ଭୁବନେଶ୍ବର: ଶତ ପ୍ରତିଶତ କୋ-ଲାଟେରାଲ୍ ସିକ୍ୟୁରିଟି ଦେଲେ ମିଳିବ ଋଣ । ହତାଶ କଲାଣି ଏମ୍ଏସ୍ଏମ୍ଇ ଶିଳ୍ପକୁ ରାଷ୍ଟ୍ରାୟତ୍ତ ବ୍ୟାଙ୍କଙ୍କ ସର୍ତ୍ତ । ଏହି ନୀତିକୁ ବଦଳାଇବାକୁ କେନ୍ଦ୍ର ଆଗରେ ଗୁହାରୀ ପରେ ବି ମିଳୁନି ଫଳ । ଏବେ ରାଜ୍ୟସଭା ପିଟିସନ୍ କମିଟି ଆଗରେ ଫେରାଦ ଦେଇଛି ଶିଳ୍ପ ସଂଘ । ବିଜେଡିର ରାଜ୍ୟସଭା ସଂସଦୀୟ ଦଳ ନେତା ତଥା ରାଜ୍ୟସଭା ପିଟିସନ୍ କମିଟି ଅଧ୍ୟକ୍ଷ ପ୍ରସନ୍ନ ଆଚାର୍ଯ୍ୟଙ୍କ ନେତୃତ୍ବରେ ସୋମବାର ମୁମ୍ବାଇ ଗସ୍ତ କରିଛି କମିଟି । ସେଠାରେ ଅନ୍ୟ ପ୍ରସଙ୍ଗ ସହ ଏମ୍ଏସ୍ଏମ୍ଇ ଶିଳ୍ପକୁ କିପରି ସୁବିଧାରେ ଋଣ ମିଳିବ ସେ ନେଇ ରିଜର୍ଭ ବ୍ୟାଙ୍କ ଗଭର୍ଣ୍ଣରଙ୍କ ସମେତ ବିଭିନ୍ନ ରାଷ୍ଟ୍ରାୟତ୍ତ ବ୍ୟାଙ୍କ କର୍ତ୍ତୃପକ୍ଷଙ୍କ ସହ କମିଟି ଆଲୋଚନା କରିବ । ରାଜ୍ୟରେ ଥିବା ୫ ଲକ୍ଷ ଏମ୍ଏସ୍ଏମ୍ଇ ୟୁନିଟ ନଗଦ ପୁଞ୍ଜି ଅଭାବରୁ ଆବଶ୍ୟକ ଉତ୍ପାଦନ କରିପାରୁନାହାନ୍ତି । ଯଦି ଋଣ ମିଳୁଛି ତା’ହେଲେ ୯ରୁ ୧୦ ପ୍ରତିଶତ ସୁଧ ଗଣିବାକୁ ପଡ଼ୁଛି । ଏପରିକି କୌଣସି କାରଣରୁ ୩ ମାସ ଋଣ କିସ୍ତି ମିଳୁନି ତା’ହେଲେ ପରବର୍ତ୍ତୀ କିସ୍ତି ଦେଲା ବେଳକୁ ବ୍ୟାଙ୍କମାନେ ୧୪ ପ୍ରତିଶତ ସୁଧ କଷୁଛନ୍ତି ବୋଲି ଶିଳ୍ପ ସଂଘ ଅଭିଯୋଗ କରିଛି ।

କୋଭିଡ ମହାମାରୀ ଯୋଗୁଁ ରାଜ୍ୟରେ ଏମ୍ଏସ୍ଏମ୍ଇ ୟୁନିଟଗୁଡିକ ବହୁ ପରିମାଣରେ ପ୍ରଭାବିତ ହୋଇଥିଲେ । କୋଭିଡ କଟକଣା ମଧ୍ୟରେ ଶିଳ୍ପ ପାଇଁ ପୂର୍ବରୁ ନେଇଥିବା ଋଣ ଉପରେ ଅତିରିକ୍ତ ୧୦ ପ୍ରତିଶତ ଋଣ ସହାୟତା ବ୍ୟାଙ୍କମାନେ ଦେଇଥିଲେ । କିନ୍ତୁ ମହାମାରୀ କଟକଣା ଯୋଗୁଁ କର୍ମଚାରୀ ଛଟେଇ ଓ କଞ୍ଚାମାଲ ଅଭାବରୁ ଉତ୍ପାଦନ ବାଧାପ୍ରାପ୍ତ ହେଲା । ଦୁର୍ଦ୍ଦିନରେ ଏମ୍ଏସ୍ଏମ୍ଇ ଥିବାବେଳେ ଋଣ ଅନାଦେୟ ହୋଇଥିବା ୟୁନିଟ୍ ଗୁଡ଼ିକୁ ବ୍ୟାଙ୍କ ସିଲ୍ କରିଦେବା ଆରମ୍ଭ କରିଛନ୍ତି । ଯେତେ କୋ-ଲାଟେରାଲ୍ ସିକ୍ୟୁରିଟି ଦେଲେ ବି ସର୍ବାଧିକ ଋଣ ପରିମାଣ ୨ କୋଟିରୁ ଅଧିକ ମିଳୁନି । ଋଣ ପରିମାଣକୁ ବୃଦ୍ଧି କରିବା ସହିତ ବ୍ୟାଙ୍କମାନେ ଯେପରି ୟୁନିଟ୍ ସିଲ ନ କରିବେ ସେ ନେଇ ଦାବି ରଖିଛନ୍ତି ଏମ୍ଏସ୍ଏମ୍ଇ ଉଦ୍ୟୋଗୀ ।

ଶିଳ୍ପମାନଙ୍କର ବିଭିନ୍ନ ସମସ୍ୟା ନେଇ ମୁମ୍ବାଇରେ ବ୍ୟାଙ୍କର୍ସମାନଙ୍କ ସହ ଆଲୋଚନା କରିବ ରାଜ୍ୟ ସଭା ପିଟିସନ୍ କମିଟି । ମୁମ୍ବାଇ ପରେ କମିଟି ମଦୁରାଇ ଯିବାର କାର୍ଯ୍ୟକ୍ରମ ରହିଛି । ଏମ୍ଏସ୍ଏମ୍ଇ ଶିଳ୍ପ ସମସ୍ୟା ନେଇ କମିଟି କେନ୍ଦ୍ର ସରକାରଙ୍କୁ କ’ଣ ସୁପାରିସ କରୁଛି ତାକୁ ନେଇ ଉଦ୍ୟୋଗୀମାନେ ଆଶା ବାନ୍ଧିଛନ୍ତି ।

ଭୁବନେଶ୍ବର: କମିଛି କେନ୍ଦ୍ରୀୟ ଅନୁଦାନ । ରାଜ୍ୟକୁ ୯୫୦୦ କୋଟି ଟଙ୍କା କମ୍‌ ମିଳିଛି । ଘେରିଲେ ବିଜେଡି ଓ କଂଗ୍ରେସ । ରାଜ୍ୟ ସ୍ବାର୍ଥ ଭୁଲି କେନ୍ଦ୍ର ପାଇଁ ଓକିଲାତି କଲା ବିଜେପି । ସ୍ବତନ୍ତ୍ର ରାଜ୍ୟ ପାହ୍ୟା, ଫୋକସ ଷ୍ଟେଟ୍‌ କି ସ୍ବତନ୍ତ୍ର ପ୍ୟାକେଜ୍‌, ସବୁକୁ କେନ୍ଦ୍ରର ନା । ପୁଣି ଅନୁଦାନ ଦେବାରେ ଟାଳଟୁଳ ନୀତି । ଟିକସ ଅଂଶଧନ ଓ  ଅନୁଦାନ ଦେବାରେ ବି ବୈମାତୃକ ମନୋଭାବ । ବର୍ଷ ବର୍ଷ ଧରି ରାଜ୍ୟ ପ୍ରତି କେନ୍ଦ୍ରର ଏପରି ମନୋଭାବ ରାଜ୍ୟ ଅର୍ଥନୀତିକୁ ଦୋହଲାଇ ଦେଇଛି । ୨୦୧୯-୨୦ ଆର୍ଥିକବର୍ଷରେ କେନ୍ଦ୍ରୀୟ ଅନୁଦାନ ବାବଦରେ ୨୪,୧୫୨,୧୦ କୋଟି ଟଙ୍କା ମିଳିଥିଲା । ୨୦୨୦-୨୧ ଆର୍ଥିକ ବର୍ଷରେ ଏ ବାଦରେ ଓଡ଼ିଶା ପାଇଥିଲା ୨୩,୦୦୬, ୩୪ କୋଟି ଟଙ୍କା । ୨୦୨୧-୨୨ରେ ଅନୁଦାନ ଆହୁରି କମିଛି । ଏହିବର୍ଷ ରାଜ୍ୟ ସରକାର ୨୦,୪୫୬,୬୭ କୋଟି ଟଙ୍କା ପାଇଛନ୍ତି । କେନ୍ଦ୍ର ଉଭୟ ଟିକସ ଅଂଶଧନ ଓ ଅନୁଦାନ କମାଇଥିବାରୁ ଦୃଢ଼ ବିରୋଧ କରିଛନ୍ତି ବିଜେଡି ଓ କଂଗ୍ରେସ ।

୨୦୨୧-୨୨ ଆର୍ଥିକ ବର୍ଷରେ ଟିକସ ଅଂଶଧନ ଓ ଅନୁଦାନ ବାବଦରେ ରାଜ୍ୟ ସରକାର କେନ୍ଦ୍ରରୁ ୫୮,୧୬୦ କୋଟି ଟଙ୍କା ପାଇଛି । ଯାହାକି ଆକଳନଠାରୁ ପ୍ରାୟ ୯୫୦୦ କୋଟି ଟଙ୍କା କମ୍ । ସେହିପରି ଓଡ଼ିଶା କୋଇଲା ସେସରୁ‌ ୬୦ ପ୍ରତିଶତ ଦାବି କରି ଆସୁଛି । କେନ୍ଦ୍ର କୋଇଲା ମନ୍ତ୍ରୀ ପ୍ରହଲାଦ ଯୋଶୀଙ୍କ ସହ ସାକ୍ଷାତ ସମୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କୋଇଲା ସେସରୁ ୬୦ ପ୍ରତିଶତ ଦାବି କରିଥିଲେ । ତେବେ ଏ ସମ୍ପର୍କରେ କୌଣସି ପ୍ରତିଶ୍ରୁତି ମିଳିନାହିଁ । ଏତେ ସବୁ ପରେ ବିଜେପି ରାଜ୍ୟ ସ୍ବାର୍ଥ ଭୁଲି କେନ୍ଦ୍ର ପାଇଁ ଓକିଲାତି କରୁଛି ।

କେନ୍ଦ୍ର ସରକାର ଅନୁଦାନ ହ୍ରାସ କରୁଥିବା ବେଳେ ରାଜ୍ୟରୁ ଆଦାୟ କରୁଥିବା ସେସରୁ ଟଙ୍କାଟିଏ ମଧ୍ୟ ରାଜ୍ୟକୁ ଦେଉନାହିଁ । ଏଥିପାଇଁ ବାରମ୍ବାର ରାଜ୍ୟ ପ୍ରତିବାଦ କରୁଛି।