କୁଚିଣ୍ଡା: କୁଚିଣ୍ଡା ଜମନକିରା ଥାନା କସଡ଼ା ଗ୍ରାମରେ ଅଭାବନୀୟ ଘଟଣା । ଆଠ ବର୍ଷର ଶିଶୁ କନ୍ୟାକୁ ଗଳା କାଟି ହତ୍ୟା କରିଛି ଦୁର୍ବୃତ୍ତ l କସଡ଼ା ଗାଁର ନବକିଶୋର ଧରୁଆଙ୍କ ଆଠ ବର୍ଷର ଝିଅ ପ୍ରଜାଲିନ ଘର ପାଖ ଚାଷ ଜମିକୁ ଶୌଚ ହେବାକୁ ଯାଇଥିଲା । ଏହି ସମୟରେ ଗାଁର ପ୍ରଶାନ୍ତ ବଗାର ଏକ ଟାଙ୍ଗିଆରେ ଶିଶୁକନ୍ୟାକୁ ହତ୍ୟା କରିଛି । ଆଠ ବର୍ଷର ଶିଶୁକନ୍ୟାକୁ ହତ୍ୟା କରିବା ପରେ କଟା ମୁଣ୍ଡକୁ ହାତରେ ଧରି ଗାଁ ଦାଣ୍ଡରେ ବୁଲିଥିଲା ପ୍ରଶାନ୍ତ । ଏହା ସହ ଏକ ନଳକୂଅ ନିକଟରେ ଶିଶୁକନ୍ୟାର ମୃତ ଦେହ ପକାଇ ଦେଇଥିଲା l ପ୍ରଜାଲିନର ପରିବାର ଲୋକ ମହୁଲ ଗୋଟାଇବାକୁ ଯାଇଥିବା ବେଳେ ଏଭଳି ଅଘଟଣ ଦେଖିବାକୁ ପାଇଥିଲେ । ଖବର ପାଇ ଜମନକିରା ପୋଲିସ ଘଟଣା ସ୍ଥଳରେ ପହଂଚି ଅଭିଯୁକ୍ତକୁ କାବୁ କରି ତଦନ୍ତ ଆରମ୍ଭ କରିଛି l
ରିଲିଜ୍ ହେଲା ବହୁ ପ୍ରତିକ୍ଷୀତ ତେଲୁଗୁ ଆକ୍ସନ ଡ୍ରାମା ଫିଲ୍ମ ଟ୍ରିପଲ୍ ଆର୍
ନୂଆଦିଲ୍ଲୀ: ରିଲିଜ ହୋଇଛି ବହୁ ପ୍ରତୀକ୍ଷିତ ଫିଲ୍ମ RRR । ଏସ୍ ଏସ୍ ରାଜାମୌଲିଙ୍କ ନିର୍ଦ୍ଦେଶିତ ଏହି ଫିଲ୍ମରେ ବଲିଉଡ ବିଉଟି ଆଲିୟା ଭଟ୍ଟଙ୍କ ସହ ସାଉଥଷ୍ଟାର ରାମଚରଣ, ଜୁନିୟର ଏନଟିଆର ଏବଂ ଅଜୟ ଦେଗବନଙ୍କ ଦମଦାର ଆକ୍ଟିଂ ଦେଖିବାକୁ ମିଳିଛି । ପ୍ରାୟ ୫୫୦ କୋଟି ଟଙ୍କାରେ ତିଆରି ହୋଇଥିବା ଏହି ଚଳଚ୍ଚିତ୍ରକୁ ନେଇ ଦର୍ଶକମାନେ ବେଶ୍ ଉତ୍ସାହିତ ଅଛନ୍ତି । ସେପଟେ ଫିଲ୍ମ ରିଲିଜ ପୂବର୍ରୁ ଆଡଭାନ୍ସ ଟିକେଟ ବୁକିଂରେ ଆରଆରଆର ଫିଲ୍ମ ରେକର୍ଡ କରିଛି । ଏହି ଚଳଚ୍ଚିତ୍ର ରିଲିଜ୍ ହେବା ପୂର୍ବରୁ ୬୦ କୋଟି ଟଙ୍କାରୁ ଅଧିକର ଆଡଭାନ୍ସଡ ବୁକିଂ ହୋଇସାରିଥିଲା ।
Hello world… It’s Show Time…. Enjoy #RRRMovie on BIGGG SCREENS from now…. ❤️🔥🌊
— RRR Movie (@RRRMovie) March 24, 2022
ଚଳଚ୍ଚିତ୍ର ବ୍ୟବସାୟ ବିଶେଷଜ୍ଞଙ୍କ ଅନୁସାରେ ଏହି ଚଳଚ୍ଚିତ୍ର ରିଲିଜ୍ ହେବାର ପ୍ରଥମ ଦିନ ହିଁ ୧୦୦ କୋଟି ଟଙ୍କାରୁ ଅଧିକ ଆୟ କରିବ । ଏସ ଏସ ରାଜାମୌଲିଙ୍କ ବାହୁବଳି-୨ ଫିଲ୍ମ ପ୍ରଥମ ଦିନରେ ସମସ୍ତ ଭାଷାରେ ପ୍ରାୟ ୧୨୧ କୋଟି ଟଙ୍କା ଆୟ କରିଥିଲା । ତେବେ ଏବେ ଆରଆରଆର’ର ଆଡଭାନ୍ସ ବୁକିଂକୁ ଦେଖି ଜଣା ପଡ଼ୁଛି କି ଏହି ଫିଲ୍ମ ବାହୁବଳି-୨ର ରେକର୍ଡ ବି ଭାଙ୍ଗିପାରେ । ଅନ୍ୟପକ୍ଷରେ ରିଲିଜ୍ ପୂର୍ବରୁ ହିଁ ‘ଆରଆରଆର୍’ ଅନେକ ରେକର୍ଡକୁ ଭାଙ୍ଗି ଦେଇଛି । ବିତରଣ, ସାଟେଲାଇଟ୍, ମ୍ୟୁଜିକ୍ ଭଳି ରାଇଟ୍ସ୍ ବିକ୍ରି କରି ଏହି ଚଳଚ୍ଚିତ୍ର ୮୦୦ କୋଟି ଟଙ୍କା ଆୟ କରିଛି । ରିଲିଜ୍ ପୂର୍ବରୁ ୮୦୦ କୋଟି ଆୟ କରିବାରେ ‘ଆରଆରଆର୍’ ଭାରତର ପ୍ରଥମ ଚଳଚ୍ଚିତ୍ର ହୋଇଛି ।
ହାର ମାନିବାକୁ ନାରାଜ ଦୁଇ ଦେଶ, ବର୍ତ୍ତମାନ ସୁଧା ୧୫ହଜାର ଋଷ ସୈନ୍ୟ ମୃତ
କିଭ୍: ଋଷ-ୟୁକ୍ରେନ ଯୁଦ୍ଧକୁ ପୂରିଲା ମାସେ । ୟୁକ୍ରେନର ବିଭିନ୍ନ ସହରରେ ଋଷ ତାର ଧ୍ୱଂସଲୀଳା ଜାରି ରଖିଛି । ଯୁଦ୍ଧ ବନ୍ଦ ଲାଗି ଆନ୍ତର୍ଜାତିକ ଚାପ ସତ୍ତ୍ୱେ ଋଷ ଜିଦରେ ଅଟଳ । ବିଭିନ୍ନ ସହର ଉପରେ କବଜା କରିବାକୁ ଋଷ ତୁହାକୁ ତୁହା ଗୁଳିଗୋଳା ବର୍ଷଣ କରାଯାଉଛି । ଋଷର ଦୂରଗାମୀ କ୍ଷେପଣାସ୍ତ୍ର ମାଡରେ ଖାରକିବରେ ୫ ଜଣ ପ୍ରାଣ ହରାଇଥିବା ବେଳେ ୧୨ରୁ ଅଧିକ ଲୋକ ଆହତ ହୋଇଥିବା ସୂଚନା ମିଳିଛି ।
ସେହିପରି ରୁବିଜିନେରେ ଋଷ ବାହିନୀ ଆକ୍ରମଣ ବେଳେ ଫସଫରସ ବ୍ୟବହାର କରିଥିବା ଅଭିଯୋଗ କରିଛନ୍ତି ଲୁଗାନସ୍କ ଗଭର୍ଣ୍ଣର ସର୍ଗେଇ ଗେଦେୟ । ଏହି ଆକ୍ରମଣରେ ୨ ଶିଶୁଙ୍କ ସମେତ ୪ ଜଣ ପ୍ରାଣ ହରାଇଛନ୍ତି ବୋଲି ସେ ଅଭିଯୋଗ କରିଛନ୍ତି । ସେହିପରି କିବ ନିକଟସ୍ଥ ଇରପିନରେ ଋଷର ବୋମା ବର୍ଷଣର ଫୁଟେଜ ଜାରି କରିଛି ବ୍ରିଟେନର ଆଇଟିଭି ।
କିବରେ ସଂଘର୍ଷ ଜୋରଦାର ଲାଗିଥିବା ବେଳେ ଋଷ ସୈନ୍ୟଙ୍କୁ ପଛକୁ ହଟାଇ ଦିଆଯାଇଛି ବୋଲି ଦାବି କରିଛି ୟୁକ୍ରେନ ସେନା । କୃଷ୍ଣ ସାଗରରେ ଋଷୀୟ ସୈନ୍ୟଙ୍କୁ ନେଇ ଆସୁଥିବା ଏକ ନୌଜାହାଜ ଉପରେ ଆକ୍ରମଣ କରାଯାଇଥିବା ବି ସୂଚନା ଦେଇଛନ୍ତି ୟୁକ୍ରେନ ।
ୟୁକ୍ରେନର ଦାବି କରୁଛି ଯେ, ଏପର୍ଯ୍ୟନ୍ତ ସୁଧା ୧୫,୮୦୦ ଋଷ ସୈନ୍ୟ ନିହତ ହୋଇଛନ୍ତି । ସେହିପରି ୟୁକ୍ରେନ ଋଷର ୨୮୦ଟି ଆର୍ଟିଲରି ସିଷ୍ଟମକୁ ଧ୍ୱଂସ କରିଦେଇଛି । ଏହା ବ୍ୟତୀତ ୟୁକ୍ରେନ ରୁଷର ୫୩୦ଟି ଟ୍ୟାଙ୍କକୁ ନଷ୍ଟ କରିଦେଇଛି । ଏହା ସହିତ, ୟୁକ୍ରେନ ୧୨୪ ହେଲିକପ୍ଟର, ୧୦୮ଟି ବିମାନ, ୮୨ଟି ଏମଏଲଆରଏସ, ୪୭ଟି ଆଣ୍ଟି-ଏୟାରକ୍ରାଫ୍ଟ ସିଷ୍ଟମକୁ ଧ୍ୱଂସ କରିଦେଇଛି ।
ମହଙ୍ଗା ପଡିଲା ଚେନ୍ ଛିନତାଇ
ଟାଙ୍ଗୀ: ମହଙ୍ଗା ପଡିଲା ଚେନ୍ ଛିନତାଇ । ମହିଳାଙ୍କଠାରୁ ସୁନା ଚେନ୍ ଲୁଟିନେବା ବେଳେ ଚୋରକୁ ଧରି ଉତ୍ତମ ମଧ୍ୟମ ଦେଲେ ଲୋକ । ଏହି ଘଟଣାଟି ଟାଙ୍ଗୀ ଭୂଷଣ୍ଡପୁର ମା ଉଗ୍ରତାରା ମନ୍ଦିର ନିକଟରେ ହୋଇଛି । ଲୁଟେରା ଜଣକ ସ୍କୁଟିରେ ଆସି ଚାଲି ଚାଲି ଯାଉଥିବା ଜଣେ ମହିଳାଙ୍କଠାରୁ ଚେନ୍ ଭିଡି ନେଇଥିଲା । ମହିଳାଙ୍କଠାରୁ ଚେନ ଛଡାଇ ଚମ୍ପଟ ମାରୁଥିବା ସମୟରେ ମହିଳା ଜଣକ ଚିତ୍କାର କରିବାରୁ ଲୁଟେରା ଅଜାଣତରେ ମହିଳାଙ୍କ ଗାଁ ଆଡ଼କୁ ପଳାଇଥିଲେ । ମହିଳାଙ୍କ ପାଟି ଶୁଣି ସ୍ଥାନୀୟ ଲୋକ ଲୁଟେରାକୁ ଧରି ନିର୍ଦ୍ଧୁମ ମାଡ଼ ମାରିଥିଲେ । ତେବେ ଖବର ପାଇଁ ପୋଲିସ ଘଟଣା ସ୍ଥଳରେ ପହଞ୍ଚି ଲୁଟେରାକୁ ହେପାଜତକୁ ନେବା ସହ ତଦନ୍ତ ଆରମ୍ଭ କରିଛି । ସୂଚନା ଅନୁସାରେ ଲୁଟେରା ଜଣକ ଭୁବନେଶ୍ୱର ସ୍ଥିତ ଡୁମୁଡୁମା ଅଞ୍ଚଳର ଶିବ ପ୍ରସାଦ ଦାସ୍ ।
ଇମ୍ରାନଙ୍କ ଗାଦି ଟଳମଳ: ସରକାରରେ ରହିବାକୁ ପ୍ରାଣପଣେ ଉଦ୍ୟମ କରୁଛନ୍ତି ଇମ୍ରାନ
ଇସଲାମାବାଦ: ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପାଇଁ ଅଗ୍ନି ପରୀକ୍ଷା । ନିଜ ଦଳ ପାକିସ୍ତାନ ତେହରିକ-ଇ-ଇନସାଫର ୩୦ ସାଂସଦ ଇମ୍ରାନଙ୍କ ବିରୋଧରେ ଅଟଳ ଥିବା ସତ୍ତ୍ୱେ ଇମ୍ରାନ ବିଚଳିତ ହୋଇପଡ଼ିଛନ୍ତି । ସେପଟେ ନିଜ ଦଳର ବିଦ୍ରୋହୀ ସାଂସଦଙ୍କୁ ଅଯୋଗ୍ୟ ଘୋଷଣା କରିବା ଲାଗି ଇମ୍ରାନଙ୍କ ଉଦ୍ୟମ ବିଫଳ ହୋଇଛି । ପାକିସ୍ତାନ ସୁପ୍ରିମକୋର୍ଟ ପ୍ରଧାନ ବିଚାରପତି ସାଂସଦମାନଙ୍କୁ ଅଯୋଗ୍ୟ କରିବା ପ୍ରସଙ୍ଗରେ ସହମତି ନ ଥିବା ସୂଚନା ମିଳିଛି ।
ଅନ୍ୟପଟେ ବିଦ୍ରୋହୀ ସାଂସଦଙ୍କ ବିରୋଧରେ ଧାରା ୬୩-ଏ ଲଗାଇବା ସହ ସେମାନଙ୍କୁ ଅଯୋଗ୍ୟ ଘୋଷଣା କରିବା ଲାଗି ତେହରିକ-ଇ-ଇନସାଫ ପକ୍ଷରୁ ଆଗତ ଏକ ପିଟିସନର ଶୁଣାଣି କରି ଏହି ସୂଚନା ଦେଇଛନ୍ତି କୋର୍ଟ । ସେପଟେ ଇମ୍ରାନ କହିଛନ୍ତି, ସେ ଶେଷ ଯାଏ ସଂଗ୍ରାମ କରିବେ ଏବଂ ସମସ୍ତଙ୍କୁ ଆଶ୍ଚର୍ଯ୍ୟ କଲା ଭଳି କାର୍ଯ୍ୟ ନିହାତି କରିବେ ।
ପିଏମଏଲ-କ୍ୟୁ, ଏମକ୍ୟୁଏମ-ପି ଓ ବାଲୋଚିସ୍ତାନ ଆୱାମି ପାର୍ଟି ଉପରେ ଇମ୍ରାନଙ୍କ ଭବିଷ୍ୟତ ନିର୍ଭର କରୁଛି । ଯଦି ଏହି ତିନି ଦଳ ସମର୍ଥନ ନ କରନ୍ତି ତେବେ ସରକାର ତିଷ୍ଠିବା କଷ୍ଟକର ହେବ । ଯଦିଓ ଇମ୍ରାନ କେଉଁ କେଉଁ ଦଳର ସାଂସଦମାନଙ୍କ ଉପରେ ନିର୍ଭର କରୁଛନ୍ତି ତାହାର ସୂଚନା ମିଳିପାରିନାହିଁ ।
ମାନସ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତଙ୍କୁ ଧରିବାକୁ କ୍ରାଇମବ୍ରାଞ୍ଚର ଛାନଭିନ୍, ରାଜ୍ୟ ବାହାରେ ୨ଟି ଟିମର ଖୋଳତାଡ
ଭଦ୍ରକ: ମାନସ ମର୍ଡର ମାମଲାରେ ତନାଘନା ଜାରି ରଖିଛି କ୍ରାଇମବ୍ରାଞ୍ଚ । ଚାନ୍ଦବାଲିରେ କ୍ରାଇମବ୍ରାଞ୍ଚ ସ୍ପେଶାଲ ଟିମ ଛାନବିନ୍ କରୁଛି । ମୁଖ୍ୟ ଖଳନାୟିକା ଶର୍ମିଷ୍ଠା ପଛରେ କ୍ରାଇମବ୍ରାଞ୍ଚର ବି’ ଟିମ୍ । ଶର୍ମିଷ୍ଠା ରାଜ୍ୟ ବାହାରେ ଆତ୍ମଗୋପନ କରିଥିବା ଖବର ପାଇଛି ତଦନ୍ତକାରୀ ଦଳ । ଦୁଇ ମୋଷ୍ଟ ୱାଣ୍ଟେଡ ମହିଳା ଶର୍ମିଷ୍ଠା ଓ ଝୁନାଙ୍କୁ ଧରିବାକୁ କ୍ରାଇମବ୍ରାଞ୍ଚ ଓ ଭଦ୍ରକ ପୋଲିସର ଦୁଇଟି ଟିମ୍ ରାଜ୍ୟ ବାହରକୁ ଯାଇଛନ୍ତି । ଉଭଙ୍କୁ ଧରିବାକୁ ବି ହୋଇଛି ବ୍ଳୁ-ପ୍ରିଣ୍ଟ । ଶର୍ମିଷ୍ଠାଙ୍କ ମୋବାଇଲ ସୁଇଚଅଫ୍ ଥିବା ବେଳେ ତାଙ୍କୁ ଧରିବା ପାଇଁ ଟେକ୍ନିକାଲ ଇନଭେଷ୍ଟିଗେସନ ଉପରେ ଟିମ୍ ଫୋକସ କରିଛି ।
ସେପଟେ ଭଦ୍ରକ ଏସପି ଓ ଚାନ୍ଦବାଲି ଥାନା ପୋଲିସ ସହିତ ଆଲୋଚନ କରିଛି କ୍ରାଇମବ୍ରାଞ୍ଚର ୫ ଜଣିଆ ଟିମ୍ । ହତ୍ୟାକାଣ୍ଡରେ ନିରଞ୍ଜନ ସେଠୀ ଓ ଶର୍ମିଷ୍ଠାଙ୍କ ଷଡ଼ଯନ୍ତ୍ର ବାବଦରେ ପଚାରି ବୁଝିଛି କ୍ରାଇମବ୍ରାଞ୍ଚର ଏ- ଟିମ । ଚାନ୍ଦବାଲି ଥାନାର ତଦନ୍ତ ରିପୋର୍ଟକୁ ସମୀକ୍ଷା କରିବା ପରେ ଟିମ୍ କିଡନାପ୍ ସ୍ପଟରେ ତଦନ୍ତ କରିଛି । ଶର୍ମିଷ୍ଠା ଧରା ପଡ଼ିଲା ପରେ ମର୍ଡର ପ୍ଳଟର ସତ ସାମ୍ନକୁ ଆସିବ । ଏଣୁ ଶର୍ମିଷ୍ଠାକୁ ଧରିବାକୁ ତନାଘନା ଚଳାଇଛି କ୍ରାଇମବ୍ରାଞ୍ଚ ।
ସୂଚନା ଅନୁସାରେ କ୍ୟାମେରାମ୍ୟାନ ମାନସ ସ୍ୱାଇଁ ହତ୍ୟାକାଣ୍ଡ ମାମଲାରେ ଡିଜିପି କ୍ରାଇମବ୍ରାଞ୍ଚକୁ ତଦନ୍ତ ଭାର ଦେଇଛନ୍ତି । ତଦନ୍ତ ଭାର ଗ୍ରହଣ କରିବା ପରେ କ୍ରାଇମବ୍ରାଞ୍ଚର ୫ ଜଣିବ ଟିମ୍ ଭଦ୍ରକ ଏସପି କାର୍ଯ୍ୟାଳୟରେ ପହଞ୍ଚି ତଦନ୍ତ ଆରମ୍ଭ କରିଥିଲେ । କ୍ରାଇମବ୍ରାଞ୍ଚର ଏହି ୫ଜଣିଆ ଟିମରେ ଡିଏସପି କଳ୍ପନା ସାହୁ, ଇନ୍ସପେକ୍ଟର ବିଶ୍ୱପ୍ରକାଶ ରାଉତ, ସବଇନ୍ସପେକ୍ଟର ଅବଧୂତ ବାରିକ, ଏଏସଆଇ ତନୁଶ୍ରୀ ନାୟକ ଓ ଆଶୁତୋଷ ପ୍ରଧାନ ରହିଛନ୍ତି ।
ଯଦି ଋଷ କୌଣସି ଗୋଟିଏ ବି ରାସାୟନିକ ଅସ୍ତ୍ର ପ୍ରୟୋଗ କରେ ତାହାଲେ…
ୱାସିଂଟନ: ଋଷ ବିରୋଧରେ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ କଡ଼ା ଘୋଷଣା । ଯଦି ୟୁକ୍ରେନରେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ କୌଣସି ଗୋଟିଏ ରାସାୟନିକ ଅସ୍ତ୍ର ପ୍ରୟୋଗ କରନ୍ତି, ତେବେ ନାଟୋ ଏହାର ଜବାବ ଦେବ ବୋଲି ଧମକ ଦେଇଛନ୍ତି ବାଇଡେନ । ବ୍ରସଲେସରେ ଆୟୋଜିତ ନାଟୋ ସମ୍ମିଳନୀରେ ଯୋଗ ଦେଇ ଏହି ଘୋଷଣା କରିଛନ୍ତି ବାଇଡେନ । ୟୁକ୍ରେନକୁ ୨ ବିଲିୟନ ଡଲାର ମୂଲ୍ୟର ଅସ୍ତ୍ରଶସ୍ତ୍ର ଓ ୧ ବିଲିୟନ ଡଲାର ମୂଲ୍ୟର ମାନବିକ ସହାୟତା ଯୋଗାଇବାକୁ ଆମେରିକା ନିଷ୍ପତ୍ତି ନେଇଛି ବୋଲି ବାଇଡେନ ସୂଚନା ଦେଇଛନ୍ତି ।
ବର୍ତ୍ତମାନ ସୁଦ୍ଧା ୟୁକ୍ରେନ ଛାଡିଥିବା ଶରଣାର୍ଥୀଙ୍କ ସଂଖ୍ୟା ୩୭ ଲକ୍ଷ ହୋଇଥିବାବେଳେ ସେମାନଙ୍କ ମଧ୍ୟରୁ ୧ ଲକ୍ଷ ଶରଣାର୍ଥୀଙ୍କୁ ଆମେରିକା ଗ୍ରହଣ କରିବ ବୋଲି ସେ କହିଛନ୍ତି । ସେପଟେ ୟୁକ୍ରେନରେ ମାନବିକ ସଂକଟ ପ୍ରସଙ୍ଗରେ ଋଷର ଏକ ପ୍ରସ୍ତାବ ନେଇ ଜାତିସଂଘ ନିରାପତ୍ତା ପରିଷଦରେ ଭାରତ ସମେତ ୧୨ଟି ରାଷ୍ଟ୍ର ବିରତ ରହିଛନ୍ତି । ସିରିୟା, ଉତ୍ତରକୋରିଆ ଓ ବେଲାଋଷର ସହଯୋଗରେ ଋଷ ଯେଉଁ ପ୍ରସ୍ତାବ ଆଗତ କରିଥିଲା ତାହା ଆବଶ୍ୟକ ସଂଖ୍ୟକ ଭୋଟ ଅଭାବରୁ ଖାରଜ ହୋଇଯାଇଛି । ଏହି ପ୍ରସ୍ତାବ ସପକ୍ଷରେ ଚୀନ ଓ ଋଷ ଭୋଟ ଦେଇଥିବା ବେଳେ, ବିରୋଧରେ କୌଣସି ରାଷ୍ଟ୍ର ଭୋଟ ଦେଇ ନଥିଲେ । ଭାରତ ଓ ଅନ୍ୟାନ୍ୟ ନିରାପତ୍ତା ସଦସ୍ୟ ରାଷ୍ଟ୍ର ଭୋଟଦାନରୁ ବିରତ ରହିଥିଲେ ।
ସେପଟେ ଋଷ ବିରୋଧରେ ଲଢେଇ ଲାଗି ତୁରନ୍ତ ଅତ୍ୟାଧୁନିକ ଲଢୁଆ ଜେଟ, ମିସାଇଲ ଡିଫେନ୍ସ ସିଷ୍ଟମ, ଟ୍ୟାଙ୍କ, ସାଞ୍ଜୁଆ ଯାନ, ଜାହାଜ ବିଧ୍ବଂସୀ କ୍ଷେପଣାସ୍ତ୍ର ଆଦି ଯୋଗାଇବାକୁ ନାଟୋ ସଦସ୍ୟ ରାଷ୍ଟ୍ରକୁ ଆହ୍ବାନ କରିଛନ୍ତି ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି । ଋଷ ଆକ୍ରମଣରେ ମୃତ୍ୟୁ ସଂଖ୍ୟା ବଢୁଥିବାରୁ ଏହି ସଂଖ୍ୟା ରୋକିବା ଲାଗି ତୁରନ୍ତ ଅସ୍ତ୍ରଶସ୍ତ୍ର ସହାୟତା ଜରୁରୀ ବୋଲି ଜେଲେନସ୍କି କହିଛନ୍ତି । ୟୁକ୍ରେନରେ ଋଷ ରାସାୟନିକ ଅସ୍ତ୍ର ପ୍ରୟୋଗ କରିବା ଏକରକମ ନିଶ୍ଚିତ ବୋଲି ସେ ସୂଚନା ଦେଇଛନ୍ତି ।
ନାଟୋ ଓ ଗ୍ରୁପ-7 ରାଷ୍ଟ୍ରର ନେତାଙ୍କୁ ଜେଲେନସ୍କି ମାରିଉପୋଲରେ ଜଳୁଥିବା ଏକ ବୃହତ ଋଷୀୟ ଯୁଦ୍ଧଜାହାଜର ଭିଡିଓ ଫୁଟେଜକୁ ମଧ୍ୟ ଜାରି କରିଛନ୍ତି । ପୂର୍ବରୁ ୟୁକ୍ରେନକୁ ନାଟୋ ବିପୁଳ ଟ୍ୟାଙ୍କ ବିଧ୍ବଂସୀ ରକେଟ ଯୋଗାଇଥିଲା । ସେପଟେ ୟୁକ୍ରେନକୁ ଯୁଦ୍ଧବିମାନ ଓ ଅନ୍ୟାନ୍ୟ ବୃହତ ଅସ୍ତ୍ର ଯୋଗାଇବାକୁ ଅଗ୍ରାହ୍ୟ କରିଛନ୍ତି ବାଇଡେନ । ଯଦି ଆମେରିକା ଏହା ଯୋଗାଏ ତେବେ ତୃତୀୟ ବିଶ୍ବଯୁଦ୍ଧ ଘଟିବ ବୋଲି ବାଇଡେନ କହିଛନ୍ତି । ଋଷ ରାଷ୍ଟ୍ରପତି ପୁଟିନ ଧ୍ବଂସଲୀଳାର ରେଡ ଲାଇନ ପାର୍ ହୋଇଯାଇଛନ୍ତି ବୋଲି କହିଛନ୍ତି ବ୍ରିଟିଶ ପ୍ରଧାନମନ୍ତ୍ରୀ ବୋରିସ ଜନସନ । ତେଣେ ରାସାୟନିକ ଓ ଆଣବିକ ଆକ୍ରମଣର ପ୍ରତିରୋଧ ଲାଗି ରୋମାନିଆ, ହଙ୍ଗେରୀ, ସ୍ଲୋଭାକିଆ ଓ ବୁଲଗେରିଆରେ ସତର୍କତାମୂଳକ ପଦକ୍ଷେପ ନିଆଯିବା ସହ ଅଧିକ ସୈନ୍ୟ ମୁତୟନ କରାଯାଇଛି ବୋଲି କହିଛନ୍ତି ନାଟୋ ମହାସଚିବ ଜେନସ ଷ୍ଟୋଲଟନବର୍ଗ ।
୪ ଦିନରେ ପେଟ୍ରୋଲ ଲିଟର ପିଛା ୨ଟଙ୍କା ୮୦ ପଇସା ବୃଦ୍ଧି
ଭୁବନେଶ୍ୱର: ପୁଣି ବଢିଲା ପେଟ୍ରୋଲ ଡିଜେଲ ଦର । ରୁଷୋ-ୟୁକ୍ରେନ ଯୁଦ୍ଧ ମଧ୍ୟରେ ଭାରତରେ ପେଟ୍ରୋଲ ଏବଂ ଡିଜେଲର ମୂଲ୍ୟ କ୍ରମାଗତ ଭାବେ ବୃଦ୍ଧି ପାଉଛି । ଚାରି ଦିନ ମଧ୍ୟରେ ତୃତୀୟ ଥର ପାଇଁ ପେଟ୍ରୋଲ ଏବଂ ଡିଜେଲ ଦର ବୃଦ୍ଧି ପାଇଛି । ପେଟ୍ରୋଲ ଲିଟର ପିଛା ୮୦ ପଇସା ଓ ଡିଜେଲ ଲିଟର ପିଛା ୮୦ ପଇସା ବୃଦ୍ଧି ପାଇଛି । ଅର୍ଥାତ ଚାରି ଦିନରେ ପେଟ୍ରୋଲ ଲିଟର ପିଛା ୨ଟଙ୍କା ୮୦ ପଇସା ଓ ଡିଜେଲ ଲିଟର ପିଛା ୨ ଟଙ୍କା ୬୭ପଇସା ବୃଦ୍ଧି ପାଇଛି । ଭାରତୀୟ ତତୈଳ ନିଗମ ଅନୁଯାୟୀ ରାଜଧାନୀ ଦିଲ୍ଲୀରେ ୮୦ ପଇସା ବୃଦ୍ଧି ପରେ ଆଜି ମାର୍ଚ ୨୫ ତାରିଖ ସୁଧା ଦିଲ୍ଲୀରେ ଡିଜେଲ୍ ଲିଟର୍ ପିଛା ୮୯.୦୭ଟଙ୍କା ଏବଂ ପେଟ୍ରୋଲ୍ ଲିଟର୍ ପିଛା ୯୭.୮୧ଟଙ୍କା ରହିଛି ।
ପୂର୍ବରୁ ଚଳିତ ସପ୍ତାହର ମଙ୍ଗଳବାର ଏବଂ ବୁଧବାର ଦିନ ଉପରୋକ୍ତ ତୈଳ ଦର ବୃଦ୍ଧି ପାଇଥିଲା। ଯଦି ପୂର୍ବ ରେକର୍ଡ ଦେଖାଯାଏ ତେବେ ତେଲ ଦର ପ୍ରତି ଥର ଲିଟର୍ ପିଛା ମୂଲ୍ୟ ୮୦ ପଇସା ବୃଦ୍ଧି ପାଉଛି। ଭାରତରେ ପେଟ୍ରୋଲ୍ ଏବଂ ଡିଜେଲ୍ ମୂଲ୍ୟ ଇନ୍ଧନର ଚାହିଦା, ଡଲାର୍ ତୁଳନାରେ ଭାରତୀୟ ମୁଦ୍ରାର ମୂଲ୍ୟ ଏବଂ ତୈଳଶୋଧନାଗାରର ବ୍ୟବହାର ଉପରେ ନିର୍ଭର କରେ। ଏହାଛଡ଼ା, ‘ଭାଟ୍’ ଏବଂ ପରିବହନ ମୂଲ୍ୟ ଆଧାରରେ ରାଜ୍ୟ ରାଜ୍ୟ ମଧ୍ୟରେ ଇନ୍ଧନ ମୂଲ୍ୟରେ ତଫାତ୍ ଦେଖା ଦେଇଥାଏ।
ଦର ବୃଦ୍ଧି ପରେ ଭୁବନେଶ୍ବରରେ ପେଟ୍ରୋଲ ଲିଟର ୧୦୩ ଟଙ୍କା ୬୯ ପଇସାରୁ ୧୦୪ ଟଙ୍କା ୫୫ ପଇସାକୁ ବୃଦ୍ଧି ପାଇଛି । ସେହିପରି ଡିଜେଲ ଦର ଲିଟର ପିଛା ୯୩ ଟଙ୍କା ୪୪ ପଇସାରୁ ବୃଦ୍ଧି ପାଇ ୯୪ ଟଙ୍କା ୨୯ ପଇସାରେ ପହଞ୍ଚିଛି । ଲଗାତର ଭାବେ ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଉଥିବାରୁ ଗ୍ରାହକଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି ।
ଇଭିଏମରେ ସିଲ୍ ପ୍ରାର୍ଥୀଙ୍କ ଭାଗ୍ୟ, ଆସନ୍ତାକାଲି ସକାଳ ୮ଟାରୁ ଭୋଟ୍ ଗଣତି
ଭୁବନେଶ୍ୱର: ସରିଲା ଭୋଟ୍ ଆସନ୍ତାକାଲିକୁ ଆସିବ ଫଳାଫଳ । ୩ ମହାନଗର ନିଗମର ୩୫ ମେୟର ପ୍ରାର୍ଥୀଙ୍କ ସମେତ ୬୮୯ କର୍ପୋରେଟର ପ୍ରାର୍ଥୀଙ୍କ ଭାଗ୍ୟ ଇଭିଏମରେ ସିଲ୍ ହୋଇଛି । ସେହିପରି ୧୦୫ଟି ସହରାଞ୍ଚଳର ୫୩୪ ଅଧ୍ୟକ୍ଷ ଏବଂ ୫୧୬୨ କାଉନସିଲର ପ୍ରାର୍ଥୀଙ୍କ ଭାଗ୍ୟ ମଧ୍ୟ ପରୀକ୍ଷା ହୋଇଛି । ମତଦାନ ପରେ ସବୁ ଇଭିଏମକୁ କଡ଼ା ସୁରକ୍ଷା ସହ ଷ୍ଟ୍ରଙ୍ଗ ରୁମରେ ରଖାଯାଇଛି । ପ୍ରତ୍ୟେକ ଷ୍ଟ୍ରଙ୍ଗ ରୁମରେ ସିସିଟିଭି ଲଗାଯିବା ସହ ପ୍ରଶାସନର ନଜର ରହିଛି ।
ଆସନ୍ତାକାଲି ସକାଳ ୮ଟାରୁ କଡ଼ା ସୁରକ୍ଷା ମଧ୍ୟରେ ଭୋଟ ଗଣତି କରାଯିବ । ସେପଟେ ନବରଙ୍ଗପୁର ଜିଲ୍ଲା ଉମରେକାଟ ପୌରାଞ୍ଚଳର ୮ ନମ୍ବର ଓ୍ବାର୍ଡରେ ଇଭିଏମରେ ଭୁଲ୍ ବାଲଟ ପେପର ଯୋଗୁଁ ଅଧ୍ୟକ୍ଷ ପଦ ପାଇଁ ନିର୍ବାଚନ ସ୍ଥଗିତ ରଖାଯାଇଛି । ଏଠାରେ ଆଜି ସାନି ନିର୍ବାଚନ କରାଯିବ। ସେହିପରି ଭଦ୍ରକ ଜିଲ୍ଲାର ଭଦ୍ରକ ପୌରାଞ୍ଚଳ ଏବଂ ନବ ଗଠିତ ଧାମନଗର ଏନଏସିର କିଛି ଜାଗାରେ ଉତ୍ତେଜନା ସୃଷ୍ଟି ହୋଇଥିବାରୁ ଏଠାରେ ସାନି ନିର୍ବାଚନ ହୋଇପାରେ ବୋଲି ରାଜ୍ୟ ନିର୍ବାଚନ କମିଶନର ସୂଚନା ଦେଇଛନ୍ତି । ଜିଲ୍ଲାପାଳଙ୍କ ବିସ୍ତୃତ ରିପୋର୍ଟ ପରେ ପୁନଃ ନିର୍ବାଚନ ତାରିଖ ଘୋଷଣା କରାଯିବ ବୋଲି କହିଛନ୍ତି ରାଜ୍ୟ ନିର୍ବାଚନ କମିଶନର ।
ତ୍ରିସ୍ତରୀୟ ପଞ୍ଚାୟତ ବ୍ୟବସ୍ଥାର ଶେଷ ପରୋକ୍ଷ ନିର୍ବାଚନ
ଭୁବନେଶ୍ୱର: ଆଜି ତ୍ରିସ୍ତରୀୟ ପଞ୍ଚାୟତ ବ୍ୟବସ୍ଥାର ଶେଷ ପରୋକ୍ଷ ନିର୍ବାଚନ । ଜିଲ୍ଲା ପରିଷଦ ଉପସଭାପତି ପାଇଁ ନିର୍ବାଚନ ହେବ । ନିର୍ବାଚିତ ହୋଇଥିବା ଜିଲ୍ଲାପରିଷଦ ସଦସ୍ୟ ମାନେ ଉପସଭାପତି ନିର୍ବାଚିତ କରିବେ । ଏଥିପାଇଁ ସକାଳ ୧୦ଟା ୩୦ରୁ ୧୧ଟା ୩୦ ମଧ୍ୟରେ ପ୍ରାର୍ଥୀମାନେ ନାମାଙ୍କନ ଦାଖଲ କରିବେ । ପରେ ୧୨ଟା ୩୦ ମଧ୍ୟରେ ପ୍ରାର୍ଥିପତ୍ର ଯାଞ୍ଚ କରାଯିବ ।
ଅପରାହ୍ନ ଗୋଟାଏରୁ ୪ଟା ଭିତରେ ଭୋଟିଂ ହେବ । ପଞ୍ଚାୟତ ନିର୍ବାଚନରେ ୮୫୨ ଆସନରୁ ଶାସକ ବିଜେଡି ଏକାକି ୭୬୬ ଆସନ ନେଇଥିବା ବେଳେ, ବିଜେପି ୪୨ ଓ କଂଗ୍ରେସ ୩୭ ଆସନ ପାଇଛି । ବିଜେଡି ସବୁ ଜିଲ୍ଲା ପରିଷଦ ସଭାପତି ଆସନ ହାତେଇଛି । ଏଣୁ ସବୁଠି ଉପସଭାପତି ପଦ ମଧ୍ୟ ବିଜେଡି ହାତେଇବ ବୋଲି ସ୍ପଷ୍ଟ ହୋଇଛି । ନିର୍ବାଚନରେ ଦଳବଦଳ ନିରୋଧ ଆଇନ ଲାଗୁ ହେଉଥିବାରୁ ଦଳୀୟ ଚିହ୍ନରେ ଲଢ଼ି ନିର୍ବାଚିତ ହୋଇଥିବା ଜିଲ୍ଲା ପରିଷଦ ସଭ୍ୟ ମାନେ ଦଳୀୟ ପ୍ରାର୍ଥୀଙ୍କୁ ଭୋଟ୍ ନିଜ ଦଳର ପ୍ରତିନିଧିଙ୍କୁ ଦେଖାଇବେ ।