ନୂଆଦିଲ୍ଲୀ: ବିଗତ ୧୧ ବର୍ଷରୁ ୯ ବର୍ଷ ଧରି ଟ୍ବିଟର କିଛି ବି ଲାଭ କିରିନି । କହିବାକୁ ଗଲେ କେବଳ ଘାଟା ହିଁ ସହିଛି । କିନ୍ତୁ ଏଭଳି ଘାଟାରେ ଚାଲୁଥିବା କମ୍ପାନୀକୁ କାହିଁକି ଏତେ ଟଙ୍କା ଦେଇ କିଣିଲେ ଏଲନ୍ ମସ୍କ ? କ’ଣ ଥାଇପାରେ ଏହା ପଛର କାରଣ ?
ଏଠାରେ ଆମେ କହି ରଖିବାକୁ ଚାହୁଁଛୁ ଯେ, ଏଲନ ମସ୍କ ଟ୍ବିଟରକୁ ପଇସା ପାଇଁ ନୁହେଁ ପ୍ରଭାବ ପାଇଁ କିଣିଛନ୍ତି । ଲୋକଙ୍କୁ ସ୍ବାଧିନତା ଦେବାକୁ ଯାଇ ଟ୍ବିଟର ପକ୍ଷୀକୁ ସେ ନିଜ ପିଞ୍ଜରାରେ ରଖିବାକୁ ପସନ୍ଦ କରିଛନ୍ତି ।
ଟ୍ବିଟର ଭଳି ଘାଟାରେ ଚାଲୁଥିବା କମ୍ପାନୀକୁ ଏତେ ଟଙ୍କାରେ କିଣି ଥିବାରୁ ଅନ୍ୟ କମ୍ପାନୀମାନେ ଏବେ ଚିନ୍ତାରେ ପଡ଼ିଯାଇଛନ୍ତି । ଗତବର୍ଷ ଟ୍ବିଟରକୁ ୧୬ଶହ ୯୦ କରୋଡର ଘାଟା ହୋଇଥିଲା । ୨୦୨୦ରେ ଏହା ୧୦ହଜାର ୬ଶହ କରୋଡ ଘାଟାରେ ଥିଲା । କହିବାକୁ ଗଲେ ପୂରା ୯ ବର୍ଷ କମ୍ପାନୀ ଘାଟାରେ ହିଁ ଚାଲିଥିଲା ।
ଏଠାରେ ଆପଣ ଭାବୁଥିବେ ଏତେ ଘାଟାରେ ଚାଲୁଥିବା ଟ୍ବିଟରକୁ ଏଲନ୍ ମସ୍କ କାହିଁକି କିଣିଲେ ? ଟ୍ବିଟରରେ ଏମିତି କ’ଣ ଅଛି ଯେ, ତାଙ୍କୁ ଘାଟା ହେବା ବି ଘାଟା ଭଳି ଲାଗିଲାନି ।
ଏହାକୁ ନେଇ ଏଲନ ମସ୍କ କହିଛନ୍ତି ଯେ, ସେ ଟଙ୍କା ପାଇଁ ଟ୍ବିଟରକୁ କିଣି ନାହାଁନ୍ତି । ସେ ଏହି ସୋସିଆଲ ମିଡିଆ କିଣି ବ୍ୟକ୍ତିର ବାକ୍ ସ୍ବାଧିନତା ଉପରେ କୌଣସି ରୋକ୍ ଲଗାଇବାକୁ ଚାହାନ୍ତି ନାହିଁ। କାରଣ ଆଜିକାଲି ସୋସିଆଲ ମିଡିଆ ଯୁଗରେ ଏଲନ୍ ଜାଣିଛନ୍ତି ଯେ, ଟ୍ବିଟରରେ ଜଣେ ବ୍ୟକ୍ତିର ଭାବ ଯାହା କରିପାରିବ ତାହା କୌଣସି ବମ୍ ବି କରିପାରିବ ନାହିଁ । ଏଥିପାଇଁ ଟ୍ବିଟରର ଗୁରୁତ୍ବ ବୁଝି ଏଲନ୍ ଏହାକୁ କିଣିଛନ୍ତି । ଏହା ତାଙ୍କ ହାତକୁ ଆସିଲେ ସେ ଦୁନିଆର ବଡ଼ ବଡ଼ ନେତା, ଅଭିନେତା, ବ୍ୟବସାୟୀ, ଖେଳାଳି ଏବଂ ଅନେକ ବଡ଼ ବଡ଼ ବ୍ୟକ୍ତିତ୍ବଙ୍କୁ ପ୍ରଭାବିତ କରିପାରିବେ । ସେ ଟ୍ବିଟର ସଫ୍ଟ ପାଓ୍ବାରର ବ୍ୟବହାର କରିବାକୁ ଚାହୁଁଛନ୍ତି ।
ଏକ ରିପୋର୍ଟରୁ ଜଣାପଡ଼ିଛି ଯେ, ଟ୍ବିଟରକୁ ସବୁଠୁ ଅଧିକା ଲୋକ କେବଳ ଖବର ପାଇଁ ବ୍ୟବହାର କରନ୍ତି । ଆମେରିକାରେ ସବୁଠୁ ଅଧିକା ଲୋକ ଟ୍ବିଟର ବ୍ୟବହାର କରିଥାନ୍ତି । ଏହା ପରେ ଅଛି ଜାପାନ ଏବଂ ଟ୍ବିଟରକୁ ଅଧିକା ବ୍ୟବହାର କାରୁଥିବା ଦେଶ ଭିତରେ ଆମ ଦେଶର ସ୍ଥାନ ତୃତୀୟ ।
ଏଠାରେ ଆମେ କହିରଖିବାକୁ ଚାହୁଁଛୁ ଯେ, ଏଲନ୍ ମସ୍କ ହେଉଛନ୍ତି ବିଶ୍ବର କୋଟିପତି ବ୍ୟବସାୟୀଙ୍କ ମଧ୍ୟରୁ ଜଣେ । ସେ ଗତକାଲି ଟ୍ବିଟରକୁ ୪୪ ବିଲିୟନ୍ ଡଲାରରେ କିଣିଛନ୍ତି ।
ଭୁବନେଶ୍ବର: ଜଣାଶୁଣା ଟିଭି ଉପସ୍ଥାପକ, ବୈଦ୍ୟୁତିକ ଗଣମାଧ୍ୟମର ବରିଷ୍ଠ ସାମ୍ବାଦିକ ସ୍ବୟଂପ୍ରକାଶ ମହାପାତ୍ର ବିଜେଡିରେ ସାମିଲ ହୋଇଛନ୍ତି । ବିଜେଡ଼ି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ଦଳର ସାଧାରଣ ସମ୍ପାଦକ (ଗଣମାଧ୍ୟମ ବ୍ୟାପାର) ମାନସ ରଞ୍ଜନ ମଙ୍ଗରାଜଙ୍କ ଉପସ୍ଥିତିରେ ସେ ବିଧିବଦ୍ଧ ଭାବରେ ଦଳରେ ସାମିଲ ହୋଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବଚ୍ଛ ଶାସନ ଓ ଆଦର୍ଶରେ ଅନୁପ୍ରାଣିତ ହୋଇ ସେ ବିଜେଡିରେ ଯୋଗ ଦେଇଛନ୍ତି । ଦଳ ତାଙ୍କୁ ଯେଉଁ ଦାୟିତ୍ବ ଦେବ ତାହା ସେ ନିର୍ବାହ କରିବେ ବୋଲି କହିଛନ୍ତି । ଗତ ପ୍ରାୟ ୧ ଦଶନ୍ଧି ଧରି ଏକାଧିକ ଓଡ଼ିଆ ବୈଦ୍ୟୁତିକ ଗଣମାଧ୍ୟମରେ ବିଭିନ୍ନ ପଦରେ କାର୍ଯ୍ୟ କରିଛନ୍ତି ସ୍ବୟଂପ୍ରକାଶ ।
ଭୁବନେଶ୍ବର: ଖରାରେ ସିଝୁଛି ସାରା ଓଡ଼ିଶା । ଅସହ୍ୟ ଗରମ ଓ ନାହିଁ ନଥିବା ଗୁଳୁଗୁଳି । ଅସ୍ତବ୍ୟସ୍ତ ଜନଜୀବନ । ଆଜି ୪୦ ଡିଗ୍ରୀ ଉପରେ ରହିଛି ରାଜ୍ୟର ୨୪ ସହରର ତାପମାତ୍ରା । ୪ଟି ସହର ତାପମାତ୍ରା ପାର କରିଛି ୪୪ ଡିଗ୍ରୀ । ୪୪.୫ ଡିଗ୍ରୀ ସହିତ ସୋନପୁର ପାଲଟିଛି ସବୁଠୁ ଉତ୍ତପ୍ତ ସହର ।
ଆଜି ଭୁବନେଶ୍ବର ତାପମାତ୍ରା ମଧ୍ୟ ୪୦ ଡିଗ୍ରୀ ପାର କରିଛି । ରାଜଧାନୀରେ ୪୦.୩ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ଆସନ୍ତା ୫ ଦିନ ଯାଏଁ ତାତିରୁ ତ୍ରାହି ମିଳିବନି ବୋଲି ସତର୍କ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ୩୦ ତାରିଖ ଯାଏଁ ସ୍ବାଭାବିକଠାରୁ ୨ରୁ ୩ ଡିଗ୍ରୀ ତାପମାତ୍ରା ବଢିବ । ଆଭ୍ୟନ୍ତରିଣ ଓଡ଼ିଶାରେ ୩ରୁ ୫ ଡିଗ୍ରୀ, ଉପକୂଳରେ ୨ରୁ ୩ ଡିଗ୍ରୀ ତାପମାତ୍ରା ବଢିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ୨୯ ତାରିଖ ଯାଏଁ ୧୧ ଜିଲ୍ଲା, ୩୦ ଯାଏଁ ୮ ଜିଲ୍ଲାରେ ହିଟ୍ଓ୍ବେଭ୍ ପ୍ରଭାବ ରହିବ । ରାଜ୍ୟର କିଛି ସ୍ଥାନରେ ତାପମାତ୍ରା ୪୭ ଡିଗ୍ରୀ ଛୁଇଁବା ନେଇ ଆଶଙ୍କା କରାଯାଉଛି । ତାପମାତ୍ରା ବୃଦ୍ଧିକୁ ଦୃଷ୍ଟିରେ ରଖି କିଛି ଜିଲ୍ଲାକୁ ୟେଲୋ ଓ୍ବାର୍ଣ୍ଣିଂ ଜାରି କରାଯାଇଛି ।
ଭୁବନେଶ୍ବର: ରାଜଧାନୀ ଭୁବନେଶ୍ବରରେ ପିଲା ଚୋରି ଅଭିଯୋଗ । ୨୦ ହଜାର ଟଙ୍କାରେ ୧୧ ବର୍ଷର ପିଲାକୁ ବିକିବାକୁ ଉଦ୍ୟମ । ପିଲା ଚୋରି ଅଭିଯୋଗରେ ସ୍ବାମୀ ସ୍ତ୍ରୀ ଥାନାରେ ଅଟକ । ନୟାଗଡ଼ର ଦମ୍ପତିଙ୍କୁ ଖଣ୍ଡଗିରି ଥାନାରେ ଅଟକ ରଖି ପଚରାଉଚରା କରୁଛି ପୋଲିସ ।
ଗତକାଲି ଜାଗମରା ଗାଁରୁ ୧୧ ବର୍ଷର ପିଲାକୁ ଚୋରି କରିନେଇଥିଲେ ଦମ୍ପତି । ଆଉ ୩ ଜଣ ପିଲାଙ୍କୁ ମଧ୍ୟ ଟଙ୍କା ଲୋଭ ଦେଖାଇ ନେବାକୁ ଚେଷ୍ଟା କରିଥିଲେ । ତେବେ ଖୋର୍ଦ୍ଧା ପୁବୁସାହି ନିକଟରୁ ନିଖୋଜ ପିଲା ଉଦ୍ଧାର ହୋଇଛି । ଘରୋଇ ବସ ଯୋଗେ ରାଜ୍ୟ ବାହାରକୁ ନେବାକୁ ଉଦ୍ୟମ କରିଥିଲେ । ପିଲାଟିକୁ ପରିବାରକୁ ହସ୍ତାନ୍ତର ପରେ ସ୍ବାମୀ ସ୍ତ୍ରୀଙ୍କୁ ପଚରା ଉଚରା କରୁଛି ପୋଲିସ ।
ମସ୍କୋ: ଏବେ ବିପଦରେ ୟୁକ୍ରେନକୁ ସାହାଯ୍ୟ କରୁଥିବା ଦେଶ । ରୁଷ-ୟୁକ୍ରେନ୍ ଯୁଦ୍ଧରେ ଖୋଲାଖୋଲି ୟୁକ୍ରେନକୁ ସାହାଯ୍ୟ କରୁଥିବା ଦେଶଗୁଡ଼ିକପାଇଁ ଏବେ ମହଙ୍ଗା ପଡ଼ିଲାଣି । ଏବେ ନାଟୋ ଦେଶ ଉପରେ ରୁଷ ବିଭିନ୍ନ ପ୍ରକାର ପ୍ରତିବନ୍ଧକ ଲଗାଇବା ଦେଖାଦେଲାଣି ।
ଏବେ ପୋଲାଣ୍ଡ ଏବଂ ବୁଲେଗରିଆକୁ ଗ୍ୟାସ ଏବଂ ତେଲ ରପ୍ତାନି କରିବା ବନ୍ଦ କରିଦେଇଛି ରୁଷ । ଯୁଦ୍ଧ ଆରମ୍ଭ ହେବା ପରେ ଏହି ଦେଶ ଗୁଡିକ ତେଲ ଏବଂ ଗ୍ୟାସ ପାଇଁ ଋଷ ମୁଦ୍ରା ରୁବେଲ ହିସାବରେ ଦାମ୍ ଦେବାକୁ କହିଥିଲେ ବି ଏହାକୁ ଅନ୍ୟ ରାଷ୍ଟ୍ରମାନେ ଗ୍ରହଣ କରିନଥିଲେ । ଏହା ଉପରେ ରୁଷ ରାଗିଯାଇ ପ୍ରତିଶୋଧ ନେବା ଆରମ୍ଭ କରିଛି ।
ପୋଲାଣ୍ଡ ଏବଂ ବୁଲେଗରିଆର କହିବା କଥା ହେଲା ରୁଷର ଦିଗଜ ଉର୍ଜା ନାମକ କମ୍ପାନୀ ଗ୍ୟାସ ଏବଂ ତେଲ ରପ୍ତାନୀ ବନ୍ଦ କରିବା କଥା କହି ସିଧା ବନ୍ଦ କରି ଦେଇଥିଲା ।
ଏଠାରେ ଆମେ କହି ରଖିବାକୁ ଚାହୁଁଛୁ ଯେ, ୟୁକ୍ରେନ ଉପରେ ଋଷର ଆକ୍ରମଣ ପରେ ପୋଲାଣ୍ଡ ଆରମ୍ଭରୁ ହିଁ ୟୁକ୍ରେନକୁ ସହଯୋଗ କରିଆସିଛି । ଯୁଦ୍ଧ ଲଢିବାକୁ ମଧ୍ୟ ୟେୁକ୍ରେନକୁ ଅସ୍ତ୍ର ଯୋଗାଇଛି ପୋଲାଣ୍ଡ । ଏହି ସପ୍ତାହରେ ୟୁକ୍ରେନକୁ ଯୁଦ୍ଧ ଟ୍ୟାଙ୍କ ପଠାଇବାକୁ ମଧ୍ୟ କହିଥିଲେ ପୋଲାଣ୍ଡ ସରକାର । ଏହାକୁ ନେଇ ଏବେ ରାଗିଯାଇଛି ଋଷ । ବହୁ ମାତ୍ରାରେ ରୁଷରୁ ଆସୁଥିବା ବିଜୁଳି ଶକ୍ତି ଏବଂ ଇନ୍ଧନ ଗ୍ୟାସ ରପ୍ତାନିର ସବୁ ବାଟ ବନ୍ଦ କରିଦେଇଛି।
ମନ୍ଦିରରେ ଜୋତା ଚପଲ ହଜିବା କିମ୍ବା ଚୋରି ହେବା ଅତ୍ୟନ୍ତ ସାଧାରଣ କଥା । ସେମିତିରେ ଦେଖିଲେ ଏହା ଏକ କ୍ଷତି । କିନ୍ତୁ ଜ୍ୟୋତିଷ ଶାସ୍ତ୍ର ଅନୁସାରେ ଜୋତା ଚୋରି ହେବା ଏକ ଶୁଭ ସଂକେତ । ବିଶେଷ ରୂପରେ ଶନିବାର ଦିନ ଜୋତା ଚପଲ ଚୋରି ହେଲେ ଖୁବ ଶୀଘ୍ର ଖରାପ ସମୟରୁ ମୁକ୍ତି ମିଳିଥାଏ । ଜ୍ୟୋତିଷ ଶାସ୍ତ୍ର ଅନୁସାରେ ଜୋତା-ଚପଲ ଚୋରି ହେବାର ମାନ୍ୟତା ରହିଛି । କୁହାଯାଏ ଏହା ଦ୍ୱାରା ଦରିଦ୍ରତା ଦୂର ହୋଇଥାଏ ଏବଂ ଗ୍ରହ ଦୋଷ ମଧ୍ୟ ଦୂର ହୋଇଥାଏ ।
ଗ୍ରହ ଦୋଷ ଏବଂ ତାହାର ଉପାୟ
ଜ୍ୟୋତିଷ ଶାସ୍ତ୍ର ଅନୁସାରେ ଯେଉଁ ଲୋକମାନଙ୍କ ଜାତକରେ ଗ୍ରହ ଦୋଷ ଥାଏ ସେମାନଙ୍କୁ ସହଜରେ ସଫଳତା ମିଳି ପାରି ନଥାଏ । ଗ୍ରହ ଗୁଡିକର ଦୋଷକୁ ଦୂର କରିବା ପାଇଁ ଉପାୟ ମଧ୍ୟ ରହିଛି । ଯାହାକୁ କରିବା ଦ୍ୱାରା ଜାବନରେ ସକାରତ୍ମକ ଫଳ ମିଳିବାର ସଂଭାବନା ବଢିଯାଇଥାଏ । ଜାତକର ଦୋଷକୁ ଦୂର କରିବା ପାଇଁ ପ୍ରତ୍ୟେକ ଦିନ ସୂର୍ଯ୍ୟଙ୍କୁ ଜଳ ଅର୍ପଣ କରିବା, ଶିବଲିଙ୍ଗ ଉପରେ ଜଳ ଢାଳିବା, ନିୟମିତ ଭାବେ ମନ୍ଦୀର ଯିବା ଏବଂ ହନୁମାନ ଚାଳିଶା ପାଠ କରିବା ଉଚିତ । ଏହା କରିବା ଦ୍ୱାରା ଜାତକର ସମସ୍ତ ସମସ୍ୟା ଏବଂ ଗ୍ରହ ଦୋଷ ଅନେକ ମାତ୍ରାରେ କମ ହୋଇଥାଏ ।
ମନ୍ଦିରରେ ଜୋତା-ଚପଲ ଚୋରି ହେବା
ଯଦି ଶନିବାର ଦିନ କୌଣସି ବ୍ୟକ୍ତିଙ୍କର ଜୋତା-ଚପଲ ଚୋରି ହୁଏ ତେବେ ଏହା ଏକ ଶୁଭ ସଂକେତ । ଏହାର କାରଣ ଶନିଙ୍କ କାରଣରୁ ସୃଷ୍ଟି ସମସ୍ୟା ସାମ୍ନା କରିବା ପାଇଁ ପଡିବ ନାହିଁ । ଶନିଙ୍କ ନ୍ୟାୟାଧିଶ କୁହାଯାଏ ତେଣୁ ଶନି ଗହ ଅଶୁଭ ହୋଇଥିଲେ କୌଣସି କାମରେ ସଫଳତା ମିଳିନଥାଏ ଏବଂ ବାରମ୍ବାର କାମ ବିଗିଡି ଥାଏ । ଏଥିପାଇଁ ମନ୍ଦୀରରେ ଜୋତା କିମ୍ବା ଚପଲ ଚୋରି ହେବା ଶୁଭ ସଂକେତ ରୂପେ ଗ୍ରହଣ କରାଯାଇଥାଏ ।
ପାଦରେ ବାସ କରିଥାନ୍ତି ଶନି
ଜ୍ୟୋତିଷ ଶାସ୍ତ୍ର ଅନୁସାରେ ମନୁଷ୍ୟ ଶରୀରରେ ସବୁ ଗ୍ରହ ବିଭିନ୍ନ ଅଙ୍ଗରେ ବାସ କରିଥାନ୍ତି । ସେହିପରି ଶନି ପାଦରେ ବାସ କରିଥାନ୍ତି । ଏହି କାରଣରୁ ଜୋତା ଏବଂ ଚପଲର ସମ୍ପର୍କ ପାଦ ସହିତ ଥିବାରୁ ଏହା ଚୋରି ହେବା ଦ୍ୱାରା ଲାଭ ମିଳିଥାଏ । ଏହା ବ୍ୟତୀତ ଜୋତା-ଚପଲ ଦାନ କରିବା ଦ୍ୱାରା ମଧ୍ୟ ଶନି ଦେବ ପ୍ରସନ୍ନ ହୋଇଥାନ୍ତି । ଯଦି ଶନିବାରକୁ ଜୋତା-ଚପଲ ଦାନ କରାଯାଏ ତେବେ ଏହା ଅଧିକ ସୁଫଳ ପ୍ରଦାନ କରିବ ।
ପୁରୀ: ଯେବେ ସାଧାରଣ ଲୋକ ଆଇନ ଭାଙ୍ଗନ୍ତି, ଆଇନ ଅନୁସାରେ କାର୍ଯ୍ୟାନୁଷ୍ଠାନ ହୁଏ । ହେଲେ ଆଇନ ପ୍ରସ୍ତୁତକାରୀ ସାଂସଦ, ସବୁ ଜାଣିଶୁଣି ଯେବେ ଆଇନକୁ ନାଲିଆଖି ଦେଖାନ୍ତି, ସେତେବେଳେ କଣ ହେବ ? ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀ ଆଗରୁ ଥିଲେ ପ୍ରଶାସିକା, ଏବେ ଜନ ପ୍ରତିନିଧି । ଆଇନ ପ୍ରଣୟନ କରିଛନ୍ତି ଆଇନ ଅନୁସାରେ ଆକ୍ସନ୍ ବି ନେଇଛନ୍ତି । ଆଇନ ଅନୁସାରେ କ’ଣ ଠିକ୍ କ’ଣ ଭୁଲ୍ ସେକଥା ବେଶ୍ ଭଲ କରି ଜାଣିଛନ୍ତି । ଆଉ ଖୋଲା ଉଲ୍ଲଂଘନ କେମିତି କରି ହେବ ସେକଥା ପୁରୀ ବଡ଼ଦାଣ୍ଡରେ ଦେଖାଇଛନ୍ତି । ପଦଯାତ୍ରାକୁ ଅନୁମତି ନମିଳିବା ପରେ କିଛି ସମର୍ଥକଙ୍କ ସହ ପୁରୀରେ ପହଞ୍ଚି ପଦଯାତ୍ରା କରିଛନ୍ତି ସାଂସଦ । ଜଗା ଦର୍ଶନ ଆଳରେ ଅପରାଜିତାଙ୍କ ପଦଯାତ୍ରା ପଲିଟିକ୍ସକୁ ନିନ୍ଦା କରିଛନ୍ତି ପୁରୀବାସୀ । କାର୍ଯ୍ୟାନୁଷ୍ଠାନ ପାଇଁ ଏତଲା କରାଯାଇଥିବା ବେଳେ ଛାତ୍ର କଂଗ୍ରେସ ଟମାଟୋ ମାଡ଼ କରି ବିରୋଧ ପ୍ରଦର୍ଶନ କରିଛି ।
ଜଗା ଦର୍ଶନ ଆଳରେ ସାଂସଦ ‘ପଦଯାତ୍ରା’ ପଲିଟିକ୍ସ କରିଥିବା ଅଭିଯୋଗ । ପୁରୀ ପଚାରୁଛି, ଅମାନିଆ ଅପରାଜିତାଙ୍କ ବିରୋଧରେ ଆକ୍ସନ୍ କେବେ ? ଅନୁମତି ମିଳିଲାନି, ସ୍ଥଗିତ ରହିଲା ଶ୍ରୀମନ୍ଦିର ସୁରକ୍ଷା ଆନ୍ଦୋଳନର ପଦଯାତ୍ରା । ହେଲେ ବିକାଶ ବିରୋଧୀ ମନୋବୃତ୍ତିରେ ଲାଗିଲାନି ବ୍ରେକ୍ । ପଦଯାତ୍ରା ସ୍ଥଗିତ ପରେ ବି ହାତଗଣତି ସମର୍ଥକଙ୍କ ସହ ପଦଯାତ୍ରା କରି ଶ୍ରୀମନ୍ଦିରକୁ ଗଲେ ସାଂସଦ ଅପରାଜିତା ଷଡ଼ଙ୍ଗୀ । ଅନୁମତି ନଥିବା ଜଣାଇଥିଲା ପ୍ରଶାସନ । ଚନ୍ଦନପୁର ନିକଟରେ ଗାଡ଼ି ଅଟକାଇ ଏକା ଯିବାକୁ ଅନୁରୋଧ ବି କରାଯାଇଥିଲା । ହେଲେ ପୋଲିସର ଅନୁରୋଧକୁ ବେଖାତିର କରିଥିଲେ ବିଜେପି ସାଂସଦ । ଜଗା ଦର୍ଶନ ନାଁରେ ଜନପ୍ରତିନିଧିଙ୍କ ହୀନ ରାଜନୀତି ଓ ଏଭଳି ଆଇନ ଉଲ୍ଲଂଘନକୁ ନିନ୍ଦା କରିଛନ୍ତି ଶ୍ରୀମନ୍ଦିର ସେବାୟତ ଓ ବୁଦ୍ଧିଜୀବୀ ।
ସାଂସଦ ହେଉଛନ୍ତି ପୂର୍ବତନ ପ୍ରଶାସିକା, ହେଲେ ଆଇନକୁ କରିଛନ୍ତି ଖୋଲା ବେଖାତିର । ଆଇନକୁ ପାଦରେ ଦଳିଚକଟି ବଡ଼ଦାଣ୍ଡରେ ପଦଯାତ୍ରା କରିଛନ୍ତି ଅପରାଜିତା । ଆଉ ଏଥିପାଇଁ ତାଙ୍କୁ ନିଜ ଦଳରୁ ବି ମିଳିନି ସମର୍ଥନ । ସେପଟେ ସାଂସଦଙ୍କ ଆଇନ୍ ଅମାନ୍ୟ ବିରୋଧରେ ଆକ୍ସନ୍ ଦାବି କରିଛନ୍ତି ଶ୍ରୀକ୍ଷେତ୍ର ବିକାଶ ମଞ୍ଚ ଓ ବୁଦ୍ଧିଜୀବୀ । ପୁରୀ ଟାଉନ ଥାନାରେ ଅପରାଜିତାଙ୍କ ବିରୋଧରେ ଏତଲା ଦାୟର ହୋଇଛି । ସାଂସଦଙ୍କ ପଲିଟିକାଲ୍ ଷ୍ଟଣ୍ଟକୁ ବିରୋଧ କରିଛି ଛାତ୍ର କଂଗ୍ରେସ ପକ୍ଷରୁ କରାଯାଇଛି ଟମାଟୋ ମାଡ଼ ।
ଶ୍ରୀମନ୍ଦିର ବିକାଶର ବାଟ ଓଗାଳି ଚାଲିଛି ରାଜନୀତି । ପୁରୀରେ ସାଂସଦଙ୍କ ପଲିଟିକାଲ୍ ଷ୍ଟଣ୍ଟକୁ ସାରା ରାଜ୍ୟ ନିନ୍ଦା କରୁଛି । ପ୍ରତି ଓଡିଆଙ୍କ ପ୍ରାଣ କାଳିଆ ସାଆନ୍ତଙ୍କ କାମରେ ବାଧା ଦେବା ପାଇଁ ଅପରାଜିତାଙ୍କ ଏଭଳି ପଦଯାତ୍ରାକୁ ସମାଲୋଚନା କରିଛନ୍ତି ପୁରୀବାସୀ । ଆଇନ ଉଲ୍ଲଂଘନ ପାଇଁ ଶୀଘ୍ର କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି ।
