ଭୁବନେଶ୍ୱର: ବରମୁଣ୍ଡା ନୂଆ ବସଷ୍ଟାଣ୍ଡରେ ଡ୍ରାଇଭର ଓ କଣ୍ଡକ୍ଟରକୁ ଗୋଡେଇ ଗୋଡେଇ ହାଣିଲେ ଅନ୍ୟ ବସର କର୍ମଚାରୀ । ପୋଲିସ ସାମ୍ନାରେ ହାଣି ରକ୍ତାକ୍ତ କଲେ । ରକ୍ତ ଜୁଡୁବୁଡୁ ହୋଇ ଡ୍ରାଇଭର ଓ କଣ୍ଡକ୍ଟର ବସ ଷ୍ଟାଣ୍ଡ ସାରା ଦୌଡ଼ିଥିଲେ ବି କେହି ଉଦ୍ଧାର କରିନଥିଲେ । ତେବେ ଘଟଣା ସ୍ଥଳରେ ପହଞ୍ଚିଛି ଭରତପୁର ଥାନା ପୋଲିସ । ଗାଡି ପାର୍କିଂକୁ ନେଇ ଡ୍ରାଇଭର ଓ କଣ୍ଡକ୍ଟରକୁ ବସ ଷ୍ଟାଣ୍ଡର ଅନ୍ୟ ବସର କର୍ମଚାରୀମାନେ ହାଣିଥିବା ସୂଚନା ମିଳିଛି । ତେବେ ଆହତ ଦୁଇ ଜଣଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି ।
ଗିରଫ ହେଲେ କୋଟିପତି ବିଡିଓ ଅଶ୍ୱିନୀ ଦାସ୍
ଜଳେଶ୍ୱର: କୋଟିପତି ଓଏସ ଅଶ୍ୱିନୀ ଦାସ ଗିରଫ । ଜଳେଶ୍ୱର ବିଡିଓ ଅଶ୍ୱିନୀ ଦାସଙ୍କ ଠାରୁ ଏଯାଏଁ ମୋଟ୍ ୫ କୋଟି ୭ ଲକ୍ଷ ଟଙ୍କାର ସମ୍ପତ୍ତି ଠାବ କରିଛି ଭିଜିଲାନ୍ସ । ଏଥିରେ ରହିଛି କଟକ ଓ ଭୁବନେଶ୍ୱରରେ ପ୍ରାଇମ ଲୋକେସନର ଥିବା ୨୪ଟି ପ୍ଳଟ । ବିଡିଓଙ୍କ ଘରେ ଥିବା ମନ୍ଦିରରେ ଠାକୁରଙ୍କ ମୁଣ୍ଡରେ ଥିଲା ସୁନା ମୁକୁଟ । ଏହି ସୁନା ମୁକୁଟକୁ ମିସାଇ ମୋଟ ୧ କେଜି ୨୮ ଗ୍ରାମ ସୁନା ଜବତ କରାଯାଇଛି । ସେହିପରି ୩ କିଲୋ ୬୩୨ ଗ୍ରାମ ରୂପା ସିଜ୍ କରିଛି ଭିଜିଲାନ୍ସ । ଜବତ ହୋଇଥିବା ସମ୍ପତ୍ତିରେ ରହିଛି ଚାରୋଟି ଦାମୀ ଚାରି ଚକିଆ ଗାଡି, ୩ଟି ଦୁଇ ଚକିଆ ଗାଡି, ୭୩ ଲକ୍ଷ ୯୧ ହଜାର ଟଙ୍କାର ବ୍ୟାଙ୍କ ଡିପୋଜିଟ୍ ଓ ଇନ୍ସୁରାନ୍ସ । ଏହାସହ ଘରୁ ନଗଦ ୧.୭ ଲକ୍ଷ ଟଙ୍କା ଜବତ କରିଛି ଭିଜିଲାନ୍ସ ।
ଜଳେଶ୍ୱର ବ୍ଳକର ଉନ୍ନତି ନୁହେଁ, ନିଜ ପକେଟ ଓ ନିଜର ବିକାଶରେ ମାତିଥିଲେ ବାବୁ । ଅଶ୍ୱିନୀଙ୍କ ଗୋଟିଏ ତିନି ମହଲା କୋଠାର ଦାମ ୧ କୋଟି ୨୨ ଲକ୍ଷ ଟଙ୍କା ଥିବା ବେଳେ, ଗୋଟିଏ ଦୁଇ ମହଲା କୋଠାର ଦାମ ରହିଛି ୧ କୋଟି ୧୦ ଲକ୍ଷ ଟଙ୍କା । ଗୋଟିଏ ବ୍ରିକ୍ସ ଫ୍ୟାକ୍ଟ୍ରି ମଧ୍ୟ ରହିଛି ଅଶ୍ବିନୀଙ୍କ ନାଁରେ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଗତକାଲି ଏକକାଳୀନ ୬ଟି ସ୍ଥାନରେ ଚଢ଼ାଉ କରିଥିଲା ଭିଜିଲାନ୍ସ । ୫ ଡିଏସପିଙ୍କ ନେତୃତ୍ୱରେ ୯ ଇନସ୍ପେକ୍ଟର ଓ ଅନ୍ୟାନ୍ୟ କର୍ମଚାରୀ ରେଡରେ ସାମିଲ ହୋଇଥିଲେ । ଅଶ୍ୱିନୀ ୧୯୯୫ ମସିହାରେ ପ୍ରଥମେ କୃଷି ବିଭାଗର ଜୁନିୟର ଆସିଷ୍ଟାଣ୍ଟ ଭାବେ କାର୍ଯ୍ୟରେ ଯୋଗ ଦେଇଥିଲେ । ୨୦୨୦ରେ ସେ ଓଏଏସ୍ ସ୍ତରକୁ ପଦୋନ୍ନତି ପାଇ ସେ ଟାଙ୍ଗୀ ତହସିଲଦାର ଭାବେ କାର୍ଯ୍ୟରେ ଯୋଗ ଦେଇଥିଲେ । ପରେ କେନ୍ଦ୍ରପଡା ଜିଲ୍ଲାର ମହାକାଳପଡ଼ା ଓ ବାଲେଶ୍ବର ଜିଲ୍ଲାର ଜଳେଶ୍ବର ବିଡ଼ିଓ ଭାବେ କାର୍ଯ୍ୟ ତୁଲାଇଥିଲେ ।
ଧିମା ପଡ଼ିଛି ଦକ୍ଷିଣ ପଶ୍ଚିମ ମୌସୁମୀ ବାୟୁ, ସମ୍ପୂର୍ଣ୍ଣ ଓଡ଼ିଶା ଛୁଇଁବାକୁ ଲାଗିବ ଆହୁରି ୫ ଦିନ
ଭୁବନେଶ୍ୱର: ସମ୍ପୂର୍ଣ୍ଣ ଓଡ଼ିଶାକୁ ମୌସୁମୀ ଛୁଇଁବାକୁ ଆହୁରି ୫ ଦିନ ଲାଗିବ । ଦକ୍ଷିଣ ଓଡ଼ିଶାରେ ମୌସୁମୀ ସକ୍ରିୟ ପରେ ଏବେ ଧିମା ହୋଇଯାଇଛି ମୌସୁମୀ । ପାଗ ଅନୁକୂଳ ହେଲେ ବି ଆଗକୁ ବଢୁନି ମୌସୁମୀ । ୧୬ ତାରିଖରେ ଦକ୍ଷିଣ ଓଡ଼ିଶା ଛୁଇଁଥିଲା ମୌସୁମୀ । ହେଲେ ୨ ଦିନ ହେବ ଦୁର୍ବଳ ହୋଇଯାଇଛି । ଫଳରେ ଅନ୍ୟ ଜିଲ୍ଲାକୁ ଅଗ୍ରସର ହୋଇପାରିନାହିଁ । ବଙ୍ଗୋପସାଗରରୁ ଆସୁଥିବା ଜଳୀୟବାଷ୍ପ ପାଇଁ କେବଳ ଘଡ଼ଘଡ଼ ବିଜୁଳି ସହ କିଛି ଜିଲ୍ଲାରେ ବର୍ଷା ହେଉଛି । ଏବେ ବି ରାଜ୍ୟରେ ୬୩ ପ୍ରତିଶତ ନିଅଣ୍ଟିଆ ବର୍ଷା ରେକର୍ଡ ହୋଇଛି ।
ତେବେ ଆସନ୍ତା ୨୪ ଘଣ୍ଟା ମଧ୍ୟରେ ପ୍ରବଳ ବର୍ଷା ନେଇ ୩ଟି ଜିଲ୍ଲା ଅନୁଗୁଳ, କେନ୍ଦୁଝର ଏବଂ ମୟୂରଭଞ୍ଜକୁ ୟେଲୋ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଆସନ୍ତା ୨୩ ତାରିଖ ପର୍ଯ୍ୟନ୍ତ ରାଜ୍ୟର କିଛି ଜିଲ୍ଲାରେ କାଳବୈଶାଖୀ ଜନିତ ବର୍ଷା ପାଇଁ ୟେଲୋ ଆଲର୍ଟ ଜାରି କରାଯାଇଥିବା ବେଳେ ଉତ୍ତର ଏବଂ ଉପକୂଳ ଓଡ଼ିଶାର କିଛି ଜିଲ୍ଲାରେ ପ୍ରବଳ ବର୍ଷା ନେଇ ସତର୍କତା ଜାରି କରାଯାଇଛି । ତେବେ ବର୍ଷା ହେଲେ ମଧ୍ୟ ଚାଷ ପାଇଁ ତାହା ପର୍ଯ୍ୟାପ୍ତ ହେବା ସମ୍ଭାବନା କମ୍ ରହିଛି । କାରଣ ଆସନ୍ତା ଜୁଲାଇ ୧୫ ତାରିଖ ପର୍ଯ୍ୟନ୍ତ ରାଜ୍ୟରେ ବଡ଼ ବର୍ଷାର ସମ୍ଭାବନା ନାହିଁ ।
ବାଙ୍ଗାଲୋରରେ ନିର୍ଣ୍ଣାୟକ ଲଢ଼େଇ, ସଂଧ୍ୟା ୭ଟାରେ ମୁହାଁମୁହିଁ ହେବେ ଭାରତ ଓ ଦକ୍ଷିଣ ଆଫ୍ରିକା
ବେଙ୍ଗାଲୁରୁ: ସୁପର ସଣ୍ଡେର ସୁପର ଫାଇଟ୍ । ଆଜି ଟି-୨୦ ସିରିଜର ଫାଇନାଲ ଲଢ଼େଇ । ବେଙ୍ଗାଲୁରୁ ଚିନ୍ନାସ୍ୱାମୀ ଷ୍ଟାଡିୟମରେ ମୁହାଁମୁହିଁ ହେବେ ଭାରତ ଓ ଦକ୍ଷିଣ ଆଫ୍ରିକା । ସଂଧ୍ୟା ୭ଟାରେ ଖେଳାଯିବ ଏହି ନିର୍ଣ୍ଣାୟକ ମ୍ୟାଚ । ତେବେ ଏହା ଏକ ରୋମାଞ୍ଚକର ମ୍ୟାଚ ହେବ ବୋଲି କ୍ରିକେଟ୍ ପ୍ରେମୀ ଆଶା ରଖିଛନ୍ତି । ୫ ମ୍ୟାଚ ବିଶିଷ୍ଟ ଏହି ସିରିଜରେ ଉଭୟ ଦଳ ଦୁଇଟି ଲେଖାଏଁ ମ୍ୟାଚ ଜିତି ସିରିଜକୁ ୨-୨ରେ ବରାବର ରଖିଛନ୍ତି । ତେଣୁ ଉଭୟ ଟିମ୍ ଆଜିର ମ୍ୟାଚକୁ ଜିତି ସିରିଜ୍ ହାତେଇବାକୁ ଉଦ୍ୟମ କରିବେ ।
ଦିଲ୍ଲୀ, କଟକରେ ପରାଜୟ ପରେ ବିଶାଖପାଟଣା ଓ ରାଜକୋଟରେ ମ୍ୟାଚ୍ ଜିତି ଭାରତୀୟ ଦଳ ଶୃଙ୍ଖଳାକୁ ୨-୨ ସ୍ତରକୁ ନେଇ ଆସିଛି । ଶୁକ୍ରବାର ଭାରତ ରାଜକୋଟରେ ୮୨ ରନ୍ର ବଡ଼ ବ୍ୟବଧାନରେ ଦକ୍ଷିଣ ଆଫ୍ରିକାକୁ ହରାଇ ଦେଇଥିଲା । ଏହାପରେ ଟିମ୍ ଇଣ୍ଡିଆର ମନୋବଳ ବୃଦ୍ଧି ପାଇଛି । ସେପଟେ ଲଗାତର ଦୁଇଟି ମ୍ୟାଚ ହାରିବା ପରେ ଆଜିର ମ୍ୟାଚକୁ ନିଜ ନାମରେ କରି ସିରିଜ୍ ହାତେଇବା ଚକ୍କରରେ ଅଛି ଭ୍ରମଣକାରୀ ଦଳ ।
ଆଜି ଆଷାଢ଼ କୃଷ୍ଣ ପଞ୍ଚମୀ ତିଥି, ମହାପ୍ରଭୁଙ୍କ ଶ୍ରୀଅଙ୍ଗରେ ଲାଗି ହେବ ଫୁଲୁରୀ ତେଲ
ପୁରୀ: ଆଜି ଆଷାଢ଼ କୃଷ୍ପ ପଞ୍ଚମୀ ତିଥି । ମହାପ୍ରଭୁଙ୍କୁ ଲାଗି ହେବ ଫୁଲୁରୀ ତେଲ । ଦେବ ସ୍ନାନ ପୂର୍ଣ୍ଣିମାରେ ୧୦୮ ଗରା ଜଳରେ ସ୍ନାନ କରି ଅଣସର ଘରେ ଜ୍ୱରରେ ପୀଡ଼ିତ ଅଛନ୍ତି ଚତୁର୍ଦ୍ଧାମୂର୍ତ୍ତୀ । ଅଣସର ଗୃହରେ କ୍ଷୀଣ ଆଲୋକରେ ଦଇତାପତି ଓ ପତି ମହାପାତ୍ର ସେବକଙ୍କ ଦ୍ୱାରା ଗୁପ୍ତସେବା ଚାଲିଥିବାବେଳେ ଚତୁର୍ଦ୍ଧା ବିଗ୍ରହଙ୍କ ଶ୍ରୀଅଙ୍ଗରେ ଲାଗି କରାଯିବ ଫୁଲୁରି ତେଲ । ବଡ଼ ଓଡ଼ିଆ ମଠ ପକ୍ଷରୁ ଚତୁର୍ଦ୍ଧାବିଗ୍ରହଙ୍କ ଲାଗି ଏହି ଫୁଲୁରି ତେଲ ଯୋଗାଯିବ ।
ବର୍ଷକ ତଳୁ ଘଣା ପେଡ଼ା ରାଶି ତେଲରେ ବିଭିନ୍ନ ପ୍ରକାର ସୁବାସିତ ଫୁଲ, କର୍ପୁର, ଔଷଧୀୟ ଚେରମୂଳ ଓ ସୁବାସିତ ଦ୍ରବ୍ୟ ପଡ଼ି ଏହାକୁ ମାଟି ତଳେ ପୋତାଯାଇ ପ୍ରସ୍ତୁତ କରାଯାଇଥାଏ । ମଧ୍ୟାହ୍ନ ଧୂପ ଏବଂ ଦକ୍ଷିଣୀ ଘର ଭୋଗ ସମ୍ପର୍ଣ୍ଣ ପରେ ପତି ମହାପାତ୍ର ସେବକ ଏହାକୁ ସଂସ୍କାର କରି ଦଇତାପତିଙ୍କୁ ଯୋଗାଇ ଦେବା ପରେ ଦଇତାପତି ସେବକ ମାନେ ମହାପ୍ରଭୁଙ୍କ ଶ୍ରୀଅଙ୍ଗରେ ଏହାକୁ ମର୍ଦନ କରିବେ ।
ଆଜି ପ୍ରଥମ ପର୍ଯ୍ୟାୟର ପ୍ରାଥମିକ ସମବାୟ ସମିତି ନିର୍ବାଚନ, ୪ ଲକ୍ଷ ୫୩ ହଜାର ଭୋଟର ଦେଉଛନ୍ତି ଭୋଟ୍
ଭୁବନେଶ୍ୱର: ଆଜି ପ୍ରଥମ ପର୍ଯ୍ୟାୟର ପ୍ରାଥମିକ ସମବାୟ ସମିତି ନିର୍ବାଚନ । ୩ ହଜାର ୨୫୨ ପ୍ରାଥମିକ ସମବାୟ ସମିତିରୁ ୨ ହଜାର ୫୨୧ଟି ସମିତିରେ ବିନା ପ୍ରତିଦ୍ୱନ୍ଦ୍ୱିତାରେ ସଦସ୍ୟ, ସଦସ୍ୟା ନିର୍ବାଚିତ ହୋଇଛନ୍ତି । ବାକି ୭୩୧ ପ୍ରାଥମିକ ସମବାୟ ସମିତିରେ ଆଜି ନିର୍ବାଚନ ହେଉଛି । ମୋଟ ୪ ଲକ୍ଷ ୫୩ ହଜାର ୬୧୦ ଭୋଟର ମତଦାନ କରୁଛନ୍ତି । ସକାଳ ୭ଟାରୁ ଆରମ୍ଭ ହୋଇଥିବା ମତଦାନ ଅପରାହ୍ନ ୪ଟା ଯାଏ ଚାଲିବ । ଭୋଟ ଗ୍ରହଣ ପରେ ନିର୍ବାଚନ ଫଳାଫଳ ଘୋଷଣା କରାଯିବ ।
୭୩୧ଟି ସମିତିରୁ ୨୪୪ଟି ସମ୍ବେଦନଶୀଳ ଚିହ୍ନଟ କରାଯାଇଛି । ଏହି ବୁଥଗୁଡ଼ିକରେ ମାଜିଷ୍ଟ୍ରେଟ, ସଶସ୍ତ୍ର ପୋଲିସ ଫୋର୍ସ ମୁତୟନ ସହ ଅନ୍ୟାନ୍ୟ ବ୍ୟାପକ ପ୍ରସ୍ତୁତି କରାଯାଇଛି । ସମ୍ବେଦନଶୀଳ ବୁଥଗୁଡିକରେ ସିସିଟିଭି ଲଗାଯାଇଛି । ନିର୍ବାଚନ ପରିଚାଳନା ପାଇଁ ୧୯ ଜଣ ଉପନିବନ୍ଧକ, ୫୮ ଜଣ ସହକାରୀ ନିବନ୍ଧକ ନିୟୋଜିତ ହୋଇଛନ୍ତି । ୩ ହଜାର ୨୫୨ ପ୍ରାଥମିକ ସମବାୟ ସମିତିରୁ ୨ ହଜାର ୫୨୧ଟି ସମିତିରେ ବିନା ପ୍ରତିଦ୍ୱନ୍ଦ୍ୱିତାରେ ସଦସ୍ୟ, ସଦସ୍ୟା ନିର୍ବାଚିତ ହୋଇଛନ୍ତି । ଆସନ୍ତା ୨୬ ତାରିଖରେ ପ୍ରଥମ ପର୍ଯ୍ୟାୟର ଦ୍ୱିତୀୟ ଦିନର ଭୋଟ ଗ୍ରହଣ ହେବ ।
ଏହି ଚାରୋଟି ରାଶିର ବ୍ୟକ୍ତିଙ୍କ ଜୀବନରେ ଲାଗିରହିବ ଅଶାନ୍ତି
ମେଷ : ଜୀବନସାଥୀଙ୍କ ସହ ମତଭେଦ ଦେଖାଦେଇପାରେ । ସୁସ୍ଥ ପ୍ରେମ ଜୀବନ ଅତିବାହିତ କରିବେ । କୌଣସି ତୃତୀୟ ବ୍ୟକ୍ତିଙ୍କ ପାଇଁ ବିବାହିତ ଦମ୍ପତିଙ୍କ ମଧ୍ୟରେ କଳହ ଦେଖାଦେଇପାରେ ।
ବୃଷ : ଅବିବାହିତଙ୍କ ପାଇଁ ବିବାହ ଯୋଗ ରହିଛି । ଗୃହସ୍ଥ୍ୟ ଜୀବନରେ ସୁଖ-ସମୃଦ୍ଧି ବଜାୟ ରହିବ । ପ୍ରେମ ଜୀବନରେ କୌଣସି ନିଷ୍ପତ୍ତି ନେବା ପାଇଁ ଏହା ଅନୁକୂଳ ସମୟ ।
ମିଥୁନ : ପ୍ରେମ ଜୀବନ ସଫଳ ହେବ । ଦାମ୍ପତ୍ୟ ଜୀବନ ଆନନ୍ଦଉଲ୍ଲାସରେ ଭରିଯିବ । କୌଣସି କାର୍ଯ୍ୟ ଧୈର୍ଯ୍ୟ ସହକାରେ କରନ୍ତୁ ନିଶ୍ଚିତ ସଫଳ ହେବେ ।
କର୍କଟ : ସାମାନ୍ୟ ଭୁଲ୍ ବୁଝାମଣା ହେତୁ ଦାମ୍ପତ୍ୟ ଜାବନରେ କଳହ ଦେଖାଦେଇପାରେ । ଧୈର୍ଯ୍ୟହରା ନ ହୋଇ ଧୈର୍ଯ୍ୟ ସହକାରେ କାର୍ଯ୍ୟ କରନ୍ତୁ । କାର୍ଯ୍ୟକ୍ଷେତ୍ରରେ ଉନ୍ନତି କରିବେ । ବ୍ୟବସାୟିକ ବ୍ୟକ୍ତି ବେପାରରେ ଅଗ୍ରଗତି କରିବେ ।
ସିଂହ : ଜୀବନସାଥୀଙ୍କ ସହ ଲାଗିରହିଥିବା ବିବାଦ ଦୂର ହେବ । ବିବାହିତ ଦମ୍ପତି କୌଣସି ସ୍ଥାନକୁ ଯାତ୍ରା କରିପାରନ୍ତି । ଏଥିସହ ପରସ୍ପର ଏକାନ୍ତରେ ସମୟ ଅତିବାହିତ କରିବେ ।
କନ୍ୟା : ପ୍ରେମ ଜୀବନ ସଫଳ ହେବ । ଦାମ୍ପତ୍ୟ ଜୀବନ ଆନନ୍ଦଉଲ୍ଲାସରେ ଭରିଯିବ । କୌଣସି କାର୍ଯ୍ୟ ଧୈର୍ଯ୍ୟ ସହକାରେ କରନ୍ତୁ ନିଶ୍ଚିତ ସଫଳ ହେବେ ।
ତୁଳା :ଚାକିରି କ୍ଷେତ୍ରରେ ଅସନ୍ତୋଷ ଦେଖାଦେଇପାରେ । ନୂତନ ଗୃହ କ୍ରୟ କରିବାକୁ ଯୋଜନା କରିପାରନ୍ତି । ବାଇଗଣୀ ଏବଂ ସବୁଜ ରଙ୍ଗ ଶୁଭ । ଶ୍ରୀ ବିଷ୍ଣୁ ସହସ୍ରନାମ ପାଠ କରନ୍ତୁ । ଗାଈଙ୍କୁ ଗୁଡ଼ ଭୋଜନ କରାନ୍ତୁ ।
ବିଛା ରାଶି : ବ୍ୟାଙ୍କିଙ୍ଗ୍ ଯିବାକୁ ଚାହୁଁଥିବା ବ୍ୟକ୍ତିଙ୍କ ପାଇଁ ଆଜିର ଦିନଟି ଅତ୍ୟନ୍ତ ଫଳଦାୟକ । ଛାତ୍ରଛାତ୍ରୀମାନଙ୍କ ମଧ୍ୟରେ କ୍ୟାରିୟରକୁ ମନରେ ଉତ୍ସାହ ଭରିରହିବ । ତେଲ ଏବଂ ଗୁଡ଼ ଦାନ କରନ୍ତୁ । ସବୁଜ ଏବଂ ନୀଳ ରଙ୍ଗ ଶୁଭ ।
ଧନୁ ରାଶି : ପରିସ୍ଥିତି ଅନୁକୂଳ ହେତୁ ବ୍ୟବସାୟରେ ସଫଳତା ପ୍ରାପ୍ତି ହେବ । ଅଟକିରହିଥିବା ଧନ ବା ଅର୍ଥ ମିଳିବାର ସମ୍ଭାବନା ରହିଛି । ହଳଦିଆ ଓ ନାରଙ୍ଗୀ ରଙ୍ଗ ଶୁଭ ।
ମକର ରାଶି : ଶିକ୍ଷାରେ ଲାଭ ମିଳିପାରେ । ଚାକିରିରେ ସଫଳତା ମିଳିପାରେ । ପିତାଙ୍କ ଆଶିର୍ବାଦ ଗ୍ରହଣ କରନ୍ତୁ । ଲାଭ ମିଳିବାର ସମ୍ଭାବନା ରହିଛି । ଶ୍ରୀ ଶୁକ୍ତ ପାଠ କରନ୍ତୁ । ଧଳା ଏବଂ ନୀଳ ରଙ୍ଗ ଶୁଭ ।
କୁମ୍ଭ ରାଶି : ଏହି ରାଶିରେ ଶନି ଦେବତାଙ୍କ ଚଳନ ହେତୁ ବ୍ୟବସାୟିକ ଚିନ୍ତାଧାରା ବିସ୍ତାରଲାଭ କରିବ । ଚାକାରିରେ ସଫଳତା ମିଳିବା ସହ ଆର୍ଥିକ ଲାଭ ମିଳିପାରେ । ସବୁଜ ଏବଂ ବାଇଗଣୀ ରଙ୍ଗ ଶୁଭ ।
ମୀନ ରାଶି : ରାଜନୀତିରେ ଲାଭ ମିଳିପାରେ । ଧନ ପ୍ରାପ୍ତି ହୋଇପାରେ । ହଳଦିଆ ଫଳ ଦାନ କରନ୍ତୁ । ଲାଲି ଏବଂ ସବୁଜ ରଙ୍ଗ ଶୁଭ ।
ବ୍ରିଜ ତଳକୁ ଖସିପଡିଲା ବରଯାତ୍ରୀ କାର, ୭ ଆହତ
ଜୟପୁର: ଜୟପୁରରେ ମର୍ମନ୍ତୁଦ ସଡ଼କ ଦୁର୍ଘଟମା । ଉମୁରି ନିକଟରେ ଘଟିଛି ଏହି ସଡକ ଦୁର୍ଘଟଣା । ଜଗଦଲପୁର ଅଭିମୁଖେ ଯାଉଥିବା ବେଳେ ଜୟପୁର ଉମୁରି ବ୍ରିଜ ନିକଟରେ ଘଟିଛି ଘଟଣା । ଭାରସାମ୍ୟ ହରାଇ ବ୍ରିଜ ତଳକୁ ଖସିପଡିଛି କାର ।
ମିଳିଥିବା ସୂଚନା ମୁତାବକ କାରରେ 7 ଜଣ ଯାତ୍ରୀ ଥିବା ବେଳେ ସମସ୍ତେ ଆହତ ହୋଇଛନ୍ତି । ଖବର ପାଇ ସ୍ଥାନୀୟ ଲୋକେ ଏବଂ ପ୍ରଶାସନ ସମସ୍ତଙ୍କୁ ଉଦ୍ଧାର କରି ଜୟପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରିଛନ୍ତି । ସେମାନଙ୍କ ଚିକିତ୍ସା ଜାରି ରହିଛି ।
SCB ରେ ଜଗାକୁ ଦେଖିଲେ ଦିଲ୍ଲୀ AIIMS ଡାକ୍ତର, ଜଗା ଭଲ ଅଛି
କଟକ: ଯୋଡାମୁଣ୍ଡ ଶିଶୁ ଜଗାକୁ ଦେଖିଲେ ଦିଲ୍ଲୀ ଏଏମସ୍ ଡାକ୍ତର ଦୀପକ ଗୁପ୍ତା । ଜଗା ଭଲ ଅଛି, ଖେଳୁଛି ଓ ଚିହ୍ନୁଚି । ତାର ଥ୍ରୀଡି ସିଟି ସ୍କାନ କରାଯାଇଛି । ଜଗାକୁ ଏବେ 7 ବର୍ଷ ହୋଇଛି 10 ବର୍ଷ ହେଲେ ସ୍କଲ୍ ଟ୍ରାନସ ପ୍ଲାଣ୍ଟ କଥା ଚିନ୍ତା କରାଯିବ । ଏଥି ସହିତ ଦୁଇଟି ସ୍ବତନ୍ତ୍ର ହେଲମେଟ ଜଗା ପାଇଁ ପ୍ରସ୍ତୁତ ହେବ । ଜଗା -ବଳିଆ ଅପରେସନ ଘଟଣା ଆମେରିକାର ଜର୍ଣ୍ଣାଲ ‘ନ୍ୟୁରୋ ସର୍ଜରୀ’ରେ ଦୁଇ ଦିନ ତଳେ ସ୍ଥାନ ପାଇଛି ।
ବିଶ୍ବର ସବୁଠାରୁ ଅଧିକ ପ୍ରଚଳିତ ଏହି ଜର୍ଣ୍ଣାଲ ରେ ଭାରତର କୌଣସି ଚିକିତ୍ସା ସମ୍ବନ୍ଧୀୟ ଷ୍ଟୋରୀ ପ୍ରଥମ କରି ସ୍ଥାନ ପାଇଛି । ଏହା ଭାରତୀୟ ଚିକିତ୍ସା ଇତିହାସ ରେ ବିରଳ ଉଦାହରଣ । ଜଗାକୁ ଏବେ ସ୍କୁଲ ପଠାଇବାକୁ ଦିଲ୍ଲୀ ଏଏମସ୍ ଡାକ୍ତର ଦୀପକ ଗୁପ୍ତା ପରାମର୍ଶ ଦେଇଛନ୍ତି । ଏହି ଅପରେସନକୁ ସଫଳ ଭାବେ କରାଯାଇଥିଲା । ଯୋଡ଼ା ମୁଣ୍ଡ ଶିଶୁ ଜଗା-ବଳିଆର ଘଟମାକୁ ଗୁରୁତ୍ୱର ସହ ନେଇଥିଲେ ରାଜ୍ୟ ସରକାର । ଏବଂ ଏଥିରେ ସଫଳ ମଧ୍ୟ ହୋଇଛନ୍ତି ।
ମଉଳୁଛି ବିରୋଧି ମେଣ୍ଟର ଆଶା, ରାଷ୍ଟ୍ରପତି ହେବାକୁ ଫାରୁକ ଅବଦୁଲ୍ଲା ଆଶାୟୀ
ନନ୍ଦିଘୋଷ ବ୍ୟୁରୋ: ରାଷ୍ଟ୍ରପତି ନିର୍ବାଚନ ପ୍ରସଙ୍ଗ । ବିରୋଧୀ ମେଣ୍ଟକୁ ପୁଣି ଧକ୍କା । ମିଳିତ ପ୍ରାର୍ଥୀ ହେବାକୁ ଅଗ୍ରାହ୍ୟ କରିଛନ୍ତି ନ୍ୟାସନାଲ କନଫରେନ୍ସ ନେତା ଫାରୁକ ଅବଦୁଲ୍ଲା । ଏନସିପି ନେତା ଶରଦ ପାଓ୍ବାର ପ୍ରଥମେ ଅଗ୍ରାହ୍ୟ କରିବା ପରେ ଫାରୁକ ବି ସମାନ ନିଷ୍ପତ୍ତି ନେଇଛନ୍ତି । କିଛି ଦିନ ଧରି ଯେଉଁମାନଙ୍କୁ ନେଇ ବିରୋଧୀ ଦଳ ମେଣ୍ଟ ରାଷ୍ଟ୍ରପତି ପ୍ରାର୍ଥୀ କରିବ ବୋଲି ଆଶା କରିଥିଲା ସେହି ନେତାମାନେ ଜଣକ ପରେ ଜଣେ ଏହି ପ୍ରସ୍ତାବକୁ ଅଗ୍ରାହ୍ୟ କରିବାରେ ଲାଗିଛନ୍ତି ।
ସେ କହିଛନ୍ତି ତାଙ୍କ ନାମକୁ ପ୍ରଥମେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରସ୍ତାବ ଦେଇଥିଲେ । ମାତ୍ର ସେ ଏହି ପ୍ରସ୍ତାବକୁ ଅଗ୍ରାହ୍ୟ କରିଛନ୍ତି । ଜାମ୍ମୁ ଓ କାଶ୍ମୀରରେ ବର୍ତ୍ତମାନ ଜଟିଳ ପରିସ୍ଥିତି ଜାରି ରହିଥିବାରୁ ସେ ସେଠାରେ ରହିବେ । ରାଷ୍ଟ୍ରପତି ନିର୍ବାଚନରୁ ସେ ଦୂରେଇ ରହିବେ । ଆସନ୍ତା ୨୧ ତାରିଖରେ ପ୍ରାର୍ଥୀ ଚୟନ ନେଇ ବିରୋଧୀ ଦଳ ବୈଠକ କରିବାକୁ ଯାଉଥିବାବେଳେ ଅବଦୁଲ୍ଲାଙ୍କ ଏହି ନିଷ୍ପତ୍ତି ସମସ୍ତଙ୍କୁ ନିରାଶ କରିଛି ।