ନୂଆଦିଲ୍ଲୀ: ଟ୍ୱିଟର କିଣିବା ପରେ କେତେ ଖୁସି ଏଲନ ମସ୍କ। ହେଲେ ତାଙ୍କର ସାକ୍ଷାତକାରରୁ ଲାଗୁଛି ମାଇକ୍ରୋବ୍ଲଗଗିଂ ସାଇଟ୍‌ ଟ୍ଵିଟର କିଣିବା ପରେ ପଶ୍ଚାତାପ କରୁଛନ୍ତି ବିଶ୍ଵର ସବୁଠୁ ଧନୀ ବ୍ୟକ୍ତି ଏଲନ ମସ୍କ ।

ରିପୋର୍ଟ ଅନୁଯାୟୀ, ଏହି ସୋସିଆଲ୍ ମିଡିଆ ସାଇଟକୁ  ଅଧିଗ୍ରହଣ ପରେ ପରିଚାଳନା କରିବା ମସ୍କଙ୍କ ପାଇଁ ବେଶ କଷ୍ଟକର ହୋଇପଡିଲାଣି। କାରଣ ଏକ ଗଣମାଧ୍ୟମରେ ଦେଇଥିବା ସାକ୍ଷାତକାରରେ ସେ କହିଛନ୍ତି, ଟ୍ୱିଟର କିଣିବା କୌଣସି ପାର୍ଟି ଭଳି କିମ୍ବା ଖୁସି କଲା ଭଳି କଥା ନୁହେଁ। ଯଦିଓ ଟ୍ୱିଟର ବୋରିଂ ନୁହେଁ । କିନ୍ତୁ ଏହା ଏକ  ରୋଲକୋଷ୍ଟର ରାଇଡ ଭଳି । ବିଗତ କିଛି ମାସ ହେବ ଚିନ୍ତାରେ ରହୁଛି । ଉପଯୁକ୍ତ ଲୋକ ମିଳିଲେ ଟ୍ଵିଟରକୁ ବିକ୍ରି କରିଦେବି ।

ମୁଁ ଟ୍ୱିଟର କିଣିବାକୁ ଚାହୁଁନଥିଲି ବରଂ ଏହାର ସେୟାର କିଣିବାକୁ ଚାହୁଁଥିଲି । କିନ୍ତୁ ପରେ ଟ୍ୱିଟର କିଣିବାକୁ ବାଧ୍ୟ ହେଲି । ଗୋଟେ ସମୟ ଥିଲା ଟ୍ୱିଟର କିଣିବାକୁ ପଛଘୁଞ୍ଚା ଦେଇଥିଲି  ହେଲେ ଟ୍ୱିଟର ପକ୍ଷରୁ ମୋତେ କାଠଗଡ଼ାରେ ଠିଆ କରାଇବା ନେଇ ଧମକ ଦିଆଯାଇଥିଲା । ପରବର୍ତ୍ତୀ ସମୟରେ ବାଧ୍ୟ ହୋଇ ଡିଲ୍ ପୂରା କରିବାକୁ ପଡିଲା ବୋଲି କହିଛନ୍ତି ମସ୍କ।

ଟ୍ୱିଟର କିଣିବା ପରେ ଅନେକ ପରିବର୍ତ୍ତନ କରାଯାଇଥିଲା । ଫଳରେ ମାନସିକ ଚାପ ବଢ଼ି ଯାଇଥିଲା। ଏମିତିକି ଅନେକ ରାତି ଠିକ୍ ସେ ଶୋଇନଥିଲେ । କାମର ଚାପ ଏତେ ଥିଲା ଯେ ବେଳେବେଳେ ଅଫିସ୍‌ରେ ଶୋଇପଡୁଥିଲେ ମସ୍କ। ଟ୍ଵିଟରରେ ଚାଲିଥିବା ଛଟେଇ ପ୍ରକ୍ରିୟାକୁ ସେ ସବୁଠାରୁ କଷ୍ଟକର ସମୟ ବୋଲି ମସ୍କ କହିଛନ୍ତି। ତାଙ୍କ ମତରେ ଟ୍ବିଟରରୁ ୮୦ ପ୍ରତିଶତ କର୍ମଚାରୀଙ୍କୁ ବିଦା କରିବା ଏକ ସହଜ ପ୍ରକ୍ରିୟା ନୁହେଁ। ବର୍ତମାନ କମ୍ପାନୀର କର୍ମଚାରୀ ସଂଖ୍ୟା ୮୦୦୦ରୁ ୧୫୦୦କୁ ହ୍ରାସ କରାଯାଇଛି ।

ବିଦା କରାଯାଇଥିବା କର୍ମଚାରୀଙ୍କ ସହ ବ୍ୟକ୍ତିଗତ ଭାବେ ଆଲୋଚନା କରିବା ସମ୍ଭବନଥିଲା । ଫଳରେ ସେମାନଙ୍କୁଇ-ମେଲ୍ ଜରିଆରେ ଛଟେଇ ନେଇ ଅବଗତ କରାଯାଇଥିଲା। ଏତେ ସଂଖ୍ୟାରେ କର୍ମଚାରୀଙ୍କ ସହ ମୁହାଁମୁହିଁ ଆଲୋଚନା କରିବା ସହଜ ନଥିଲା ବୋଲି କହିଛନ୍ତି ମସ୍କ ।

ତେବେ ଗତବର୍ଷ ଅକ୍ଟୋବର ମାସରେ ଟ୍ଵିଟରକୁ ୪୪ ବିଲିୟନ ଡଲାର ଦେଇ କିଣିଥିଲେ ମସ୍କ । ସେବେଠାରୁ ଟ୍ୱିଟରରେ ବହୁ ପରିବର୍ତ୍ତନ ହୋଇଛି । କମ୍ପାନୀର ବହୁ ସଂଖ୍ୟକ କର୍ମଚାରୀଙ୍କୁ ବିଦା କରାଯିବା ସହିତ ଟ୍ୱିଟରର ନୀତି ଏବଂ ବ୍ୟବସାୟରେ ପରିବର୍ତ୍ତନ ଜାରି ରହିଛି । ନିକଟରେ ଟ୍ୱିଟରର ଲୋଗୋ ନୀଳ ପକ୍ଷୀକୁ ବଦଳାଇ ଡଗି ଲୋଗୋ ରଖାଯାଇଥିଲା।