ଭୁବନେଶ୍ୱର: ରାଜଧାନୀ ଭୁବନେଶ୍ବରରେ ପୁଣି ଜଣେ ଯୁବତୀଙ୍କ ଆତ୍ମହତ୍ୟା ଅଭିଯୋଗ । ବେକରେ ଗାମୁଛା ବାନ୍ଧି ଯୁବତୀ ଫ୍ୟାନରେ ଝୁଲି ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଯୁବତୀ ଜଣଙ୍କ ଖଣ୍ଡଗିରି ବାରଭୁଜା ଅଞ୍ଚଳରେ ଏକ ଘରୋଇ କମ୍ପାନୀରେ ଚାକିରି କରିଥିଲେ । ମୃତ ଯୁବତୀ ହେଲେ ପୁରୀ ଜିଲ୍ଲା ତିରିପଦା ଗଡ଼ର ଦୀପ୍ତି ପାଣି ।
ମିଳିଥିବା ସୂଚନା ମୁତାବକ ଘଟଣାସ୍ଥଳରୁ ଏକ ସୁଇସାଇଡ ନୋଟ ଜବତ ହୋଇଛି । ମୃତଦେହ ଜବତ କରି ତଦନ୍ତ ଆରମ୍ଭ କରିଛି ଖଣ୍ଡଗିରି ଥାନା ପୋଲିସ । ଘରୋଇ କମ୍ପାନୀରେ କାର୍ଯ୍ୟ କରୁଥିବା ଯୁବତୀ ଜଣଙ୍କ ଆତ୍ମହତ୍ୟା କରିବା ପଛର କାରଣ କଣ ହୋଇପାରେ । ଆତ୍ମହତ୍ୟା ପଛର କାରଣ ଖୋଜୁଛି ପୋଲିସ ।
ପଦ୍ମପୁର: ଆହୁରି ବଢୁଛି ବିଜେଡି ବଳ । ପଦ୍ମପୁର ଉପନିର୍ବାଚନ ଯେତିକି ପାଖେଇ ଆସୁଛି ବିଜେଡି ପ୍ରତି ଅନ୍ୟ ଦଳ ନେତା ଓ କର୍ମୀଙ୍କର ଆସ୍ଥା ସେତିକି ବଢ଼ିବାରେ ଲାଗିଛି । ଆଜି ପାଇକମାଳରେ ଅନୁଷ୍ଠିତ ବିଜେଡି କର୍ମୀ ସମ୍ମିଳନୀରେ ଶତାଧିକ ବିଜେପି ଓ କଂଗ୍ରେସ ନେତା ଓ କର୍ମୀ ବିଜେଡିରେ ଯୋଗଦେଇଛନ୍ତି । ଏମାନଙ୍କ ମଧ୍ୟରେ ବିଭିନ୍ନ ପଞ୍ଚାୟତର ସରପଞ୍ଚ ଓ ସମିତି ସଭ୍ୟ ଅଛନ୍ତି ।
ଏହି କର୍ମୀ ସମ୍ମିଳନୀରେ ମନ୍ତ୍ରୀ ଅତନୁ ସବ୍ୟସାଚୀ ନାୟକ, ନବ କିଶୋର ଦାଶ, ସାଂସଦ ନିରଞ୍ଜନ ବିଶି, ବିଧାୟିକା ସ୍ନେହାଙ୍ଗିନୀ ଛୁରିଆ, ବିଧାୟକ ଦେବୀ ପ୍ରସାଦ ମିଶ୍ର ପ୍ରମୁଖ ଉପସ୍ଥିତ ଥିଲେ । ନବୀନ ପଟ୍ଟନାୟକଙ୍କ ନିର୍ମଳ ଭାବମୂର୍ତ୍ତି, ବିକାଶଧାରା ଓ ଦୁର୍ନୀତିମୁକ୍ତ ଶାସନ ପ୍ରତି ଆକୃଷ୍ଟ ହୋଇ ଅନ୍ୟ ଦଳର ନେତା ଓ କର୍ମୀ ବିଜେଡିରେ ମିଶିଥିବା କହିଛନ୍ତି । ପଦମପୁର ଉପନିର୍ବାଚନ ସମୟରେ ପ୍ରତିଦିନ ଅନ୍ୟ ଦଳର ଶହଶହ କର୍ମୀ ବିଜେଡିରେ ମିଶୁଥିବାରୁ ଦଳର ବିଜୟ ସୁନିଶ୍ଚିତ ବୋଲି କୁହାଯାଉଛି ।
ଭୁବନେଶ୍ୱର: ପ୍ରକାଶ ପାଇଲା ୨୦୨୧ ମସିହାର ଓଜେଏସ ରେଜଲ୍ଟ । ଓଡ଼ିଶା ନ୍ୟାୟିକ ପରୀକ୍ଷାରେ ବାଜି ମାରିଛନ୍ତି ଝିଅ । ଚଳିତବର୍ଷ ଆଦ୍ୟାଶା ମିଶ୍ର ହୋଇଛନ୍ତି ଓଜେଏସ ଟପ୍ପର । ପ୍ରଥମ ତିନୋଟି ସ୍ଥାନରେ ଅଛନ୍ତି ମହିଳା । ଓପିଏସସି ପକ୍ଷରୁ ପ୍ରକାଶ ପାଇଛି ରେଜଲ୍ଟ । ସେହିପରି ପ୍ରକାଶ ପାଇଥିବା ରେଜଲ୍ଟରେ ଦ୍ବିତୀୟ ସ୍ଥାନରେ ଅଛନ୍ତି ଚେତନା ପଟ୍ଟନାୟକ ଏବଂ ତୃତୀୟ ସ୍ଥାନରେ ରହିଛନ୍ତି ଗୀତାଞ୍ଜଳୀ ନାଇଡୁ ।
ନନ୍ଦିଘୋଷ ବ୍ୟୁରୋ: ଏଲନ ମସ୍କଙ୍କ ହାତକୁ କମ୍ପାନୀ ମାଲିକାନା ଯିବା ପରେ ଅନେକ କିଛି ପରିବର୍ତ୍ତନ କରାଯାଇଛି । ଅନେକ କର୍ମଚାରୀଙ୍କୁ କମ୍ପାନୀ ଛଟେଇ କରିଥିବା ବେଳେ ଏବେ ବହୁ ବରିଷ୍ଠ ଅଧିକାରୀ ଇସ୍ତଫା ଦେଉଛନ୍ତି । ବରିଷ୍ଠ ଅଧିକାରୀମାନେ କମ୍ପାନୀ ଛାଡ଼ିବା ଯୋଗୁ ଟୁଇଟର ଦେବାଳିଆ ହୋଇଯିବା ଆଶଙ୍କା ସୃଷ୍ଟି ହୋଇଛି ବୋଲି ମସ୍କ କହିଛନ୍ତି । ଆସନ୍ତାବର୍ଷ କମ୍ପାନୀ ଆରବ ଡଲାରର କ୍ଷତି ସହିପାରେ ବୋଲି ଆଶଙ୍କା ବ୍ୟକ୍ତ କରିଛନ୍ତି ମସ୍କ ।
ନିକଟରେ ଟୁଇଟରର ମୁଖ୍ୟ ସୁରକ୍ଷା ଅଧିକାରୀ ଓ ଅନ୍ୟ ଜଣେ ବରିଷ୍ଠ ଅଧିକାରୀ ପଦରୁ ଇସ୍ତଫା ଦେଇଥିଲେ । ଏହାଦ୍ବାରା କମ୍ପାନୀର ଆର୍ଥିକ ସ୍ଥିତି ଉପରେ ସଙ୍କଟ ରହିଛି ବୋଲି ବିଶେଷଜ୍ଞ ଆକଳନ କରିଛନ୍ତି । ମାଇକ୍ରୋବ୍ଲଗିଂ ସାଇଟ ଟୁଇଟରକୁ ମସ୍କ କିଣିବା ପରେ ଅଧାରୁ ଅଧିକ କର୍ମଚାରୀଙ୍କୁ ଛଟେଇ କରାଯାଇଥିଲା ।
ଫେକ୍ ଟୁଇଟର ଆକାଉଣ୍ଟକୁ ବନ୍ଦ କରିବାକୁ କମ୍ପାନୀ ଘୋଷଣା କରିଥିବା ବେଳେ ବ୍ଲୁ ଟିଗ୍ ଆକାଉଣ୍ଟକୁ ପ୍ରତିମାସରେ ୮ଡଲାର ଦେବାକୁ ହେବ ବୋଲି କମ୍ପାନୀ ଘୋଷଣା କରିଥିଲା । ଏବେ ବିଜ୍ଞାପନ କମ୍ପାନୀମାନେ ମଧ୍ୟ ଟୁଇଟର ଛାଡୁଥିବାରୁ ପ୍ରତିଦିନ ପ୍ରାୟ ୪ ମିଲିୟନ ଡଲାରର କ୍ଷତି ସହୁଛି କମ୍ପାନୀ ।
ମୁମ୍ବାଇ: ପୁଣି ଜଣେ ଅଭିନେତାଙ୍କ ମୃତ୍ୟୁ । ଓ୍ବାର୍କଆଉଟ ବେଳେ ହୃଦଘାତର ଶିକାର ହେଲେ ଅଭିନେତା । ଟେଲିଭିଜନ ଦୁନିଆର ବେଶ ଜଣାଶୁଣା ଅଭିନେତା ସିଦ୍ଧାନ୍ତ ବୀର ସୂର୍ଯ୍ୟବଂଶୀଙ୍କର ମୃତ୍ୟୁ ହୋଇଛି । ଜିମରେ ଓ୍ବାର୍କଆଉଟ କରୁଥିବା ବେଳେ ସିଦ୍ଧାନ୍ତଙ୍କୁ ହାର୍ଟ ଆଟାକ ଆସିଥିଲା । ସିଦ୍ଧାନ୍ତଙ୍କୁ ତାଙ୍କ ଜିମ୍ ଟ୍ରେନର ହସ୍ପିଟାଲକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । କୁସୁମ, ବାରିସ ଆଦି ଶୋରେ ତାଙ୍କୁ ଦେଖିବାକୁ ମିଳିଥିଲା ।
ଆଗରୁ ଅନେକ ନାମୀଦାମୀ କଳାକାରଙ୍କ ମୃତ୍ୟୁ ଘଟିଛି । ପରବର୍ତ୍ତୀ ସମୟରେ ଜଣା ପଡିଛି ମୃତ୍ୟୁର କାରଣ କେବଳ ଜିମ୍ । ଅର୍ଥାତ ଜିମ୍ କରୁଥିବାବେଳେ ଅଧିକାଂଶ କଳାକାରଙ୍କ ମୃତ୍ୟୁ ଘଟୁଥିବା ପରିଲିଖିତ ହୋଇଛି । ସିଦ୍ଧାର୍ଥ ଶୁକ୍ଲାଙ୍କ ଠାରୁ ଆରମ୍ଭ କରିସିଦ୍ଧାନ୍ତ ବୀର ସୂର୍ଯ୍ୟବଂଶୀଙ୍କର ମୃତ୍ୟୁ ହୋଇଛି ।
ଭୁବନେଶ୍ୱର: ରାଜ୍ୟରେ ଯୁବକ ଯୁବତୀଙ୍କ ପାଇଁ ବମ୍ପର ନିଯୁକ୍ତି ସୁଯୋଗ। ସରକାରୀ ମାଧ୍ୟମିକ ସ୍କୁଲରେ ୭ହଜାର ୫୪୦ ଶିକ୍ଷକଙ୍କୁ ନିଯୁକ୍ତିକୁ ଅନୁମୋଦନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏହାଦ୍ବାରା ଯୁବକ ଯୁବତୀଙ୍କ ପାଇଁ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି ହେବ। ଶିକ୍ଷାର ରୂପାନ୍ତରଣ ସହ ଛାତ୍ରଛାତ୍ରୀଙ୍କୁ ଶିକ୍ଷାଦାନକୁ ଅଧିକ କ୍ରିୟାଶୀଳ କରିବ। ସୋସିଆଲ୍ ମିଡିଆରେ ଏନେଇ 5Tସଚିବ ଭିକେ ପାଣ୍ଡିଆନ୍ ସୂଚନା ଦେଇଛନ୍ତି ।
ନୂତନ ଶିକ୍ଷକ ନିଯୁକ୍ତି ନେଇ ଖୁବଶୀଘ୍ର ପ୍ରକ୍ରିୟା ଆରମ୍ଭ ହେବ । ରାଜ୍ୟ ସରକାର ଗତବର୍ଷ ୧୩ହଜାର ଶିକ୍ଷକଙ୍କୁ ନିଯୁକ୍ତି ଦେଇଛନ୍ତି । ଚଳିତବର୍ଷ ମଧ୍ୟ ଶିକ୍ଷା କ୍ଷେତ୍ରରେ ମେଗା ନିଯୁକ୍ତି ପ୍ରଦାନ କରିବେ ରାଜ୍ୟ ସରକାର । ଯୁବକ-ଯୁବତୀଙ୍କୁ ନିଯୁକ୍ତି ପ୍ରଦାନ କରି ଆତ୍ମନିର୍ଭର କରିବା ଦିଗରେ ରାଜ୍ୟ ସରକାରଙ୍କ ଏହା ବଳିଷ୍ଠ ଉଦ୍ୟମ । ଏହି କ୍ରମରେ ଚଳିତ ବର୍ଷ ୭ହଜାର ୫୪୦ ଶିକ୍ଷକଙ୍କୁ ନିଯୁକ୍ତି ପ୍ରଦାନ କରିବେ ।
ରାଜ୍ୟର ବିଭିନ୍ନ ସରକାରୀ ହାଇସ୍କୁଲ ମାନଙ୍କରେ ବିଭିନ୍ନ ବିଷୟରେ ଖାଲି ଥିବା ଶିକ୍ଷକ ପଦବୀ ପୂରଣ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଅନୁଯାୟୀ ଖୁବଶୀଘ୍ର ୭୫୪୦ ହାଇସ୍କୁଲ ନିଯୁକ୍ତ ପ୍ରକ୍ରିୟା ଆରମ୍ଭ କରିବା ପାଇଁ ଓଡିଶା ଷ୍ଟାଫ ସିଲେକ୍ସନ କମିଶନଙ୍କୁ ଅନୁରୋଧ କରାଯାଇଛି। ଏହି ପଦବୀ ଗୁଡିକ ପୂରଣ ହେବା ପରେ ରାଜ୍ୟର ସମସ୍ତ ୪୮୪୮ଟି ସରକାରୀ ହାଇସ୍କୁଲର ସବୁ ଶିକ୍ଷକ ପଦବୀ ପୂରଣ ହୋଇପାରିବ।
ଟିଜିଟି (କଳା), ଟିଜିଟି (ପିସିଏମ ଓ ସିବିଜେଡ୍), ସଂସ୍କୃତ, ହିନ୍ଦି, ଉର୍ଦ୍ଦୁ, ତେଲୁଗୁ ଓ ଶାରୀରିକ ଶିକ୍ଷକ ପଦବୀ ପୂରଣ ନିମନ୍ତେ ଚୟନ ପ୍ରକ୍ରିୟା ଆରମ୍ଭ କରାଯିବ। ପ୍ରକାଶ ଥାଉ କି, ୨୦୨୧-୨୨ ବର୍ଷରେ କରାଯାଇଥିବା ଦୁଇଟି ଚୟନ ପ୍ରକ୍ରିୟାରେ ୧୩ ହଜାରରୁ ଉର୍ଦ୍ଧ୍ବ ଶିକ୍ଷକ ପଦବୀ ପୂରଣ କରାଯାଇ ବିଭିନ୍ନ ସରକାରୀ ବିଦ୍ୟାଳୟ ମାନଙ୍କରେ ନିଯୁକ୍ତ କରାଯାଇଥିଲା।
ସୂଚନାଯୋଗ୍ୟ ଯେ ରାଜ୍ୟ ସରକାରଙ୍କ ୫-ଟି ଉପକ୍ରମରେ ରାଜ୍ୟର ବିଭିନ୍ନ କାର୍ଯ୍ୟକ୍ରମରେ ରୂପାନ୍ତର ଆଣିବା ପ୍ରକ୍ରିୟା ଜାରି ରହିଥିବା ବେଳେ ସ୍କୁଲ ରୂପାନ୍ତର କାର୍ଯ୍ୟକ୍ରମକୁ ଗୁରୁତ୍ବ ଦିଆଯାଇ ପିଲାମାନଙ୍କ ପାଇଁ ଆଧୁନିକ ଶିକ୍ଷା ବ୍ୟବସ୍ଥା କରାଯାଇଛି। କମ୍ପୁଟର, ଇଣ୍ଟରନେଟ ଠାରୁ ଆରମ୍ଭ କରି ଇ-ଲାଇବ୍ରେରୀ, ଉନ୍ନତ ଖେଳ ଉପକରଣ ଓ ପଡିଆ ତଥା ଅନ୍ୟାନ୍ୟ ସୁବିଧାର ବିକାଶ କରାଯାଉଛି। ୫-ଟିରେ ନିଯୁକ୍ତି କାର୍ଯ୍ୟକ୍ରମକୁ ମଧ୍ୟ ତ୍ବରାନ୍ବିତ କରାଯାଉଛି। ବିଭିନ୍ନ ବିଭାଗରେ ଥିବା ଖାଲି ପଦବୀ ଗୁଡିକୁ ସଂପୂର୍ଣ୍ଣ ସ୍ବଚ୍ଛତାର ସହିତ କ୍ଷୀପ୍ର ଗତିରେ ପୂରଣ କରାଯାଉଛି। ଗତ କିଛି ବର୍ଷ ମଧ୍ୟରେ ବିଭିନ୍ନ ବିଭାଗର ହଜାର ହଜାର ପଦବୀ ପୂରଣ କରାଯାଇଥିବା ବେଳେ ଏହି ନିଯୁକ୍ତି ପ୍ରକ୍ରିୟା ଆଗକୁ ମଧ୍ୟ ଜାରି ରହିବ ।
କଟକ: ଅଙ୍ଗନବାଡ଼ି ରୋଷେଇ ଘରେ ଗ୍ୟାସ ସିଲିଣ୍ଡର ବିସ୍ଫୋରଣ । ଅଳ୍ପକେ ବର୍ତ୍ତିଲେ ଛାତ୍ରଛାତ୍ରୀ । କଟକ ଜିଲ୍ଲା ମାହାଙ୍ଗା ବ୍ଲକ ଲଳିତଗିରି ଅଙ୍ଗନବାଡ଼ି କେନ୍ଦ୍ର- ୨ର ରୋଷେଇ ଘରେ ହଠାତ୍ ଗ୍ୟାସ୍ ସିଲିଣ୍ଡର ଫାଟିବାରୁ ନିଆଁ ଲାଗି ଯାଇଥିଲା । ଏଥିରୁ ଅଳ୍ପକେ ବର୍ତ୍ତି ଯାଇଛନ୍ତି ୨୦ ଜଣ ଛାତ୍ରଛାତ୍ରୀ । କେନ୍ଦ୍ରର ସହାୟିକା ବାହାରେ ବସି ସିଝାଅଣ୍ଡା ଛଡ଼ାଉ ଥିବା ବେଳେ, ହଠାତ୍ ଗ୍ୟାସ ସିଲିଣ୍ଡର ବିସ୍ଫୋରଣ ହୋଇ ନିଆଁ ଲାଗି ଯାଇଥିଲା । ଅଗ୍ନିକାଣ୍ଡରେ ରୋଷେଇ ଘରେ ଥିବା ବିଭିନ୍ନ ସାମଗ୍ରୀ ପୋଡ଼ି ଯାଇଛି । ସେହିପରି ଛାତ୍ରଛାତ୍ରୀମାନେ ସୁରକ୍ଷିତ ଥିବା ବେଳେ, ସ୍ଥାନୀୟ ଲୋକ ନିଆଁକୁ ଆୟତ୍ତ କରିଥିଲେ ।
ଭୁବନେଶ୍ୱର: ଓଡ଼ିଶା ଗସ୍ତର ଦିତ୍ୱୀୟ ଦିନରେ ଓଡ଼ିଆ ଭାଷାରେ ଇଂଜିନିୟରିଂ ପୁସ୍ତକ ଉନ୍ମୋଚନ କରିଛନ୍ତି ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଓଡ଼ିଆ ଭାଷାରେ ଲିଖିତ ଇଞ୍ଜିନିୟରିଂ ପାଠ୍ୟପୁସ୍ତକ, ବୈଷୟିକ ଶିକ୍ଷା ସଙ୍କଳନ ଓ ଇ-କୁମ୍ଭ ପୋର୍ଟାଲର ଲୋକାର୍ପଣ କରିଛନ୍ତି ରାଷ୍ଟ୍ରପତି। ମାତୃଭାଷାରେ ଶିକ୍ଷା ଦ୍ୱାରା ଛାତ୍ରୀଛାତ୍ରଙ୍କ ଦକ୍ଷତା ବୃଦ୍ଧି ହେବ ଏବଂ ରାଷ୍ଟ୍ରର ବିକାଶ ନିମନ୍ତେ ସେମାନେ ଉତ୍ସର୍ଗୀକୃତ ଭାବେ ଯୋଗଦାନ କରିବେ ବୋଲି କହିଛନ୍ତି ରାଷ୍ଟ୍ରପତି।
ଅନ୍ୟପଟେ ରାଜ୍ୟରେ ଇଂଜିନିୟରିଂ ପାଠପଢ଼ାର ଓଡିଆ ମାଧ୍ୟମକୁ ଏଆଇସିଟିଇ ଓ ସିଏସଟିଟିର ଅବଦାନକୁ ଭୂୟସୀ ପ୍ରଶଂସା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଚଳିତବର୍ଷଠାରୁ ରାଜ୍ୟରେ ଓଡ଼ିଆରେ ଇଂଜିନିୟରିଂ ପାଠପଢ଼ା ହେବାକୁ ଯାଉଥିବାବେଳେ ଏଆଇସିଟିଇ ଓ ସିଏସଟିଟିର ସହଯୋଗରେ ଓଡ଼ିଆ ଅଧ୍ୟୟନ ଓ ଗବେଷଣା ସଂସ୍ଥା ପ୍ରଥମ ବର୍ଷ ବି-ଟେକ ଓ ଡିପ୍ଲୋମା ଲାଗି ପୁସ୍ତକ ପ୍ରକାଶ କରିଛନ୍ତି।
ଏହା ଓଡ଼ିଆ ଶିକ୍ଷା କ୍ଷେତ୍ରରେ ନୂଆ ମାଇଲଖୁଣ୍ଟ ସ୍ଥାପନ କରିବ । ଅଖିଳ ଭାରତୀୟ ବୈଷୟିକ ଶିକ୍ଷା ପରିଷଦ-ଏଆଇସିଟିଇର ଓଡ଼ିଆରେ ଇଞ୍ଜିନିୟରିଂ ବହିର ଲୋକାର୍ପଣ ଉତ୍ସବରେ ଯୋଗ ଦେଇ ଏହା କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେହିପରି ୩ଟି ଭଲ୍ୟୁମର ପୁସ୍ତକରେ ପ୍ରାୟ ୫୦ ହଜାର ଟର୍ମିନୋଲଜିର ପରିପ୍ରକାଶ କରିଥିବା ‘କମିଶନ ଫର ସାଇଣ୍ଟିଫିକ ଆଣ୍ଡ ଟେକ୍ନିକାଲ ଟର୍ମିନୋଲଜି’ (ସିଏସଟିଟି)କୁ ଧନ୍ୟବାଦ ଦେଇଛନ୍ତି ନବୀନ। ଇ-କୁମ୍ଭ ପୋର୍ଟାଲର ଲୋକାର୍ପଣ ମଧ୍ୟ ସାରାଦେଶର ଇଞ୍ଜିନିୟରିଂ ଛାତ୍ରଛାତ୍ରୀଙ୍କୁ ଦିଗଦର୍ଶନ ଦେବ ବୋଲି ମୁଖ୍ୟମନ୍ତ୍ରୀ ଆଶା କରିଛନ୍ତି ।
ରାଜ୍ୟ ସରକାର ମଧ୍ୟ ଓଡ଼ିଆ ଭାଷା ଓ ସାହିତ୍ୟର ପ୍ରଚାର ଓ ପ୍ରସାର ପାଇଁ ଅନେକ ପଦକ୍ଷେପ ନେଇଛନ୍ତି । ମାତୃଭାଷାରେ ସିଭିଲ ସର୍ଭିସ ପରୀକ୍ଷା କରାଯିବାକୁ ନିଷ୍ପତ୍ତି ହୋଇଛି । ସେହିପରି ସ୍କୁଲ ଓ କଲେଜର ଓଡିଆ ଛାତ୍ରଛାତ୍ରୀଙ୍କୁ ସ୍ବତନ୍ତ୍ର ବୃତ୍ତି ପ୍ରଦାନ ଲାଗି ପଦକ୍ଷେପ ନିଆଯାଇଛି । ଯାହା ଓଡ଼ିଆ ଭାଷା ଓ ସାହିତ୍ୟର ଉନ୍ନତି ଦିଗରେ ବିଶେଷ ସହାୟକ ହେବ ବୋଲି ନବୀନ ଆଶା କରିଛନ୍ତି ।
ଖୋର୍ଦ୍ଧା: ଭାଉଜ ପ୍ରେମରେ ପଡ଼ି ବିଷ ପିଇଲା ଦିଅର। ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର ପରେ ଭୁବନେଶ୍ବରକୁ ସ୍ଥାନାନ୍ତର କରାଯାଇଛି । ସମ୍ପୃକ୍ତ ଭାଉଜଙ୍କୁ ଅଟକ ରଖି ପୋଲିସ ତଦନ୍ତ କରୁଛି । ଏଭଳି ଘଟଣା ଘଟିଛି ଖୋର୍ଦ୍ଧା ଟାଙ୍ଗୀ ଚଣ୍ଡେଶ୍ବର ଗାଁରେ । ଚଣ୍ଡେଶ୍ୱର ଗାଁର ୨୮ ବର୍ଷୀୟ ଚିତ୍ତରଂଜନ ଜେନା ୪ବର୍ଷ ତଳେ ବିବାହ କରିଥିଲେ । ବିବାହର ୨ବର୍ଷ ପରେ ତାଙ୍କର ଏକ ସନ୍ତାନ ଜନ୍ମ ହୋଇଥିଲା । ଚିତ୍ତ ରଂଜନଙ୍କ ବଡ଼ ଭାଇ ସୂଦୁର ଦୁବାଇରେ ରହୁଥିବାରୁ ଭାଉଜ ଓ ଦିଅର ମଧ୍ୟ୍ୟରେ ପ୍ରେମ ସଂପର୍କ ଗଢି଼ ଉଠିଥିଲା ।
ମହିଳାଙ୍କର ୨ଜଣ ବଡ଼ ପୁଅ ଅଛନ୍ତି। ଉଭୟଙ୍କ ସମ୍ପର୍କ ନେଇ ବାହାରେ ପ୍ରଘଟ ହେବାରୁ ମହିଳା ଜଣକ ଦୁଇ ପିଲାଙ୍କ ସହ ଚଣ୍ଡେଶ୍ୱର ଘର ଛାଡି କୁହୁଡି ଚୁଆ ଟାଙ୍ଗୀରେ ଘର ଭଡ଼ା ନେଇ ରହି ଆସୁଥିଲେ । ଫଳରେ ଘରେ କେହି ନଥିବାରୁ ଦିଅର ଚିତ୍ତରଂଜନ ଭାଉଜଙ୍କ ଘରକୁ ଯିବା ଆସିବା ସହଜ ହେଉଥିଲା । ଚିତ୍ତରଂଜନ ନିଜ ଭାଉଜ ପ୍ରେମରେ ପଡ଼ି ପତ୍ନୀଙ୍କୁ ନିର୍ଯ୍ୟାତନା ଦେଇ ଆସୁଥିବା ଅଭିଯୋଗ ହୋଇଛି। କିଛି ଦିନ ତଳେ ଦିଅର ଭାଉଜଙ୍କ ପ୍ରେମାଳାପର ଏକ ଅଡିଓ ରେକଡିଂ ସ୍ତ୍ରୀଙ୍କ ହାତରେ ଲାଗିଥିଲା।
ସ୍ବାମୀଙ୍କୁ ତାଗିଦ୍ କରିବାରୁ ଉଭୟଙ୍କ ମଧ୍ୟରେ ଗଣ୍ଡଗୋଳ ଲାଗିଥିଲା। ଅନ୍ୟ ଉପାୟ ନପାଇ ପୋଲିସକୁ ଜଣାଇଥିଲେ ସ୍ତ୍ରୀ । ପୋଲିସ ଉଭୟଙ୍କୁ ଥାନାକୁ ଡ଼କାଇଥିଲେ । ଥାନାକୁ ଆସିଥିବା ବେଳେ ଦିଅର ଚିତ୍ତରଂଜନ ହଠାତ୍ ଅଚେତ୍ ହୋଇପଡିଥିଲେ। ପୋଲିସ୍ ତୁରନ୍ତ ଉଦ୍ଧାର କରି ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲା। ପରେ ପଚରାଉଚୁରାରୁ ଚିତ୍ତ ବିଷ ଖାଇଥିବା ସ୍ୱୀକାର କରିଥିଲା । ଭାଉଜକୁ ଥାନାରେ ଅଟକ ରଖି ପଚରାଉଚରା କୁରଛି ପୋଲିସ ।
ଭୁବନେଶ୍ୱର: ମହାମହିମ ରାଷ୍ଟ୍ରପତିଙ୍କ ଦୁଇ ଦିନିଆ ଓଡ଼ିଶା ଗସ୍ତର ଆଜି ଶେଷ ଦିନ। ଆଜି ସକାଳୁ ପ୍ରଥମେ ଖଣ୍ଡଗିରି ସ୍ଥିତ ତପୋବନ ହାଇସ୍କୁଲ ପରିଦର୍ଶନ କରିଥିଲେ ମହାମହିମ । ପିଲାଙ୍କ ସହ କଥା ହେବା ସହ ସ୍କୁଲ ଜୀବନର ଅନୁଭୂତି ବାଣ୍ଟିଥିଲେ । ପିଲାଙ୍କୁ ଭଲ ପାଠ ପଢ଼ିବାକୁ ଦେଇଥିଲେ ପରାମର୍ଶ । ପରେ ୟୁନିଟ୍ ୨ରେ ଥିବା ସରକାରୀ ଗାର୍ଲ୍ସ ହାଇସ୍କୁଲ ପରିଦର୍ଶନ କରିଥିଲେ ରାଷ୍ଟ୍ରପତି । ଏହି ହାଇସ୍କୁଲରେ ନିଜେ ପଢିଛନ୍ତି ଦ୍ରୌପଦୀ । ତେଣୁ ସେଠାରେ ଥିବା ସମସ୍ତ ସ୍ମୃତି ଯେମିତି ମାନସ ପଟରେ ଉଙ୍କି ମାରିଥିଲା । ସବୁ ଛାତ୍ରୀଙ୍କୁ ଭେଟିବା ସହ ପୁରୁଣା ସ୍ମୃତି ସାଉଣ୍ଟିଥିଲେ ମହାମହିମ।
ପିଲାବେଳର ସାଙ୍ଗମାନଙ୍କୁ ସାକ୍ଷାତ କରିଥିଲେ । ବିଦ୍ୟାଳୟ ପରିସରରେ ସହପାଠୀଙ୍କ ସହ ଏକ ଭାବବିହ୍ବଳ ପରିବେଶ ସୃଷ୍ଟି ହୋଇଥିଲା । ସେହି ସମୟରେ ସହପାଠୀଙ୍କୁ ରାଜଭବନକୁ ନିମନ୍ତ୍ରଣ କରିଥିଲେ ମହାମହିମ । ହାଇସ୍କୁଲ ପରିସରରେ ଗଛ ଲଗାଇବା ସହ ପିଲାଙ୍କ ସହ କଥା ହେବା ସାଙ୍ଗକୁ ନାଚ ଗୀତରେ ନିଜେ ସାମିଲ ହୋଇଥିଲେ । ଛାତ୍ରଛାତ୍ରୀଙ୍କ ସହ ଫଟୋ ଉଠାଇଥିଲେ ମହାମହିମ ।
କୁନ୍ତଳା କୁମାରୀ ସାବତ ଆଦିବାସୀ ଗାର୍ଲସ ହଷ୍ଟେଲ ପରିଦର୍ଶନ କରିବା ପରେ ରାଜଭବନ ଫେରିଯାଇଥିଲେ ରାଷ୍ଟ୍ରପତି । ପୁରୁଣ ସ୍ମୃତିକୁ ଫଟୋ ଫ୍ରେମରେ ସଜ୍ଜିତ କରାଯାଇ ରାଷ୍ଟ୍ରପତିକୁ ପ୍ରଦାନ କରାଯାଇଥିଲା । ୧୧ଟା ୪୦ରେ ଜୟଦେବ ଭବନରେ ଆୟୋଜିତ କାର୍ଯ୍ୟକ୍ରମରେ ଯୋଗଦେବେ ରାଷ୍ଟ୍ରପତି । ସମସ୍ତ କାର୍ଯ୍ୟକ୍ରମ ସାରି ଅପରାହ୍ଣ ୧ଟା ୧୫ରେ ଦିଲ୍ଲୀ ରାଇସିନା ହିଲ୍ସ ଫେରିଯିବେ ରାଷ୍ଟପତି ଦୌପଦି ମୁର୍ମୁ ।
