ଭୁବନେଶ୍ୱର: ମୋ ବସ୍ରୁ ପୁଣି ଚୋରି । ଭୁବନେଶ୍ବରରେ ମୋ ବସ୍ ଯାତ୍ରୀଙ୍କଠାରୁ ୪୨ ହଜାର ଟଙ୍କା ଚୋରି ହୋଇଥିବା ଅଭିଯୋଗ ହୋଇଛି । ନୟାଗଡ଼ର ବିରଞ୍ଚି ସେଠୀ ଓ ତାଙ୍କ ପତ୍ନୀ ମୋ ବସ୍ରେ ବାଣୀବିହାରରୁ ଖଣ୍ଡଗିରି ଯିବା ବେଳେ ନୟାପଲ୍ଲୀଠାରେ ଚୋରି ହୋଇଛି । ବନ୍ଧକ ରଖିଥିବା ସୁନା ମୁକୁଳାଇବା ପାଇଁ ଟଙ୍କା ନେଇ ଯାଉଥିଲେ । ନୟାପଲ୍ଲୀଠାରେ ପକେଟରେ ଟଙ୍କା ନଥିବା ଜାଣିପାରିବା ପରେ ଦମ୍ପତି ଏ ନେଇ ଥାନାରେ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ତଦନ୍ତ ଆରମ୍ଭ କରିଛି ପୋଲିସ ।
ବିଭିନ୍ନ ମେଡିସିନ୍ ହୋଲସୋଲର ଉପରେ ଚଢ଼ାଉ
ଭୁବନେଶ୍ୱର: ରାଜଧାନୀରେ ମେଲିଛି ନକଲି ଔଷଧ ପସରା । ରାଜ୍ୟର ବିଭିନ୍ନ ସ୍ଥାନକୁ ହେଉଛି ଯୋଗାଣ । ଭୁବନେଶ୍ବର ଅଶୋକ ନଗରରେ ବିଭିନ୍ନ ମେଡ଼ିସିନ ହୋଲସେଲ ଦୋକାନରେ ଚଢ଼ାଉ । ରେଡ କରୁଛି ଡ୍ରଗ ସ୍କ୍ବାଡ୍ । ୫ଜଣିଆ ଟିମ୍ ବିଭିନ୍ନ ହୋଲସେଲ ଦୋକାନରେ ଚଢାଉ କରୁଛି । କେବଳ ଓଡ଼ିଶା ନୁହେଁ ଦେଶର ବିଭିନ୍ନ ସ୍ଥାନରେ ଚାଲିଛି ନକଲି ଔଷଧ କାରବାର । ଓଡିଶାରୁ ଗ୍ଲେନମାର୍କ କମ୍ପାନୀର ଟେଲମା ଏଚ ଓ ଟେଲମା 40ର ନିର୍ଦ୍ଧିଷ୍ଟ ବ୍ୟାଚର ଔଷଧ ନକଲି ହୋଇଥିବା ଜଣାପଡିବା ପରେ ଦେଶବ୍ୟାପୀ ଖୋଳତାଡ଼ ଜାରି ରହିଛି ।
କେବଳ କଟକ, ଭୁବନେଶ୍ବର ନୁହେଁ ବରଗଡ଼ ଓ ଝାରସୁଗୁଡାରୁ ମଧ୍ୟ ବହୁ ପରିମାଣର ନକଲି ଔଷଧ ଜବତ କରାଯାଇଛି । ନକଲି ଔଷଧର ଚେର ହିମାଚଳପ୍ରଦେଶ ଓ ଉତ୍ତର ପ୍ରଦେଶକୁ ବ୍ୟାପିଥିବା ଜଣାପଡିଛି । ହିମାଚଳର ବାଦୀ ଓ ବାରଣାସୀରୁ ନକଲି ଔଷଧ ଝାରସୁଗୁଡାର ଅମିତ ମେଡିକାଲ ଏଜେନ୍ସି ଓ ବରଗଡର ଅଶୋକ ମେଡିକାଲ ଏଜେନ୍ସିକୁ ଆସିଥିଲା ।
ବିଭିନ୍ନ ରାଜ୍ୟରୁ ଏକାଧିକ କମ୍ପାନୀର ବହୁ ଔଷଧର ନକଲି ଜବତ ପରେ ଭାରତୀୟ ଡ୍ରଗ୍ସ ନିୟନ୍ତ୍ରକଙ୍କ ପକ୍ଷରୁ ନିର୍ଦ୍ଧିଷ୍ଟ କମ୍ପାନୀର ନିର୍ଦ୍ଧିଷ୍ଟ ବ୍ୟାଚର ଔଷଧ ରି-କଲ କରିବାକୁ ସବୁ ରାଜ୍ୟ ଡ୍ରଗ୍ସ କଣ୍ଟ୍ରୋଲରଙ୍କୁ ନିର୍ଦ୍ଦେଶ ଦିଆଯାଇଥିଲା। ଏହାକୁ ଆଧାର କରି ରାଜ୍ୟ ଡ୍ରଗ୍ସ ନିୟନ୍ତ୍ରକ ରାଜ୍ୟର ସବୁ ଜିଲ୍ଲା ଔଷଧ ନିରୀକ୍ଷକଙ୍କୁ ଚଢ଼ାଉ ପାଇଁ ନିର୍ଦ୍ଦେଶ ଦେଇଛନ୍ତି । ଏନେଇ ପୂର୍ବରୁ ସମସ୍ତ ଡିଲର ଓ ରେଟେଲରଙ୍କୁ ସୂଚନା ଦିଆଯାଇଥିଲା । ଆଜି ଭୁବନେଶ୍ବରରେ ଏକାଧିକ ସ୍ଥାନରେ ଚଢ଼ାଉ ସହ ଯାଞ୍ଚ ଜାରି ରହିଛି।
ଡାକ୍ତରୀ ପଢ଼ା ପାଇଁ ଅର୍ଥ ସାଜିବନି ବାଧକ, ପୁରୀର ବୈକୁଣ୍ଠ ସେଠୀଙ୍କୁ ସହଯୋଗର ହାତ ବଢ଼ାଇଲେ ମୁଖ୍ୟମନ୍ତ୍ରୀ
ପୁରୀ: ଡାକ୍ତରୀ ପଢ଼ିବା ପାଇଁ ଜଣେ ଗରିବ ଛାତ୍ରଙ୍କୁ ସହଯୋଗର ହାତ ବଢ଼ାଇଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଡାକ୍ତରୀ ପଢ଼ିବା ପାଇଁ ଅର୍ଥ ସାଜିଥିଲା ବାଧକ । ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବା ପରେ ପୁରୀ ଜିଲ୍ଲାର ବୈକୁଣ୍ଠ ସେଠୀଙ୍କୁ ରାଜ୍ୟ ସରକାର ସହଯୋଗର ହାତ ବଢାଇଛନ୍ତି । ପାଠପଢ଼ା ପାଇଁ ସମସ୍ତ ଅର୍ଥ ରାଜ୍ୟ ସରକାର ବହନ କରିବାକୁ ପ୍ରତିଶ୍ରୁତି ଦେଇଛନ୍ତି । ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ 5T ସଚିବ ଭି.କେ ପାଣ୍ଡିଆନଙ୍କୁ ଧନ୍ୟବାଦ ଦେଇଛନ୍ତି ବୌକୁଣ୍ଠ ସେଠୀ ।
ପୁରୀ ଜିଲ୍ଲା କଣାସ ବ୍ଲକ ତେଲଙ୍ଗାପଡ଼ାର ବୈକୁଣ୍ଠ ସେଠୀ Neet ଉତ୍ତୀର୍ଣ୍ଣ ହେବା ପରେ ଫକୀର ମୋହନ ମେଡିକାଲ କଲେଜରେ ଆଡମିଶନ ପାଇଁ ସୂଚନା ଆସିଥିଲା । ଦିନ ମଜୁରିଆ ପରିବାରର ବୈକୁଣ୍ଠ ବହୁ କଷ୍ଟରେ ଆଡମିଶନ କରିଥିଲେ ମଧ୍ୟ ପାଠପଢ଼ା ପାଇଁ ଆବଶ୍ୟକ ଅର୍ଥ ଯୋଗାଡ଼ରେ ଅକ୍ଷମ ହେବା ପରେ ସୋସିଆଲ ମିଡିଆରେ ସହଯୋଗ ଲୋଡିଥଲେ । ଘଟଣାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ 5T ସଚିବ ଭି.କେ ପାଣ୍ଡିଆନ ଗୁରୁତ୍ବର ସହିତ ନେଇ ପଦକ୍ଷେପ ନେବାକୁ SC-ST DEVELOPMENT ବିଭାଗକୁ ନିର୍ଦ୍ଦେଶ ଦେଇଥିଲେ । ବିଭାଗ ପକ୍ଷରୁ ବୈକୁଣ୍ଠଙ୍କୁ ଯୋଗାଯୋଗ କରି ସରକାରଙ୍କ ପକ୍ଷରୁ ସହଯୋଗ ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଛି ।
ସମ୍ବଲପୁରରେ ଜୋର୍ ଧରିଲା ହାଇକୋର୍ଟ ବେଞ୍ଚ୍ ପ୍ରତିଷ୍ଠା ଦାବି, ସୁପ୍ରିମକୋର୍ଟଙ୍କ ତାଗିଦ ସତ୍ତ୍ବେ ଜାରି ରହିଛି ଆନ୍ଦୋଳନ
ସମ୍ବଲପୁର: ସୁପ୍ରିମକୋର୍ଟଙ୍କ ତାଗିଦ ସତ୍ତ୍ବେ ସମ୍ବଲପୁରରେ ଜାରି ରହିଛି ହାଇକୋର୍ଟ ବେଞ୍ଚ ଆନ୍ଦୋଳନ । ଓକିଲ ଦମନ ନୀତି ବିରୋଧରେ ଆଜି ସମ୍ବଲପୁରରେ ଆଇନଜୀବୀ କରିଛନ୍ତି ପ୍ରବଳ ପ୍ରତିବାଦ । ବ୍ୟାରିକେଡ୍ ଭାଙ୍ଗି କୋର୍ଟ ପରିସରକୁ ଧସେଇ ପଶିଛନ୍ତି ଆନ୍ଦୋଳନକାରୀ ଆଇନଜୀବୀ । ଏଥିସହ ପୋଲିସ ସହ ମୁହାଁମୁହିଁ ହୋଇଛନ୍ତି ।
ଆନ୍ଦୋଳନକୁ ଦୃଷ୍ଟିରେ ରଖି ସମ୍ବଲପୁର ମହାନଗର ନିଗମ ଅଞ୍ଚଳର ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିଛି । ସମ୍ବଲପୁରର କଚେରୀ ଛକ ସମେତ ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନରେ ୨ ଜଣ ଅତିରିକ୍ତ ଏସପି, ୬ ଜଣ ଡିଏସପି, ୮ ଜଣ ଇନ୍ସପେକ୍ଟର, ୨୦ ଜଣ ଏସଆଇ ଓ ୧୧ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଛନ୍ତି । ଅପ୍ରୀତିକର ପରିସ୍ଥିତିକୁ ଏଡ଼ାଇବା ପାଇଁ ୨ ପ୍ଲାଟୁନ ରାପିଡ୍ ଆକ୍ସନ ଫୋର୍ସ ନିୟୋଜିତ ହୋଇଛନ୍ତି ।
ସମ୍ବିଧାନର ସୁରକ୍ଷା ପାଇଁ ମୋଦିଙ୍କୁ ହତ୍ୟା କରିବାକୁ ପ୍ରସ୍ତୁତ ରୁହ: ରାଜା ପଟେରିଆ
ନୂଆଦିଲ୍ଲୀ: ପୁଣି ସାମ୍ନାକୁ ଆସିଛି କଂଗ୍ରେସର ପୂର୍ବତନ ମନ୍ତ୍ରୀ ରାଜା ପଟେରିଆଙ୍କ ବିବାଦୀୟ ବୟାନ । ଏହି ବୟାନରେ ରାଜା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ହତ୍ୟା କରିବା ବିଷୟରେ କହୁଥିବା ଅଭିଯୋଗ ହୋଇଛି । ତେବେ ଏହି ବୟାନକୁ ନେଇ ବିବାଦ ସୃଷ୍ଟି ହେବା ପରେ ରାଜା ଏହି ବୟାନକୁ ପ୍ରତ୍ୟାହାର କରିଛନ୍ତି । ସେ କହିଛନ୍ତି ଯେ ଆସନ୍ତା ନିର୍ବାଚନରେ ସେ ମୋଦୀଙ୍କୁ ପରାସ୍ତ କରିବାକୁ ଚାହୁଁଛନ୍ତି । କେବଳ ଏତିକି ନୁହେଁ ଏହା ଫ୍ଲେରେ ହୋଇଯାଏ ବୋଲି ସେ କହିଛନ୍ତି । ତେବେ ରାଜାଙ୍କ ଏହି ଭିଡିଓକୁ ସେୟାର କରି ବିଜେପି ନେତା କଂଗ୍ରେସକୁ ଟାର୍ଗେଟ କରିଛନ୍ତି ।
Congress leader & former minister Raja Pateria incites people to kill PM Modi – earlier too Cong leaders spoke about death of PM Modi (Sheikh Hussain)
But now a death threat!
After “Aukat dikha denge” “Raavan” this is Rahul Gandhi’s Pyaar ki Rajniti? Will they act on him? No! pic.twitter.com/wH6LSi63g2
— Shehzad Jai Hind (Modi Ka Parivar) (@Shehzad_Ind) December 12, 2022
ରାଜା ପଟେରିଆଙ୍କ ଯେଉଁ ଭିଡିଓ ଭାଇରାଲ ହେଉଛି ସେ ଏହି ଭିଡିଓରେ କିଛି କର୍ମୀଙ୍କୁ ସମ୍ବୋଧିତ କରୁଛନ୍ତି । ଏହି ସମୟରେ ସେ କର୍ମୀଙ୍କୁ କହୁଛନ୍ତି କି ମୋଦୀ ନିର୍ବାଚନ ସମାପ୍ତ କରିଦେବେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଧର୍ମ, ଜାତି, ଭାଷା ଆଧାରରେ ଦେଶକୁ ବିଭାଜନ କରିବେ । ଦଳିତ, ଆଦିବାସୀ ଓ ସଂଖ୍ୟାଲଘୁଙ୍କ ଜୀବନ ବିପଦରେ ରହିଛି । ଯଦି ସମ୍ବିଧାନକୁ ବଞ୍ଚାଇବାକୁ ଚାହୁଁଛ ତେବେ ମୋଦୀଙ୍କୁ ହତ୍ୟାକୁ କରିବାକୁ ପ୍ରସ୍ତୁତ ରୁହ । ତେବେ ପରେ ସେ ହତ୍ୟା ଅର୍ଥ ପରାଜୟ ବୋଲି ସେ କହିଛନ୍ତି ।
ପୂର୍ବତନ କଂଗ୍ରେସ ମନ୍ତ୍ରୀ ରାଜା ପଟେରିଆଙ୍କ ବିବୃତ୍ତିରେ ମଧ୍ୟପ୍ରଦେଶ ଗୃହମନ୍ତ୍ରୀ ନରୋତ୍ତମ ମିଶ୍ର କହିଛନ୍ତି ଯେ ମୁଁ ରାଜା ପଟେରିଆଙ୍କ ବିବୃତ୍ତି ଶୁଣିଛି । ତାଙ୍କ ବୟାନରୁ ସ୍ପଷ୍ଟ ହେଉଛି ଯେ ଏହି କଂଗ୍ରେସ ମହାତ୍ମା ଗାନ୍ଧୀଙ୍କ କଂଗ୍ରେସ ନୁହେଁ । ଏହି ମାମଲାରେ ତୁରନ୍ତ ଏଫଆଇଆର ଦାଖଲ କରିବାକୁ ମୁଁ ଏସପିଙ୍କୁ ନିର୍ଦ୍ଦେଶ ଦେଇଛି ବୋଲି ନରୋତ୍ତମ ମିଶ୍ର କହିଛନ୍ତି ।
ହାତୀ-ମଣିଷ ସଂଘର୍ଷ ରୋକିବାକୁ ହାଇଟେକ୍ ଯୋଜନା, ଗତିବିଧି ଅଧିକ ଥିବା ଅଞ୍ଚଳରେ କରାଯିବ ସୋଲାର ଫେନସିଂ
ଭୁବନେଶ୍ୱର: ହାତୀ-ମଣିଷ ସଂଘର୍ଷ ରୋକିବାକୁ ରାଜ୍ୟ ସରକାରଙ୍କ ହାଇଟେକ୍ ଯୋଜନା । ହାତୀ ଗତିବିଧି ଅଧିକ ଥିବା ଅଞ୍ଚଳରେ ସୋଲାର ଫେନସିଂ ହେବ ବୋଲି ବନ୍ୟପ୍ରାଣୀ ପିସିସିଏଫ ସୁଶୀଲ କୁମାର ପୋପଲି ସୂଚନା ଦେଇଛନ୍ତି । ଢେଙ୍କାନାଳରେ ସୋଲାର ଫେନସିଂର ଚାରିଟି ପ୍ରକଳ୍ପ ଆରମ୍ଭ ହୋଇଛି । ଧୀରେଧୀରେ ସବୁ ଜିଲ୍ଲାରେ ହେବ । ସୋଲାର ଫେନସିଂ ହାତୀ ଚଳାଚଳକୁ ପ୍ରଭାବିତ କରିବ ନାହିଁ । ହାତୀ ଆସିଲେ ସାମାନ୍ୟ ସକ୍ ପାଇ ଫେରିଯିବେ । ହେଲେ ମରିବେ ନାହିଁ । ମୁଖ୍ୟତଃ ଚାଷଜମି ଓ ହାତୀ କରିଡର ପାଖରେ ସୋଲାର ଫେନସିଂ ହେବ । ଏକ କିଲୋମିଟର ଯାଏଁ ଫେନସିଂ ପାଇଁ ୩ ଲକ୍ଷ ଟଙ୍କା ଲାଗିବ । ଏଥିରୁ ୨ ଲକ୍ଷ ୭୦ ହଜାର ରାଜ୍ୟ ସରକାର ଓ ବାକି ଅର୍ଥ ଶ୍ରମଦାନ ଭାବେ ଗାଁ ଦେବ ।
OREDA କିଛି ଭେଣ୍ଡରଙ୍କୁ ଅନୁମୋଦନ ଦେଇ ଚୟନ ପାଇଁ ପଠାଇଛି । ଗୋଷ୍ଠୀ ସହଯୋଗରେ କାମ କରିବାକୁ DFOମାନଙ୍କୁ ନିର୍ଦ୍ଦେଶ ଦିଆଯାଇଛି । Anthropologic tendency ବଢ଼ିବାରୁ ହାତୀ-ମଣିଷ ସଂଘର୍ଷ ବଢୁଛି । ଓଡ଼ିଶାରେ ୨ହଜାରରୁ ଅଧିକ ହାତୀ ଅଛନ୍ତି । ଜନ ସୁରକ୍ଷା ଗଜ ରକ୍ଷା କାର୍ଯ୍ୟକ୍ରମ ଆରମ୍ଭ ହୋଇଛି । ଲୋକଙ୍କୁ ସୁରକ୍ଷା ଦେଲେ ହାତୀର ସୁରକ୍ଷା ହେବ । ଏହା ଦୁଇଟି ମଡେଲରେ କରାଯାଉଛି । ଗୋଟିଏ ବ୍ୟକ୍ତିଗତ, ଅନ୍ୟଟି PPP ମୋଡରେ ଗୋଷ୍ଠୀଙ୍କୁ ନେଇ ହେଉଛି । ଗଜସାଥୀ ଯୋଜନା ବି ଅଛି । ସେଠାରେ Eco Development କମ୍ୟୁନିଟି କରି ୨୫ ହଜାର ଟଙ୍କା ଦିଆଯାଉଛି । ହାତୀ ଆସିଲେ ସେମାନେ ବନ ବିଭାଗକୁ ସୂଚନା ଦେଉଛନ୍ତି । ୧୨ ଶହ ଗାଁ କଭର କରାଯାଇଛି । ପ୍ରତି ଗାଁ ପାଇଁ ୪୦ରୁ ୫୦ ହଜାର ଟଙ୍କା ଦିଆଯାଇଥିବା ବନ୍ୟପ୍ରାଣୀ ବିଭାଗ ପସିସିଏଫ୍ ସୁଶୀଲ କୁମାର ପୋପଲି ସୂଚନା ଦେଇଛନ୍ତି ।
ପରକୀୟା ପ୍ରୀତି ସନ୍ଦେହରେ ଜଘନ୍ୟ ହତ୍ୟା ଘଟଣା, ଉପଯୁକ୍ତ ତଦନ୍ତ ଦାବି କଲେ ପଡ଼ୋଶୀ
କଟକ: ପରକୀୟା ପ୍ରୀତି ସନ୍ଦେହରେ ଜଘନ୍ୟ ହତ୍ୟା ଘଟଣା । କଟକ ମହାନ୍ତିପଡ଼ାର ଶୈଳେନ୍ଦ୍ରନାଥ ଜେନାଙ୍କୁ ହତ୍ୟା ଘଟଣାର ଉପଯୁକ୍ତ ତଦନ୍ତ ଦାବି କରିଛନ୍ତି ପଡୋଶୀ । ଗତକାଲି ନୟାଗଡ଼ ମହିପୁର ପାଟଳିପୁରରୁ ଶୈଳେନ୍ଦ୍ରଙ୍କ ମୃତଦେହ ଉଦ୍ଧାର ହୋଇଥିଲା । ହତ୍ୟା ପଛରେ ପରକୀୟା ପ୍ରୀତି ରହିଥିବା ସନ୍ଦେହ କରାଯାଉଛି । ଶୈଳେନ୍ଦ୍ର ମହାନ୍ତିପଡାରେ ୧୦ ବର୍ଷ ଧରି ପରିବାର ସହ ଭଡ଼ାରେ ରହୁଥିଲେ । ତେବେ ହତ୍ୟାକାଣ୍ଡର ଉପଯୁକ୍ତ ତଦନ୍ତ କରାଯିବା ସହ ଦୋଷୀଙ୍କୁ ଦଣ୍ଡଦେବାକୁ ପଡୋଶୀ ଦାବି କରିଛନ୍ତି ।
ଅପହରଣ ନୁହେଁ, ଦୁର୍ଘଟଣାରେ ୪ ଜଣଙ୍କ ମୃତ୍ୟୁ, ଟାୟାର ଫାଟିଯାଇ ପରିତ୍ୟକ୍ତ କୂଅରେ ପଡ଼ି ମୃତ୍ୟୁ
ଉମରକୋଟ: ଅପହରଣ ନୁହେଁ, ଦୁର୍ଘଟଣାରେ ୪ ଜଣଙ୍କ ହୋଇଛି ମୃତ୍ୟୁ । ଉମରକୋଟରେ ୪ ଜଣ ନିଖୋଜ ଘଟଣାରେ ସାମ୍ନାକୁ ଆସିଲ ସତ । କାରରେ ଯାଉଥିବା ବେଳେ ଏକ ପରିତ୍ୟକ୍ତ କୂଅରେ ପଡ଼ି ସମସ୍ତଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । କାର ଟାୟାର ଫାଟି ଯିବାରୁ କୂଅ ଭିତରେ ପଶି ଯାଇଥିବା ଜଣାପଡ଼ିଛି । କୂଅରୁ ପାଣି ଖାଲି କରାଯାଇ ସସମସ୍ତଙ୍କୁ ଉଦ୍ଧାର କରୁଛି ପୋଲିସ ।
ରାଇଘର ତହସିଲ ସୁପରଭାଇଜର ସପନ ସରକାର ଓ ତାଙ୍କ ସ୍ତ୍ରୀ ରୀତା ସରକାର, ଶଳା ବିଶୁ ଅଧିକାରୀ ଏବଂ ଅନ୍ୟଜଣେ ବନ୍ଧୁ ହାଜାରୀ ଡାଲି ଛତିଶଗଡ଼ କାଙ୍କେରରେ ଏକ ବିବାହ ଉତ୍ସବରେ ସାମିଲ ହେବାକୁ ଯାଇଥିଲେ ୪ ଜଣ । ସେଠାରୁ ଶନିବାର ରାତି ସାଢେ ୧୦ଟା ବେଳେ ସମସ୍ତେ ଏକାଠି ଗୋଟିଏ ଗାଡ଼ିରେ କୋଣ୍ଡାଗାଁ ବାହାରିଥିଲେ। କିଛି ବାଟ ଆସିବା ପରେ ସେମାନଙ୍କ ଫୋନ୍ ଲାଗି ନଥିଲା । ସପନ ଓ ଅନ୍ୟମାନେ ଘରେ ପହଞ୍ଚି ନଥିବା ବେଳେ ସମସ୍ତଙ୍କ ମୋବାଇଲ ମଧ୍ୟ ସୁଇଚ ଅଫ୍ ରହିଥିଲା । ରବିବାର ସକାଳୁ ପରିବାର ଲୋକେ ବିଭିନ୍ନ ଆଡେ ଖୋଜାଖୋଜି କରିଥିଲେ ବି ସେମାନଙ୍କ ପତ୍ତା ମିଳି ନଥିଲା । ଗତକାଲି ସେମାନଙ୍କୁ ଅପହରଣ କରାଯାଇଥିବା ନେଇ ପରିବାର ଲୋକ ଥାନାରେ ଏତଲା ଦେଇଥିଲେ ।
ଶପଥ ନେଲେ ନବନିର୍ବାଚିତ ବିଧାୟିକା ବର୍ଷା ସିଂ ବରିହା, ଶପଥ ପାଠ କରାଇଲେ ବାଚସ୍ପତି
ଭୁବନେଶ୍ୱର: ବିଧାୟିକା ଭାବେ ଶପଥ ନେଇଛନ୍ତି ପଦମପୁରର ନବନିର୍ବାଚିତ ବିଧାୟିକା ବର୍ଷା ସିଂ ବରିହା । ବାଚସ୍ପତି ବିକ୍ରମ କେଶରୀ ଆରୁଖ ବର୍ଷାଙ୍କୁ ଶପଥ ପାଠ କରାଇଛନ୍ତି । ବିଜୟ ରଞ୍ଜନ ସିଂ ବରିହାଙ୍କ ବିୟୋଗ ପରେ ପଦମପୁରରେ ଉପନିର୍ବାଚନ ହୋଇଥିଲା । ଏଥିରେ ବଡ଼ ବ୍ୟବଧାନରେ ବିଜୟୀ ହୋଇଛନ୍ତି ଦିବଗଂତ ବିଧାୟକ ବିଜୟ ରଞ୍ଜନ ସିଂ ବରିହାଙ୍କ ଝିଅ ବର୍ଷା ସିଂ ବରିହା ।
ଆଗକୁ ବାପାଙ୍କ ଅଧୁରା ସ୍ୱପ୍ନ ପୂରଣ କରିବେ ବୋଲି ସେ ପ୍ରତିଶ୍ରୁତି ଦେଇଛନ୍ତି । ଉପନିର୍ବାଚନ ସମୟରେ ପଦମପୁରବାସୀଙ୍କୁ ଦେଇଥିବା ସମସ୍ତ ପ୍ରତିଶ୍ରୁତି ପୂରଣ କରିବେ । ସେମାନଙ୍କ ପାଖରେ ରହି ସେବା କରିବେ ବୋଲି ବର୍ଷା କହିଛନ୍ତି । ଲୋକ କିପରି ସରକାରୀ ଯୋଜନାର ସୁବିଧା ପାଇପାରିବେ, ସେନେଇ ଗୁରୁତ୍ୱ ଦେବା ସହ ଲୋକଙ୍କ ସମସ୍ୟା ସମାଧାନକୁ ପ୍ରାଥମିକତା ଦେବେ ବୋଲି କହିଛନ୍ତି ବର୍ଷା ।
୯୫ ଦିନରେ କଂଗ୍ରେସର ଭାରତ ଯୋଡ଼ ପଦଯାତ୍ରା, ହିମାଚଳରୁ ଫେରି ରାଜସ୍ଥାନରେ ରାହୁଲଙ୍କ ଆକ୍ସନ
ଜୟପୁର: ରାଜସ୍ଥାନରେ କଂଗ୍ରେସର ଭାରତ ଯୋଡ ଯାତ୍ରା । ବୁନ୍ଦି ଜିଲ୍ଲାରେ ସମର୍ଥକଙ୍କ ସହ ପଦଯାତ୍ରାରେ ସାମିଲ ହୋଇଛନ୍ତି ରାହୁଲ ଗାନ୍ଧୀ । ଆଜି ପଦଯାତ୍ରାରେ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସମେତ ରାଜସ୍ଥାନ କଂଗ୍ରେସର ବହୁ ବରିଷ୍ଠ ନେତା ମଧ୍ୟ ସାମିଲ ହୋଇଛନ୍ତି । ଗତକାଲି ହିମାଚଳରେ ମୁଖ୍ୟମନ୍ତ୍ରୀଙ୍କ ଶପଥ ସମାରୋହରେ ସାମିଲ ହୋଇଥିବା ବେଳେ, ଆଜି ସକାଳୁ ପୁଣି ରାଜସ୍ଥାନର ବୁନ୍ଦିରୁ ଆରମ୍ଭ ହୋଇଛି ପଦଯାତ୍ରା ।
ଆଜି ପଦଯାତ୍ରାରେ ରାହୁଲ ସମର୍ଥକଙ୍କ ବଳଦ ଗାଡ଼ିରେ ଚଢ଼ିଥିବା ଦେଖା ଯାଇଥିଲା । ଏହି ଭିଡିଓକୁ ଭାରତ ଯୋଡ ଅଫିସିଆଲ ଟୁଇଟର ହ୍ୟାଣ୍ଡେଲରେ ସେୟାର କରାଯାଇଛି । ସେପ୍ଟେମ୍ବର ୭ ତାରିଖରୁ ଭାରତ ଯୋଡ ଯାତ୍ରା ଆରମ୍ଭ ହୋଇଥିବା ବେଳେ, ୯୫ ଦିନରେ ଏହା ୮ ରାଜ୍ୟର ୪୦ ଜିଲ୍ଲା ଅତିକ୍ରମ କରିସାରିଛି । କନ୍ୟାକୁମାରୀରୁ ଆରମ୍ଭ ହୋଇଥିବା ଏହି ପଦଯାତ୍ରା ଆସନ୍ତା ଫେବୃୟାରୀରେ କାଶ୍ମୀରରେ ପହଞ୍ଚିବ ।