ଭୁବନେଶ୍ୱର : ଦିନେ କି ଦୁଇ ଦିନ ଭିତରେ ଓଡ଼ିଶା ଛୁଇଁବ ମୌସୁମୀ । ମୌସୁମୀ ପାଇଁ ପାଗ ଅନୁକୂଳ ରହିଛି ବୋଲି ପାଣିପାଗ ବିଭାଗ ସୂଚନା ଦେଇଛି । ଅନେକ ଅଞ୍ଚଳରେ ପ୍ରାକ ମୌସୁମୀ ବର୍ଷା ହୋଇଛି , ଏହା ସହ ମେଘୁଆ ପାଗ ବି ରହୁଛି ।
ଗତ ଦୁଇ ତିନି ଦିନ ଭିତରେ କିଛି ଜିଲ୍ଲାରେ ବର୍ଷାର ମାତ୍ରା ବୃଦ୍ଧି ପାଇଛି । ବର୍ତ୍ତମାନ ବାୟୁର ଯେଉଁ ଚଳାଚଳ ରହିବା କଥା ମୌସୁମୀ ଆଗମାନ ପାଇଁ, ତାହା ବାୟୁମଣ୍ଡଳର ନିମ୍ନ ଭାଗରେ ଦୃଶ୍ୟମାନ ହେଉଛି । ବିଶେଷ କରି ଦକ୍ଷିଣପଶ୍ଚିମ ଦିଗରୁ ବାୟୁ ପ୍ରଭାହିତ ହେଉଛି । ଆଗାମୀ ଦୁଇ ଦିନରେ ଏହାର ପରିମାଣ ବଢିବାର ଆକଳନ କରାଯାଉଛି । ଯାହା ମୌସୁମୀ ଆଗମାନ ପାଇଁ ଅନୁକୂଳ ବୋଲି ସୂଚନା ରହିଛି ।
ଦକ୍ଷିଣ ଓଡ଼ିଶାର କୋରାପୁଟ, ନବରଙ୍ଗପୁର, ଗଞ୍ଜାମ, ଗଜପତି ଜିଲ୍ଲାରେ ବର୍ଷାର ମାତ୍ରା ଅଧିକ ରହିବ । ଗତକାଲି ମଧ୍ୟ କୋରାପୁଟ ଓ ନବରଙ୍ଗପୁରର କିଛି ଅଂଚଳରେ ପ୍ରବଳ ବର୍ଷା ରେକର୍ଡ କରାଯାଇଛି । ଭୁବନେଶ୍ୱରରେ ଆଜି ସକାଳ ୮.୩୦ ସୁଦ୍ଧା ୮୩ ପ୍ରତିଶତ ଆଦ୍ରତା ରହିଥିଲା । ଏହା ସହିତ ହିଟୱେଭ ସ୍ଥିତି ନଥିବା ବେଳେ, ଜୁନ ୨୨ରୁ ହାଲୁକା ମଧ୍ୟମ ଧରଣର ବର୍ଷା ରହିବ । ୨୨ ପରେ ୨୩ ଓ ୨୪ରେ କିଛି ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି ।
ପଶ୍ଚିମ ଓଡ଼ିଶାରେ ୪୦ ଡିଗ୍ରୀ ତାପମାତ୍ରା ରହିବ । ହେଲେ ହିଟୱେଭ ରହିବନି । ଚଳିତ ବର୍ଷ ଜୁନରେ ନିଅଣ୍ଟିଆ ବର୍ଷା ହିଟୱେଭ ଆକଳନ ହୋଇଥିଲା । ତେଣୁ ବର୍ଷା ପରିମାଣ କମ ଅଛି ଜୁନରେ । ଯେହେତୁ କେରଳକୁ ବିଳମ୍ବରେ ଛୁଇଁଲା ମୌସୁମୀ, ତେଣୁ ଓଡ଼ିଶାରେ ବି ବିଳମ୍ବ ହୋଇଛି । ତେଣୁ ବର୍ଷାର ପ୍ରଭାବ କମିବ । ଜୁନରେ ୨୦୦ମିଳିମିଟର ବର୍ଷା ରେକର୍ଡ ହେବା କଥା । ହେଲେ ଜୁନ ୧୯ ସୁଦ୍ଧା ୮୦ % କମ୍ ବର୍ଷା ରହିଛି । ଆଗକୁ ବର୍ଷା ହେଲେ, ଏହାର ପରିମାଣ ଯଥେଷ୍ଟ ବଢିବାର ଅନୁମାନ କରାଯାଉଛି ।
