ନୂଆଦିଲ୍ଲୀ: ଥଣ୍ତା, ଜ୍ୱର ଓ କଫ ପାଇଁ ହରିୟାଣାରେ ମେଡେନ ଫାର୍ମାସ୍ୟୁଟିକାଲ ତରଫରୁ ପ୍ରସ୍ତୁତ ୪ଟି କଫ୍ ସିରପ ବ୍ୟବହାର ନ କରିବାକୁ ସତର୍କ କରାଇଲା WHO । ଏହି ସିରପ ପିଇ ଗାମ୍ୱିଆରେ ୬୬ ଶିଶୁଙ୍କ ମୃତ୍ୟୁ ପରେ ଭାରତ ସମେତ ସବୁ ଦେଶକୁ ସତର୍କତା ଜାରି କରିଛି WHO । ଲ୍ୟାବରାଟୋରୀରେ ଏହି ସିରପ ପରୀକ୍ଷା ପରେ ଆବଶ୍ୟକତାଠାରୁ ଅଧିକ ପରିମାଣର ଆଲକୋହଲ ମାତ୍ରା ଥିବା ସ୍ପଷ୍ଟ ହୋଇଛି । ଏହା କିଡନୀକୁ ପ୍ରଭାବିତ କରୁଛି ଓ ବ୍ୟବହାର ନ କରିବାକୁ ଆଡଭାଇଜରି ଜାରି କରିଛି WHO ।
ଭାରତ ଯୋଡୋ ଯାତ୍ରାରେ ଆଜି ସାମିଲ ହେବେ ସୋନିଆ ଗାନ୍ଧି, ସାଧାରଣ ସଭାରେ ଦେବେ ଉଦବୋଧନ
ବେଙ୍ଗାଲୁରୁ: ଆଜି ଭାରତ ଯୋଡ଼ୋ ଯାତ୍ରାରେ ସାମିଲ ହେବେ ଏଆଇସିସି ଅନ୍ତରୀଣ ସଭାନେତ୍ରୀ ସୋନିଆ ଗାନ୍ଧି । କର୍ଣ୍ଣାଟକର ମାଣ୍ଡ୍ୟା ଜିଲ୍ଲାରେ ଭାରତ ଯୋଡ଼ୋ ଯାତ୍ରା ଚାଲିଥିବାବେଳେ ଆଜି ସୋନିଆ ରାଲିରେ ଯୋଗଦେବେ । ଏହାସହ ବାଲାରିରେ ଆୟୋଜିତ ସାଧାରଣ ସଭାରେ ବି ଯୋଗଦେବେ ସୋନିଆ । ଗତ ସୋମବାର ସୋନିଆ କୋଡ଼ାଗୁ ଜିଲ୍ଲାରେ ପହଞ୍ଚିବା ପରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେଇଥିଲେ । ଗତକାଲି ବେଗୁରସ୍ଥିତ ଭୀମାନକୋଲି ମନ୍ଦିରରେ ସୋନିଆ ପୂଜାର୍ଚ୍ଚନା କରିଥିଲେ ।
ଆଜି ପାଣ୍ଡବପୁରାରୁ ଭାରତ ଯୋଡ଼ୋ ଯାତ୍ରା ଆରମ୍ଭ ହେବ । ଗତ ସେପ୍ଟେମ୍ବର ୭ ତାରିଖରେ କନ୍ୟାକୁମାରୀରୁ ଯାତ୍ରାର ଶୁଭାରମ୍ଭ ହୋଇଥିବାବେଳେ ସେପ୍ଟେମ୍ବର ୩୦ ତାରିଖରେ କର୍ଣ୍ଣାଟକକୁ ଯାତ୍ରା ପ୍ରବେଶ କରିଥିଲା । ମିଶନ୍ ସାଉଥ ଅନୁସାରେ କେରଳ, କର୍ଣ୍ଣାଟକ, ଆନ୍ଧ୍ରପ୍ରଦେଶ, ତେଲଙ୍ଗାନା, ତାମିଲନାଡୁ ଆଦି ରାଜ୍ୟକୁ କଂଗ୍ରେସ ପ୍ରାଧାନ୍ୟ ଦେଉଥିବାବେଳେ ଭାରତ ଯୋଡ଼ୋ ଯାତ୍ରା ବିଶେଷ ପ୍ରଭାବ ପକାଇବା ପରିଲକ୍ଷିତ ହୋଇଛି ।
ଆମେରିକା ଓ ପାଶ୍ଚାତ୍ୟ ରାଷ୍ଟ୍ରଙ୍କୁ ମସ୍କୋର ଧମକ, ମହଙ୍ଗା ପଡ଼ିପାରେ ୟୁକ୍ରେନକୁ ଅଧିକ ସାମରିକ ପ୍ରୀତି
କିଭ୍: ମହଙ୍ଗା ପଡ଼ିପାରେ ୟୁକ୍ରେନକୁ ଅଧିକ ସାମରିକ ସହାୟତା । ଏହାକୁ ନେଇ ଆମେରିକା ଓ ପାଶ୍ଚାତ୍ୟ ରାଷ୍ଟ୍ରଙ୍କୁ ଧମକ ଦେଇଛି ମସ୍କୋ । ଆମେରିକାସ୍ଥିତ ଋଷର ରାଷ୍ଟ୍ରଦୂତ ଆନାତୋଲି ଅନ୍ତୋନୋଭ କହିଛନ୍ତି- ଆମେରିକାର ଏହି ନିଷ୍ପତ୍ତି ସିଧାସଳଖ ଋଷ ଲାଗି ଚାଲେଞ୍ଜ ସୃଷ୍ଟି କରିଛି । ଏହାର ଅର୍ଥ ଋଷ-ୟୁକ୍ରେନ ବିବାଦରେ ଆମେରିକା ହସ୍ତକ୍ଷେପ କରୁଛି । ଗତ ସପ୍ତାହରେ ୟୁକ୍ରେନକୁ ଆମେରିକା ୬୨୫ ନିୟୁତ ଡଲାରର ଆର୍ଥିକ ସହାୟତା ଘୋଷଣା କରିବା ପରେ ଉତ୍ତ୍ୟକ୍ତ ହୋଇଥିଲା ଋଷ ।
ୟୁକ୍ରେନକୁ ଆମେରିକା ବିଲିୟନ ବିଲିୟନ ଡଲାର ଅସ୍ତ୍ର ଓ ଆର୍ଥିକ ସହାୟତା ପ୍ରଦାନ କରୁଥିବାରୁ ପଛଘୁଞ୍ଚା ଦେବାରେ ଲାଗିଛି ଋଷ । ଆମେରିକାର ଏହି ସହାୟତା ଅଯଥାରେ ରକ୍ତପାତ ସୃଷ୍ଟି କରୁଛି ବୋଲି କହିଛନ୍ତି ଆନାତୋଲି । ସେପଟେ ଋଷ ହରାଇଥିବା ଅଞ୍ଚଳକୁ ଖୁବ୍ ଶୀଘ୍ର କବଜା କରିବ ବୋଲି କହିଛନ୍ତି ରାଷ୍ଟ୍ରପତି ଭ୍ଲାଦିମିର ପୁଟିନ୍ ।
ବଙ୍ଗୋପସାଗରରେ ଦୁର୍ବଳ ହେଲା ଲଘୁଚାପ, କାଲି ପର୍ଯ୍ୟନ୍ତ କିଛି ଜିଲ୍ଲାରେ ସାମାନ୍ୟରୁ ମଧ୍ୟମ ଧରଣର ବର୍ଷା
ଭୁବନେଶ୍ୱର: ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟ ଲଘୁଚାପ ଦୁବର୍ଳ ହୋଇଛି । ପ୍ରଭାବରେ ରାଜ୍ୟରେ ବର୍ଷାର ପରିମାଣ କମିଛି । ତେବେ ଲଘୁଚାପ ସହ ଜଡ଼ିତ ଘୂର୍ଣ୍ଣିବଳୟ ଆନ୍ଧ୍ର ଉପକୂଳରେ ସକ୍ରିୟ ରହିଛି । ଏହା ସହ ମୌସୁମୀ ନିମ୍ନ ଚାପରେଖା ମଧ୍ୟ ସକ୍ରିୟ ରହିଛି । ଦୁଇ ପ୍ରକାର ପାଣିପାଗ ନିୟାମକ ପ୍ରଭାବରେ ଆସନ୍ତାକାଲି ପର୍ଯ୍ୟନ୍ତ ଜିଲ୍ଲାରେ ସାମାନ୍ୟରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି । ବିଶେଷ କରି ଉତ୍ତର, ଉପକୂଳ ଏବଂ ଆଭ୍ୟନ୍ତରୀଣ ଓଡ଼ିଶାରେ ପ୍ରବଳ ବର୍ଷା ହେବା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
ଆଜି ସକାଳ ସାଢ଼େ ୮ଟା ମଧ୍ୟରେ ପ୍ରବଳ ବର୍ଷା ନେଇ ୧୬ଟି ଜିଲ୍ଳାକୁ ୟେଲୋ ଆଲର୍ଟ ଜାରି କରିଛି ପାଣିପାଗ ବିଭାଗ । ସେହିପରି ଗଞ୍ଜାମ, ଗଜପତି ଏବଂ ପୁରୀ ଜିଲ୍ଲାରେ ପ୍ରବଳ ବର୍ଷା ନେଇ ସତର୍କତା ଜାରି କରିଛି ପାଣିପାଗ କେନ୍ଦ୍ର । କାଲିଠୁ ବର୍ଷାର ବିସ୍ତୃତି ସହ ପରିମାଣ କମିବାର ସମ୍ଭାବନା ରହିଛି ।
ଆଜି ପୁରୀରେ ଗୋଷାଣି ମେଳଣ, ଶ୍ରୀମନ୍ଦିର ସମ୍ମୁଖରେ ଗୋଷାଣିମାନଙ୍କର ହେବ ଦେବସଭା
ପୁରୀ: ଆଜି ପୁରୀରେ ଅନୁଷ୍ଠିତ ହେବ ଗୋଷାଣି ମେଳଣ । ପବିତ୍ର ଏକାଦଶୀ ତିଥିରେ ଶ୍ରୀକ୍ଷେତ୍ରରେ ପୂଜା ପାଉଥିବା ଗୋଷାଣିମାନଙ୍କର ଶ୍ରୀମନ୍ଦିର ସମ୍ମୁଖରେ ଦେବସଭା ଅନୁଷ୍ଠିତ ହେବ । ମହାଦୀପ ଉଠିବା ପରେ ହେବ ମେଲାଣି ଉତ୍ସବ । ଶ୍ରୀକ୍ଷେତ୍ରରେ ଦୁର୍ଗାପୂଜା ଶେଷରେ ଭସାଣ ଉତ୍ସବର ରହିଛି ସ୍ୱତନ୍ତ୍ରତା । ସବୁ ଦୁର୍ଗାମେଢ଼ ବା ଗୋଷାଣି ମେଢ଼ ଶ୍ରୀମନ୍ଦିର ସମ୍ମୁଖରେ ସମ୍ମିଳିତ ହୋଇ ଏକାଦଶୀ ମହାଦୀପ ଉଠିଲା ପରେ ବିସର୍ଜନ କରାଯାଇଥାଏ ।
ପରମ୍ପରା ଅନୁସାରେ ଗୋଷାଣି ବ୍ୟତୀତ ନାଗା ମେଢ଼ ଓ ଅନ୍ୟାନ୍ୟ ମେଢ଼ ମଧ୍ୟ ଦେଖିବାକୁ ମିଳିବ । କରୋନା କଟକଣା ପାଇଁ ଗତ ଦୁଇବର୍ଷ ବିନା ଭକ୍ତରେ ମେଳଣ ଅନୁଷ୍ଠିତ ହେଉଥିଲା । ଚଳିତବର୍ଷ ମେଳଣରେ ଶ୍ରଦ୍ଧାଳୁ ସାମିଲ ହେବେ । ଜନସମାଗମକୁ ଦୃଷ୍ଟିରେ ରଖି ବ୍ୟାପକ ପ୍ରସ୍ତୁତି କରିଛି ପ୍ରଶାସନ । ସାହି କମିଟି ସହିତ ଆଲୋଚନା କରି କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।
ଆଜି ବିଦାୟ ନେବେ ମାଆ, ଭସାଣ ଉତ୍ସବ ପାଇଁ ସ୍ୱତନ୍ତ୍ର ବ୍ୟବସ୍ଥା କରିଛି କମିଶନରେଟ ପୋଲିସ
ଭୁବନେଶ୍ୱର: ସରିଲା ଦଶହରା । ପୁଣି ଆର ବର୍ଷକୁ ଅପେକ୍ଷା । ଆଜି ବିଦାୟ ନେବେ ମାଆ । ଅନୁଷ୍ଠିତ ହେଉଛି ମହାମାୟାଙ୍କର ଭସାଣ ଉତ୍ସବ । ଦୁଇବର୍ଷର କରୋନା କଟକଣା ପରେ ଏଥର ଶୋଭାଯାତ୍ରାରେ ହେବ ମାଆଙ୍କର ବିସର୍ଜନ । ଏଥିପାଇଁ ଟ୍ୱିନସିଟିରେ ସ୍ୱତନ୍ତ୍ର ବ୍ୟବସ୍ଥା କରିଛି କମିଶନରେଟ ପୋଲିସ । ବିସର୍ଜନ ପାଇଁ କରାଯାଇଛି ଅସ୍ଥାୟୀ ପୋଖରୀ । ଭସାଣ ପାଇଁ ଭୁବନେଶ୍ୱରରେ ୧୭ ପ୍ଲାଟୁନ ଫୋର୍ସ ମୁତୟନ ହେବେ ।
ରାଜଧାନୀରେ ଭସାଣ ଉତ୍ସବ ପାଇଁ ୩ ଜଣ ଅତିରିକ୍ତ ଡିସିପି ଦାୟିତ୍ୱରେ ରହିବେ । ୬୫ ଡିସିବେଲରୁ ଅଧିକ ଉଚ୍ଚ ସ୍ୱରରେ ଡିଜେ ବାଜିବ ନାହିଁ । ଭୁବନେଶ୍ୱରରେ ୩ଟି ଭସାଣି କମିଟି ରହିଛି । ସମସ୍ତଙ୍କ ପାଇଁ ସ୍ୱତନ୍ତ୍ର ରୁଟ୍ ଲାଇନ ବ୍ୟବସ୍ଥା କରାଯାଇଛି । ଟ୍ରାଫିକରେ ଜାମ ସ୍ଥିତି ନଉପୁଜିବା ଉପରେ ଗୁରୁତ୍ୱ ଦିଆଯାଇଛି । ସୁରକ୍ଷା ଦୃଷ୍ଟିକୋଣରୁ ବାରିକେଡର ବ୍ୟବସ୍ଥା କରାଯାଇଛି ।
ମୂର୍ତ୍ତି ବିସର୍ଜନ ବେଳେ ଭାସିଗଲେ ୪୦
କୋଲକାତା: ମୂର୍ତ୍ତି ବିସର୍ଜନ କରିବାକୁ ଯାଇ ନଦୀରେ ଭାସିଗଲେ ୪୦ ଜଣ ନିଖୋଜ । ଦୁଇ ଜଣଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ରେସକ୍ୟୁ ଅପରେସନ୍ ଜାରି ରହିଛି । ପଶ୍ଚିମବଙ୍ଗର୍ ଜଲପାଇଗୁଡି ଜିଲ୍ଲା ମାଲ୍ ନଦୀରେ ଘଟିଛି ଅଘଟଣ । ରାତି ୯ ସମୟରେ ମା’ ଦୂର୍ଗାଙ୍କ ମୂର୍ତ୍ତି ବିସର୍ଜନ କରାଯାଉଥିବା ବେଳେ ନଦୀରେ ହଠାତ ପାଣି ଆସିଯିବାରୁ ଏହି ଅଘଟଣ ଘଟିଛି । ଏନଡିଆରଏଫ ଟିମ୍ ପକ୍ଷରୁ ଘଟଣାସ୍ଥଳରେ ପହଞ୍ଚି ରେସକ୍ୟୁ ଅପରେସନ୍ ଆରମ୍ଭ କରିଛି ।
ଭାରସାମ୍ୟ ହରାଇ ଓଲଟି ପଡିଲା ବସ୍, ଜଣେ ମୃତ
ନୟାଗଡ଼: ଗୋଡିବିଡା ନିକଟରେ ଭାରସାମ୍ୟ ହରାଇ ଓଲଟିଲା ବସ୍ । ଘଟଣା ସ୍ଥଳରେ ଜଣେ ମୃତ । ମୃତକ ଜଣଙ୍କ ହେଲେ ଓଡ଼ିଶା ଗ୍ରାମ୍ୟବ୍ୟାଙ୍କ ଖାଖା ମ୍ୟାନେଜର କଲ୍ୟାଣୀ ପଣ୍ଡା । ୪ ଜଣଙ୍କ ଅବସ୍ଥା ସଙ୍କଟାପନ୍ନ ଅଛି । ଏକାଧିକ ଯାତ୍ରୀ ଆହତ ହୋଇଥିବା ବେଳେ ସମସ୍ତଙ୍କୁ ଦଶପଲ୍ଲା ମେଡିକାଲରେ ଭର୍ତ୍ତି କରାଯାଇଛି ।
ଭଞ୍ଜନଗରରୁ ଦଶପଲ୍ଲା ଅଭିମୁଖେ ଆସୁଥିବା କାଳେଶ୍ବର ନାମକ ବସ୍ ଭାରସାମ୍ୟ ହରାଇ ଓଲଟି ପଡିଥିଲା । ଅଗ୍ନିଶମ ଓ ପୋଲିସ ପହଞ୍ଚି ଆଡତଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଥିଲେ । ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ଇନୋଭେସନ୍ ହବରେ ପରିଣତ ହେବ ଫାଇଭ-ଟି ସ୍କୁଲ
ଭୁବନେଶ୍ବର: ଫାଇଭ-ଟି ସ୍କୁଲ ଇନୋଭେସନ୍ ହବରେ ପରିଣତ ହେବ । ପୂର୍ବରୁ ଏହି ପ୍ରକଳ୍ପ ଯୋଜନା ଓ ସଂଯୋଜନା ବିଭାଗ କରିଥାନ୍ତା । ହେଲେ ଏହାର ଗୁରୁତ୍ବ ଉପଲବ୍ଧ କରି ବିଜ୍ଞାନ ଓ କାରିଗରୀ ବିଭାଗକୁ ଏହି ଦାୟିତ୍ବ ମିଳିଛି । ପ୍ରଥମ ପର୍ଯ୍ୟାୟରେ ୫୦ଟି ଫାଇଭ-ଟି ହାଇସ୍କୁଲରେ ଇନୋଭେସନ୍ ହବ୍ କରାଯିବ । ଏ ଦିଗରେ ସ୍କୁଲ ଗୁଡ଼ିକୁ ଆର୍ଥିକ ସହାୟତା ପ୍ରଦାନ କରିବ ବିଜ୍ଞାନ ଓ କାରିଗରୀ ବିଭାଗ । ଏହାକୁ କାର୍ଯ୍ୟକାରୀ କରିବା ପାଇଁ ଇନୋଭେସନ୍ କାଉନସିଲ ଗଠନ କରାଯିବ ।
ଅଖ୍ୟାତ ପଲ୍ଲୀରୁ ବାହାରିବେ ବିଖ୍ୟାତ । ଫାଇଭ ଟି ସ୍କୁଲରୁ ବାହରିବେ ଥୋମାସ୍ ଆଲଭା ଏଡିସନ୍ ଓ ସି.ଭି. ରମଣଙ୍କ ପରି ବୈଜ୍ଞାନିକ । ସେମାନଙ୍କୁ ଆଉ ଶିକ୍ଷାଗତ ଯୋଗ୍ୟତା ନେଇ ରିସର୍ଚ୍ଚ କରିବାକୁ ପଡ଼ିବ ନାହିଁ । ସ୍କୁଲ ସ୍ତରରୁ ହିଁ ବୈଜ୍ଞାନିକ ସୃଷ୍ଟି କରିବା ପାଇଁ ବିଜ୍ଞାନ ଓ କାରିଗରୀ ବିଭାଗ ନୂତନ ଖସଡ଼ା ପ୍ରସ୍ତୁତ କରିଛି । ଫାଇଭ-ଟି ସ୍କୁଲକୁ ଇନୋଭେସନ୍ ହବ୍ କରି ନୂଆ ନୂଆ ଯନ୍ତ୍ରାଂଶ ଓ ବୈଷୟିକ ପ୍ରଣାଳୀ ଆବିଷ୍କାର କରାଯିବ । ଏହା ବୈଜ୍ଞାନିକ ଆବିଷ୍କାରଠାରୁ ଭିନ୍ନ ରହିବ । ସ୍କୁଲରୁ ପିଲାମାନଙ୍କ ଭିତରେ ମେଧା ଓ ଆବିଷ୍କାର କରିବାର ଶକ୍ତିର ବିକାଶ ଦିଗରେ ସହାୟକ ହେବ ଇନୋଭେସନ୍ ହବ୍ । ନ୍ୟାସନାଲ ଇନୋଭେସନ୍ ଫାଉଣ୍ଡେସନ ସହ ସମନ୍ବୟ ରଖି ସେହି ନିର୍ଦ୍ଦେଶାଳୟକୁ ଅନୁସରଣ କରାଯିବ । ଏଥିପାଇଁ ଉଭୟ ଶିକ୍ଷକ ଓ ଛାତ୍ରଛାତ୍ରୀଙ୍କ ମ୍ୟାପିଂ କରାଯିବ । ଯିଏ ଯେଉଁ ବିଷୟରେ ରିସର୍ଚ୍ଚ କରିବ, ତାକୁ ଯେପରି ଅନ୍ୟ ବିଷୟ ବସ୍ତୁର ରିସର୍ଚ୍ଚ ଆଡ଼କୁ ନ ଠେଲା ଯିବ, ତାକୁ ମ୍ୟାପିଂ ଜରିଆରେ ଗୁରୁତ୍ବ ଦିଆଯିବ ।
ଇନୋଭେସନ୍ ହବ୍ ପ୍ରକଳ୍ପକୁ ବିଭିନ୍ନ ମହଲରେ ସ୍ବାଗତ କରାଯାଇଛି । ଏଥିପାଇଁ ମ୍ୟାପିଂ ସହ ପ୍ରଶିକ୍ଷଣ ଜରିଆରେ କାର୍ଯ୍ୟକ୍ରମ ଆରମ୍ଭ କରିବାକୁ ପରାମର୍ଶ ଦିଆଯାଇଛି । ଫାଇଭ-ଟି ସମେତ ଉପାନ୍ତ ସ୍କୁଲ ଗୁଡ଼ିକରେ ବି ଇନୋଭେସନ୍ ହବ୍ ହେଲେ, ଅଖ୍ୟାତ ପଲ୍ଲୀରୁ ବିଖ୍ୟାତ ଛାତ୍ର ବାହାରି ପାରିବା ନେଇ ମତ ପ୍ରକାଶ ପାଇଛି ।
ଧାମନଗର ଉପନିର୍ବାଚନ: ଲଢ଼େଇରେ ବିଜେଡି ଆଗରେ
ଭଦ୍ରକ: ଧାମନଗର ଲଢେଇ ପାଇଁ ଆରମ୍ଭ ହୋଇଯାଇଛି ସମରସଜ୍ଜା । ନଭେମ୍ବର ୩ ସେମିଫାଇନାଲ ପାଇଁ ତାରିଖ ଘୋଷଣା ପରେ ଗଡ଼ଦଖଲ କରିବାକୁ ୩ ପ୍ରମୁଖ ଦଳ ଆରମ୍ଭ କରିଛନ୍ତି କ୍ଲୋଜଡୋର ପଲିଟିକ୍ସ । ୨୦୦୦ ମସିହାରୁ ୨୦୧୯ ନିର୍ବାଚନ ଫଳାଫଳକୁ ସମୀକ୍ଷା କଲେ ଧାମନଗରରେ ସବୁବେଳେ ଶାସକ ଦଳର ଦବଦବା ରହିଛି । ଏଥର ବି ଉପନିର୍ବାଚନରେ ଦଳ ବଡ଼ ବ୍ୟବଧାନରେ ବିଜୟ ଲାଭ କରିବ ବୋଲି ଶାସକ ଦଳ ଯୁକ୍ତି ବାଢ଼ିଛି । କଂଗ୍ରେସ, ବିଜେପିକୁ ପଛରେ ପକାଇ ଦ୍ବିତୀୟ ସ୍ଥାନରେ ରହିବାକୁ ଅଣ୍ଟା ଭିଡ଼ିଛି ।
ଧାମନଗର ଉପନିର୍ବାଚନ ପାଇଁ ଆରମ୍ଭ ହୋଇଛି ରାଜନୈତିକ ଅଙ୍କ କଷା । ୧୯ ବର୍ଷ ଧରି ଧାମନଗର ଭୋଟରଙ୍କ ମୁଡ଼କୁ ସମୀକ୍ଷା କଲେ ଧାମନଗରରେ ବିଜେଡ଼ିର ବିଜୟବାନା ଉଡିବା ଅଧିକ ସ୍ପଷ୍ଟ ସଙ୍କେତ ଦେଉଛି । ୨୦୦୦ ମସିହାରେ ସ୍ବାଧୀନ ପ୍ରାର୍ଥୀ ମାନସ ମଲ୍ଲିକ ବିଜେପି ପ୍ରାର୍ଥୀ ମନମୋହନ ସାମଲକୁ ପରାସ୍ତ କରିଥିଲେ । ୨୦୦୪ ମସିହାରେ ବିଜେପି ଓ ବିଜେଡି ମେଣ୍ଟ ଯୋଗୁଁ ମନମୋହନ ସାମଲ ବିଜୟୀ ହୋଇଥିଲେ । ୨୦୦୯ରେ କିନ୍ତୁ ବଦଳିଗଲା ଧାମନଗର ରାଜନୀତି । ବିଜେପି ସହ ବିଜେଡି ମେଣ୍ଟ ଭାଙ୍ଗିବାରୁ ଏହି ଆସନ ଅକ୍ତିଆର କରିଥିଲା ବିଜେଡି । ବିଜେଡି ପ୍ରାର୍ଥୀ ରାଜେନ୍ଦ୍ର ଦାସ ବିଜୟୀ ହୋଇଥିଲେ । ୨୦୧୪ରେ ଲଗାତର ଦ୍ବିତୀୟ ଥର ପାଇଁ ବିଜେଡି ଏହି ଆସନ ଦଖଲ କଲା । ବିଜେଡି ବିଧାୟକ ଭାବେ ମୁକ୍ତିକାନ୍ତ ମଣ୍ଡଳ ନିର୍ବାଚିତ ହୋଇଥିଲେ । ୨୦୧୯ରେ ବିଜେଡ଼ି ପ୍ରାର୍ଥୀ ମାତ୍ର ୪ହଜାର ୬୨୫ ଖଣ୍ଡ ଭୋଟରେ ପରାସ୍ତ ହୋଇଥିଲେ । ହେଲେ ନିକଟରେ ଶେଷ ହୋଇଥିବା ପଞ୍ଚାୟତ ଓ ପୌର ନିର୍ବାଚନରେ ବିଜେଡ଼ି ଧାମନଗରରେ ଏକ ପାଖିଆ ବିଜୟୀ ହୋଇଥିବାରୁ ଉପ ନିର୍ବାଚନରେ ଦଳ ବଡ଼ ବିଜୟ ବ୍ୟବଧାନରେ ଜିତିବ ବୋଲି ଦଳୀୟ ନେତା ଯୁକ୍ତି ବାଢିଛନ୍ତି ।
୨୦୧୯ ନିର୍ବାଚନରେ ବିଜେପି ୮୦ ହଜାର ୧୧୧ ଖଣ୍ଡ ଭୋଟ ପାଇଥିବା ବେଳେ ବିଜେଡି ୭୫ ହଜାର ୪୮୬ ଖଣ୍ଡ ଭୋଟ ପାଇଥିଲା । କଂଗ୍ରେସ ୭ ହଜାର ୩୦୩ ଖଣ୍ଡ ଭୋଟ ପାଇଥିଲା । ବିଜେଡି ମାତ୍ର ୪ ହଜାର ୬୨୫ ଖଣ୍ଡ ଭୋଟ ପଛରେ ରହିଯାଇଥିଲା । ତେବେ ପୂର୍ବରୁ ଉପନିର୍ବାଚନ ଫଳାଫଳ ଶାସକ ଦଳ ସପକ୍ଷରେ ଯାଉଥିବାରୁ ବିଜେଡି ପାଇଁ ଧାମନଗର ଗଡ଼ ହାସଲ କରିବା ସହଜ ହେବ । କଂଗ୍ରେସ କିନ୍ତୁ ଉପନିର୍ବାଚନରେ ବିଜେପିକୁ ପଛରେ ପକାଇ ଆଗରେ ରହିବାକୁ ରଣନୀତି କରୁଛି । ଦଳ କାହାକୁ ଟିକେଟ ଦେବ ଏନେଇ ପିସିସି ସଭାପତି ସ୍ବତନ୍ତ୍ର କିମିଟି ଗଠନ କରିଥିଲେ ମଧ୍ୟ ଏହାକୁ ନେଇ ପ୍ରଶ୍ନ ଉଠାଇଛନ୍ତି କମିଟି ସଦସ୍ୟ ଜୟଦେବ ଜେନା । ବିଜେପି କିନ୍ତୁ ଏ ନିର୍ବାଚନରେ କଡ଼ା ଟକ୍କର ଦେବାକୁ ସଜବାଜ ଆରମ୍ଭ କରିଛି ।
ନିକଟ ଅତୀତରେ ହୋଇଥିବା ୫ଟି ଉପନିର୍ବାଚନ ଫଳାଫଳ ବିଜେଡ଼ି ସପକ୍ଷରେ ଯାଇଛି । ବିଜେପୁର, ବାଲେଶ୍ବର, ତିର୍ତ୍ତୋଲ, ପିପିଲି, ବ୍ରଜରାଜନଗର ଉପନିର୍ବାଚନ ଶାସକ ବିଜେଡି ଏକ ପାଖିଆ ବିଜୟ କରିଛି । ଧାମନଗର ନିର୍ବାଚନୀ ମଣ୍ଡଳୀର ରାଜନୈତିକ ଇତିହାସକୁ ସମୀକ୍ଷା କଲେ ନଭେମ୍ବର ୩ ତାରିଖରେ ହେବାକୁ ଯାଉଥିବା ଉପନିର୍ବାଚନ ଫଳାଫଳ ବିଜେଡି ବେଶ ଫାଇଦା ଦେବ ବୋଲି ରାଜନୈତିକ ସମୀକ୍ଷକ କହିଛନ୍ତି ।