ଲକ୍ଷ୍ନୌ : କୃଷ୍ଣ ପ୍ରେମରେ ମୁସଲମାନ ମହିଳା । କୁହାଯାଏ ପ୍ରଭୁ ଶ୍ରୀକୃଷ୍ଣଙ୍କ ପ୍ରେମରେ ଯିଏ ପଡିଛି ସେ ସବୁକିଛି ଭୁଲିଯାଇଛି । କୃଷ୍ଣଙ୍କ ଜନ୍ମସ୍ଥାନ ମଥୁରା ଓ ଲୀଳା କ୍ଷେତ୍ର ବୃନ୍ଦାବନ ସମଗ୍ର ବିଶ୍ୱରେ ଭକ୍ତି ଏବଂ ପ୍ରେମର ତୀର୍ଥସ୍ଥାନ ପାଲଟିଛି । ସେଥିପାଇଁ ଏହି ସହରରେ ଦେଶ ବିଦେଶର ବିଭିନ୍ନ ଧର୍ମର ଭକ୍ତଙ୍କୁ ଦେଖିବାକୁ ମିଳେ । କାହ୍ନା ପ୍ରେମରେ ପଡ଼ି ଘରଦ୍ବାର ଛାଡ଼ି ଲୀଲାକ୍ଷେତ୍ର ବୃନ୍ଦାବନରେ ପହଞ୍ଚିଛନ୍ତି ଉତ୍ତର ପ୍ରଦେଶ ମୁରାଦାବାଦର ଶବନମ । କୃଷ୍ଣ ପ୍ରେମରେ ପଡ଼ିବା ପରେ ଧର୍ମ ଭୁଲି ପରିବାର ଛାଡ଼ି ବୃନ୍ଦାବନବାସୀ ପାଲଟିଛନ୍ତି ଶବନମ ।
ଶବନମ୍ ଉତ୍ତରପ୍ରଦେଶର ମୋରାଡାବାଦର ଜିଗର କଲୋନୀ ନିବାସୀ । ଶବନମ ପିଲାଦିନୁ ହିନ୍ଦୁ ଦେବୀଦେବତାଙ୍କୁ ପୂଜା କରୁଥିଲେ । ୨୦୦୦ ମସିହାରେ, ଶବନମ୍ ଦିଲ୍ଲୀର ଶାହଦରାରେ ବିବାହ କରିଥିଲେ । ମାତ୍ର ବିବାହର ୫ ବର୍ଷ ପରେ ଶବନମଙ୍କର ଛାଡପତ୍ର ହୋଇଥିଲା । ବିବାହ ପରେ ଅନେକ କଠିନ ପରିସ୍ଥିତି ଦେଇ ଗତି କରିଥିଲେ । ହେଲେ ଗତ ୪ ମାସ ହେବ ସେ ବୃନ୍ଦାବନରେ ପହଞ୍ଚିଛନ୍ତି । ଗୋବର୍ଦ୍ଧନ ପରିକ୍ରମା ମାର୍ଗ ସ୍ଥିତ ଗୋପାଳ ଆଶ୍ରମ ଏବେ ଶବନମଙ୍କ ନୂଆ ଠିକଣା ପାଲଟିଛି । ବାକି ଜୀବନ ବୃନ୍ଦାବନରେ ରହି କାଟିବାକୁ ଯୋଜନା କରିଛନ୍ତି ବୋଲି ଶବନମ କହିଛନ୍ତି ।
