ଭୁବନେଶ୍ୱର: ଓଡ଼ିଶାବାସୀଙ୍କୁ ଠକିବାରେ ବିଜେପିର ଲମ୍ବା ଇତିହାସ ରହିଛି । କୃଷକଙ୍କଠାରୁ ଆରମ୍ଭ କରି ଯୁବକ, ରେଳପଥ ଠାରୁ ଜାତୀୟ ରାଜପଥ, ଧାନ କ୍ରୟ ଠାରୁ ଗ୍ରାମୀଣ ଗୃହ ନିର୍ମାଣ, ଟେଲିକମ୍ ସଂଯୋଗ ସମସ୍ୟା ଠାରୁ ବ୍ୟାଙ୍କିଂ ନେଟୱାର୍କ ପର୍ପ୍ୟନ୍ତ ବିଜେପି ମିଛ ପ୍ରତିଶ୍ରୁତି ଦେବା ଏବଂ ଓଡ଼ିଶାର ଲୋକଙ୍କୁ ପ୍ରତାରଣା କରୁଛି ବୋଲି ଆଜି ଏଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ବିଜେଡି ପ୍ରବକ୍ତା ତଥା ସାଂସଦ ଡକ୍ଟର ସସ୍ମିତ ପାତ୍ର । ସାମ୍ବାଦିକ ସମ୍ମିଳନୀରେ ବିଜେପି କିଭଳି ଓଡ଼ିଶାବାସୀ ଓ ପଦମପୁରର ଲୋକଙ୍କୁ ଠକିଛି ତାହାର ଗୋଟି ଗୋଟି କରି ହିସାବ ରଖିଛନ୍ତି ।
ପଦମପୁର ରେଳ ଲାଇନ ବିଷୟରେ ସସ୍ମିତ ପାତ୍ର କହିଛନ୍ତି ଯେ ୨୦୧୮ରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟୁଇଟ୍ କରି କହିଥିଲେ ଯେ ପଦମପୁର ରେଳ ଲାଇନକୁ ମଞ୍ଜୁର କରାଯାଇଛି । ଚାରି ବର୍ଷ ବିତିଗଲାଣି କିନ୍ତୁ ଗୋଟିଏ ବି ଇଟା ପଡ଼ିପାରିଲା ନାହିଁ । କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ଆଜି ଆମକୁ ଜମି ଦିଅ, ଆସନ୍ତାକାଲି ଆମେ ପ୍ରକଳ୍ପ ଆରମ୍ଭ କରିବୁ । କିନ୍ତୁ ୨୦୧୯ରେ ତାଙ୍କ ମନ୍ତ୍ରଣାଳୟ ଚିଠିରେ କହିଛି ଯେ ଏହି ପ୍ରକଳ୍ପ କାର୍ଯ୍ୟକ୍ଷମ ଉପଯୋଗୀ ନୁହେଁ ଏବଂ ଏହାକୁ ସଂରକ୍ଷଣ କରାଯିବା ଉଚିତ୍ । ବିଜେପି କାହାକୁ ଠକିବାକୁ ଚେଷ୍ଟା କରୁଛି ? ପଦମପୁରବାସୀ ନା ଓଡ଼ିଶାର ଲୋକମାନଙ୍କୁ ବୋଲି ସସ୍ମିତ ପାତ୍ର ପ୍ରଶ୍ନ କରିଛନ୍ତି ।
ସେହିଭଳି ବିଜେପି ସବୁବେଳେ ଓଡ଼ିଶାର ଚାଷୀଙ୍କୁ ଅବହେଳା କରିଆସୁଛି । କେନ୍ଦ୍ର ଚାଷୀଙ୍କ ଫସଲ ବୀମାକୁ ଅଟକାଇ ରଖିଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ନିୟମିତ ଅନୁଧ୍ୟାନ ଏବଂ ଚାଷୀଙ୍କ କ୍ରୋଧର ସମ୍ମୁଖୀନ ହୋଇ କେନ୍ଦ୍ରକୁ ବୀମା କମ୍ପାନୀମାନଙ୍କୁ ଚାଷୀଙ୍କ ବାକିଆ ଅର୍ଥ ଦେବାପାଇଁ କହିବାକୁ ପଡ଼ିଲା । ଏହା ପ୍ରମାଣିତ କଲା ଯେ କେନ୍ଦ୍ର ହିଁ ଫସଲ ବୀମା ଦେୟକୁ ଅଟକାଇ ରଖିଥିଲା ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶାର ଚାଷୀଙ୍କୁ ୨୦୦ କୋଟି ଟଙ୍କାର ଇନପୁଟ୍ ସବସିଡି ଯୋଗାଇ ସାହାଯ୍ୟ କରିବାକୁ ଚାହୁଁଥିଲେ । ହେଲେ ବିଜେପି ନେତୃତ୍ୱାଧୀନ କେନ୍ଦ୍ର ସରକାର ପଦମପୁରରେ ଆଦର୍ଶ ଆଚରଣବିଧି ଲାଗିଥିବାର ବାହାନା କରିବା ସହିତ ଚୁପଚାପ୍ ନିର୍ବାଚନ କମିଶନଙ୍କୁ କହି ତାହାକୁ ବନ୍ଦ କରିଦେଲେ ।
ଓଡ଼ିଶା ବିଧାନସଭାରେ ସର୍ବସମ୍ମତି କ୍ରମେ ଧାନର ସର୍ବନିମ୍ନ ସହାୟକ ମୂଲ୍ୟ କୁଇଣ୍ଟାଲ ପିଛା ୨୯୩୦ କରିବାକୁ ପ୍ରସ୍ତାବ ପାରିତ ହୋଇଥିଲା । ଅନ୍ୟ ବିଧାୟକଙ୍କ ସହ ବିଜେପି ବିଧାୟକମାନେ ବି ଏଥିରେ ସହମତ ହୋଇଥିଲେ । କିନ୍ତୁ ଏବେ ବିଜେପି ଚାଷୀଙ୍କୁ ସହାୟତା କରିବା ବଦଳରେ ଏଥିରୁ ମୁହଁ ଫେରାଇ ନେଉଛି ।
କେନ୍ଦ୍ର ଅତିରିକ୍ତ ଉଷୁନା ଚାଉଳ ଉଠାଣ ବନ୍ଦ କରିଦେଲା ଯାହା ପଦମପୁର ସମେତ ଓଡ଼ିଶାର ଲକ୍ଷ ଲକ୍ଷ ଚାଷୀଙ୍କ ପାଇଁ ଅକଥନୀୟ ଯନ୍ତ୍ରଣା ଓ ଦୁଃଖ ଆଣି ଦେଇଛି । କୃଷକଙ୍କ ଆୟ ଦ୍ୱିଗୁଣିତ ହେବା ନେଇ ବିଜେପି କହିଥିଲା । ଏହା କେବେ ହେବ ତାହା ଅନ୍ୟ ଏକ ଜୁମଲା । ବିଜେପି କହିଛି ଯେ ଏମଏସପିକୁ ଉତ୍ପାଦନ ମୂଲ୍ୟର ୧.୫ ଗୁଣ କରାଯିବ । ସ୍ୱାମୀନାଥନ୍ କମିଶନ ରିପୋର୍ଟ ସୁପାରିଶ ଅନୁଯାୟୀ ଉତ୍ପାଦନ ମୂଲ୍ୟର ୧.୫ ଗୁଣ କେବେ ବୃଦ୍ଧି କରିବ? ସ୍ୱାମୀନାଥନ୍ କମିଶନ ରିପୋର୍ଟ କେବେ କାର୍ଯ୍ୟକାରୀ ହେବ?
କେନ୍ଦୁପତ୍ର ତୋଳାଳିଙ୍କ ପ୍ରତି ବିଜେପିର ଅବହେଳା ବିଷୟରେ ସସ୍ମିତ ପାତ୍ର କହିଛନ୍ତି ଏହା ଐତିହାସିକ । ଏଥିରୁ ଜଣାପଡ଼ୁଛି ଯେ ବିଜେପି ଅନୁଭବ କରୁଛି କେନ୍ଦୁପତ୍ର ତୋଳାଳିମାନେ ହୀରା ବ୍ୟବସାୟୀଙ୍କ ଅପେକ୍ଷା ଅଧିକ ଧନୀ ଅଟନ୍ତି । ନହେଲେ ବିଜେପି ନେତୃତ୍ୱାଧୀନ କେନ୍ଦ୍ର ସରକାର କେନ୍ଦୁପତ୍ର ଉପରେ ୧୮% ଜିଏସଟି ଆଦାୟ କରୁଥିବାବେଳେ ହୀରା ଉପରୁ ୧.୫% ଆଦାୟ ହେଉଛି । ଏହା ଅତ୍ୟକ୍ତ ଆଶ୍ଚର୍ଯ୍ୟଜନକ ।
ତିନି ବର୍ଷ ଧରି ଓଡ଼ିଶା ଗରିବ ଲୋକଙ୍କ ପାଇଁ ଗ୍ରାମୀଣ ଘର ଦାବି କରିଆସୁଛି । କିନ୍ତୁ କେନ୍ଦ୍ର ଏହାକୁ ଅଟକାଇ ରଖିଛି । ଏହି ଘରଗୁଡ଼ିକ ମୁଖ୍ୟତଃ ଓଡ଼ିଶାର ପଶ୍ଚିମ ଏବଂ ଦକ୍ଷିଣ ଓଡ଼ିଶାର ଅଧିକାଂଶ ଆଦିବାସୀ ଅଞ୍ଚଳରେ । ରେଳବାଇରେ ବିଜେପି ଓଡ଼ିଶାକୁ ପ୍ରତାରଣା କରିଛି ଯେଉଁଠାରେ ସେମାନେ ପାଞ୍ଚ ବର୍ଷ ମଧ୍ୟରେ ଓଡ଼ିଶାରୁ ୧ ଲକ୍ଷ କୋଟି ଟଙ୍କା ନେଇଥିଲେ, କିନ୍ତୁ ୨୫% ରୁ କମ୍ ଦେଇଥିଲେ । ଆଜି ବି ଲୋକଙ୍କୁ ଟେଲିକମ୍ ନେଟୱାର୍କ ପାଇବା ପାଇଁ ପାହାଡ଼ ଏବଂ ଗଛ ଉପରକୁ ଚଢ଼ିବାକୁ ପଡ଼ୁଛି । ସମ୍ବଲପୁରରୁ କଟକ ରାଜପଥ ଜାତୀୟ ରାଜପଥ ଅବହେଳାର ଅନ୍ୟ ଏକ ଜୀବନ୍ତ ଉଦାହରଣ । ସମଗ୍ର ଦେଶରେ ଓଡ଼ିଶାର ସର୍ବନିମ୍ନ ବ୍ୟାଙ୍କିଂ ଉପସ୍ଥିତି ରହିଛି । ରାଜ୍ୟର ପ୍ରତ୍ୟେକ ପଞ୍ଚାୟତରେ ବ୍ୟାଙ୍କିଂ ସୁବିଧା ନାହିଁ । ବିଜେଡି କହିଛି ଯେ ଓଡ଼ିଶାର ଲୋକଙ୍କୁ ବିଜେପି କରୁଥିବା ପ୍ରତାରଣାର ଆହୁରି ଅନେକ ଉଦାହରଣ ସେମାନେ ପେଶ୍ କରିବେ । ବିଜେଡି ଜୋର ଦେଇ କହିଛି ଯେ ୫ ଡିସେମ୍ବର, ୨୦୨୨ରେ ପଦମପୁରବାସୀ ବିଜେପି ଦ୍ୱାରା ଓଡ଼ିଶାବାସୀଙ୍କୁ ଦିଆଯାଉଥିବା ଏଭଳି ମିଥ୍ୟା ପ୍ରତିଶ୍ରୁତିର ଉଚିତ୍ ଜବାବ ଦେବେ ।
