ଲଣ୍ଡନ: କିଏ ହେବ ବ୍ରିଟେନ ପ୍ରଧାନମନ୍ତ୍ରୀ । ସବୁଠୁ ଚର୍ଚ୍ଚାରେ ଥିବା ଋଷି ସୁନକଙ୍କ ପାଇଁ ପ୍ରଧାନମନ୍ତ୍ରୀ ହେବା ସହଜ ହୋଇନପାରେ । ପୁଣି ଥରେ ପୂର୍ବତନ ପ୍ରଧାନମନ୍ତ୍ରୀ ବୋରିସ ଜନସନ ବ୍ରିଟେନ ବସ୍ ହେବା ପାଇଁ ଉଦ୍ୟମ କରୁଛନ୍ତି । ଏଥିପାଇଁ ସେ ସୁନକଙ୍କୁ ପ୍ରଧାନମନ୍ତ୍ରୀ ରେସ୍ରୁ ଓହରିଯିବା ପାଇଁ କହିଥିବା ବ୍ରିଟିଶ ଗଣମାଧ୍ୟମରେ ଚର୍ଚ୍ଚା ହେଉଛି । ଋଷିଙ୍କ ପ୍ରତି ସମର୍ଥନ ଓହରିଲେ ବୋରିସ ଜନସନ ଏକ ମାତ୍ର ପ୍ରାର୍ଥୀ ଭାବେ ବିପୁଳ ସମର୍ଥନ ପାଇବେ ।
ପିଏମ ରେସରେ ୭ଜଣଙ୍କ ନାଁକୁ ନେଇ ଚର୍ଚ୍ଚା ଜୋର ଧରିଛି । ଭାରତୀୟ ବଂଶୋଦ୍ଭବ ଋଷି ସୁନକ, ପୂର୍ବତନ ପ୍ରଧାନମନ୍ତ୍ରୀ ବୋରିସ ଜନସନ ରେସ୍ରେ ସବୁଠୁ ଆଗରେ । ବ୍ରିଟେନର ପ୍ରତିରକ୍ଷା ମନ୍ତ୍ରୀ ବେନ ବାଲେସ, ବୈଦେଶିକ ବ୍ୟାପାର ସଚିବ କେମି, ବୈଦେଶିକ ମନ୍ତ୍ରୀ ଜେମ୍ସ, ଗୃହମନ୍ତ୍ରୀ ସୁଏଲା, ମାଇକେଲ ଗୋବଙ୍କ ନାଁକୁ ନେଇ ମଧ୍ୟ ଚର୍ଚ୍ଚା ଜୋର୍ । ବ୍ରିଟିଶ ସଂସଦରେ ୩୫୭ ସାଂସଦ ରହିଥିବା ବେଳେ ପିଏମ ପଦର ଦାବିଦାର ପାଇଁ ଅତି କମ୍ରେ ଶହେ ସାଂସଦଙ୍କ ସମର୍ଥନ ଆବଶ୍ୟକ ।
୨୦୨୪ ଡିସେମ୍ବରରେ ନିର୍ବାଚନ ହେବ । ତାପୂର୍ବରୁ ବୋରିସ ଜନସନ ପ୍ରଧାନମନ୍ତ୍ରୀ ଥିଲେ ସେହିଁ ପୁଣି ଥରେ ନିର୍ବାଚନ ଜିତିପାରିବେ ବୋଲି ବିରୋଧୀ ଦଳରେ ମଧ୍ୟ ଚର୍ଚ୍ଚା ହେଉଛି ।
