଅନୁସାରେ ପୁଟିନ ପରମାଣୁ ଯୁଦ୍ଧ ପାଇଁ ଅଭ୍ୟାସ କରୁଛନ୍ତି । ୟୁକ୍ରେନ୍ ସହ ଉତ୍ତେଜନା ବୃଦ୍ଧି ବାତାବରଣରେ ଆଣବିକ ଯୁଦ୍ଧରେ ଲୋକଙ୍କୁ ସ୍ଥାନାନ୍ତରଣ ଅଭ୍ୟାସ ନିମନ୍ତେ ରୁଷୀୟ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍ ଆଦେଶ ଦେଇଥିବା କଥା କେତେକ ଗଣମାଧ୍ୟମ ‘ଟେଲିଗ୍ରାମ୍ ଚାନେଲ୍’ଗୁଡ଼ିକରୁ ଜଣାପଡ଼ିଛି । କେବଳ ସେତିକି ନୁହେଁ ସେ ଏହି ଅଭ୍ୟାସ ପୂର୍ବରୁ ତାଙ୍କ ପରିବାର କୁ ସାଇବେରିଆ ପଠାଇ ଦେଇଥିବା ମଧ୍ୟ କୁହାଯାଇଛି ।
ଉଭୟ ଯୁଦ୍ଧ ଓ ଶାନ୍ତି ଆଲୋଚନା ସମାନ ଭାବେ ଚାଲିଥିବା ବେଳେ ୟୁକ୍ରେନ୍ ଉପରେ ଅତ୍ୟାଧୁନିକ ହାଇପର୍ସୋନିକ୍ କ୍ଷେପଣାସ୍ତ୍ର ପ୍ରୟୋଗ କରିଥିବା କଥା ରୁଷ୍ ଦାବି କରିଛି । ପୁଟିନ୍ କ୍ରମଶଃ ଆଣବିକ ଯୁଦ୍ଧ ଆଡ଼କୁ ଅଗ୍ରସର ହେଉଥିବାର ଆଭାସ ପାଇ କ୍ରେମ୍ଲିନ୍ ସରକାରୀ ଅଧିକାରୀମାନେ ବିସ୍ମିତ ତଥା ବିବ୍ରତ ହୋଇପଡ଼ିଥିବା କଥା ଏକ ରିପୋର୍ଟରୁ ଜଣାପଡ଼ିଛି ।
ସୂଚନା ଅନୁସାରେ, ଆଣବିକ ଯୁଦ୍ଧରେ ଲୋକାମାନଙ୍କୁ କିଭଳି ସ୍ଥାନାନ୍ତରଣ କରାଯାଇପାରିବ ସେନେଇ ଅଭ୍ୟାସ କରାଯଆଉଥିବା ନିଜେ ପୁଟିନ୍ କ୍ରେମ୍ଲିନ୍ର ବରିଷ୍ଠ ରାଜନୀତିଜ୍ଞମାନଙ୍କୁ କହିଥିବା ଜଣାପଡ଼ିଛି । ସମ୍ପ୍ରତି ନିରାପତ୍ତା କ୍ଷେତ୍ରରେ କାର୍ଯ୍ୟ କରୁଥିବା ପୂର୍ବତନ ରାଷ୍ଟ୍ରପତି ଡିମିତ୍ରି ମେଦଭେଦେଭ୍ ଏବଂ ଦୁଇ ଗୃହର ବାଚସ୍ପତି ଭିଆଚେସ୍ଲାଭ୍ ଭୋଲୋଦିନ୍ ଏବଂ ଭାଲେନ୍ତିନା ମାତ୍ଭିୟେଙ୍କୋଙ୍କୁ ଆଣବିକ ଯୁଦ୍ଧ ବିଷୟରେ କୁହାଯାଇଥିବା କଥା ରିପୋର୍ଟରୁ ଜଣାପଡ଼ିଛି ।
ପୁଟିନ୍ଙ୍କ ପରିବାର ବିଷୟରେ ବିଶେଷ କିଛି ଜଣା ନ ଥିଲେ ବି ରିପୋର୍ଟ ଅନୁସାରେ, ରୁଷ୍-ୟୁକ୍ରେନ୍ ଯୁଦ୍ଧ ଆରମ୍ଭ ହେବା ଠାରୁ ହିଁ ପୁଟିନ୍ ତାଙ୍କ ପରିବାର ଲୋକମାନଙ୍କୁ ସାଇବେରିଆକୁ ପଠାଇ ଦେଇଛନ୍ତି । ସାଇବେରିଆର ଟେକ୍ ଆଲଟାଇ ପର୍ବତମାଳା ମଧ୍ୟରେ ଥିବା ଏହି ବଙ୍କର୍ଟିକୁ ଭୂତଳ ବଙ୍କର ମଧ୍ୟ କୁହାଯାଏ ।
ପୁରୀ: ରବିବାର ବି ଶ୍ରୀମନ୍ଦିର ଯାଇପାରିବେ ଭକ୍ତ । କୋଭିଡ କଟକଣା କୋହଳ ହେବା ପରେ ରବିବାର ଜଗାକୁ ଦର୍ଶନ କରୁଛନ୍ତି ଭକ୍ତ । ଦୀର୍ଘଦିନ ପରେ ରବିବାରରେ ମହାପ୍ରଭୁଙ୍କୁ ଦର୍ଶନ କରୁଛନ୍ତି ଭକ୍ତ । କରୋନା କଟକଣା ପାଇଁ ପୂର୍ବରୁ ରବିବାର ଶ୍ରୀମନ୍ଦିରରେ ସାଧାରଣ ଦର୍ଶନ ବନ୍ଦ ରହୁଥିଲା । ରବିବାର ଶ୍ରୀମନ୍ଦିର ବନ୍ଦ ରଖି ମନ୍ଦିର ପରିସରକୁ ସାନିଟାଇଜ୍ କରାଯାଉଥିଲା । ଯାହା ଫଳରେ ଅନେକ ଭକ୍ତ ରବିବାର ପୁରୀ ଆସି ଶ୍ରୀଜିଉଙ୍କ ଦର୍ଶନରୁ ବଞ୍ଚିତ ହେଉଥିଲେ । ତେବେ ବର୍ତ୍ତମାନ କରୋନା ସଂକ୍ରମଣ ହ୍ରାସ ପାଇବାରୁ ଏବେ ରବିବାର ମଧ୍ୟ ମହାପ୍ରଭୁଙ୍କୁ ଦର୍ଶନ କରିବାର ସୁଯୋଗ ପ୍ରଦାନ କରାଯାଇଛି । ଗତ ୧୨ ତାରିଖରେ ଜିଲ୍ଲାପାଳଙ୍କ ଅଧ୍ୟକ୍ଷତାରେ ବସିଥିବା ଛତିଶା ନିଯୋଗ ବୈଠକରେ ଏନେଇ ନିଷ୍ପତ୍ତି ହୋଇଥିଲା । ଯାହା ଫଳରେ ଆଜି ରବିବାରରେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରୁଛନ୍ତି ଭକ୍ତ । ଏବେ ପ୍ରତିଦିନ ସାଧାରଣ ଦର୍ଶନକୁ ଅନୁମତି ମିଳିଥିବାରୁ ଶ୍ରଦ୍ଧାଳୁଙ୍କ ମହଲରେ ଖୁସି ଦେଖାଦେଇଛି ।
ନୂଆଦିଲ୍ଲୀ: ଜାମ୍ମୁ କାଶ୍ମୀରକୁ ନେଇ ଦିନକୁ ଦିନ ନୂଆ ନୂଆ ପଦକ୍ଷପ ନିଆଯାଉଛି । ଦି କାଶ୍ମୀର ଫାଇଲ୍ ରିଲିଜ୍ ହେବା ପରେ ସବୁଆଡ଼େ ଜାମ୍ମୁ କାଶ୍ମୀରକୁ ନେଇ ଚର୍ଚ୍ଚା ଜୋର ଧରିଛି । ଏହି ସମୟରେ ଜାମ୍ମୁ କାଶ୍ମୀରରେ ସୁରକ୍ଷା ବାହିନୀ ନିୟୋଜନ ସମ୍ପର୍କରେ ଗୃହମନ୍ତ୍ରୀ ଅମିତ ଶାହା ଏକ ବଡ଼ ବୟାନ ଦେଇଛନ୍ତି । ଶନିବାର ଦିନ ସିଆରପିଏଫ (CRPF) ର ୮୩ ତମ ସ୍ଥାପନ ଦିବସରେ ଗୃହମନ୍ତ୍ରୀ ଅମିତ ଶାହା ଜାମ୍ମୁରେ ଏକ କାର୍ଯ୍ୟକ୍ରମରେ ଅଂଶଗ୍ରହଣ କରିଛନ୍ତି । ଏହି ସମୟରେ ସେ କହିଛନ୍ତି ଯେ, ହୁଏତ ଆଗାମୀ ଦିନରେ ଜାମ୍ମୁ କାଶ୍ମୀରରେ CRPF ର କୌଣସି ଆବଶ୍ୟକତା ପଡ଼ି ନପାରେ ।
ଗୃହମନ୍ତ୍ରୀ ଶାହା ଜାମ୍ମୁ କାଶ୍ମୀରରେ CRPF ଯବାନମାନଙ୍କର ଭୂମିକାକୁ ପ୍ରଶଂସା କରିଛନ୍ତି । ସେ କହିଛନ୍ତି ଯେ, ଯବାନମାନେ କେବଳ ବର୍ଡରରେ ଆତଙ୍କବାଦର ମୁକାବିଲା କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିନାହାଁନ୍ତି, ବରଂ ଆଇନ ଶୃଙ୍ଖଳା ପରିସ୍ଥିତିକୁ ଦୃଢ କରିବା ପାଇଁ ମଧ୍ୟ କାର୍ଯ୍ୟ କରିଛନ୍ତି । CRPF ଜାମ୍ମୁ କାଶ୍ମୀର, ଉତ୍ତର ପୂର୍ବ ଏବଂ ନକ୍ସଲ ପ୍ରଭାବିତ ଅଞ୍ଚଳରେ ଉତ୍କୃଷ୍ଟ କାର୍ଯ୍ୟ କରଛନ୍ତି । ମୁଁ ନିଶ୍ଚିତ ଯେ ଆଗାମୀ କିଛି ବର୍ଷ ମଧ୍ୟରେ ଏହି ତିନୋଟି କ୍ଷେତ୍ରରେ CRPF ର କୌଣସି ଆବଶ୍ୟକତା ରହିବ ନାହିଁ । ଏବଂ ଏହାର ସମ୍ପୂର୍ଣ୍ଣ ଶ୍ରେୟ CRPF କୁ ହିଁ ଯିବ । CRPF କୁ ପ୍ରଶଂସା କରି ଶାହା କହିଛନ୍ତି ଯେ ଗତ କିଛି ବର୍ଷ ମଧ୍ୟରେ ଜାମ୍ମୁ କାଶ୍ମୀରରେ ସୁରକ୍ଷା ବ୍ୟବସ୍ଥାରେ ବହୁତ ଉନ୍ନତି ହୋଇଛି । CRPF ଯବାନମାନଙ୍କୁ ସମ୍ବୋଧିତ କରିବାବେଳେ ସେ ଧାରା ୩୭୦ ଏବଂ ୩୫A ର ହଟାଇବା ବିଷୟରେ ମଧ୍ୟ କହିଥିଲେ ।
ସେ କହିଛନ୍ତି ଯେ, ଏହି ଧାରା ହଟିବା ପରେ ଜାମ୍ମୁ କାଶ୍ମୀରର ସାଧାରଣ ଲୋକ ଉପକୃତ ହୋଇଛନ୍ତି । ଏଠାରେ ସୂଚନା ଯୋଗ୍ୟ ଯେ, ଜାମ୍ମୁ କାଶ୍ମୀରରେ ଏହା ହେଉଛି ପ୍ରଥମ ଥର ଯେଉଁଠାରେ CRPF ସ୍ଥାପନ ଦିବସ ପାଳନ କରାଯାଉଛି ଏହାପୂର୍ବରୁ ଏହି ଦିବସଟି ରାଜଧାନୀ ଦିଲ୍ଲୀରେ ହିଁ ପାଳନ କରାଯାଉଥାଲା ।
CRPF ଯବାନମାନଙ୍କୁ ସମ୍ବୋଧିତ କରି ଅମିତ ଶାହା କହିଛନ୍ତି ଯେ, ମୁଁ CRPF ଯବାନ ଏବଂ ସେମାନଙ୍କ ପରିବାରବର୍ଗଙ୍କୁ ମୋର ଶୁଭେଚ୍ଛା ଜଣାଉଛି। ମୁଁ CRPF ସହିଦମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛି । ଐତିହାସିକ ସହର ଜାମ୍ମୁରେ CRPF ସ୍ଥାପନ ଦିବସ ପାଳନ କରାଯାଉଛି । ମୁଁ ସର୍ବପ୍ରଥମେ ମାଆ ବୈଷ୍ଣବ ଦେବୀଙ୍କୁ ପ୍ରଣାମ କରୁଛି । ଅମିତ ଶାହା କହିଛନ୍ତି ଯେ, ଜାମ୍ମୁ ହେଉଛି ସେହି ସ୍ଥାନ ଯେଉଁଠାରେ ପି. ପ୍ରେମନାଥ ଡୋଗରା ଏବଂ ଡକ୍ଟର ସ୍ୟାମା ପ୍ରସାଦ ମୁଖାର୍ଜୀ, ଏକ ରାଷ୍ଟ୍ର , ଏକ ଧ୍ୱଜା ଏକ ସମ୍ବୀଧାନ ପାଇଁ ଆନ୍ଦୋଳନ ଆରମ୍ଭ କରିଥିଲେ । ଆମେ ଖୁସି ଯେ ଡକ୍ଟର ଶ୍ୟାମା ପ୍ରସାଦ ମୁଖାର୍ଜୀଙ୍କ ସ୍ୱପ୍ନକୁ ପୂରା କରିପାରିଛୁ । ଏହାସହ ସେ ସିଆରପିଏଫ୍ ଯବାନମାନଙ୍କୁ ମଧ୍ୟ ଖୁବ୍ ପ୍ରଶଂସା କରିଛନ୍ତି ।
ନୂଆଦିଲ୍ଲୀ: ଏପ୍ରିଲ ମାସରେ ଆସିବେ ଇସ୍ରାଏଲର ପ୍ରଧାନମନ୍ତ୍ରୀ ବେନେଟ । ପ୍ରଧାନମନ୍ତ୍ରୀ ମୋଦୀଙ୍କ ନିମନ୍ତ୍ରଣ କ୍ରମେ ଏପ୍ରିଲ ଆରମ୍ଭରେ ଇସ୍ରାଏଲର ପ୍ରଧାନମନ୍ତ୍ରୀ ନାଫଟାଲି ବେନେଟ ଭାରତ ଗସ୍ତ କରିବେ । ସୂଚନା ଅନୁଯାୟୀ, ଇସ୍ରାଏଲ୍ ଏବଂ ଭାରତ ମଧ୍ୟରେ ସମ୍ପର୍କ ସ୍ଥାପନ ହେବାର ୩୦ତମ ବାର୍ଷିକୀ ପାଳନ କରିବା ନିମନ୍ତେ ଇସ୍ରାଏଲର ପ୍ରଧାନମନ୍ତ୍ରୀ ଗସ୍ତ କରୁଥିବା ଜଣାପଡ଼ିଛି । ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିମନ୍ତ୍ରଣ କ୍ରମେ ୨ ଏପ୍ରିଲ ୨୦୨୨ରେ ଶନିବାର ଦିନ ଭାରତ ଗସ୍ତ କରିବେ ନାଫଟାଲି ବେନେଟ ।
ଏହି ଦୁଇ ନେତାଙ୍କ ଭେଟ ଶେଷଥର ପାଇଁ ଅକ୍ଟୋବରରେ ଗ୍ଲାସଗୋରେ ମିଳିତ ଜାତିସଂଘର ଜଳବାୟୁ ପରିବର୍ତ୍ତନ ସମ୍ମିଳନୀ (COP26) ସମୟରେ ହୋଇଥିଲା । ତା’ପରେ ପ୍ରଧାନମନ୍ତ୍ରୀ ମୋଦୀ ଇସ୍ରାଏଲର ପ୍ରଧାନମନ୍ତ୍ରୀ ବେନେଟଙ୍କୁ ଦେଶ ଗସ୍ତରେ ଆସିବାକୁ ନିମନ୍ତ୍ରଣ କରିଥିଲେ। ଏହି ଗସ୍ତ ଦୁଇ ଦେଶ ମଧ୍ୟରେ ଥିବା ସମ୍ପର୍କକୁ ଆହୁରି ଦୃଢ କରିବ । ଇସ୍ରାଏଲର ପ୍ରଧାନମନ୍ତ୍ରୀ ବେନେଟଙ୍କ ଗସ୍ତର ଉଦ୍ଦେଶ୍ୟ ହେଉଛି ଦୁଇ ଦେଶ ମଧ୍ୟରେ ରଣନୈତିକ ସହଯୋଗକୁ ଆଗକୁ ବଢାଇବା ଏବଂ ଦୃଢ କରିବା। ଏହାସହ ଦ୍ୱିପାକ୍ଷିକ ସମ୍ପର୍କ ବିସ୍ତାର ଉପରେ ମଧ୍ୟ ଗୁରୁତ୍ୱ ଦିଆଯିବ । ଏହା ବ୍ୟତୀତ ଉଭୟ ଦେଶର ପ୍ରଧାନମନ୍ତ୍ରୀମାନେ ଅର୍ଥନୀତି, ଅନୁସନ୍ଧାନ, ବିକାଶ, କୃଷି ଏବଂ ଅନ୍ୟାନ୍ୟ କ୍ଷେତ୍ରରେ ସହଯୋଗକୁ ମଜବୁତ କରିବା ଉପରେ ଆଲୋଚନା କରିବେ।
ପ୍ରଧାନମନ୍ତ୍ରୀ ବେନେଟ, ଭାରତୀୟ ପ୍ରଧାନମନ୍ତ୍ରୀ ମୋଦୀ ଏବଂ ଅନ୍ୟାନ୍ୟ ବରିଷ୍ଠ ସରକାରୀ ଅଧିକାରୀଙ୍କ ସହ ଆଲୋଚନା କରିବେ। ପ୍ରଧାନମନ୍ତ୍ରୀ ବେନେଟ୍ କହିଛନ୍ତି ଯେ, ମୋର ବନ୍ଧୁ ପ୍ରଧାନମନ୍ତ୍ରୀ ମୋଦୀଙ୍କ ନିମନ୍ତ୍ରଣ କ୍ରମେ ମୁଁ ଭାରତ ଗସ୍ତ କରି ଖୁସି ହେବି ଏବଂ ଏହାସହ ଆମେ ଆମେ ଆମ ଦେଶ ମଧ୍ୟରେ ସମ୍ପର୍କକୁ ମଧ୍ୟ ଆଗକୁ ବଢାଇବୁ । ତେବେ ପ୍ରଧାନମନତ୍ରୀ ମୋଦି ଭାରତ ଓ ଇସ୍ରାଏଲ ମଧ୍ୟରେ ସମ୍ପର୍କକୁ ପୁଣି ଆରମ୍ଭ କରିଛନ୍ତି ଏବଂ ଏହା ଐତିହାସିକ ମହତ୍ତ୍ୱ ମଧ୍ୟ ରହିଛି ।
ମସ୍କୋ: ଯୁଦ୍ଧ ଅବସ୍ଥା ଦିନକୁ ଦିନ ଘନୀଭୂତ ହେଉଥିବା ବେଳେ, ଋଷ ପକ୍ଷରୁ ଦିଆଯାଇଛି ଗୁରୁତ୍ବପୂର୍ଣ୍ଣ ସୂଚନା । ବସନିଆ ଓ ହେର୍ଜଗୋଭିନା ଲାଗି ନିଯୁକ୍ତ ଋଷ ରାଷ୍ଟ୍ରଦୂତ ଇଗୋର କାଲାବୁଖୋଭ କହିଛନ୍ତି, ନାଟୋ ବିରୋଧରେ ଋଷର ସ୍ୱତନ୍ତ୍ର ଯୋଜନା ରହିଛି । ସେ କହିଛନ୍ତି, କୌଶଳଗତ ଅବସ୍ଥା ନେଇ ଋଷ ଆକଳନ କରୁଛି ଏବଂ କୌଣସି ପ୍ରକାର ବିପଦର ମୁକାବିଲା କରିବାକୁ ତାଙ୍କ ଦେଶ ସକ୍ଷମ ।
ସେପଟେ ଏସ୍ତୋନିଆ, ଲାଟଭିଆ ଓ ଲିଥୁଆନିଆ ସରକାର ଋଷର ପ୍ରାୟ ୧୦ ଜଣ କୂଟନୀତିଜ୍ଞଙ୍କୁ ବହିଷ୍କାର କରିଛନ୍ତି । ଯୁଦ୍ଧକୁ ଅଧିକ ସଂଗୀନ କରିବା ଲାଗି ଆମେରିକା ଜୋରଦାର ଉଦ୍ୟମ ଚଳାଇଛି । ଖୁବ୍ ଶୀଘ୍ର ୟୁକ୍ରେନରେ ଆମେରିକା ନିର୍ମିତ ଷ୍ଟିଞ୍ଜର ଓ ଜାଭେଲିନ ମିସାଇଲ ପହଞ୍ଚିବ ବୋଲି ସୂଚନା ମିଳିଛି । ଏହି ଅସ୍ତ୍ର ଆସିଲେ ଋଷ ନିଜର ଆକ୍ରମଣର ତରିକା ବଦଳାଇବା ଆଶଙ୍କା କରାଯାଉଛି ।
ଅନ୍ୟପଟେ, ତୁର୍କୀ ନିକଟରେ ପୂର୍ବରୁ ଗଚ୍ଛିତ ଋଷ ନିର୍ମିତ ମିସାଇଲ ସିଷ୍ଟମକୁ ୟୁକ୍ରେନକୁ ଦେବା ଲାଗି ତୁର୍କୀକୁ ପରାମର୍ଶ ଦେଇଛି ଆମେରିକା । ଯୁଦ୍ଧ ଟାଳିବାକୁ ଉଦ୍ୟମ କରିବା ବଦଳରେ ଏହାକୁ ଅଧିକ ତୀବ୍ର କରିବା ଲାଗି ଆମେରିକା ନିଜର ସାମରିକ ପିପାସା ଜାରି ରଖିଛି ।
ଭୁବନେଶ୍ୱର: ପୁଣି ଅଶାନ୍ତ ହେଲା ବାଣୀ ବିହାର କ୍ୟାମ୍ପସ । ଉତ୍କଳ ବିଶ୍ବବିଦ୍ୟାଳୟରେ ପୁଣି ଦେଖା ଦେଇଛି ଉତ୍ତେଜନା । ଗତକାଲି ବିଳମ୍ବିତ ରାତିରେ ଦୁଇଟି ବାଇକ୍ ପୋଡ଼ିଦେଲେ ଦୁର୍ବୃତ୍ତ । ଗୋଦାବରୀଶ ହଷ୍ଟେଲ ନିକଟରେ ଗାଡ଼ି ପୋଡ଼ାକୁ ନେଇ କ୍ୟାମ୍ପସରେ ଚାପା ଉତ୍ତେଜନା ଜାରି ରହିଛି ।
ସୂଚନା ଅନୁସାରେ ଗତକାଲି ବିଳମ୍ବିତ ରାତିରେ ଉତ୍କଳ ବିଶ୍ୱବିଦ୍ୟାଳୟରେ ଦୁଇ ଗୋଷ୍ଠୀ ମଧ୍ୟରେ ବିବାଦ ହୋଇଥିଲା । ଦୁଇ ଗୋଷ୍ଠୀ ମଧ୍ୟରେ ବିବାଦ ପରେ ଗୋଦାବରୀଶ ହଷ୍ଟେଲ ନିକଟରେ ଥିବା ଗାଡି କେହି ପୋଡ଼ି ଦେଇଛନ୍ତି । ଗୋଟିଏ ଗୋଷ୍ଠୀର ପିଲା ଅନ୍ୟ ଗୋଷ୍ଠୀର ଗାଡି ପୋଡ଼ି ଦେଇଥିବା ଅଭିଯୋଗ ହୋଇଛି । ପୂର୍ବ ଶତ୍ରୁତାରୁ ଏଭଳି କାଣ୍ଡ ଘଟିଥିବା ଜଣାପଡ଼ିଛି । ଏହି ଘଟଣା ପରେ ଏବେ ବି କ୍ୟାମ୍ପସରେ ଚାପା ଉତ୍ତେଜନା ଲାଗି ରହିଛି । ତେଣୁ ସୁରକ୍ଷା ଦୃଷ୍ଟିରୁ କ୍ୟାମ୍ପସରେ ବ୍ୟାପକ ପୋଲିସ ମୁତୟନ ହୋଇଛନ୍ତି ।
