ଭୁବନେଶ୍ୱର: ରାଜଧାନୀରେ ଚଳିତ ବର୍ଷର ପ୍ରଥମ ଡେଙ୍ଗୁ ମୃତ୍ୟୁ ଅଭିଯୋଗ । ମୃତକ ଜଣେ ଅବସରପ୍ରାପ୍ତ ପୋଲିସ ଅଧିକାରୀ ହୋଇଥିବା ସୂଚନା ମିଳିଛି । ଡେଙ୍ଗୁରେ ଆକ୍ରାନ୍ତ ହୋଇ ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି । ନିଳାଦ୍ରୀବିହାର ଓ ଡମଣା ଅଞ୍ଚଳରେ ୨ ଜଣ ଡେଙ୍ଗୁରେ ଆକ୍ରାନ୍ତ ହୋଇଥିଲେ । ଆଗକୁ ବର୍ଷା ଦିନ, ତେଣୁ ଡେଙ୍ଗୁ ରୋକିବାକୁ ବିଏମସି ପକ୍ଷରୁ ତତ୍ପରତା ପ୍ରକାଶ ପାଇଛି । ଦୁଇଟି ମେଡିକାଲ ଟିମ ପଠାଇ ସମ୍ପୃକ୍ତ ଅଞ୍ଚଳରେ ସ୍ଥିତି ଅନୁଧ୍ୟାନ କରାଯାଉଛି । ଉଭୟ ଅଞ୍ଚଳକୁ ସ୍ବାସ୍ଥ୍ୟ ଟିମ୍ ସହ ମେୟର ସୁଲୋଚନା ଦାସ ଗସ୍ତ କରିଛନ୍ତି । ତୁରନ୍ତ ବୁଦା କଟାଯିବା ସହ ମଶା ଧୂଆଁ ଛାଡ଼ିବା ଓ ଲୋକଙ୍କ ମଧ୍ୟରେ ସଚେତନତା ସୃଷ୍ଟି ପାଇଁ ପରାମର୍ଶ ଦିଆଯାଇଛି । ଖାଲୁଆ ଅଞ୍ଚଳରେ ପାଣି ଜମି ମଶା ବଂଶ ବୃଦ୍ଧିର ଆଶଙ୍କା ଥିବାରୁ ଏହାର ପ୍ରତିକାର ବ୍ୟବସ୍ଥା ପାଇଁ ସଫେଇ କାର୍ଯ୍ୟକୁ ତ୍ବରାନ୍ବିତ କରିବାକୁ ମେୟର ନିର୍ଦ୍ଦେଶ ଦେଇଛନ୍ତି ।
କେନ୍ଦ୍ରାପଡ଼ାରେ ଅଭାବନୀୟ ଘଟଣା, ବାଲି ଅତଡ଼ା ଖସି ୨ ନାବାଳକ ମୃତ
କେନ୍ଦ୍ରାପଡ଼ା: ଖେଳ ହେଲା କାଳ । ବାଲି ଅତଡ଼ା ଧସି ଦୁଇ ନାବାଳକ ମୃତ । ଏଭଳି ଅଭାବନୀୟ ଅଘଟଣ ଘଟିଛି କେନ୍ଦ୍ରାପଡ଼ା ସଦର ଥାନା ମଗୁରଗଣ୍ଡ ପାଟଣା ଗାଁରେ । ଗାଁର ତିନି ଜଣ ଶିଶୁ ଘର ନିକଟରେ ଥିବା ପୋଖରୀରେ ବାଲି ଗଦାରେ ଗାତ ଖୋଳି ଖେଳୁଥିଲେ । ହଠାତ୍ ବାଲି ଅତଡ଼ା ଧସିବାରୁ ବାଲି ତଳେ ରହି ଯାଇଥିଲେ ୨ ଶିଶୁ । ପରିବାର ଲୋକ ବିଳମ୍ବରେ ଜାଣି ଶିଶୁଙ୍କୁ ଉଦ୍ଧାର କରିବା ବେଳକୁ ସେମାନଙ୍କର ମୃତ୍ୟୁ ହୋଇ ସାରିଥିଲା । ମୃତ ୨ ଶିଶୁ ହେଲେ ସୁରେନ୍ଦ୍ର ଜଜ୍ ଓ ସୁରେନ୍ଦ୍ର ମଞ୍ଚ । ଜଣଙ୍କ ବୟସ ୭ ବର୍ଷ ହୋଇଥିବା ବେଳେ, ଅନ୍ୟ ଜଣଙ୍କ ବୟସ ୧୨ ବର୍ଷ ହେବ ।
ଚନ୍ଦକା ଡମପଡ଼ା ଅଭୟାରଣ୍ୟକୁ ଫେରିଲେ ମହାନଦୀରେ ଫସିଥିବା ଦୁଇ ହାତୀ
ଆଠଗଡ଼: ଚନ୍ଦକା ଡମପଡ଼ା ଅଭୟାରଣ୍ୟକୁ ଫେରିଲେ ମହାନଦୀରେ ଫସିଥିବା ଦୁଇ ହାତୀ । ଗତକାଲି ଆଠଗଡ଼ ସୁକାଶନ ଜଙ୍ଗଲରୁ ଚନ୍ଦକା ଡମପଡ଼ା ଅଭୟାରଣ୍ୟକୁ ଯାଉଥିବା ସମୟରେ ସକାଳ ହୋଇଯିବାରୁ ବାଙ୍କୀ ଭଗିପୁର ଗ୍ରାମ ନିକଟ ମହାନଦୀରେ ଫସି ରହିଥିଲେ ଦୁଇ ହାତୀ । ଦିନ ତମାମ ପ୍ରାୟ ୧୨ ଘଣ୍ଟାରୁ ଅଧିକ ସମୟ ଧରି ପାଣି ଭିତରେ ରହିବା ପରେ ହାତୀ ବାହାରକୁ ବାହାରି ଆସିଛନ୍ତି । ତେବେ ହାତୀକୁ ଦେଖିବା ପାଇଁ ନଦୀ ତୁଠରେ ସ୍ଥାନୀୟ ଲୋକ ମାନଙ୍କ ଭିଡ଼ ଲାଗିଥିବା ବେଳେ ହାତୀମାନେ ଉପରକୁ ଆସିବା ପାଇଁ ବାଧା ସୃଷ୍ଟି ହୋଇଥିଲା । ସନ୍ଧ୍ୟା ହେବା ପରେ ହାତୀ ଦୁଇଟି ଉପରକୁ ଆସିଥିଲେ ଏବଂ ସନ୍ଧ୍ୟା ସମୟରେ ରାସ୍ତାରେ ଜନଗହଳି ଥିବାରୁ ହାତୀ ଦୁଇଟି ରାସ୍ତା କରକୁ ଆସି ପୁଣି ନଦୀ କୂଳକୁ ଫେରି ଯାଇଥିଲେ । ସେଠାରେ ୩ ରୁ ୪ ଘଣ୍ଟା ରହିବା ପରେ ରାତି ପ୍ରାୟ ୩ଟା ସମୟରେ ହାତୀ ଦୁଇଟି ଭଗିପୁର ଗାଁ ନିକଟରେ ଥିବା ବାବା ଧୁଳିଆ ଷଣ୍ଢ ମନ୍ଦିର ଦେଇ ଚନ୍ଦକା ଡମପଡା ଅଭୟାରଣ୍ୟକୁ ଚାଲିଯାଇଥିବା ନେଇ ଡମପଡା ରେଞ୍ଜର ବିରାଜ ଦାସ ସୂଚନା ଦେଇଛନ୍ତି ।
ପାଖେଇ ଆସିଲାଣି ବିଶ୍ବ ପ୍ରସିଦ୍ଧ ରଥଯାତ୍ରା, ଜୋରସୋରରେ ଆଗେଇ ଚାଲିଛି ୩ ରଥର କାମ
ପୁରୀ: ପାଖେଇ ଆସିଲାଣି ବିଶ୍ବ ପ୍ରସିଦ୍ଧ ରଥଯାତ୍ରା । ରଥରେ ଚଢ଼ି ପତିତ ଉଦ୍ଧାର ପାଇଁ ଯାତ୍ରା କରିବେ ପତିତପାବନ । ଏଥିପାଇଁ ପୁରୀ ରଥଖଳାରେ ଜୋରସୋରରେ ଆଗେଇ ଚାଲିଛି ୩ ରଥର କାମ । ବିଶ୍ବକର୍ମା, ଭୋଇ, ରୂପକାରଙ୍କ ସହ ଦୋଳବେଦୀ ଅସ୍ଥାୟୀ କମାର ଶାଳରେ ନିର୍ମାଣ କାର୍ଯ୍ୟକୁ ଜୋରଦାର କରିଛନ୍ତି । ରଥର ଦଣ୍ଡା ସ୍ଥାପନ ହୋଇ ତିନି ରଥର ଚକ ଓ ଅଖ ଉପରେ ଦଣ୍ଡାକୁ ସମତୁଲ କରାଯିବା ପରେ ଅଖର ଗୋଲେଇ ଅନୁସାରେ ଦଣ୍ଡାକୁ କାଟି ଖାପ ଦିଆଯାଇଛି । ସ୍ନାନଯାତ୍ରା ପୂର୍ବରୁ ୪ ନାହାକା ଉଠାଇବାକୁ ଚାଲିଛି ପ୍ରସ୍ତୁତି ।
ସେପଟେ ଦୁଇ ବର୍ଷ ପରେ ମହାପ୍ରଭୁଙ୍କ ଯାତ୍ରାରେ ସାମିଲ ହେବେ ଶ୍ରଦ୍ଧାଳୁ । ଏଥିପାଇଁ ପୁରୀରେ ଅଧିକ ଭିଡ଼ ଜମିବା ଆଶଙ୍କା କରାଯାଉଛି । ଏହାକୁ ଦୃଷ୍ଟିରେ ରଖି ଆଜି ଶ୍ରୀମନ୍ଦିର ସମ୍ମୁଖ ଓ ଚତୁଃପାର୍ଶ୍ୱରେ ରାପିଡ ଆକ୍ସନ ଫୋର୍ସ ମକଡ୍ରିଲ କରିଛି । ରଥଯାତ୍ରାରେ ଦୁଇ କମ୍ପାନୀ, ୨୪୦ ଯବାନ RAF ନିୟୋଜିତ ହେବେ । ଭିଡ଼ ନିୟନ୍ତ୍ରଣ ଓ ସୁରକ୍ଷା ସମ୍ପର୍କରେ ପୁରୀ ପୋଲିସ ମିଳିତ ଭାବରେ ଏହି ମକଡ୍ରିଲରେ ସାମିଲ ହୋଇଥିଲେ ।
ଜଳୁଛି ପଶ୍ଚିମ ଓଡ଼ିଶା, ଆହୁରି ଦୁଇ ଦିନ ଜାରି ରହିବ ଗ୍ରୀଷ୍ମ ପ୍ରବାହ
ଭୁବନେଶ୍ୱର: ଜଳୁଛି ପଶ୍ଚିମ ଓଡ଼ିଶା । ଆସନ୍ତା ଦୁଇ ଦିନ ପର୍ଯ୍ୟନ୍ତ ପଶ୍ଚିମ ଓଡ଼ିଶାରେ ଜାରି ରହିବ ଗ୍ରୀଷ୍ମ ପ୍ରବାହ । ସ୍ବାଭାବିକଠାରୁ ୪ରୁ ୫ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବ । ଏଥିପାଇଁ ବରଗଡ଼, ନୂଆପଡ଼ା, ସୋନପୁର, ବୌଦ୍ଧ, ବଲାଙ୍ଗୀର, ସମ୍ବଲପୁରକୁ ୟେଲୋ ଆଲର୍ଟ ଜାରି କରାଯାଇଛି । ଦିନ ୧୧ଟାରୁ ୩ଟା ପର୍ଯ୍ୟନ୍ତ ଘରୁ ନ ବାହାରିବା ପାଇଁ ପରାମର୍ଶ ଦିଆଯାଇଛି । ଟିଟିଲାଗଡ଼ରେ ତାପମାତ୍ରା ୪୫ ଡିଗ୍ରୀ ଉପରେ ଥିବା ବେଳେ ୪୩ ଡିଗ୍ରୀ ଉପରେ ୯ଟି ସହର ରହିଛି ।
ସେହିପରି ୪୦ ଡିଗ୍ରୀ ଉପରେ ୧୯ଟି ସହର ରହିଛି । ପ୍ରବଳ ଗ୍ରୀଷ୍ମ ପ୍ରବାହ ପାଇଁ ରୋଗୀ, ବୟସ୍କ ଏବଂ ଶିଶୁଙ୍କୁ ଖରା ସଂସ୍ପର୍ଶରେ ଆସିବାକୁ ବାରଣ କରାଯାଇଛି । ଗ୍ରୀଷ୍ମପ୍ରବାହ ପାଇଁ ଆବଶ୍ୟକ ପଦକ୍ଷେପ ନେବାକୁ ପ୍ରତି ଜିଲ୍ଲାପାଳଙ୍କୁ କୁହାଯାଇଛି । ଉପକୂଳ ଓଡ଼ିଶାରେ ତାତି ଅଧିକ ନଥିଲେ ବି ଗୁଳୁଗୁଳି ଅନୁଭୁତ ହେଉଛି । ତାପମାତ୍ରା ୩୫ରୁ ୩୮ ଡିଗ୍ରୀ ମଧ୍ୟରେ ରହୁଥିଲେ ମଧ୍ୟ ଆର୍ଦ୍ରତା ୭୦ ରୁ ୯୦ ପ୍ରତିଶତ ରହୁଛି । ପାଣିପାଗ ନିୟାମକ ଅନୁକୂଳ ନଥିବାରୁ ଲଘୁଚାପ କିମ୍ବା ଘୂର୍ଣ୍ଣିବଳୟ ସୃଷ୍ଟି ହେଉନାହିଁ । ୧୨ ତାରିଖରୁ ରାଜ୍ୟରେ କାଳବୈଶାଖୀ ବର୍ଷା ହେବାର ସମ୍ଭାବନା ରହିଛି ।
ମିଳିପାରେ ଅଶୁଭ ଖବର
ମେଷ : ଆଜି ନିଜର ସକ୍ଷମ ମୁତାବକ କିଛି ଖାଦ୍ୟ କୌଣସି ଅସହାୟ ଲୋକକୁ ସାହାଯ୍ୟ କରନ୍ତୁ ମନର ଆଶା ପୁରଣ ହେବ । ପିତାଙ୍କ ସହିତ ମତଭେଦ ହେବ ଏବଂ ଆଜି ଅଯଥା ଖର୍ଚ୍ଚାନ୍ତ ହେବ । ଆଜି ରିଷ୍ଟପୂର୍ଣ୍ଣ ଦିବସ ରହିଛି ଘରୁ ବାହାରିଲା ବେଳେ କିଛି ଦହି ଖାଇକି ବାହାରନ୍ତୁ । ଜଳରେ ହଳଦି ମିଶାଇ ସ୍ନାନ କରିବ ଏବଂ ଓଁ ଋଣହତ୍ରେ ନମଃ ୨୭ଥର ଜପ କରିବେ ।
ଶୁଭ ରଙ୍ଗ – ହଳଦିଆ
ବୃଷ : ଆଜି କୌଣସି ଆର୍ଥିକ କ୍ଷତି ହେବ ଏବଂ ନିଚ୍ଚଲୋକ ଠାରୁ ଅପମାନିତ ହେବେ ମଥାରେ ଚନ୍ଦନ ଲଗାନ୍ତୁ । ସ୍ୱାମୀ ସ୍ତ୍ରୀ କିମ୍ବା ପ୍ରେମୀଯୁଗଳ ହିଅନ୍ତୁ ମତାନ୍ତର ସହିତ ମନ ବିଚଳିତ ରହିବ, କିଛି ଖାଦ୍ୟ ଦାନ କରନ୍ତୁ । ଆଜି ଚାକିରି ହେଉ କିମ୍ବା ବ୍ୟବସାୟରେ ସଂପୂର୍ଣ୍ଣ ସତର୍କ ରହିବେ ନଚେତ ଦଣ୍ଡିତ ହୋଇପାରନ୍ତି । ଜଳରେ କ୍ଷିର କିମ୍ବା ଗଙ୍ଗାଜଳ ମିଶାଇ ସ୍ନାନ କରିବ ଏବଂ ଓଁ ଦେତ୍ୟ ଗୁରବେ ନମଃ ୨୭ଥର ଜପ କରିବେ, ମଥାରେ ଚନ୍ଦନ ତିଳକ ଲଗାଇବେ ଏବଂ ଚନ୍ଦନ କାଠି ପାଖରେ ରଖିବେ ।
ଶୁଭ ରଙ୍ଗ- ଲାଲ ରଙ୍ଗ
ମିଥୁନ : ଅଶୁଭ ଗ୍ରହଙ୍କର ପ୍ରଭାବରେ ଆଜି ସାଧାରଣ କଥାକୁ ନେଇ ବିଶୃଙ୍ଖଳା ଘଟିବ ଫଳରେ ମନ ଦୁର୍ବଳ ରହିବ କାର୍ଯ୍ୟ ବିଗିଡିଯିବ । ଆଜି କୌଣସି ତରବରିଆ ନିଷ୍ପତି ନେବେ ନାହିଁ ନହେଲେ ନିଜର କ୍ଷତି ହେବ, ନିଜର କାମଗୁଡିକ ସହଜରେ ପୁରଣ ହେବନାହିଁ । ଶତୃ ଆଜି ମିତ୍ର ପାଲଟିଯିବ, ନହେଉଥିବା କାମ ସହଜରେ ହୋଇଯିବ, ମନ ଉତ୍ସାହିତ ରହିବ । ଜଳରେ ଗୋଲାପଜଳ ମିଶାଇ ସ୍ନାନ କରିବ ଏବଂ ଓଁ ଲକ୍ଷ୍ମୀନାରାୟଣାୟ ନମଃ ୨୭ଥର ଜପ କରିବେ, ସବୁଜ ବସ୍ତ୍ର ଦାନ କରିବେ ।
ଶୁଭ ରଙ୍ଗ- ପାଉଁସିଆ
କର୍କଟ : ପାରିବାରିକ ବୋଝ ସହିତ ଚାକିରି କିମ୍ବା ବ୍ୟବସାୟରେ ଭୁଲବୁଝାବଣାର ଶିକାର ଏବଂ ଅର୍ଥଚିନ୍ତା ବଢିବ । ଆଜି ମନ ସନ୍ଦେହ ଭିତରେ ରହିବ ତେଣୁ ଚାକିରି ହେଉ କିମ୍ବା ବ୍ୟବସାୟ ବିଭିନ୍ନ ସମସ୍ୟା ଉପୁଜିବ । ପ୍ରତି କାମ ବିଳମ୍ବରେ ହାସଲ ହେବ, ପ୍ରତି ମୂହୁର୍ତ୍ତରେ ମନ ଭିତରେ ଅଜଣା ଡର ରହିବ । ଜଳରେ ହଳଦିଆ ସୋରିଷ ମିଶାଇ ସ୍ନାନ କରିବେ ଏବଂ ଓଁ ବକ୍ରତୁଣ୍ଡାୟ ନମଃ ୨୭ଥର ଜପ କରିବେ, ଚଣାଡାଲି ଦାନ କରିବେ ।
ଶୁଭ ରଙ୍ଗ – ଧଳା
ସିଂହ : ଗୋଲାପି ରଙ୍ଗର ବସ୍ତ୍ର ପରିଧାନ କରନ୍ତୁ ଏବଂ କିଛି ଅର୍ଥ ଆଜି କୌଣସି ଅସହାୟକୁ ସାହାର୍ଯ୍ୟ କରନ୍ତୁ ମନମୁତାବକ ଫଳ ମିଳିବ । ନିଜର କୌଣସି ସମ୍ପର୍କିୟଙ୍କର ଦେହ ଖରାପ ରହିବ ଫଳରେ ବ୍ୟସ୍ତ ରହିବେ ଏବଂ ମାନସିକ ଚିନ୍ତା ଓ ଅର୍ଥାଭାବ ବଢିବ । ଖର୍ଚ୍ଚ ବଢିଚାଲିବ କିନ୍ତୁ ରୋଜଗାର ସେହି ଅନୁପାତରେ ହେବନାହିଁ ଫଳରେ ମନ ବିଚଳିତ ରହିବ । ଜଳରେ ହଳଦି ମିଶାଇ ସ୍ନାନ କରିବେ ଏବଂ ଓଁ ନମଃ ଶିବାୟ ୨୭ଥର ଜପ କରିବେ ।
ଶୁଭରଙ୍ଗ- ଧଳା
କନ୍ୟା : ଜାଗାବାଡି କିମ୍ବା ନୂଆ କୌଣସି ଗାଡି କିଣିବାର ସମ୍ଭାବନା ଷୃଷ୍ଥି ହେବ, ପୂର୍ବରୁ ନିବେଷ କରିଥିବା ଅର୍ଥର ଲାଭାଶଂ ମିଳିବ । ଆର୍ଥିକ ଅଭିବୃଦ୍ଧି, ନିତ୍ୟବ୍ୟବହାର୍ଯ୍ୟ ଦ୍ରବ୍ୟ ଲାଭ ହେବ କିନ୍ତୁ ମାନସମ୍ନାନରେ କମି ରହିବ । ପ୍ରତି କାଯ୍ୟରେ ମନମୁତାବକ ଫଳ ମିଳିବ, କିନ୍ତୁ ଛାତି କିମ୍ବା ମୁଣ୍ଡ ଜନିତ ବ୍ୟଥା ଭୋଗିବେ । ଜଳରେ ଗୋମତିଚକ୍ର ପକାଇ ସ୍ନାନ କରିବେ ଏବଂ ଓଁ ଲକ୍ଷ୍ମୀନାରାୟଣାୟ ନମଃ ୨୭ଥର ଜପ କରିବେ, କୋଳଥଡାଲି ଦାନ କରିବେ ।
ଶୁଭ ରଙ୍ଗ- ସବୁଜ
ତୁଳା : କୌଣସି ପ୍ରକାରେ ଲାଭାନ୍ୱିତ ହେବେ, କିନ୍ତୁ ଅଚାନକ ମୁଣ୍ଡବ୍ୟଥା ଭଳି ଅସୁସ୍ଥତା ମନକୁ ଅଶାନ୍ତ କରିଦେବ । ପିଲାମାନଙ୍କ ମଧ୍ୟରେ ଆତ୍ମବଳ ବଢିବ, କୌଣସି ଲକ୍ଷ ପୂର୍ଣ୍ଣ ହେବ, କିନ୍ତୁ ଟଙ୍କାପଇସାର ଅଭାବ କିଛି ଅଂଶରେ ରହିବ । ଆଜି କୌଣସି ପ୍ରକାରେ ବାଧାବିଘ୍ନ ଭୋଗିବେ ତେଣୁ ଘରୁ ବାହାରିଲା ବେଳେ ତୁଳସି ଡାଳିଖଣ୍ଡେ ପାଖରେ ରଖି ବାହାରନ୍ତୁ । ଓଁ ବୁଂ ବୁଧାୟ ନମଃ ୨୭ଥର ଜପ କରିବେ, ଅରୁଆଚାଉଳ ଦୁଇମୁଠା କାଉଙ୍କୁ ଖାଇବାକୁ ଦେବେ ।
ଶୁଭ ରଙ୍ଗ- ଧଳା
ବିଛା : ଆର୍ଥିକ ଅଭାବ ସହିତ କର୍ମକ୍ଷେତ୍ରରେ ଅଶୁଭ ସୂଚନା ବଢିବ ଯୋଜନାରେ ଅସଫଳ ହେବେ । ପାରିବାରିକ ମାନସିକଚାପ ବଢିବ, ଆର୍ଥିକ ଅନାଟନ ବଢିବ, ବିବାହ ଯୋଗ୍ୟ ପିଲାଙ୍କର ବିବାହର ସମ୍ଭାବନା ଷୃଷ୍ଟି ହେବ । ନିତିଦିନ ଜିବନରେ ସଂଘର୍ଷ ବଢି ଚାଲିବ, ଜିବନ ଜିବିକାକୁ ନେଇ ଚିନ୍ତା ଦେଖାଦେବ । ଜଳରେ ଲାଲସିନ୍ଦୁର ମିଶାଇ ସ୍ନାନ କରିବେ ଏବଂ ଓଁ ଅଙ୍ଗାରକାୟ ନମଃ ୨୭ଥର ଜପ କରିବେ ।
ଶୁଭ ରଙ୍ଗ- ସବୁକ
ଧନୁ : ନିଜ ବନ୍ଧୁପରିଜନରେ କିମ୍ବା ସମାଜରେ କଲ୍ୟାଣକାରି କାର୍ଯ୍ୟକରି ଆତ୍ମସମ୍ମାନ ବୃଦ୍ଧି ହେବ । ଜି କିଛି ଗୁଡ ଗାଇଙ୍କୁ ନିଜ ହାତରେ ଖୁଆନ୍ତୁ ଅଟକିଥିବା କାମ ପୁରଣ ହେବ । କିଛି ନା କିଛି ମନମୁତାବକ ଇଛା ପୁରଣ ହେବ, ଅନ୍ୟର ସୁଖରେ ସୁଖି ହେବେ ଫଳରେ ମାନସମ୍ନାନ ବଢିବ । ଦହି ମିଶାଇ ସ୍ନାନ କରିବେ ଏବଂ ୭ଖଣ୍ଡ ହଳଦି ଭଗବାନ ବିଷ୍ନୁଙ୍କୁ ଅର୍ପଣ କରିବେ ।
ଶୁଭ ରଙ୍ଗ – ଧଳା
ମକର : କୌଣସି ଅଟକିଥିବା କାର୍ଯ୍ୟ ହାସଲ ହେବ ଏବଂ ପୁରୁଣା ବକେୟା ମିଳିବ କିମ୍ବା ମିଳିବାର ସମ୍ଭାବନା ସୃଷ୍ଟି ହେବ । ବନ୍ଧୁପରିଜନରେ ସାହାଯ୍ୟ ମିଳିବ, ଯାହା ଉଦ୍ୟମ କରିବେ ପୁରଣ ହେବ, କୌଣସି ସ୍ଥାନକୁ ବୁଲିବାକୁ ଯିବେ । ସମୟ ଏତେ ଶୁଭ ରହିବ ନାହିଁ ମନ ଅଶାନ୍ତ ରହିବ ତେଣୁ ଖଣ୍ଡେ ବର ଓହଳ ପାଖରେ ରଖିବେ କଲ୍ୟାଣ ହେବ । ମୁଗଡାଲି ପାରାଙ୍କୁ ଖାଇବାକୁ ଦିଅନ୍ତୁ କଲ୍ୟାଣ ହେବ ।
ଶୁଭ ରଙ୍ଗ- ଧଳା
କୁମ୍ଭ : ଆଜି କିଛି ବିରିଡାଲି କୌଣସି ଦିବ୍ୟାଙ୍ଗଙ୍କୁ ଦାନ କରନ୍ତୁ ରିଷ୍ଠ ଖଣ୍ଡନ ହୋଇ ଶୁଭରେ ଦିନ କଟିବ । ଆଜି କଳା ରଙ୍ଗର କିଛି ବ୍ୟବହାର କରନ୍ତୁ ଏବଂ କିଛି ଲୁହାର ଦ୍ରବ୍ୟ କୌଣସି କଳା ବ୍ରାହ୍ମଣଙ୍କୁ ଦାନ କରନ୍ତୁ । ଚେଷ୍ଟା ଅନୁଯାୟୀ ଫଳ ମିଳିବ ନାହିଁ, ରାଜଦଣ୍ଡର ସୁଚନା ରହିଛି ତେଣୁ ପ୍ରତି କ୍ଷେତ୍ରରେ ସତର୍କର ସହିତ ରହିବା ଜରୂରୀ ।
ଶୁଭ ରଙ୍ଗ- ହଳଦିଆ
ମୀନ ରାଶି : ପୂର୍ବଭାଦ୍ର ନକ୍ଷତ୍ର- ପେଟ ଏବଂ ଛାତି ଜନିତ ବ୍ୟଥା ଭୋଗିବେ, ଗୃହରେ କିମ୍ବା ସଙ୍ଗସାଥିରେ ବିଶୃଙ୍ଖଳା ଷୃଷ୍ଟି ହେବ, ତେଣୁ ମନେମନେ ଓଁ ନମଃ ଶିବାୟ ଜପ କରିବେ । ମନକୁ ଅଜଣା ଭୟ ମଧ୍ୟରେ ଦିନଭରି ରହିବ, ଅର୍ଥ ବ୍ୟୟ ଏବଂ ମାନସିକ ଅଶାନ୍ତି ବଢିବ, ପାରାଙ୍କୁ ଖାଇବାକୁ ଦେବେ କଲ୍ୟାଣ ହେବ । ଆୟ ଠାରୁ ବ୍ୟୟ ଅଧିକ ହେବ, ଚାକିରିରେ ଅନିଶ୍ଚିତତା ପରିସ୍ଥିତି ଷୃଷ୍ଟି ହେବ, ମନ ଅସ୍ଥିର ରହିବ । ଜଳରେ ମହୁ ମିଶାଇ ସ୍ନାନକରିବେ ଏବଂ ଓଁ ବିଷ୍ଣବେ ନମଃ ୨୭ଥର ଜପ କରିବେ, ଗହମ ଦାନ କରିବେ ।
ଶୁଭ ରଙ୍ଗ – ନୀଳ
ଆଜିଠୁ ଚିଲିକାରେ ବୁଲିବ ଓଡ଼ିଶାର ପ୍ରଥମ ବିଳାସପୂର୍ଣ୍ଣ ହାଉସ ବୋଟ୍ ଗରୁଡ଼, ଉଦଘାଟନ କରିବେ ମୁଖ୍ୟମନ୍ତ୍ରୀ
ଚିଲିକା: ଆଜିଠୁ ଚିଲିକାରେ ବୁଲିବ ବହୁ ପ୍ରତିକ୍ଷୀତ ଓଡ଼ିଶାର ପ୍ରଥମ ବିଳାସପୂର୍ଣ୍ଣ ହାଉସ ବୋଟ୍ ’ଗରୁଡ଼’ । ସକାଳ ୯ଟା ୩୦ରେ ଭର୍ଚୁଆଲରେ ଉଦଘାଟନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଉଦଘାଟନ ସମୟରେ ଉପସ୍ଥିତ ରହିବେ ପର୍ଯ୍ୟଟନ ମନ୍ତ୍ରୀ ଅଶ୍ବନୀ କୁମାର ପାତ୍ର । ଗରୁଡ଼ ବୋଟରେ ଜନ୍ମଦିନ, ରିଙ୍ଗ ସେରମୋନି, ବିବାହ ବାର୍ଷିକୀ ପାଳନ, ରାତ୍ରିଯାପନ ବ୍ୟବସ୍ଥା ଇତ୍ୟାଦିର ମଜା ନେଇପାରିବେ ପର୍ଯ୍ୟଟକ । ପର୍ଯ୍ୟଟକଙ୍କ ଖୁସି ଏବଂ ସୁରକ୍ଷାକୁ ପ୍ରାଧାନ୍ୟ ଦିଆଯିବ ସହ ସବୁ ପ୍ରକାରର ସୁବିଧା ବୋଟରେ ଉପଲବ୍ଧ ରହିଛି ।
ଡବଲ୍ ଇଞ୍ଜିନ୍ ବିଶିଷ୍ଟ ଏହି ବୋଟର ଲମ୍ବା ୧୦୫ଫୁଟ୍, ଓସାର ୨୨ଫୁଟ୍ ରହିଛି । ଚିଲିକାର ଜଳବାୟୁ ଓ ପରିବେଶ ଅନୁଯାୟୀ ଏହାର ଡିଜାଇନ୍ କରାଯାଇଛି । ବୋଟର ତଳ ମହଲାରେ ବିଳାସପୂର୍ଣ୍ଣ ଶୀତତାପ ନିୟନ୍ତ୍ରିତ ବାର୍ ସହିତ ଲାଉଞ୍ଜ ଅଛି । ୩୦ ଜଣ ଲୋକ ଏକାଠି ହୋଇପାରିବେ । ସୁସ୍ୱାଦୁ ମଧ୍ୟାହ୍ନଭୋଜନ, ହାଇ ଟି, ରାତ୍ରିଭୋଜନ ଓ ସକାଳ ଜଳଖିଆ ମିଳିବ । ବୋଟରେ ଥିବା ପ୍ରାଇଭେଟ୍ ଲାଉଞ୍ଜରେ ୪ଟି ପ୍ରିମିୟମ ରୁମ୍ ରହିଛି । ଦୁଇଟି ସୁଟ୍ ରୁମରେ ନୀଳାମ୍ବୁ ଚିଲାକାର ମନୋରମ ଦୃଶ୍ୟକୁ ୧୮୦ଡିଗ୍ରୀରୁ ଉପଭୋଗ କରିପାରିବେ । ତା’ ସାଙ୍ଗକୁ କିଙ୍ଗ୍ ସାଇଜ୍ ବେଡ୍, ବସିବା ଲାଗି ରାଜକୀୟ ସୋଫାର ମଧ୍ୟ ବ୍ୟବସ୍ଥା କରାଯାଇଛି ।
ବାରବାଟୀ ଟି-୨୦ ପାଇଁ ବଢୁଛି ହାର୍ଟବିଟ୍, ସକାଳ ୯ଟାରେ କାଉଣ୍ଟରରେ ମିଳିବ ଟିକେଟ୍
କଟକ: ବାରବାଟୀ ଟି-୨୦ ପାଇଁ ବଢ଼ୁଛି ହାର୍ଟବିଟ୍ । ଉତ୍କଣ୍ଠିତ ଦର୍ଶକ, ଉତ୍ସାହିତ ଓସିଏ କର୍ତ୍ତୃପକ୍ଷ । ୧୨ରେ ଭାରତ-ଦକ୍ଷିଣ ଆଫ୍ରିକା ଟକ୍କର । ଏଥିପାଇଁ ଆଜିଠୁ କାଉଣ୍ଟରରେ ମିଳୁଛି ଟିକେଟ୍ । ସାଧାରଣ ଦର୍ଶକଙ୍କ ପାଇଁ ୧୨ ହଜାର ଟିକେଟ ବିକ୍ରି ହେବ । ଗ୍ୟାଲେରୀ ଟିକେଟ ପାଇଁ ୧୦ଟି ଓ ୫ ହଜାର ଟଙ୍କାରୁ ଅଧିକ ମୂଲ୍ୟର ଟିକେଟ ପାଇଁ ୨ଟି କାଉଣ୍ଟର ଖୋଲାଯାଇଛି । ନିଜ ପରିଚୟ ପତ୍ର ଦେଖାଇବା ପରେ ଜଣକ ପିଛା ଦୁଇଟି ଟିକେଟ ମିଳିବ । ଏଥିପାଇଁ ଓସିଏ ପକ୍ଷରୁ ସମସ୍ତ ପ୍ରସ୍ତୁତି ହୋଇଛି ।
ସେପଟେ ପିଚ୍, ଗ୍ରାଉଣ୍ଡ, ଷ୍ଟାଡିୟମର ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ବିସିସିଆଇ ମୁଖ୍ୟ କ୍ୟୁରେଟର ଆଶିଷ ଭୌମିକ୍, ବେଙ୍ଗଲ କ୍ରିକେଟ ଆସୋସିଏସନର ମୁଖ୍ୟ କ୍ୟୁରେଟର ସୁଜନ ମୁଖାର୍ଜୀ ଷ୍ଟାଡିୟମ ବୁଲି ପ୍ରସ୍ତୁତି ସମ୍ପର୍କରେ ଓସିଏ ମୁଖ୍ୟ କ୍ୟୁରେଟର ପଙ୍କଜ ପଟ୍ଟନାୟକଙ୍କ ସହ ଆଲୋଚନା କରିଛନ୍ତି । ମ୍ୟାଚ ପାଇଁ ଆସନ୍ତାକାଲି ଅପରାହ୍ନରେ ଉଭୟ ଦଳ ସ୍ବତନ୍ତ୍ର ବିମାନ ଯୋଗେ ଭୁବନେଶ୍ବର ପହଞ୍ଚିବେ । ୧୧ ତାରିଖରେ ପର୍ଯ୍ୟାୟକ୍ରମେ ବାରବାଟୀ ଅଭ୍ୟାସ ପାଇଁ ଯିବେ ।
ହିମାଳୟ ଅଞ୍ଚଳରେ ଚୀନର ବେଆଇନ କାର୍ଯ୍ୟକଳାପ, ସତର୍କ କରାଇଲେ ଆମେରିକା କମାଣ୍ଡିଂ ଜେନେରାଲ
ଲଦାଖ: ଲଦାଖରେ ଡ୍ରାଗନର ଖେଳ । ଚାଲିଛି ବେଆଇନ କାର୍ଯ୍ୟକଳାପ । ଏନେଇ ସତର୍କ କରାଇଛନ୍ତି ଆମେରିକା ଆର୍ମି ପାସିଫିକର କମାଣ୍ଡିଂ ଜେନେରାଲ ଚାର୍ଲସ ଏ. ଫ୍ଲିନ । ସେ କହିଛନ୍ତି ଚୀନର ଏହି କାର୍ଯ୍ୟକଳାପ ଓ ଭିତ୍ତିଭୂମି ନିର୍ମାଣ ଅସ୍ଥିରତା ସୃଷ୍ଟି ଉଦ୍ଦେଶ୍ୟରେ କରାଯାଉଛି । ଏହା ସହ ଏହା ଦ୍ବିପାକ୍ଷିକ ସମ୍ପର୍କ ବି କ୍ଷୁଣ୍ଣ କରିପାରେ । ସେ କହିଛନ୍ତି ଚୀନ ପକ୍ଷରୁ ଓ୍ବେଷ୍ଟେର୍ଣ୍ଣ ଥିଏଟର କମାଣ୍ଡରେ କରାଯାଉଥିବା ଏହି ନିର୍ମାଣ କାର୍ଯ୍ୟ ପ୍ରତି ସତର୍କ ହେବାର ଆବଶ୍ୟକତା ରହିଛି । ଚୀନର ଏହି ପ୍ରକଳ୍ପ ଉଦ୍ଦେଶ୍ୟମୂଳକ ଓ ଗୋପନୀୟ ଭାବେ ଜାରି ରହିଛି । ଏହି ଅଞ୍ଚଳରେ ଅସ୍ଥିରତା ସୃଷ୍ଟି ଲାଗି ଚୀନର ଏହି ପଦକ୍ଷେପ ବୋଲି କହିଛନ୍ତି ଫ୍ଲିନ । ଚୀନର ଏହି ଛଳନା ବିରୋଧରେ ମିଳିତ ଭାବେ କାର୍ଯ୍ୟ କରିବାକୁ ଆହ୍ବାନ ଦେଇଛନ୍ତି ଜେନେରାଲ ଫ୍ଲିନ ।
ଆସନ୍ତା ଅକ୍ଟୋବରରେ ଭାରତ ଓ ଆମେରିକା ପକ୍ଷରୁ ମିଳିତ ଭାବେ ହିମାଳୟ ଅଞ୍ଚଳରେ ସମରାଭ୍ୟାସ କରାଯିବ । ପ୍ରାୟ ୧୦ ହଜାର ଫୁଟ ଉଚ୍ଚରେ ଏହି ସମରାଭ୍ୟାସ ଚାଲିବ । ଅତ୍ୟଧିକ ଉଚ୍ଚତାରେ ଯୁଦ୍ଧ କୌଶଳ ଲାଗି ପ୍ରସ୍ତୁତି ଏହି ସମରାଭ୍ୟାସର ଉଦ୍ଦେଶ୍ୟ । ଏହି ସମରାଭ୍ୟାସରେ ନୂଆ ପ୍ରଯୁକ୍ତି, ବାୟୁସେନାକୁ ସଶକ୍ତ କରିବା, ଆକାଶମାର୍ଗରେ ଯୁଦ୍ଧ କୌଶଳ, ଲଜିଷ୍ଟିକ୍ସ ଓ ସୂଚନା ଆଦାନପ୍ରଦାନ ଲାଗି କ୍ଷେତ୍ର ପ୍ରସ୍ତୁତ କରାଯିବ । ଗତ ଜାନୁଆରୀରେ ଲଦାଖ ଅନ୍ତର୍ଗତ ପଙ୍ଗୋଙ୍ଗ ହ୍ରଦ ନିକଟରେ ଚୀନ ଏକ ପୋଲ ନିର୍ମାଣ କରୁଥିବା ସୂଚନା ମିଳିଥିଲା । ଏହା ସହ ହିମାଳୟ ଅଞ୍ଚଳରେ ଚୀନ କେତେକ ଏୟାରଫିଲ୍ଡ ଓ ଭିତ୍ତିଭୂମି ନିର୍ମାଣ କରୁଥିବା ବି ସୂଚନା ମିଳିଛି ।
ଜୁନ୍ ଶେଷ ସପ୍ତାହରେ ବିଦେଶ ଗସ୍ତରେ ଯିବେ ନବୀନ, ରୋମରେ ଓ୍ବାର୍ଲଡ ଫୁଡ କାର୍ଯ୍ୟକ୍ରମରେ କରିବେ ସମ୍ବୋଧନ
ଭୁବନେଶ୍ୱର: ଜୁନ୍ ଶେଷ ସପ୍ତାହରେ ବିଦେଶ ଗସ୍ତରେ ଯିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଥମେ ରୋମରେ ଅନୁଷ୍ଠିତ ହେବାକୁ ଥିବା ଓ୍ବାର୍ଲଡ ଫୁଡ୍ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀଙ୍କ ସମ୍ବୋଧନ କାର୍ଯ୍ୟକ୍ରମ ରହିଛି । ପରେ ଭାଟିକାନ୍ ସିଟିରେ ପୋପଙ୍କୁ ସାକ୍ଷାତ କରିବାର ସମ୍ଭାବନା ରହିଛି । ଶେଷରେ ଦୁବାଇ ନିବେଶକ ସମ୍ମିଳନୀରେ ମୁଖ୍ୟମନ୍ତ୍ରୀଙ୍କ ଯୋଗଦେବାର କାର୍ଯ୍ୟକ୍ରମ ରହିଛି । ଓ୍ବାର୍ଲଡ ଫୁଡ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ରାଜ୍ୟରେ କୃଷି, ଖାଦ୍ୟ ନିରାପତ୍ତା ଏବଂ ବିପର୍ଯ୍ୟୟ ପ୍ରଶମନର ରୂପାନ୍ତରଣ କ୍ଷେତ୍ରରେ ଓଡ଼ିଶାର ଉଦ୍ୟମ, ସାମର୍ଥ୍ୟ ଓ ସଫଳତା ଅନ୍ୟମାନଙ୍କ ପାଇଁ କିଭଳି ଅନୁକରଣୀୟ ହୋଇପାରିଛି, ସେନେଇ ନିଜ ଅନୁଭୂତି ଓ ଉପଲବ୍ଧି କହିବେ ।
ରୋମଠାରେ ଥିବା ପ୍ରବାସୀ ଓଡ଼ିଆ ସଂଘ ସହିତ ମୁଖ୍ୟମନ୍ତ୍ରୀ ଭାବବିନିମୟ କରିବାର ମଧ୍ୟ କାର୍ଯ୍ୟକ୍ରମ ରହିଛି । ଏହା ସହ ମୁଖ୍ୟମନ୍ତ୍ରୀ ଭାଟିକାନ୍ ସିଟି ଯାଇ ପୋପଙ୍କୁ ସାକ୍ଷାତ କରିବାର ମଧ୍ୟ ସମ୍ଭାବନା ରହିଛି । ବିଦେଶ ଗସ୍ତର ଶେଷ ପର୍ଯ୍ୟାୟରେ ମୁଖ୍ୟମନ୍ତ୍ରୀ ଦୁବାଇରେ ପହଞ୍ଚିବେ । ସେଠାରେ ଅନୁଷ୍ଠିତ ହେବାକୁ ଥିବା ଏକ ନିବେଶକ ସମ୍ମିଳନୀକୁ ସମ୍ବୋଧିତ କରିବା ସହ ଦୁବାଇରେ ଅବସ୍ଥାନ କରୁଥିବା ଓଡ଼ିଆ ସଂଗଠନର ସଦସ୍ୟଙ୍କୁ ଭେଟିବାର କାର୍ଯ୍ୟକ୍ରମ ରହିଥିବା ସୂଚନା ମିଳିଛି । ଦୀର୍ଘ ଏକ ଦଶନ୍ଧି ପରେ ମୁଖ୍ୟମନ୍ତ୍ରୀ ବିଦେଶ ଗସ୍ତରେ ଯିବେ । ଶେଷଥର ପାଇଁ ସେ ୨୦୧୨ରେ ବ୍ରିଟେନ ଗସ୍ତ କରିଥିଲେ ।