ଭୁବନେଶ୍ବର: କଳାହାଣ୍ଡି ଜିଲ୍ଲା ଉତ୍କେଲା ବିମାନବନ୍ଦରରୁ ଭୁବନେଶ୍ବର ମଧ୍ୟରେ ବିମାନ ଚଳାଚଳ ପାଇଁ ମଙ୍ଗଳବାର ଜି ଟ୍ରାଏଲ ରନ୍ ସଫଳ ହୋଇଛି । ଆସନ୍ତା ଅଗଷ୍ଟ ୩୧ ତାରିଖରୁ କଳାହାଣ୍ଡି ଜିଲ୍ଲା ଉତ୍କେଲା ବିମାନବନ୍ଦରରୁ ଉଡ଼ିବ ବିମାନ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଶୁଭାରମ୍ଭ କରିବେ । ବିମାନ ଚଳାଚଳ ପାଇଁ ଅଗଷ୍ଟ ୭ ତାରିଖରେ ଉତ୍କେଲା ବିମାନବନ୍ଦରକୁ DGCA ଲାଇସେନ୍ସ ଦେଇଥିଲା । ଭୁବନେଶ୍ବର ଓ ଉତ୍କେଲା ବିମାନବନ୍ଦର ମଧ୍ୟରେ ୯ଟି ସିଟ୍ ଥିବା ବିମାନ ଚଳାଚଳ କରିବ । ଏହାକୁ ଚଳାଇବ ଇଣ୍ଡିଆ ୱାନ୍। ଟିକେଟର ଦାମ୍ ୯୯୯ ଟଙ୍କା ରହିଛି । ସକାଳ ୭ଟା ୧୫ରେ ବିମାନ ଭୁବନେଶ୍ୱର ଛାଡ଼ି ୮ଟା ୨୫ରେ ଉତ୍କେଲାରେ ପହଞ୍ଚିବ । ଉତ୍କେଲାରୁ ସକାଳ ୮ଟା ୫୦ରେ ବାହାରି ୧୦ଟାରେ ଭୁବନେଶ୍ୱର ପହଞ୍ଚିବ । ଏହା ରାଜ୍ୟର ପଞ୍ଚମ ବିମାନବନ୍ଦର । ଯାହା ସପ୍ତାହର ୭ ଦିନ ଯାକ ବିମାନ ସେବା ଦେବ । ତେବେ ଯାତ୍ରୀଙ୍କ ବୁକିଂ ଉପରେ ସବୁ ନିର୍ଭର କରୁଛି । ନୂଆ ATCର ପାରାଲାଲ ଅପରେସନ ଆରମ୍ଭ ହୋଇଛି ।
କୋଟା ଛାତ୍ରଙ୍କୁ ସୁପର-୩୦ ଫାଉଣ୍ଡର ଆନନ୍ଦ କୁମାରଙ୍କ ସ୍ପେଶାଲ ମେସେଜ
ନନ୍ଦିଘୋଷ ବ୍ୟୁରୋ: କୋଟା ଛାତ୍ରଙ୍କୁ ସୁପର-୩୦ ଫାଉଣ୍ଡର ଆନନ୍ଦ କୁମାରଙ୍କ ସ୍ପେଶାଲ ମେସେଜ । କୌଣସି ଗୋଟିଏ ପରୀକ୍ଷାରେ ବିଫଳତା ମିଳିବା ଜଣେ ଛାତ୍ରର ପ୍ରତିଭାକୁ ପ୍ରମାଣିତ କରେନାହିଁ । ଜୀବନରେ ସଫଳ ହେବା ପାଇଁ ଗୋଟିଏ ନୁହେଁ ଅନେକ ରାସ୍ତା ରହିଥାଏ । ମାଆ-ବାପା ବି ପିଲାଙ୍କ ଜରିଆରେ ନିଜର ଅଧୁରା ସ୍ବପ୍ନ ପୂରଣ କରିବାକୁ ଚାହାଁନ୍ତି । ରବିବାର ଆଉ ଦୁଇ NEET ଆଶାୟୀଙ୍କ ଆତ୍ମହତ୍ୟା ପରେ ଛାତ୍ରଛାତ୍ରୀଙ୍କ ପାଇଁ ସ୍ବତନ୍ତ୍ର ବାର୍ତ୍ତା ରଖିଛନ୍ତି ସୁପର-୩୦ର ଫାଉଣ୍ଡର । ସେ ଏ ନେଇ ଟୁଇଟରରେ ଏକ ପୋଷ୍ଟ କରିଛନ୍ତି । କୋଚିଂ ସେଣ୍ଟରଗୁଡ଼ିକ ସବୁ ପିଲାଙ୍କ ପ୍ରତି ସ୍ବତନ୍ତ୍ର ଧ୍ୟାନ ଦେବା ଆବଶ୍ୟକ । ଶିକ୍ଷାକୁ କେବଳ ରୋଜଗାରର ମାଧ୍ୟମ ନକରି ବିଦ୍ୟାର୍ଥୀଙ୍କ ଉପରେ ସ୍ବତନ୍ତ୍ର ଦୃଷ୍ଟି ଦେବାକୁ ଅପିଲ କରିଛନ୍ତି ଆନନ୍ଦ କୁମାର ।
ଛାତ୍ର ଛାତ୍ରୀଙ୍କୁ ସହ ମନଖୋଲା ଆଲୋଚନା କଲେ 5T ସଚିବ
ଯାଜପୁର: ଯାଜପୁର ଗସ୍ତରେ 5T ସଚିବ ଭି.କେ ପାଣ୍ଡିଆନ୍ । ଯାଜପୁରରେ ଛାତ୍ରଛାତ୍ରୀଙ୍କ ସହ ମନଖୋଲା ଆଲୋଚନା କରିଛନ୍ତି 5T ସଚିବ । ଭଲ ପାଠ ପଢ଼ି ଭବିଷ୍ୟତର ସ୍ବପ୍ନ ପୂରଣ କରିବାକୁ ଆହ୍ବାନ ଦେବା ସହ କଲେଜ ରୂପାନ୍ତର କାମରେ ଶ୍ରମଦାନ କରିବାକୁ କହିଛନ୍ତି । ଶ୍ରମଦାନର ଫଟୋ ଇନଷ୍ଟାଗ୍ରାମରେ ପୋଷ୍ଟ କରିବାକୁ ସେ ଆହ୍ବାନ ଦେଇଛନ୍ତି । ଯାଜପୁରର ସମସ୍ତ +୨ ଓ +୩ କଲେଜକୁ 5Tରେ ସାମିଲ କରାଯାଇଛି । ସ୍ମାର୍ଟ କ୍ଲାସରୁମ ସହ ଇ-ଲାଇବ୍ରେରୀ ମିଳିବ । ସେହିପରି ବମ୍ବେ, କୋଲକାତା ଓ ଦିଲ୍ଲୀରେ ଯେଉଁ ସୁବିଧା ମିଳୁଛି, ଯାଜପୁର ଜିଲ୍ଲାର ପିଲାମାନେ ବି ସବୁ ପ୍ରକାର ସୁବିଧା ପାଇବେ ବୋଲି କହିଛନ୍ତି 5T ସଚିବ । ଛାତ୍ରଛାତ୍ରୀମାନେ ଯେପରି ଭଲ ପାଠ ପଢ଼ିବେ, ସେଥିପାଇଁ ମୁଖ୍ୟମନ୍ତ୍ରୀ ଏସବୁ ବ୍ୟବସ୍ଥା କରିଛନ୍ତି । କଲେଜରେ ଏବେକାର ସ୍ଥିତି ଏବଂ ରୂପାନ୍ତର କାମ ପରେ ନୂଆ ଚିତ୍ର ଇନଷ୍ଟାଗ୍ରାମରେ ପୋଷ୍ଟ କରିବାକୁ କହିଛନ୍ତି 5T ସଚିବ । ସେହିପରି ବ୍ୟାୟାମ କରିବା ସହ ନିଶା ଠାରୁ ଦୂରେଇ ରହିବାକୁ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଛନ୍ତି 5T ସଚିବ ।
ଖାଉଟିଙ୍କୁ ଆଶ୍ବସ୍ତି, ୨ଶହ ଟଙ୍କା କମିବ ଗ୍ୟାସ୍ ଦର!
ନନ୍ଦିଘୋଷ ବ୍ୟୁରୋ: ଖାଉଟିଙ୍କୁ ବଡ଼ ଆଶ୍ବସ୍ତି । ୨ଶହ ଟଙ୍କା ଶସ୍ତା ହେଲା ଘରୋଇ ଏଲପିଜି ଗ୍ୟାସ ଦର । ଉଜ୍ଜଳା ଯେଜାନାରେ ଅନ୍ତର୍ଭୂକ୍ତ ଘରୋଇ ଗ୍ୟାସ ଦର ୨ଶହ ହ୍ରାସ କରିଛନ୍ତି କେନ୍ଦ୍ର ସରକାର । ତେବେ ଘରୋଇ ଗ୍ୟାସ ସିଲିଣ୍ଡରରେ କୌଣସି ପରିବର୍ତ୍ତନ ହୋଇନାହିଁ । ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ୍ ବୈଠକରେ ଏହି ଘୋଷଣା କରାଯାଇଛି । ଉଜ୍ଜଳା ଯୋଜନାରେ ସରକାର ୨ଶହ ଟଙ୍କାର ସବସିଡି ଘୋଷଣା କରିଛନ୍ତି । ୧୪ କିଲୋ ୨ଶହ ଗ୍ରାମ ସିଲିଣ୍ଡର ଉପରେ ଏହି ସବିସିଡି ଲାଗୁହେବ । ପୂର୍ବରୁ ଉଜ୍ଜଳା ଯୋଜନାରେ ଅନ୍ତର୍ଭୁକ୍ତ ହିତାଧିକାରୀମାନେ ୨ଶହ ଟଙ୍କାର ସବସିଡି ପାଉଥିଲେ । ଏବେ ଅତିରିକ୍ତ ୨ଶହ ଟଙ୍କାର ସବସିଡି ପାଇବେ । ୨୦୧୬ରୁ ଉଜ୍ଜଳା ଯୋଜନା କେନ୍ଦ୍ର ସରକାରଙ୍କ ଦ୍ବାରା ଆରମ୍ଭ ହୋଇଥିବାବେଳେ ମାର୍ଚ୍ଚ ୨୦୨୩ ସୁଦ୍ଧା ୯ କୋଟିରୁ ଅଧିକ ଉପଭୋକ୍ତା ସାମିଲ ହୋଇଛନ୍ତି ।
ଜେଲରୁ ମୁକୁଳିବେ ଇମ୍ରାନ ଖାନ୍
ଇସଲାମବାଦ: ପାକିସ୍ତାନର ପୂର୍ବ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ମିଳିଲା ବଡ଼ ଆଶ୍ବସ୍ତି । ଜେଲରୁ ମୁକୁଳିବା ପାଇଁ ବାଟ ଖୋଲିଛି । ତୋଷଖାନା ଦୁର୍ନୀତି ମାମଲାରେ ଇସଲାମାବାଦ ହାଇକୋର୍ଟ ଦଣ୍ଡାଦେଶ ଉପରେ ରୋକ୍ ଲଗାଇଛନ୍ତି । ଏହାଦ୍ବାରା ତାଙ୍କୁ ଜାମିନରେ ମୁକୁଳାଇବାକୁ ଆଦେଶ ମିଳିଛି । ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀଙ୍କୁ ଏହି ମାମଲାରେ ୩ବର୍ଷ ଜେଲ୍ ଦଣ୍ଡ ଶୁଣାଇଥିଲେ ନିମ୍ନ ଅଦାଲତ । ବୁଧବାର କୋର୍ଟରେ ହାଜର ହୋଇଥାନ୍ତେ ଇମ୍ରାନ । ତୋଷଖାନ ମାମଲାରେ ଇମ୍ରାନ ଖାନଙ୍କୁ ୩ ବର୍ଷ ଜେଲ ଦଣ୍ଡ ସହ ୫ ବର୍ଷ ନିର୍ବାଚନରେ ପ୍ରତିଦ୍ବନ୍ଦିତା କରିପାରିବେ ନାହିଁ ବୋଲି ନିର୍ଦ୍ଦେଶ ଦେଇଥିଲେ ।
ଦିଦିଙ୍କ ଭବିଷ୍ୟତବାଣୀ, ଆଗୁଆ ହେବ ନିର୍ବାଚନ, ବିଜେପି ବୁକିଂ କରିସାରିଛି ହେଲିକପ୍ଟର
ନୂଆଦିଲ୍ଲୀ: ଦେଶରେ ହେବ କି ଆଗୁଆ ନିର୍ବାଚନ? ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ବୟାନକୁ ନେଇ ଏବେଠୁ ଜୋର ଧରିଲାଣି ଚର୍ଚ୍ଚା। ଗତକାଲି ତୃଣମୂଳ ଯୁବ କଂଗ୍ରେସକୁ ଉଦବୋଧନ ଦେଇ ଡିସେମ୍ବର କିମ୍ବା ଜାନୁଆରୀରେ କେନ୍ଦ୍ର ନିର୍ବାଚନ କରାଇପାରେ ବୋଲି କହିଛନ୍ତି ମମତା ।
ଟିଏମସି ଯୁବ ସଂଗଠନର ସମାବେଶକୁ ସମ୍ବୋଧିତ କରିବାବେଳେ ମମତା ବାନାର୍ଜୀ କହିଛନ୍ତି ଯେ, ଯଦି ବିଜେପି କ୍ରମାଗତ ତୃତୀୟ ଥର ପାଇଁ ଦେଶର କ୍ଷମତାକୁ ଫେରିବ ତେବେ ଦେଶକୁ ଏକଛତ୍ରବାଦୀ ଶାସନର ସାମ୍ନା କରିବାକୁ ପଡିବ ।
ଏଥିପାଇଁ ବିଜେପି ଆଗୁଆ ହେଲିକପ୍ଟର ବୁକିଂ କରିସାରିଛି । ଅନ୍ୟମାନେ ଯେପରି ଠିକ୍ ଭାବେ ପ୍ରଚାର କରି ପାରିବେନି ତାକୁ ନଜରରେ ରଖି ବିଜେପି ଆଗୁଆ ହେଲିକପ୍ଟର ବୁକିଂ କରିଥିବା ମମତା କହିଛନ୍ତି। ମମତାଙ୍କ ଆକଳନକୁ ନେଇ ଏବଂ ଦେଶରେ ରାଜନୈତିକ ମାହୋଲ ଗରମ ହୋଇଛି ।
କିନ୍ତୁ ଏହି ଗରମ ମାହୋଲ ଉପରେ ପୂର୍ଣ୍ଣଚ୍ଛେଦ ପକାଇଛନ୍ତି ରାଜ୍ୟ ନିର୍ବାଚନ ଅଧିକାରୀ । ସେ ଏହି କଥାକୁ ଖଣ୍ଡନ କରିଛନ୍ତି। ନିର୍ବାଚନ ଦେଶର ସବୁଠାରୁ ବଡ଼ ପ୍ରକ୍ରିୟା। ସେଥିପାଇଁ ପ୍ରସ୍ତୁତି ଲମ୍ବା ସମୟ ଧରି ଚାଲୁଛି। ତେବେ ପ୍ରସ୍ତୁତି ସହ ଶୀଘ୍ର ନିର୍ବାଚନ ହେବାର କୌଣସି ଲିଙ୍କ ନାହିଁ ବୋଲି ସିଇଓ କହିଛନ୍ତି।
ଜୁଲାଇ ସୁଦ୍ଧା ରାଜ୍ୟ ସମସ୍ତ ଇଭିଏମ ପାଇସାରିଛି। ଅକ୍ଟୋବର ୧ରୁ ଇଭିଏମ ଚେକିଂ ଆରମ୍ଭ ହୋଇ ନଭେମ୍ବରରେ ଶେଷ ହେବ। ଆସନ୍ତା ୧୩ରେ ଓଡ଼ିଶା ଆସିବେ ନିର୍ବାଚନ ଆୟୋଗଙ୍କ କାର୍ଯ୍ୟାଳୟର ବରିଷ୍ଠ ଅଧିକାରୀ। ରାଜ୍ୟର ସମସ୍ତ ଜିଲ୍ଲାପାଳଙ୍କ ସହ ନିର୍ବାଚନକୁ ନେଇ ଆଲୋଚନା କରିବା କାର୍ଯ୍ୟକ୍ରମ ରହିଛି ।
ସିଇଓ ଆଗୁଆ ନିର୍ବାଚନ ଚର୍ଚ୍ଚାକୁ ଟାଳି ଦେଉଥିବା ବେଳେ ସେପ୍ଟେମ୍ବରରେ ନିର୍ବାଚନ ଆୟୋଗଙ୍କ କାର୍ଯ୍ୟାଳୟର ବରିଷ୍ଠ ଅଧିକାରୀଙ୍କ ଓଡ଼ିଶା ଗସ୍ତକୁ ଭିନ୍ନ ଦୃଷ୍ଟିରେ ଦେଖିଛନ୍ତି ରାଜନୈତିକ ବିଶେଷଜ୍ଞ। ଆଗୁଆ ନିର୍ବାଚନ ନେଇ ଏହା ଏକ ବଡ଼ ସଂକେତ ବୋଲି ଚର୍ଚ୍ଚା ହେଉଛି ।
ସେପଟେ ବିଭିନ୍ନ ସମୟରେ ଆଗୁଆ ନିର୍ବାଚନକୁ ନେଇ ତିନି ପ୍ରମୁଖ ରାଜନୈତିକ ଦଳର ନେତାମାନେ ମଧ୍ୟ ବୟାନବାଜି ଜାରି ରଖିଛନ୍ତି। ଡିସେମ୍ବରରେ ହିନ୍ଦୀ ହାର୍ଟଲ୍ୟାଣ୍ଡରେ ବିଧାନସଭା ନିର୍ବାଚନ ହେବାକୁ ଥିବା ବେଳେ ଏହା ସହ ସାଧାରଣ ନିର୍ବାଚନ ମିଶାଇ କରିବାକୁ କେନ୍ଦ୍ର ଯୋଜନା କରୁଛି ବୋଲି ଚର୍ଚ୍ଚା ହେଉଛି।
ସୀମା ବିବାଦକୁ ନେଇ ଭାରତକୁ ଉସୁକାଉଛି ଚୀନ୍
ନୂଆଦିଲ୍ଲୀ : ସୀମା ବିବାଦକୁ ନେଇ ଭାରତକୁ ଉସୁକାଉଛି ଚୀନ । ସପ୍ତାହେ ପରେ ଭାରତରେ ଜି-୨୦ ସମ୍ମିଳନୀ ହେବାକୁ ଥିବା ବେଳେ ଏହା ପୂର୍ବରୁ ଔଦ୍ଧତ୍ୟ ଦେଖାଇଛି ପଡ଼ୋଶୀ ରାଷ୍ଟ୍ର । ୨୦୨୩ ସଂସ୍କରଣର ମାନଚିତ୍ର ଜାରି କରି ଅରୁଣାଚଳ ଓ ଅକସାଇ ଚୀନକୁ ନିଜର ବୋଲି ଦାବି କରିଛି ଡ୍ରାଗନ । ଚୀନର ସରକାରୀ ଗଣମାଧ୍ୟମ ଗ୍ଲୋବାଲ ଟାଇମ୍ସ ଏହି ମ୍ୟାପ ଜାରି କରିଛି ।
ଯେଉଁଥିରେ କେବଳ ଅରୁଣାଚଳ ପ୍ରଦେଶ ନୁହେଁ ଅକ୍ସାଇ ଚୀନ୍, ତାଇୱାନ ଏବଂ ବିବାଦୀୟ ଦକ୍ଷିଣ ଚୀନ୍ ସାଗର ମଧ୍ୟ ରହିଛି । ଭାରତର ଅରୁଣାଚଳ ପ୍ରଦେଶକୁ ଚୀନ୍ ଦକ୍ଷିଣ ତିବ୍ଦତ ବୋଲି ଦାବି କରୁଛି । ୧୯୬୨ ଯୁଦ୍ଧ ପରେ ଅରୁଣାଚଳ ପ୍ରଦେଶର ସୀମାରେ ଚୀନ ସେନା ମାଡି ଆସିଥିଲା । ସେହି ଅଞ୍ଚଳକୁ ଚୀନ ନିଜର ବୋଲି ଦାବି କରି ଆସୁଛି । ଗତ ୫ ବର୍ଷ ମଧ୍ୟରେ ଚୀନ ତୃତୀୟ ଥର ପାଇଁ ନୂଆ ମାନଚିତ୍ର ଜାରି କରିଛି ।
ଏହା ପୂର୍ବରୁ ୨୦୨୧ରେ ୧୫ଟି ସ୍ଥାନ ଏବଂ ୨୦୧୭ରେ ୬ଟି ସ୍ଥାନର ନାମ ପରିବର୍ତ୍ତନ କରିଥିଲା ଚୀନ । ନିକଟରେ ବ୍ରିକ୍ସ ସମ୍ମିଳନୀରେ ମୋଦି-ଜିନପିଙ୍ଗଙ୍କ ମଧ୍ୟରେ ଭେଟଘାଟ ହୋଇଥିଲା । ଏହି ସମୟରେ ଦୁଇ ନେତାଙ୍କ ମଧ୍ୟରେ ସୀମା ସୁରକ୍ଷା ନେଇ ଆଲୋଚନା ହୋଇଥିଲା । କିନ୍ତୁ ଭେଟଘାଟର କିଛି ଦିନ ପରେ ଚୀନ ପୁଣି ଥରେ ନୂଆ ବିବାଦ ସୃଷ୍ଟି କରିଛି । ଆସନ୍ତା ସପ୍ତାହରେ ଭାରତରେ ଜି-୨୦ ସମ୍ମିଳନୀ ହେବାକୁ ଯାଉଛି । ଚୀନ ରାଷ୍ଟ୍ରପତି ସି ଜିନପିଙ୍ଗ ସମ୍ମିଳନୀରେ ଯୋଗଦେବା କାର୍ଯ୍ୟକ୍ରମ ରହିଛି । ଜି-୨୦ ସମ୍ମିଳନୀ ପୂର୍ବରୁ ଚୀନର ଏହି ହରକତକୁ ନିନ୍ଦା କରିଛି କଂଗ୍ରେସ ।
ବଲାଙ୍ଗୀର ସିନ୍ଧେକେଲାରେ ଡାଇରିଆ ଆତଙ୍କ, ଭୁବନେଶ୍ବରରୁ ଗଲେ ସ୍ବତନ୍ତ୍ର ଡାକ୍ତରୀ ଟିମ୍
ବଲାଙ୍ଗୀର : ବଲାଙ୍ଗୀର ଜିଲ୍ଲା ସିନ୍ଧେକେଲାରେ ଡାଇରିଆ ଆତଙ୍କ ପରେ ଭୁବନେଶ୍ବରରୁ ଗଲେ ସ୍ବତନ୍ତ୍ର ଡାକ୍ତରୀ ଟିମ୍ । ଭୁବନେଶ୍ବରରୁ ୨ଜଣିଆ ଡାକ୍ତରୀ ଦଳ ଓ ବଲାଙ୍ଗୀରର ୩ଜଣିଆ ଡାକ୍ତରୀ ଟିମ୍ ସିନ୍ଧେକେଲାରେ ପହଞ୍ଚିଛନ୍ତି । ଗାଁରେ ଅନୁଧ୍ୟାନ ସହ ଚିକିତ୍ସା ଆରମ୍ଭ ହୋଇଛି ।
ସିନ୍ଧେକେଲାରେ ଝାଡ଼ାବାନ୍ତିରେ ୨ଜଣଙ୍କ ମୃତ୍ୟୁ ହୋଇଥିବା ବେଳେ ୬୩ ଜଣ ଆକ୍ରାନ୍ତ ହୋଇଛନ୍ତି । ୧୨ ଜଣ ଡାକ୍ତରଖାନାରେ ଭର୍ତ୍ତି ହୋଇଥିବା ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି । ୧୦ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ଝାଡ଼ାବାନ୍ତିର କାରଣ ଜାଣିବା ପାଇଁ ନିକଟସ୍ଥ ବିଭିନ୍ନ ଉତ୍ସରୁ ପାଣି ପରୀକ୍ଷା କରାଯାଉଛି । ନଦୀପାଣିରୁ ସଂକ୍ରମଣ ହୋଇଥିବା କରାଯାଉଛି ଆଶଙ୍କା । ପାଣି ବିଶୋଧନ କରାଯାଉଛି । ଅଞ୍ଚଳରେ ୨ଟି ମୋବାଇଲ ଡାକ୍ତରୀ ଟିମ୍ ନିୟୋଜନ ଥିବା ଜନସ୍ବାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର ସୂଚନା ଦେଇଛନ୍ତି ।
ସୁପ୍ରିମକୋର୍ଟଙ୍କ ମନ୍ତବ୍ୟ : ନାଗରିକଙ୍କ ମୌଳିକ ଅଧିକାର କ୍ଷୁର୍ଣ୍ଣ କରୁଥିଲା ୩୫A
ନୂଆଦିଲ୍ଲୀ : ଧାରା ୩୭୦ର ଅନୁଛେଦ ୩୫ଏ ଅଧିନରେ ଜମ୍ମୁ-କାଶ୍ମୀର ନାଗରିକଙ୍କୁ ବିଶେଷ ଅଧିକାର ମିଳିଥିଲା । କିନ୍ତୁ ଏହି ଧାରା କାରଣରୁ ଦେଶର ବାକି ନାଗରିକ ତିନି ମୌଳିକ ଅଧିକାରରୁ ବଂଚିତ ହୋଇଥିଲେ । ଏହି ଅନୁଛେଦ କାରଣରୁ ଅନ୍ୟ ରାଜ୍ୟର ଲୋକ କାଶ୍ମୀରରେ ଚାକିରି,ଜମି କିଣିବା ଓ ରହିବାର ଅଧିକାରରୁ ବଂଚିତ ହୋଇଥିଲେ । ଏଭଳି ଟିପ୍ପଣୀ କରିଛନ୍ତି ସୁପ୍ରିମକୋର୍ଟର ପ୍ରଧାନ ବିଚାରପତି ଡି.ୱାଇ ଚନ୍ଦ୍ରଚୁଡ଼ ।
ଧାରା ୩୭୦ ଉଚ୍ଛେଦକୁ ନେଇ କେନ୍ଦ୍ର ସରକାର ନେଇଥିବା ନିଷ୍ପତି ଉପରେ ଆଜି ଖୁସି ହୋଇଥିବେ । କାରଣ ଏକ ଡଜନରୁ ଅଧିକ ଆବେଦନ ଉପରେ ଶୁଣାଣି କରି ପ୍ରଧାନ ବିଚାରପତି ଉପରୋକ୍ତ ମନ୍ତବ୍ଯ ଦେଇଛନ୍ତି । ଯାହା ଧାରା ୩୭୦ ଉଛେଦର ଆବଶ୍ଯକତା ଓ ଗୁରୁତ୍ୱ କଥା କହୁଛି । ୨୮ ଅଗଷ୍ଟରେ ପ୍ରଧାନ ବିଚାରପତି D.Y ଚନ୍ଦ୍ରଚୁଡ଼ ଶୁଣାଣି କାଳରେ କହିଥିଲେ ଯେ, ସମ୍ବିଧାନର ଅନୁଛେଦ ୩୫ଏ ଜମ୍ମୁକାଶ୍ମୀର ବାସିନ୍ଦାଙ୍କୁ କିଛି ମୁଖ୍ଯ ସାମ୍ବିଧାନିକ ଅଧିକାର ଦେଇଥିଲା । କିନ୍ତୁ ଏହି ଅନୁଛେଦ ମଧ୍ଯ ଅନ୍ଯ ରାଜ୍ଯରୁ ଆସି ସେଠାରେ ରହୁଥିବା ଲୋକଙ୍କୁ କିଛି ଅଧିକାରରୁ ବଞ୍ଚିତ କରିଥିଲା । ସେ କହିଥିଲେ ଯେ, ସମାନ ଅବସର,ରାଜ୍ଯ ସରକାରରେ ଚାକିରି ଓ ଜମି କିଣିବା ଭଳି ଅଧିକାରରୁ ଏହି ଅନୁଛେଦ ବଞ୍ଚିତ କରୁଥିଲା,କାରଣ(ଜମ୍ମୁ-କାଶ୍ମୀର) ନିବାସୀଙ୍କ ପାଖରେ ଏହି ବିଶେଷ ଅଧିକାର ଅଥିଲା ଓ ଅଣ-କାଶ୍ମୀରୀଙ୍କୁ ଏଥିରୁ ବାହାରେ ରଖା ଯାଇଥିଲା । ଭାରତୀୟ ସମ୍ବିଧାନ ଜମ୍ମୁ-କାଶ୍ମୀରର ରାଜ୍ଯ ସମ୍ବିଧାନଠାରୁ ଅଧିକ ମହତ୍ୱ ରଖେ ବୋଲି ଭାରତ ସରକାରଙ୍କ ମତ ସହିତ ପ୍ରଧାନ ବିଚାରପତି ସହମତ ହୋଇଥିଲେ ।
ସୁପ୍ରିମ କୋର୍ଟ ଏହା ମାନିଛନ୍ତି ଯେ, ଜାମ୍ମୁ-କାଶ୍ମୀର ନାଗରିକଙ୍କୁ ଧାରା ୩୭୦ର ଅନୁଛେଦ ୩୫ ଏ ଅଧିନରେ ବିଶେଷ ଅଧିକାର ମିଳିଥିଲା । ଯେଉଁଥିପାଇଁ ଦେଶର ବାକି ନାଗରିକ ମୁଳ ଅଧିକାରରୁ ବଂଚିତ ଥିଲେ । ୩୫ ଏ’ ନାଗରିକଙ୍କ ମୂଳ ଅଧିକାର ଛଡାଇ ନେଇଥିଲା ।
ସରକାରଙ୍କ ପକ୍ଷ
ସର୍ବୋଚ୍ଚ ଅଦାଲତରେ ସରକାରଙ୍କ ପକ୍ଷ ଥିଲା ଯେ, ଧାରା ୩୭୦ ଉଛେଦ ନହେବ ପର୍ଯ୍ଯନ୍ତ କାଶ୍ମୀର ନାଗରିକଙ୍କୁ ସରକାରଙ୍କ ଜନକଲ୍ଯାଣ କାର୍ଯ୍ୟକ୍ରମର ଲାଭ ମିଳୁନଥିଲା । କେନ୍ଦ୍ରର ଅନେକ ଆଇନ ଧାରା ୩୭୦ ପାଇଁ କାଶ୍ମୀରରେ ଲାଗୁ ହୋଇ ପାରୁନଥିଲା । ଉଦାହରଣ ଭାବେ କେନ୍ଦ୍ର ସରକାରଙ୍କ ଓକିଲ ଶିକ୍ଷା ଅଧିକାର ପ୍ରସଙ୍ଗ ଉଠାଇଥିଲେ । ସମ୍ବିଧାନରେ ଶିକ୍ଷା ଅଧିକାର ଯୋଡ଼ା ଯାଇଥିବା ବେଳେ ଧାରା ୩୭୦ କାରଣରୁ କାଶ୍ମୀରେର ଏହା ଲାଗୁ ହୋଇ ପାରୁନଥିଲା ।
ପୁଲୱାମା ଆକ୍ରମଣ ପରେ ଧାରା ଉଛେଦ ପାଇଁ ଚିନ୍ତା
୨୦୧୯ ଫେବ୍ରୁଆରି ମାସରେ ହୋଇଥିବା ପୁଲୱାମା ଆକ୍ରମଣ ପରେ କେନ୍ଦ୍ର ସରକାର ସମ୍ବିଧାନର ଧାରା ୩୭୦ ଉଛେଦ ପାଇଁ ବିଚାର କରିଥିଲେ ବୋଲି ସରକାରଙ୍କ ଓକିଲ ତୁଷାର ମେହେଟା ସର୍ବୋଚ୍ଚ ଅଦାଲତଙ୍କୁ କହିଥିଲେ । ସୁଚନାଯୋଗ୍ଯ ଯେ, ସେହି ଆକ୍ରମଣରେ ସିଆରପିଏଫର ୪୦ ଜଣ ଯବାନ ପ୍ରାଣ ହରାଇଥିଲେ । ଏହି ଆକ୍ରମଣର ଗମ୍ଭୀରତକୁ ଦେଖି ସରକାର ଧାରା ୩୭୦ ଉଛେଦ କରି ଜମ୍ମୁ-କାଶ୍ମୀରକୁ ଦେଶର ମୁଖ୍ଯଧାରାରେ ସାମିଲ କରିବାକୁ ଚିନ୍ତା କରିଥିଲେ ବୋଲି ସେ ଅଦାଲତରେ କହିଥିଲେ ।
ଯାଜପୁର ଗସ୍ତରେ 5T ସଚିବ , ସରକାରୀ ଯୋଜନା ସମ୍ପର୍କରେ କଲେ ସଚେତନ
ଯାଜପୁର : ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା 5T ସଚିବ ଭି.କେ ପାଣ୍ଡିଆନ ଆଜିଠାରୁ ୩ ଦିନିଆ ଯାଜପୁର ଜିଲ୍ଲା ଗସ୍ତରେ ଯାଇଛନ୍ତି । ଆଜି ଗସ୍ତର ପ୍ରଥମ ଦିନରେ ଫାଇଭ-ଟି ସଚିବ କୋରାଇ ନିର୍ବାଚନମଣ୍ଡଳୀର ଚାନ୍ଦମା ଖେଳ ପଡ଼ିଆରେ ଆୟୋଜିତ ମିଶନ ଶକ୍ତି ସଭାରେ ଯୋଗଦେଇଥିଲେ । ଶଙ୍ଖ ହୁଳହୁଳି ସହ ପୁଷ୍ପ ବର୍ଷା କରି ସ୍ବାଗତ କରିଥିଲେ ମହିଳା । ରାକ୍ଷୀ ବାନ୍ଧିଥିଲେ ମିଶନ ଶକ୍ତି ମାଆ । 5T ସଚିବ ମିଶନ ଶକ୍ତି ମହିଳାଙ୍କ ସମସ୍ୟା ଶୁଣିବା ସହ ଅଭିଯୋଗପତ୍ର ଗ୍ରହଣ କରିଥିଲେ । ରାଜ୍ୟ ସରକାରଙ୍କ ବିଭିନ୍ନ ଯୋଜନା ଓ ସୁବିଧା ସୁଯୋଗ ସମ୍ପର୍କରେ ମିଶନ ଶକ୍ତି ମା’ମାନଙ୍କୁ ସଚେତନ କରାଇଛନ୍ତି ଫାଇଭ-ଟି ସଚିବ ଭି.କେ ପାଣ୍ଡିଆନ ।
ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ମିଶନ ଶକ୍ତି ବ୍ଲକ ଫେଡେରେସନଗୁଡ଼ିକୁ ଖୁବଶୀଘ୍ର ଗାଡ଼ି ଯୋଗାଇ ଦିଆଯିବ । ଯାଜପୁର ଜିଲ୍ଲାରେ ମିଶନ ଶକ୍ତି ମାଆମାନଙ୍କୁ ୫୪୦ କୋଟି ଟଙ୍କାର ଋଣ ଯୋଗାଇ ଦିଆଯାଇଛି । କେବଳ ୨୦୨୦-୨୧ ବର୍ଷରେ ଯୋଗାଇ ଦିଆଯାଇଛି ୧୮୦ କୋଟି ଟଙ୍କା ଋଣ । ସ୍କୁଟି ପାଇଁ ୧୭୦୦ ଆବେଦନ ପତ୍ର ଆସିଛି । ସବୁ ସରକାରୀ ଅଧିକାରୀଙ୍କ ଗାଡି ଅଛି । ଏଥିପାଇଁ ମିଶନଶକ୍ତି ବ୍ଳକ ଫେଡେରେସନଙ୍କୁ ସ୍କଟି ଦେବାପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଆପଣ ଦୌଡିଲେ ଅଧିକ ବ୍ୟବସାୟ ହେବ ବୋଲି କହିଛନ୍ତି 5T ସଚିବ । ଲାଭ ଭଲ ହେଲେ ପିଲାମାନେ ଭଲରେ ରହିବେ । ପିଲାର ଉନ୍ନତି ହେଲେ ଓଡ଼ିଶାର ଉନ୍ନତି ହେବ ବୋଲି କହିଛନ୍ତି 5T ସଚିବ । ମୁଖ୍ୟମନ୍ତ୍ରୀ ୩ଟି ନୂଆ ନିଷ୍ପତ୍ତି ନେଇଛନ୍ତି । ଏମବିକେ ଓ ସିଆରପିଙ୍କ ଦରମା ବଢିବ । ୧୦୦ ପ୍ରତିଶତ ଦରମା ସରକାର ବହନ କରିବେ ।
ମହିଳାଙ୍କ ପାଇଁ ୧୮୦ ଦିନ ପାଇଁ ମାତୃତ୍ବକାଳୀନ ଛୁଟି ମୁଖ୍ୟମନ୍ତ୍ରୀ ମଞ୍ଜୁର କରିଛନ୍ତି । ୬ ମାସ କାମ ନକରି ଦରମା ପାଇବେ । ସେହିପରି ପରିଚୟ ପାଇଁ ସମସ୍ତ ଙ୍କୁ ସ୍ମାର୍ଟ ଆଇଡି କାର୍ଡ ଦିଆଯିବ । ଦେଶରେ ଓଡିଶା ପ୍ରଥମ ରାଜ୍ୟ ଭାବେ ଏଭଳି ସୁବିଧା ଦେଉଛନ୍ତି । କାର୍ଯ୍ୟକ୍ରମରେ ଯାଜପୁର ଜିଲ୍ଲାର ବିଭିନ୍ନ ବ୍ଲକରୁ ଆସିଥିବା ୧୫ ହଜାରରୁ ଉର୍ଦ୍ଧ୍ବ ମିଶନ ଶକ୍ତିର ମହିଳାମାନେ ସାମିଲ ହୋଇଥିଲେ। ଫାଇଭ-ଟି ସଚିବଙ୍କ ଗସ୍ତ ନେଇ ଲୋକମାନଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି ।

