ଭୁବନେଶ୍ୱର: ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀଙ୍କୁ ବରିଷ୍ଠ ରାଜନେତା ଦାମୋଦର ରାଉତଙ୍କ କାଉଣ୍ଟର ଆଟାକ। ମୁଖ୍ୟମନ୍ତ୍ରୀଙ୍କ ୩ଟି ବିକାଶମୂଳକ କାମ ଐତିହ୍ୟ ପରିକ୍ରମା ପ୍ରକଳ୍ପ, ବିଜୁ ସେତୁ ଯୋଜନା ଏବଂ ସ୍କୁଲ ରୂପାନ୍ତରିତ କାମକୁ 5T ସଚିବ ତଦାରଖ କରୁଛନ୍ତି। ସେ କେବଳ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରୁଛନ୍ତି। ସେ କେଉଁଠି ଭିତ୍ତିପ୍ରସ୍ତର ସ୍ଥାପନ କିମ୍ବା ନଡ଼ିଆ ବାଡେଇ ଶୁଭ ଦେଉନାହାନ୍ତି। ସେ କେବଳ ମୁଖ୍ୟମନ୍ତ୍ରୀଙ୍କ କାମକୁ ତଦାରଖ କରୁଛନ୍ତି। ଏହା ଦ୍ବାରା ଲୋକ ପ୍ରତିନିଧି, ସରକାରୀ ଅଧିକାରୀ, ସାଧାରଣ ଲୋକେ ସଚେତନ ହେଉଛନ୍ତି। ଫଳରେ ଲୋକପ୍ରିୟତା ବୃଦ୍ଧି ପାଉଛି।

ଅପରାଜିତା ନିଜେ ବିଏମସି କମିଶନର ଥିବା ବେଳେ ମେୟରଙ୍କୁ ଅଣଦେଖା କରି କୋଟି କୋଟି ଟଙ୍କା ଖର୍ଚ୍ଚ କରି ନିଜ ସପକ୍ଷରେ ପ୍ରଚାର ପ୍ରସାର କରୁଥିଲେ। ପରେ ଚାକିରୀ ଛାତି ଆସି ସାଂସଦ ହୋଇଛନ୍ତି। ଆସନ୍ତା ୨୦୨୪ ରେ ଅପରାଜିତା କେତେ ଲୋକପ୍ରିୟ ତାହା ଲୋକେ ଠିକଣା ଜବାବ ଦେବେ। ନବୀନ ପଟ୍ଟନାୟକଙ୍କ ମୁଖ୍ୟ କାମ ଐତିହ୍ୟ ସ୍ଥଳ ବିକାଶ କରିବା। ଅପରାଜିତା ଅମଲାତାନ୍ତ୍ରିକ ମନୋଭାବ ରଖି ଯେଉଁ ଅଭିଯୋଗ କରିଛନ୍ତି ତାର ସତ୍ୟତା ନାହିଁ। ବିଜେପି ତଥା ଅପରାଜିତା ଷଡ଼ଙ୍ଗୀ ଯଦି ଓଡିଶା ସ୍ବାର୍ଥ ପାଇଁ ସ୍ବର ଉଠାନ୍ତେ ତାହେଲେ ଆମେ ସାବାସି ଦିଅନ୍ତେ।

ଆନ୍ଧ୍ର ସରକାର ଓଡିଶା ବିରୋଧରେ ଯାଇ ପୋଲାଭରମ୍ ପ୍ରକଳ୍ପ କଲେ। ଯାହା ଦ୍ବାରା ଓଡ଼ିଶାର ୧୦ ହଜାର ଆଦିମ ଆଦିବାସୀଙ୍କର ଜୀବନ ଜୀବିକା ବିପନ୍ନ ହୋଇଛି। କିନ୍ତୁ କେନ୍ଦ୍ର ସରକାର ଏହାକୁ ଜାତୀୟ ପ୍ରକଳ୍ପ ଘୋଷଣା କରି ପର୍ଯ୍ୟାପ୍ତ ଅର୍ଥ ପ୍ରଦାନ କରିଛନ୍ତି। କାହିଁକି ଅପରାଜିତା ମୁହଁ ଖୋଲୁନାହାନ୍ତି। ଛତିଶଗଡ ସରକାର ଓଡ଼ିଶାର ଗଙ୍ଗା ମହାନଦୀକୁ ଶୁଖେଇ ସାରିଲେଣି। କହିଁକି ଅପରାଜିତା ତା ବିରୋଧରେ ମୁହଁ ଖୋଲିନାହାନ୍ତି। କିନ୍ତୁ ଓଡିଶା ସରକାର ଯେଉଁ ଭଲ କାର୍ଯ୍ୟ କରୁଛନ୍ତି ତା ବିରୋଧରେ ଅପପ୍ରଚାର କରି ଲୋକଙ୍କୁ ବିଭ୍ରାନ୍ତି କରିବା ପାଇଁ ସାଂସଦ ଯେଉଁ ପ୍ରୟାସ କରିଛନ୍ତି ଲୋକ ତାହାର ଜବାବ ଦେବେ।