ଭୁବନେଶ୍ୱର: ଏକ ଘରୋଇ ହସ୍ପିଟାଲର ଡାକ୍ତରଙ୍କ ଆତ୍ମହତ୍ୟା । ହସ୍ପିଟାଲ ଚାମ୍ବର ଭିତରେ ଆତ୍ମହତ୍ୟା କରିଛନ୍ତି ଡାକ୍ତର । କିନ୍ତୁ କାହିଁକି ଓ କେଉଁ କାରଣ ପାଇଁ ଡାକ୍ତର ଆତ୍ମହତ୍ୟା କରିଛନ୍ତି ତାହାର କାରଣ ଅସ୍ପଷ୍ଟ ରହିଛି । ମିଳିଥିବା ସୂଚନା ମୁତାବକ ଡାକ୍ତର ଜଣକ ହେଉଛନ୍ତି ଶିଶିର ସାହୁ ।
ଘଟଣାଟି ଭରତପୁର ଥାନା ଅଞ୍ଚଳରେ ଘଟିଥିବାବେଳେ ପୋଲିସ ଘଟଣାସ୍ଥଳରେ ପହଁଚି ତଦନ୍ତ ଜାରି ରଖିଛି । ଡାକ୍ତର ଜଣଙ୍କ ମେଡ଼ିସିନ କିମ୍ବା ନିଜ ଦେହରେ ବିଷ ଇଂଜେକସନ ଦେଇଥିବା ସନ୍ଧେହ କରାଯାଉଛି ।
ମୟୂରଭଞ୍ଜ: ଶୋଇଥିବା ବେଳେ ଘରେ ଲାଗିଲା ନିଆଁ , ୩ ଜୀବନ୍ତ ଦଗ୍ଧ । ମୟୂରଭଞ୍ଜ ଜିଲ୍ଲା ଝାରପୋଖରିଆ ଥାନା ଉଞ୍ଚଗାଁର ଢ଼ିପାସାହିରେ ବିଳମ୍ବିତ ରାତିରେ ଅଗ୍ନିକାଣ୍ଡ । ନିଆଁ ଲାଗି ମା ସହ ୨ ଶିଶୁ ଜୀଅନ୍ତା ଜଳିଯାଇଛନ୍ତି । ଗୁରୁବାର ରାତି ପ୍ରାୟ୨ଟା ସମୟରେ ଏହି ଦୁଃଖଦ ଘଟଣା ଘଟିଛି । ପରିବାର ଲୋକେ ଗଭୀର ନିଦରେ ଶୋଇ ଥିବା ସମୟରେ ଏହି ଅଗ୍ନିକାଣ୍ଡ ଘଟିଥିଲା ।
ନିଆଁ ଲାଗିଥିବା ସୂଚନା ପାଇ ସାରସକଣା ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ହେଲେ ମା ଓ ୨ ଶିଶୁଙ୍କ ଜୀବନ ଚାଲିଯାଇଥିଲା । ଅଗ୍ନିକାଣ୍ଡରେ ମୃତ୍ୟୁର କାରଣ ସ୍ପଷ୍ଟ ନଥିବା ବେଳେ ପୋଲିସ ସନ୍ଦେହରେ ମଙ୍ଗଲକୁ ଝାରପୋଖରିଆ ଥାନାରେ ଅଟକ ରଖି ଅଧିକ ତଦନ୍ତ ଜାରି ରଖିଛି । ।
ମୃତକମାନେ ହେଲେ ମଙ୍ଗଲ ମାର୍ଣ୍ଡିଙ୍କ ପତ୍ନୀ ସୁରୁକୁନି ମାର୍ଣ୍ଡି , ୬ବର୍ଷର ଝିଅ ସରିତା ମାର୍ଣ୍ଡି ଓ ୩ମାସର ପୁଅ ଜଗଦୀଶ ମାର୍ଣ୍ଡି । ମଙ୍ଗଲ ପୂର୍ବରୁ ଜଣକୁ ବିବାହ କରିଥିବା ବେଳେ ଘରୋଇ କଳି ଯୋଗୁ ସେ ତାଙ୍କୁ ଛାଡ଼ିଦେଇ ଦ୍ଵିତୀୟ ବିବାହ କରିଥିଲେ । ବାରିପଦାରୁ ସାଇଣ୍ଟିଫିକ ଟିମ ଆସିବା ପରେ ଶବ ବ୍ୟବଚ୍ଛେଦ ପାଇଁ ପିଆରଏମ ମେଡିକାଲ କଲେଜକୁ ପଠାଯିବ ।
ଭୁବନେଶ୍ୱର: କିଛି ଦିନରେ ବିରତି ପରେ ପୁଣି କଲବଲ କରିବ ତାତି । ଗତକାଲିଠୁ ରାଜ୍ୟରେ ପାଗ ବଦଳିଥିବାବେଳେ ଆଜିଠୁ ତାପମାତ୍ରାରେ ବୃଦ୍ଧି ଘଟିବ । ବାତ୍ୟା ପ୍ରଭାବରେ ଉପାନ୍ତରୁ ଉପକୁଳ ସବୁଠି ସ୍ବାଭାବିକଠାରୁ ୩ ରୁ ୫ ଡିଗ୍ରୀ ତାପମାତ୍ରା କମିଥିଲା । ଏବେ ଆସନ୍ତା ୨ ଦିନ ମଧ୍ୟରେ ୩ ରୁ ୪ ଡିଗ୍ରୀ ତାପମାତ୍ରା ବଢିବ ବୋଲି ଆକଳନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
୧୫ ତାରିଖ ବେଳକୁ ସ୍ବାଭାବିକ ଠାରୁ ଉପରମୁହାଁ ହେବ ପାରଦ । ଉପକୂଳ ଓଡିଶାରେ ତାପମାତ୍ରା ୪୦ ଡିଗ୍ରୀ ଏବଂ ଆଭ୍ୟନ୍ତରୀଣରେ ତାପମାତ୍ରା ୪୪ ଡିଗ୍ରୀ ଛୁଇଁବାର ସମ୍ଭାବନା ରହିଛି । ୧୬ ତାରିଖରୁ ରାଜ୍ୟର ଅଧିକାଂଶ ସହରରେ ୪୦ କିମ୍ବା ତା ଠାରୁ ଅଧିକ ତାପମାତ୍ରା ରେକର୍ଡ ହେବ ବୋଲି କହିଛି ଆଞ୍ଚଳିକ ପାଣିପାଗ କେନ୍ଦ୍ର । କେତେକ ଜିଲ୍ଲାରେ କାଳବୈଶାଖୀ ସମ୍ଭାବନା ମଧ୍ୟ ରହିଛି ।
୧୭ ତାରିଖ ପର୍ଯ୍ୟନ୍ତ ରାଜ୍ୟର କିଛି ଜିଲ୍ଲାରେ ଘଡଘଡି ବିଜୁଳି ସହ ବର୍ଷା ବା କାଳବୈଶାଖୀ ବର୍ଷା ହେବାର ସମ୍ଭାବନା ରହିଛି । ଅନ୍ୟପଟେ ଏଥର ସଅଳ ଆସିବ ମୌସୁମୀ । ନିର୍ଦ୍ଧାରିତ ସମୟ ପୂର୍ବରୁ ଦକ୍ଷିଣ ଆଣ୍ଡାମାନ ସାଗରରେ ସକ୍ରିୟ ହେବ ମୌସୁମୀ । ଏଥିପାଇ ପାଣିପାଗ ଅନୁକୁଳ ରହିଛି । ବିଗତ ବର୍ଷ ଅନୁସାରେ ୫ ଦିନ ପୂର୍ବରୁ ହେବ ସକ୍ରିୟ ।
ରାୟପୁର: ଛତିଶଗଡ଼ ରାୟପୁରରେ ହେଲିକପ୍ଟର କ୍ରାସ୍ । ଏକ ଟ୍ରେନିଂ ହେଲିକପ୍ଟର ଦୁର୍ଘଟଣାରେ ଦୁଇ ପାଇଲଟଙ୍କ ମୃତ୍ୟୁ ଘଟିଛି । ପ୍ରାଣ ହରାଇଥିବା ଦୁଇ ପାଇଲଟ ହେଲେ କ୍ୟାପଟେନ ଗୋପାଳକୃଷ୍ଣ ପଣ୍ଡା ଓ ଏ.ପି. ଶ୍ରୀବାସ୍ତବ । ରାୟପୁରସ୍ଥିତ ସ୍ବାମୀ ବିବେକାନନ୍ଦ ବିମାନବନ୍ଦର ନିକଟରେ ଅଘଟଣ ଘଟିଥିବା ସୂଚନା ମିଳିଛି । ଦୁର୍ଘଟଣାକୁ ନେଇ ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବଘେଲ ଶୋକପ୍ରକାଶ କରିଛନ୍ତି ।
ହେଲିକପ୍ଟରଟି ଅବତରଣ କରିବାବେଳେ ସେଥିରେ ନିଆଁ ଲାଗିଯାଇଥିଲା । ଘଟଣାସ୍ଥଳରେ ପୋଲିସ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛି । ଅତ୍ୟନ୍ତ ଗୁରୁତର ଅବସ୍ଥାରେ ଦୁଇ ପାଇଲଟଙ୍କୁ ସ୍ଥାନୀୟ ରାମକ୍ରିଷ୍ଣା ହସ୍ପିଟାଲରେ ଭର୍ତ୍ତି କରାଯାଇଥିଲା । ମାତ୍ର ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ । ଦୁର୍ଘଟଣା ସମ୍ପର୍କରେ ସୂଚନା ଦେଇଛନ୍ତି ରାୟପୁରର ବରିଷ୍ଠ ଏସପି ପ୍ରଶାନ୍ତ ଅଗ୍ରଓ୍ବାଲ ।
ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସୌଜନ୍ୟମୂଳକ ସାକ୍ଷାତ କରିଛନ୍ତି ଓଡ଼ିଶାର ପୂର୍ବତନ ରାଜ୍ୟପାଳ ଏମ୍ ଏମ୍ ରାଜେନ୍ଦ୍ରନ୍ । ନବୀନଙ୍କୁ ଭେଟି ନିଜ ପୁସ୍ତକ ’ସର୍ଭିସ ଅନଇଣ୍ଟରପଟେଡ୍’ ଉପହାର ଦେଇଛନ୍ତି। ପୁସ୍ତକରେ ତାଙ୍କ ପ୍ରାଶାସନିକ ଅଭିଜ୍ଞତା ସମ୍ପର୍କରେ ଉଲ୍ଲେଖ ରହିଛି। ରାଜେନ୍ଦ୍ରନଙ୍କୁ ଭେଟି ଖୁସି ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ।
ନବୀନ ପଟ୍ଟନାୟକ ଏବଂ ଏମ୍. ଏମ୍. ରାଜେନ୍ଦ୍ରନଙ୍କ ସମ୍ପର୍କ ମଧ୍ୟ ଇତିହାସର ଅଭୁଲା କାହାଣୀ । କାରଣ ଯେତେବେଳେ ନବୀନ ପଟ୍ଟନାୟକ ପ୍ରଥମ କରି ଓଡ଼ିଶାର ମୁଖ୍ୟମନ୍ତ୍ରୀ ଭାବେ ଅଭିଷିକ୍ତ ହୁଅନ୍ତି ଅବା ୨୦୦୦ ମସିହାରେ ନବୀନ ପଟ୍ଟନାୟକଙ୍କୁ ମୁଖ୍ୟମନ୍ତ୍ରୀ ଭାବେ ପ୍ରଥମ କରି ଶପଥ ପାଠ କରାଇଥିଲେ ସେତେବେଳେର ରାଜ୍ୟପାଳ ଏମ୍. ଏମ୍. ରାଜେନ୍ଦ୍ରନ ।
ଗୁରୁବାର ଏମ୍. ଏମ୍. ରାଜେନ୍ଦ୍ରନ ନବୀନ ନିବାସ ଆସି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁନ ଭେଟିଛନ୍ତି । ବିଭିନ୍ନ ପ୍ରସଙ୍ଗରେ ଆଲୋଚନା ମଧ୍ୟ କରିଛନ୍ତି । ଏଥିସହିତ ନିଜର ପୁସ୍ତକ ’ସର୍ଭିସ ଅନଇଣ୍ଟରପଟେଡ୍’ ଉପହାର ମଧ୍ୟ ଦେଇଛନ୍ତି।
ଭୁବନେଶ୍ୱର: ଓଡ଼ିଶା ବିଧାନସଭାର ବାଚସ୍ପତି ଡଃ. ସୂର୍ଯ୍ୟନାରାୟଣ ପାତ୍ରଙ୍କ ସହିତ କୋଲକାତାରେ ଅବସ୍ଥାପିତ ଅଷ୍ଟ୍ରେଲିଆର ଡେପୁଟି କନ୍ସଲ୍ ଜେନେରାଲ୍ ଡାନିଏଲ୍ ସିମ୍ ଓ ବରିଷ୍ଠ ସମ୍ବଳ ଅଧିକାରୀ ଆଞ୍ଜେଲିନା ନାୟାର ତାଙ୍କ କାର୍ଯ୍ୟାଳୟ ପ୍ରକୋଷ୍ଠରେ ସୌଜନ୍ୟସାକ୍ଷାତ କରି ରାଜ୍ୟ ରାଜନୀତିରେ ନାରୀମାନଙ୍କର ସ୍ଥିତି, ଶାସନକୁ ବ୍ୟବସ୍ଥିତ କରିବାରେ ନାରୀଶକ୍ତିର ଭୂମିକା, ନାରୀ ସଶକ୍ତିକରଣ ଓ ଅଷ୍ଟ୍ରେଲିଆ ଏବଂ ଓଡ଼ିଶାର ସଂସଦୀୟ ବିଧିବ୍ୟବସ୍ଥା ଉପରେ ଆଲୋଚନା କରିଛନ୍ତି । ଏହି ସୌଜନ୍ୟସାକ୍ଷାତ ସମୟରେ ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଧାୟିକା ଉଷାଦେବୀ, ଲତିକା ପ୍ରଧାନ, ସୂର୍ଯ୍ୟମଣି ବୈଦ୍ୟ, ବାସନ୍ତି ହେମ୍ବ୍ରମ୍, କୁସୁମ ଟେଟେ, ବିଧାନସଭା ସଚିବ ଦାଶରଥୀ ଶତପଥୀ, ନିର୍ଦ୍ଦେଶକ (ଗବେଷଣା) କୃପାସିନ୍ଧୁ ମିଶ୍ର, ଗ୍ଲୋବାଲ୍ ପଲିସି ରିସର୍ଚ୍ଚ ଫାଉଣ୍ଡେସନର ଟିମ୍ଲିଡ୍ ସିନି ମହାନ୍ତି ପ୍ରମୁଖ ଉପସ୍ଥିତ ରହି ନାରୀ ସଶକ୍ତିକରଣ ଏବଂ ଅନ୍ୟାନ୍ୟ ପ୍ରସଙ୍ଗରେ ଆଲୋଚନା କରିଛନ୍ତି ।
ଓଡ଼ିଶା ଓ ଅଷ୍ଟ୍ରେଲିଆ ମଧ୍ୟରେ ଥିବା ଦ୍ୱିପାକ୍ଷିକ ସଂପର୍କକୁ ମଜବୁତ କରିବାକୁ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ପରାମର୍ଶ ଦେବା ସହିତ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ଓଡ଼ିଶା ସରକାର ସବୁବେଳେ ନାରୀ ସଶକ୍ତିକରଣ ଉପରେ ପ୍ରାଧାନ୍ୟ ଦେଇ ଆସିଛନ୍ତି ବୋଲି ବାଚସ୍ପତି ଡଃ. ପାତ୍ର ପ୍ରକାଶ କରିଛନ୍ତି । ନାରୀମାନଙ୍କ ସର୍ବାଙ୍ଗୀନ ଉନ୍ନତି ହେଲେ ହିଁ କୌଣସି ରାଜ୍ୟ ତଥା ଦେଶର ବିକାଶ ହୋଇପାରିବ ବୋଲି ସେ କହିଛନ୍ତି । ମିଶନ ଶକ୍ତି ଯୋଜନା ମାଧ୍ୟମରେ ଓଡ଼ିଶାର, ମୁଖ୍ୟତଃ ଗ୍ରାମାଞ୍ଚଳର ମହିଳାମାନେ ଆର୍ଥିକ ଓ ସାମାଜିକ ଦୃଷ୍ଟିକୋଣରୁ ସଶକ୍ତ ହୋଇପାରିଛନ୍ତି ବୋଲି ପୂର୍ବତନ ମନ୍ତ୍ରୀ ଉଷାଦେବୀ ଉଲ୍ଲେଖ କରିଛନ୍ତି । ମହିଳା ସଶକ୍ତିକରଣ ଉପରେ ରାଜ୍ୟ ସରକାରଙ୍କ ବହୁବିଧ ପଦକ୍ଷେପକୁ ଡାନିଏଲ୍ ସିମ୍ ପ୍ରଶଂସା କରିଛନ୍ତି ।
ତେଲେଙ୍ଗାନା: ରାତି ଅଧରେ ୧୦୦ ନଂରେ ଡାଏଲ୍ କରି ପୋଲିସକୁ ଡାକିଲେ । ପୋଲିସ ବାବୁ ମଧ୍ୟ ଆସି ପହଞ୍ଚିଗଲେ । ତା’ ପରେ କହିଲେ ମୋତେ ଗୋଟେ ଚିଲ୍ଡ ବିୟର ଦରକାର । ଯୁବକଙ୍କ କଥା ଶୁଣି ପୋଲିସ ବି ତାଜୁବ । ଏଭଳି ଘଟଣା ଘଟିଛି ତେଲେଙ୍ଗାନାର ବିକାରାବାଦ ସହରରେ ।
ସୂଚନା ଅନୁଯାୟୀ, ବିଳମ୍ବିତ ରାତି ପ୍ରାୟ ୨ଟା ୩୦ମି. ବେଳକୁ ବିକାରାବାଦ ପୋଲିସ କଣ୍ଟ୍ରୋଲ୍ ରୁମକୁ ଏକ ଫୋନ୍ କଲ୍ ଆସିଥିଲା । ପୋଲିସ ଫୋନ୍ ଉଠାଇବା ବେଳକୁ ସାମ୍ନାପଟୁ ମଧୁ ନାମକ ଜଣେ ବ୍ୟକ୍ତି କହିଥିଲେ- ମୋତେ ସାହାଯ୍ୟ କରନ୍ତୁ । ଘଟଣା ସମ୍ପର୍କରେ ମୁଁ ଫୋନରେ କହିପାରିବିନି, ଆପଣ ମୋ ଘରକୁ ଆସନ୍ତୁ । ତତକ୍ଷଣାତ୍ ଜଣେ ପୋଲିସ ବାବୁ ସମ୍ପୃକ୍ତ ଯୁବକ ରହୁଥିବା ଦୌଲତାବାଦ ସ୍ଥିତ ତାଙ୍କ ଘରେ ପହଞ୍ଚିଥିଲେ। ସେଠାରେ ପହଞ୍ଚିବା ପରେ ମଧୁ କନଷ୍ଟେବଳଙ୍କୁ କହିଥିଲେ- ମୋ ପାଇଁ ଦୁଇଟି ଚିଲ୍ଡ ବିୟର ଆଣିଦିଅନ୍ତୁ । ଯାହାକୁ ଶୁଣି ଚକିତ ହୋଇପଡିଲେ କନଷ୍ଟେବଳ ଜଣକ । ତା’ପରେ ସେ ମଧୁକୁ ପିଟିବା ସହ ତା’ ବିରୋଧରେ ମାମଲା ରୁଜୁ କରିଥିବା ନେଇ ଏକ ଗଣମାଧ୍ୟମ ରିପୋର୍ଟରୁ ଜଣାପଡିଛି । ରିପୋର୍ଟ ଅନୁସାରେ ମଧୁ ସମ୍ପୂର୍ଣ୍ଣ ନିଶାଗସ୍ତ ଥିଲେ ।
ମୋ ସ୍ତ୍ରୀ ମଟନ ରୋଷେଇ କରୁନି
ତେବେ ଏଭଳି ଘଟଣା ନୂଆ ନୁହେଁ । ଏହା ପୂର୍ବରୁ ତେଲେଙ୍ଗାନାର ନଲଗୋଣ୍ଡା ଜିଲ୍ଳାର ବାସିନ୍ଦା ନବୀନ ମଧ୍ୟ ୧୦୦ ନଂକୁ କଲ୍ କରି କହିଥିଲେ ସ୍ଥିତି ସାଂଘାତିକ ରହିଛି । ଏପରିକି ସେ ପୋଲିସକୁ ୬ ଥର କଲ୍ କରିଥିଲେ । ଯେତେବେଳେ ପୋଲିସ ନବୀନ ଘରେ ପହଞ୍ଚିଲେ ସେତେବେଳେ ନବୀନ ନିଶାରେ ଚୂର ଥିଲା ଏବଂ କହିଥିଲା ମୋ ସ୍ତ୍ରୀ ମୋ ପାଇଁ ମଟନ୍ ରୋଷେଇ କରୁନାହିଁ । ପରେ ଏହି ଘଟଣାରେ ପୋଲିସ ଏକ ମାମଲା ରୁଜୁ କରିବା ସହ ତାକୁ ହେପାଜତରେ ନେଇଥିଲା । କିନ୍ତୁ ପରେ ଛାଡି ଦେଇଥିଲା ।
ମୋ ପ୍ରେମିକ କଥା ହେଉନାହିଁ
ସେହିଭଳି ଗତ ବର୍ଷ ମଧ୍ୟପ୍ରଦେଶର ଛିନ୍ଦୱାରାରେ ଜଣେ ମହିଳା ୧୦୦ ନଂକୁ ଡାଏଲ କରି ପୋଲିସର ସାହାଯ୍ୟ ଲୋଡିଥିଲେ । ଆଉ କହିଥିଲେ ମୋ ପ୍ରେମିକ ରାଗିଛନ୍ତି ଏବଂ ମୋ ସହ କଥାବାର୍ତ୍ତା କରୁନାହାଁନ୍ତି । ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ମହିଳା ଜଣକ ତାଙ୍କ ପ୍ରେମିକ ସହିତ କିଛି କଥାରେ ଝଗଡା କରିଥିଲେ। ମହିଳାଙ୍କ ସମସ୍ତ ଚେଷ୍ଟା ସତ୍ୱେ ପ୍ରେମିକ ଜଣକ ତାଙ୍କ ସହ କଥା ହୋଇନଥିଲେ, ଯାହାପରେ ସାହାଯ୍ୟ ପାଇଁ ସେ ୧୦୦ ନମ୍ବରକୁ ଡାଏଲ କରିଥିଲେ।
ଭୁବନେଶ୍ୱର: ବ୍ରଜରାଜନଗର ଉପ-ନିର୍ବାଚନ ନିମନ୍ତେ କଂଗ୍ରେସ ପ୍ରକାଶ କରିଛି ଷ୍ଟାର ପ୍ରଚାରକ ତାଲିକା । କଂଗ୍ରେସର ଷ୍ଟାର ପ୍ରଚାରକ ତାଲିକାରେ ରହିଛନ୍ତି ୪୦ ଜଣିଆ ପ୍ରଚାରକ । ପ୍ରଚାର ତାଲିକାରେ ରହିଛନ୍ତି ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲ ଏବଂ ସ୍ୱାସ୍ଥ୍ୟ ମନ୍ତ୍ରୀ ଟିଏସ. ସିଂ ଦେଓ । ସେହିପରି ବ୍ରଜରାଜନଜର ପାଇଁ ମୈଦାନକୁ ଓହ୍ଲାଇବେ ଯୁବ ନେତା କହ୍ନେୟା କୁମାର ଓ ଜିଗ୍ନେଶ ମେଓ୍ୱାନୀ।
ଅନ୍ୟପଟେ କଂଗ୍ରେସ ରାଜ୍ୟ ପ୍ରଭାରୀ ଚେଲ୍ଲା କୁମାର ଓ ସହପ୍ରଭାରୀ ଜି. ରୁଦ୍ର ରାଜୁଙ୍କ ନାଁ ମଧ୍ୟ ତାଲିକାରେ ରହିଛି । ଏହାସହ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ସହ ରାଜ୍ୟ ସଂଗ୍ରେସର ସମସ୍ତ ବିଧାୟକଙ୍କ ନାଁ ମଧ୍ୟ ଏହି ତାଲିକାରେ ସାମିଲ ହୋଇଛି । ସାଂସଦ ସପ୍ତଗିରି ଉଲାକା, ବରିଷ୍ଠ ନେତା ଭକ୍ତ ଦାସଙ୍କ ମଧ୍ୟ ପ୍ରଚାରକୁ ଓହ୍ଲାଇବା ପାଇଁ ତାଲିକାରେ ନାମ ପ୍ରକାଶ କରିଛି କଂଗ୍ରେସ ।
ଲକ୍ଷ୍ନୌ: ଉତ୍ତରପ୍ରଦେଶର କେରାନାରେ ରହୁଥିବା ୨ ଫୁଟ ୬ ଇଞ୍ଚର ଜଣେ ବ୍ୟକ୍ତି ବାହାଘର ପାଇଁ ପ୍ରଧାନମନ୍ତ୍ରୀଙ୍କୁ ଗୁହାରୀ କରିଛନ୍ତି । ତାଙ୍କ ନାଁ ହେଉଛି ଆଜିମ୍ ମନସୁରୀ । ମନସୁରୀଙ୍କ କହିବା କଥା ହେଲା ‘ଗତ ୯ ମାର୍ଚ୍ଚରେ ମୋର ଜଣେ ଝିଅଙ୍କ ସହ ନିର୍ବଦ୍ଧ ହୋଇଥିଲା । ତାଙ୍କ ଉଚ୍ଚତା ମଧ୍ୟ ମୋ ଭଳି କମ୍ । ସବୁ ପ୍ରସ୍ତୁତି ସରିଥିଲା । କିନ୍ତୁ ମୋ ବାପା ମାଆ ମୋର ଏବେ ବାହାଘର କରାଇବାକୁ ଚାହୁଁନାହାନ୍ତି’ ।
ଏଥିପାଇଁ ଗୁରୁବାର ଦିନ ଆଜିମ ହାତରେ ଏକ ପୋଷ୍ଟର ନେଇ ଥାନାଧିକାରୀଙ୍କ ପାଖରେ ପହଞ୍ଚିଗଲେ । ଆଉ କହିଲେ ମୋ ବାହାଘର କରେଇ ଦିଅ । ମୋ ଘର ଲୋକ ବାହାଘର କରାଉନାହାନ୍ତି । ବାହାଘର ଠିକ୍ ହୋଇଥିବା ଝିଅ ହାପୁରରେ ରହନ୍ତି । ସେ ବି.କମ୍ ପଢ଼ିଛନ୍ତି । ଥାନାଧିକାରୀ ତାଙ୍କଠୁ ପୋଷ୍ଟର ନେଇ ଆଶ୍ବାସନା ଦେଲେ । ଏବଂ କହିଲେ ତୁମର ବାହାଘର କରାଇବୁ ।
ଆଜିମଙ୍କ କହିବା କଥା ହେଲା ‘ ମୋର ବାହା ହେବାରେ ମହୁତ ମନ । ଏଥିପାଇଁ ମୋତେ ରାତିରେ ନିଦ ଆସୁନି । କେହି ଜାଣି ପାରୁନାହାନ୍ତି ମୁଁ ମୋ ଜୀବନସାଥିପାଇଁ କେତେ ଉଦାସ ରହୁଛି । ମୋ ଭାଇମାନଙ୍କର ବାହାଘର ଧୀରେ ଧୀରେ ହେବ କିନ୍ତୁ ମୋ ବାହାଘର ଶୀଘ୍ର କରେଇ ଦିଅନ୍ତୁ । ରମଜାନ ମାସ ବି ସରିଗଲା । ମୁଁ ଦୁଆ ବି ମାଗିଥିଲି । ମୋ ବାପା ମାଆ କହିଥିଲେ ଯେ, ଇଦ୍ ପରେ ମୋ ବାହାଘର ହେବ କିନ୍ତୁ କରାଉନାହାନ୍ତି । ପିଏମ୍ ମୋଦି ଏବଂ ସିଏମ୍ ଯୋଗୀ ଆଦିତ୍ୟନାଥଙ୍କୁ ମୋ ବାହାଘର କରାଇଦେବାକୁ ନିବେଦନ କରିଥିଲି ।
ଏହା ପୂର୍ବରୁ ୨୮ ବର୍ଷିୟ ଆଜିମ୍ ମହିଳା ଥାନା ଯାଇ ବି ପୋଲିସ କର୍ମୀଙ୍କୁ ବି ବାହାଘର ପାଇଁ ନିବେଦନ କରିଥିଲେ । ଆଜିମଙ୍କ ଦାଦାଙ୍କ କହିବା କଥା ହେଲା ଯେ, ଆଜିମଙ୍କ ସହ ୩ ଭାଇଙ୍କର ବି ଏକାସହ ବାହାଘର ହେବ । ସେମାନଙ୍କ ପାଇଁ ବି ଝିଅ ଦେଖା ସରିଛି । ଏକାଥର ୪ ଜଣଙ୍କ ବିବାହ ହେବ ।
ଭୁବନେଶ୍ୱର: ସର୍ତ୍ତରେ ରାଜଧାନୀରେ ଖୋଲିବ ଡ୍ୟାନ୍ସବାର । 14 ଟି ଡ୍ୟାନ୍ସ ବାରକୁ ଅନୁମତି ମିଲିଛି । 18 ଟି ସର୍ତ୍ତ ମାନିବାକୁ ଡ୍ୟାନ୍ସ ବାରକୁ ନିର୍ଦ୍ଦେଶ ଦିଆଯାଇଛି । ସର୍ତ୍ତ ନ ମାନିଲେ ଆଇନ ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ମଧ୍ୟ ଚେତାବନୀ ଦିଆଯାଇଛି । 21 ବର୍ଷରୁ କମ ଝିଅ ମାନେ ଡ୍ୟାନ୍ସ ବାରରେ ନାଚ କରି ପାରିବେ ନାହିଁ ବୋଲି କୁହାଯାଇଥିବାବେଳେ ଦିନ 12 ରୁ ରାତି 12 ଖୋଲା ରହିବ ବାର ।
ନିର୍ଦ୍ଦେଶ ମୁତାବକ ବାର ଡ୍ୟାନ୍ସର ମାନେ ଉତ୍ତେଜକ ଡ୍ରେସ ପିନ୍ଧିପାରିବେ ନାହିଁ । ଡ୍ୟାନ୍ସ ବାରରେ ସିସିଟିଭି କ୍ୟାମେରା ରହିବ । ଅନୁମତି ପାଇ ନଥିବା ବାର ଗୁଡିକ ଡ୍ୟାନ୍ସ ବାର ଚଳାଇଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଅବକାରୀ ବିଭାଗ ଡେପୁଟି ସୁପରିନଟେଣ୍ଡଣ୍ଟ ସଂଘମିତ୍ରା ପ୍ରଧାନ ।
