ନନ୍ଦିଘୋଷବ୍ୟୁରୋ: ମହାକାଶରେ ଭାରତର ମାନବ ଅଭିଯାନକୁ ପୁଣି ଝଟକା। ଘୁଞ୍ଚିପାରେ ଇସ୍ରୋର ମହତ୍ତ୍ୱାକାଂକ୍ଷୀ ଗଗନଯାନ ମିସନ୍ର ଉତ୍କ୍ଷେପଣ ତାରିଖ। ପୂର୍ବ ଯୋଜନା ଅନୁସାରେ ଚଳିତ ବର୍ଷ ଡିସେମ୍ବରରେ ହେବାକୁ ଥିବା ପ୍ରଥମ ମାନବବିହୀନ ଉଡ଼ାଣ ଏବେ ୨୦୨୭କୁ ଘୁଞ୍ଚିବା ଆଶଙ୍କା ରହିଛି। ଗଗନଯାନ ମିସନ୍ ଜରିଆରେ ଭାରତ ପ୍ରଥମ ଥର ପାଇଁ ନିଜ ମାଟିରୁ ମଣିଷଙ୍କୁ ମହାକାଶକୁ ପଠାଇବାକୁ ଲକ୍ଷ୍ୟ ରଖିଛି। ଏହି ଐତିହାସିକ ଅଭିଯାନ ପୂର୍ବରୁ ମାନବବିହୀନ ଉଡ଼ାଣ କରାଯିବ। ଏଥିରେ ମଣିଷଙ୍କ ବଦଳରେ ମହାକାଶକୁ ଯିବ ରୋବଟ୍ ‘ବ୍ୟୋମମିତ୍ର’।
ତେବେ ଅଧିକ ପରୀକ୍ଷଣ, ସିମୁଲେସନ୍ ଏବଂ ବୈଷୟିକ ଯାଞ୍ଚ ପାଇଁ ଉତ୍କ୍ଷେପଣରେ ବିଳମ୍ବ ହେଉଥିବା ସୂଚନା ମିଳିଛି। ଏହି କାରଣରୁ ୨୦୨୭ ଫେବ୍ରୁଆରୀ ପୂର୍ବରୁ ପ୍ରଥମ ଉଡ଼ାଣ ହେବାର ସମ୍ଭାବନା କମ୍ ରହିଛି।
ବିଳମ୍ବ ସତ୍ତ୍ୱେ ଗଗନଯାନ ମିସନ୍ର ପ୍ରାୟ ୮୦ ପ୍ରତିଶତ କାମ ଶେଷ ହୋଇଥିବା କୁହାଯାଉଛି। ମାନବବିହୀନ ଉଡ଼ାଣ ପାଇଁ ପ୍ରସ୍ତୁତ କ୍ରୁ ମଡ୍ୟୁଲ୍କୁ ଅନୁମତି ମିଳିସାରିଛି। ଖୁବ୍ଶୀଘ୍ର ଏହାକୁ ଶ୍ରୀହରିକୋଟାସ୍ଥିତ ସତୀଶ ଧାୱନ ମହାକାଶ କେନ୍ଦ୍ରକୁ ନିଆଯାଇ HLVM3 ରକେଟ୍ ସହ ସଂଯୋଗ କରାଯିବ। ୨୦୧୯ ଜାନୁଆରୀରେ ଅନୁମୋଦନ ପାଇଥିବା ଗଗନଯାନ ମିସନ୍ ୨୦୨୧ରେ ଉତ୍କ୍ଷେପଣ ହେବାର ଯୋଜନା ଥିଲା। କିନ୍ତୁ କୋଭିଡ୍ ମହାମାରୀ ଏବଂ ଉପକରଣ ଯୋଗାଣରେ ବାଧା ଯୋଗୁଁ ଏହାର ସମୟସୀମା ଘୁଞ୍ଚିଥିଲା। ପ୍ରଥମେ ୨୦୨୬କୁ ଧାର୍ଯ୍ୟ କରାଯାଇଥିବା ଉତ୍କ୍ଷେପଣ ଏବେ ପୁଣି ବିଳମ୍ବ ହେବାର ଆଶଙ୍କା ରହିଛି।
ତେବେ ଗଗନଯାନ ମିସନ୍ରେ ବିଳମ୍ବ ହେଲେ ମଧ୍ୟ ଇସ୍ରୋର ପ୍ରାଥମିକତା ରହିଛି ସୁରକ୍ଷିତ ଓ ସଫଳ ମାନବ ମହାକାଶ ଅଭିଯାନ। କାରଣ ଏହା କେବଳ ଏକ ମହାକାଶ ଉତ୍କ୍ଷେପଣ ନୁହେଁ, ବରଂ ମହାକାଶ କ୍ଷେତ୍ରରେ ଭାରତର ଏକ ଐତିହାସିକ ମାଇଲଖୁଣ୍ଟ।

