ନୂଆଦିଲ୍ଲୀ: ଦିଲ୍ଲୀ ସ୍ବାସ୍ଥ୍ୟମନ୍ତ୍ରୀ ଗିରଫ । ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନଙ୍କୁ ବାନ୍ଧିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ଗିରଫ ନେଇ ସୂଚନା ଦେଇଛି ED । ଅରବିନ୍ଦ କେଜ୍ରିଓ୍ବାଲ ସରକାରଙ୍କ କ୍ୟାବିନେଟ ମନ୍ତ୍ରୀ ଅଛନ୍ତି ସତ୍ୟେନ୍ଦ୍ର । ସେ ଆମ ଆଦମି ପାର୍ଟିର ଜଣେ ବରିଷ୍ଠ ନେତା । ସତ୍ୟେନ୍ଦ୍ର ହେଉଛନ୍ତି ଦିଲ୍ଲୀ କ୍ୟାବିନେଟରେ ଥିବା ୭ ମନ୍ତ୍ରୀଙ୍କ ମଧ୍ୟରେ ଅନ୍ୟତମ ।
କିନ୍ତୁ ଅର୍ଥ ହେରଫେର ମାମଲାରେ ସତ୍ୟେନ୍ଦ୍ର ଜଡ଼ିତ ଥିବା ନେଇ ଇଡି ପାଖରେ ରହିଛି ବଳିଷ୍ଠ ପ୍ରମାଣ । ଯେଉଁ ପ୍ରମାଣ ଆଧାରରେ ଆମ ଆଦମୀ ପାର୍ଟିର ଏହି ବରିଷ୍ଠ ମନ୍ତ୍ରୀଙ୍କୁ ଆରେଷ୍ଟ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ ।
କଟକ: ବାରବାଟୀ ଷ୍ଟାଡିୟମରେ ଭାରତ ଦକ୍ଷିଣ ଆଫ୍ରିକା ମଧ୍ୟରେ ଖେଳା ଯିବାକୁ ଥିବା ଟି ଟ୍ବେଣ୍ଟି ମ୍ୟାଚ ପାଇଁ ଜୁନ 1 ତାରିଖ ଦିନ 11ଟା ରୁ ଅନଲାଇନ ଟିକେଟ ବିକ୍ରି ହେବ । ମୋଟ 5 ହଜାର ଟିକେଟ୍ ଅନଲାଇନରେ ମିଳିବ । ଜଣେ ଦର୍ଶକ ଦୁଇଟି ଟିକେଟ ନେଇପାରିବେ । ପେଟିଏମ ଆପ୍ ଜରିଆରେ ଅନଲାଇନ ଟିକେଟ ବୁକ କରିବେ ଦର୍ଶକ ।
ସେହିପରି ଟିକେଟ ବୁକିଂ ବେଳେ ଦର୍ଶକଙ୍କୁ ନିଜର ପରିଚୟ ପତ୍ର ଦେବାକୁ ପଡିବ । ଅନଲାଇନ୍ ଟିକେଟ କରିଥିବା ବ୍ୟକ୍ତି ୯ ତାରିଖରୁ ୧୧ ତାରିଖ ମଧ୍ୟରେ ଦିନ ୧୦ଟାରୁ ୬ ଟା ମଧ୍ୟରେ ସେମାନଙ୍କ ଟିକେଟ ହାର୍ଡକପି ସଂଗ୍ରହ କରିବେ । ଉଭୟ ଅଫଲାଇନ ଏବଂ ଅନଲାଇନ୍ରେ ଟିକେଟ୍ ବିକ୍ରି ହେବ । ଭୁବନେଶ୍ବର ଓ କଟକରେ ଖୋଲିବ ଦୁଇଟି ଲେଖାଏଁ କାଉଣ୍ଟର । ତେବେ ଏଥର ଟିକେଟ୍ ଦର ବଢିବ । ଜଣେ ଲୋକ ଦୁଇଟି ଟିକେଟ କିଣିପାରିବେ । ୪୪ ହଜାର ଲୋକ ଷ୍ଟାଡିୟମରେ ଖେଳ ଦେଖିବା ଭଳି ବ୍ୟବସ୍ଥା କରାଯିବ ।
ଜୁନ୍ ୧୨ରେ ବାରବାଟୀରେ କେଳାଯିବ ବାରତ- ଦକ୍ଷିଣ ଆଫ୍ରିକା ମ୍ୟାଚ । ମ୍ୟାଚ୍ ପାଇଁ ଓସିଏର ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ଏଥିରେ ଖେଳାଳିଙ୍କ ସୁରକ୍ଷା, ଟ୍ରାଫିକ୍, ପାର୍କିଂ ଭଳି ବ୍ୟବସ୍ଥାକୁ ନେଇ ଆଲୋଚନା ହୋଇଛି । ଜୁନ୍ ୧୦ରେ ଭୁବନେଶ୍ବର ପହଞ୍ଚିବେ ଖେଳାଳି । ସେଠାରୁ କଡାସୁରକ୍ଷା ମଧ୍ୟରେ ଖେଳାଳିଙ୍କୁ ତାରକା ହୋଟେଲ ନିଆଯିବ । ଏଥିସହ ମ୍ୟାଚ୍ ପୂର୍ବରୁ ଅଭ୍ୟାସ ପାଇଁ ଖେଳାଳି ବାରବାଟି ଷ୍ଟାଡିୟମର ଯିବା ବେଳେ ବ୍ୟାପକ ସୁରକ୍ଷା ବ୍ୟବସ୍ଥା କରାଯିବ ।
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେଦ୍ର ମୋଦିଙ୍କ ସହ ଆଲୋଚନା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦିଲ୍ଲୀ ଗସ୍ତରେ ଥିବା ମୁଖ୍ୟମନ୍ତ୍ରୀ ଆଜି ଅପରାହ୍ନରେ ପ୍ରଧାନମନ୍ତ୍ରୀଙ୍କୁ ସାକ୍ଷାତ କରିଛନ୍ତି । ପ୍ରାୟ ଅଧ ଘଣ୍ଟାରୁ ଅଧିକ ସମୟ ଧରି ଦୁଇ ନେତାଙ୍କ ମଧ୍ୟରେ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇଛି । ରାଜ୍ୟର ସ୍ୱାର୍ଥ ସମ୍ଭଳିତ ପ୍ରସଙ୍ଗକୁ ମୋଦିଙ୍କ ନିକଟରେ ଉତଥାପନ କରିଛନ୍ତି ନବୀନ ।
ଆସନ୍ତା ଜୁଲାଇ ମାସରେ ରାଷ୍ଟ୍ରପତି ନିର୍ବାଚନ ହେବାକୁ ଥିବାବେଳେ ଦୁଇ ନେତାଙ୍କ ମଧ୍ୟରେ ଏ ପ୍ରସଙ୍ଗ ଆଲୋଚନା ହୋଇଥିବା ମଧ୍ୟ ସୂଚନା ମିଳୁଛି । ସେପଟେ ବଳକା ଉଷୁନା ଚାଉଳ ପ୍ରସଙ୍ଗ ଠାରୁ କେନ୍ଦ୍ରୀୟ ଅନୁଦାନ ନେଇ ମଧ୍ୟ ଆଲୋଚନା ହୋଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଧାନମନ୍ତ୍ରୀଙ୍କୁ ଭେଟିବା ପରେ ଗଣମାଧ୍ୟମ ସମ୍ମୁଖରେ ପ୍ରତିକ୍ରିୟା ପ୍ରକାଶ କରିଛନ୍ତି ।
କିଛି ଦିନ ତଳେ ତେଲେଙ୍ଗାନାର ବଳକା ଉଷୁନା ଓ ଅରୁଆ ଚାଉଳ ଉଠାଇବାକୁ କେନ୍ଦ୍ର ସରକାର ରାଜି ହୋଇଛନ୍ତି । ହେଲେ ଏଯାଏ ଓଡ଼ିଶାର ବଳକା ଉଷୁନା ଚାଉଳ ଉଠାଉ ନଥିବାରୁ, ପ୍ରଧାନମନ୍ତ୍ରୀଙ୍କ ପାଖରେ ଚାଉଳ ଉଠାଣ ଦାବି ରଖିଛନ୍ତି ମୁଖ୍ୟମନ୍ତ୍ରୀ । ସେହିପରି କୋଇଲା ଉତ୍ପାଦନ ରୟାଲଟିରେ ସଂଶୋଧନ ଆସିଲେ, ରାଜ୍ୟକୁ ଅଧିକ ରାଜସ୍ବ ମିଳିବ । ମହାନଦୀ ଜଳ ବିବାଦ ଯୋଗୁ ଖରାଦିନେ ଓଡ଼ିଶା ଜଳକଷ୍ଟ ଭୋଗୁଥିବାରୁ ଏହାର ସମାଧାନ କରି ନ୍ୟାୟ ଦେବା ଦିଗରେ ବି ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ପିପିଲି: ସାବିତ୍ରୀ ବ୍ରତ ପାଇଁ ବଜାରକୁ ଯାଇ ଆଉ ଶାଶୂ ଘରକୁ ଫେରିଲେନି ବୋହୂ । ବୋହୂ ଘରକୁ ନଫେରିବାରୁ ପୁରୀ ପିପିଲି ବଳଙ୍ଗା ଥାନାରେ ଶାଶୁ ଘର ଲୋକ ଅଭିଯୋଗ କରିଛନ୍ତି । ଅଭିଯୋଗ ପରେ ବଳଙ୍ଗା ଥାନା ପୋଲିସ ତଦନ୍ତ ଆରମ୍ଭ କରିଛି । ତେବେ ବୋହୂ ଯମୁନା ବେହେରା କହିଛନ୍ତି, ଶାଶୂ ଘରେ ତାଙ୍କୁ ନିର୍ଯ୍ୟାତନ ଦିଆଯାଉଥିଲା । ସେଥିପାଇଁ ସେ ଘର ଛାଡ଼ିଥିବା ଥାନାରେ କହିଛନ୍ତି । ଅଭିଯୋଗ ଅନୁଯାୟୀ ଶନିବାର ଦିନ ପ୍ରଭାକରଙ୍କ ସାନ ବୋହୂ ନିଜର ୩ ବର୍ଷର ଶିଶୁପୁତ୍ରକୁ ଛାଡ଼ି ଅନ୍ୟ ଯାଆଙ୍କ ସହ ମାର୍କେଟିଂ କରିବାକୁ ବଳଙ୍ଗା ବଜାରକୁ ଯାଇଥିଲେ ।
ମିଳିଥିବା ସୂଚନା ମୁତାବକ ବୋହୂ ବଜାରକୁ କିଣାକିଣି କରିବାକୁ ଯାଇଥିଲେ । ଦୋକାନରୁ କିଣାକିଣି କରୁଥିବା ବେଳେ ଯମୁନା ମୋବାଇଲ ମରାମତି ଦୋକାନକୁ ଯାଇଥିଲେ । ତେବେ ଦୋକାନରୁ କିଣାକିଣି କରି ଯାଆମାନେ ଅଟୋ ନିକଟକୁ ଫେରିଥିବା ବେଳେ ଯମୁନା କିନ୍ତୁ ଆଉ ଫେରିନଥିଲେ । ପରେ ସାଥିରେ ଯାଇଥିବା ଅନ୍ୟ ଯାଆ ମାନେ ବହୁତ ଖୋଜାଖୋଜି କରିଥିଲେ । ତଥାପି କୌଣସି ପତ୍ତା ମିଳି ନଥିଲା । ବୋହୂଙ୍କ ବିଷୟରେ କୌଣସି ସୂଚନା ନମିଳିବାରୁ ଥାନାରେ ଅଭିଯୋଗ ଦେଇଥିଲେ ଶାଶୁଘର ଲୋକ । ତେବେ ବୋହୂ ଥାନାରେ ଆସି ନିଜ ଇଚ୍ଛାରେ ଶାଶୂ ଘରୁ ଆସିଥିବା କହିଛନ୍ତି ବୋଲି ବଳଙ୍ଗା ଥାନା ଆଇଆଇସି କହିଛନ୍ତି ।
ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ପହଁଚିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତିନି ଦିନିଆ ଦିଲ୍ଲୀ ଗସ୍ତରେ ଯାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବିମାନ ଯୋଗେ ଦିଲ୍ଲୀରେ ପହଁଚିଲା ପରେ ଓଡ଼ିଶା ଭବନରେ ପହଁଚିଛନ୍ତି ମୁଖ୍ୟମନ୍ତ୍ରୀ । ମିଲିତିବା ସୂଚନା ମୁତାବକ ଅପରାହ୍ନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମୁଖ୍ୟମନ୍ତ୍ରୀ ଭେଟିବାର କାର୍ଯ୍ୟକ୍ରମ ରହିଛି । ଏହି ସମୟରେ ରାଜ୍ୟ ସ୍ବାର୍ଥ ସମ୍ପର୍କିତ ଅନେକ ପ୍ରସଙ୍ଗରେ ଆଲୋଚନା କରିବେ ନବୀନ ।
୩ଦିନିଆ ଗସ୍ତରେ ପ୍ରଧାନମନ୍ତ୍ରୀଙ୍କ ବ୍ୟତୀତ ବିଭିନ୍ନ କେନ୍ଦ୍ରମନ୍ତ୍ରୀଙ୍କୁ ଭେଟି ମୁଖ୍ୟମନ୍ତ୍ରୀ ଆଲୋଚନା କରିବେ । ବଳକା ଉଷୁନା ଚାଉଳ ଉଠାଇବା ସହିତ ଜିଏସଟି ବକେୟା ଆଦି ପ୍ରସଙ୍ଗରେ ଆଲୋଚନା କରିବେ ନବୀନ । ସେହିପରି ଆଦିବାସୀ ଅଧ୍ୟୁଷିତ ଅଞ୍ଚଳରେ ବଳକା ଆବାସ ଯୋଜନା ସମ୍ପର୍କରେ ମଧ୍ୟ ଆଲୋଚନା ହୋଇପାରେ । ଜୁନ୍ ୧ ତାରିଖରେ ଭୁବନେଶ୍ବର ଫେରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଭୁବନେଶ୍ୱର: ସର୍ବଭାରତୀୟ ସିଭିଲ ସର୍ଭିସ ପରୀକ୍ଷାରେ ଓଡ଼ିଆଙ୍କ ପିଲାଙ୍କ ବାଜିମାତ । ଆଜି ପ୍ରକାଶ ପାଇଥିବା ପରୀକ୍ଷା ଫଳରେ ଓଡିଆ ପିଲା ହାସଲ କରିଛନ୍ତି କୃତ୍ତିତ୍ୱ । ସୂଚନା ଅନୁସାରେ ସମୁଦାୟ ୧୬ ଜଣ ଓଡ଼ିଆ କୃତକାର୍ଯ୍ୟ ହୋଇଛନ୍ତି । ପ୍ରଥମ ଶହେ ଜଣଙ୍କ ମଧ୍ୟରେ ରହିଛନ୍ତି ୪ ଜଣ ଓଡ଼ିଆ । ସୂଚନା ଅନୁସାରେ ୫୨ ତମ ସ୍ଥାନରେ ଅଛନ୍ତି ଅଙ୍କୁର ଦାସ । ସେହିପରି ୬୩ ନମ୍ବର ସ୍ଥାନରେ କାର୍ତ୍ତିକ ପାଣିଗ୍ରାହୀ, ୮୬ ନମ୍ବରରେ ଗୌରବ ଅଗ୍ରୱାଲ, ୯୯ ନମ୍ବରରେ ତରୁଣ ପଟ୍ଟନାୟକ ମାଦଳା ।
ସେହିପରି ୧୧୬ ନମ୍ବର ପୋଜିସନରେ ସମ୍ଭାବୀ ମିଶ୍ର, ୧୯୯ ନମ୍ବର ରାଙ୍କରେ ପୂଜା ସାହୁ ଅଛନ୍ତି । ୨୦୫ ନମ୍ବରରେ ଦୁର୍ଗା ପ୍ରସାଦ ଅଧିକାରୀ, ୨୨୮ ନମ୍ବରରେ ମୟଙ୍କ ମିଶ୍ର, ୨୩୨ ନମ୍ବରରେ ବିଶ୍ୱ ବିଶ୍ରୁତ ତ୍ରିପାଠୀ, ୨୫୫ ନମ୍ବରରେ ସିଦ୍ଧାର୍ଥ କୁମାର ମିଶ୍ର, ୨୬୯ ନମ୍ବରରେ ଅନୂପ ଗର୍ଗ, ୨୭୩ରେ ସମୀର କୁମାର ଜେନା, ୩୦୬ରେ ସୌମ୍ୟ ରଞ୍ଜନ ପ୍ରଧାନ, ୩୭୬ରେ ହର୍ଷିତ ମେହର, ୫୧୩ରେ ମାନସ ରଞ୍ଜନ ସାହୁ ଏବଂ ୬୧୪ ନମ୍ବରରେ ଅଛନ୍ତି ନୟନ ରଞ୍ଜନ ଦାସ ।
UPSC ଦ୍ୱାରା ପରିଚାଳିତ ସର୍ବ ଭାରତୀୟ ପ୍ରଶାସନିକ ପରୀକ୍ଷାରେ ଏଥର ମୋଟ ୬୮୫ ଜଣ କୃତକାର୍ଯ୍ୟ ହୋଇଛନ୍ତି । ଉତ୍ତର ପ୍ରଦେଶର ଝିଅ ଶ୍ରୁତି ଶର୍ମା ଟପ୍ପର ହୋଇଛନ୍ତି । ଅନ୍ୟପଟେ ପ୍ରଥମ ୫ ଜଣଙ୍କ ମଧ୍ୟରେ ୪ ଜଣ ଝିଅ ରହିଛନ୍ତି । ଦ୍ବିତୀୟ, ତୃତୀୟ ଓ ଚତୁର୍ଥ ସ୍ଥାନରେ ମଧ୍ୟ ଝିଅମାନେ ସ୍ଥାନ ବଜାୟ ରଖିଛନ୍ତି । ଦ୍ବିତୀୟ ସ୍ଥାନରେ ଅଙ୍କିତା ଅଗ୍ରଓ୍ବାଲ ରହିଥିବା ବେଳେ ତୃତୀୟରେ ଗାମିନୀ ସିଂଗଲ, ଚତୁର୍ଥରେ ଐଶ୍ବର୍ଯ୍ୟା ବର୍ମା ଅଛନ୍ତି । ପଞ୍ଚମରେ ଉତ୍କର୍ଷ ଦ୍ବିବେଦୀ, ଷଷ୍ଠରେ ୟକ୍ଷ ଚୌଧୁରୀ, ସପ୍ତମରେ ସମ୍ୟକ କେ. ଜୈନ, ଅଷ୍ଟମରେ ଇସିତା ଏ. ରଥି , ନବମରେ ପ୍ରୀତମ କୁମାର ଓ ଦଶମରେ ହରକିରତ ସିଂହ ରାନ୍ଧଓ୍ବା ଅଛନ୍ତି ।
ବାଙ୍ଗାଲୋର: ଭାରତୀୟ କିଷାନ ୟୁନିଅନ ନେତା ରାକେଶ ଟିକାଏତଙ୍କ ଉପରେ କାଳିମାଡ଼ । ବାଙ୍ଗାଲୋରରେ ପ୍ରେସମିଟ୍ ବେଳେ ରାକେଶ ଓ ସହଯୋଗୀ ଯୁଦ୍ଧବୀର ସିଂଙ୍କ ଉପରେ ହୋଇଛି କାଳିମାଡ଼ । ପ୍ରାୟ ୧୨ ଜଣ ଲୋକ ପ୍ରେସମିଟ ସ୍ଥଳରେ ପହଞ୍ଚି ତାଙ୍କ ଉପରେ କାଳିମାଡ଼ କରିଥିଲେ । ଏନେଇ ସ୍ଥାନୀୟ ପୋଲିସକୁ ଦାୟୀ କରିଛନ୍ତି ରାକେଶ । ରାକେଶଙ୍କ ଉପରେ କାଳିମାଡ ପରେ ସେଠାରେ ଉତ୍ତେଜନା ପ୍ରକାଶ ପାଇଛି । ଏହାକୁ ନେଇ ରାକେଶଙ୍କ ସମର୍ଥକ ଓ ପୋଲିସ ମଧ୍ୟରେ ଠେଲାପେଲା ହୋଇଛି ।
Bengaluru | No security has been provided by local police here. This has been done in collusion with the government: Bhartiya Kisan Union leader Rakesh Tikait on ink attack on him pic.twitter.com/P5Jwcontc7
— ANI (@ANI) May 30, 2022
ସେଠାରେ ଉପସ୍ଥିତ ଥିବା କର୍ମୀମାନେ ଉତ୍ତ୍ୟକ୍ତ ହୋଇ ଚେୟାର ଫୋପାଡ଼ିବା ସହ ହଙ୍ଗାମା କରିଛନ୍ତି । ଏହି ଘଟଣା ପରେ ସେଠାରେ ଉତ୍ତେଜନା ଲାଗି ରହିଛି । କର୍ଣ୍ଣାଟକ ସରକାରଙ୍କ ଦ୍ବାରା ଏହା ପ୍ରାୟୋଜିତ ବୋଲି ଅଭିଯୋଗ କରିଛନ୍ତି ରାକେଶଙ୍କ ସମର୍ଥକ । କର୍ଣ୍ଣାଟକର ଜଣେ ପୂର୍ବତନ ନେତା କୋଦିହାଲି ଚନ୍ଦ୍ରଶେଖରଙ୍କ ଏକ ଦୁର୍ନୀତି ସଂକ୍ରାନ୍ତ ଏକ ଷ୍ଟିଙ୍ଗ ଅପରେସନର ଭିଡିଓ ନେଇ ସେମାନେ ମତ ରଖୁଥିବାବେଳେ ଏହି କାଳିମାଡ ହୋଇଥିଲା ।
ଭୁବନେଶ୍ୱର: ଗାଡ଼ି ସାଇଡ଼ କରିବାକୁ ନେଇ ରାଜଧାନୀରେ ମହିଳା ଡାକ୍ତରଙ୍କୁ ମାଡ଼ ଅଭିଯୋଗ । ଲକ୍ଷ୍ମୀସାଗର ଥାନାରେ ଅଭିଯୋଗ କଲେ ମହିଳା ଡାକ୍ତର । ଅଭିଯୋଗ ପରେ ମାଡ଼ ମାରିଥିବା ଯୁବକକୁ ଅଟକ ରଖିଛି ଲକ୍ଷ୍ମୀସାଗର ପୋଲିସ । ଅଟକ ଯୁବକ ବିଜେପି କୃଷକ ମୋର୍ଚ୍ଚାର ସମ୍ପାଦକ ବିଶ୍ବଜିତ ସ୍ବାଇଁ ବୋଲି ଜଣାପଡ଼ିଛି ।
ସୂଚନା ଅନୁସାରେ ମହିଳା ଡାକ୍ତର ଓ ତାଙ୍କ ମା’ ଗତକାଲି ରାତିରେ ସ୍କୁଟିରେ ଘରକୁ ଫେରୁଥିଲେ । ରାସ୍ତାରେ ଗାଡ଼ି ରଖିଥିଲେ ବିଶ୍ବଜିତ । ମହିଳା ତାଙ୍କୁ ଗାଡ଼ି ସାଇଡ କରିବାକୁ କହି ହର୍ଣ୍ଣ ମାରିଥିଲେ । ହେଲେ ପୂର୍ବରୁ ଡାକ୍ତର ଜଣଙ୍କ ତାଙ୍କ ଗାଡ଼ି ମିରରରେ ଗାଡ଼ି ବଜାଇଥିବା କହି ହଠାତ୍ ଡାକ୍ତରଙ୍କୁ ମାଡ଼ ମାରିଥିଲେ । ମହିଳା ଡାକ୍ତରଙ୍କ ମା’ ପ୍ରତିରୋଧ କରିବାକୁ ତାଙ୍କୁ ମଧ୍ୟ ଠେଲିଦେଇଥିବା ଅଭିଯୋଗ ହୋଇଛି ।
ନୂଆଦିଲ୍ଲୀ: ପ୍ରକାଶ ପାଇଲା ସିଭିଲ ସର୍ଭିସ ପରୀକ୍ଷା ଫଳ । ୨୦୨୧ ମସିହାର ସିଭିଲ ସର୍ଭିସ ପରୀକ୍ଷା ଫଳ ପ୍ରକାଶ ପାଇଛି । ପରୀକ୍ଷାରେ କୃତକାର୍ଯ୍ୟ ହୋଇଛନ୍ତି ୬୮୫ ଜଣ । ୬୮୫ ଜଣଙ୍କ ମଧ୍ୟରୁ ସାଧାରଣ ବର୍ଗରେ ୨୪୪ ଜଣ କୃତକାର୍ଯ୍ୟ ହୋଇଥିବାବେଳେ ଇଡବ୍ଲୁଏସ ବର୍ଗରେ ୭୩, ଓବିସିରେ ୨୦୩, ଅନୁସୂଚିତ ଜାତିରେ ୧୦୫ ଓ ଅନୁସୂଚିତ ଜନଜାତିରେ ୬୦ ଜଣ କୃତକାର୍ଯ୍ୟ ହୋଇଛନ୍ତି ।
UPSC declares 2021 Civil Services Exam results
Shruti Sharma, Ankita Agarwal and Gamini Singla secure top three ranks, respectively pic.twitter.com/b0x9N0IomU
— ANI (@ANI) May 30, 2022
ତେବେ ଚଳିତ ଥର UPSC ପରୀକ୍ଷାରେ ୧୮୦ ଜଣ ଆଇଏଏସରେ କୃତକାର୍ଯ୍ୟ ହୋଇଥିବାବେଳେ ଆଇଏଫଏସରେ ୩୭ ଜଣ ଓ ଆଇପିଏସରେ ୨୦୦ ଜଣ କୃତକାର୍ଯ୍ୟ ହୋଇଛନ୍ତି । ଉତ୍ତରପ୍ରଦେଶର ବିଜନୌରର ଶ୍ରୁତି ଶର୍ମା ଟପ୍ପର ହୋଇଛନ୍ତି । ତେବେ ସବୁଠାରୁ ବଡ଼ କଥା ହେଉଛି UPSC ଦ୍ୱାରା ଜାରି ହୋଇଥିବା ଲିଷ୍ଟର ପ୍ରଥମ ୫ ଜଣଙ୍କ ମଧ୍ୟରୁ ୪ ଜଣ ଝିଅ ଅଛନ୍ତି । ତେବେ ଏହି ଲିଷ୍ଟର ୬୩ ନମ୍ବର ସ୍ଥାନରେ କାର୍ତ୍ତିକ ପାଣିଗ୍ରାହୀ ଓ ୮୬ ନମ୍ବରରେ ରାଉରକେଲାର ଗୌରବ ଅଗ୍ରଓ୍ବାଲ ରହିଛନ୍ତି ।
କାଠମାଣ୍ଡୁ: ମନ ଯୋଡ଼ୁ ଯୋଡ଼ୁ ଦୁଃଖଦ ଅଧ୍ୟାୟର ଆରମ୍ଭ । ନେପାଳ ବିମାନ ଦୁର୍ଘଟଣା ନେଇ ଆସିଲା ଆଉ ଏକ ସ୍ପର୍ଶକାତର ବିଷୟ । ବିମାନରେ ଥିବା ଅଶୋକ ତ୍ରିପାଠୀଙ୍କ ପରିବାର ସମ୍ପର୍କରେ ଜାତୀୟ ଗଣମାଧ୍ୟମରେ ଏକ ସ୍ବତନ୍ତ୍ର ରିପୋର୍ଟ ପ୍ରକାଶ ପାଇଛି । ରିପୋର୍ଟ ଅନୁସାରେ ଅଶୋକ ଓ ପତ୍ନୀ ବୈଭବୀଙ୍କ ମଧ୍ୟରେ ବହୁଦିନ ପୂର୍ବରୁ ହୋଇସାରିଛି ବିବାହ ବିଚ୍ଛେଦ । ତେବେ କୋର୍ଟଙ୍କ ନିର୍ଦ୍ଦେଶ ଅନୁସାରେ ଏହି ଦମ୍ପତି ପ୍ରତି ବର୍ଷ ୧୦ ଦିନ ପରିବାର ସହ ଛୁଟି କାଟିବା ଲାଗି ଯାଇଥାନ୍ତି ।
କୋର୍ଟଙ୍କ ଏହି ନିର୍ଦ୍ଦେଶ ଅନୁସାରେ ସେମାନେ ଏଥର ମୁମ୍ବାଇରୁ ନେପାଳ ବୁଲିବାକୁ ଯାଇଥିଲେ । ଦୁର୍ଘଟଣାଗ୍ରସ୍ତ ବିମାନରେ ଅଶୋକ ତ୍ରିପାଠୀ, ପତ୍ନୀ ବୈଭବୀ ତ୍ରିପାଠୀ, ପୁତ୍ର ଧନୁଷ ଓ କନ୍ୟା ଋତିକା ଥିଲେ ବୋଲି ବେସାମରିକ ବିମାନ ଚଳାଚଳ କର୍ତ୍ତୃପକ୍ଷ ସୂଚନା ଦେଇଛନ୍ତି ।
ସୂଚନା ଅନୁସାରେ ଗତକାଲି ନେପାଳରେ ଏକ ବିମାନ ଦୁର୍ଘଟଣାଗ୍ରସ୍ଥ ହୋଇଥିଲା । ଏହି ବିମାନରେ ୨୨ ଜଣ ଯାତ୍ରୀ ରହିଥିଲେ । ବିମାନ ଦୁର୍ଘଟଣା ପରେ ଆଜି ବିମାନ ଦୁର୍ଘଟଣାସ୍ଥଳରେ ସେନା ପହଞ୍ଚି ସର୍ଚ୍ଚ ଅପରେସନ ଆରମ୍ଭ କରିଥିଲା । ତେବେ ଦୁର୍ଘଟଣାସ୍ଥଳରୁ ୧୪ ମୃତଦେହ ମିଳିଛି । ଏନେଇ ସୂଚନା ଦେଇଛନ୍ତି ବେସାମରିକ ବିମାନ ଚଳାଚଳ କର୍ତ୍ତୃପକ୍ଷ ।
