ମୁମ୍ବାଇ: ଶିବସେନା ନିର୍ବାଚନୀ ଚିହ୍ନ ବିବାଦ ମାମଲାର ଆସିଲା ସୁପ୍ରିମ ରାୟ । ଉଦ୍ଧବ ଗୋଷ୍ଠୀକୁ ଝଟକା, ସିନ୍ଧେ ଗୋଷ୍ଠୀ ଆଶ୍ବସ୍ଥ । କିଏ ପ୍ରକୃତ ଶିବସେନା, ସେ ନିଷ୍ପତ୍ତି ନେବେ ନିର୍ବାଚନ କମିଶନ । ଦଳୀୟ ନାମ ଓ ଚିହ୍ନକୁ ନେଇ ନିର୍ବାଚନ କମିଶନ ରାୟ ଶୁଣାଇପାରିବେ । ଇସିଙ୍କ ନିଷ୍ପତ୍ତି ଉପରେ କୌଣସି ରୋକ ନାହିଁ ବୋଲି ସର୍ବୋଚ୍ଚ କୋର୍ଟ ସ୍ପଷ୍ଟ କରିଛନ୍ତି । ନିର୍ବାଚନ ଆୟୋଗଙ୍କ ନିଷ୍ପତ୍ତିରେ ରୋକ ଲଗାଇବାକୁ ଉଦ୍ଧବ ଗୋଷ୍ଠୀଙ୍କ ପକ୍ଷରୁ ପିଟିସନ ଦାଏର ହୋଇଥିଲା । ଏହି ପିଟିସନକୁ ଖଣ୍ଡପୀଠ ଖାରଜ କରିଦେଇଛନ୍ତି । ଜଷ୍ଟିସ ଡିଓ୍ବାଇ ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ପିଟିସନର ଶୁଣାଣି କରି ଏହି ରାୟ ଶୁଣାଇଛନ୍ତି ।
ଓଡ଼ିଶା ହାଇକୋର୍ଟରେ ରେକର୍ଡ, ଦିନକରେ ୩୨ ମାମଲାର ଶୁଣାଣି
କଟକ: ଓଡ଼ିଶା ହାଇକୋର୍ଟରେ ରେକର୍ଡ । ଦିନକରେ ୩୨ ମାମଲାର ହେଲା ଶୁଣାଣି । ଗତକାଲି ଜଣିକିଆ ଖଣ୍ଡପୀଠରେ ୩୨ଟି ମାମଲାର ରାୟ ଶୁଣାଇଛନ୍ତି ଜଷ୍ଟିସ ଦେବବ୍ରତ ଦାଶ । ୟା ଭିତରେ ଅଧିକାଂଶ ମାମଲା ଥିଲା ତଳ କୋର୍ଟରେ ହୋଇଥିବା ନିଷ୍ପତ୍ତିକୁ ଚ୍ୟାଲେଞ୍ଜ । କିଛି ୧୯୮୮ ଓ ୧୯୯୦ ମସିହାର ମାମଲାର ମଧ୍ୟ ଶୁଣାଣି କରାଯାଇଛି । ବିଚାରପତିଙ୍କ ଏଭଳି ଶୁଣାଣିକୁ ପ୍ରଶଂସା କରିଛନ୍ତି ଓକିଲ । ଓଡ଼ିଶା ହାଇକୋର୍ଟରେ ସେପ୍ଟେମ୍ବର ୨୩ ସୁଦ୍ଧା ୧ଲକ୍ଷ ୭୨ହଜାର ମାମଲା ବିଚାରାଧୀନ ରହିଛି। ସେଥିମଧ୍ୟରୁ ୬୭ ହଜାରରୁ ଅଧିକ ମାମଲା ସିଭିଲ୍ ଲିଟ୍ ଆବେଦନ ସମ୍ବନ୍ଧୀୟ । ପ୍ରାୟ ୨୦ ହଜାର ଅପରାଧିକ ମାମଲା ବିଚାରାଧୀନ ରହିଛି ।
ଇଡବ୍ଲ୍ୟୁଏସ୍ କୋଟା ମାମଲାରେ ରାଏ ସଂରକ୍ଷିତ ରଖିଲେ ସୁପ୍ରିମକୋର୍ଟ
ନୂଆଦିଲ୍ଲୀ: ଉଚ୍ଚ ଶିକ୍ଷାରେ ଆର୍ଥିକ ଭାବେ ପଛୁଆ ବର୍ଗ ଇଡଲ୍ବୁଏସ୍ ସଂରକ୍ଷଣର ସାମ୍ବିଧାନିକ ବୈଧତା ଏବଂ ଆର୍ଥିକ ସ୍ଥିତି ଆଧାରରେ ରୋଜଗାର ପ୍ରସଙ୍ଗ ସହ ସମ୍ବନ୍ଧିତ ମାମଲାରେ ସୁପ୍ରିମକୋର୍ଟ ରାୟ ସଂରକ୍ଷିତ ରଖିଛନ୍ତି । ସୁପ୍ରିମକୋର୍ଟଙ୍କ ସାମ୍ବିଧାନିକ ପୀଠ ଇଡବ୍ଲୁଏସ୍ କୋଟାରେ ୧୦ ପ୍ରତିଶତ ସଂରକ୍ଷଣର ସାମ୍ବିଧାନିକତା ଉପରେ ଶୁଣାଣି କରୁଥିଲେ । ଉଭୟ ପକ୍ଷର ଦଲିଲ ଶୁଣିବା ପରେ ରାଏକୁ ସଂରକ୍ଷିତ ରଖିଛନ୍ତି ।
ଜାନୁଆରୀ ୨୦୧୯ରେ ୧୦୩ତମ ସମ୍ବିଧାନ ସଂଶୋଧନ ଆଇନ ଅନୁଯାୟୀ ଇଡବ୍ଲ୍ୟୁଏସ କୋଟା ଲାଗୁ କରାଯାଇଥିଲା । ଆଇନ ଲାଗୁ ହେବାର କିଛି ଦିନ ପରେ ଏହାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଥିଲା । ପାଞ୍ଚ ଜଜ ବିଶିଷ୍ଠ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ । ଆବେଦନରେ କୁହାଯାଇଥିଲା ଯେ ଏସସି, ଏସଟି ଏବଂ ଓବିସିରେ ମଧ୍ୟ ଗରିବ ଲୋକ ଅଛନ୍ତି ତେବେ ଏହି ସଂରକ୍ଷଣ କେବଳ ସାଧାରଣ ବର୍ଗ ଲୋକଙ୍କୁ କଣ ପାଇଁ ଦିଆଯାଉଛି । ଏହାଦ୍ୱାରା ୫୦ ପ୍ରତିଶତ ସଂରକ୍ଷଣ ନିୟମର ଉଲ୍ଲଂଘନ ହେଉଛି ।
ପ୍ରଥମରୁ ହିଁ ଓବିସିଙ୍କୁ ୨୭ ପ୍ରତିଶତ, ଏସସିଙ୍କୁ ୧୫ ଏବଂ ଏସଟିଙ୍କ ପାଇଁ ୭.୫ ପ୍ରତିଶତ କୋଟା ନିର୍ଦ୍ଧାରିତ କରାଯାଇଛି । ଏହିଭଳି ୧୦ ପ୍ରତିଶତର ଇଡବ୍ଲ୍ୟୁଏସ କୋଟା ୫୦ ପ୍ରତିଶତ ନିୟମକୁ ଭଙ୍ଗ କରୁଛି । ଗତ ଶୁଣାଣି ସମୟରେ ସରକାର ସୁପ୍ରିମକୋର୍ଟରେ କହିଥିଲେ ଯେ, ଇଡବ୍ଲ୍ୟୁଏସ୍ କୋଟା ଉପରେ ସାଧାରଣ ବର୍ଗର ହିଁ ଅଧିକାର ରହିଛି, କାରଣ ଏସସି-ଏସଟି ଲୋକଙ୍କୁ ପ୍ରଥମରୁ ହିଁ ସଂରକ୍ଷଣର ଅନେକ ଲାଭ ମିଳୁଛି ।
ପ୍ରଧାନ ବିଚାରପତି ୟୁୟୁ ଲଳିତ, ଜଷ୍ଟିସ ଦିନେଶ ମାହେଶ୍ୱରୀ, ଜଷ୍ଟିସ ଏସ ରବୀନ୍ଦ୍ର ଭଟ, ଜଷ୍ଟିସ ବେଲା ଏମ ତ୍ରିବେଦୀ ଏବଂ ଜଷ୍ଟିସ ଜେବି ପାରଦୀୱାଲାଙ୍କ ଖଣ୍ଡପୀଠ ସମ୍ମୁଖରେ ଆଟର୍ଣ୍ଣି ଜେନେରାଲ କେକେ ବେଣୁଗୋପାଳ କହିଥିଲେ ଯେ, ପଛୁଆ ଜାତି, ଅନୁସୂଚିତ ଜାତି ଏବଂ ଅନୁସୂଚିତ ଜନଜାତିର ଲୋକମାନେ ପୂର୍ବରୁ ହିଁ ସଂରକ୍ଷଣର ଲାଭ ନେଉଛନ୍ତି । ସାଧାରଣ ବର୍ଗର ଗରିବ ଲୋକଙ୍କୁ ଏହି ଆଇନ ଆଧାରରେ ଲାଭ ମିଳିବ ଯାହାକି କ୍ରାନ୍ତିକାରୀ ପ୍ରମାଣିତ ହେବ ।
ଆଗକୁ ବେଣୁଗୋପାଳ କହିଥିଲେ ଏହି ଆଇନ ଅନୁଚ୍ଛେଦ ୧୫(୬) ଏବଂ ୧୬(୬) ଅନୁଯାୟୀ ହିଁ ଦିଆଯାଉଛି । ଏହା ପଛୁଆ ଏବଂ ବଞ୍ଚିତଙ୍କୁ ଆଡମିଶନ ଏବଂ ଚାକିରିରେ ସଂରକ୍ଷଣ ଦେଇଥାଏ ଏବଂ ୫୦ ପ୍ରତିଶତ ସୀମାକୁ ଉଲ୍ଲଂଘନ କରୁନାଇଁ । ସମ୍ବିଧାନରେ ଏସସି ଏବଂ ଏସଟିଙ୍କ ପାଇଁ ସଂରକ୍ଷଣ ଅଲଗା କରାଯାଇଛି । ଏହାରି ମୁତାବିକ ସଂସଦରେ, ପଞ୍ଚାୟତରେ ଏବଂ ସ୍ଥାନୀୟ ବିଭାଗରେ ଏବଂ ପ୍ରମୋସନରେ ମଧ୍ୟ ସେମାନଙ୍କୁ ସଂରକ୍ଷଣ ମିଳିଥାଏ । ଯଦି ସେମାନଙ୍କ ପଛୁଆ ସ୍ଥିତିକୁ ଧ୍ୟାନରେ ରଖି ସବୁ ପ୍ରକାରର ଲାଭ ସେମାନଙ୍କୁ ଦିଆଯାଉଛି ତେବେ ଇଡବ୍ଲ୍ୟୁଏସ କୋଟା ପାଇବା ପାଇଁ ସେମାନେ ଏହି ସମସ୍ତ ଫାଇଦା ଛାଡିବା ପାଇଁ ପ୍ରସ୍ତୁତ ହେବା ଆବଶ୍ୟକ ।
ମିଶନ ଶକ୍ତି ମାଧ୍ୟମରେ ମହିଳାଙ୍କ ନେତୃତ୍ୱ ବିକାଶ ହୋଇପାରିଛି: ସୁଜାତା ଆର୍. କାର୍ତ୍ତିକେୟନ
ଭୁବନେଶ୍ୱର: ମିଶନ ଶକ୍ତି ମହିଳାମାନଙ୍କୁ ଏକ ସ୍ୱତନ୍ତ୍ର ପରିଚୟ ଦେଇଛି । ମିଶନ ଶକ୍ତି ଅଧୀନରେ କାର୍ଯ୍ୟ କରୁଥିବା ସ୍ୱୟଂ ସହାୟକ ଗୋଷ୍ଠୀର ମହିଳାମାନେ ସରକାର ଏବଂ ସମାଜ ମଧ୍ୟରେ ସେତୁ ସଦୃଶ କାର୍ଯ୍ୟ କରୁଛନ୍ତି ବୋଲି ମିଶନ ଶକ୍ତି ବିଭାଗର ସଚିବ ସୁଜାତା ଆର୍. କାର୍ତ୍ତିକେୟନ ପ୍ରକାଶ କରିଛନ୍ତି। ଆଜି ୱାର୍ଲଡ ସ୍କିଲ ସେଣ୍ଟରରେ ଆୟୋଜିତ ମହତ୍ମା ଗାନ୍ଧୀ ଜାତୀୟ ଫେଲୋଙ୍କ ଦକ୍ଷତା ବିକାଶ କର୍ମଶାଳାର ଉଦଯାପନୀ ଦିବସରେ ଯୋଗଦେଇ ଶ୍ରୀମତୀ କାର୍ତ୍ତିକେୟନ ରାଜ୍ୟରେ ମିଶନ ଶକ୍ତିର ସଫଳତା ଏବଂ ଆହ୍ୱାନ ସଂପର୍କରେ ଅଧିକାରୀମାନଙ୍କୁ ବିସ୍ତୃତ ସୂଚନା ପ୍ରଦାନ କରିଛନ୍ତି ।
ଶ୍ରୀମତୀ କାର୍ତ୍ତିକେୟନ କହିଛନ୍ତି ଯେ ଓଡିଶା ସରକାରଙ୍କ ପ୍ରମୁଖ ବିକାଶମୂଳକ ପଦକ୍ଷେପ ମଧ୍ୟରୁ ମହିଳା ସଶକ୍ତିକରଣ ଅନ୍ୟତମ । ମହିଳାମାନଙ୍କର ଆର୍ଥିକ ସଶକ୍ତିକରଣ ସେମାନଙ୍କର ସାମାଜିକ ସଶକ୍ତିକରଣରେ ଯଥେଷ୍ଟ ସହାୟକ ହୋଇଥାଏ । ବିଶେଷ କରି ତୃଣମୂଳସ୍ତରର ମହିଳାମାନେ ନିଷ୍ପତ୍ତି ଗ୍ରହଣରେ ଭାଗନେବା ଆବଶ୍ୟକ । ମିଶନ ଶକ୍ତି ମାଧ୍ୟମରେ ମହିଳାଙ୍କ ନେତୃତ୍ୱ ବିକାଶ ହୋଇପାରିଛି । କୋଭିଡ୍ ସମୟରେ ରାଜ୍ୟର ସ୍ୱୟଂ ସହାୟିକା ଗୋଷ୍ଠୀର ମହିଳାମାନେ ସୂଚାରୁ ରୂପେ ଦାୟିତ୍ୱ ନିର୍ବାହ କରି ଏହାକୁ ପ୍ରମାଣିତ କରିଛନ୍ତି ।
ରାଜ୍ୟ ସରକାର ପାଞ୍ଚ ବର୍ଷ ନିମନ୍ତେ ସ୍ୱୟଂ ସହାୟକ ଗୋଷ୍ଠୀଙ୍କୁ ବ୍ୟବସାୟ ପାଇଁ ୫ ହଜାର କୋଟି ଟଙ୍କାର ପାଣ୍ଠି ଯୋଗାଇଦେବାର ବ୍ୟବସ୍ଥା କରିଛନ୍ତି । ସେହିପରି ଆଗାମୀ ଦିନରେ ପ୍ରତ୍ୟେକ ବ୍ଲକ ଓ ଜିଲ୍ଲା ସ୍ତରରେ ୫୦୦ ମିଶନ ଶକ୍ତି ବଜାର/ ଆଉଟଲେଟ ଆରମ୍ଭ କରାଯିବା ନିମନ୍ତେ ଯୋଜନା କରାଯାଇଛି । ଏହାବ୍ୟତୀତ ପ୍ରତ୍ୟେକ ବ୍ଲକରେ ମିଶନ ଶକ୍ତି କାଫେ ସ୍ଥାପନ କରିବାର ଲକ୍ଷ୍ୟ ରଖାଯାଇଛି । ଏହି କାଫେରେ କାର୍ଯ୍ୟରତ ମହିଳାମାନେ ଇଣ୍ଡିଆନ ଇନଷ୍ଟିଚ୍ୟୁଟ ଅଫ୍ ହୋଟେଲ ମେନେଜମେଣ୍ଟରେ ତାଲିମ ପାଇଛନ୍ତି ।
ନୂତନ ଓଡିଶା ଗଠନରେ ସ୍ୱୟଂ ସହାୟକ ଗୋଷ୍ଠୀ ସହଯୋଗୀ ଭାବେ ରାଜ୍ୟର ବିକାଶରେ ନେତୃତ୍ୱ ନେବ ବୋଲି ଶ୍ରୀମତୀ କାର୍ତ୍ତିକେୟନ ପ୍ରକାଶ କରିଛନ୍ତି । ଏହି କର୍ମଶାଳାରେ କୃଷି ଏବଂ କୃଷକ ସଶକ୍ତିକରଣ ବିଭାଗର ପ୍ରମୁଖ ଶାସନ ସଚିବ ଡଃ ଅରବିନ୍ଦ ପାଢୀ ଖାଦ୍ୟର ବିବିଧତା ଏବଂ ଖାଦ୍ୟ ଅପଚୟ ହ୍ରାସ ଉପରେ ଗ୍ରାହକଙ୍କ ମଧ୍ୟରେ ସଚେତନତା ସୃଷ୍ଟି କରିବାକୁ ଆହ୍ୱାନ କରିଛନ୍ତି । ସେ କହିଛନ୍ତି ଯେ ସ୍ୱାସ୍ଥ୍ୟକର, ନିରାପଦ ଏବଂ ପୁଷ୍ଟିକର ଖାଦ୍ୟ ପ୍ରତି ଗ୍ରାହକଙ୍କ ଆଗ୍ରହ ବଢାଇବା ନିମନ୍ତେ ସଚେତନତା ଅଭିଯାନର ଆବଶ୍ୟକତା ରହିଛି ।
ମହିଳାମାନଙ୍କ ପାଇଁ କୃଷିଭିତ୍ତିକ ପ୍ରଯୁକ୍ତିବିଦ୍ୟା ବିକାଶ କରିବା ଜରୁରୀ ଅଟେ । ଚାଷ ଜମି ଉପରେ ମହିଳାଙ୍କ ଅଧିକାର ରହିବା ସହ ନିଷ୍ପତ୍ତି ନେବାର କ୍ଷମତା ମଧ୍ୟ ସେମାନଙ୍କର ହାତରେ ରହିବା ଦରକାର । ଏହା ଦ୍ୱାରା କୃଷି କ୍ଷେତ୍ରରେ ମଧ୍ୟ ମହିଳା ସଶକ୍ତିକରଣ ହୋଇପାରିବ । ଅକ୍ଷୟ ଶକ୍ତିର ବ୍ୟବହାର, ଡିଜିଟାଲ ମାଧ୍ୟମରେ କୃଷି ସୂଚନା ଏବଂ ସେବାର ସମୟାନୁବର୍ତ୍ତୀ ବିତରଣ ଉପରେ ସେ ଗୁରୁତ୍ୱାରୋପ କରିଛନ୍ତି ।
ଏହି ଅବସରରେ ସିଟିଟିସି, ସିପେଟ୍, ଓର୍ମାସ୍, ଅରେଞ୍ଜ କ୍ରସ୍ ଏବଂ ଟାଟା ଷ୍ଟ୍ରାଇଭ ସଂସ୍ଥାର ପ୍ରତିନିଧିମାନେ ପ୍ରଦାନ କରୁଥିବା ଦକ୍ଷତା ବିକାଶ ତାଲିମ ସଂପର୍କରେ ସୂଚନା ପ୍ରଦାନ କରିଥିଲେ । ଶେଷରେ ଏହି ୨୯ ଜଣ ଅଧିକାରୀ ୪ ଗୋଟି ଦଳରେ ବିଭକ୍ତ ହୋଇ ଆଗାମୀ ବର୍ଷ ନିମନ୍ତେ ଏକ ଯୋଜନା ପ୍ରସ୍ତୁତ କରି ଉପସ୍ଥାପନ କରିଥିଲେ । ଓଡିଶା ଦକ୍ଷତା ବିକାଶ ପ୍ରାଧିକରଣର ସିଇଓ ରେଘୁ ଜି ଧନ୍ୟବାଦ ଅର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗର ବରିଷ୍ଠ ଅଧିକାରୀ, ନିୟୋଜନ ନିର୍ଦ୍ଦେଶାଳୟର ଅଧିକାରୀ ଏବଂ ବିଭିନ୍ନ ଜିଲ୍ଲା ନିୟୋଜନ ଅଧିକାରୀମାନେ ଉପସ୍ଥିତ ଥିଲେ ।
୨୦୨୩ ହକି ବିଶ୍ୱକପ ପାଇଁ ପ୍ରକାଶ ପାଇଲା ଖେଳସୂଚୀ
ଭୁବନେଶ୍ୱର: ୨୦୨୩ ବିଶ୍ୱକପ ହକି ପାଇଁ ଖେଳସୂଚୀ ପ୍ରକାଶ । ଉଦଘାଟନୀ ମ୍ୟାଚରେ ମୁହାଁମୁହିଁ ହେବେ ସାଉଥ ଆଫ୍ରିକା- ଆର୍ଜେଣ୍ଟିନା । ଜାନୁଆରୀ ୧୩ରେ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଖେଳାଯିବ ମ୍ୟାଚ । ଦ୍ୱିତୀୟ ମ୍ୟାଚ ଅଷ୍ଟ୍ରେଲିଆ-ଫ୍ରାନ୍ସ ମଧ୍ୟରେ ଅନୁଷ୍ଠିତ ହେବ । ବିଶ୍ୱକପରେ ମୋଟ ୪୪ଟି ମ୍ୟାଚ୍ ଖେଳାଯିବ ।
ପ୍ରଥମ ଥର ପାଇଁ ରାଉରକେଲା ବିର୍ସା ମୁଣ୍ଡା ଷ୍ଟାଡିୟମରେ ହେବ ମ୍ୟାଚ । ବିର୍ସା ମୁଣ୍ଡା ଷ୍ଟାଡିୟମରେ ସାମ୍ନାସାମ୍ନି ହେବେ ଭାରତ-ସ୍ପେନ । ସେହିପରି ଜାନୁଆରୀ ୧୫ ଏବଂ ୧୯ ତାରିଖରେ ଭାରତ ଇଂଲଣ୍ଡ ଏବଂ ୱେଲ୍ସକୁ ଭେଟିବ । ଜାନୁଆରୀ ୨୯ରେ ସନ୍ଧ୍ୟା ୭ରେ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଖେଳାଯିବ ଫାଇନାଲ ମ୍ୟାଚ । ପ୍ରଥମଥର ପାଇଁ ହକି ବିଶ୍ୱ କପରେ ସାମିଲ ହେବେ ଚିଲି ଓ ୱେଲ୍ସ ।
ଟିମଗୁଡିକୁ ଚାରୋଟି ପୁଲରେ ବିଭାଜିତ କରାଯାଇଛି । ପୁଲ-ଏ ରେ ଅଷ୍ଟ୍ରେଲିଆ, ଆର୍ଜେଣ୍ଟିନା, ଫ୍ରାନ୍ସ, ଦକ୍ଷିଣଆଫ୍ରିକା । ପୁଲ-ବି ରେ ବେଲଜିଅମ, ଜର୍ମାନୀ, କୋରିଆ, ଜାପାନ । ପୁଲ-ସି ରେ ନେଦରଲ୍ୟାଣ୍ଡସ, ନିଉଜିଲ୍ୟାଣ୍ଡ, ମାଲାସିଆ, ଚିଲ୍ । ପୁଲ-ଡି ରେ ଭାରତ, ଇଂଲଣ୍ଡ, ସ୍ପେନ, ୱେଲ୍ସ ରହିଛନ୍ତି ।
ପ୍ରତି ପୁଲର ଶୀର୍ଷ ଟିମ୍ ସିଧାସଳଖ କ୍ୱାଟର ଫାଇନାଲ ପାଇଁ କ୍ୱାଲିଫାଏ କରିବେ । ସେହିପରି ପୁଲର ଦ୍ୱିତୀୟ ଏବଂ ତୃତୀୟ ସ୍ଥାନରେ ଥିବା ଟିମ୍ କ୍ରସଓଭର ମ୍ୟାଚ୍ ଖେଳି ଶେଷ ୮ରେ ପହଞ୍ଚିବା ପାଇଁ ଯାଗା ବନାଇବେ ।
ଭିଜାଲାନ୍ସ ଜାଲରେ ବୈପାରିଗୁଡ଼ା ତହସିଲ କାର୍ଯ୍ଯାଳୟର ବରିଷ୍ଠ କିରାଣି
କୋରାପୁଟ: ଭିଜିଲାନ୍ସ ଜାଲରେ କୋରାପୁଟ ବୈପାରିଗୁଡ଼ା ତହସିଲ କାର୍ଯ୍ଯାଳୟର ବରିଷ୍ଠ କିରାଣି । ୫ ହଜାର ଟଙ୍କା ଲାଞ୍ଚ ନେଉଥିବା ସତ୍ୟନାରାୟଣ ଦେଳେଇଙ୍କୁ ଧରିଲା ଭିଜିଲାନ୍ସ । ଜମିବାଡ଼ି କିସମ ପରିବର୍ତ୍ତନ ପାଇଁ ଇପ୍ସିତା ଧଳଙ୍କଠାରୁ ନେଉଥିଲେ ଲାଞ୍ଚ । କିରାଣିଙ୍କ କାର୍ଯ୍ୟାଳୟ ସମେତ ବିଭିନ୍ନ ସ୍ଥାନରେ ରେଡ କରୁଛି ଭିଜାଲାନ୍ସ ଟିମ । ସୂଚନାଥାଉକି ଗତ କିଛିଦିନ ହେବ ଭିଜିଲାନ୍ସ ଆକ୍ସନ ମୋଡରେ ରହିଛି । ଦୁର୍ନୀତିଖୋର ଅଫିସରଙ୍କ ଉପରେ ନଜର ରଖାଯାଇଛି । ପ୍ରମାଣ ମିଳିବା କ୍ଷଣି ରେଡ୍ ହ୍ୟାଣ୍ଡ ଧରୁଛି ଭିଜିଲାନ୍ସ ଟିମ୍ ।
ନିଜ ନେତାଙ୍କ ଗିରଫଦାରୀର ପ୍ରତିଶୋଧ ନେବାକୁ PFIର ମିଶନ୍ ‘ବୟାଥିସ୍’
ନୂଆଦିଲ୍ଲୀ: ବାରମ୍ବାର ଚଢାଉ ଓ ଛାମୁଁଆ ନେତାଙ୍କ ଗିରଫଦାରୀ ପରେ ବ୍ୟାକଫୁଟରେ ଅଛି ପିଏଫଆଇ । ବ୍ୟାକଫୁଟରେ ଥିବା ସଂଗଠନ ନିଜ କର୍ମୀଙ୍କ ମନୋବଳ ବଢାଇବା ପାଇଁ ଆକ୍ରମଣର ଯୋଜନା କରୁଛି । ପିଏଫଆଇ ପ୍ଲାନ୍ ବୟାଥିସ୍ ଉପରେ କାମ କରୁଛି । ମିଶନ ବୟାଥିସ୍ କ୍ରମରେ ପପୁଲାର ଫ୍ରଣ୍ଟ୍ ଆତ୍ମଘାତୀ ଆକ୍ରମଣ କରି ସରକାରଙ୍କୁ ଚେତାବନୀ ଦେବାକୁ ଯୋଜନା କରୁଥିବା ଗୁଇନ୍ଦା ସୂଚନା ମିଳିଛି । ତେବେ ଏହି ମିଶନ ବୟାଥିସ୍ କ’ଣ ? ବୟାଥିସର ଅର୍ଥ କ’ଣ । ବୟାଥିସ୍ କ’ଣ ଓ ବୟାଥିସର ଅର୍ଥ କ’ଣ ତାହା ଜାଣିବା ଆଗରୁ ଜାଣିନିଅନ୍ତୁ ମହାରାଷ୍ଟରରୁ ମିଳିଥିବା ଗୋଟିଏ ଦସ୍ତାବିଜ୍ ବାବଦରେ ଯାହା ସୁରକ୍ଷା ଏଜେନ୍ସିଙ୍କ ଚିନ୍ତା ବଢାଇ ଦେଇଛି ।
ପ୍ଲାନ୍-୨୦୪୭
ମହାରାଷ୍ଟ ଏଟିଏସ୍ କୁ ମୁମ୍ବାଇର ଜଣେ ପିଏଫଆଇ କ୍ୟାଡରଠାରୁ ପ୍ଲାନ୍ ୨୦୪୭ ନାମକୁ ପୁସ୍ତିକା ମିଳିଥିଲା । ଏଥିରେ ପିଏଫଆଇ ଆଗାମୀ ବର୍ଷ ଗୁଡିକରେ କ’ଣ କରିବାକୁ ଚାହେଁ ତା’ ବାବଦରେ ବିସ୍ତୃତ ସୂଚନା ରହିଥିଲା । ଏହି ପୁସ୍ତିକା ଅନୁସାରେ ଭାରତକୁ ୨୦୪୭ ବେଳକୁ ମୁସଲିମ୍ ରାଷ୍ଟ୍ରରେ ପରିଣତ କରିବା ପିଏଫଆଇର ଲକ୍ଷ୍ୟ । ଏଥିପାଇଁ ଏହା ଏବେ ନିଜର ଏକ ନରମ ଇମେଜ୍ ତିଆରି କରିବାକୁ ତା’ର କର୍ମୀଙ୍କୁ ପରାମର୍ଶ ଦିଏ । ଦଳିତ ହିନ୍ଦୁଙ୍କୁ ନିଜ ପଟକୁ ନେଇ ଭାରତରେ ଅସ୍ତିରତା ସୃଷ୍ଟି ହେଉଛି ପିଏଫଆଇର ଲକ୍ଷ୍ଯ । ପିଏଫଆଇ ମୁସଲିମ ଯୁବକଙ୍କୁ ଇସଲାମିକ୍ ଷ୍ଟେଟ୍ ଭଳି ଆତଙ୍କବାଦୀ ସଂଗଠନରେ ସାମିଲ ହେବାକୁ ପ୍ରୋତ୍ସାହିତ କରିଥାଏ ।
ଆକ୍ରମଣ ଯୋଜନା କରୁଛି ପିଏଫଆଇ
ପିଏଫଆଇର ମାଷ୍ଟର ପ୍ଲାନ୍ ବାବଦରେ ତ’ ଜାଣିଲେ । ଏବେ ଆସନ୍ତୁ ଜାଣିବା ଆତଙ୍କ ସଂଗଠନର ମିଶନ୍ ବୟାଥିସ୍ କ’ଣ ? କୁହାଯାଉଛି ଯେ,ଯେଉଁଭଳି ଭାବେ ଏନଆଇଏ ଅଚାନକ ଚଢାଉ କରି ଏହା ଛାମୁଆଁ ନେତାଙ୍କୁ ଗିରଫ କରି ନେଇଛି । ସେଥିରେ ପିଏଫଆଇ କ୍ଷୁବ୍ଧ ହୋଇଛି । ତାକୁ ଲାଗୁଛି ଯେ, ଏହାର ପ୍ରଭାବ କର୍ମୀଙ୍କ ମନୋବଳ ହ୍ରାସ କରିବ । ତେଣୁ ପିଏଫଆଇ ମିଶନ୍ ବୟାଥିସ୍ ଆରମ୍ଭ କରିବାକୁ ଯାଉଛି । ପିଏଫଆଇ ବଡ଼ ଧରଣର ଆକ୍ରମଣ କରି କେନ୍ଦ୍ର ସରକାରଙ୍କୁ ଚେତାବନୀ ଦେବାକୁ ଚାହୁଁଛି । ପିଏଫଆଇ ପ୍ଲାନ୍ ଅନୁସାରେ ହିନ୍ଦୁବାଦୀ ଦଳ ଓ ଏହାର ନେତାଙ୍କୁ ଟାର୍ଗେଟ୍ କରାଯିବ । ଏହି ହିଂସାତ୍ମକ ଆକ୍ରମଣ ହିଁ ହେଉଛି ମିଶନ୍ ବୟାଥିସ୍ ।
ବୟାଥିସର ଅର୍ଥ କ’ଣ ?
ବୟାଥିସ ଏକ ଆରବୀ ଶବ୍ଦ । ଯାହାର ଅର୍ଥ ହେଉଛି ମୃତ୍ୟୁର ସୌଦାଗର ବା ଆତ୍ମଘାତୀ ଆକ୍ରମଣକାରୀ । ପିଏଫାଇ ଏହାର କ୍ୟାଡରଙ୍କୁ ଆତ୍ମଘାତୀ ସଜାଇ ବଡ଼ଧରଣର ଆକ୍ରମଣ ଯୋଜନା କରୁଛି । ତିହାଡ ଜେଲରେ ନିଜ ନେତାଙ୍କୁ ରଖାଯିବା ନେଇ ପିଏଫଆଇ କ୍ଷୁବ୍ଧ ଅଛି । ବୟାଥିସ୍ ଆକ୍ରମଣ ଆତ୍ମଘାତୀ ଆକ୍ରମଣ ହେବ । ଯେଉଁଥିରେ ଆକ୍ରମଣକାରୀ ମରିବ କିମ୍ବା ମାରିବା ଲକ୍ଷ୍ୟ ନେଇ ମୈଦାନକୁ ଆସିଥାଏ ।
ଦୁର୍ଗାପୂଜାର ଅଭନନ୍ଦନ ଜଣାଇ ମୌଳବାଦୀଙ୍କ ଟାର୍ଗେଟରେ ବାଂଲାଦେଶୀ ହିନ୍ଦୁ କ୍ରିକେଟର
ନୂଆଦିଲ୍ଲୀ: ମାଆ ଦୁର୍ଗାଙ୍କ ନବରାତ୍ରୀ ଉତ୍ସବ ଆରମ୍ଭ ହୋଇଯାଇଛି । ସାରା ବିଶ୍ୱରେ ଥିବା ହିନ୍ଦୁ ଧର୍ମର ଲୋକମାନେ ଦଶହରାର ପ୍ରଥମ ଦିନକୁ ବଡ ଧୁମଧାମରେ ସ୍ୱାଗତ ସମ୍ବର୍ଦ୍ଧନା କରିଛନ୍ତି । ଅନେକ କ୍ରିକେଟ ଖେଳାଳି ମଧ୍ୟ ସାମାଜିକ ଗଣମାଧ୍ୟମରେ ନବରାତ୍ରୀର ଶୁଭେଚ୍ଛା ଜଣାଇଛନ୍ତି । ଏହି କ୍ରମରେ ବାଂଲାଦେଶୀ ହିନ୍ଦୁ କ୍ରିକେଟର ଲିଟନ ଦାସ ମଧ୍ୟ ଫେସବୁକରେ ଦୁର୍ଗା ପୂଜାର ଶୁଭେଚ୍ଛା ଜଣାଇଛନ୍ତି, କିନ୍ତୁ ଏହା ତାଙ୍କ ପାଇଁ ମହଙ୍ଗା ପଡ଼ିଛି । କିଛି ମୌଳବାଦୀ ମୁସଲିମଙ୍କୁ ଏହା ପସନ୍ଦ ଆସିନାହିଁ ।
ତାଙ୍କର ଏହି ଫେସବୁକ ପୋଷ୍ଟର କମେଣ୍ଟରେ ଅନେକ ଧର୍ମ ପରିବର୍ତ୍ତ କରିବା ପାଇଁ କହିଛନ୍ତି । ପ୍ରକାଶଯୋଗ୍ୟ, ନବରାତ୍ରୀ ପୂର୍ବରୁ ମହାଳୟାରେ କ୍ରିକେଟର ଲିଟନ ଦାସ ଫେସବୁକ ପୋଷ୍ଟ କରି ନରାତ୍ରୀର ଶୁଭେଚ୍ଛା ଜଣାଇଥିଲେ । ଅନେକ ଲୋକ କ୍ରିକେଟରଙ୍କ ପାଇଁ ଖରାପ ଶବ୍ଦର ପ୍ରୟୋଗ କରିଥିଲେ । ଅବଶ୍ୟ ସବୁ ମୁସଲିମ ଖରାପ ଶବ୍ଦର କମେଣ୍ଟ କରିନଥିଲେ, ଅନେକ ଶୁଭେଚ୍ଛା ମଧ୍ୟ ଜାଣାଇଥିଲେ । ତେବେ ଏହା ପ୍ରଥମ ଘଟଣା ନୁହେଁ ଯେବେ ମୁସଲିମମାନେ ତାଙ୍କୁ ଟାର୍ଗେଟ କରିଛନ୍ତି ।
ଏହା ପୂର୍ବରୁ ଜନ୍ମାଷ୍ଟମୀରେ ମଧ୍ୟ ଶୁଭେଚ୍ଛା ଦେଇଥିଲେ, ସେ ସମୟରେ ମଧ୍ୟ ତାଙ୍କୁ ଟ୍ରୋଲ କରାଯାଇଥିଲା । ଏବଂ ଧମକ ଦିଆଯାଇଥିଲା । ତାଙ୍କ ପୋଷ୍ଟରେ ଅଲ-ଜୁଲୁଲ ଲେଖାଯାଇଥିଲା । ଏପରିକି ଏକ ଛୋଟ ପିଲାର ଭିଡିଓ ଭାଇରାଲ୍ ହୋଇଥିଲା, ଯେଉଁଥିରେ ଫେବୋରାଇଟ୍ ଖେଳାଳି ପଚରାଯିବାରୁ ସେ କହିଥିଲା କି ସୌମ୍ୟ ସରକାରଙ୍କୁ ପସନ୍ଦ କରୁନାହିଁ କାରଣ ସେ ଜଣେ ହିନ୍ଦୁ ଅଟନ୍ତି ।
ଅନ୍ୟପକ୍ଷରେ ବାଂଲାଦେଶରେ ହିନ୍ଦୁମାନଙ୍କ ସହ ଜୁଲୁମ ଖବର ପ୍ରାୟତଃ ସମୟରେ ଆସିଥାଏ । କେତବେଳେ ଘର ଜଳାଇ ଦିଆଯଆଇଥାଏ ତ କେବେ ଖେଳାଳିଙ୍କ ସହ ଏପରି ବ୍ୟବହାର ହୋଇଥାଏ । ଉଲ୍ଲେଖଯୋଗ୍ୟ, ଲିଟନ ଦାସ ଏବଂ ସୌମ୍ୟ ସରକାର ବାଂଲାଦେଶର ଅନ୍ତର୍ଜାତୀୟ କ୍ରିକେଟ ଟିମରେ ଖେଳୁଥିବା ନିୟମତି ଖେଳାଳିଙ୍କ ମଧ୍ୟରେ ସାମିଲ ଅଛନ୍ତି ।
ଉତ୍ତରାଖଣ୍ଡ ଅଙ୍କିତା ମର୍ଡର ମିଷ୍ଟ୍ରି, ପୁଲକିତର ରିସୋର୍ଟରେ ଚାଲିଥିଲା ଦେହ ବ୍ୟବସାୟ
ଡେରାଡୁନ୍: ଉତ୍ତରାଖଣ୍ଡ ଅଙ୍କିତା ଭଣ୍ଡାରୀ ହତ୍ୟା ମାମଲା । ଖୋଲୁଛି ଅଭିଯୁକ୍ତଙ୍କ ଅପରାଧର ପେଡ଼ି । ରିସର୍ଟରେ ଚାଲିଥିଲା ଦୁଇ ନମ୍ବରୀ କାରବାର । ବାପା ବିଜେପି ନେତା ଥିବାରୁ ଖୁଲମଖୁଲା ଅପରାଧର ସାମ୍ରାଜ୍ୟ ଚଳାଇଥିଲା ପୁଲକିତ । ମୁଖ୍ୟ ଅଭିଯୁକ୍ତ ତଥା ବହିଷ୍କୃତ ବିଜେପି ନେତାଙ୍କ ପୁଅ ପୁଲକିତ ଆର୍ଯ୍ୟାଙ୍କ ବିରୋଧରେ ସାଂଘାତିକ ଖୁଲାସା କରିଛନ୍ତି ରିସର୍ଟର ପୂର୍ବତନ କର୍ମଚାରୀ । ବେଶ୍ୟାବୃତ୍ତି ଓ ଡ୍ରଗ୍ସ ହବ୍ ପାଲଟିଥିଲା ରିସର୍ଟ । ରିସର୍ଟକୁ ଆସୁଥିଲେ ସ୍ପେଶାଲ ଗେଷ୍ଟ । ସେମାନଙ୍କୁ ପାଇଁ ବିଭିନ୍ନ ସମୟରେ ଝିଅମାନଙ୍କୁ ଅଣାଯାଉଥିଲା ।
ଏପରିକି ରୁମରେ ଗଞ୍ଜେଇ, ଡ୍ରଗ୍ସ ଓ ଦାମୀ ମଦର ବନ୍ଦୋବସ୍ତ କରାଯାଉଥିଲା ବୋଲି ପୂର୍ବତନ କର୍ମଚାରୀ ବୟାନ ରଖିଛନ୍ତି । ଏହାଛଡ଼ା ରିସର୍ଟରେ କାମ କରୁଥିବା କର୍ମଚାରୀଙ୍କୁ ମଧ୍ୟ ନିର୍ଯାତନା ଦିଆଯାଉଥିଲା । ଚାକିରି ଛାଡ଼ୁଥିବା କର୍ମଚାରୀଙ୍କୁ ମିଛ ମାମଲାରେ ଫସାଉଥିଲେ ବିଜେପି ନେତାଙ୍କ ପୁଅ । ଅଙ୍କିତା ମର୍ଡର କେସକୁ ନେଇ SIT ତଦନ୍ତ କରୁଥିବା ବେଳେ ଏଭଳି ଚାଞ୍ଚଲ୍ୟକର ବୟାନ ରଖିଛନ୍ତି ରିସର୍ଟର ପୂର୍ବତନ କର୍ମଚାରୀ । ପୂର୍ବତନ କର୍ମଚାରୀଙ୍କ ବୟାନ ଆଧାରରେ ସେ ଦିଗରେ ତଦନ୍ତ କରାଯିବ ବୋଲି ସ୍ୱତନ୍ତ୍ର ଯାଞ୍ଚ କମିଟି ପକ୍ଷରୁ କୁହାଯାଇଛି ।
ସୁପ୍ରିମକୋର୍ଟରେ ଶୁଣାଣିର ଲାଇଭ ଷ୍ଟ୍ରିମିଂ ଆରମ୍ଭ, ବିଚାର ବିଭାଗରେ ସ୍ୱଚ୍ଛତା ରକ୍ଷା ଲାଗି ଐତିହାସିକ ନିଷ୍ପତ୍ତି
ନୂଆଦିଲ୍ଲୀ: ଆଜିଠୁ ସୁପ୍ରିମକୋର୍ଟରେ ଆରମ୍ଭ ହେଲା ଶୁଣାଣିର ଲାଇଭ ଷ୍ଟ୍ରିମିଂ । ୩ଟି ସ୍ୱତନ୍ତ୍ର ସାମ୍ବିଧାନିକ ଖଣ୍ଡପୀଠର ଲାଇଭ ଷ୍ଟ୍ରିମିଂ କରାଯାଉଛି । ବିଚାର ବିଭାଗରେ ସ୍ୱଚ୍ଛତା ରକ୍ଷା ଲାଗି ସୁପ୍ରିମକୋର୍ଟ ଏହି ନିଷ୍ପତ୍ତି ନେଇଛନ୍ତି । ୟୁଟ୍ୟୁବ ବା ଅନ୍ୟାନ୍ୟ ପ୍ଲାଟଫର୍ମ ବଦଳରେ NIC ପ୍ଲାଟଫର୍ମରେ ଶୁଣାଣିର ସିଧାପ୍ରସାରଣ କରାଯାଉଛି । ସିଜେଆଇ ଜଷ୍ଟିସ ୟୁ.ୟୁ.ଲଳିତଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଅର୍ଥନୈତିକ ଭାବେ ଦୁର୍ବଳ ବର୍ଗ ବା EWS ମାମଲାର ଶୁଣାଣି କରୁଛନ୍ତି । ଏହି ମାମଲା ୧୦୩ତମ ସମ୍ବିଧାନ ସଂଶୋଧନକୁ ଚାଲେଞ୍ଜ କରୁଛି । ସେହିପରି ଜଷ୍ଟିସ ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଶିବସେନା ବିବାଦ ମାମଲାର ଶୁଣାଣି କରୁଛନ୍ତି । ଜଷ୍ଟିସ କାଉଲଙ୍କ ନେତୃତ୍ୱାଧୀନ ଖଣ୍ଡପୀଠ ସର୍ବଭାରତୀୟ ବାର୍ ପରୀକ୍ଷା ମାମଲାର ଶୁଣାଣି କରୁଛନ୍ତି ।
ଆଗାମୀ ଦିନରେ ବିଭିନ୍ନ ଶୁଶାଣିର ସିଧାପ୍ରସାରଣ ଲାଗି ସୁପ୍ରିମକୋର୍ଟ ନିଜର ସ୍ୱତନ୍ତ୍ର ଓଟିଟି ପ୍ଲାଟଫର୍ମ ତିଆରି କରିବେ ବୋଲି ସୂଚନା ମିଳିଛି । ପୂର୍ବରୁ ମଧ୍ୟପ୍ରଦେଶ ହାଇକୋର୍ଟ ମଧ୍ୟ ଓଟିଟି ପ୍ଲାଟଫର୍ମରେ ଲାଇଭ ଷ୍ଟ୍ରିମିଂ କରିବାକୁ ପଦକ୍ଷେପ ନେଇଛନ୍ତି । ସୁପ୍ରିମକୋର୍ଟ ନିଜର ଏକ ଓଟିଟି ପ୍ଲାଟଫର୍ମ ତିଆରି କରିବା ନେଇ ଗୁରୁତ୍ୱ ଦେଇଥିଲେ ପ୍ରଧାନବିଚାରପତି ଜଷ୍ଟିସ ଲଳିତ ।