କଟକ: ଭାସିଗଲା ଅସ୍ଥାୟୀ ରାସ୍ତା । ବାବା ଧବଳେଶ୍ବରଙ୍କ ପୀଠଙ୍କୁ ଯୋଗାଯୋଗ ବନ୍ଦ । ଝୁଲାପୋଲରେ ଯାଇ ବାବା ଧବଳେଶ୍ବରଙ୍କୁ ଦର୍ଶନ କରୁଥିଲେ ଶ୍ରଦ୍ଧାଳୁ । ମାତ୍ର ତାହା ଦୁର୍ବଳ ଥିବା ଜଣାପଡ଼ିବା ପରେ ପ୍ରଶାସନ ଏହାକୁ ବନ୍ଦ ରଖିଛି । ନଦୀ ଭିତରେ ନିର୍ମିତ ଅସ୍ଥାୟୀ ରାସ୍ତାରେ ଯାତାୟତ କରୁଥିଲେ ଶ୍ରଦ୍ଧାଳୁ । ମାତ୍ର ନଦୀରେ ପାଣିଆସିବାରୁ ତାହା ଭାସିଯାଇଛି । ଫଳରେ ବାବାଙ୍କ ଦର୍ଶନ କରିବାକୁ ଯାଇପାରୁନାହାନ୍ତି ଶ୍ରଦ୍ଧାଳୁ । ପୀଠକୁ ଏବେ କଂକ୍ରିଟ ପୋଲର ନିର୍ମାଣ କରାଯାଉଛି ।
ନବରଙ୍ଗପୁର ଜିଲ୍ଲା ଉମରକୋଟ ବାସିନୀଛକରେ ମର୍ମନ୍ତୁଦ ସଡ଼କ ଦୁର୍ଘଟଣା, ୩ ମୃତ
ନବରଙ୍ଗପୁର: ନବରଙ୍ଗପୁର ଜିଲ୍ଲା ଉମରକୋଟ ବାସିନୀଛକରେ ମର୍ମନ୍ତୁଦ ସଡ଼କ ଦୁର୍ଘଟଣା । ଭାରସାମ୍ୟ ହରାଇ ଗଛରେ ପିଟିହେଲା କାର୍ । ଘଟଣାସ୍ଥଳରେ ତିନି ଜଣଙ୍କର ମୃତ୍ୟୁ ହୋଇଥିବାବେଳେ ଜଣେ ଗୁରୁତର ହୋଇଛନ୍ତି । ବିଳମ୍ବିତ ରାତି ପ୍ରାୟ ସାଢେ ଦୁଇଟାରେ ଦୁର୍ଘଟଣା ଘଟିଛି । ମୃତକଙ୍କ ହେଲେ ସୁରେଶ ମଣ୍ଡଳ , ଗୌରାଙ୍ଗ ରାୟ ଓ ସତ୍ୟରଞ୍ଜନ ବେପାରୀ । ମୃତକଙ୍କ ଘର ରାଇଘର ଓ ଉମରକୋଟ ଅଞ୍ଚଳରେ । ସମସ୍ତେ ଛତିଶଗଡ଼ ଜଗଦଲପୁରରୁ ମେଡିକାଲ କାମ ସାରି ଉମରକୋଟର ଅଞ୍ଚଳା ଗ୍ରାମକୁ ଫେରୁଥିଲେ । ଗୁରୁତର ତରୁଲତା ବେପାରୀଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ଜଗତସିଂହପୁରରେ 5T ସଚିବଙ୍କ ବିକାଶ କାର୍ଯ୍ୟର ସମୀକ୍ଷା, ହାଇସ୍କୁଲ ସହ ୭୦ଟି ଡିଗ୍ରୀ କଲେଜର ହେବ ରୂପାନ୍ତରଣ
ଜଗତସିଂହପୁର: ଜଗତସିଂହପୁର ଜିଲ୍ଲା ଗସ୍ତରେ 5T ସଚିବ ଭି.କେ. ପାଣ୍ଡିଆନ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ବିଭିନ୍ନ ବିକାଶ କାମର ସମୀକ୍ଷା କରୁଛନ୍ତି । ଏହି ଅବସରରେ ବଡ଼ ଘୋଷଣା ହୋଇଛି । ହାଇସ୍କୁଲ ସହ ୭୦ଟି ଡିଗ୍ରୀ କଲେଜର ରୂପାନ୍ତରଣ ହେବ । SVM କଲେଜ ପଡ଼ିଆରେ ଡିଗ୍ରୀ କଲେଜ ପିଲାଙ୍କ ସହ ଆଲୋଚନା କରିଥିଲେ 5T ସଚିବ ଭି.କେ ପାଣ୍ଡିଆନ୍। ସଂସ୍କୃତ କଲେଜ ଓ ସ୍କୁଲ ଛାତ୍ରଛାତ୍ରୀଙ୍କ ସହ ପାଠପଢ଼ା ବାବଦରେ ଆଲୋଚନା କରିଥିଲେ 5T ସଚିବ । ରୂପାନ୍ତରଣ ପାଇଁ ୩୨ କୋଟି ୫୦ ଲକ୍ଷ ଟଙ୍କା ମଞ୍ଜୁର କରିଛନ୍ତି ମୁଖ୍ୟମନ୍ତ୍ରୀ । ମୃତ୍ତିକା କ୍ଷୟ ରୋକିବାକୁ ଏରସମା ସିଆଳି ସମୁଦ୍ର କୂଳ ପ୍ରକଳ୍ପକୁ ଗୁରୁତ୍ୱ ଦିଆଯାଇଛି ।
ସିଆଳି ସି ବିଚ୍ ସଂରକ୍ଷଣ ପ୍ରକଳ୍ପକୁ ପ୍ରାଥମିକତା ଦିଆଯିବ ସହ ଏଥିପାଇଁ ଖର୍ଚ୍ଚ ହେବ ୪୦ କୋଟି ଟଙ୍କା । ଗସ୍ତ ଅବସରରେ ପାରାଦୀପ ବନ୍ଦର ନିକଟରେ ଥିବା ମିଶନ ଶକ୍ତି କାଫେ ପରିଦର୍ଶନ କରିଥିଲେ । ମିଶନ ଶକ୍ତି ସଦସ୍ୟାଙ୍କ ସହ ଆଲୋଚନା କରିଥିଲେ 5T ସଚିବ । ପାରାଦୀପର ବିଜୁ କନଭେନସନ ସେଣ୍ଟର ପରିଦର୍ଶନ କରିଥିଲେ 5T ସଚିବ । ପାରାଦୀପ ଆଇଟିଆ ପରିଦର୍ଶନ କରିବା ସହ ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ । ପିଲାଙ୍କୁ ଉତ୍ସାହିତ କରିବା ସହ ନିଜ ଦକ୍ଷତାର ବିକାଶ କରିବାକୁ ଅପିଲ କରିଥିଲେ ।
ଆଇଟିଆଇ ପାସ କରିଥିବା ଛାତ୍ରଛାତ୍ରୀଙ୍କ ନିଯୁକ୍ତି ଉପରେ ଗୁରୁତ୍ୱ ଦେଇଛନ୍ତି । ଏହାପରେ କୁଜଙ୍ଗ ଫତେପୁର ଜୀବନଜ୍ୟୋତି ଟେରାକୋଟା ସଦସ୍ୟଙ୍କ ସହ ଆଲୋଚନା କରିଥିଲେ 5T ସଚିବ । ଗଡ଼କୁଜଙ୍ଗ କୁଞ୍ଜବିହାରୀ ମନ୍ଦିରରେ ପୂଜାର୍ଚ୍ଚନା କରିବା ସହ ମନ୍ଦିରର ବିକାଶ ନେଇ ସେବାୟତ ଓ କମିଟି ସଦସ୍ୟଙ୍କ ସହ ଆଲୋଚନା କରିଥିଲେ । ସେହିପରି କୁଞ୍ଜବିହାରୀ ମନ୍ଦିରର ବିକାଶ ନେଇ DPR ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛନ୍ତି । ରୂପାନ୍ତରିତ ବି.ବି ହାଇସ୍କୁଲରେ ଛାତ୍ର, ଶିକ୍ଷକଙ୍କ ସହ ଆଲୋଚନା କରିଥିଲେ । ଲକ୍ଷ୍ୟରେ ପହଞ୍ଚିବା ପାଇଁ କଠିନ ପରିଶ୍ରମ କରିବାକୁ ପିଲାଙ୍କୁ ପରାମର୍ଶ ଦେଇଛନ୍ତି 5T ସଚିବ ଭି.କେ ପାଣ୍ଡିଆନ୍ ।
ସୁନାବେଶରେ ଦର୍ଶନ ଦେଉଛନ୍ତି ରଥାରୂଢ଼ ଚତୁର୍ଦ୍ଧାମୂର୍ତ୍ତି, ଦିବ୍ୟ ବେଶ ଦେଖି ଭକ୍ତ ବିଭୋର
ପୁରୀ: ସୁବର୍ଣ୍ଣରେ ସୁସଜ୍ଜିତ ଶ୍ରୀଜିଉ । ଶ୍ରୀଭୁଜ, ଶ୍ରୀପୟର, ହରିଡ଼ା ମାଳି, ବାହାଡ଼ା ମାଳି, ଘାଗଡ଼ା ମାଳି, ଶଙ୍ଖ, ଚକ୍ର, ଗଦା, ପଦ୍ମ, ହଳ ମୂଷଳ, ମୁକୁଟ, ସବୁକିଛି ସୁନା । ସୁନାରେ ଝଟକୁଛନ୍ତି ମହାବାହୁ। ଶ୍ରୀଜିଉଙ୍କ ପବିତ୍ର ସୁନାବେଶ ବା ବଡ଼ତଢ଼ାଉ ବେଶ । ସୁବର୍ଣ୍ଣ ବିଭୂଷିତ ଦାରୁବ୍ରହ୍ମଙ୍କ ଆଭାରେ ଦାଉ ଦାଉ ଦିଶୁଛନ୍ତି ରଥତ୍ରୟ । ରଥ ଉପରେ ଆଜି ଚତୁର୍ଦ୍ଧାମୂର୍ତ୍ତିଙ୍କୁ ସୁନାବେଶ ବା ବଡ଼ତଢ଼ାଉ ବେଶରେ ସଜ୍ଜିତ କରାଯାଇଥିବା ବେଳେ ଶାନ୍ତି ଶୃଙ୍ଖଳା ସହ ସମସ୍ତ ନୀତିକାନ୍ତି ସମ୍ପନ୍ନ ହୋଇଛି । ଦୈନନ୍ଦିନ ନୀତି ଶେଷ ହେବା ପରେ ଠାକୁରଙ୍କୁ ସୁନାବେଶରେ ସଜ୍ଜିତ କରାଯାଇଥିଲା । ବଡ଼ଦାଣ୍ଡରେ, ରଥ ଉପରେ ଠାକୁରଙ୍କ ସୁନାବେଶ ଦେଖି ଭକ୍ତ ସନ୍ତୋଷ ଲାଭ କରିଛନ୍ତି ।
ଆସନ୍ତାକାଲି ଅଧର ପଣା । ଏହି ବେଶରେ ମହାପ୍ରଭୁଙ୍କୁ ଦର୍ଶନ କଲେ ଅଶେଷ ପୁଣ୍ୟ ମିଳିବା ସହ କୋଟି ଜନ୍ମର ପାପ କ୍ଷୟ ହୋଇଥାଏ ବୋଲି ବିଶ୍ବାସ ରହିଛି । ୪ ଥର ରତ୍ନ ସିଂହାସନରେ ସୁନାବେଶ ହେଉଥିବା ବେଳେ ବର୍ଷକରେ ଥରେ ଏହି ଗୋଟିଏ ଦିନ ମହାପ୍ରଭୁ ରଥ ଉପରେ ସୁନାବେଶରେ ଦର୍ଶନ ଦେଇଥାନ୍ତି । ତେଣୁ ଏହାର ମହତ୍ତ୍ବ ଅଧିକ । ଆଜି ମଧ୍ୟାହ୍ନ ଧୂପ ପରେ ଭଣ୍ଡାର ମେକାପଙ୍କ ଦ୍ୱାରା ସୁନା ଅଳଙ୍କାର ଅଣାଯାଇ ଶ୍ରୀବିଗ୍ରହମାନଙ୍କୁ ସଜା ଯାଇଥିଲା । ସେପଟେ ରୁପା ଛାଉଣୀ ପରେ ଝଲସୁଛି ସିଂହଦ୍ବାର । ଶ୍ରୀଜିଉଙ୍କ ସୁନାବେଶ ସାଙ୍ଗକୁ ଆହୁରି ପରିବେଶର ଶୋଭା ବର୍ଦ୍ଧନ କରିଛି ରୁପା ଛାଉଣୀ କବାଟ । ଏହି ବିଶେଷ ମୁହୂର୍ତ୍ତରେ ନିଜକୁ ସାମିଲ କରି ସମସ୍ତେ ବେଶ୍ ଖୁସି ବ୍ୟକ୍ତ କରିଛନ୍ତି ।
ହିଂସାଗ୍ରସ୍ତ ରାଜ୍ୟରେ ରାହୁଲଙ୍କ ଶାନ୍ତି ସନ୍ଦେଶ, ହେଲିକପ୍ଟରରେ ଚୁରଚାନ୍ଦପୁରରେ ପହଞ୍ଚି ପୀଡ଼ିତଙ୍କୁ ଭେଟିଲେ
ଇମ୍ଫାଲ: ରାହୁଲଙ୍କ ଶାନ୍ତି ସନ୍ଦେଶ । ସ୍ବାଗତ କଲା ମଣିପୁର । ପିସ୍ ମିଶନରେ ବାଟ ଓଗାଳିଲା ପୋଲିସ, ପ୍ରଶାସନ । ହିଂସାଗ୍ରସ୍ତ ରାଜ୍ୟରେ ଶାନ୍ତି, ଏକତା, ଭାଇଚାରାର ସନ୍ଦେଶ ନେଇ ପହଞ୍ଚିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ଇମ୍ଫାଲ ଏୟାରପୋର୍ଟରୁ ଚୁରାଚାନ୍ଦପୁର ଯାଉଥିବା ବେଳେ ବିଷ୍ଣୁପୁର ଚେକ ପୋଷ୍ଟରେ ରାହୁଲଙ୍କୁ ଅଟକାଇଥିଲ ପୋଲିସ । ରାସ୍ତାକଡ଼ରେ ଲୋକମାନେ ରାହୁଲଙ୍କ ସ୍ବାଗତ ଉଦ୍ଦେଶ୍ୟରେ ନାରା ଦେଉଥିବା ବେଳେ ପୋଲିସ କିନ୍ତୁ କାରକେଡକୁ ଆଗକୁ ଛାଡ଼ି ନଥିଲା । ତେବେ ଇମ୍ଫାଲ ଫେରି ହେଲିକପ୍ଟର ଯୋଗେ ପୀଡ଼ିତଙ୍କ ପାଖରେ ପହଞ୍ଚିଛନ୍ତି ରାହୁଲ ।
ଦୁଇ ମାସ ଧରି ପୂର୍ବୋତ୍ତର ରାଜ୍ୟ ଜଳୁଥିବା ବେଳେ ଶାନ୍ତି ଫେରାଇ ଆଣିବାରେ ଫେଲ୍ ମାରିଛି କେନ୍ଦ୍ର । ସରକାର ମଣିପୁରକୁ ଜଳିବାକୁ ଛାଡ଼ି ଦେଇଛନ୍ତି ବୋଲି କଂଗ୍ରେସ ଅଭିଯୋଗ କରିଛି । ରାହୁଲ ଭାଇଚାରାର ବର୍ତ୍ତା ଦେବାକୁ ଆସିଥିବା ବେଳେ କେନ୍ଦ୍ର ସରକାରଙ୍କ ନିର୍ଦ୍ଦେଶରେ ପୋଲିସ ଓ ପ୍ରଶାସନ ତାଙ୍କୁ ଅଟକାଇଛି ବୋଲି କଂଗ୍ରେସ କହିଛି । ରାହୁଲଙ୍କୁ ଫେରାଇ ଦିଆଯିବା ପରେ କେନ୍ଦ୍ର ଓ ରାଜ୍ୟର ଡବଲ ଇଞ୍ଜିନ ସରକାର ବିରୋଧରେ ଜୋରଦାର ନାରାବାଜି ହୋଇଛି । ଦୁଇ ମାସ ହେବ ଜଳୁଛି ମଣିପୁର ।
୫୮ ଦିନର ଉଗ୍ର ହିଂସାରେ ଶତାଧିକ ଲୋକ ଜୀବନ ହାରିଲେଣି । ବାସହରା ହୋଇଯାଇଛନ୍ତି ହଜାର ହଜାର ପରିବାର । ପ୍ରାୟ ୩ଶହ ରିଲିଫ କ୍ୟାମ୍ପରେ ୫୦ରୁ ୬୦ହଜାର ବିସ୍ଥାପିତ ଆଶ୍ରୟ ନେଇଛନ୍ତି । ଆଦିବାସୀ ଓ ଅଣ ଆଦିବାସୀଙ୍କ ସଂଘର୍ଷ ଯୋଗୁ ଅଶାନ୍ତ ହୋଇ ପଡ଼ିଥିବା ମଣିପୁରରେ ଶାନ୍ତି ଫେରିବାର ନାଁ ଧରୁନି । ଲୋକମାନେ ଇଣ୍ଟରନେଟ ଠାରୁ ଆରମ୍ଭ କରି ଅନେକ ପ୍ରକାରର ମୌଳିକ ଅଧିକାରରୁ ବଞ୍ଚିତ ହୋଇରହିଛନ୍ତି । ରାହୁଲ ଗାନ୍ଧୀ ମଣିପୁର ଲୋକଙ୍କ ମନରେ ପୁଣିଥରେ ବିଶ୍ବାସ, ଭଲପାଇବା, ଭାଇଚାରା ବାଣ୍ଟିବାକୁ ଆସିଥିବା ବେଳେ ସରକାର ତାଙ୍କୁ ଅଟକାଇବା ନିନ୍ଦନୀୟ ।
ଏବେ ମଣିପୁରରେ ସଂଘର୍ଷ ନୁହେଁ, ଶାନ୍ତିର ଆବଶ୍ୟକତା ରହିଛି ବୋଲି ଟୁଇଟ କରିଛନ୍ତି AICC ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ । ଆଜିଠୁ ଦୁଇ ଦିନିଆ ମଣିପୁର ଗସ୍ତରେ କଂଗ୍ରେସ ନେତା ରାହୁଲ ଗାନ୍ଧୀ । ଘୃଣାର ବଜାରରେ ପ୍ରେମ ଦୋକାନ ଖୋଲିବେ ବୋଲି କହିଛନ୍ତି କଂଗ୍ରେସ ନେତା କହିଛନ୍ତି । ପୀଡ଼ିତଙ୍କୁ ଭେଟିବା ସହ ଶାନ୍ତି ସ୍ଥାପନା ପାଇଁ ଇମ୍ଫାଲ ଓ ଚୁରାଚାନ୍ଦପୁରରେ ସିବିଲ ସୋସାଇଟି ପ୍ରତିନିଧିଙ୍କ ସହ ଆଲୋଚନା କରିବେ ରାହୁଲ ।
ବାହୁଡ଼ାଯାତ୍ରାରେ ଅଘଟଣ ସମ୍ପର୍କରେ ତ୍ରିପୁରା ମୁଖ୍ୟମନ୍ତ୍ରୀଙ୍କ ସହିତ ଟେଲିଫୋନ ଯୋଗେ କଥା ହେଲେ ନବୀନ
ଭୁବନେଶ୍ୱର: ତ୍ରିପୁରାରେ ବାହୁଡ଼ାରେ ଘଟିଥିବା ଅଘଟଣ ସମ୍ପର୍କରେ ତ୍ରିପୁରା ମୁଖ୍ୟମନ୍ତ୍ରୀ ମାଣିକ ସରକାରଙ୍କ ସହିତ ଟେଲିଫୋନରେ କଥା ହୋଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୃତ ବ୍ୟକ୍ତିଙ୍କ ପରିବାରକୁ ସେ ସମବେଦନା ଜଣାଇଛନ୍ତି । ଏଭଳି ଦୁଃଖଦ ସମୟରେ ତ୍ରିପୁରାର ଲୋକଙ୍କ ପାଇଁ ଓଡ଼ିଶାବାସୀ ସହଯୋଗର ହାତ ବଢାଇବେ । ଆହତଙ୍କ ଆଶୁ ଆରୋଗ୍ୟ କାମନା କରିବା ସହ ତ୍ରିପୁରା ସରକାରକୁ ଆବଶ୍ୟକ ସହଯୋଗ ଯୋଗାଇ ଦେବାକୁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି । ଏଥିସହ ସଂସ୍କୃତି ବିଭାଗ ନିର୍ଦ୍ଦେଶକ ଦିଲ୍ଲୀପ ରାଉତରାୟଙ୍କୁ ଘଟଣାସ୍ଥଳକୁ ପଠାଇଛନ୍ତି ମୁଖ୍ୟମନ୍ତ୍ରୀ ।
ମୃତକ କିମ୍ବା ଆହତଙ୍କ ଭିତରେ ଓଡ଼ିଶାରୁ କୌଣସି ବ୍ୟକ୍ତି ଥିବାର ସନ୍ଦେହ କରି ସଂସ୍କୃତି ନିର୍ଦ୍ଦେଶକଙ୍କୁ ତ୍ରିପୁରା ପଠାଯାଇଛି । ଯଦି କୌଣସି ଓଡ଼ିଆ ସେଠାରେ ଥାନ୍ତି, ତେବେ ତାଙ୍କୁ ସମସ୍ତ ପ୍ରକାରର ସହାୟତା ଯୋଗାଯିବ । ଏହାସହ ତ୍ରିପୁରାରେ ମୃତକଙ୍କ ପରିବାରକୁ ସମବେଦନା ଜଣାଇବେ ସଂସ୍କୃତି ନିର୍ଦ୍ଦେଶକ । ଗତକାଲି ତ୍ରିପୁରା ଉନାକୁଟି ଜିଲ୍ଲାର କୁମରଘାଟରେ ଘଟିଥିଲା ଅଭାବନୀୟ ଘଟଣା । ରଥଟାଣୁ ଟାଣୁ ଜିଅନ୍ତା ଜଳିଯାଇଥିଲେ ଶ୍ରଦ୍ଧାଳୁ ।
୩୩ କେଭି ବିଦ୍ୟୁତ ତାର ସଂସ୍ପର୍ଶରେ ଆସିବାଫଳରେ କରେଣ୍ଟ ଲାଗି ଶ୍ରଦ୍ଧାଳୁଙ୍କର ମୃତ୍ୟୁ ହୋଇଥିଲା । ଘଟଣାସ୍ଥଳରେ ୬ଜଣଙ୍କର ମୃତ୍ୟୁ ହୋଇଥିବାବେଳେ ଡାକ୍ତରଖାନାରେ ଅନ୍ୟଜଣଙ୍କର ମୃତ୍ୟୁ ହୋଇଥିଲା । ମୃତକ ହେଲେ ସୀମା ପୌଲ, ସୁସ୍ମିତା ଦାସ, ରୁପକ ଦାସ, ସୁମା ବିଶ୍ବାସ, ରୁହାନ ଦାସ, ଶାନ ମଲକର, ପ୍ରିୟଙ୍କା ଘୋଷ । ମୃତକଙ୍କ ମଧ୍ୟରେ ୩ଜଣ ୯ବର୍ଷର ପିଲା ରହିଥିବା ସୂଚନା ମିଳିଛି । ସେହିପରି ୧୦ ଜଣ ଆହତ ହୋଇ ଚିକିତ୍ସିତ ହେଉଛନ୍ତି ।
ବାହୁଡ଼ା ଯାତ୍ରା ଦୁର୍ଘଟଣାରେ ମୃତକଙ୍କ ପାଇଁ ମୁଖ୍ୟମନ୍ତ୍ରୀଙ୍କ ଶୋକ, ତିନି ଲକ୍ଷ ଟଙ୍କା ଅନୁକମ୍ପା ସହାୟତା ଘୋଷଣା କଲେ
ଭୁବନେଶ୍ବର: ଗତ କାଲି ବାହୁଡା଼ ଯାତ୍ରା ସମୟରେ ଦୁର୍ଘଟଣାରେ ମୃତକଙ୍କ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଭୀର ଶୋକ ପ୍ରକାଶ କରିଛନ୍ତି । ଏଥିସହିତ ମୃତକଙ୍କ ନିକଟତମ ଆତ୍ମୀଙ୍କ ପାଇଁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ତିନି ଲକ୍ଷ ଟଙ୍କା ଅନୁକମ୍ପାମୂଳକ ସହାୟତା ଘୋଷଣା କରିଛନ୍ତି । ଗତକାଲି ରଥଯାତ୍ରା ସମୟରେ କେଉଁଝର ଜିଲ୍ଲା କେନ୍ଦୁଆ ଗ୍ରାମ ଠାରେ ୩ ଜଣ ଓ କୋରାପୁଟ ଜିଲ୍ଲା କୋଲାବ ନଗରଠାରେ ଜଣେ ବ୍ୟକ୍ତି ମୃତ୍ୟୁବରଣ କରିଥିଲେ । ମୁଖ୍ୟମନ୍ତ୍ରୀ ଅନୁକମ୍ପା ଘୋଷଣା କରିବା ସହ ଶୋକ ସନ୍ତପ୍ତ ପରିବାର ବର୍ଗଙ୍କୁ ଗଭୀର ସମବେଦନା ଜଣାଇଛନ୍ତି । ଏହି ଦୁର୍ଘଟଣାରେ ଆହତମାନଙ୍କୁ ମାଗଣାରେ ଉପଯୁକ୍ତ ଚିକିତ୍ସା ଯୋଗାଇ ଦେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେବା ସହିତ ସେମାନଙ୍କର ଆଶୁ ଆରୋଗ୍ୟ କାମନା କରିଛନ୍ତି ।
ରାଜ୍ୟରେ ତାପମାତ୍ରା କମିଲେ ବି ଗୁଳୁଗୁଳି ଅନୁଭୂତ ହେବ, ହାଲୁକାରୁ ମଧ୍ୟମ ଧରଣର ବର୍ଷା ମଧ୍ୟ ହେବ
ଭୁବନେଶ୍ୱର: ରାଜ୍ୟରେ ତାପମାତ୍ରା କମିଲେ ବି ଗୁଳୁଗୁଳି ଅନୁଭୂତ ହେବ । ହାଲୁକାରୁ ମଧ୍ୟମ ଧରଣର ବର୍ଷା ମଧ୍ୟ ହେବ। ଓଡ଼ିଶାରେ ପାଣିପାଗରେ ସେମିତି କିଛି ନିର୍ଦିଷ୍ଟ ପ୍ରଭାବ ନାହିଁ । ଜଳୀୟବାଷ୍ପ ଯଥେଷ୍ଟ ଅଧିକ ରହିଛି, ଯାହା ଫଳରେ ଆଦ୍ରତା ଅଧିକ ରହିଛି । ଭୁବନେଶ୍ୱର ୮୮ ପ୍ରତିଶତ ଆଦ୍ରତା ଆଜି ସକାଳ ୮ଟା ୩୦ ସୁଦ୍ଧା ରେକର୍ଡ କରାଯାଇଛି । ଆସନ୍ତା ୨ ଓ ୩ ତାରିଖ ବେଳକୁ ଦକ୍ଷିଣ ଓ ଉପକୂଳବର୍ତୀ ଓଡ଼ିଶାରେ ବିଜୁଳି ଘଡଘଡି ଜନିତ ବର୍ଷା ସହ, ବର୍ଷାର ପରିମାଣ ବଢିବ। ବାଦଲ ଆକାଶରେ ଛାଇ ହୋଇ ରହିବ ।
ଗତ ୨୪ଘଣ୍ଟାର ରିପୋର୍ଟ ଅନୁସାରେ ୨୮ ଜୁନ ସୁଦ୍ଧା ରାଜ୍ୟରେ ୧୫୬.୧ ମିମି ବର୍ଷା ରେକର୍ଡ ହୋଇଛି । ଯାହାକି ସ୍ୱାଭାବିକ ବର୍ଷା ୧୯୨.୩ ମିମି ତୁଳନାରେ ୧୯ ପ୍ରତିଶତ କମ ଅଛି । ଯାହାକି ସ୍ୱାଭାବିକ ପରିସର ଭୁକ୍ତ। ସର୍ବାଧିକ ଦେବଗଡ଼ରେ ୩୦୭. ୬ ମିମି, ବର୍ଷା ରେକର୍ଡ ହୋଇଛି, ଯାହା ୮୬ପ୍ରତିଶତ ଅଧିକ ରହିଛି । ଝାରସୁଗୁଡା, ଢେଙ୍କାନାଳ, ବରଗଡ଼ ଏସବୁ ଜିଲ୍ଲାରେ ସ୍ୱାଭାବିକ ଠାରୁ ଅଧିକ ବର୍ଷା ରେକର୍ଡ ହୋଇଛି। ମୌସୁମୀ ବିଳମ୍ବରେ ଆସିଥିଲେ ବି ଆଗାମୀ ଦିନର ବର୍ଷା ସ୍ବଭାବିକ ରହିବ। ଗତ ବର୍ଷ ଜୁନ ମାସ ତୁଳନାରେ ଏବର୍ଷ ଅଧିକ ବର୍ଷା ହୋଇଛି ।
ଗତ ବର୍ଷ ୧୩୬.୧ ମିମି ବର୍ଷା ରେକର୍ଡ ହୋଇଥିଲା, ଏଥର ବର୍ତ୍ତମାନ ସୁଧା ୧୫୬.୧ ମିମି ହୋଇଛି। ଚାଷ ପାଇଁ ଯାହା ଅନୁକୂଳ ହୋଇଛି । ପୁରୀରେ ଆଗାମୀ ୨ଦିନ ପର୍ଯ୍ୟନ୍ତ ଗୁଳୁଗୁଳି ରହିବ। ଅଳ୍ପ ତାତି ବଢିଲେ ବି ବର୍ଷା ମଧ୍ୟ ରହିବ । ମୌସୁମୀ ୨୨ତାରିଖକୁ ରାଜ୍ୟରେ ଅଗ୍ରଗତି କରିଥିଲା । ଲଘୁଚାପ କ୍ଷେତ୍ର ସୃଷ୍ଟି ହୋଇଥିଲା। ପଶ୍ଚିମ ଦିଗରେ ଏହା ଅଗ୍ରଗତି ହୋଇଛି । ନିମ୍ନଚାପ ରେଖା ଉତ୍ତର ଆଡ଼କୁ ଅଗ୍ରସର ହୋଇଛି । ତେବେ ଓଡ଼ିଶା ଠାରୁ ଯଥେଷ୍ଟ ଦୂରରେ ଅଛି ।
ହିଂସାଗ୍ରସ୍ତ ମଣିପୁର ଗସ୍ତବେଳେ ରାହୁଲଙ୍କ ଗାଡ଼ିକୁ ଅଟକାଇଲା ପୋଲିସ, ଏବେ ହେଲିକପ୍ଟରରେ ଚୁରାଚାନ୍ଦପୁର ଯାଇ ପୀଡିତଙ୍କୁ ଭେଟିବେ
ଇମ୍ଫାଲ: କଂଗ୍ରେସ ନେତା ରାହୁ ଗାନ୍ଧି ଆଜି ହିଂସାଗ୍ରସ୍ତ ମଣିପୁର ଗସ୍ତ କରିଛନ୍ତି । ସେ ପୀଡିତଙ୍କୁ ଭେଟିବା ପାଇଁ ଚୁରାଚାନ୍ଦପୁର ରିଲିଫ କ୍ୟାମ୍ପ ଯିବାକୁ ଚାହୁଁଥିଲେ, କିନ୍ତୁ ପୋଲିସ ପ୍ରାୟ ୩୪ କିଲୋମିଟର ପୂର୍ବରୁ ବିଷ୍ଣୁପୁରରେ ତାଙ୍କୁ ଅଟକାଇ ଦେଇଥିଲା । ପୋଲିସ ଏହା କହି ଅଟକାଇଥିଲା ଯେ ରାସ୍ତାରେ ହିଂସା ହୋଇପାରେ । ଏହାପରେ ସେ ଇମ୍ଫାଲ ଫେରିଯାଇଥିଲେ । ଏବେ ହେଲିକପ୍ଟର ଜରିଆରେ ଚୁରାଚାନ୍ଦପୁର ଯିବେ । ପୋଲିସ ଅଧିକାରୀ କହିଛନ୍ତି ଯେ ବିଷ୍ଣୁପୁର ଜିଲ୍ଲାରେ ଜାତୀୟ ରାଜପଥରେ ଟାୟାର ଜଳାଯାଇଥିଲା ଏବଂ କନଭୟେ ଉପରେ ପଥର ଫୋପଡ଼ାଯାଇଥିଲା ।
ଏଥିପାଇଁ ସୁରକ୍ଷା ଦୃଷ୍ଟିରୁ ରାହୁଲଙ୍କ ଗାଡ଼ିକୁ ବିଷ୍ଣୁପୁରରେ ଅଟକାଯାଇଥିଲା । ରାହୁଲଙ୍କ ଗାଡ଼ି ଅଟକାଯିବା ପରେ ଏଠାରେ ଏକ ଗୋଷ୍ଠୀ ତାଙ୍କ ସମର୍ଥନରେ ଯେତେବେଳେ କି ଅନ୍ୟ ଗୋଷ୍ଠୀ ତାଙ୍କ ବିରୋଧରେ ବିକ୍ଷୋଭ କରୁଛନ୍ତି । ସେମାନଙ୍କୁ କାବୁ କରିବା ପାଇଁ ପୋଲିସକୁ ଲୁହବୁହା ଗ୍ୟାସ୍ ମାଡ଼ କରିବାକୁ ପଡ଼ିଛି । ଏହାରି ମଧ୍ୟରେ ସେନା କହିଛି ଯେ ଦଙ୍ଗାକାରୀମାନେ ଅସ୍ତ୍ରଶସ୍ତ୍ର ଧରି କାଙ୍ଗପୋକପି ଜିଲ୍ଲାରେ ଗୁଳିମାଡ଼ କରିଛନ୍ତି । ରାହୁଲ ଗାନ୍ଧି ଆଜି ଗସ୍ତ କାଳରେ ମଣିପୁର ରିଲିଫ କ୍ୟାମ୍ପ ଯିବା ସହ ସିଭିଲ ସୋସାଇଟିର ନେତାମାନଙ୍କୁ ଭେଟିବାର କାର୍ଯ୍ୟକ୍ରମ ରହିଛି ।
ସେ ୩୦ ଜୁନ ସୁଦ୍ଧା ମଣିପୁରରେ ରହିବେ । ପ୍ରକାଶଥାଉକି, ମଣିପୁରରେ ୩ ମଇରୁ କୁକୀ ଏବଂ ମେଇତି ଗୋଷ୍ଠୀ ମଧ୍ୟରେ ହିଂସା ଜାରି ରହିଛି । ହିଁସାରେ ଏପର୍ଯନ୍ତ ସୁଦ୍ଧା ୧୩୧ ଜଣଙ୍କ ମୃତ୍ୟୁ ହୋଇ ସାରିଛି । ସେହିପରି ୪୧୯ ଜଣ ଆହତ ହୋଇଛନ୍ତି । ୬୫ ହଜାରରୁ ଅଧିକ ଲୋକ ନିଜ ଘର ଛାଡ଼ିଛନ୍ତି । ୫ ହଜାରରୁ ଅଧିକ ପୋଡ଼ାଜଳା ଘଟଣା ହୋଇଛି । ୬ହଜାର ମାମଲା ରୁଜୁ ହୋଇଛି ଏବଂ ୧୪୪ ଜଣଙ୍କୁ ଗିରଫ କରାଯାଇଛି ।
ସରିଲା ଶ୍ରୀମନ୍ଦିର ସିଂହଦ୍ବାରର ରୂପା ଛାଉଣୀ କାର୍ଯ୍ୟ
ପୁରୀ: ସୁନ୍ଦର ଦିଶୁଛି ଶ୍ରୀମନ୍ଦିର, ଆକର୍ଷଣୀୟ ସିଂହଦ୍ବାର । ଶ୍ରୀମନ୍ଦିର ସିଂହଦ୍ବାରର ରୂପା ଛାଉଣୀ ସରିଛି । ପୂର୍ବ ନିଷ୍ପତ୍ତି ଅନୁସାରେ ମହାପ୍ରଭୁଙ୍କ ନବଦିନାତ୍ମକ ଯାତ୍ରା ସମୟରେ ସିଂହଦ୍ବାର ରୂପାଛାଉଣୀ କରାଯାଇଛି । ମୁମ୍ବାଇରୁ ଆସିଥିବା ୫୦୦ କେଜି ଓଜନର ଦୁଇଟି ଷ୍ଟିଲ୍ ଫ୍ରେମରେ ଦାତା ଦେଇଥିବା ରୂପାରେ ନିର୍ମିତ ଚାଦରକୁ କବାଟରେ ଲଗାଯାଉଛି । ଗତକାଲି ମହାପ୍ରଭୁ ଶ୍ରୀଗୁଣ୍ଡିଚା ମନ୍ଦିରରୁ ବାହୁଡ଼ିଛନ୍ତି । ଆଉ ଦିନକ ପରେ ଶ୍ରୀମନ୍ଦିରକୁ ପ୍ରବେଶ କରିବେ ଶ୍ରୀଜିଉ । ରୂପା ଛାଉଣୀ ପରେ ଅତି ସୁନ୍ଦର ଦିଶୁଛି ରୂପା ସିଂହଦ୍ବାର । ପୂର୍ବରୁ ଶ୍ରୀମନ୍ଦିର ଭିତରେ ୮ଟି ଦ୍ବାରର ରୂପା ଛାଉଣୀ ହୋଇଛି ।