ଢେଙ୍କାନାଳ: ଢେଙ୍କାନାଳ ରାମଚଣ୍ଡୀ ମନ୍ଦିର ନିକଟରେ ଅଘଟଣ । ବ୍ରାହ୍ମଣୀ ନଦୀରେ ବୁଡ଼ି ଜଣେ ମୃତ, ଜଣେ ଗୁରୁତର । ଭୋଜି କରିବାକୁ ଯାଇଥିବା ବେଳେ ଘଟିଛି ଅଘଟଣ । ମୃତକ ଜଣକ ଏକ ଘରୋଇ କମ୍ପାନୀରେ କାମ କରୁଥିବା ସୂଚନା ରହିଛି । ଭୋଜି କରିବାକୁ ଯାଇ ଗାଧୋଉଥିବା ବେଳେ ଉଭୟ ବୁଡ଼ିଯାଇଥିଲେ । ନଦୀରୁ ଜଣଙ୍କର ମୃତଦେହକୁ ଉଦ୍ଧାର କରିଛି ଅଗ୍ନିଶମ ବାହିନୀ । ଅନ୍ୟ ଗୁରୁତର ଜଣଙ୍କୁ ମେଡିକାଲରେ ଭର୍ତ୍ତି କରାଯାଇଛି ।
ନକଲି ସୁନା ଶଙ୍ଖ କାରବାର ଓ ଅପହରଣ ଅଭିଯୋଗରେ ୨ ଅଭିଯୁକ୍ତଙ୍କୁ ବାନ୍ଧିଲା ପୋଲିସ୍
ନବରଙ୍ଗପୁର: ନକଲି ସୁନାଶଙ୍ଖ କାରବାର କରିବା ପଡ଼ିଲା ମହଙ୍ଗା । ନବରଙ୍ଗପୁରରୁ ଯୁବକଙ୍କୁ ଉଠାଇ ମଧ୍ୟପ୍ରଦେଶ ନେଇଗଲେ ଭଣ୍ଡବାବା । ତଦନ୍ତ କରି ଯୁବକଙ୍କୁ ଉଦ୍ଧାର କଲା ମଇଦଲପୁର ଥାନା ପୋଲିସ । ଉଦ୍ଧାର ଯୁବକ ହେଲେ ନବରଙ୍ଗପୁର ଜିଲ୍ଲା ଚନ୍ଦ୍ରପୁର ଅଞ୍ଚଳର ରବିନ୍ଦ୍ର ମିର୍ଗାନ । ପୋଲିସ ସୂଚନା ଅନୁସାରେ ୨ଲକ୍ଷ ଟଙ୍କାରେ ସୁନା ଶଙ୍ଖ ଦେବାର ଲୋଭ ଦେଖାଇ ମଧ୍ୟପ୍ରଦେଶର କିଛି ବ୍ୟକ୍ତିଙ୍କଠାରୁ ଅଗ୍ରୀମ ବାବଦକୁ ୪୦ହଜାର ଟଙ୍କା ଆଣିଥିଲେ ରବିନ୍ଦ୍ର । ସେମାନଙ୍କୁ ଏକ ଶଙ୍ଖର ନମୂନା ମଧ୍ୟ ଦେଖାଇଥିଲେ ।
ପରେ କମ ଦାମରେ ସୁନା ଶଙ୍ଖ ପାଇବା ଆଶାରେ ବାରମ୍ବାର ନବରଙ୍ଗପୁର ଆସୁଥିଲେ ଅଗ୍ରୀମ ଦେଇଥିବା ବ୍ୟକ୍ତି । ଶେଷରେ ରବିନ୍ଦ୍ର ଏକ ନକଲି ସୁନାଶଙ୍ଖ ପ୍ରଦାନ କରିଥିଲେ । ଏହାର ଯାଞ୍ଚ କରି ନକଲି ବୋଲି ଜାଣିବାକୁ ପାଇବା ପରେ ରବିନ୍ଦ୍ରଙ୍କୁ ଉଠାଇନେଇଥିଲେ ଅଭିଯୁକ୍ତ । ମଧ୍ୟପ୍ରଦେଶରେ ଏକ ଘରେ ବନ୍ଦୀ କରି ରଖିବା ସହିତ ପରିବାର ଲୋକଙ୍କଠାରୁ ୬ଲକ୍ଷ ଟଙ୍କା ଦାବି କରିଥିଲେ । ଏନେଇ ଥାନାରେ ଅଭିଯୋଗ ପରେ ସ୍ବତନ୍ତ୍ର ଟିମ୍ ଗଠନ କରି ରବିନ୍ଦ୍ରଙ୍କୁ ଉଦ୍ଧାର କରିଛି ପୋଲିସ ।
ମାମଲାରେ ୨ଅଭିଯୁକ୍ତଙ୍କୁ ଗିରଫ କରାଯାଇଛି । ସେଥିରେ ଜଣେ ଭଣ୍ଡ ବାବାଥିବା ସୂଚନା ମିଳିଛି । ନକଲି ସୁନା କାରବାରକୁ ରବିନ୍ଦ୍ର ଖଣ୍ଡନ କରିଥିବାବେଳେ ବାବା ଜଣଙ୍କ ନିର୍ଯାତନା ଦେବା ସହିତ କିଡନୀ ବିକ୍ରି କରିଦେବାକୁ ଧମକ ଦେଉଥିବା ଅଭିଯୋଦଗ କରିଛନ୍ତି । ସେପଟେ ସୁନା ଶଙ୍ଖ କାରବାରକୁ ସ୍ବୀକାର କରିଛନ୍ତି ଅଭିଯୁକ୍ତ ଭଣ୍ଡବାବା । ପୋଲିସ ବିଭିନ୍ନ ଦିଗରକୁ ମାମଲାର ତଦନ୍ତ ଜାରି ରଖିଛି ।
ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ତିଷ୍ଟି ପାରିଲେନି କିୱି ବ୍ୟାଟର, ୧୦୮ ରନରେ ଅଲଆଉଟ୍
ରାଇପୁର: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଦ୍ୱିତୀୟ ଦିନିକିଆ ମ୍ୟାଚ୍ ଚାଲିଛି । ରାଇପୁରର ସହୀଦ ବୀର ନାରାୟଣ ସିଂ ଅନ୍ତର୍ଜାତୀୟ ଷ୍ଟାଡିୟମରେ ଏହି ମ୍ୟାଚ୍ ଖେଳାଯାଉଛି । ପ୍ରଥମେ ଶ୍ରୀଲଙ୍କା ବ୍ଯାଟିଂ କରି ୩୪.୩ ଓଭରରେ ନିଜର ସମସ୍ତ ୱିକେଟ୍ ହରାଇ ୧୦୮ ରନ୍ ସଂଗ୍ରହ କରିପାରିଛି । ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ କ୍ରୀଜରେ ତିଷ୍ଟିପାରିନଥିଲେ କିୱି ବ୍ୟାଟର । ଭାରତକୁ ଏବେ ଏହି ସହଜ ଲକ୍ଷ୍ୟକୁ ୫୦ ଓଭର ମଧ୍ୟରେ ହାସଲ କରିବାକୁ ହେବ । ଏହି ବିଜୟ ଲକ୍ଷ୍ୟ ହାସଲ କରିବା ସହ ଭାରତ ସିରିଜ୍ ବିଜୟୀ ହେବ ।
ଭାରତୀୟ ଅଧିନାୟକ ରୋହିତ ଶର୍ମା ପ୍ରଥମେ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲେ । ସେହିପରି ଆହ୍ୱାନକ୍ରମେ ନ୍ୟୁଜିଲାଣ୍ଡ ବ୍ୟାଟିଂ କରିଥିଲା । ଭାରତୀୟ ବୋଲରଙ୍କ ଘାତକ ବୋଲିଂରେ ଧରାଶାୟୀ ହୋଇଥିଲେ କିୱି ବ୍ୟାଟର । ନ୍ୟୁଜିଲାଣ୍ଡର ଦୁଇ ପ୍ରାରମ୍ଭିକ ବ୍ୟାଟ୍ସମ୍ୟାନ ଫିନ୍ ଆଲେ ଏବଂ ଦେଭୋନ କନୱେୟ ଖରାପ ଆରମ୍ଭ କରିଥିଲେ । କିଛି ରନ୍ ନକରିପାରି ଫିନ୍ ଆଲେ ଆଉଟ୍ ହୋଇଯାଇଥିବା ବେଳେ ଦେଭୋନ ମାତ୍ର ୭ ରନ୍ କରି ଆଉଟ୍ ହୋଇଯାଇଥିଲେ ।
ଦଳ ପକ୍ଷରୁ ଗ୍ଲେନ ମିଚେଲ ସର୍ବାଧିକ ୩୬ ରନ୍ କରିଥିବା ବେଳେ ମାଇକେଲ ବ୍ରେସୱେଲ୍ ୨୨ ଏବଂ ମାଇକେଲ ସାଣ୍ଟନର ୨୭ ରନ୍ କରିଥିଲେ । ଏହି ତିନି ବ୍ୟାଟ୍ସମ୍ୟାନଙ୍କୁ ଛାଡିଲେ ଅନ୍ୟ କେହି ଦୁଇ ଅଙ୍କ ଛୁଇଁବାରେ ସମର୍ଥ ହୋଇନଥିଲେ । ଭାରତ ପକ୍ଷରୁ ମହମ୍ମଦ ସାମୀ ସର୍ବାଧିକ ୩ ଟି ୱିକେଟ୍ ଅକ୍ତିଆର କରିଥିବା ବେଳେ ହାର୍ଦ୍ଦିକ ପାଣ୍ଡ୍ୟା ଏବଂ ୱାଶିଂଟନ ସୁନ୍ଦର ଦୁଇଟି ଲେଖାଏଁ ୱିକେଟ୍ ଅକ୍ତିଆର କରିଥିଲେ । ସେହିପରି ମହମ୍ମଦ ସିରାଜ, ଶ୍ରାଦ୍ଧୁଳ ଠାକୁର ଓ କୁଲଦୀପ ଯାଦବ ଗୋଟେ ଲେଖାଏଁ ୱିକେଟ୍ ନେଇଥିଲେ ।
ଭାରତକୁ ଜିତିବାକୁ ହେଲେ ନିର୍ଦ୍ଧାରିତ ୫୦ ଓଭର ମଧ୍ୟରେ ୧୦୯ ରନ୍ ସଂଗ୍ରହ କରିବାକୁ ହେବ । ଏହି ସହଜ ବିଜୟ ଲକ୍ଷ୍ୟକୁ ଭାରତ ସହଜରେ ହାସଲ କରିବା ନେଇ ଆଶା । ପ୍ରଥମ ମ୍ୟାଚରେ ଜିତି ଭାରତ ୧-୦ରେ ଆଗୁଆ ଥିଲା ଏବେ ଆଜିର ମ୍ୟାଚ୍ ଜିତିଲେ ୨-୦ରେ ସିରିଜ୍ ବିଜୟୀ ହେବ । ଏହା ପୂର୍ବରୁ ଶ୍ରୀଲଙ୍କା ବିପକ୍ଷ ଦିନିକିଆରେ ୩-୦ରେ ସିରିଜ ମୂଳପୋଛ କରିଥିଲା ଭାରତ ।
ଏ କ୍ଲାସ କଣ୍ଟ୍ରାକ୍ଟରଙ୍କୁ ଶ୍ରମିକ ଦେବା ନାଁରେ ୬୬ ହଜାର ଟଙ୍କା ଲୁଟ୍
ଭୁବନେଶ୍ୱର: ସାଇବର ଠକର ଚିଟିଂ ସ୍କ୍ରିପଟ । ଏ କ୍ଲାସ କଣ୍ଟ୍ରାକ୍ଟରଙ୍କୁ ଶ୍ରମିକ ଦେବା ନାଁରେ 66 ହଜାର ଟଙ୍କା ଲୁଟ୍ । ଭୁବନେଶ୍ବର ସାଇବର ଥାନାରେ ଲିଖିତ ଅଭିଯୋଗ କରିଛନ୍ତି ଠିକାଦାର । ମୁର୍ସିଦାବାଦରୁ ଶ୍ରମିକ ପଠାଉଛି କହି ଠିକାଦାରଙ୍କୁ ଫୋନ୍ କରିଥିଲା ଠକ । ପ୍ରଥମେ ୫ ହଜାର ଟିକେଟ ପାଇଁ ଆଡଭାନ୍ସ ନେଇଥିଲା । ଶ୍ରମିକ ପିଛା ଖର୍ଚ୍ଚ ବାବଦକୁ ନେଇଥିଲା ଆଉ ୧୫ ହଜାର ଟଙ୍କା । କିଛି ସମୟ ପରେ ରେଳବାଇ ପୋଲିସ ହାବୁଡ଼ରେ ପଡି ଯାଇଥିବା କହି ଫାଇନ ବାବଦରେ ୩୩ ହଜାର ନେଇଥିଲା ।
ଠିକାଦାର ୩୩ ହଜାର ଟଙ୍କା ପଠାଇ ସାରିବା ପରେ ଟ୍ରାନଜାକ୍ସନ ଲିମିଟ ସରିଯାଇଥିବା କହି ଆଉ ୧୩ ହଜାର ଟଙ୍କା ରେଳବାଇ ପୋଲିସ ଅଧିକାରୀଙ୍କ ଆକାଉଣ୍ଟକୁ ପଠାଇବାକୁ କହିଥିଲା । ସମସ୍ତ ଟଙ୍କା ଦେଇ ସାରିବା ପରେ କିଷାନଗଞ୍ଜ ଷ୍ଟେସନରେ ମାଜିଷ୍ଟ୍ରେଟ ତଦନ୍ତ ଚାଲୁଥିବା କହି ଆଉ ୩୦ ହଜାର ଟଙ୍କା ମାଗିଥିଲା ଠକ । ତେବେ ଠିକାଦାରଙ୍କ ସନ୍ଦେହ ହେବାରୁ ଜଣେ ସମ୍ପର୍କୀୟ ରେଳ ଅଧିକାରୀଙ୍କ ଜରିଆରେ ଘଟଣାର ସତ୍ୟାସତ୍ୟ ଜାଣିବା ପାଇଁ ଅନୁରୋଧ କରିଥିଲେ । ଏଭଳି କିଛି ହୋଇ ନଥିବା ଜାଣିବା ପରେ ଭୁବନେଶ୍ବର ସାଇବର ଥାନାରେ ଲିଖିତ ଅଭିଯୋଗ କରିଛନ୍ତି ଠିକାଦାର ନିତ୍ୟାନନ୍ଦ ପାଢ଼ୀ । ଅଭିଯୋଗ ପରେ ତଦନ୍ତ ଆରମ୍ଭ କରିଛି ସାଇବର ଥାନା ପୋଲିସ ।
ବେସରକାରୀ କଲେଜ କର୍ମଚାରୀଙ୍କ ବଢ଼ିଲା ଦରମା
ଭୁବନେଶ୍ୱର: ବେସରକାରୀ କଲେଜ କର୍ମଚାରୀଙ୍କ ବଢ଼ିଲା ଦରମା । ଆଜି ମୁଖ୍ୟମନ୍ତ୍ରୀ ଅଧ୍ୟକ୍ଷତାରେ ରାଜ୍ୟ କ୍ୟାବିନେଟ ବୈଠକରେ ଗ୍ରାଣ୍ଟ-ଇନ-ଏଡ ବୃଦ୍ଧି ଉପରେ ବାଜିଛି ମୋହର । ଅନୁଦାନପ୍ରାପ୍ତ ବେସରକାରୀ କଲେଜ କର୍ମଚାରୀଙ୍କ ଗ୍ରାଣ୍ଟ-ଇନ୍ ଏଡ୍ ବଢିବା ସହ ପିଛିଲା ଭାବେ ୨୦୨୨ ଜାନୁଆରୀ ୧ ତାରିଖରୁ ଏହା ଲାଗୁ ହେବ । ସେହିପର ୨ଟି ଗ୍ରାମୀଣ ପାଇପ ଜଳ ଯୋଗାଣ ପ୍ରକଳ୍ପକୁ ଅନୁମୋଦନ ମିଳିଥିବା ବେଳେ ଓଡ଼ିଶା ଗ୍ରୁପ-ବି କର୍ମଚାରୀ ନିଯୁକ୍ତି ଓ ସେବାସର୍ତ୍ତରେ ସଂଶୋଧନରେ କ୍ୟାବିନେଟ ମୋହର ବାଜିଛି । ଏପରି ୧୨ଟି ପ୍ରସ୍ତାବରେ କ୍ୟାବିନେଟ୍ ମୋହର ବାଜିଛି ।
ଯେଉଁ ଶିକ୍ଷକ ଏବଂ ଅଣଶିକ୍ଷକ କର୍ମଚାରୀମାନେ ୨୦୦୮ ନିୟମ ଅନୁସାରେ ଦରମା ପାଇଆସୁଥିଲେ । ତେବେ ଅସନ୍ତୋଷକୁ ନଜରରେ ରଖି ୨୦୧୭ ନିୟମ ଅନୁସାରେ ଦରମା ବୃଦ୍ଧି କରାଯାଇଛି । ସପ୍ତମ ବେତନ ହାର ନିୟମ ଅନୁସାରେ ଗତ ବର୍ଷ ଜାନୁଆରୀରୁ ପିଛିଲାଭାବେ ବର୍ଦ୍ଧିତ ଦରମା ପାଇବେ । ଏହାଦ୍ବାରା ସରକାର ଅତିରିକ୍ତ ୨୯୦ କୋଟିର ବୋଝ ମୁଣ୍ଡାଇବେ । ଏଥିରେ ୧୫ ହଜାର ୭୭୧ ଜଣ ଶିକ୍ଷକ ଓ କର୍ମଚାରୀ ଉପକୃତ ହେବ । ଅନୁଦାନପ୍ରାପ୍ତ ବେସରକାରୀ କଲେଜ କର୍ମଚାରୀଙ୍କ ଗ୍ରାଣ୍ଟ-ଇନ୍ ଏଡ୍ ବୃଦ୍ଧି ହୋଇଥିବାରୁ ରାଜ୍ୟ ସରକାରଙ୍କୁ ଧନ୍ୟବାଦ ଜଣାଇଛନ୍ତି ୪୮୮ ବର୍ଗ କଲେଜର ରାଜ୍ୟ ସଭାପତି ପବିତ୍ର ମହଲା ।
ବିଜେପିକୁ ଭର୍ତ୍ସନା କଲେ ସ୍ୱାତୀ ମାଲିଓ୍ୱାଲ, କହିଲେ- ଚାଲିଛି ଅପପ୍ରଚାର
ନୂଆଦିଲ୍ଲୀ: ରାଜରାସ୍ତାରେ ଦିଲ୍ଲୀ ମହିଳା କମିଶନ ଅଧ୍ୟକ୍ଷା ସ୍ୱାତୀ ମାଲିଓ୍ୱାଲଙ୍କୁ କାରରେ ଭିଡ଼ି ନେବା ଘଟଣା । ବିଜେପିର ମିଥ୍ୟା ଅଭିଯୋଗକୁ ନେଇ ଦଳକୁ ଭର୍ତ୍ସନା କରିଛନ୍ତି ସ୍ୱାତୀ । ଗତ ଗୁରୁବାର ରାତିରେ ଦିଲ୍ଲୀ ଏମସ୍ ପଛପଟେ ରିୟଲିଟି ଚେକ୍ କରୁଥିବାବେଳେ ଜଣେ ମଦ୍ୟପ କାର୍ ଡ୍ରାଇଭର ସ୍ୱାତୀଙ୍କୁ ୧୦ ମିଟର ଘୋଷାଡ଼ି ନେଇଥିବା ଅଭିଯୋଗ ହୋଇଥିଲା । ତେବେ ଏହି ଘଟଣା ସତ ନୁହେଁ ଏବଂ ଏକ ଷ୍ଟିଙ୍ଗ ଥିଲା ବୋଲି ବିଜେପି କହିବା ପରେ ଏହାକୁ ନେଇ ବର୍ଷିଛନ୍ତି ସ୍ବାତୀ । ଦିଲ୍ଲୀ ପୋଲିସକୁ ବଦନାମ କରିବା ଲାଗି ଏହା ଏକ ଅପରେସନ ଥିଲା ବୋଲି ବିଜେପି କହିବା ପରେ ଏହାକୁ ବିରୋଧ କରିଥିଲେ ସ୍ବାତୀ ।
ସେ କହିଛନ୍ତି- ତାଙ୍କ ସମ୍ପର୍କରେ ଅପପ୍ରଚାର କରାଯାଉଛି । ସେ ଅନେକ ଗୁରୁତ୍ବପୂର୍ଣ୍ଣ ଦାୟିତ୍ବ ଗ୍ରହଣ କରିଆସିଛନ୍ତି । ତାଙ୍କୁ ଅନେକ ସମୟରେ ଆକ୍ରମଣ କରାଯାଇଛି । ମାତ୍ର ସେ ଦବିବେ ନାହିଁ । ପ୍ରତି ଷଡ଼ଯନ୍ତ୍ର କ୍ଷେତ୍ରରେ ତାଙ୍କ ଭିତରେ ଥିବା ନିଆଁ ଅଧିକ ତେଜିଆନ ହେବ । ତାଙ୍କ ସ୍ବରକୁ କେହି ଦମନ କରିପାରିବେ ନାହିଁ । ସେ ବଞ୍ଚିଥିବା ଯାଏ ସଂଗ୍ରାମ ଜାରି ରଖିବେ । ଗତ ଗୁରୁବାରର ଘଟଣା ପ୍ରସଙ୍ଗରେ ବିଜେପି ପକ୍ଷରୁ କୁହାଯାଇଥିଲା- ଖୋଦ୍ କାର୍ ଚାଳକ ହରିଶ ଚନ୍ଦ୍ର ସୂର୍ଯ୍ୟବଂଶୀ ଜଣେ ଆପ୍ କର୍ମୀ ଏବଂ ସ୍ବାତୀଙ୍କ ଏହା ଥିଲା ଏକ ନାଟକ ।
ଚୀନ୍ ସହ ସୀମା ବିବାଦ ମଧ୍ୟରେ ସମରାଭ୍ୟାସ କରିବ ଭାରତୀୟ ବାୟୁସେନା
ନୂଆଦିଲ୍ଲୀ: ଚୀନ ସହ ଟେନସନ ଜାରି ରହିଥିବାବେଳେ ଭାରତୀୟ ବାୟୁସେନା ଆରମ୍ଭ କରିବ ସମରାଭ୍ୟାସ । ଉତ୍ତରପୂର୍ବାଞ୍ଚଳ ଅନ୍ତର୍ଗତ ସମସ୍ତ ଏୟାରବେସରେ ବାୟୁସେନା କରିବ ସମରାଭ୍ୟାସ । ‘ପ୍ରଳୟ’ ନାମରେ ନାମିତ ଏହି ସମରାଭ୍ୟାସରେ ସାମିଲ ହେବେ ଡ୍ରୋନ ସ୍କ୍ବାଡ୍ରନ। ଚୀନ ସହ ସମ୍ପର୍କ ତିକ୍ତ ହେବା ପରେ ଭାରତ ପକ୍ଷରୁ କିଛିଦିନ ତଳେ ଡ୍ରୋନ ସ୍କ୍ବାଡ୍ରନ ଉତ୍ତରପୂର୍ବ ସୀମା ଅନ୍ତର୍ଗତ ପ୍ରକୃତ ନିୟନ୍ତ୍ରଣ ରେଖାକୁ ପ୍ରେରଣ କରାଯାଇଥିଲା ।
ଆସନ୍ତା କିଛି ଦିନ ମଧ୍ୟରେ ଭାରତୀୟ ବାୟୁସେନା ପକ୍ଷରୁ ଏହି କାର୍ଯ୍ୟକ୍ରମ କରାଯିବ। ଏହି ସମରାଭ୍ୟାସରେ ଏସ-୪୦୦ ଏୟାର ଡିଫେନ୍ସ ସ୍କ୍ବାଡ୍ରନ ସାମିଲ ହେବ। ଶତ୍ରୁ ପକ୍ଷରୁ କୌଣସି ପ୍ରକାର ବିମାନ ବା ମିସାଇଲକୁ ୪୦୦ କିଲୋମିଟର ଉପରୁ ଖସାଇବାର ସାମର୍ଥ୍ୟ ହାସଲ କରିଛି ସିଷ୍ଟମ। ଏହି ସମରାଭ୍ୟାସରେ ରାଫେଲ, ସୁଖୋଇ-୩୦ ଆଦି ବିମାନ ବି ସାମିଲ ହେବ। ସିକ୍କିମ ଓ ସିଲିଗୁଡ଼ି କରିଡରରେ ଶତ୍ରୁ ପକ୍ଷରୁ ଚାଲିଥିବା ବିଭିନ୍ନ କାର୍ଯ୍ୟକ୍ରମ ବିରୋଧରେ ଭାରତ ସତର୍କ ହୋଇଥିବାବେଳେ ଏହାର ମୁକାବିଲା ଲାଗି ଭାରତ ପ୍ରସ୍ତୁତ ହେବାରେ ଲାଗିଛି ।
ଡୋକଲାମ ଇଲାକାରେ ବି ଚୀନ ନିଜର କାର୍ଯ୍ୟକଳାପ ବୃଦ୍ଧି କରୁଛି। ଚୀନ ସହ ଟେନସନ ଜାରି ରହିଥିବାବେଳେ ଭାରତୀୟ ବାୟୁସେନା ଆରମ୍ଭ କରିବ ସମରାଭ୍ୟାସ। ଉତ୍ତରପୂର୍ବାଞ୍ଚଳ ଅନ୍ତର୍ଗତ ସମସ୍ତ ଏୟାରବେସରେ ବାୟୁସେନା କରିବ ସମରାଭ୍ୟାସ। ପ୍ରଳୟ ନାମରେ ନାମିତ ଏହି ସମରାଭ୍ୟାସରେ ସାମିଲ ହେବେ ଡ୍ରୋନ ସ୍କ୍ବାଡ୍ରନ। ଚୀନ ସହ ସମ୍ପର୍କ ତିକ୍ତ ହେବା ପରେ ଭାରତ ପକ୍ଷରୁ କିଛିଦିନ ତଳେ ଡ୍ରୋନ ସ୍କ୍ବାଡ୍ରନ ଉତ୍ତରପୂର୍ବ ସୀମା ଅନ୍ତର୍ଗତ ପ୍ରକୃତ ନିୟନ୍ତ୍ରଣ ରେଖାକୁ ପ୍ରେରଣ କରାଯାଇଥିଲା।
ଆସନ୍ତା କିଛି ଦିନ ମଧ୍ୟରେ ଭାରତୀୟ ବାୟୁସେନା ପକ୍ଷରୁ ଏହି କାର୍ଯ୍ୟକ୍ରମ କରାଯିବ। ଏହି ସମରାଭ୍ୟାସରେ ଏସ-୪୦୦ ଏୟାର ଡିଫେନ୍ସ ସ୍କ୍ବାଡ୍ରନ ସାମିଲ ହେବ। ଶତ୍ରୁପକ୍ଷରୁ କୌଣସି ପ୍ରକାର ବିମାନ ବା ମିସାଇଲକୁ ୪୦୦ କିଲୋମିଟର ଉପରୁ ଖସାଇବାର ସାମର୍ଥ୍ୟ ହାସଲ କରିଛି ସିଷ୍ଟମ । ଏହି ସମରାଭ୍ୟାସରେ ରାଫେଲ, ସୁଖୋଇ-୩୦ ଆଦି ବିମାନ ବି ସାମିଲ ହେବ । ସିକ୍କିମ ଓ ସିଲିଗୁଡ଼ି କରିଡରରେ ଶତ୍ରୁ ପକ୍ଷରୁ ଚାଲିଥିବା ବିଭିନ୍ନ କାର୍ଯ୍ୟକ୍ରମ ବିରୋଧରେ ଭାରତ ସତର୍କ ହୋଇଥିବାବେଳେ ଏହାର ମୁକାବିଲା ଲାଗି ଭାରତ ପ୍ରସ୍ତୁତ ହେବାରେ ଲାଗିଛି । ଡୋକଲାମ ଇଲାକାରେ ବି ଚୀନ ନିଜର କାର୍ଯ୍ୟକଳାପ ବୃଦ୍ଧି କରୁଛି।
କଟକ ଏସସିବି ମେଡିକାଲରେ ବିରଳ ଅସ୍ତ୍ରୋପଚାର, ଡାହାଣ ହାତରେ ଲାଗିଲା ବାମ ଗୋଡ଼ର ଆଙ୍ଗୁଠି
କଟକ: କଟକ ଏସସିବି ବଡ଼ ମେଡିକାଲରେ ବିରଳ ଅସ୍ତ୍ରୋପଚାର । ମେଡିକାଲର ପ୍ଲାଷ୍ଟିକ ସର୍ଜରୀ ବିଭାଗ କରି ଦେଖାଇଛି ସଫଳ ଅସ୍ତ୍ରୋପଚାର । ଯାହା ଓଡ଼ିଶାରେ ପ୍ରଥମ । ଡାହାଣ ହାତରେ ଲାଗିଲା ବାମ ଗୋଡ଼ର ଆଙ୍ଗୁଠି । ଭଦ୍ରକର ସୀତାକାନ୍ତ ବାରିକ ତାମିଲନାଡ଼ୁରେ ଏକ କମ୍ପାନୀରେ କାର୍ଯ୍ୟ କରିବା ସମୟରେ ତାଙ୍କ ଡାହାଣ ହାତର ବୁଢ଼ା ଆଙ୍ଗୁଠି ସମ୍ପୂର୍ଣ୍ଣ କଟି ଯାଇଥିଲା । ଯାହାକୁ ନେଇ ସେହି କମ୍ପାନୀର ମୁଖ୍ୟ ଓ ପରିବାର ଲୋକେ ସୀତାକାନ୍ତଙ୍କୁ ଏସସିବି ମେଡିକାଲର ପ୍ଲାଷ୍ଟିକ ସର୍ଜରୀ ବିଭାଗରେ ଚିକିତ୍ସା ପାଇଁ ଭର୍ତ୍ତି କରିଥିଲେ ।
ପ୍ରଥମ ପର୍ଯ୍ୟାୟରେ କାଉନସିଲିଂ କରିବା ପରେ ଅପରେସନ କରିବା ପାଇଁ ଆରମ୍ଭ ହୋଇଥିଲା ପ୍ରସ୍ତୁତି । ଦୀର୍ଘ ୮ ଘଣ୍ଟାର ଅପରେସନ ପରେ ନୂଆ ଜୀବନ ପାଇଛନ୍ତି ୨୫ ବର୍ଷୀୟ ଯୁବକ ସୀତାକାନ୍ତ । ୧୦ ଦିନ ପୂର୍ବରୁ ହୋଇଥିଲା ଅପରେସନ । ବର୍ତ୍ତମାନ ସୀତାକାନ୍ତ ସମ୍ପୂର୍ଣ୍ଣ ସୁସ୍ଥ ଅଛନ୍ତି । ବାମ ଗୋଡ଼ର ଦ୍ବିତୀୟ ଆଙ୍ଗୁଠିର ରକ୍ତ ନଳୀ, ସ୍ନାୟୁ, ହାଡ଼କୁ ଅଲଗା କରାଯାଇ ହାତ ବୁଢା ଆଙ୍ଗୁଠିରେ ଯୋଡ଼ା ଯାଇଛି । ୮ ଜଣ ଦକ୍ଷ ଡାକ୍ତରର ଏହି ବିରଳ ଅପରେସନରେ ସାମିଲ ହୋଇଥିଲେ ।
ଜମ୍ମୁର ନରଓ୍ବାଲରେ ବିସ୍ଫୋରଣ, ୬ ଆହତ
ଶ୍ରୀନଗର: ଜମ୍ମୁର ନରଓ୍ବାଲ ଅଞ୍ଚଳରେ ଦୁଇଟି ବିସ୍ଫୋରଣ । ବିସ୍ଫୋରଣରେ ୬ ଜଣ ଆହତ ହୋଇଥିବା ସୂଚନା। ଏନେଇ ସୂଚନା ଦେଇଛନ୍ତି ଜମ୍ମୁ ଜୋନ ଏଡିଜି ମୁକେଶ ସିଂ । ଗ୍ରେଟର କାଶ୍ମୀରରେ ହୋଇଛି ବିସ୍ଫୋରଣ ।
ଘଟଣାସ୍ଥଳରେ ପୋଲିସ ମୁତୟନ ହୋଇଛନ୍ତି । ତେବେ ବିସ୍ଫୋରଣର କାରଣ ନେଇ ଛାନଭିନ ଜାରି ରହିଛି। ନରଓ୍ବାଲ ଅନ୍ତର୍ଗତ ଟ୍ରାନ୍ସପୋର୍ଟ ନଗରର ୟାର୍ଡ ନମ୍ବର ୭ରେ ହୋଇଛି ବିସ୍ଫୋରଣ। ଆହତମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି।
ହକି ବିଶ୍ୱକପରେ ଟିମ୍ ଇଣ୍ଡିଆକୁ ଝଟକା, ବିଶ୍ୱକପରୁ ବାଦ୍ ପଡ଼ିଲେ ହାର୍ଦ୍ଦିକ ସିଂ
ଭୁବନେଶ୍ୱର: ହକି ବିଶ୍ୱକପରେ ଟିମ୍ ଇଣ୍ଡିଆକୁ ଲଗିଛି ବଡ଼ ଝଟକା । ରବିବାର ଟିମ୍ ଇଣ୍ଡିଆ ନ୍ୟୁଜିଲାଣ୍ଡ ବିପକ୍ଷରେ ଖେଳିବ କ୍ରସ୍ ଓଭର ମ୍ୟାଚ୍ । ତେବେ ଏହି ମ୍ୟାଚ୍ ପୂର୍ବରୁ ଭାରତକୁ ଲାଗିଛି ଶକ୍ତ ଝଟକା । ଆହତ କାରଣରୁ ଭାରତୀୟ ଦଳରୁ ବାଦ୍ ପଡ଼ିଛନ୍ତି ଷ୍ଟାର ମିଡ୍ ଫିଲ୍ଡର ହାର୍ଦ୍ଦିକ ସିଂ । ରାଉରକେଲାର ବିର୍ସା ମୁଣ୍ଡା ଷ୍ଟାଡିୟମରେ ଖେଳାଯାଇଥିବା ଇଂଲଣ୍ଡ ବିପକ୍ଷ ମ୍ୟାଚରେ ଆହତ ହୋଇଥିଲେ ହାର୍ଦ୍ଦିକ । ଏହା ପରେ ସେ କଳିଙ୍ଗ ଷ୍ଟାଡିୟମରେ ଖେଳାଯାଇଥିବା ଓ୍ୱେଲ୍ସ ବିପକ୍ଷ ମ୍ୟାଚରେ ଖେଳିନଥିଲେ ।
ଅନ୍ୟପକ୍ଷରେ ଆହତ କାରଣରୁ ହାର୍ଦ୍ଦିକ ବାଦ୍ ପଡ଼ିବା ପରେ ତାଙ୍କ ସ୍ଥାନରେ ଦଳରେ ସାମିଲ ହୋଇଛନ୍ତି ରାଜ୍ କୁମାର ପାଲ୍ । ଟିମ୍ ଇଣ୍ଡିଆର ମୁଖ୍ୟ କୋଚ୍ ଗ୍ରାହମ୍ ରିଡ୍ କହିଛନ୍ତି କି ରବିବାର ନ୍ୟୁଜିଲାଣ୍ଡ ବିପକ୍ଷରେ କ୍ରସ୍ ଓଭର ମ୍ୟାଚରେ ହାର୍ଦ୍ଦିକ ସିଂ ଖେଳିବେ ନାହିଁ । ସେ ଚଳିତ ହକି ବିଶ୍ୱକପରୁ ବାଦ୍ ପଡ଼ିଛନ୍ତି । ସେ ଆହୁରି କହିଛନ୍ତି କି ହାର୍ଦ୍ଦିକଙ୍କ ଆଗାତ ସେତେ ଗୁରୁତର ନୁହେଁ । କିନ୍ତୁ ଆମ ପାଖରେ ସମୟ ନାହିଁ । ତେଣୁ ସବୁ ପ୍ରକାର ପ୍ରକ୍ରିୟା ଶେଷ କରିବା ପରେ ହାର୍ଦ୍ଦିକଙ୍କୁ ବାଦ୍ ଦିଆଯିବା ନେଇ ନିଷ୍ପତ୍ତି ହୋଇଛି ବୋଲି ଗ୍ରାହମ୍ ରିଡ୍ କହିଛନ୍ତି ।